თბილისი. „საერთაშორისო გამჭვირვალობა – საქართველო" ნაძალადევის, სამტრედიისა და ბაღდათის ოლქებში მიმდინარე შუალედურ არჩევნებს ექვსი მობილური ჯგუფის მეშვეობით აკვირდებოდა. „სამივე ოლქში არჩევნებმა საერთო ჯამში მშვიდ გარემოში და ამომრჩეველთა დაბალი აქტივობის ფონზე ჩაიარა. საარჩევნო უბნების გახსნიდან დახურვამდე ორგანიზაციამ მხოლოდ ერთი საჩივარი დაწერა: სამტრედიის მუნიციპალიტეტის სოფელ ხიბლარის მე-20 საარჩევნო უბნის გადასატანი ყუთის მეშვეობით ხმა მისცა ამომრჩეველმა, რომელიც არ იმყოფებოდა არც ძირითად და არც გადასატანი საარჩევნო ყუთის სიაში. სხვა სახის სერიოზული გადაცდომები არ დაგვიფიქსირებია, თუმცა მცირე პროცედურული დარღვევების გამო ჩანაწერთა წიგნში ჩვენმა დამკვირვებლებმა რამდენიმე ათეული შენიშვნა შეიტანეს", ნათქვამია ორგანიზაციის განცხადებაში. სრულად წყარო: transparency.ge

თბილისი. საია საპარლამენტო შუალედური არჩევნების მიმდინარეობას აკვირდება საარჩევნო 3 ოლქში. ორგანიზაციის ინფორმაციით, „კენჭისყრის პროცესი ძირითადად მიმდინარეობდა მშვიდ ვითარებაში, საარჩევნო კოდექსის მასშტაბურ დარღვევებს ადგილი არ ჰქონია", ნათქვამია განცხადებაში. მასში ასევე გამახვილებულია ყურადღება იმ პროცედურულ დარღვევებზე, რომლებიც ორგანიზაციი დამკვირვებლებმა ხმის მიცემის პროცედურის დროს დააფიქსირეს. სრულად წყარო: gyla.ge

კახეთი.„კახეთის სამოქალაქო ლიგის" წარმომადგენლის დაკვირვებით, 2013 წლის 23 აპრილს თელავის სახელმწიფო უნივერსიტეტის სტუდენტური თვითმმართთველობის არჩევნები არ შეესაბამებოდა დემოკრატიული არჩევნების ძირითად საერთაშორისო სტანდარტებს. ამის შესახებ კახეთის სამოქალქო ლიგის ერთ-ერთმა დამფუძნებელმა და თავმჯდომარემ ეთო შიუკაშვილმა განაცხადა. „საარჩევნო ბიულეტენსა და კონვერტს არ გააჩნდა იურიდიული ძალა, საარჩევნო ყუთებში არ იყო ჩაგდებული საკონტროლო ფურცლები, სიები იყო არასრული და არაზუსტი, სათანადოდ არ იყო მოწყობილი საარჩევნო კაბინები. 2013 წლის 23 აპრილს თელავის სახელმწიფო უნივერსიტეტის სტუდენტური თვითმმართთველობის არჩევნები არ შეესაბამებოდა დემოკრატიული არჩევნების ძირითად საერთაშორისო სტანდარტებს", აცხადებს ეთო შიუკაშვილი.

თბილისი. განვითარებისა და დემოკრატიის ცენტრის (CDD)  სადამკვირვებლო მისიის წევრების შეფასებით  შუალედური საპარლამენტო არჩევნები სამივე ოლქში მშვიდ გარემოში წარიმართა. როგორც სოციალურ ქსელში ორგანიზაციის გვერდზეა მითითებული დაფიქსირებული მცირე დარღვევების მიუხედავად მისიის მიერ პროცესი შეფასდა დადებითად. „საარჩევნო მისიის მიერ 27 აპრილის, 20:00 საათისათვის დაფიქსირდა შემდეგი ტიპის პროცედურული დარღვევები: მარკირების სითხის შემოწმებასთან დაკავშრებული პრობლემები, წილისყრის პროცედურის არასწორი თანმიმდევრობით ჩატარება, საარჩევნო უბნის ადრე გახსნა, ჩანაწერთა წიგნში ინფორაციის შეცდომით შეტანის რამოდენიმე ფაქტი, საარჩევნო უბნებზე ბიულეტენებისა და კონვერტების ნაკლებობით მიწოდება და სხვა", აღნიშნულია ორგანიზაციის გვერდზე. სრულად წყარო: ორგანიზაციის გვერდი სოციალურ ქსელში

სამეგრელო.„ინვალიდ მეომართა და დაღუპულ მებრძოლთა მეუღლეთა კავშირის" და „გენდერული თანასწორობის ქსელის" ორგანიზებით, ზუგდიდში, 26 აპრილს, პოლიტიკურ პროცესებში გენდერული თანასწორობს პრობლემებზე ისაუბრეს. გენდერული თანასწორობის ცენტრის ხელმძვანელის მანანა მებუკეს თქმით, პროექტის „გენდერული თანასწორობის" ფარგლებში მიმდინარეობს  კოორდინატორების შერჩევა, რადგან 2014 წლის ადგილობრივი თვითმმართველობის არჩეენებისთვის მომზადნენ ქალი კანდიდატები. მისივე თქმით, პროექტის მიზანია ხელი შეუწყოს გენდერული თანასწორობის პოლიტიკის უზრუნველყოფას და ქალთა მონაწილეობის გაზრდა გადაწყვეტილების მიღების პროცესში. პროექტი ხორციელდება საარჩევნო სისტემების საერთაშორისო ფონდის და ამერიკის შეერთებული შტატების საერთაშორისო განვითარების სააგენტოს ფინანსური მხარდაჭერით.

აჭარა. 19 აპრილს, ბათუმის დემოკრატიული ჩართულობის ცენტრში, „საერთაშორისო გამჭვირვალობა - საქართველომ" პროექტის - „გამჭვირვალე და ანგარიშვალდებული პოლიტიკური ფინანსები საქართველოში" - ფარგლებში მორიგი ანგარიში გამოაქვეყნა. ანგარიშში „პოლიტიკური პარტიების დაფინანსება 2012 წელს" გაანალიზებული იმ ცხრა პოლიტიკური გაერთიანების წლიური ფინანსური დეკლარაციები, რომლებმაც 2012 წლის საპარლამენტო არჩევნებში დამოუკიდებლად ან საარჩევნო ბლოკის ფარგლებეში ხმების 1% მეტი მიიღეს.

თბილისი. საქართველოს იურისტთა ასოციაცია, საერთაშორისო გამჭვირვალობა –საქართველო და სამართლიანი არჩევნები, 13 აპრილს მათ მიერ გავრცელებულ განცხადებაზე ცესკოს პასუხს ეხმაურებიან.  „საარჩევნო ადმინისტრაცია აცხადებს, რომ ცესკო-ს კანონით მინიჭებული აქვს პროცედურების დაზუსტების და არა კანონის მუხლების განმარტების უფლებამოსილება. მსგავს საკითხებზე გამოთქმული კომპეტენტური მოსაზრებები უნდა ეფუძნებოდეს კანონის უზენაესობის პრინციპს და არა პოლიტიკურ მიზანშეწონილობას", ნათქვამია ცესკოს მიერ გავრცელებულ განცხადებაში.  ცესკო საკითხების განსახილველად ორგანიზაციებს 16 აპრილს საჯარო დისკუსიაზე – „სამოქალაქო სექტორის როლი საარჩევნო პროცესში” იწვევს.  „გვსურს აღვნიშნოთ,რომ ჩვენ ყოველთვის მზად ვართ ყველა დაინტერესებულ მხარესთან, მათ შორის ცესკოსთან საარჩევნო საკითხებზე სადისკუსიოდ, თუმცა, მიგვაჩნია, რომ მსჯელობა იმ საკითხის გარშემო უნდა წარიმართოს, რაც აზრთა სხვადასხვაობის საფუძველი გახდა და არა ჩვენი როლის თაობაზე საარჩევნო პროცესებში, რაც ორგანიზაციებისათვის, რომლებიც მრავალი წელია საარჩევნო საკითხებზე ვმუშაობთ,  ცალსახად ნათელია",  ნათქვამია განცხადებაში.  ცესკოს განცხადება   საზოგადოებრივი ორგანიზაციების განცხადება  წყარო: cesko.gov.ge, gyla.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალმა  პროექტის –  „ჩემი ხმა პარლამენტში" – ფარგლებში გამართა შეხვედრები  იმერეთის მხარის ბაღდათის მუნიციპალიტეტის მაჟორიტარი დეპუტატობის კანდიდატებთან. პროექტი ხორციელდება აღმოსავლეთ-დასავლეთის მართვის ინსტიტუტის (EWMI) პროგრამის „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.  წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველო განცხადებას ავრცელებს და საქართველოს პროკურატურას მიმართავს შეისწავლოს ნაძალადევის საოლქო საარჩევნო კომისიის თავმჯდომარის ქმედებები. ინფორმაციაში ნათქვამია, რომ 30 მარტს უწყებათაშორისი კომისიის სხდომაზე ერთიანი ნაციონალური მოძრაობის წარმომადგენელმა საჩივარი წარადგინეს. მასში ნათქვამია, რომ ნაძალადევის საოლქო კომისია, საუბნო საარჩევნო კომისიის არაპარტიული წევრების შესარჩევი კონკურსის მიმდინარეობისას მონაწილეთა დისკრიმინაციას მათი პოლიტიკური შეხედულებების მიხედვით ახდენდა. „ცენტრალურმა საარჩევნო კომისიამ ერთიანი ნაციონალური მოძრაობის ეს საჩივარი არ განიხილა. ჩვენი მოსაზრებით, ცესკო ვალდებული იყო გადაემოწმებინა საჩივარში მოყვანილი სერიოზული ბრალდებები. მივმართავთ საქართველოს პროკურატურას შეისწავლოს ნაძალადევის საოლქო საარჩევნო კომისიის თავმჯდომარის ქმედებებში სისხლის სამართლის დანაშაულის ნიშნების არსებობის საკითხს", ნათქვამია ორგანიზაციის მიერ გამოქვეყნებულ მიმართვაში. სრულად წყარო: transparency.ge

თბილისი.საქართველოს იურისტთა ასოციაციამ, საერთაშორისო გამჭვირვალობა–საქართველომ, სამართლიანმა არჩევნებმა, 27 აპრილის შუალედურ არჩევნებზე საუბნო საარჩევნო კომისიებში მდივნების არჩევის საკითხზე განცხადება გაავრცელეს.  „მიგვაჩნია, რომ ცესკომ  2013 წლის შუალედურ არჩევნებზე მდივნის არჩევის  წესი კანონის არსისა და მისი სულისკვეთების საწინააღმდეგოდ განმარტა. შედეგად კი აღმოჩნდა, რომ საუბნო საარჩევნო კომისიების მენეჯერულ პოზიციებზე კვლავ მმართველი პოლიტიკური ძალის მიერ დანიშნული წარმომადგენლები აღმოჩნდნენ. ვფიქრობთ, კანონის სწორი განმარტების პირობებში, ერთ პოლიტიკურ პარტიას ან ერთ პოლიტიკურ ძალას არ უნდა მისცემოდა იმის შესაძლობლობა, რომ საუბნო საარჩევნო კომისიის მენეჯერულ პოზიციებზე დომინირებული მდგომარეობა ჰქონოდა", ნათქვამია განცხადებაში. სრულად წყარო: gyla.ge

თბილისი. არასამთავრობო ორგანიზაციები საარჩევნო კოდექსში შესატან ცვლილებებთან დაკავშირებით, 8 აპრილს განცხადებას ავრცელებენ. 25 მარტს საქართველოს პარლამენტის ბიურომ მიიღო გადაწყვეტილება „საქართველოს საარჩევნო კოდექსში" შესატანი ცვლილებების დაჩქარებული წესით განხილვის შესახებ. არასამთავრობო ორგანიზაციები მოუწოდებენ საქართველოს პარლამენტს საქართველოს „საარჩევნო კოდექსში შესატან ცვლილებებთან დაკავშირებით საზოგადოებას ფართო საჯარო დისკუსიის გამართვის შესაძლებლობა მისცეს და არ დაუშვას აღნიშნული ცვლილებების დაჩქარებული წესით მიღება". სრულად წყარო: სამართლიანი არჩევნების გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოებამ და საქართველოს ახალგაზრდა იურისტთა ასოციაციამ საარჩევნო ადმინისტრაციის დაკომპლექტების მონიტორინგის ანგარიში წარმოადგინეს. 2012 წლის საპარლამენტო არჩევნების პერიოდში ორგანიზაციები საუბნო საარჩევნო კომისიების დაკომპლექტების, საარჩევნო ადმინისტრაციის მოხელეთა მიერ ეთიკის კოდექსის შესრულებისა და მათ მიერ კანონმდებლობის დარღვევის შემთხვევებზე შესაბამისი პასუხისმგებლობის დაკისრების მონიტორინგს ერთობლივი პროექტის ფარგლებში ახორციელებდნენ. პროექტის მიზანს წარმოადგენდა საარჩევნო ადმინისტრაციისადმი რეკომენდაციების შემუშავება საარჩევნო კომისიების დაკომპლექტების უკეთესი პრაქტიკის დამკვიდრებისა და მათდამი ნდობის ამაღლებისათვის. სრულად წყარო:ორგანიზაციის გვერდი სოციალურ ქსელში

აჭარა. ასოციაცია „თავისუფალ ჟურნალისტთა სახლმა" ბათუმის შოთა რუსთველის სახელმწიფო უნივერსიტეტში თვითმართველობის არჩევნების შესახებ  დისკუსია გამართა. დისკუსიაზე თვითმართველობის თავმჯდომარის მომავალმა კანდიდატებმა სამოქმედო გეგმაზე ისაუბრეს. ოთხივე კანდიდატი ბათუმის პრესკაფეში მხარდაჭერებთან ერთად შეიკრიბა.  დისკუსიის მსვლელობისას მაყურებელს საშუალება ჰქონდათ პირდაპირი ეთერის დროს დაესვათ კითხვები და ჩართულიყვნენ დისკუსიაში სკაიპის საშუალებით.  წყარო:ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოებამ"  2012 წლის 1 ოქტომბრის საპარლამენტო არჩევნების საბოლოო ანგარიში წარმოადგინა. ანგარიში მოიცავს წინსაარჩევნო პერიოდის, არჩევნების დღისა და არჩევნების შემდგომი პერიოდის მონიტორინგის შედეგებს. „შეგვიძლია განვაცხადოთ, რომ მიუხედავად საკმაოდ პრობლემური წინასაარჩევნო პერიოდისა, არჩევნები შედგა, რაც, უპირველეს ყოვლისა, განპირობებული იყო არჩევნების დღეს მოქალაქეთა მაღალი აქტიურობით და კენჭისყრისა და ხმის დათვლის პროცესის გამჭვრვალობით. საქართველოს მოქალაქეებმა გამოხატეს ნება, რაც შესაბამისად იქნა ასახული არჩევნების შედეგების შემაჯამებელ ოქმში", – ნათქვამია ანგარიშში. წყარო:ორგანიზაციის გვერდი სოციალურ ქსელში

იმერეთი. საქართველოს ახალგაზრდა იურისტთა ასოციაციამ, 5 მარტს, პროექტის –  „იცოდე ვის და რისთვის ირჩევ"  ანგარიშის პრეზენტაცია გამართა. შეხვედრა ქუთაისში, დემოკრატიული ჩართულობის ცენტრში შედგა. პროექტის ფარგლებში,  ახალგაზრდა იურისტთა ასოციაციის წარმომადგენლებმა, საქართველოს ხუთ რეგიონში, მოსახლეობის ინფორმირებულობის, სამართლებრივი ცნობიერების ამაღლებისა და საზოგადოებრივი აქტიურობის გაუმჯობესების მიზნით, 1000-ზე მეტ მოქალაქეს ტრენინგი ჩაუტარეს. საიას მიერ ასევე მოხდა არჩევნების საკითხებთან დაკავშირებით, მასმედიისა  და არასამთავრობო სექტორის წარმომადგენლების გადამზადებაც. პროექტი „იცოდე ვის და რისთვის ირჩევ", აშშ-ს დემოკრატიის განვითარების მცირე საგრანტო პროგრამის ფარგლებში დაფინანსდა.

თბილისი. საქართველოს ახალგაზრდა იურისტთა ასოციაციამ წინასაარჩევნო გარემოს, არჩევნების დღისა და არჩევნების შემდგომი პერიოდის მონიტორინგის ანგარიშის პრეზენტაცია 11 თებერვალს გამართა. ანგარიში მოიცავს 2012 წლის 1 აგვისტოდან 20 ოქტომბრის ჩათვლით განხორციელებული მონიტორინგის შედეგებს (წინასაარჩევნო პროცესების დაკვირვება საიამ გაცილებით ადრე, 2012 წლის 1 იანვრიდან დაიწყო და     წინასაარჩევნო გარემო ორ შუალედურ ანგარიშში შეაფასა).  როგორც უკვე აღვნიშნეთ დღეს წარმოადგენილი ანგარიში მოიცავს 1 აგვისტოდან წინასაარჩევნო კამპანიის, არჩევნების დღესა და არჩევნების შემდგომ პერიოდს. ანგარიშში ყურადღება გამახვილებულია წინასაარჩევნო პერიოდის, არჩევნების დღისა და არჩევნების შემდგომ საჩივრების განხილვისა და შედეგების შეჯამების პროცედურებზე. ანგარიში წყარო: gyla.ge

აჭარა.8 თებერვალს, აჭარის ავტონომიური რესპუბლიკის მთავრობის ადმინისტრაციულ შენობაში, მთავრობის თავმჯდომარე არჩილ ხაბაძე რეგიონში მოქმედ საზოგადოებრივ ორგანიზაციებს შეხვდა. შეხვედრისას განიხილეს აჭარის ავტონომიური რესპუბლიკის უმაღლესი სარჩევნო კომისიის დაკომპლექტებისა და უფლებამოსილების ვადების განსაზღვრის საკითხები.

თბილისი. აჭარის ავტონომიური რესპუბლიკის მთავრობის თავმჯდომარეს არჩილ ხაბაძეს საზოგადოებრივმა ორგანიზაციებმა წერილით მიმართეს. წერილი, რომელსაც ხელს სამი ორგანიზაცია – საია, სამართლიანი არჩევნები და გამჭვირვალობა საქართველო აწერენ, ეხება აჭარის უმაღლესი საბჭოს მიერ მიღებულ საკანონმდებლო ცვლილებას, რომელიც ახლებურად არეგულირებს უმაღლესი საარჩევნო კომისიის დაკომპლექტების წესს. ამ საკითხზე აღნიშნულმა საზოგადოებრივმა ორგანიზაციებმა მანამდეც გაავრცელეს მიმართვა, ისინი მიიჩნევენ, რომ საარჩევნო სისტემის დახვეწა, მათ შორის უსკოს რეფორმაც, ერთიანი საარჩევნო რეფორმის ნაწილი უნდა იყოს. „მოგმართავთ თხოვნით, რომ გამოიყენოთ აჭარის ავტონომიური რესპუბლიკის კონსტიტუციით თქვენთვის მონიჭებული უფლება  და  ხელმოსაწერად გადმოცემული კანონპროექტი მოტივირებული შენიშვნებით გასახილველად უკან დაუბრუნოთ უმაღლეს საბჭოს", – ნათქვამია მიმართვაში.    სრულად წყარო: transparency.ge

თბილისი. არასამთავრობო ორგანიზაციამ  „ახალი თაობა –ახალი ინიციატივა" უკსოს დაკომპლექტების წესის შეცვლასთან დაკავშირებით ღია წერილი გაავრცელა. ორგანიზაციის განცხადებით, 29 იანვარს აჭარის ავტონომიური რესპუბლიკის უზენაესი საბჭოს მიერ მიღებული კანონი არსებითად ცვლის  უსკოს დაკომპლექსტების წესს და უფლებამოსილების ვადას. „კანონი მიღებული იქნა ნაჩქარევად, საარჩევნო ადმინისტრაციის და სხვა დაინტერესებული მხარეების, მათ შორის ავტორიტეტული ადგილობრივი და საერთაშორისო სადამკვირებლო ორგანიზაციების ჩართვის გარეშე", ნათქვამია წერილში. სრულად წყარო: ორგანიზაციის გვერდი სოციალურ ქსელში

აჭარა. 30 იანვარს, „სამართლიანი არჩევნებისა და დემოკრატიის საერთაშორისო საზოგადოებამ", საქართველოს ახალგაზრდა იურისტთა ასოციაციამ და „საერთაშორისო გამჭვირვალობა – საქართველომ" გამართეს ერთობლივი პრესკონფერენცია. იგი უსკოს დაკომპლექტების წესთან დაკავშირებით „აჭარის ავტონომიური რესუბლიკის უმაღლესი საბჭოს არჩევნების შესახებ” აჭარის ა/რ კანონში შესულ ცვილებებს ეხებოდა. ორგანიზაციები საზოგადოებას გააცნეს თავიანთ პოზიცია აჭარის უმაღლესი საბჭოს მიერ 2013 წლის 29 ინავარს მიღებულ საკანონმდებლო ცვლილებასთან დაკავშირებით, რომელიც ახლებურად განსაზღვრავს უსკოს დაკომპლექტების წესს. ორგანიზაციები მიიჩნევენ, რომ უსკოს დაკომპლექტების წესის ამ ფორმით  შეცვლა საარჩევნო რეფორმის გარეშე, კონტექსტიდან ამოგლეჯილად აღიქმება,  როგორც საარჩევნო ადმინისტრაციაზე პოლიტიკური გავლენის მოხდენის მცდელობა. შეგახსენებათ, რომ 2012  წლის 26 დეკემბერს არასამთავრობო ორგანიზაციებმა განცხადებით მიმართა აჭარის ავტონომიური რესპუბლიკის უმაღლეს საბჭოს და მოუწოდეს, რომ უსკოს დაკომპლექტების წესის შეცვლა საარჩევნო რეფორმის ჭრილში, არასამთავრობო სექტორთან სამუშაო ფორმატში  განეხორციელებინა. წყარო: სამართლიანი არჩევნების გვერდი სოციალურ ქსელში

თბილისი. „სამართლიანი არჩევნებისა და დემოკრატიის საერთაშორისო საზოგადოებამ, აჭარის უმაღლესი საბჭოს მიერ უმაღლესი საარჩევნო კომისიის დაკომპლექტების წესის ცვლილებასთან დაკავშირებით განცხადება გაავრცელა. ორგანიზაციის განცხადებაში ნათქვამია, რომ აღნიშნული ცვლილებები ნაჩქარევად იქნა მიღებული და კოორდინაციაში არ არის საარჩევნო რეფორმის მიმდინარეობასთან. ორგანიზაციის შეშფოთებას გამოთქვამს „უსკოს დაკომპლექტების წესის ამ ფორმით შეცვლა საარჩევნო რეფორმის გარეშე, კონტექსტიდან ამოგლეჯილად აღიქმება. როგორც საარჩევნო ადმინისტრაციაზე პოლიტიკური გავლენის მოხდენის მცდელობა". განცხადება წყარო: isfed.ge

თბილისი.აჭარის ავტონომიური რესპუბლიკის უმაღლესი საბჭო განიხილავს კანონპროექტს უმაღლესი საარჩევნო კომისიის დაკომპლექტების წესში ცვლილებების შეტანის თაობაზე. არასამთავრობო ორგანიზაციები მიმარვას ავრცელებენ, სადაც ნათქვამია, რომ საპარლამენტო არჩევნების შემდეგ ისინი კიდევ ერთხელ გამოვიდნენ საარჩევნო კანონმდებლობის რეფორმირების ინიციატივით. რეფორმის ჭრილში საარჩევნო ადმინისტრაციის დაკომპლექტების წესის ცვლილება ერთ–ერთი პრიორიტეტული საკითხია. „აღნიშნული საკითხის საფუძვლიანი ანალიზისა და საარჩევნო ადმინისტაციის სასურველი მოდელის შემუშავების მიზნით უკვე ინტენსიურად დაიწყო მუშაობა საარჩევნო ექსპერტიზის მქონე ადგილობრივმა და საერთაშორისო ორგანიზაციებმა. პროცესში ჩართულია ცენტრალური საარჩევნო კომისია და მუშაობა საქართველოს პარლამენტთან კოორდინირებულად მიმდინარეობს. შესაბამისად, მიგვაჩნია, რომ უსკოს დაკომპლექტების წესის ცვლილებაც აღნიშნული სამუშაო ჯგუფის ფორმატში უნდა განიხილებოდეს. შექმნილი სიტუაციიდან გამოსავალი მხოლოდ საფუძვლიანი და ფუნდამენტური ცვლილებების განხორციელებით არის შესაძლებელი, ამასთანავე, უსკოს რეფორმაც ერთიანი საარჩევნო რეფორმის ნაწილი უნდა იყოს, რადგან საარჩევნო კანონმდებლობით უსკო საქართველოს საარჩევნო ადმინისტრაციის შემადგენელი ნაწილია. გთავაზობთ, შემოგვიერთდეთ და უსკოს დაკომპლექტების წესი არასამთავრობო ორგანიზაციების სამუშაო ჯგუფის ფორმატში განვიხილოთ" – ნათქვამია მიმართვაში. სრულად წყარო: isfed.ge