თბილისი. საერთაშორისო გამჭვირვალობა - საქართველო და სამართლიანი არჩევნები (ISFED) აქვეყნებს ერთობლივ შეფასებებს და რეკომენდაციებს პოლიტიკურ პარტია „ქართულ ოცნებასა“ და „მოქალაქეებს“ შორის გაფორმებული მემორანდუმის საფუძველზე შემუშავებულ საარჩევნო კოდექსში შესატან ცვლილებებთან დაკავშირებით. „ასევე, გამოთქმულია მოსაზრებები საარჩევნო კანონმდებლობისა და პრაქტიკის დახვეწის მიზნით იმ პრობლემათა გადასაჭრელად, რომლებიც მთელი საარჩევნო ციკლის პროცესში უარყოფით გავლენას ახდენდნენ თანასწორ და თავისუფალ საარჩევნო გარემოზე. ყურადღება ეთმობა იმ საკითხებსაც, რომლებსაც შემოთავაზებული საკანონდებლო ცვლილებების პროექტი არ ითვალისწინებს, მაგრამ საკვანძო მნიშვნელობა აქვს ქვეყანაში საარჩევნო გარემოს გაუმჯობესებისა და არჩევნების შედეგების სანდოობის გაზრდის კუთხით“. სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) წარმოგიდგენთ თამაშობანა tamashobana-სთან ერთად შექმნილ სამაგიდო თამაშს „საარჩევნო ასოციაციები“.  „ესაა სამაგიდო თამაში ორ ენაზე (ქართულად და ინგლისურად), სადაც მოთამაშეებს შეუძლიათ ხატვით, პანტომიმით ან მეტყველებით ახსნან ბარათზე დატანილი სიტყვები - არჩევნებთან დაკავშირებული ტერმინები, ცნებები და პროფესიები“. სრულად... წყარო: ორგანიზაციის გვერდი სოციალურ ქსელში

თბილისი. საარჩევნო სისტემების საერთაშორისო ფონდს (IFES) ორგანიზებით, გაიმართება ვებინარი: დეზინფორმაციის გენდერული განზომილებები არჩევნებში, პოლიტიკასა და ციფრული ინფორმაციის სივრცეში. „ტრადიციულად IFES-ის ვებინარი გაიმართება პირდაპირი ტრანსლაციით, ზუმის პლატფორმის გამოყენებით და უზრუნველყოფილი იქნება სინქრონული თარგმანი ინგლისურიდან ალბანურ, სომხურ, ქართულ, მაკედონიურ, რუსულ, სამხრეთ სლავურ და უკრაინულ ენებზე.  2021 წლის 24 თებერვალი, ოთხშაბათი (14-15.30 ევროპის ცენტრალური დრო), თბილისის დროით 17:00 საათზე“. გთხოვთ რეგისტრაცია გაიაროთ ბმულზე... სრულად... წყარო: ორგანიზაციის გვერდი სოციალურ ქსელში

თბილისი. ევროპის საბჭოსა და მთავრობის ადმინისტრაციის მიერ „მე ვირჩევ თანასწორობას” კამპანიის ფარგლებში ჩატარდა თანასწორობის რეპორტიორის კონკურსი. ლალე სოფიევა კონკურსის ერთერთი გამარჯვებულია და ის, ესეში, თავისი დიდი ბებიის ფარი-ხანუმ სოფიევას შესახებ გვიყვება. „მინდა, გაგაცნოთ ფარი-ხანუმ სოფიევა, დემოკრატიული გზით არჩეული პირველი მუსლიმი ქალი მსოფლიოში, რომელმაც თავისი სამაგალითო და დღემდე საიდუმლოებით მოცული ისტორიებით მსოფლიო გააოცა და ასი წლის შემდეგაც მისი საქმიანობა მისაბაძია. ფარი-ხანუმ სოფიევა არის ჩემი დიდი ბებია. დაიბადა 1884 წელს, გარდაბნის მუნიციპალიტეტის სოფელ ყარაჯალაში“... სრულად... წყარო: www.coe.int

თბილისი. სამართლიანი არჩევნებისა და დემოკრატიის საერთაშორისო საზოგადოება საარჩევნო ადმინისტრაციის წარმომადგენლებისა და არჩევნებში ჩართული მხარეების მიერ დასმულ შეკითხვებს ეხმაურება. შეკითხვები შეეხება 2020 წლის 31 ოქტომბრის საპარლამენტო არჩევნების ხმების პარალელური დათვლის (PVT) შედეგების შესახებ, მათ შორის უბნების 8%-ზე გამოვლენილი დისბალანსების თაობაზე.  „სამართლიანი არჩევნების“ მმართველი რგოლის ცვლილების შემდეგ, საზოგადოებაში გაჩენილ შეკითხვებზე ამომწურავი პასუხების გასაცემად, ორგანიზაციის თანამშრომლებისა და გამგეობის წევრების მიერ, გადაწყდა შემაჯამებელ ოქმებში გამოვლენილი ხარვეზების ხელახალი, სიღრმისეული შესწავლა. ამ მიზნით, ორგანიზაციის სათაო და რეგიონული ოფისების წარმომადგენლებმა, იანვრის პირველ ნახევარში, გადაამოწმეს ხმების პარალელური დათვლის შერჩევაში შესული ყველა საარჩევნო უბნის შემაჯამებელი ოქმი და თანდართული დოკუმენტები (850 უბანი), მათ შორის 25 სპეციალური, ე.წ. COVID-უბნისა და პენიტენციურ დაწესებულებებში გახსნილი სამი საარჩევნო უბნის შემაჯამებელი ოქმები“ - ნათქვამია ორგანიზაციის მიერ გავრცელებულ ინფორმაციაში, „- გადამოწმების ფარგლებში “სამართლიანმა არჩევნებმა” გამოავლინა ის შემაჯამებელი ოქმები, რომლებშიც საარჩევნო სუბიექტების მიერ მიღებული ხმების და ბათილად მიჩნეული ბიულეტენების ჯამი მეტი, ტოლი ან ნაკლები იყო არჩევნებში მონაწილე ამომრჩეველთა საერთო რაოდენობაზე. გადამოწმების პროცესში გაანალიზდა თანდართული დოკუმენტაციაც (შესწორების ოქმები, ახსნა-განმარტებები და განკარგულებები), აგრეთვე, „სამართლიანმა არჩევნებმა“ შეადარა დამკვირვებლებისთვის უბნის დახურვისას გადაცემული შემაჯამებელი ოქმების დამოწმებული ასლები და ცენტრალური საარჩევნო კომისიის ვებ გვერდზე ატვირთული შემაჯამებელი ოქმები“.  სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველომ, 2020 წლის 1 სექტემბრიდან 17 ნოემბრის ჩათვლით, საპარლამენტო არჩევნების კამპანიის დაფინანსების საკითხები შეისწავლა და პოლიტიკური პარტიების მიერ მიღებულ შემოწირულებებში 2020 წლის 1 იანვრიდან გამოკვეთილი ტენდენციებიც მიმოიხილა.  ორგანიზაციის განცხადებით, იმ 9 საარჩევნო სუბიექტიდან, რომელმაც არჩევნებში 1%-ის ოდენობის ხმა მაინც მიიღო, ერთმა სუბიექტმა („გირჩი”) შევსებული ფინანსური დეკლარაციები სახელმწიფო აუდიტის სამსახურს არ მიაწოდა, შესაბამისად. ანგარიშში გამოკვეთილი მიგნებები ძირითადად ეყრდნობა 8 საარჩევნო სუბიექტის მიერ წარდგენილი ფინანსური დეკლარაციებისა და წინასაარჩევნოდ მიმდინარე პროცესების ანალიზს.  სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო თვლის, რომ საარჩევნო და პოლიტიკური პარტიების კანონმდებლობაში შესატანი ცვლილებები დემოკრატიულ სტანდარტებს არ აკმაყოფილებს. „მიგვაჩნია, რომ პარტიების დაფინანსების წესის წარმოდგენილი ცვლილების ძირითადი ნაწილი ეწინააღმდეგება სახელმწიფოს მიერ პარტიების დაფინანსების ევროპულ სტანდარტებს და არალეგიტიმური საფუძვლით მძიმე დარტყმას მიაყენებს ოპოზიციური პარტიების ფინანსურ მდგომარეობას, რაც უარყოფითად აისახება პოლიტიკურ პლურალიზმზე და კონკურენტულ პოლიტიკურ გარემოზე. ამასთანავე, არაუფლებამოსილი პირის საარჩევნო კამპანიაში მონაწილეობისთვის საარჩევნო სუბიექტისთვის საარჩევნო რეგისტრაციის გაუქმება არაპროპორციულად მძიმე სანქციაა და ატარებს მისი პოლიტიკური მიზნებით გამოყენების დიდ საფრთხეს“, ნათქვამია განცხადებაში. სრულად... წყარო: transparency.ge

თბილისი. 25 დეკემბერს „სამართლიანი არჩევნების” ოფისში გაიმართა ორგანიზაციის გამგეობის ბრიფინგი, სადაც გამგეობის წევრებმა ბაია პატარაიამ და თამარა სართანიამ წარადგინეს მოკვლევის ანგარიში და გამგეობის რეკომენდაციები სამომავლო ნაბიჯებთან დაკავშირებით. „კომისიას მიაჩნია, რომ აღმასრულებელმა დირექტორმა ვერ გაითვალისწინა არსებული პოლიტიკური კონტექსტი და საარჩევნო სუბიექტების მიერ მიღებული ხმების დათვლის ფორმულაში აღმოჩენილი ხარვეზის შესახებ დროულად არ მიაწოდა ინფორმაცია საზოგადოებას, რითიც რისკის ქვეშ დააყენა ორგანიზაციის რეპუტაცია და, ზოგადად, PVT-ის მეთოდოლოგიის სანდოობა. ამასთანავე, კომისიის მიერ მოკვლეული ინფორმაციით, არ იკვეთება აღმასრულებელ დირექტორზე ზეწოლის ან დაშინების მცდელობა, რაც მას ამ ინფორმაციის დამალვას აიძულებდა“, ნათქვამია განცხადებაში.  სრულად... წყარო: isfed.ge

თბილისი. „საერთაშორისო გამჭვირვალობა - საქართველოს” მიერ 2020 წლის 1 ივლისიდან 22 ნოემბრამდე საპარლამენტო არჩევნებისთვის განხორციელებულმა დაკვირვებამ აჩვენა, რომ საარჩევნოდ ადმინისტრაციული რესურსების გამოყენება საქართველოსთვის კვლავ პრობლემურია. „ძალადობის შემთხვევების არაეფექტიანი გამოძიება, საჯარო ინსტიტუტების, მათ შორის საარჩევნო კომისიების პოლიტიზება და მმართველი პარტიის მიერ საბიუჯეტო ორგანიზაციების თანამშრომელთა მობილიზება საარჩევნო კამპანიისთვის, საგამოძიებო უწყებების გამოყენება პოლიტიკური ოპონენტების დისკრედიტირებისათვის და სხვა მანკიერი ტენდენციები არჩევნებიდან არჩევნებამდე მოუგვარებელ საკითხებად რჩება“, ნათქვამია ორგანიზაციის საბოლოო ანგარიშში. სრულად... წყარო: transparency.ge

თბილისი. ამერიკის შეერთებული შტატების საერთაშორისო განვითარების სააგენტო (USAID) განცხადებას ავრცელებს და მიესალმება „სამართლიანი არჩევნების“ (ISFED) გადაწყვეტილებას - ISFED-მა საკუთარი ინიციატივით გადაამოწმა პარალელური დათვლის (PVT) შედეგები, აუდიტის დასკვნა კი საზოგადოებას გააცნო. „ISFED პროფესიონალური და ღირსეული რეპუტაციის მქონე სამოქალაქო საზოგადოების ორგანიზაციაა, რომელიც ყოველთვის პასუხისმგებელია გამჭირვალე ინფორმაციის უზრუნველყოფაზე, საკუთარ მონაცემთა ხარისხის კონტროლსა და შედეგების სიზუსტეზე PVT-ის ჩატარების საერთაშორისოდ აღიარებული საუკეთესო პრატიკის შესაბამისად. მხარს ვუჭერთ არჩევნების მონიტორინგში ჩართული ყველა ორგანიზაციის გამჭვირვალე მუშაობას და ვაფასებთ ISFED-ის მიერ არჩევნების შემდგომ რთულ გარემოში განხორციელებულ საქმიანობას“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველო გვიხსნის თუ როგორ პარლამენტს მივიღებთ, თუკი საპარლამენტო ოპოზიცია უარს იტყვის შესვლაზე და საკანონდებლო ორგანო მხოლოდ „ქართული ოცნების” 90 დეპუტატით იქნება წარმოდგენილი. „საქართველო, კონსტიტუციის უკანასკნელი ცვლილებების თანახმად, საპარლამენტო რესპუბლიკაა და შესაბამისად, პარლამენტის გამართული ფუნქციონირება საკვანძო მნიშვნელობისაა ქვეყნის განვითარებისათვის. პარლამენტი ხალხის წარმომადგენლობითი ორგანოა, ის საქართველოს მოსახლეობის არჩევანსა და მის ნებას უნდა გამოხატავდეს. ერთპარტიული პარლამენტი ვერ შეასრულებს წარმომადგენლობითი ორგანოს ფუნქციას, ვერ შეძლებს გამართულად ფუნქციონირებას და მთავრობის კონტროლს. პარლამენტის თანამდებობები სრულად ვერ დაკომპლექტდება და ბევრ გადაწყვეტილებას პარლამენტი ვერ მიიღებს ხმათა არასაკმარისი რაოდენობის გამო. ოთხმოცდაათი წევრით წარმოდგენილი პარლამენტი ვერ მიიღებს ისეთ გადაწყვეტილებებს, რომელთა მიღებასაც 100 ან 113 ხმა ჭირდება და ძალიან გართულდება 90 ხმის მობილიზებაც. ასეთი გადაწყვეტილება კი არაერთია“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. კელი დეგნანი - ამერიკის ელჩი საქართველოში საერთაშორისო გამჭვირვალობა-საქართველოს არჩევნების პროცესში შეტანილი წვლილისთვის მადლობას უხდის. „საერთაშორისო სტანდარტებთან შესაბამისობისკენ მიმართული თქვენი ძალისხმევა ხელს შეუწყობს ისეთი საარჩევნო პროცესის ჩამოყალიბებას, რომელიც ნდობით ისარგებლებს ქართველ ამომრჩევლებს შორის. გულითად მადლობას გიხდით ამ რთული და სასიცოცხლოდ მნიშვნელოვანი საქმიანობის ასეთი თავდადებით და პროფესიონალიზმით განხორციელებისთვის“, წერს ელჩი.  სრულად... წყარო: ორგანიზაციის გვერდი სოციალურ ქსელში

თბილისი. ნორვეგიის ჰელსინკის კომიტეტი და ადამიანის უფლებათა ცენტრი ყურადღებით ადევნებენ თვალყურს საქართველოში 2020 წლის 31 ოქტომბრის საპარლამენტო არჩევნების ირგვლივ განვითარებულ მოვლენებს, რომელშიც საქართველოს მოსახლეობამ დამოუკიდებლობის მოპოვებიდან მეათეჯერ აირჩია უმაღლესი საკანონმდებლო ორგანო საყოველთაო და პირდაპირი კენჭისყრით.  „31 ოქტომბრის საპარლამენტო არჩევნების წინასაარჩევნო და არჩევნების შემდგომი პერიოდი მნიშვნელოვანი ხარვეზებით წარიმართა, რაც ცხადყოფს საარჩევნო დარღვევებთან გამკლავების კუთხით როგორც კანონმდებლობაში, ასევე პრაქტიკაში არსებულ სისტემურ პრობლემებს. წინასაარჩევნო პერიოდში ხშირი იყო სახელმწიფოსა და მმართველ პარტიას შორის ზღვარის წაშლის, ადმინისტრაციული რესურსის საარჩევნო მიზნით გამოყენებისა და ამომრჩეველთა მოსყიდვის სავარაუდო შემთხვევები მთელი საქართველოს მასშტაბით. მსგავს ფაქტებთან დაკავშირებით თვალსაჩინო ტენდენციას წარმოადგენდა სამართალდამცავი ორგანოების მხრიდან ადეკვატური რეაგირებისა და დამნაშავეთა დასჯის ნაკლებობა“.  სრულად... წყარო: humanrights.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) 2020 წლის საპარლამენტო არჩევნების მეორე ტურს, რომელიც 21 ნოემბერს იმართება, 17 მაჟორიტარულ ოლქში 35 მობილური ჯგუფის საშუალებით დააკვირდება. ორგანიზაციის სადამკვირვებლო მისია მეორე ტურზე ლიმიტირებული იქნება. „როგორც ცნობილია, ოპოზიციურმა პარტიებმა უარი განაცხადეს მეორე ტურში მონაწილეობაზე. მიუხედავად იმისა, რომ საარჩევნო კოდექსი არჩევნების მეორე ტურში მაჟორიტარი დეპუტატობის კანდიდატურის მოხსნის შესაძლებლობას არ ითვალისწინებს და საარჩევნო ბიულეტენში საუკეთესო შედეგის მქონე ორი კანდიდატი იქნება მოცემული, ოპოზიციური პარტიების მიერ პარლამენტის ბოიკოტი და არჩევნების მეორე ტურში მონაწილეობაზე უარის თქმა მნიშვნელოვნად აზრს უკარგავს საარჩევნო უბნებზე არჩევნების პროცესის დაკვირვებას. ამასთან, კოვიდ-ინფექციით ინფიცირებულთა მზარდი სტატისტიკის ფონზე ჯანდაცვის სისტემაში შექმნილი პრობლემების გათვალისწინებით, დამკვირვებელთა მთელი დღის მანძილზე საარჩევნო უბანზე ყოფნა მათ ჯანმრთელობას გაუმართლებელ რისკებს უქმნის“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. საერთო-სამოქალაქო მოძრაობა „მრავალეროვანი საქართველო“ 2020 წლის 21 ნოემბერს საქართველოს პარლამენტის არჩევნების მეორე ტურის მიმდინარეობას დააკვირდება. „არჩევნების დღის მონიტორინგს განახორციელებს ორგანიზაციის 200 დამკვირვებელი. მათ შორის, 175 საუბნო საარჩევნო კომისიის, 18 მობილური ჯგუფის და 7 საოლქო საარჩევნო კომისიის დამკვირვებელი. არჩევნების დღეზე დაკვირვება მოიცავს სულ 7 მაჟორიტარულ საარჩევნო ოლქს, რომელთა შორისაა: რუსთავი და გარდაბანი (#12), ლაგოდეხი, ყვარელი, თელავი და ახმეტა (#10) - კახეთი; მცხეთა (#11)- მცხეთა-მთიანეთი; ასევე მთაწმინდა (#1), ისანი (#4), სამგორი (#5) და გლდანი (#8) - თბილისი“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: დასჯა, დაჯილდოვება და მიტოვება: პოლიტიკური სტრატეგიები არჩევნების დროს მარნეულსა და ბოლნისში. „სტატიის მიზანია, (1) წარმოაჩინოს პოლიტიკის და არჩევნების ბუნება ბოლნისსა და მარნეულში; (2) აღწეროს ის სტრატეგიები და მეთოდები, რაც საარჩევნო პროცესებში ძირითადი პოლიტიკური აქტორების მიერ გამოიყენებოდა; (3) აჩვენოს ის, თუ როგორ მუშაობს კოორდინატორების სისტემა ქვემო ქართლში; და (4) დაგვანახოს, თუ რა სოციალურ და კულტურულ კვალს ტოვებს არჩევნები მოსახლეობაში. ჩვენი რწმენით, მიკრო სოციალურ დონეზე უკეთ ჩანს ძალაუფლებრივი სისტემების მუშაობა და ეფექტები. სწორედ ამიტომ მცირე საზოგადოებების მაგალითზე პოლიტიკური აქტორების სტრატეგიების, მათ მიერ გამოყენებული პოლიტიკური რაციონალობისა და მორალის სისტემების ანალიზი, მათ საერთო სახეს კარგად აშიშვლებს და საზოგადოებრივ გავლენებსაც უკეთესაც წარმოაჩენს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს პარლამენტის 2020 წლის 31 ოქტომბრის არჩევნებს, ადგილობრივი სადამკვირვებლო ორგანიზაცია - განვითარებისა და დემოკრატიის ცენტრი (CDD), საერთაშორისო სადამკვირვებლო ორგანიზაცია - დემოკრატიის, მედიისა და კულტურული გაცვლის ინსტიტუტთან (IDEM) პარტნიორობით, 100 კაციანი ერთობლივი სადამკვირვებლო მისიით დააკვირდა საქართველოს ყველა რეგიონსა და ქვეყნის გარეთ გახსნილ საარჩევნო უბნებზე. „ჩვენი ერთობლივი მისიის შეფასებით, საქართველოს პარლამენტის 31 ოქტომბრის არჩევნები კონკურენტულ გარემოში და ზოგადად ძირითადი თავისუფლებების დაცვით ჩატარდა. კენჭისყრის პროცესმა შედარებით მშვიდ და ორგანიზებულ გარემოში ჩაიარა, ერთეული პროცედურული დარღვევების ფონზე. თუმცა რიგი ხარვეზები - დარღვევები გამოიკვეთა ხმების დათვლისა და შედეგების შეჯამების პროცესში. COVID-19 პანდემიასთან დაკავშირებული გამოწვევების ფონზე, აღსანიშნავია ამომრჩეველთა მაღალი აქტივობა, რითაც კიდევ ერთხელ დადასტურდა ქართველი ამომრჩევლის მხარდაჭერა შეცვლილი საარჩევნო სისტემისადმი, რომლის ერთერთი მთავარი მიზანი, სწორედ უფრო პროპორციული, წარმომადგენლობითი და მრავალფეროვანი საკანონმდებლო ორგანოს ფორმირება იყო“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „სამართლიანმა არჩევნებმა“ საქართველოს პარლამენტის კენჭისყრის დღის შემაჯამებელ ოქმებთან დაკავშირებით საერთო სასამართლოებში ჯამში 19 სარჩელი წარადგინა, რითაც 33 საარჩევნო უბანთან დაკავშირებით საოლქო საარჩევნო კომისიების მიერ კენჭისყრის შედეგების გადათვლაზე უარი ან საჩივრის განუხილვევლად დატოვების გადაწყვეტილებები გაასაჩივრა. წარდგენილი სარჩელების საფუძველზე სასამართლომ ორ საოლქო საარჩევნო კომისიას 4 საარჩევნო უბნის შედეგების გადათვლა დაავალა. ორგანიზაციის მიერ მიერ სასამართლოში წარდგენილი სარჩელების განხილვების პროცესში გამოიკვეთა რამდენიმე სამწუხარო ტენდენცია: სასამართლოებმა ვერ გაიაზრეს მათი როლი საარჩევნო პროცესში; აშკარად გამოიკვეთა საარჩევნო დავებზე მომუშავე მოსამართლეთა ნაწილის არაკომპეტენტურობა; გამოიკვეთა სასამართლოს ადმინისტრაციული ორგანოს სასარგებლოდ მიკერძოებულობის პრობლემა; სასამართლო გადაწყვეტილებები არასათანადოდაა დასაბუთებული; სასამართლო გადაწყვეტილების დაგვიანებით ჩაბარება. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაცია (საია) საუბნო საარჩევნო კომისიების შემაჯამებელი ოქმების კანონიერების და მონაცემების ხელახალი გადათვლის საკითხზე  სასამართლოში 38 უბანთან მიმართებით დავობდა. ორგანიზაციის ცნობით, გასაჩივრებული უბნებიდან სასამართლომ მოთხოვნა მხოლოდ 12 უბანთან მიმართებით დააკმაყოფილა. სრულად... წყარო: gyla.ge

თბილისი. ევროპის ფონდი მხარს უჭერს მშვიდობიანი შეკრების უფლებასა და გამოხატვის თავისუფლებას. ფონდი მოუწოდებს ხელისუფლებას არ შეზღუდოს ეს უფლებები და აიცილოს სიტუაციის შემდგომი ესკალაცია. ორგანიზაცია უერთდება საზოგადოების მოთხოვნას, გაიმართოს მოლაპარაკებები მმართველ პარტიასა და არჩევნებში მონაწილე სხვა პოლიტიკურ სუბიექტებს შორის, რათა გამოინახოს კონსტრუქციული გზა არსებული პოლიტიკური სიტუაციის განმუხტვისა და ქვეყნის შემდგომი სტაბილური, დემოკრატიული განვითარებისათვის. სრულად... წყარო: www.epfound.ge

თბილისი. საქართველოს ღია საზოგადოების ფონდი ეხმაურება 2020 წლის 31 ოქტომბერს გამართულ საპარლამენტო არჩევნებს და შემდგომ განვითარებულ მოვლენებს. „საზოგადოებას შევახსენებთ, რომ მიმდინარე წელს გატარებულმა საკონსტიტუციო ცვლილებებმა და თითქმის პროპორციული საარჩევნო სისტემის შემოღებამ, გააჩინა რეალური პერსპექტივა, საკანონმდებლო ორგანო გამხდარიყო უფრო პლურალისტური და გადადგმულიყო ქმედითი ნაბიჯები კოალიციური მთავრობის ფორმირებისთვის. თუმცა, ვიზიარებთ საერთაშორისო და ადგილობრივი პარტნიორი ორგანიზაციების შეფასებებს და მიგვაჩნია, რომ როგორც წინასაარჩევნო პერიოდი, ისე არჩევნების დღე და ხმის დათვლის პროცესი მრავალრიცხოვანი დარღვევების ფონზე მიმდინარეობდა. განსაკუთრებით შემაშფოთებელი იყო ტენდენცია, რომ წაიშალა ზღვარი მმართველ პოლიტიკურ პარტიასა და სახელმწიფოს შორის, გამოყენებულ იქნა ადმინისტრაციული რესურსი, ადგილი ჰქონდა ამომრჩევლის დაშინების, მოსყიდვის და მათ თავისუფალ ნებაზე კონტროლის განხორციელების მცდელობებს, რამაც, შესაძლოა, ეჭქვეშ დააყენოს არჩევნების და აღნიშნული არჩევნების შედეგად არჩეული საკანონმდებლო ორგანოს ლეგიტიმუმრობის საკითხი. აღნიშნულის გათვალისწინებით, 2020 წლის 8 ნოემბერს, საქართველოს მოქალაქეებმა გამოხატეს მშვიდობიანი პროტესტი საქართველოს პარლამენტის, ხოლო მოგვიანებით – საქართველოს ცენტრალური საარჩევნო კომისიის შენობის მიმდებარედ. აღნიშნული პროტესტის დროს, სამართალდამცავებმა გამოიყენეს შეკრება-მანიფესტაციის დაშლის სპეციალური საშუალებები, კანონმდებლობით გათვალისწინებული პროცედურების დარღვევით, რამაც ხელი შეუწყო დაძაბულობის ესკალაციას და დაშავდნენ საპროტესტო აქციის მონაწილეები“. სრულად... წყარო: osgf.ge

თბილისი. საქართველოს სახალხო დამცველი მოუწოდებს როგორც მმართველ, ასევე, არჩევნებში მონაწილე ოპოზიციურ პარტიებს, დაუყოვნებლივ დაიწყონ მოლაპარაკებები საარჩევნო დარღვევების გამო შექმნილი პოლიტიკური კრიზისიდან გამოსავლის ძიების მიზნით. სრულად... წყარო: ombudsman.ge