სამეგრელო. ასოციაცია „ათინათში" სამოქალაქო განათლებისა და პედაგოგთა გადამზადების პროგრამის ფარგლებში გაიმართა ვიდეორგოლის ჩვენება: „უსაფრთხო ინტერნეტი – სასარგებლო ინფორმაციის კიდობანია". კლუბის წევრებმა ზუგდიდში ცნობილ ადამიანებთან ჩაწერეს მოკლე ინტერვიუები, სადაც ისინი ინტერნეტის უსარფხოების შესახებ მსჯელობენ. ვიდეორგოლის ჩვენების შემდეგ გაიმართა დისკუსია ინტერნეტის უსარფრთხოების შესახებ. დისკუსიისა და ვიდეორგოლის მომზადების მიზანი იყო საზოგადოებაში უსაფრთხო ინტერნეტის პოპულარიზაცია და ინტერნეტის მომხმარებლის ვალდებულების და პასუხისმგებლობის შესახებ ინფორმაციის გავრცელება. წყარო: civics.ge ვიდეორგოლი – უსაფრთხო ინტერნეტი – სასარგებლო ინფორმაციის კიდობანია

თბილისი. ორგანიზაცია „რადარამი" აგრძელებს ტრადიციას და თებერვლის ბოლოს გეგმავს წიგნის „გარდატეხა: როგორ გავატაროთ ცვლილება, როცა ეს ასე რთულია" გამოცემას და პრეზენტაციას. ჩიპ და დენ ჰითების წიგნის პრეზენტაცია თებერვლის ბოლოს ზუგდიდში გაიმართება. წიგნი ცვლილებებისა და ნებისყოფის ანატომიას ეძღვნება. ნაწყვეტი:  „...არ დაიჯეროთ, ვინმე თუ გეტყვით, რომ ცვლილება იმიტომ ვერ მოხერხდა, რომ ადამიანები ზარმაცები არიან და ცვლილებებს ეწინააღმდეგებიან. პირიქით, წარუმატებლობის მიზეზი ხშირად სრულიად საპირისპირო რამ არის: ცვლილების განხორციელება რთულია იმიტომ, რომ მისი განხორცილების პროცესში ადამიანები ისე იღლებიან, დაწყებული საქმის დასამთავრებლად უბრალოდ ენერგია აღარ ჰყოფნით..." წყარო: ორგანიზაციის გვერდი სოციალურ ქსელში

შიდა ქართლი. 9–10 თებერვალს, სამოქალაქო განვითარების ინსტიტუტის „ბავშვზე ორიენტირებული სკოლის ადვოკატირების" პროექტის ფარგლებში, გორში გაიმართა ტრენინგი: „კლასის მართვის თეორიული და პრაქტიკული ასპექტები". ტრენინგი მიმდინარეობდა აკრედიტებული მოდულის შესაბამისად. მრავალფეროვან სატრენინგო მასალასთან ერთად მონაწილეებს დაურიგდა ინსტიტუტის მიერ მომზადებული წიგნი –  „ბავშვზე ორიენტირებული სკოლის გზამკვლევი". წყარო: cdi.org.ge

თბილისი. "კივიტას გეორგიკამ" სკოლამდელი განათლების მდგომარეობასა და საკანონმდებლო ინიციატივებზე შეხვედრა გამართა. შეხვედრის მონაწილეებმა ისაუბრეს ალტერნატიული ბაღების მნიშვნელობაზე, სკოლამდელი განათლების ხარისხზე, პროგრამაზე, ბავშვისა და პედაგოგის საჭიროებებსა და სკოლამდელი განათლების მუნიციპალურ სტრატეგიებზე. შეხვედრას საპარლამენტო უმრავლესობის წევრი თინა ხიდაშელი ესწრებოდა, რომელმაც სკოლამდელი განათლების რეგულირების მიზნით საკანონმდებლო ინიციატივაზე და მოსალოდნელ ცვლილებებზე ისაუბრა, რომლის მიხედვითაც  სკოლამდელი განათლება საყოველთაო და უნივერსალური უნდა გახდეს. პროექტი, რომლის ფარგლებშიც აღნიშნული შეხვედრა მოეწყო, გაეროს ბავშვთა ფონდის დაფინანსებით ხორციელდება. წყარო: civitas.ge

თბილისი. თავისუფალი დებატების ლიგა სტუდენტებს იწვევს საქართველოს ჩემპიონატზე პოლიტიკური ფორმატის დებატებში. მონაწილეობის მსურველებს შეუძლიათ როგორც გუნდური, ასევე ინდივიდუალური აპლიკაციის გაგზავნა.  აპლიკაციების მიღების ბოლო ვადაა 25 თებერვალი სრულად წყარო: ორგანიზაციის გვერდი სოციალურ ქსელში

იმერეთი. ქუთაისის განათლების განვითარების და დასაქმების ცენტრი „სამოქალაქო განათლებისა და პედაგოგთა გადამზადების პროგრამის ფარგლებში აცხადებს კონკურსს „გაიცანით, ის გმირია“. კონკურსში მონაწილეობის მიღება შეუძლიათ პროგრამაში ჩართულ იმერეთის რეგიონის საჯარო სკოლების მე–9-10-11-12 კლასის მოსწავლეებს, როგორც ინდივიდუალურად ასევე ჯგუფურად. კონკურსის მონაწილეებმა უნდა წარმოადგინონ ცნობილი ან ნაკლებად ცნობილი სამოქალაქო გმირის შესახებ პრეზენტაცია. ნამუშევრების წარდგენა მსურველებს შეუძლიათ 10 მარტამდე. სრულად წყარო: ორგანიზაციის გვერდი სოციალურ ქსელში

თბილისი. კონსტიტუციონალიზმის კვლევისა და ხელშეწყობის რეგიონალური ცენტრი ჟურნალისტებისთვის მიზნობრივი კვალიფიკაციის ამაღლების კურსებს გამართავს.  „კონსტიტუციონალიზმის გაკვეთილები“ მარტი, აპრილი, მაისის თვეებში გაიმართება. გამართული ლექციები და პრაქტიკული მეცადინეობები დაკავშირებული იქნება რეალურ მოვლენებთან და კონსტიტუციოური პროექტის შემუშავება–განხილვაში მონაწილე პოზიციებთან. წყარო: ორგანიზაციის გვერდი სოციალურ ქსელში

თბილისი. მშვიდობის, დემოკრატიის და განვითარების კავკასიურმა ინსტიტუტმა ლოგიკური ჩარჩოს ანალიზის  ქართულენოვანი მოკლე ვიდეო ლექციები გამოაქვეყნა. აღნიშნული მოდელი აქტიურად გამოიყენება პროექტების შემუშავებისას, იგი გაყოფილია სამ ნაწილად. პირველ ნაწილი მოიცავს მეთოდის განმარტებას, მეორე ნაწილი მიმართულია პრობლემების ანალიზის შემუშავებაზე, ხოლო მესამე ნაწილი კი დაგეხმარებათ პრობლემების ანალიზზე დაყრდნობით შესაბამისი მიზნების ჩამოყალიბებაში. მთლიანობაში ეს პრეზენტაცია საშუალებას მისცემს მომხმარებელს გაერკვეს ამ მეთოდის მნიშვნელობასა და მისი გამოყენების საჭიროებებში. ვიდეო ლექცია – მეთოდის განმარტება ვიდეო ლექცია – პრობლემების ანალიზის შემუშავება ვიდეო ლექცია – მიზნების ანალიზი წყარო: ორგანიზაციის გვერდი სოციალურ ქსელში

თბილისი. ბიოლის ფონდის ბიბლიოთეკას გასული წლის განმავლობაში 300-მდე პუბლიკაცია შეემატა. მთლიანად ბიბლიოთეკაში თავმოყრილია 2000 პუბლიკაციაზე მეტი  სხვადასხვა ფორმატის ლიტერატურა – წიგნები, ბროშურები, პერიოდული გამოცემები,  CD გერმანულ, ინგლისურ, რუსულ და ქართულ ენებზე. ბიბლიოთეკა ღიაა სტუდენტებისა და აკადემიური სფეროს წარმომადგენლებისთვის, რომელთაც შეუძლიათ გაეცნონ უახლეს ლიტერატურას სოციალურ მეცნიერებებში, აგრეთვე ადამიანის უფლებების, დემოკრატიის, ეკოლოგიისა და მდგრადი განვითარების, გენდერული თანასწორობის, კონფლიქტების ტრანსორმაციის და საბჭოთა წარსულის გააზრების სფეროებში. კატალოგი –  წყარო: georgien.boell-net

სამცხე–ჯავახეთი.სამოქალაქო განთლებისა და პედაგოგთა გადამზადების პროგრამის ფარგლებში ქალაქ ბორჯომის N 3 საჯარო სკოლაში  გაიმართა კონფერენცია თემაზე: „დავითიდან თამარამდე". კონფერენციის ინიციატორები ადიგენის მუნიციპალიტეტის სოფელ არალის საჯარო სკოლის მოსწავლეები იყვნენ. კონფერენციაში საჯარო 8 სკოლის სამოქალაქო კლუბის წევრებმა მიიღეს მონაწილეობა. მოეწყო მოსწავლეთა ნამუშევრების პრეზენტაცია, რომლიდანაც სამი საუკეთესო ნამუშევარი გამოვლინდა. გამარჯვებული  სკოლების სამოქალაქო კლუბებს  წიგნიერების დონის ამაღლების მიზნით, სამახსოვროდ  საკითხავი ლიტერეტურა, ხოლო  კონფერენციაში მონაწილეობისათვის ყველა პრეზენტატორს  სერთიფიკატი გადაეცა. კონფერენცია მიზნად ისახავდა საკლუბო ინიციატივების ხელშეწყობას და პროგრამაში ჩართული სხვადასხვა სამოქალაქო კლუბების ურთიერთგაცნობასა და  დამეგობრებას.

თბილისი.  სიქას ახალგაზრდა ტრენერებმა თსუ–ს სტუდენტებისთვის კარლ–პოპერის ფორმატის დებატების შესახებ სემინარი 9 თებერვალს გამართეს. 25 მონაწილე ფორმალური დებატების სხვადასხვა სახეობას გაეცნო და კარლ–პოპერის ფორმატი დეტალურად განიხილა. ღონისძიების ფარგლებში საჩვენებელი დემო–დებატი მოეწყო. სემინარი  „ელსას - ევროპის იურისტ სტუდენტთა ასოციაცია თბილისის" პროექტის ფარგლებში მოეწყო, რომელიც თბილისის უნივერსიტეტებს შორის დებატების ტურნირის მოწყობას ითვალისწინებს. 

თბილისი. CISV (ბავშვთა საერთაშორისო საზაფხულო სოფლები)- საქართველოს ინიციატივით 9–-10 თებერვალს „მოზაიკის ტრენინგი“ ჩატარდა. მოზაიკა ორგანიზაციის ერთ––ერთი პროგრამაა, რომელიც ლოკალური პრობლემების გამოვლენასა და გადაჭრის გზების ძიებას მოიცავს. ტრენინგის ფარგლებში მონაწილეებმა პროექტების დაგეგმვისა და განხორციელების შესახებ მიიღეს ინფორმაცია. ტრენინგი შვედეთიდან მოწვეულმა ტრენერებმა ჩაატარეს. წყარო: cisvgeorgia.org

იმერეთი. 8 თებერვალს, სამოქალაქო განათლებისა და პედაგოგთა გადამზადების პროგრამის პარტნიორი სკოლების მოსწავლებისათვის ფოტო სკოლის მორიგი შეხვედრა ჩატარდა.  ფოტო სკოლა ქუთაისის განათლების განვითარების და დასაქმების ცენტრტში №7 საჯარო სკოლის სამოქალაქო კლუბის ინიციატივით დაარსდა, რომელშიც გაერთიანდა ქუთაისის პროგრამის სამიზნე სკოლების ფოტოგრაფიით დაინტერესებული მოსწავლეები. შეხვედრაზე მსმენელებმა მიიღეს ინფორმაცია მხატვრული ფოტოს, პორტრეტის, ახალი ამბის და ფარული გადაღების შესახებ. ასევე გაეცვნენ ფოტოგრაფიის ისტორიას და ცნობილი ფოტოგრაფების ცხოვრებას.ფოტო სკოლის მსმენელები მონაწილეობას მიიღებენ ქუთაისის განათლების განვითარების და დასაქმების ცენტრის მიერ პროგრამის ფარგლებში გამოცხადებულ ფოტო კონკურსში. წყარო: kedec.ge

იმერეთი.ქუთაისის ახალგაზრდული ცენტრის წევრებისათვის დისკუსია „ათასწლეულის განვითარების მიზნები საქართველოში" 8 თებერვალს ჩატარდა. დისკუსიაზე მსმენელებს მიეწოდათ ინფორმაცია თუ რა უნდა იქნას მიღწეული 2015 წლისათვის და განხილული იქნა ათასწლეულის 8 მიზანი, რომელთა განხორციელების ვალდებულება საქართველომ ათასწლეულის დეკლარაციაზე ხელის მოწერით აიღო. დისკუსია „საქართველოში ეროვნული ინტეგრაციის გაძლიერების პროექტის" ფარგლებში ჩატარდა. წყარო: ორგანიზაციის გვერდი სოციალურ ქსელში

ქვემო ქართლი. სიქა 17–დან 25 წლამდე ნებისმიერ ლიდერობით და დებატებით დაინტერესებულ ახალგაზრდას კლუბში „უნარები პროფესიული წარმატებისთვის"  იწვევს.  კლუბის პროგრამის ფარგლებში მონაწილეები დებატების ხელოვნებას, ანალიტიკურ და შემოქმედებით აზროვნებას, აქტივობების დაგეგმვასა და განხორციელებას ისწავლიან.  განაცხადის მიღების ბოლო ვადაა 12 თებერვალი.  სრულად

თბილისი.  ახალგაზრდა დიპლომატთა კლუბი 8–10 თებერვალს პარლამენტის მოდელირების  ზამთრის სესიას გამართავს. პროექტში მონაწილე 16–დან 22 წლამდე ახალგაზრდები ღონისძიების ფარგლებში საქართველოს პარლამენტის მუშაობის სპეციფიკას გაეცნობიან. ახალგაზრდებს საშუალება ექნებათ გახდნენ მოვლენათა მონაწილენი და თავად გადაწყვიტონ ქვეყნის წინაშე არსებული პრობლემები. წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა დიპლომატთა კლუბი და თსუ სოციალურ და პოლიტიკურ მეცნიერებათა ფაკულტეტის საერთაშორისო ურთიერთობების მიმართულება აცხადებს ნაშრომების მიღებას სტუდენტური კონფერენციისთვის. მონაწილეებს საშუალება აქვთ გააგზავნონ ნაშრომი მათთვის საინტერესო საკითხზე საერთაშორისო ურთიერთობების დისციპლინის ფარგლებში.  ნაშრომის მიღების ბოლო ვადაა 24 თებერვალი 23:59 საათი. სრულად: http://www.facebook.com/events/464304523623207/?ref=22 წყარო: ორგანიზაციის გვერდი სოციალურ ქსელში

სამცხე–ჯავახეთი. 5 თებერვალს, ,,სამოქალაქო განათლებისა და პედაგოგთა გადამზადების პროგრამის ფარგლებში" ახალციხის მუნიციპალიტეტის აწყურის  საჯარო სკოლის სამოქალაქო კლუბის წევრებს ჩაუტარდათ ტრენინგი  თემაზე: ,,მასობრივი გამოკითხვა". ტრენინგის მონაწილეები გაეცნენ მასობრივი გამოკითხვის ტიპებს  და აქტიურად ჩაერთვნენ ტრენინგის მსვლელობაში, ახალგაზრდებისათვის აღნიშნული თემატიკა საინტერესო იყო. ტრენინგის ორგანიზატორი იყო საზოგადოებრივი ორგანიზაცია ,,ახალციხის ახალგაზრდული ცენტრი".

თბილისი. მშვიდობის, დემოკრატიის და განვითარების კავკასიური ინსტიტუტი და კონრად ადენაუერის ფონდის სამხრეთ კავკასიის ოფისი უკვე სთავაზობს 18–დან 30 წლამდე ახალგაზრდებს სალექციო კურსს –  მსოფლიო რელიგიების შესახებ. პროექტ „მსოფლიო რელიგიათა კლუბის" ფარგლებში, კურსის მონაწილეებს ხუთი თვის განმავლობაში საშუალება ექნებათ გაეცნონ მსოფლიოში ყველაზე გავრცელებული რელიგიების (იუდაიზმი, ქრისტიანობა, ისლამი, ჰინდუიზმი, ბუდიზმი და ა.შ) ძირითად არსს და ისტორიას, დაესწრონ შესაბამისი დარგის წამყვანი სპეციალისტების ლექციებს და შეხვდნენ ამა თუ იმ რელიგიის წარმომადგენლებს. კურსი ასევე ითვალისწინებს თბილისის რელიგიური ძეგლების და ცენტრების დათვალიერებას. ლექციები ჩატარდება 27 თებერვლიდან ყოველ ოთხშაბათს 16–იდან 18 საათამდე. ლექციების კურსი უფასოა.  განაცხადის შეტანა შეუძლიათ 18–იდან 30 წლამდე ახალგაზრდებს. განაცხადის შემოტანის ბოლო ვადაა 15 თებერვალი. განაცხადის ფორმა იხილეთ საიტზე: www.cipdd.org წყარო: cipdd.org

კახეთი. „ეროვნული ინტეგრაციის გაძლიერება საქართველოში–თელავის ცენტრმა"  ადვოკატირებასა და ლიდერობაზე ტრენინგი სკოლის მოსწავლეებისათვის თელავის განათლების განვითარებისა და დასაქმების ცენტრში  ჩაატარა. თეორიული და პრაქტიკული სამუშაოები  ლიდერობის, გუნდური მუშაობისა და ადვოკატირების კამპანიაზე იყო ორიენტირებული. ტრენინგში თელავის ექვსი სკოლის მოსწავლეებმა მიიღეს მონაწილეობა. წყარო : ორგანიზაციის გვერდი სოციალურ ქსელში

თბილისი. საქართველოს სოციალურ მუშაკთა ასოციაცია თბილისის სახელმწიფო უნივერსიტეტის სოციალური მუშაობის მიმართულების სტუდენტებს იწვევს შეხვედრაზე, რომელზეც განხილული იქნება პრაქტიკის განხორციელებასთან დაკავშირებული საკითხები და არსებული პრობლემების მოგვარება. შეხვედრა 4 თებერვალს, 16:00 საათზე საქართველოს სოციალურ მუშაკთა ასოციაციის ოფისსში გაიმართება. მისამართი : ალ. ყაზბეგის #44. წყარო : ორგანიზაციის გვერდი სოციალურ ქსელში

იმერეთი. ქუთაისის ახალგაზრდული ცენტრმა თავისი წევრებისათვის მოაწყო დოკუმენტური ფილმის „დების" ჩვენება. ფილმი მოგვითხრობს პალიატიური მზრუნველობის ქვეშ მყოფი ადამიანების ცხოვრებას ფერისცვალების დედათა მონასტრეთან არსებულ ჰოსპისის – მოწყალების სახლში. ახალგაზრდული ცენტრის წევრებმა ფილმის დასრულების შემდეგ გამოთქვეს საკუთარი შეხედულებები პალიატიური მზრუნველობის და ჰოსპისების არსებობის მნიშვნელობის შესახებ. ფილმის ჩვენება ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ორგანიზაციის გვერდი სოციალურ ქსელში