თბილისი. ქალთა საერთაშორისო დღესთან დაკავშირებით, ერთობლივ განცხადებას ავრცელებენ: გაერთიანებული ერების ორგანიზაცია საქართველოში, ევროკავშირის წარმომადგენლობა საქართველოში, ევროსაბჭოს ოფისი საქართველოში. ასევე, ავსტრიის, ამერიკის შეერთებული შტატების, ბელგიის, ბულგარეთის, გაერთიანებული სამეფოს, გერმანიის, ესპანეთის, ესტონეთის, იაპონიის, ირლანდიის, იტალიის, ისრაელის, ლატვიის, ლიეტუვას, ნიდერლანდების, ნორვეგიის, საბერძნეთის, საფრანგეთის, შვედეთისა და შვეიცარიის საელჩოები საქართველოში. „გაერთიანებული ერების ორგანიზაცია და ჩვენი პარტნიორები მზად ვართ დავეხმაროთ კონფლიქტის შედეგად დაზარალებულ ყველა ადამიანს, განსაკუთრებით ქალებს, ბავშვებს, ხანდაზმულებს, უმცირესობების წარმომადგენლებს, შეზღუდული შესაძლებლობების მქონე პირებს, იძულებით გადაადგილებულ პირებს, ლტოლვილებს, და მესამე ქვეყნის მოქალაქებს ამ უდიდესი გაჭირვების ჟამს. სამოქალაქო საზოგადოებასთან, ქალთა უფლებადამცველებთან და მშვიდობისმყოფელებთან პარტნიორობა გადამწყვეტია. ქალთა ამ საერთაშორისო დღეს, საქართველოში მყოფი საერთაშორისო პარტნიორები, ამ რთულ დროს, ჩვენს თანაგრძნობას და სოლიდარობას ვუცხადებთ კონფლიქტის შედეგად დაზარალებულ ყველა ადამიანს, ყოველგვარი დისკრიმინაციის გარეშე. ჩვენ ვუერთდებით გაერთიანებული ერების ორგანიზაციის გენერალური მდივნის მოწოდებას სამხედრო მოქმედებების დაუყოვნებლივი შეწყვეტის შესახებ. საომარი მოქმედებები უნდა დასრულდეს ახლა. საქართველოს და მსოფლიოს მოსახლეობა ითხოვს ამას. ჩვენ შანსი უნდა მივცეთ მშვიდობას“. სრულად... წყარო: georgia.un.org

თბილისი. სოციალური სამართლიანობის ცენტრი სოლიდარობას უცხადებს უკრაინელ ქალებს და რვა მარტს ულოცავს. „წლევანდელი 8 მარტის ჩვენი გამოხმაურება გვინდა უკრაინელ ქალებს მივუძღვნათ. ქალებს, რომლებიც უკვე მეცამეტე დღეა თავდაცვისთვის იბრძვიან, ან დევნილობაში უწევთ ყოფნა საკუთარი შვილებისა და ოჯახის წევრების სიცოცხლის გადასარჩენად. უმძიმესი რეალობის მიუხედავად უკრაინელი ხალხი და ქალები მათ ყოველდღიურობაში ბრძოლის, თვითორგანიზებისა და გამბედაობის უნიკალურ მაგალითებს ქმნიან. ჩვენმა ხალხმა კარგად იცის ომის ტრაგიკული რეალობა. ეთნიკური წმენდა, მკვლელობები, ტყვეობა, ასიათასობით (290 000-მდე) ადამიანის დევნილობა, უსახლკარობა - ბოლო 30 წელში ჩვენს მიერ განცდილი სამი ომის უმძიმესი ჭრილობაა. ქართველ ქალებს ყველაზე უკეთ შეუძლიათ უკრაინელი ქალების ტკივილის, გამბედაობის და რწმენის გაგება. ჩვენ კიდევ ერთხელ ვუცხადებთ სოლიდარობას უკრაინელ ქალებს და უკრაინელ ხალხს“.  სრულად... წყარო: ორგანიზაციის გვერდი სოციალურ ქსელში ნახატი: Maria Primachenko

შიდა ქართლი. „ფონდი ტასო“ „ქალთა ეკონომიკური გაძლიერების“ პროექტის ფარგლებში, სამიზნე სოფლებს სტუმრობს. 4 მარტს, ფონდმა სამუშაო შეხვედრა ერგნეთში გამართა. შეხვედრას სოფელ ერგნეთსა და სოფელ ბროწლეთში მცხოვრები ქალები ესწრებოდნენ. აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით, შიდა ქართლის, სამეგრელოს, გურიის, იმერეთისა და რაჭა-ლეჩხუმის რეგიონებში ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს ენ მაკლინტოკის სტატიის თარგმანს: ოჯახური ქიშპობა: გენდერი, ნაციონალიზმი და ოჯახი. „ყველა სახის ნაციონალიზმი გენდერითაა განპირობებული, ყველა მათგანი გამოგონილი და სახიფათოა. სახიფათოა არა ერიკ ჰობსბაუმის გაგებით, რომელთანაც დაპირისპირებული უნდა იყო, არამედ იმ გაგებით, რომლითაც იგი მიემართება პოლიტიკურ ძალაუფლებასა და ძალადობრივ საშუალებებს“. სრულად... წყარო: socialjustice.org.ge

თბილისი. საქართველოს სახალხო დამცველი აქვეყნებს ანგარიშს: გენდერული თანასწორობის ინსტიტუციური მექანიზმების ეფექტიანობის შეფასება საქართველოში. „წინამდებარე ანგარიში წარმოადგენს გენდერული თანასწორობის ეროვნული მექანიზმების - გენდერული თანასწორობის მუდმივმოქმედი საპარლამენტო საბჭოს, საქართველოს გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორისი კომისიის და მასში შემავალი უწყებების მიერ გენდერული თანასწორობის მისაღწევად გადადგმული ნაბიჯების ეფექტიანობის შეფასებას პოლიტიკის ყველა სფეროში“. სრულად... წყარო: ombudsman.ge

ევროკომისიის მხარდაჭერით „უფლებები საქართველო“ რაჭა-ლეჩხუმში, ზემო იმერეთსა და კახეთში სამართლებრივი დახმარების ცენტრებს გახსნის. ცენტრები გაიხსნება პროექტის „გენდერულ და ოჯახში ძალადობაგადატანილთა მიმართ დახმარებაზე ხელმისაწვდომობის უზრუნველყოფა“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ფონდის ინფორმაციით, 2022 წლის 8 მარტის მთავარს თემას წარმოადგენს „გენდერული თანასწორობა დღეს ხვალინდელი მდგრადობისთვის“. „იგი მიზნად ისახავს მთელ მსოფლიოში იმ ქალებისა და გოგოების წვლილის აღიარებას, რომლებიც წარმატებით უძღვებიან კლიმატის ცვლილებების შემსუბუქებისა თუ მათზე რეაგირების საქმიანობებსა და მდგრადი მომავლის მშენებლობას. აღიარებულია, რომ კლიმატის ცვლილებები ქალებზე უფრო დიდ ზეგავლენას ახდენს, ვიდრე კაცებზე, რადგან ისინი ღარიბი და ბუნებრივ რესურსებზე მეტად დამოკიდებული მოსახლეობის უმრავლესობას წარმოადგენენ. ამდენად, კლიმატის ცვლილებები მათ განსაკუთრებით აზიანებს. ამავდროულად, ქალები და გოგოები არიან ქმედითი და ძლიერი ლიდერები და ცვლილებების ინიციატორები კლიმატის ცვლილებების შემსუბუქებისა და მათთან შეგუების თვალსაზრისით“. სრულად... წყარო: georgia.unwomen.org

თბილისი. ორგანიზაციამ „პარტნიორობა ადამიანის უფლებებისთვის (PHR) საქართველოში პირველი საქმე მოიგო სპორტში ქალების, მათ შორის არასრულწლოვანი გოგოების მიმართ სექსუალურ შევიწროებაზე. ორგანიზაციის ინფორმაციით, შევიწროებას კაცი მწვრთნელი ახორციელებდა. „მოსამართლემ სრულად დააკმაყოფილა მორალური ზიანის მოთხოვნაც. ეს გადაწყვეტილება დასაწყისია საქართველოში ათლეტი ქალებისთვის უსაფრთხო გარემოს შესაქმნელად“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს სტატიას: პოლიტიკა ქალთა მიმართ ძალადობის წინააღმდეგ - ახალი პერსპექტივების ძიებისთვის. „ქალთა მიმართ ძალადობა საქართველოსთვის კვლავ დიდ გამოწვევად რჩება. არსებული პოლიტიკა არსებითად კარცერული ანუ სადამსჯელო ლოგიკით იმართება, რომელშიც პოლიტიკა დანაშაულის აღკვეთის მიზანზე დაიყვანება და საპოლიციო ძალაუფლების ფეტიშიზაციაზე დგას. ოჯახში ძალადობის აღმოფხვრა იზომება ქალის მიერ მართლმსაჯულებაზე წვდომის და პოლიციის მიერ მყისიერი რეაგირებით, რამაც ქალთა დაცვა ძალადობისგან სახელმწიფოს რეპრესიულ აპარატსა და სასჯელზე დამოკიდებული გახადა“. სრულად... წყარო: socialjustice.org.ge

თბილისი. გაეროს განვითარების პროგრამამ და საქართველოს ბანკმა ხელი მოაწერეს შეთანხმებას მეწარმე ქალების ხელშეწყობის შესახებ. „ამ თანამშრომლობის ფარგლებში, ჩვენ უპრეცედენტო დახმარებას გავუწევთ ორასამდე მეწარმე ქალს“. სრულად... წყარო: www.ge.undp.org

თბილისი. გაეროს ქალთა ფონდი აქვეყნებს „ქვეყნის გენდერული თანასწორობის პროფილს“, გზამკვლევს გენდერული თანასწორობისა და ქალთა გაძლიერების მდგომარეობის შესაფასებლად. „დოკუმენტში გენდერულ თანასწორობასთან დაკავშირებული ვითარება საქართველოში მდგრადი განვითარების ინდიკატორებზე დაყრდნობითა და პეკინის სამოქმედო პლატფორმისა და ქალთა მიმართ დისკრიმინაციის ყველა ფორმის აღმოფხვრის შესახებ კონვენციის გათვალისწინებითაა აღწერილი“. სრულად... წყარო: georgia.unwomen.org

თბილისი. საქართველოს ახალგაზრდა იურისტთა ასოციაციის (საია) ინფორმაციით, ევროპულმა სასამართლომ პოლიციელის მიერ ჩადენილი ფემიციდის საქმეზე დარღვევა დაადგინა. 19 წლის სალომე ჯორბენაძე, მისმა ყოფილმა ქმარმა, ზესტაფონის რაიონული სამმართველოს თანამშრომელმა, სერგი საცერაძემ სამსახურებრივი საშტატო იარაღით მოკლა. „მკვლელობამდე სალომე მიმართავდა ზესტაფონის პოლიციას, პროკურატურას და შსს-ს გენერალურ ინსპექციას და მოძალადისგან დაცვას ითხოვდა. მიუხედავად ამისა, მოძალადის შესაჩერებლად კანონით გათვალისწინებული ზომები არ გატარდა. ამ საქმეს საია აწარმოებდა ორგანიზაციებთან ადამიანის უფლებათა დაცვის ევროპული ცენტრი (EHRAC) და პარტნიორობა ადამიანის უფლებებისთვის (PHR) თანამშრომლობით“. სრულად... წყარო: ორგანიზაციის გვერდი სოციალურ ქსელში

თბილისი. ფონდი „ტასო“ გთავაზობთ, მონაწილეობა მიიღოთ ქალთა დღისადმი მიძღვნილ გლობალურ კამპანიაში - #დაამსხვრიესტერეოტიპები. „დააკოპირე ეს პოსტი და სოლიდარობის ნიშნად, ატვირთე შენი ფოტო გადაჯვარედინებული ხელებით, ან გააზიარე სპეციალურად კამპანიისთვის შექმნილი პოსტერი. მონიშნე ხუთი მეგობარი და გამოიწვიე, რომ ჩაერთოს კამპანიაში“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ორგანიზაციის მიერ ჩატარებული კვლევის, „საქართველოს მუსლიმი ქალების ყოფა და მათი ჩაგვრის მრავალშრიანი აღწერა", მეორე თავს აქვეყნებს. „დოკუმენტში შეჯამებულია მარნეულის მუნიციპალიტეტსა და მაღალმთიან აჭარაში გამოკითხული რესპონდენტების დასაქმების, შინ შრომის, სოფლის მეურნეობაში მუშაობის ყოველდღიურობა და სირთულეები. დოკუმენტი ასევე ეხება ოჯახების ეკონომიკურ სირთულეებს, სოფლად მცხოვრები ქალების დასაქმების პერსპექტივებს, ვალისა და კრედიტის აღების მიზეზებს, ქალების მძიმე შრომას და სხვა საკითხებს“. სრულად... წყარო: socialjustice.org.ge

თბილისი. ქალთა ფონდი საქართველოში გაცნობებთ, რომ უკრაინის, პოლონეთის, სომხეთისა და საქართველოს ქალთა ფონდებმა, გერმანული ქალთა ფონდ ფილიას და გერმანიის საგარეო საქმეთა სამინისტროს ფინანსური მხარდაჭერით, ერთობლივი პროექტი „ფემინისტური ლანდშაფტი - სამოქალაქო საზოგადოების დიალოგი ყველა ხმის ჩართულობით“ დაიწყეს. „მისი მიზანია მარგინალიზებული ქალთა ჯგუფების მონაწილეობის ხელშეწყობა, მათი შესაძლებლობების გაძლიერება და ქალთა/ფემინისტურ მოძრაობებში აქტიურად ჩართვაში მხარდაჭერა“.  სრულად... წყარო: ქალთა ფონდი საქართველოში

თბილისი. გაეროს ქალთა ორგანიზაციამ პროექტის „კარგი მმართველობა გენდერული თანასწორობისთვის საქართველოში“ ფარგლებში დოკუმენტი მოამზადა.  „პუბლიკაცია აღწერს საქართველში არსებულ სიტუაციას გადაწყვეტილებების მიღებაში ქალების ჩართულობასთან დაკავშირებით. ქვეყნის გენდერული თანასწორობის პროფილისა (2020) და სხვა თემატური კვლევების მონაცემების ვიზუალიზაციით, დოკუმენტი აჩვენებს, რომ ქალები ნაკლებად არიან წარმოდგენილები გადაწყვეტილების მიმღებ პოზიციებზე როგორც პარლამენტსა და აღამსრულებელ ხელისუფლებაში, ისე საჯარო სამსახურსა და ადგილობრივ თვითმმართველობებში“. სრულად... წყარო: georgia.unwomen.org

თბილისი. გაეროს განვითარების პროგრამის ინფორმაციის მიხედვით, 24 იანვარს, საკრებულოს წევრი ქალები ყოველწლიურ ფორუმზე შეიკრიბნენ და ის კონკრეტულ ნაბიჯები განიხილეს, რომელთა განხორციელება ხელს შეუწყობს გენდერულად დაბალანსებული პოლიტიკის შემუშავებასა და ადგილობრივ დონეზე არსებულ ეკონომიკურ და სოციალურ გამოწვევებთან გამკლავებას. სრულად... წყარო: www.ge.undp.org

თბილისი. სოციალური სამართლიანობის ცენტრის მკვლევარი, მარიამ შალვაშვილი ცდილობს, კვლევაში „საქართველოს მუსლიმი ქალების ყოფა და მათი ჩაგვრის მრავალშრიანი აღწერა“ არსებულ მიგნებებზე ისაუბროს და გააანალიზოს ის სირთულეები და დაბრკოლებები, რომლებიც უდგათ ეთნიკური და რელიგიური უმცირესობების ქალებს აჭარასა და მარნეულის მუნიციპალიტეტში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ანალიტიკურ დოკუმენტში, მარნეულის მუნიციპალიტეტისა და აჭარის მაგალითზე, აღწერს ჯანდაცვის სფეროში არსებულ გამოწვევებსა და ბარიერებს, რომლებსაც რეგიონებში მცხოვრები ქალები ყოველდღიურად აწყდებიან. „შეიძლება რამე გტკიოდეს მაგრამ ითმენ იმის გამო, რომ ექიმთან მისვლით უფრო მეტი ხარჯებია. არ არის ჩვენთან ის სიტუაცია რომ ფული გქონდეს და [ექიმთან] გაიქცე საკუთარი თავისთვის … მართალია, ჯერ საკუთარი თავისთვის უნდა იზრუნო, მაგრამ უკან როცა ოჯახს ხედავ, [რომელსაც] არ აქ საშუალება ... თავს არ აძლევ უფლებას, რომ მიხვიდე და წინასწარ ჩაიტარო კვლევა საკუთარ თავზე". (რესპონდენტი მაღალმთიანი აჭარიდან) “სახელმწიფო ზოგადად პრევენციაში არ დებს რესურსს, და ეს ხელმიუწვდომელი რჩება მოსახლეობისთვის, იმდენად ძვირია ... სახელმწიფო დაფინანსება არის უკიდურესი ზომისთვის განკუთვნილი". (რესპონდენტი მარნეულის მუნიციპალიტეტიდან) „ვერ ვუმკლავდები [მედიკამენტების ყიდვას], რადგან მაქვს ფინანსური პრობლემები. ზოგჯერ დროულად ვერ ვყიდულობ მედიკამენტებს ან ნახევარს ვყიდულობ და ნაწილს ვერა“. (რესპონდენტი მარნეულის მუნიციპალიტეტიდან) სრულად... წყარო: socialjustice.org.ge

თბილისი. სახალხო დამცველმა სქესის ნიშნით დისკრიმინაციის საქმის ფარგლებში რეკომენდაციით მიმართა საქართველოს ფეხბურთის ფედერაციას (სფფ-ს). „ომბუდსმენმა დისკრიმინაციად მიიჩნია ის გარემოება, რომ სფფ-ს რეგულაციებში არ არის გათვალისწინებული ქალების სპეციალური საჭიროებები რეპროდუქციული ჯანმრთელობის მიმართულებით.  სახალხო დამცველმა საქართველოს ფეხბურთის ფედერაციას მოუწოდა, რომ ქალი ფეხბურთელების სექსუალური და რეპროდუქციული უფლების, ასევე შრომის უფლების დაცვის მიზნით, შემოიღოს რეგულაციები, რომელთა დარღვევისას გამოიყენებს მის ხელთ არსებულ სპორტულ სანქციებს. გარდა ამისა, საჭიროების შემთხვევაში, მიიღოს სახელმძღვანელო დოკუმენტები და გაატაროს სხვა ღონისძიებები“. სრულად... წყარო: ombudsman.ge

თბილისი. გაეროს ქალთა ფონდი აქვეყნებს კვლევას: ქალთა გაძლიერების პრინციპების (WEPs) ზეგავლენა ბიზნესზე საქართველოში. „კვლევაში გაანალიზებულია საბაზისო მონაცემები და გაანალიზებულია საქართველოში WEPs-ის ხელმომწერი კომპანიების მიერ გენდერული თანასწორობისა და ქალთა გაძლიერების მიმართულებით 2017-2020 წლებში ჩატარებული სამუშაო“. სრულად... წყარო: ორგანიზაციის გვერდი სოციალურ ქსელში

თბილისი. 15 იანვარს, თბილისში, სასტუმრო „რუმსში“ ჩატარდა ტრენინგი „იყავი მის ადგილას“. „ტრენინგების მიზანია იმ მავნე გენდერული სტერეოტიპების, სოციალური ნორმებისა და დამოკიდებულებების ცვლილება, რომლებიც ხშირად ქალთა მიმართ ძალადობის გამოწვევია ან ამართლებს ასეთ ქცევას“. სრულად... წყარო: ორგანიზაციის გვერდი სოციალურ ქსელში