თბილისი. 18 ივნისს, ორგანიზაციაში „პარტნიორობა ადამიანის უფლებებისთვის" დღის ცენტრების წარმომადგენლებთან სემინარი გაიმართა. PHR-ის იურისტმა, ანა თავხელიძემ ისაუბრა დღის ცენტრების როლის შესახებ გენდერული ძალადობის წინააღმდეგ ბრძოლისა და ძალადობაგამოვლილი ბავშვის მხარდაჭერის პროცესში. სრულად... წყარო: phrgeorgia.wordpress.com

იმერეთი. 15 ივნისს სასტუმრო „ბაგრატი 1003" გაიმართა რეგიონული კონფერენცია - მეტი ქალის ხმა ადგილობრივ თვითმმართველობაში. „კონფერენციის მიზანი იყო, იმერეთის მხარის 12-ვე მუნიციპალიტეტისა და სამოქალაქო საზოგადოების წარმომადგენლებისთვის ინფორმაციის მიწოდება ქალთა საჭიროებებისა და ადგილობრივი თვითმმართველობის დონეზე გენდერული პოლიტიკის პრინციპების შესახებ. სრულად... წყარო: ორგანიზაციის ვებგვერდი სოციალურ ქსელში

თბილისი. 14 ივნისს, „საქართველოს ჟურნალისტური ეთიკის ქარტიის" საბჭომ PHR-ის განცხადება განიხილა, რომელიც ტელეკომპანია „იმედის" ეთერში გასულ ფემიციდის შემთხვევას ეხებოდა. PHR-ის პოზიციით, ჟურნალისტმა ვერ გააცნობიერა სქესის ნიშნით დისკრიმინაციის წახალისების საფრთხე და ასევე, სიუჟეტში ქალის პირადი ცხოვრების შესახებ გაავრცელა ინფორმაცია. ქარტიის საბჭომ გაიზიარა ორგანიზაციის პოზიცია და მიიღო გადაწყვეტილება, რომლის მიხედვითაც „იმედის" ჟურნალისტმა ქარტიის მეშვიდე (დისკრიმინაცია) და მეათე (პირად ცხოვრებაში შეჭრა) პრინციპები დაარღვია. სრულად... წყარო: phrgeorgia.wordpress.com

თბილისი. „კოალიცია თანასწორობისთვის" ეხმაურება საქართველოს იუსტიციის მინისტრის, თეა წულუკიანის განცხადებას ტრანსგენდერი ადამიანების გენდერის სამართლებრივ აღიარებასთან დაკავშირებით. „კოალიციის შეფასებით, იუსტიციის მინისტრის აღნიშნული განცხადება უკიდურესად შემაშფოთებელია, რადგან აღრმავებს ტრანსგენდერი ადამიანების მიმართ საზოგადოებაში არსებულ სტიგმას და დამატებით უწყობს ხელს მათ მარგინალიზაციას. მინისტრი, ნაცვლად იმისა, რომ იმ მწვავე გამოწვევებს და კრიტიკას პასუხობდეს, რაც სასამართლოს რეფორმის და პროკურატურის საქმიანობასთან დაკავშირებით არსებობს, ყურადღების გადატანას ტრანსგენდერი ადამიანების პრობლემაზე სპეკულირებით ცდილობს. აღნიშნული განცხადება ხელისუფლების მხრიდან ლგბტ ადამიანების ინსტრუმენტალიზების კიდევ ერთი დადასტურებაა და წარმოადგენს პოლიტიკური ჰომოფობიისა და ტრანსფობიის განსაკუთრებით ნეგატიურ შემთხვევას", - ნათქვამია განცხადებაში. სრულად  წყარო: www.gdi.ge

თბილისი. პროექტი მიზნად ისახავს ქალთა ეკონომიკურ გაძლიერებას ბიზნესის სხვადასხვა სფეროში მოღვაწე ქალთა მხარდაჭერით.  პროექტი განხორციელდება 2018-2019 წწ-ში. პროექტი დაფინანსებულია გაეროს ქალთა ორგანიზაციის მიერ. პროექტის ფარგლებში შეირჩევა 50 ქალი ბენეფიციარი, რომელიც გადამზადდება და გაივლის შესაბამის ტრენინგებს ცოდნისა და კვალიფიკაციის ასამაღლებლად. მიმდინარე წლის ბოლოს შიდა კომისიის მიერ შერჩეული 25 ბენეფიციარი მიიღებს გრანტს ბიზნესის გაფართოების მიზნით. სრულად... წყარო: ორგანიზაციის ვებგვერდი სოციალურ ქსელში

თბილისი. კავშირი „საფარი" აქვეყნებს ბლოგპოსტს, რომლიც თანახმადაც, ორგანიზაციის თანამშრომლებმა, მოძალადე სუბიექტის მიმართ, შემაკავებელი ორდერის გამოწერა მოსთხოვეს სამართალდამცავებს. ოფიციალურად მიღებულ წერილში, საფარის იურისტს განემარტა, რომ შემაკავებელი ორდერი ვერ გაიცემა იმ მიზეზით, რომ მსხვერპლი და მოძალადე ოჯახის წევრები არ არიან. ორგანიზაცია, კიდევ ერთხელ, განმარტავს და შეახსენებს სამართალდამცავებს, რომ ერთი წლის წინ, კანონში შეტანილი ცვლილების თანხმად, მოძალადედ მიიჩნევა არა მხოლოდ ოჯახის წევრი, არამედ „ნებისმიერი სხვა პირი, რომელიც საზოგადოებრივ თუ პირად ცხოვრებაში ქალის მიმართ გენდერული ნიშნით ახორციელებს ფიზიკურ, ფსიქოლოგიურ, სექსუალურ ან ეკონომიკურ ძალადობას ან იძულებას". სრულად... წყარო: ორგანიზაციის ვებგვერდი სოციალურ ქსელში

თბილისი. „ქალთა ფონდი" წარმოგიდგენთ ქალთა საჭიროებებზე მოკლე ინტერვიუებს. ამჯერად, რუსუდან გოცირიძე, ევანგელისტურ-ბაპტისტური ეკლესიის ეპისკოპოსი გვესაუბრება იმაზე, თუ როგორ ქმნის რელიგია სექსუალურ ტაბუებს. „რელიგიას ადამიანის სხეულის, სექსუალობის დემონიზაციაში დიდი წვლილი მიუძღვის. ადამიანებმაც და რელიგიამაც უნდა გაიაზროს, რომ ეს ყველაფერი ღმერთის შექმნილია, მისი ჩანაფიქრია და მას სურდა, რომ ადამიანებს ჰარმონიულად, ბედნიერ გარემოში ეცხოვრათ". სრულად... წყარო: ორგანიზაციის ვებგვერდი სოციალურ ქსელში

თბილისი. ზვიად დევდარიანი, პატივისა და ღირსების შელახვისთვის სასამართლოს მიმართავს. „სარჩელი შევა იმ ქალების წინააღმდეგ, ვინც მას სექსუალურ შევიწროვებაში ადანაშაულებს, ასევე იმ ადამიანების წინააღმდეგ, ვინც, მისი თქმით, ამ თემის ტირაჟირებას უწყობდა ხელს. ამის შესახებ დევდარიანმა სახალხო დამცველის ოფისში, ომბუდსმენის აპარატის წარმომადგენლებთან შეხვედრის შემდეგ გამართულ ბრიფინგზე განაცხადა", ნათქვამია გენდერული საინფორმაციო პორტალის ვებგვერდზე. სრულად...  წყარო: ginsc.net

თბილისი. ივნისში, თბილისის წიგნის საერთაშორისო ფესტივალზე, ჰაინრიჰ ბიოლის ფონდის სამხრეთ კავკასიის რეგიონული ბიუროს ორგანიზებით, გაიმართა პრეზენტაცია წიგნისა – „ვის ეშინია ფემინიზმის საქართველოში?" „ქალები, რომლებიც სამართალწარმოების პროცესში თავს დამცირებულად გრძნობენ, მიიჩნევენ, რომ მათი ტრავმული გამოცდილება სისტემამ სათანადოდ არ შეაფასა. როდესაც სისტემას ძალადობაზე სრული პასუხისმგებლობა ქალებზე გადააქვს, ეს უკანასკნელნი, ხშირად, სამუდამოდ ამბობენ უარს სისტემასთან თანამშრომლობაზე. ისინი სამართალწარმოების რწმენას კარგავენ", – განაცხადა პრეზენტაციაზე წიგნის ერთ-ერთი თანაავტორმა, PHR-ის ხელმძღვანელმა, ანა არგანაშვილმა. სრულად  წყარო: phrgeorgia.wordpress.com/2

თბილისი. პარტნიორობა ადამიანის უფლებებისთვის (PHR) აქვეყნებს ვიზუალიზაციას: პროკურატურა გენდერულ სტატისტიკას არ აწარმოებს. ორგანიზაციამ, პროკურატურას სტამბოლის კონვენციის თანახმად, გენდერული სტატისტიკის წარმოების მოთხოვნით მიმართა, თუმცა ორგანომ PHR-ის ადმინისტრაციული საჩივარი არ დააკმაყოფილა. სრულად... წყარო: phrgeorgia.wordpress.com

თბილისი. პარტნიორობა ადამიანის უფლებებისთვის აქვეყნებს ბლოგპოსტს, რომლის თანახმადაც ქალზე მოძალადეს მორალური ზიანის ანაზღაურების ვალდებულება დაეკისრა. „სასამართლომ გაიზიარა PHR-ის პოზიცია და პირველად საქართველოში, ოჯახის წევრის მიმართ განხორციელებული ფიზიკური ძალადობის ფაქტზე მოძალადეს მორალური ზიანის ანაზღაურება 3500 (სამი ათას ხუთასი) ლარის ოდენობით დააკისრა. სასამართლომ განმარტა, რომ მორალური ზიანის ანაზღაურებით დაცული არამატერიალური სიკეთე ადამიანის საყოველთაო უფლებებისა და თავისუფლების ნაწილია. „მორალური ზიანი" სულიერი გრძნობებისა და ურთიერთობების სფეროში მიყენებულ ზიანს გულისხმობს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

ქვემო ქართლი. მარნეულის გენდერული თანასწორობის საბჭოს რიგით მეორე სხდომა გაიმართა. სხდომის მიზანს საბჭოს სამოქმედო გეგმის შემუშავება წარმოადგენდა. „მარნეულში მომუშავე არასამთავრობო სექტორისა და სახალხო დამცველის წარმომადგენლებმა გენდერული თანასწორობის საბჭოს საკუთარი გამოცდილება გაუზიარეს და რეკომენდაციები წარუდგინეს. სახალხო დამცველის რეგიონულმა წარმომადგენელმა ქვემო-ქართლში მარიამ გვიდიანმა საბჭოს სახალხო დამცველის რეკომენდაციები გაუზიარა. მარიამ გვიდიანმა ასევე თქვა, რომ სახალხო დამცველი გენდერული თანასწორობის საბჭოს სხდომების მონიტორინგსაც ატარებს და იმედს გამოთქვამს, რომ საბჭო მათ რეკომენდაციებს გაითვალისწინებს და სამოქმედო გეგმაში ასახავს", ნათქვამია ორგანიზაციის ვებგვერდზე.  სრულად... წყარო: ginsc.net

იმერეთი. 25 მაისს, ბაღდათის მუნიციპალიტეტში ორგანიზაციის „პარტნიორობა ადამიანის უფლებებისთვის" იურისტმა, ანა თავხელიძემ ადგილობრივი სკოლების მასწავლებლებთან ტრენინგი თემაზე – „მასწავლებლის როლი ძალადობაგამოვლილი ბავშვისა და მშობლის მხარდაჭერის პროცესში" ჩაატარა. ტრენინგს ასევე ესწრებოდნენ ადგილობრივი სოციალური მუშაკი და მედიის წარმომადგენლები. „მასწავლებლებთან შეხვედრა დისკუსიის რეჟიმში მიმდინარეობდა. მათ მიერ დასმული კითხვები შეეხებოდა ძალადობის ფორმებსა და საზოგადოებაში არსებულ სტერეოტიპულ დამოკიდებულებებს, რაც მასწავლებლების თქმით, განსაკუთრებულ ხელისშემშლელ ფაქტორს წარმოადგენს ძალადობაგამოვლილი ქალების მხარდაჭერის პროცესში", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. გენდერული საინფორმაციო პორტალი აქვეყნებს მარიამ კავილაძის ბლოგპოსტს: „სხვა ანუ შენ". „მე ვარ გოგო და მოგიყევით სხვაზე. სხვამ საკუთარ შინაგან მეობას უერთგულა და ის ამიტომ არის განსხვავებული. გენდერულ სტერეოტიპებს დღესდღეისობით ყველგან შეხვდებით, ოჯახში, სკოლაში, უნივერსიტეტში... იცოდეთ, რომ ყოველთვის ორი არჩევანი გექნებათ როგორც ქალს: ან ამოიღოთ ხმა და იბრძოლოთ ცვლილებისთვის, ან დათმოთ და დაემორჩილოთ", ნათქვამია ბლოგპოსტში. სრულად... წყარო: ginsc.net

თბილისი. საქართველოს ახალგაზრდა იურისტთა ასოციაცია აცხადებს, რომ ნიკა გორგილაძეს, რომელიც 17 მაისს საქართველოს მთავრობის ადმინისტრაციის შენობასთან მიმდინარე ანტიჰომოფობიურ აქციაზე დაზარალდა, რეალური საფრთხე ემუქრება. „ნიკა გორგილაძე მუდმივად იღებს მუქარის შემცველ გზავნილებს სოციალური ქსელის მეშვეობით, ასევე, ნიკას განცხადებით, იგი ყოველდღიურად ხდება აგრესიისა და შეურაცხყოფის მსხვერპლი ქუჩასა თუ საზოგადოებრივ ტრანსპორტში", - ნათქვამია საია-ს მიერ გავრცელებულ განცხადებაში, - „ნიკა გორგილაძის მიმართ განხორციელებულ ძალადობასთან დაკავშირებით საიამ როგორც საქართველოს შინაგან საქმეთა სამინისტროს, ასევე საქართველოს მთავარ პროკურატურას მიმართა და ითხოვა ზემოაღნიშნულ ფაქტებზე რეაგირების განხორციელება, ხოლო ნიკას მიმართ დაცვის სპეციალური ღონისძიების გამოყენება". სრულად  წყარო: ორგანიზაციის ვებგვერდი

ქვემო ქართლი. „ქალთა საინფორმაციო ცენტრის" ექსპერტებმა მარნეულში, საქართველოს აზერბაიჯანელთა კონგრესის ოფისში, მარნეულის არასამთავრობო ორგანიზაციების წარმომადგენლებთან საკონსულტაციო შეხვედრა გამართეს. შეხვედრაზე, რომელიც გერმანიის თანამშრომლობის საზოგადოების (GIZ) მხარდაჭერით ჩატარდა, იმსჯელეს მუნიციპალიტეტში არსებული პრობლემების შესახებ და გამოკვეთეს საჭიროებები, რომელიც მუნიციპალიტეტის გენდერული თანასწორობის სამოქმედო გეგმაში აისახება. სრულად  წყარო: ორგანიზაციის გვერდი სოციალურ ქსელში

თბილისი. პლათფორმა „არა ფობიას!" წევრი ორგანიზაციები სასჯელაღსრულებისა და პრობაციის მინისტრ კახა კახიშვილს განცხადებით მიმართავენ. „მოგმართავთ თქვენდამი დაქვემდებარებული სამინისტროს შიდა აუდიტის სამსახურის უფროსის, მამუკა ჩხეიძის საჯარო მოსამსახურისთვის დაუშვებელ ჰომოფობიურ გამოხატვასთან დაკავშირებით, სოციალურ ქსელ „ფეისბუკში". მიგვაჩნია, რომ ამგვარი გამოხატვის ფორმა განსაკუთრებით მიუღებელია იმ უწყების წარმომადგენლისგან, რომელიც ყველა ღონეს უნდა ხმარობდეს, რათა აღმოფხვრას სასჯელაღსრულების დაწესებულებებში დამკვიდრებული ქვიარ თემის დისკრიმინაცია და ჩაგვრა. აღნიშნულისთვის კი, პირველ რიგში, დისკრიმინაციული მიდგომები არ უნდა ჰქონდეთ თავად სამინისტროს წარმომადგენლებს", - ნათქვამია განცხადებაში, -„მოგმართავთ, შეისწავლოთ მამუკა ჩხეიძის დაკავებული თანამდებობისადმი შესაფერისობის საკითხი და მიიღოთ შესაბამისი გადაწყვეტილება". სრულად  წყარო: www.gdi.ge

თბილისი. 18-20 მაისს, გაიმართა სამუშაო შეხვედრა „გენდერული თანასწორობა თბილისის მუნიციპალიტეტში".  შეხვედრის მიზანი იყო გენდერული თანასწორობის შესახებ მონაწილეთა ცნობიერების გაზრდა, ეროვნული და საერთაშორისო ვალდებულებების მიმოხილვა და თბილისის მუნიციპალიტეტის სამოქმედო გეგმის განხილვა. სრულად... წყარო: ორგანიზაციის ვებგვერდი სოციალურ ქსელში

თბილისი. 19 მაისს, ილიას სახელმწიფო უნივერსიტეტის სოციალური მუშაობის მიმართულების სტუდენტებს ჩაუტარდათ ტრენინგი თემაზე „სოციალური მუშაობის ფემინისტური პერსპექტივა". ტრენინგს უძღვებოდნენ სოციალური მუშაობის დოქტორანტი თეონა გოცირიძე და ამავე მიმართულების მაგისტრი, ქეთი ლეკიშვილი. ტრენინგი ჩატარდა პროექტის „ფემინისტური ხედვის გაძლიერება სოციალური მუშაობის პრაქტიკაში" ფარგლებში, რომელსაც ახორციელებს ორგანიზაცია „ინიციატივა სოციალური ცვლილებებისთვის" (ISC), „ქალთა ფონდი საქართველოში" (WFG) მხარდაჭერით. სრულად... წყარო: ორგანიზაციის ვებგვერდი სოციალურ ქსელში

თბილისი. უფლებადამცველმა ორგანიზაციებმა, "იდენტობის" საქმეზე ევროსასამართლოს გადაწყვეტილების აღსრულების თაობაზე, ევროპის საბჭოს მინისტრთა კომიტეტთან კომუნიკაცია წარადგინეს. კომუნიკაციის ავტორები მიმართავენ მინისტრთა კომიტეტს, არ დაუშვას საქმეზე ზედამხედველობის პროცესის შეწყვეტა და მოუწოდებენ სახელმწიფოს, მოახდინოს საქმეზე - „იდენტობა და სხვები საქართველოს წინააღმდეგ" - ადამიანის უფლებათა ევროპული სასამართლოს გადაწყვეტილების ეფექტიანი და სრულყოფლი აღსრულება და ლგბტ ჯგუფის მიმართ დისკრიმინაციასა და ჩაგვრას ფუნდამენტური, ფართო და კომპლექსური პოლიტიკით დაუპირისპირდეს. სრულად  წყარო: emc.org.ge

თბილისი. სამოქალაქო პლატფორმაში „არა-ფობიას!" შემავალი ორგანიზაციები საქართველოს პარლამენტის წევრის, კობა ლურსმანაშვილის განცხადებას ეხმაურებიან. „უაღრესად შემაშფოთებელია საქართველოს პარლამენტის წევრის, პარტია ქართული ოცნების წარმომადგენლის, კობა ლურსმანაშვილის მიერ ჰოფომობიური განცხადების გაკეთება, რომელიც უფრო მეტად ამწვავებს ბოლო დროს გაძლიერებულ აგრესიასა და აღვივებს სიძულვილს საზოგადოების სხვადასხვა ჯგუფების მიმართ”, - ვკითხულობთ განცხადებაში, - „მოვუწოდებთ საქართველოს პარლამენტის წევრებს, პასუხისმგებლობით მოეკიდონ საკუთარ მანდატს და სტატუსს, თავი შეიკავონ საჯარო სივრცეში სიძულვილის ენის შემცველი გამონათქვამებისგან და ნაცვლად საზოგადოების სხვადასხვა ჯგუფებს შორის სიძულვილისა და შუღლის გაღვივებისა, ქვეყანაში კანონმდებლობის დახვეწაზე, მთავრობის საქმიანობის კონტროლსა და მათზე დაკისრებულ სხვა ფუნქციების განხორციელებაზე, მათ შორის უმცირესობათა უფლებების დაცვაზე იზრუნონ". სრულად  წყარო: http://www.gdi.ge

თბილისი. საქართველოს სახალხო დამცველის მოადგილე და აპარატის თანამშრომლები ევროკავშირის სპეციალურ წარმომადგენელს ადამიანის უფლებათა დაცვის საკითხებში სტავროს ლამბრინიდისს შეხვდნენ. შეხვედრაზე განსაკუთრებული ყურადღება გამახვილდა სამართალდამცავთა მხრიდან არასათანადო მოპყრობის ფაქტებსა და მათი გამოძიების ხარვეზების, პენიტენციურ დაწესებულებებში არსებული ვითარების, ბავშვთა მიმართ ძალადობისა და ოჯახში ძალადობის პრობლემების თაობაზე, რომელთა გადასაჭრელად ხელისუფლების ძალისხმევა ჯერ კიდევ არასაკმარისია. სრულად  წყარო: ორგანიზაციის ვებგვერდი