სამცხე–ჯავახეთი. 30 იანვარს, ახალციხის დემოკრატიული ჩართულობის ცენტრში, ზრდასრულთა განათლების ასოციაციის ორგანიზებით, ,,ინგლისური ენის შესწავლის ხელმისაწვდომობის (Accss)  სასტიპენდიო პროგრამის" კურსდამთავრებულებს სერთიფიკატები გადაეცათ და პროგრამის შედეგები შეჯამდა. აღნიშნული პროგრამა საქართველოს ოთხ ქალაქში ხორციელდება და მას  ამერიკის საელჩო აფინანსებს. პროგრამის სრული კურსი ახალციხეში 26 მოზარდმა გაიარა. პირველ კურსდამთავრებულებს სერთიფიკატები და საჩუქრები ამერიკის საელჩოს საზოგადოებასთან ურთიერთობის განყოფილების უფროსმა მაიკლ ტერნერმა გადასცა. ინგლისური ენის შესწავლის ხელმისაწვდომობის სასტიპენდიო პროგრამა მიზნად ისახავს ხელმისაწვდომი გახადოს ინგლისური ენის შესწავლა მოზარდებისთვის ეკონომიურად შეჭირვებული ოჯახებიდან. გარდა იმისა, რომ ბავშვები შეისწავლიან ინგლისურ ენას, ისინი ასევე ეზიარებიან ამერიკულ კულტურასა და წეს–ჩვეულებებს და განივითარებენ ლიდერის თვისებებს.

გურია. სამოქალაქო განათლებისა და პედაგოგთა გადამზადების პროგრამის ფარგლებში გურიის ახალგაზრდული რესურს ცენტრის ორგანიზებით, 29 იანვარს ოზურგეთის დემოკრატიული ჩართულობის ცენტრში, გაიმართა შუალედური კონფერენცია. მისი  მიზანი იყო 2012 წლის ივლის-დეკემბრის თვეებში პროგრამის ფარგლებში განხორციელებული ღონისძიებების გაცნობა ადგილობრივი საზოგადოებისათვის. ღონისძიებას ესწრებოდნენ პროგრამის მიზნობრივ სკოლებში მოქმედი სამოქალაქო კლუბებისა და საინიციატივო ჯგუფების წევრები, მხარდამჭერი პედაგოგები, საგანმანათლებლო რესურს ცენტრის წარმომადგენლები და მასმედია. ღონისძიებაზე დააჯილდოვეს პროგრამის სტაჟირების კომპონენტის მონაწილე 5 მოზარდის და მასპინძელი ორგანიზაციები.

იმერეთი. 30 იანვარს, ქუთაისის დემოკრატიული ჩართულობის ცენტრში  გაიმართა ტრენინგი საპროექტო წინადადების წერისა და ფონდების მოძიების საკითხებზე. მას ილიას სახელმწიფო უნივერსიტეტის პიარ სამსახურის უფროსი ლანა ღვინჯილია უძღვებოდა. ტრენინგი განკუთვნილი იყო არასამთავრობო ორგანიზაციებისა  და სტუდენტებისთვის. შეხვედრის პირველ ნაწილი სამოქალაქო აქტივიზმის თემას შეეხო, კონკრეტულად განხილული იყო სოციალური ქსელების, მედიისა და მოსახლეობის აქტივოის საკითხები. ტრენინგის მეორე ნაწილი პროექტის სტრუქტურისა და დაწერის ტექნიკების განხილვას დაეთმო. შეხვედრის ბოლოს გაიმართა ფილმის ჩვენება, რომელიც პრაღის 1968 წლის მოვლენებს ასახავდა.

სამეგრელო.25 იანვარს, ზუგდიდში, ასოციაცია „ათინათში" ჩატარდა „სამოქალაქო განათლებისა და პედაგოგთა გადამზადების პროგრამის" შუალედური ღონისძიება. ღონისძიებაზე წარმოდგენილი იყო სამოქალაქო კლუბების მიერ დაგეგმილი და განხორციელებული ინიციატივები, მცირე გრანტების პროგრამის ფარგლებში დაფინანსებული პროექტების პრეზენტაცია, სოციალური მედიის ფარგლებში ჩატარებული ტრენინგების შედეგები და წარმატებული ბლოგის პრეზენტაცია. ღონისძიებაზე სერთიფიკატებითა და სიგელებით დაჯილდოვდნენ პროგრამაში აქტიურად ჩართული სკოლები. ღონისძიებას ესწრებოდა ზუგდიდის მუნიციპალიტეტის გამგეობის, ზუგდიდის საკრებულოს, ასევე, სხვადასხვა პარტნიორი საზოგადოებრივი ორგანიზაციებისა და პარტნიორი სკოლების წარმომადგენლები.

შიდა ქართლი. საზოგადოება „ბილიკმა" პროექტის – „ჩემს თავზე საუბარი" – შედეგების პრეზენტაცია გამართა. მოეწყო პროექტის ფარგლებში გადაღებული ფოტოების გამოფენა და ფილმების ჩვენება. პროექტში, რომელიც „ღია საზოგადოების ფონდის” ფინანსური მხარდაჭერით განხორციელდა ჩართულნი იყვნენ ქართველი, აზერბაიჯანელი, სომეხი და ჩეჩენი მოზარდები. პროექტი მიზნად ისახავდა მედია კლუბების ჩამოყალიბებას, რომლის წევრებიც შეძლებდნენ საკუთარი აზრის თავისუფლად გამოხატვას, სხვადასხვა აქტივობებში ჩართვას, დებატების და დისკუსიების გამართვას საზოგადოებისთვის მნიშვნელოვან საკითხებზე და პუბლიკაციების მომზადებას მედიასაშუალებებისთვის. პროექტის ფარგლებში ჟურნალისტიკის სტუდიის სხვადსხვა ტრენინგ–კურსი გაირა 100–მდე მოზარდმა, რომლებმაც შეისწავლეს საგაზეთო ჟურნალისტიკა, ფოტოგრაფია და მცირეფორმატიანი ფილმების წარმოება. მოეწყო 2 საზაფხულო მედიაბანაკი დაბა ურეკში, რომელშიც ჩართული იყო 80–მდე მოზარდი. გაიმართა 3 ფოტოგამოფენა. პროექტი 2 წლის მანძილზე – 2011 წლის 1 იანვრიდან 2012 წლის 31 დეკემბრამდე ხორციელდებოდა.

თბილისი. მშვიდობის, დემოკრატიის და განვითარების კავკასიური ინსტიტუტის რეგიონული განვითარებისა და ადგილობრივი თვითმმართველობის რესურს ცენტრში შესაძლებლობა გეძლევათ გაეცნოთ პოლ ჰერსტის და გრემ ტომპსონის წიგნს: „გლობალიზაცია-კრიტიკული ანალიზი". ავტორები აღნიშნავენ, რომ ცნება გლობალიზაცია საკმაოდ ფართოდ გამოყენებადი ტერმინია. პოლიტიკურ და აკადემიურ დისკუსიებში ხაზგასმულია ბოლო დროს მიმდინარე სწრაფი ეკონომიკური გლობალიზაცია, რაც წარმოადგენს ინტერნაციონალური კაპიტალიზმის განვითარების თვისობრივად ახალ ეტაპს. თუმცა აქვე ჩნდება კითხვა: ასახავს თუ არა ეს რეალობას? წიგნში გამოხატულია სკეპტიციზმი გლობალურ ეკონომიკურ პროცესებთან მიმართებაში და ხაზგასმულია ეროვნული და საერთაშორისო ეკონომიკის მნიშვნელობა. წყარო: participate.ge

სამცხე–ჯავახეთი. 22 იანვარს, ახალციხის მუნიციპალიტეტის სააქტო დარბაზში ორგანიზაცია ,,ახალციხის ახალგაზრდულმა ცენტრმა” ,,სამოქალაქო განათლებისა და პედაგოგთა გადამზადების პროგრამის” ფარგლებში ექვსი თვის მუშაობა შეაჯამა. შეხვედრას პროგრამაში მონაწილე რეგიონის არაქართული და ქართული საჯარო სკოლების მოსწავლეები, მასწავლებლები, საგანმანათლებლო რესურსცენტრის, არასამთავრობო ორგანიზაციის და ადგილობრივი მედიის წარმომადგენლები ესწრებოდნენ. პროგრამის ფარგლებში ორგანიზაციამ რეგიონის მასშტაბით 66 საჯარო სკოლაში სამოქალაქო კლუბები გააქტიურა. შეხვედრაზე თავიანთი საქმიანობის შესახებ ანგარიში რვა კლუბმა წარმოადგინა.   PH International საქართველოს სამოქალაქო განათლებისა და პედაგოგთა გადამზადების პროგრამის  გრანტების მენეჯერის თამარ ფრუიძის განმარტებით, სამოქალაქო კლუბებმა ბოლო ექვსი თვის განმავლობაში არაერთი სამოქალაქო აქტივობა განახორციელეს და  ითანამშრომლეს ადგილობრივ ხელისუფლებასთან; მონაწილეობდნენ სოციალურად დაუცველი ოჯახებისთვის დაგეგმილ საქველოქმედო აქციებში, ჩართული იყვნენ სხვადასხვა ტრენინგებში და ა.შ. სამოქალაქო განათლებისა და პედაგოგთა გადამზადების პროგრამა 2004 წლის ივნისში დაიწყო და 2014 წლის ივნისში დასრულდება.

თბილისი. კავკასიის ეკონომიკური და სოციალური კვლევითი ინსტიტუტი (CIESR) 21–23 იანვარს, პროექტის ფარგლებში - „V4 С3-ის ევროინტეგრაციისთვის" - აწყობს საჯარო ლექციების ციკლს საქართველოს სხვადასხვა უმაღლესი სასწავლებლების სტუდენტების, აკადემიური პერსონალისა და მედიის წარმომადგენლებისთვის. საჯარო ლექციის მიზანია უმაღლესი სასწავლებლების სტუდენტებს, და აკადემიურ პერსონალსა და მედიის წარმომადგენლებს მიაწოდოს ინფორმაცია ზემოაღნიშნული პროექტის შესახებ, ასევე „აღმოსავლეთის პარტნიორობის" კონტექსტში საქართველოს სოციალურ-ეკონომიკური პოლიტიკის საკითხები ევროინტეგრაციასთან მიმართებით. „აღმოსავლეთის პარტნიორობაში" საქართველოს მონაწილეობა ქვეყანას მრავალი გამოწვევისა და რეფორმის გატარების აუცილებლობის წინაშე აყენებს. ერთის მხრივ, ჰარმონიზაციის უპრეცენდენტო შესაძლებლობები და, მეორე მხრივ, ამისთვის საჭირო რესურსების აკუმულირება, მიმდინარე პერიოდის მნიშვნელოვანი გამოწვევებია. საჯარო ლექციები ტარდება პროექტის ფარგლებში - „V4 С3-ის ევროინტეგრაციისთვის".  პროექტის ხანგრძლივობა შეადგენს 12 თვეს და ხორციელდება საერთაშორისო ფონდ „ვიშეგრადის" (International Visegrad Fund) ფინანსური მხარდაჭერით.

იმერეთი.ქუთაისის დემოკრატიული ჩართულობის ცენტრში, 18 იანვარს „მაკლეინის ასოციაცია ბავშვებისთვის" ინიციატივით გაიმართა ლექსცია. იგი ინკლუზიური განათლების საკითხებს ეხებოდა. შეხვედრას ესწრებოდნენ დღის ცენტრების, სკოლებისა და საბავშვო ბაგა–ბაღების პედაგოგები. რომლებიც ტრენინგის ფარგლებში შეზღუდული შესაძლებლობების მქონე ადამიანების განვითარებისა და ემოციური სფეროს დარღვევების შესახებ ინფორმაციას გაეცნენ. ტრენინგი ოთხი დღე გაგრძელდება.

გურია.  17 იანვარს, ოზურგეთის დემოკრატიული ჩართულობის ცენტრში გაიმართა ინგლისური ენის შესწავლის ხელმისაწვდომობის სასტიპენდიო პროგრამის პირველი ნაკადის კურსდამთავრებულთა დაჯილდოვების ცერემონია. ინგლისური ენის შესწავლის ხელმისაწვდომობის სასტიპენდიო პროგრამა ხორციელდება ამერიკული ორგანიზაცია PH –ინტერნატინალის მიერ და გურიაში მისი პარტნიორია „გურიის ახალგაზრდული რესურს ცენტრი". აღნიშნული პროგრამა გახორციელდა საქართველოს ოთხ ქალაქში: რუსთავში, გორში, ახალციხესა და ოზურგეთში. იგი მიზნად ისახავს ხელმისაწვდომი გახადოს ინგლისური ენის შესწავლა  მოზარდებისთვის სოციალურად დაუცველი და ეკონომიკურად შეჭირვებული ოჯახებიდან. სასწავლო კურსი ორი წელი მიმდინარეობდა და მოიცავდა სწავლების 4 სემესტრს 2011 წლის მარტიდან 2012 წლის დეკემბრის ჩათვლით. პროგრამაში მონაწილეობდა 14-18 წლამდე 25 მოზარდი სოციალურად დაუცველი ოჯახებიდან. ინგლისური ენის გაკვეთილებთან ერთად, მათთვის ჩატარდა 10-მდე დამატებითი ღონისძიება ამერიკული კულტურის, ტრადიციების, ისტორიისა და წეს-ჩვეულებების შესახებ. მოეწყო ორი საზაფხულო ბანაკი. გარდა იმისა, რომ ბავშვებმა შეისწავლეს ინგლისური ენა, მათ გაიცნეს ამერიკულ კულტურასა და წეს-ჩვეულებებს, განივითარეს ლიდერის თვისებები

კახეთი. კახეთის რეგიონის სკოლების სამოქალაქო კლუბების წევრები   დედოფლისწყაროს მუნიციპალიტეტის სოფ. საბათლოს სკოლას ესტუმრნენ და სკოლის  ბიბლიოთეკისათვის თანატოლებს  წიგნები ჩაუტანეს.  სოფელი საბათლო მდებარეობს  საქართველო - აზერბაიჯანის საზღვარზე და არის ყველა დასახლებული პუნქტიდან  საკმაოდ მოშორებული. იქ მცხოვრებ აზერბაიჯანელ მოსწავლეებს უჭირთ ქართული ენის კარგად ათვისება და თანატოლებთან ინტეგრაცია.  სწორედ ამ პრობლემის მოგვარებას  ითვალისწინებდა სამოქალაქო კლუბების მოსწაველეების ინიციატივა- განეახლებინათ სკოლის ბიბლიოთეკა ქართული წიგნებით და დაემყარებინათ მჭიდრო ურთიერთობა საბათლოს სკოლი მოსწავლეებთან. კახეთის სხვადასხვა  სკოლის მოსწავლეებმა შეაგროვეს სხვადასხვა სახის მხატვრული ლიტერატურა და ესტუმრნენ საბათლოს საჯარო სკოლას. მოსწავლეებმა ასევე ჩაიტანეს საკლუბო მუშაობისთვის საჭირო ინვენტარი და სამოქალაქო კლუბის მუშაობის პრეზენტაცია ჩაატარეს.  სამოქალაქო კლუბის წევრებმა თანატოლებს გამოცდილება გაუზიარეს. ისუბრეს, როგორ ხდება სკოლაში, თემში პრობლემის გამოვლენა და ამ პრობლემის მოსაგვარებლად საჭირო გზების მოძებნა. შეხვედრის ბოლოს სკოლებს შორის ერთობლივი საქმიანობები დაიგეგმა. წყარო:civics.ge

ქვემო ქართლი. 15 იანვარს დემოკრატიული ჩრთულობის ცენტრში სამოქალაქო განათლების პროგრამის ფარგლებში ჩატარდა შეხვედრა სტუმართან. სტუმარი იყო სიქა-ს ქართველი მოხალისე დათო ოდიკაძე რომელიც ამჟამად არის EVS პროგრამის მოხალისე რუმინეთში. შეხვედრა საინტერესოდ ჩაიარა. სამოქალაქო კლუბების ბავშვებმა და სტუმარმა ისაუბრეს მოხალისეობის საკითხებზე, დამსწრე საზოგადოებამ  ბევრი რამ შეიტყეს იმაზე თუ რას ნიშნავს იყო მოხალისე. წყარო: ორგანიზაციის გვერდი სოციალურ ქსელში

თბილისი. კულტურულ ურთიერთობათა ცენტრი – კავკასიური სახლი კავკასიოლოგიური სახალხო უნივერსიტეტის ფარგლებში აცხადებს  ახალგაზრდების მიღებას. აღნიშნულის ფარგლებში მსმენელბი გაეცნობიან და მიიღებენ განათლებას კავკასიის ხალხთა ისტორიის, კულტურის, ეკონომიკის, დემოგრაფიის, ეკოლოგიის, პოლიტოლოგიის სფეროებში. სტუდენტები ასევე მიიღებენ ობიექტურ ინფორმაციას კავკასიის რეგიონში მიმდინარე საზოგადოებრივ– პოლლიტიკური პროცესების შესახებ. აღნიშნული ხორციელდება კავკასიური სახლის პროექტის – „კავკასია ჩვენი საერთო სახლია – პოლიტიკური სკოლა მშვიდობიანი კავკასიისათვის" – ფარგლებში, რომელსაც ფინანსურ მხარდაჭერას უწევს ევროპული ფონდი HORIZON". სრულად წყარო – ორგანიზაციის გვერდი სოციალურ ქსელში

თბილისი. თავისუფლების კლუბი ზამთრის სკოლაში იწვევს ახალგაზრდებს. ზამთრის სკოლა გაიმართება ბაზალეთის ტრენინგ ცენტრში 18–24 იანვარს და ახალგაზრდებს საშუალება ექნებათ მოისმინონ ლექსიცები და სემინარები ისეთ თემებზე როგორიცაა – დემოკრატია, პოლიტიკური და პიროვნული თავისუფლება. ასევე რეგულაციების და თავისუფალი ბაზარის, ანტიმონოპოლიური კანონმდებლობის, ეკონომიკური თავისუფლებისა და ეკონომიკური ზრდის, თავისუფალი ვაჭრობის შეთანხმებების, ჩრდილო ატლანტიკური ალიანსის და სხვა მრავალი თემის შესახებ დეტალური ინფორმაცია წყარო: clubofliberty.org

თბილისი. „რადარამი" იწყებს კონკურსს „ვიკითხოთ და ვიკამათოთ".კონკურსის ფარგლებში „რადარამის" მიერ გამოცემეული წიგნების ერთგულ მკითხველს მოეთხოვებათ,  დაწერონ საკუთარი შთაბეჭდილება, მოსაზრება, ანალიზი, მიმოხილვა ორგანიზაციის მიერ უკვე გამოცემული 5 წიგნიდან ერთ-ერთზე (ან ხუთივეზე სურვილისამებრ). შემდეგ ნაწერი გააგზავნონ მისამართზე info@radarami.org ან მიწერონ სოციალურ ქსელში ორგანიზაციას 31 იანვრის ჩათვლით.  ყველაზე საინტერსო 5 მიმოხილვა გამოვლინდება „რადარამის" თანამშრომლების მიერ და სოციალური ქსელის მეშვეობით. პირველ ხუთეულს საჩუქრად გადაეცემა „რადარამის" წიგნები. ასევე სურვილისამებრ,  ეს ადამიანები ჩაერთვებიან ახალი წიგნების პრეზენტაციის კამპანიაში საქართველოს სხვადასხვა რეგიონში. „ჩვენ გვაინტერესებს, რამდენად საინტერესო და გასათვალისწინებელია ქართველი მკითხველისათვის წიგნების ავტორთა მოსაზრებები და რამდენად ახლოსაა მათ მიერ წამოჭრილი პრობლემები ქართულ რეალობასთან", – ნათქვამია ორგანიზაციის ოფიაციალურ გვერდზე სოციალურ ქსელში  სრულად წყარო:  ორგანიზაციის გვერდი სოციალურ ქსელში

იმერეთი.20 დეკემბერს ქუთაისის ახალგაზრდული ცენტრის წევრები საქართველოს ენერგეტიკისა და წყალმომარაგების მარეგულირებელ ეროვნულ კომისიამ სტუმრობდნენ სასწავლო ვიზიტის ფარგლებში.  ახალგაზრდები გაეცნენ საქართველოს ენერგეტიკისა და წყალმომარაგების მარეგულირებელი ეროვნული კომისიის მუშაობას და სპეციფიკას. მათ საშუალება ჰქონდა სემეკის ხელმძღვანელებისგან გაეგოთ ენერგეტიკის, გაზისა და წყალმომარაგების სექტორების რეგულირების საკითხები, დაესვათ კითხვები. სასწავლო ვიზიტი შედგა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ორგანიზაციის გვერდი სოციალურ ქსელში

სამცხე–ჯავახეთი. 18 დეკემბერს,  პროექტ ,,ეროვნული ინტეგრაციის გაძლიერება საქართველოში" ფარგლებში, ადიგენის მუნიციპალიტეტის სოფელ არალის საჯარო სკოლაში  საგანმანათლებლო ფილმის ჩვენება მოეწყო. ფილმის ჩვენების შემდეგ მონაწილეებს შორის დისკუსია გაიმართა. პროექტს ,,ეროვნული ინტეგრაციის გაძლიერება საქართველოში" საზოგადოებრივი ორგანიზაცია ,,დემოკრატ მესხთა კავშირი" ახორციელებს.

თბილისი. 2012 წლის 19 დეკემბერს, არასამთავრობო ორგანიზაცია ,,რადარამი” ტონი ჯატის წიგნის ,,უკეთურება ეუფლება ქვეყნიერებას" პრეზენტაციას გამართავს. ღონისძიება „მოსწავლე ახალგაზრდობის ეროვნულ სასახლეში" გაიმართება, დასაწყისი 18.00 საათზე. ტონი ჯატის წიგნი ,,რადარამის” წიგნების სერიის მეხუთე წიგნია. იგი ერთდროულადაა ომის შემდგომი დასავლეთის ისტორიაც და უკომპრომისო პოლემიკაც თანამედროვეობის პოლიტიკური კლიმატისა თუ სოციალური პრობლემების შესახებ. ,,რადარამი” ქართული არასამთავრობო ორგანიზაციაა, რომელმაც უკანასკნელი წლების არამხატვრული ჟანრის ლიტერატურის ქართულ ენაზე თარგმნა და ბეჭდვა დაიწყო. წიგნები ისეთ აქტუალურ თემებს ეხება, როგორიცაა გლობალიზაცია, ეკონომიკა, გარემოს დაცვა, პოლიტიკა, მეცნიერება, ფსიქოლოგია და სხვა. თითოეული მათგანი ისეთი ენითაა დაწერილი, რომ არ მოითხოვს კონკრეტული საკითხის პროფესიონალურ დონეზე ცოდნას და გასაგებია ყველა დაინტერესებული ადამიანისათვის. წყარო: ორგანიზაციის გვერდი სოციალურ ქსელში

აჭარა. 18 დეკემბერს, ბათუმის დემოკრატიული ჩართულობის ცენტრში, ორგანიზაცია „კავკასიონის" და ბათუმის მე-10 საჯარო სკოლის „ლიტერატურული კლუბის" ორგანიზებით გაიმართა „ლიტერატურული მარათონი". მასშიც მონაწილეობდნენ ბათუმის სხვადასხვა სკოლის მოსწავლეები. სსიპ ქალაქ ბათუმის #10 საჯარო სკოლის „ლიტერატურულმა კლუბმა" სასკოლო კლუბების ხელშეწყობის მიზნობრივი პროგრამით აჭარის განათლების, კულტურისა და სპორტის სამინისტროსგან ორჯერ მიიღო დაფინანსება. აღნიშნული გრანტის ფარგლებში კლუბი ატარებს ლიტერატურულ კონკურსებს, მარათონებს, აწყობს ქართული და უცხოური მწერლების შემოქმედების განხილვას. „ლიტერატურული მარათონის" გამარჯვებული გუნდის წევრები წიგნებითა და დიპლომებეით დაჯილდოვდნენ.

გურია. სამოქალაქო განათლებისა და პედაგოგთა გადამზადების პროგრამის ფარგლებში გურიის ახალგაზრდული რესურსცენტრისა და ამავე პროგრამის 20 მიზნობრივი სკოლის სამოქალაქო კლუბებისა და საინიციატივო ჯგუფების ინიციატივით ჩატარდა ესსეების კონკურსი თემაზე „პატრიოტიზმი და კოსმოპოლიტიზმი". შემოსული ესსეები კომპეტენტურმა ჟიურიმ შეაფასა და გამოავლინა სამი ფინალისტი. 2012 წლის 12 დეკემბერს ოზურგეთის დემოკრატიული ჩართულობის ცენტრში ჩატარდა დისკუსია ამავე თემაზე – „პატრიოტიზმი და კოსმოპოლიტიზმი". დისკუსიაში მონაწილეობდნენ სამოქალაქო განათლების პედაგოგები, მოწვეული სტუმრები და მიზნობრივი სკოლების სამოქალაქო კლუბებისა და საინიციატივო ჯგუფების წევრები. შეხვედრა ძალიან საინტერესო გარემოში წარმიმართა, მონაწილეებმა იმსჯელეს პატრიოტიზმისა და კოსმოპოლიტიზმის მნიშვნელობასა და ურთიერთკავშირზე. შეხვედრის მეორე ნაწილში გაიმართა ესსეების კონკურსში გამარჯვებული ფინალისტების დაჯილდოვება. შეხვედრის დასასრულს კი მონაწილე საინიციატივო ჯგუფებმა და სამოქალაქო კლუბებმა ერთმანეთს გაუზიარეს ინფორმაცია მიმდინარე სასწავლო წელს განხორციელებული ინიციატივების შესახებ. ღონისძიებას სულ 60 ადამიანი ესწრებოდა. სამოქალაქო განათლებისა და პედაგოგთა გადამზადების პროგრამა ხორციელდება PH International-ის მიერ ამერიკის საერთაშორისო განვითარების სააგენტოს დაფინანსებით. გურიაში პროგრამის პარტიორია გურიის ახალგაზრდული რესურსცენტრი. გურიის რეგიონში პროექტში 33 სკოლაა ჩართული.

სამცხე–ჯავახეთი. 28 ნოემბერს ახალციხის ახალგაზრდულმა ცენტრმა სოციალურ მედიაში რამდენიმე თვის წინ გამოცხადებული კონკურსის მონაწილეთა ნამუშევრების პრეზენტაცია გამართა და შედეგები შეაჯამა. ბლოგის და თემების პრეზენტაცია გაიმართა  ახალციხის მუნიციპალიტეტის საკრებულოს სხდომათა დარბაზში. თემების განხილვის დასრულების შემდეგ კომპეტენტურმა ჟიურიმ გამარჯვებულები გამოავლინა. მათ ფასიანი საჩუქრები გადაეცათ. ახალციხის ახალგაზრდულმა ცენტრმა პირველ, მეორე, მესამე ადგილზე გასული თემების ავტორები დასაჩუქრა მეხსიერების დისკებით,  ახალციხის მუნიციპალიტეტის საკრებულოს თავჯდომარემ პირველი ადგილის მფლობელ კონკურსანტს სამახსოვროდ წიგნი „მეცნიერების ენციკლოპედია" ინტერნეტი გადასცა. ასევე ყველა მონაწილეს სერთიფიკატები გადაეცა, ხოლო მოსწავლეების მიერ შექმნილი ჩანახატები გამოიფინება ახალციხის ახალგაზრდულ ცენტრში.

გურია. 20 ნოემბერს „ახალგაზრდა პედაგოგთა კავშირის" ბაზაზე არსებულ ახალგაზდული ცენტრის წევრებმა ბავშვთა ძალადობის წინააღმდეგ მიძღვნილი დღე აქციით აღნიშნეს. აქციის მონაწილეები ახალგაზრდა პედაგოგთა კავშირის საპრეზენტაციო დარბაზში შეიკრიბნენ, სადაც თავიანთ სკოლებში დაზადებული ბანერები ერთ დიდი ტრანსფარანტად გააერთიანეს. ამასთანავე, მოისმინეს მცირე სემინარი ბავშვების ძალადობისგან დაცვის აუცილებლობის და ამ დღის მნიშვნელობის შესახებ. ახალგაზრდა პედაგოგთა კავშირიდან მოეწყო ორგანიზებული მსვლელობა ოზურგეთის ქუჩებში. მსვლელობა ჭადრების ბაღში დასრულდა, სადაც მოაწყვეს ბავშვთა უფლებებთან დაკავშირებული, „ლიდერთა სკოლის" მიერ მომზადებული ანიმაციური რგოლების ჩვენება. პარკში შეკრების შემდეგ,  მოხალისეები ახალგაზრდა პედაგოგთა კავშირის საპრეზენტაციო დარბაზში დაბრუნდნენ, სადაც მათთვის გაიმართა მხატვრული ფილმის: „უკანასკნელი გაკვეთილის" ჩვენება და განხილვა. აქციაში  მონაწილეობა მიიღო ოზურგეთის მუნიციპალიტეტის 15-მდე სკოლამ. ახალგაზრდული ცენტრი ახალგაზრდა პედაგოგთა კავშირის ბაზაზე ფუნქციონირებს  პროგრამის  „ეროვნული ინტეგრაციის გაძლიერება საქართველოში"  ფარგლებში, რომელიც დაფინანსებულია აშშ-ის საერთაშორისო განვითარების სააგენტოს (USAID) მიერ და განმახორციელებლი ორგანიზაციაა საქართველოს გაეროს ასოციაცია.