აჭარა. 15 ივნისს, ქალაქ ბათუმში, მასშტაბური დასაქმების ფორუმის ორგანიზებასა და განხორციელებაში თავისუფალ ჟურნალისტთა სახლის (IJH) ახალგაზრდული ცენტრის წევრებმა მოხალისეობრივად მიიღეს მონაწილეობა. „მოხალისეების დახმარებით შესაძლებელი გახდა ფორუმზე მოსული სამუშაოს მაძიებლების ნაკადის მართვა, COVID-19 რეგულაციების დაცვა და მონაწილეების ინფორმირება“. განათლების განვითარების და დასაქმების ცენტრი (EDEC) მადლობას უხდის მოხალისე ახალგაზრდებს გაწეული შრომისთვის და წარმატებები ვუსურვოთ სამომავლო საქმიანობაში. სრულად... წყარო: edec.ge

თბილისი. სოციალური სამართლიანობის ცენტრი (ყოფილი EMC) ნამახვანი ჰესის მიერ გამომუშავებული ელექტროენერგიის ექსპორტის შესაძლებლობის შესახებ ანალიზს გთავაზობთ. „სახელმწიფო უწყებების წარმომადგენლები ნამახვანი ჰესის სარგებლიანობაზე საუბრისას, სხვა საკითხებთან ერთად, ხშირად, ხაზს უსვამენ პროექტის მნიშვნელობას ქვეყნის ენერგოდამოუკიდებლობის განმტკიცებაში. ეს მტკიცება ენერგოდამოუკიდებლობის შესახებ, მორიგია ხმამაღალ განცხადებებს შორის, რომელიც ხშირად ისმის ხელისუფლების წარმომადგენლების მხრიდან და რომელსაც ხელშეკრულების ტექსტი – ინვესტორსა და მთავრობას შორის გაფორმებული შეთანხმების შინაარსი – ზურგს არ უმაგრებს“. სრულად... წყარო: socialjustice.org.ge

თბილისი. როგორ გავხადოთ კომპანია მეტად ეკომეგობრული? გაიგეთ UNIDO-სა და EU4Environment პროგრამის მხარდაჭერით შექმნილ საინფორმაციო ბარათებზე… წყარო: www.euneighbours.eu

იმერეთი. ადგილობრივი დემოკრატიის სააგენტო საქართველომ, პროექტ „ერთობლივი ორგანიზაცია სოფლის ქსელების სამეწარმეო ახალგაზრდების განვითარებისთვის - JOURNEY” დაასრულა მეწარმეთა შესაძლებლობების განვითარების სემინარები, იმერეთის მხარის მუნიციპალიტეტების ახალგაზრებისთვის. „მენტორებმა ტრენინგზე ახალგაზრდებს პროექტის ფარგლებში მიღებული პოლონური და იტალიური გამოცდილება გაუზიარეს. გარდა ამისა, საუბარი შეეხო მოქმედ საგადასახადო კანონმდებლობასა და მეწარმეებისათვის არსებულ სამართლებრივ გარემოს, ბიზნეს იდეის შემუშავებისა და განვითარების საკითხებს (სტარტაპის ჩამოყალიბება/განვითარება, ფიჩინგი)“. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს მუდმივი კოორდინატორი საქართველოში საბინე მახლი ზუგდიდში ადგილობრივ მეწარმე და ფერმერ ქალებს შეხვდა. „მონაწილეები საბინე მახლს რეგიონში არსებულ ეკონომიკურ ვითარებაზე, მცირე და საშუალო ბიზნესზე პანდემიის გავლენაზე, სირთულეებსა და საჭიროებებზე ესაუბრნენ. შეხვედრის მეორე ნაწილი კი მეწარმე ქალების გამოწვევების შესახებ დისკუსიას დაეთმო. დამსწრე ქალები მცირე და საშუალო ბიზნესებს უძღვებიან. საკუთარი საქმიანობები მათ გაეროს ქალთა ორგანიზაციის პროექტის „ერთობლივი ძალისხმევა ქალთა ეკონომიკური გაძლიერებისთვის საქართველოში“ დახმარებით, ნორვეგიის მთავრობის მხარდაჭერით განავითარეს“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. მედიის განვითარების ფონდი (MDF) აქვეყნებს ახალ ანგარიშს, რომელიც კრემლის პროპაგანდისტულ ვებ-საიტებზე Google ads-ის მეშვეობით ადგილობრივი კომპანიების პროდუქციის რეკლამის განთავსების საკითხს იკვლევს. „ანგარიშის პირველი ნაწილი ეთმობა ქართული კომპანიების რეკლამების განთავსებას კრემლის პროპაგანდისტულ ვებ-გვერდებზე, ხოლო მეორე ნაწილი საქართველოს ტერიტორიაზე ფუნქციონირებად სპუტნიკზე განთავსებულ რეკლამებს. მესამე ნაწილში მოცემულია ინფორმაცია იმის შესახებ, თუ რომელმა კომპანიამ მოახდინა რეაგირება კვლევის მიგნებებზე. ბოლო ნაწილი კი იმ მედიების პროფილებს მიმოიხილავს, რომლებიც კრემლის პროპაგანდისტული პლატფორმებია. ანგარიში მომზადდა ღია საინფორმაციო პარტნიორობის (OIP) კვლევითი პროექტის ფარგლებში 5 ქვეყნის (ლიეტუვა, საქართველო, ესტონეთი, ჩეხეთი, პოლონეთი) კვლევითი ორგანიზაციების მონაწილეობით და საქართველოს მიგნებებს ასახავს“.  სრულად... წყარო: www.mdfgeorgia.ge

შიდა ქართლი. 20 მაისს, 11:00 საათიდან 14:00 საათამდე, განათლების განვითარების და დასაქმების ცენტრის ორგანიზებით, ქ. გორში, გორის მუნიციპალიტეტის ადმინისტრაციული შენობის მიმდებარედ (სტალინის ქუჩა N16) დასაქმების ფორუმი ჩატარდება. „დასაქმების ფორუმი გაიმართება ევროკავშირის მიერ მხარდაჭერილი პროექტის „სწავლა, წვრთნა, მიღწევა და კავშირების დამყარება დასაქმებისთვის! (ისწავლე დასაქმებისთვის!)“ ფარგლებში. ფორუმზე შიდა ქართლში არსებული 30 მცირე და საშუალო ბიზნესი ვაკანსიებს წარმოადგენს. ღონისძიებაში ჩაერთვება 300–ზე მეტი სამუშაოს მაძიებელი, რომლებსაც შესაძლებლობა ექნებათ შეხვდნენ დამსაქმებლებს, გაესაუბრონ სასურველი ვაკანსიის თაობაზე და წარმოაჩინონ საკუთარი უნარები პოტენციურ დამსაქმებლებთან პირდაპირი კომუნიკაციის გზით. სამუშაო ადგილები ძირითადად მომსახურების და წარმოების სფეროებიდან იქნება წარმოდგენილი. დასაქმების ფორუმში მონაწილეობის მსურველ სამუშაოს მაძიებლებს შეუძლიათ, 14 მაისის ჩათვლით, დარეგისტრირდნენ ბმულზე... სრულად... წყარო: edec.ge

ზუგდიდი. გაეროს ქალთა ორგანიზაციამ და გაეროს სურსათისა და სოფლის მეურნეობის ორგანიზაციამ ფერმერ ქალთა ეკონომიკური გაძლიერებისთვის სამეგრელო-ზემო სვანეთში აქტივობები დაიწყეს. „პროექტის „ფერმერ ქალთა ეკონომიკური გაძლიერების ხელშეწყობა რძის პროდუქტების წარმოების ხელშეწყობის მხარდაჭერით ფერმერთა საველეს სკოლების (FFS) მიდგომების გზით“ ფარგლებში, გაეროს ორი სააგენტოს წარმომადგენლებმა სამიზნე რეგიონში არსებულ თუ პოტენციურ პარტნიორებთან შეხვედრები გამართეს და თანამშრომლობის პერსპექტივებზეც იმსჯელეს. კერძოდ, პროექტის შინაარსსა და მიზნებს გაეცნენ ზუგდიდის მუნიციპალიტეტში ქალთა გაძლიერების საკითხებზე მომუშავე ორგანიზაციები, საკონსულტაციო შეხვედრა შედგა ამავე მუნიციპალიტეტის გენდერული თანასწორობის საბჭოსა და სოციალური დაცვისა და გენდერული თანასწორობის განყოფილების უფროსთან, გოგი რევიასთანაც. შედეგად, პროექტით გათვალისწინებული ერთ-ერთი კომპონენტის - ქალთა უფლებებისა და ოჯახში ძალადობის შესახებ ცნობიერების ამაღლებასთან დაკავშირებით გაეროს ქალთა ორგანიზაციასა და მუნიციპალიტეტს შორის სამომავლო თანამშრომლობის გეგმები გამოიკვეთა“, ნათქვამია ორგანიზაციის ვებგვერდზე. სრულად... წყარო: georgia.unwomen.org

თბილისი. სოციალური სამართლიანობის ცენტრი (ყოფილი EMC) გთავაზობთ ანა დიაკონიძის სტატიას: „დასაქმების პრობლემები მონოინდუსტრიულ ქალაქებში“ კრებულიდან - „ექსტრაქტივისტული გადაკვეთები პოლიტიკა, ეკოლოგია და სოციალური ველი“. „ჯორჯიან მანგანეზი“ არა მარტო ჭიათურაში, არამედ მთელი ქვეყნის მასშტაბითაც ერთ-ერთი ყველაზე მსხვილი დამსაქმებელია. ადგილობრივი მცირე ბიზნესების მუშაობა მნიშვნელოვნად არის დამოკიდებული მანგანუმის წარმოებაზე, რადგან „ჯმ“-ს მიერ გაცემული ხელფასები საფუძვლიანად ამყარებს ადგილობრივ ეკონომიკას. აღსანიშნავია, რომ მანგანუმის მოპოვებას დიდი პოლიტიკური მნიშვნელობა აქვს ქვეყნისათვის: ის ქვეყნის ექსპორტის 10%-ს შეადგენს. თუმცაღა, ერთ დამსაქმებელზე ასეთი ძლიერი დამოკიდებულება მრავალი რისკის შემცველია. უპირველეს ყოვლისა, ეს მუშებს საკუთარი ინტერესების დაცვის საშუალებას ართმევს, რადგან არ არსებობენ კონკურენტები, რომლებსაც ისინი იმ შემთხვევაში მიმართავდნენ, თუ „ჯმ“ დამაკმაყოფილებელ პირობებს არ უზრუნველყოფდა. გარდა ამისა, ძლიერი ექსპორტის ორიენტაცია მრეწველობას დაუცველს ხდის საერთაშორისო ეკონომიკური შოკებისადმი“. სრულად... წყარო: socialjustice.org.ge

ქვემო ქართლი. საქართველოს ფერმერთა ასოციაციის ორგანიზებით, პროექტის „ეს წალკაა“ პარტნიორობის ფარგლებში, წალკის რაიონის ფერმერებისთვის და მცირე ბიზნესის წარმომადგენლებისთვის ტრენინგები მიმდინარეობს. „ბენეფიციარებმა უკვე გიარეს ტრენინგები ენერგოეფექტურობასა და კლიმატგონივრულ მეწარმეობაში, ელექტრონულ კომერციასა და ციფრულ მარკეტინგში და ინოვაციურ სტარტაპმეწარმეობაში; 11 მაისის ჩათვლით, ტრენინგის მონაწილეებისთვის შეხვედრები გაიმართება: აგროტურიზმის მენეჯმენტი და საკანონმდებლო ჩარჩო; სურსათის უვნებლობის სტანდარტები პირველადი და გადამუშავებული პროდუქტის წარმოებაში; ტყის არამერქნული პროდუქტების მდგრადი მართვა“. სრულად... წყარო: ორგანიზაციის გვერდი სოციალურ ქსელში

ქვემო ქართლი. თეთრიწყაროს ახალგაზრდულ ცენტრში, რომელიც სწავლებისა და დასაქმების ხელშეწყობის ერთ-ერთ ცენტრია ქვემო ქართლის რეგიონში, გაიმართა შეხვედრა ადგილობრივი თვითმართველობის წარმომადგენლებთან, პროექტის „უნარების განვითარება და დასაქმების ინოვაციური შესაძლებლობები საქართველოს რეგიონული განვითარებისთვის“ ფარგლებში.  „CSRDG ის წარმომადგენელმა დამსწრეებს გააცნო პროექტის მიზნები და ამოცანები. ასევე, განიხილეს სამომავლო თანამშრომლობის შესაძლებლობები“.  სრულად... წყარო: ორგანიზაციის გვერდი სოციალურ ქსელში

თბილისი. 25 მაისს ბიზნესისა და ტექნოლოგიების უნივერსიტეტი დასაქმების დისტანციურ ფორუმს, Femtech-ს გამართავს. „ფორუმი მიზნად ისახავს იმ ქალებისა და გოგოების დასაქმებას, რომლებიც კოდინგის სკოლის ფარგლებში გადამზადდნენ. ახლა კი უნივერსიტეტი მათ ტექნოლოგიების სფეროში დასაქმებაშიც დაეხმარება. ბიზნესისა და ტექნოლოგიების უნივერსიტეტი ქალთა გაძლიერების პრინციპების მხარდამჭერი და ამ მიმართულებით არაერთი საინტერესო ინიციატივის განმახორციელებელია“. სრულად... ფორუმზე რეგისტრაციისთვის ეწვიეთ ბმულს... წყარო: გაეროს ქალთა ფონდის გვერდი სოციალურ ქსელში

თბილისი. სოციალური სამართლიანობის ცენტრი შრომის რეფორმის პროცესსა და შინაარსზე აქვეყნებს ინტერვიუს GIPA-ს პროფესორთან, საჯარო მართვის სამაგისტრო პროგრამის თანახელმძღვანელთან, კოტე ერისთავთან. „2020 წლის განმავლობაში საქართველოს პარლამენტში მიმდინარეობდა შრომის რეფორმის ხანგრძლივი და წინააღმდეგობრივი პროცესი, რის შედეგადაც მნიშვნელოვნად შეიცვალა არსებული შრომის კანონმდებლობა. მიუხედავად იმისა, რომ ცვლილებების ნაწილი ხელშესახებად აუმჯობესებს დასაქმებულთა უფლებრივ მდგომარეობას, სხვადასხვა ინტერესთა ჯგუფის აგრესიული ლობირების შედეგად, სარეფორმო პაკეტში ვერ მოხვდა არაერთი ფუნდამენტური წინადადება“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) გთავაზობთ სტატიას კრებულიდან: „ექსტრაქტივისტული გადაკვეთები პოლიტიკა, ეკოლოგია და სოციალური ველი“. „მშრომელთა მოძრაობის მიერ პოლიტიკური ბრძოლის შექმნის უუნარობა მნიშვნელოვანწილად განპირობებულია იმ იდეოლოგიზირებული პოლიტიკურ-დისკურსული ველით, რომელიც წარმატებით ახერხებს პოლიტიკური საკითხების პრივატიზებას, და თავისუფლების სახელით, მშრომელთა საბაზისო უფლებების შეზღუდვის ხარჯზე, მსხვილი კაპიტალის ინტერესს ემსახურება. შრომითი ურთიერთობების ამგვარი დეპოლიტიზება, პროდუქტიულ ძალებს მნიშვნელოვან წინაღობას უქმნის იმისთვის, რათა საკუთარი სიტუაციის სრულად გააზრება და კორპორატისტული პოლიტიკური ცნობიერების გადალახვა შეძლონ“. სრულად... წყარო: socialjustice.org.ge

თბილისი. ღირსეული შრომის პლატფორმა მშრომელთა საერთაშორისო დღესთან დაკავშირებით განცხადებას ავრცელებს. „საქართველოში, პირველ მაისს მშრომელთა ერთი ნაწილი უსამსახუროდ, მეორე ნაწილი კი საფრთხისშემცველ სამუშაო პირობებში ხვდება. COVID 19-ის პანდემიის შედეგად დამდგარი მრავალმხრივი და საყოველთაო კრიზისი იმის დასტურია, რომ არსებული პოლიტიკური და ეკონომიკური სისტემა ვერ უზრუნველყოფს მდგრად, სამართლიან და უსაფრთხო ყოველდღიურობას მშრომელთათვის და მათი ოჯახებისთვის. კრიზისი ადასტურებს ფუნდამენტური ცვლილებების და მათთვის ბრძოლის აუცილებლობასაც“, ნათქვამია ერთობლივ განცხადებაში. სრულად... წყარო: socialjustice.org.ge

ქვემო ქართლი. 6-დან 8 მაისამდე, მარნეულში, პროექტ „მეცფესტის“ ფარგლებში, პირველად ჩატარდება სტარტაპ კვირეულის (ონლაინ) ღონისძიება. „თქვენ აღმოაჩენთ ახალ შესაძლებლობებს, შეხვდებით საინტერესო ადამიანებს, მონაწილეობას მიიღებთ მენტორინგის სესიებში, რომელსაც გაუძღვებიან დარგის ექსპერტები, გაეცნობით დაფინანსების ახალ ინსტრუმენტებს და შესაძლებლობა გექნებათ მონაწილეობა მიიღოთ იდეათონის კონკურსში, რომელში გამარჯვებული 3 გუნდი დაჯილდოვდება ფულადი პრიზით 1200, 1000 და 800 ლარით“.  კვირეულში მონაწილეობის მისაღებად შეგიძლიათ გაიაროთ რეგისტრაცია... პროექტი ხორციელდება USAID Zrda Activity in Georgia მხარდაჭერითა და Startup Grind Tbilisi Georgia პარტნიორობით. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. 10 ივნისს, CENN ევროკავშირის მხარდაჭერითა და სამცხე-ჯავახეთის სახელმწიფო უნივერსიტეტთან თანამშრომლობით, ახალციხეში ახალგაზრდებისათვის დასაქმების ფორუმს აწყობს. „ხარ სამუშაოს მაძიებელი სრულწლოვანი ახალგაზრდა, რომელიც ცხოვრობს სამცხე-ჯავახეთის რეგიონში? მაშინ ეს ფორუმი შენთვისაა! დასაქმების შესაძლებლობები შეთავაზებული იქნება შემდეგი მიმართულებებით: მომსახურება; წარმოება; განათლება; სოციალური პროგრამები; გარემოს დაცვა; საგრანტო შესაძლებლობები სოციალურ და მწვანე მეწარმეობაში“.  დაინტერესებულმა ახალგაზრდებმა უნდა გაიარონ რეგისტრაცია 16 მაისამდე შემდეგ ბმულზე... სრულად... წყარო: ორგანიზაციის გვერდი სოციალურ ქსელში

თბილისი. 19 მაისს, ონლაინ ფორმატში გაიმართება „საქართველოს პასუხისმგებელი ბიზნესის კონკურსის Meliora 2020“-ის დაჯილდოების ცერემონია. წლევანდელი კონკურსი განსაკუთრებული ფორმატით ჩატარდება და კომპანიები იმ პროექტებისა და თუ ინიციატივებისთვის დაჯილდოვდება, რომლებიც მათ თავიანთი კორპორაციული სოციალური პასუხისმგებლობის (CSR) ფარგლებში Covid პანდემიასთან საბრძოლველად განახორციელეს. „დაჯილდოების ცერემონიაზე კომპანიები პანდემიით გამოწვეული კრიზისის გასამკლავებლად განხორციელებული პროექტებისთვის შემდეგ კატეგორიებში დაჯილდოვდებიან: თანამშრომელთა მხარდაჭერა, მომხმარებელთა და მომწოდებელთა მხარდაჭერა, საზოგადოების მხარდაჭერა და მცირე ბიზნესის და დაზარალებული სექტორების მხარდაჭერა. საქართველოს პასუხისმგებელი ბიზნესის კონკურსის Meliora 2020-ის სპონსორია კომპანია Moore ABC. Meliora 2020 ხორციელდება ევროკავშირისა და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში“, ნათქვამია საქართველოს პასუხისმგებელი ბიზნესის კონკურსის ვებგვედრზე. სრულად... წყარო: meliora.ge

თბილისი. 25 აპრილს, 12:00-დან 18:00 სთ-მდე, ორბელიანის მოედანზე, სოციალურ საწარმოთა ალიანსი გიწვევთ სააღდგომო ბაზრობაზე, რომელიც ევროკავშირის მხარდაჭერით მიმდინარე პროექტის „სოციალური მეწარმეობის განვითარება მდგრადი და ინკლუზიური საზოგადოებისთვის“ ფარგლებში გაიმართება. ღონისძიებას მხარს უჭერს „თბილისის მერია“ და „ქარავანი“. „სოციალური საწარმოები წარმოადგენენ ისეთ საწარმოებს, რომლებიც სხვადასხვა სახის სოციალურ პრობლემას სამეწარმეო მიდგომებით აგვარებენ. სოციალური მეწარმეობა შედარებით ახალი კონცეფციაა, რომელიც ბიზნესის „ახლებური გზით“ კეთებას გულისხმობს. ჩვეულებრივი ბიზნესისგან სოციალურ საწარმოს სწორედ მისი სოციალური ბუნება განასხვავებს - ის იქმნება კონკრეტული პრობლემის მოსაგვარებლად და მოგებაც სწორედ ამ პრობლემის გადაჭრისკენ მიემართება. სააღდგომო ბაზრობის მთავარ მიზანს სწორედ სოციალური საწარმოების ეკონომიკური გაძლიერება წარმოადგენს პანდემიით გამოწვეული კრიზისის პირობებში“. ბაზრობაზე თქვენთან შესახვედრად ემზადება ალიანსის წევრი 17 სოციალური საწარმო საქართველოს სხვადასხვა რეგიონიდან: ბაბალე, ჩუ, კოდალა, ჩირიგე, იკორთა, სამეზობლო, არაბული არტჰაუსი, ნუკრიანის სახელოსნოები, ეთნოდიზაინი, პოტერია, დადარი, კაფუნე, თემი, იალონი, ფარშევანგი, 7R, ისტორიალი. გაეცანით ღონისძიების შესახებ ინფორმაციას სრულად... „გამოგვიარეთ ორბელიანზე, გაახალისეთ უქმე დღე და შეიქმენით სადღესასწაულო განწყობა ჩვენთან ერთად“. წყარო: სოციალურ საწარმოთა ალიანსის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს პოლიტიკის მეცნიერების სპეციალისტის, სინოლოგ შალვა ჩიხლაძის სტატიას - „საქართველოს სატრანზიტო შესაძლებლობები, სიახლეები და გამოწვევები პანდემიის ფონზე“.  „დამოუკიდებლობის მოპოვების შემდეგ ახალგაზრდა ქართულმა სახელმწიფომ საკუთარი პოლიტიკური იდენტობის ძიება დაიწყო, რომელიც მას ხელს შეუწყობდა ეკონომიკური და პოლიტიკური კრიზისიდან გამოსვლაში და მის მნიშვნელობას გაზრდიდა მეზობელი და არამეზობელი სახელმწიფოებისთვის. ბაქო-თბილისი-ჯეიჰანის ნავთობსადენისა და ტრასეკას ამოქმედების შემდგომ ქვეყნის პოლიტიკურმა ელიტამ საქართველოს სატრანზიტო პოტენციალი ქვეყნისთვის ერთ-ერთ აუცილებელ და მნიშვნელოვან კომპონენტად გამოაცხადა, რომელსაც დიდი როლი უნდა ეთამაშა მშვიდობისა და სტაბილურობის განმტკიცებაში. ფორმულა მარტივი იყო - საქართველო ხდებოდა და უნდა გამხდარიყო სხვა ქვეყნებისთვის საჭირო, ხოლო ეს საჭიროება უნდა ტრანსფორმირებულიყო შემოსავალსა და უსაფრთხოებაში“, - აღნიშნულია სტატიაში, - „რეალურად, ნავთობსადენებმა და გეოგრაფიულმა მდებარეობამ ნამდვილად შეიტანა გარკვეული წვლილი ქვეყნის ეკონომიკური და ენერგეტიკული განვითარების სფეროში, თუმცა, ცხადი გახდა, რომ ეს არ იყო საკმარისი ინსტრუმენტი სამომავლო გრადაციისთვის. საჭირო იყო საქართველოს უფრო მეტი სატრანსპორტო და ეკონომიკური ინტეგრაცია ფართო რეგიონალურ ჭრილში“. სრულად... წყარო: ორგანიზაციის ვებგვერდი

თბილისი. ევროკავშირი (EU) და გაეროს განვითარების პროგრამა (UNDP) აგრძელებენ განაცხადების მიღებას საგრანტო პროგრამაზე: „სტრატეგიული ინვესტიციები ზრდისთვის შეფუთვების მიწოდების ჯაჭვის კომპანიებისთვის“.  საგრანტო პროგრამის მიზანია, დახმარება აღმოუჩინოს კომპანიებს, რომელთაც სჭირდებათ თანადაფინანსება ბიზნეს საქმიანობის გასაუმჯობესებლად. ევროკავშირისა და UNDP-ის ხელშეწყობის შედეგად, კომპანიები შეძლებენ გაყიდვებისა და დასაქმების გაზრდას, პროდუქციის ხარისხისა თუ საწარმოო პროცესების გაუმჯობესებას, დამატებითი ღირებულების შემქმნელი პროდუქტებისა თუ მომსახურების შექმნასა და განახლებას.  საგრანტო პროგრამა ტარდება ევროკავშირის მიერ დაფინანსებული ინიციატივის ფარგლებში „ინოვაციური პროექტი კერძო სექტორის კონკურენტუნარიანობისთვის საქართველოში“, რომელიც ხორცილდება გაეროს სააგენტოების მიერ კერძო სექტორთან თანამშრომლობით და რომლის მთლიანი ბიუჯეტი 6 მილიონ აშშ დოლარს შეადგენს. პროექტის მიზანია, ხელი შეუწყოს ქართულ მეწარმეობას, საკანონმდებლო ველის გაუმჯობესებას, ფინანსებზე ხელმისაწვდომობის გაზრდასა და ევროკავშირთან თანამშრომლობის განმტკიცებას.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრმა (ყოფილი EMC) გამოსცა კვლევის დოკუმენტი: ეთნიკური უმცირესობების დასაქმების პოლიტიკა. დოკუმენტი გამოიცა პროექტის - „ეთნიკური უმცირესობების ინტეგრაციის და უფლებების დაცვის გაძლიერება კვლევის, განათლების, ადვოკატირებისა და ნდობის მშენებლობის გზით“ - ფარგლებში,  „არსებული რეალობა ორმაგად აზიანებს ეთნიკური უმცირესობების დასაქმების პროცესს, რადგან განათლებაზე, სახელმწიფო სერვისებზე, მათ შორის, მხარდამჭერ ეკონომიკურ პროგრამებზე მწირი ხელმისაწვდომობის, სუსტი ენის კომპეტენციებისა და ენის პოლიტიკაში უმცირესობების ენის რადიკალური გამოტოვების, დისკრიმინაციული გარემოს გამო, მათთვის რთული ხდება სოციალურ და ეკონომიკურ ცხოვრებაში ჩართვა და მონაწილეობა.  წინამდებარე დოკუმენტის მიზანია ეთნიკური უმცირესობების დასაქმების პოლიტიკის რელევანტური გამოცდილებების მიმოხილვა, რომელიც შეიძლება გახდეს საინტერესო რესურსი სახელმწიფოსთვის დასაქმების პოლიტიკაში ეთნიკური უმცირესობების სპეციალური საჭიროებების გააზრებისა და დამატებითი მხარდამჭერი პოლიტიკების გატარების პროცესში“. სრულად... წყარო: socialjustice.org.ge