თბილისი. სახალხო დამცველი, ნინო ლომჯარია მწუხარებას გამოთქვამს 2018 წლის 13 აპრილს, თბილისში მომხდარი ქალის მკვლელობის გამო და თანაგრძნობას უცხადებს გარდაცვლილის ოჯახსა და ახლობლებს. „მიუხედავად იმისა, რომ ბოლო წლების განმავლობაში გაიზარდა ოჯახში ძალადობის გამოვლენის მაჩვენებელი და ერთი შეხედვით პრობლემამ ჩაკეტილი სოციალური წრიდან საჯარო სფეროში გადაინაცვლა, კვლავ მაღალია ძალადობის სასტიკი ფორმების და მკვლელობების რიცხვი. 2017 წელს მომხდარი ქალის მკვლელობის 26 შემთხვევიდან 14 ოჯახში ძალადობის პირობებში იყო ჩადენილი, ხოლო 15 მკვლელობის მცდელობის ფაქტიდან 12 ოჯახურ დანაშაულს უკავშირდებოდა. სახალხო დამცველი მუდმივად მიუთითებს დამცავი ღონისძიებების არაეფექტურობასა და პრევენციის ღონისძიებების გაძლიერების საჭიროებაზე", ნათქვამია განცხადებაში. სრულად... წყარო: www.ombudsman.ge

თბილისი. ქალთა მოძრაობამ დაიწყო ხელმოწერების შეგროვება  ფემიციდის სპეციალური მუხლის მისაღებად სისხლის სამართლის კოდექსში. მოძრაობამ ამ საკითხზე პეტიცია განათავსა www.change.org–ზე. სრულად... წყარო: ქალთა მოძრაობის გვერდი სოციალურ ქსელში

თბილისი. 11 აპრილს, კახა ბენდუქიძის საუნივერსიტეტო კამპუსში გაიმართა საჯარო დებატები გენდერული კვოტირების შესახებ. „საქართველოს პარლამენტმა, პლენარულ სხდომაზე, პირველი მოსმენით განიხილა საკანონმდებლო ინიციატივა სავალდებულო გენდერული კვოტირების შესახებ. კენჭისყრის შედეგად 66 ხმით 14-ის წინააღმდეგ პარლამენტმა კანონპროექტი არ მიიღო. საზოგადოების აზრი ამ საკითხთან დაკავშირებით ორად გაიყო. დებატების დროს შეხვედრის მონაწილეებს შესაძლებლობა ჰქონდათ მოესმინათ ორივე მხარის არგუმენტირებული მსჯელობა და ჩართულიყვნენ მოწვეულ მომხსენებლებთან დისკუსიაში", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. საქართველოს სახალხო დამცველის მოადგილე, ეკატერინე სხილაძე კახეთის მუნიციპალიტეტების მერიისა და საკრებულოს თანამშრომლებს შეხვდა. შეხვედრა სახალხო დამცველის აპარატის თელავის ოფისის თანამშრომლებთან და ქალთა საინფორმაციო ცენტრის წარმომადგენელთან ერთად გაიმართა. ამ საინფორმაციო ღონისძიების მიზანს ადგილობრივ თვითმმართველობებში არსებული გენდერული საბჭოების შესახებ ინფორმაციის მიღება და მერიაში გენდერული თანასწორობის საკითხებზე პასუხისმგებელი პირების საქმიანობისა და გეგმების გაცნობა წარმოადგენდა. სრულად  წყარო: ორგანიზაციის ვებგვერდი

თბილისი. ძალადობის მსხვერპლმა მ. რ.-მ და მისმა არასრულწლოვანმა შვილმა დახმარებისათვის „საფარს" მიმართეს. „2017 წლიდან, მ. რ-ისა და მისი არასრულწლოვანი შვილის მიმართ სახელმწიფო უსაფრთხოების სამსახურის თანამშრომელი სექსუალურ, ეკონომიკურ, ფიზიკურ და ფსიქოლოგიურ ძალადობას ახორციელებდა. „საფარის" დახმარებით, მ. რ-მ პოლიციას მიმართა. იგი აცხადებდა, რომ სისტემატურად იყო უკანონო თვალთვალის, არასასურველი კომუნიკაციის მსხვერპლი, აღნიშნული ვითარება იწვევდა მის ფსიქიკურ ტანჯვას და ცხოვრების წესის შეცვლას აიძულებდა. შედეგად, დაიწყო გამოძიება სისხლის სამართლის კოდექსის 126-ე მუხლით, რაც ძალადობას მოიცავს. 21 მარტს, თბილისის საქალაქო სასამართლომ სს კოდექსის 126-ე მუხლით დამნაშავედ ცნო სუს-ის თანამშრომელი, 4 წლით თავისუფლების აღკვეთა და 5000 ლარი ჯარიმა შეუფარდა", ნათქვამია ორგანიზაციის ვებგვერდზე. სრულად... წყარო: sapari.ge

მცხეთა-მთიანეთი. 29–30 მარტს, მცხეთაში, სასტუმროში „ჯინო ველნეს მცხეთა", გაიმართა ტრენინგი „ადამიანის უფლებებისა და გენდერული თანასწორობის საკითხებზე". „ტრენინგში მონაწილეობდნენ კახეთის რეგიონის მუნიციპალიტეტების მერიისა და საკრებულოს წარმომადგენლები, რომლებიც პასუხისმგებლები არიან გენდერული თანასწორობის საკითხებზე. ტრენინგს უძღვებოდნენ ქალთა საინფორმაციო ცენტრის ტრენერები. ტრენინგის მიზანს წარმოადგენდა ადგილობრივი თვითმმართველობის საჯარო მოხელეების ინფორმირება ადამიანის უფლებებისა და გენდერული თანასწორობის საკითხებზე, ადგილობრივი და საერთაშორისო ვალდებულებების გაცნობა", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის შეშფოთებას გამოთქვამს საქართველოს იუსტიციის უმაღლესი საბჭოს სხდომებზე სქესის ნიშნით დისკრიმინაციის შემცველი გამონათქვამების გახშირებისა და გენდერული უთანასწორობის ატმოსფეროს გაძლიერების გამო. „2018 წლის 26 მარტის სხდომაზე საბჭოს მოსამართლე მამაკაცმა წევრებმა, არამოსამართლე წევრის - ნაზი ჯანეზაშვილის მიმართ განაცხადეს, რომ იგი იტყუებოდა, მასთან საუბარი არ შეიძლებოდა და მისი მოსმენა არ შეიძლებოდა. რაც დასრულდა საბჭოს მოსამართლე წევრის სერგო მეთოფიშვილის მიერ, ნაზი ჯანეზაშვილის მიმართ გაკეთებული მიმართვით, რომ ნაზის შესაძლოა მართავდეს მისი მეუღლე დავით გამისონია. როგორც საბჭოს სხდომებზე, ასევე მედია სივრცეში, იუსტიციის უმაღლესი საბჭოს კაცი წევრების მიერ საბჭოს ქალი წევრების მიმართ კრიტიკის გამოხატვა, არაეთიკური და გენდერული სტერეოტიპებით განპირობებული შინაარსით, პრაქტიკად იქცა, რაც ღირსების შემლახველია და ქმნის მტრულ გარემოს ქალი წევრებისთვის", ნათქვამია განცხადებაში. კოალიცია მოუწოდებს დამოუკიდებელ ინსპექტორს შეისწავლოს გენდერული შევიწროების შემთხვევები. სრულად... წყარო: coalition.ge

თბილისი. საქართველოს სახალხო დამცველი კრიტიკულად აფასებს თბილისის მუნიციპალიტეტის საკრებულოს წევრის, ვახტანგ შაქარიშვილის რეპლიკას, რომლითაც მან საჯარო განხილვაში მონაწილე პირებს მიმართა. სახალხო დამცველი მიიჩნევს, რომ აღნიშნული გამონათქვამი სექსისტური შინაარსისაა და ქალთა კონკრეტულ მდგომარეობას დამამცირებელ კონტექსტში მოიაზრებს. სახალხო დამცველის განცხადებით პოლიტიკურ პროცესებში მონაწილე პირებს გაცნობიერებული უნდა ჰქონდეთ, რომ განსაკუთრებული პასუხისმგებლობა აკისრიათ, ხელი შეუწყონ თანასწორობის პრინციპის დაცვას. მათი მხრიდან გამოთქმული სექსისტური თუ სხვა სახის დისკრიმინაციული შინაარსის შემცველი გამონათქვამების გამოყენებას შესაძლოა დამანგრეველი ეფექტი ჰქონდეს ქვეყანაში თანასწორობისთვის ბრძოლის პროცესზე. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველი მნიშვნელოვნად მიიჩნევს გენდერული კვოტირების შესახებ კანონპროექტისთვის საქართველოს პარლამენტის მხარდაჭერას. „საზოგადოებამ, 37000 ამომრჩევლის ხელმოწერით, ნათლად გამოხატა ქალთა პოლიტიკური მონაწილეობის გაზრდის მნიშვნელობა და ახლა ისტორიული ნაბიჯი საქართველოს პარლამენტმა უნდა გადადგას. საქართველოში გენდერული თანასწორობისა და ქალთა უფლებრივი მდგომარეობის მიმართულებით არსებული გამოწვევები ხაზს უსვამს საკითხის მნიშვნელობას და ყველა უწყების, მათ შორის, პარლამენტის მხრიდან ეფექტიანი ნაბიჯების გადადგმას მოითხოვს", - ნათქვამია სახალხო დამცველის აპარატის მიერ გავრცელებულ ინფორმაციაში. სრულად  წყარო: ორგანიზაციის ვებგვერდი

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს კვლევას: „ქალთა პოლიტიკური წარმომადგენლობა და არსებული საკანონმდებლო ბარიერები". „მიუხედავად იმისა, რომ დამოუკიდებლობის მოპოვებიდან დღემდე საქართველომ ცვლილებები განახორციელა პოლიტიკაში ქალთა წარმომადგენლობის გაზრდის მიზნით, ქალთა პოლიტიკური უფლებების რეალიზაცია კვლავ მნიშვნელოვან გამოწვევას წარმოადგენს. როგორც არაერთმა ადგილობრივმა თუ საპარლამენტო არჩევნების შედეგებმა გამოავლინა, ქალთა წარმომადგენლობა უმაღლეს საკანონმდებლო და აღმასრულებელ ორგანოებში საგანგაშოდ დაბალია. 2016 წლის საპარლამენტო არჩევნებზე პროპორციული საარჩევნო სისტემის საფუძველზე წარდგენილი კანდიდატებიდან 37% იყო ქალი, ხოლო მაჟორიტარული საარჩევნო სისტემის საფუძველზე წარდგენილ ქალთა რაოდენობა 17.69%- ს შეადგენდა. არჩევნების შედეგად, 150 მანდატიდან ქალებმა მხოლოდ 24 მოიპოვეს. საქართველოს პარლამენტის მსგავსად, გენდერული დისბალანსია ადგილობრივი თვითმმართველობის წარმომადგენლობით და აღმასრულებელ ორგანოებში", ნათქვამია ორგანიზაციის ვებგვერდზე. სრულად... წყარო: www.isfed.ge

თბილისი. საზოგადოებრივი ორგანიზციები ეხმაურებიან პარლამენტში დაგეგმილ განხილვას, არჩევნებში ქალთა მონაწილეობის კვოტირების შესახებ. „როგორც ცნობილია, საქართველოს პარლამენტი რამდენიმე დღეში განიხილავს 37,455 ამომრჩევლის საკანონმდებლო ინიციატივას, რომელიც საპარლამენტო და ადგილობრივი თვითმმართველობის არჩევნებზე, პარტიებსა და ბლოკებს დაავალდებულებს, რომ პარტიულ სიებში ყოველი მეორე განსხვავებული სქესის კანდიდატი წარადგინონ. ვრცელდება ინფორმაცია, რომ მმართველ პარტიაში განიხილება კანონპროექტის იმგვარი ცვლილება, რომ პროპორციულ სიებში ყოველი მესამე კანდიდატი იყოს განსხვავებული სქესის, ხოლო მაჟორიტარებს შორის ყოველი მეექვსე. კანონპროექტის ამგვარი ფორმით მიღების შემთხვევაში, ქალთა წარმომადგენლობა პარლამენტში გარანტირებულად მხოლოდ 15% იქნება, მაჟორიტარულ ოლქებში ქალი კანდიდატების გამარჯვების შემთხვევაში კი 23%-მდე", - ნათქვამია გავრცელებულ განცხადებაში. სრულად  წყარო: gyla.ge

გურია. „ახალგაზრდა პედაგოგთა კავშირის" ახალგაზრდული მიმართულების ფარგლებში დაიგეგმა ქალთა უფლებებისადმი მიძღვნილი კვირეული. კვირეულის ფარგლებში, 19 მარტს გაიმართა კიდევ ერთი აქტივობა. „წარმატებული სამეწარმეო პრაქტიკის გაზიარების მიზნით ჩატარდა საჯარო ლექცია, რომელსაც უძღვებოდა ახალგაზრდა მეწარმე ქეთო ნინიძე - საოჯახო მარანი - ოდა/Oda Family Winery-ის დამფუძნებელი. საუბარი სამი ნაწილისგან შედგებოდა”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. სოციალურ მეცნიერებათა ცენტრის თანამშრომლები მარიამ ამაშუკელი და ელენე ჯაფარიძე, წარმოგიდგენთ „ალტერნარატივების" სერიიდან ერთ-ერთ ვიდეორგოლს, რომელიც ადრეული ქორწინების პრობლემას ეხება. პროექტი განხორციელდა „ქალთა ფონდი საქართველოში"-ს ფინანსური მხარდაჭერით. წყარო: სოციალურ მეცნიერებათა ცენტრის ვებგვერი სოციალურ ქსელში

სამეგრელო. 18 მარტს, ასოციაცია „ათანათის” ახალგაზრდული ცენტრის ორგანიზებით, ზუგდიდის რაიონულ სასამართლოში ჩატარდა სისხლის სამართლის იმიტირებული პროცესი. განსახილველი ქეისის მთავარი თემა იყო ქალის უფლებების დარღვევა და მკვლელობა გაუფრთხილებლობით. „სასამართლო წარიმართა ნაფიცმსაჯულთა მონაწილეობით, რომლებმაც პროცესის ბოლოს გამოიტანეს შესაბამი ვერდიქტი. პროცესს ასევე ესწრებოდნენ „საია"-ს წარმომადგენლები, რომლებმაც პროცესის ბოლოს გამოავლინეს რჩეული მონაწილეები და დააჯილდოვეს”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

იმერეთი. ქალთა ისტორიის თვის ფარგლებში, ქუთაისის ახალგაზრდული ცენტრის წევრებისთვის მოეწყო სადისკუსიო კლუბის მორიგი შეხვედრა თემაზე: „ქალთა მიმართ ძალადობა და მისი პრევენცია". შეხვედრის მიზანი იყო მონაწილეთა ცნობიერების ამაღლება ქალთა უფლებების, ქალთა მიმართ ძალადობის (ოჯახში ძალადობა), არსებული კანონმდებლობის და ძალადობის პრევენციის საკითხებზე. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს მთავრობის 2018 წლის 15 მარტის N 588 განკარგულებით ქალთა მიმართ და ოჯახში ძალადობის წინააღმდეგ ექსპერტთა ჯგუფში (GREVIO) წარსადგენი კანდიდატთა სია დამტკიცდა. „14 მარტს, გენდერული თანასწორობის, ქალთა მიმართ და ოჯახში ძალადობის საკითხებზე მომუშავე უწყებათაშორისი კომისიის წევრები გაესაუბრნენ ექვსივე კანდიდატს, რომელთაგანაც მათთვის კომისიის წევრების მიერ მინიჭებული საშუალო ჯამური ქულების კლებადობის მიხედვით შედგა შემდეგი სია: 1. ვლადიმერ მკერვალიშვილი 2. ანა არგანაშვილი 3. თეა ჯალიაშვილი ქალთა მიმართ და ოჯახში ძალადობის წინააღმდეგ ექსპერტთა ჯგუფი (GREVIO) არის დამოუკიდებელ ექსპერტთაგან შემდგარი ორგანო, რომელიც ახორციელებს მონიტორინგს წევრი სახელმწიფოების მიერ ქალებზე ძალადობისა და ოჯახში ძალადობის წინააღმდეგ ბრძოლისა და პრევენციის შესახებ ევროპის საბჭოს კონვენციის (სტამბოლის კონვეცია), შესრულებაზე. საქართველოსთან ერთად GREVIO-ში ასარჩევი კანდიდატების (მაქსიმუმ 3 კანდიდატი) წარდგენის უფლება ჰქონდა 16 ქვეყანას. ევროპის საბჭოს გენერალური მდივანი წარდგენილ კანდიდატთა სიას გადასცემს კონვენციის მხარეთა კომიტეტს განსახილველად, საბოლოო გადაწყვეტილების მიღების მიზნით", ნათქვამია გენდერული საინფორმაციო პორტალის ვებგვერდზე. სრულად... წყარო: ginsc.net

თბილისი. საქართველოს ახალგაზრდა იურისტთა ასოციაცია (საია) 2018 წლის #1 საინფორმაციო ბიულეტენს აქვეყნებს: „საია ქალთა უფლებებისთვის". ის ეხება ქვეყანაში ქალთა უფლებრივი მდგომარეობის საკითხებს. სრულად... წყარო: gyla.ge

5–8 მარტს, მცხეთაში, გაიმართა ტრენინგი „ადამიანის უფლებებისა და გენდერული თანასწორობის საკითხებზე". „ტრენინგის მიზანი იყო ადგილობრივი თვითმმართველობის საჯარო მოხელეების ინფორმირება ადამიანის უფლებებისა და გენდერული თანასწორობის საკითხებზე, ადგილობრივი და საერთაშორისო ვალდებულებების გაცნობა. ტრენინგი გაიმართა GIZ-ის ორგანიზებით ქალთა საინფორმაციო ცენტრთან თანამშრომლობით პროექტის „კახეთიდან და სამცხე–ჯავახეთიდან ქალი პოლიტიკოსებისა და გენდერზე პასუხისმგებელი პირების ქსელი პროფესიული და ლიდერული უნარ–ჩვევების გაძლიერებისათვის", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

„დემოკრატიული ჩართულობის ცენტრების ქსელის" მიერ მარტის თვეში დაიგეგმა ღონისძიებები, რომლებიც მიეძღვნება ქალებს და მათ როლს საქართველოს ისტორიასა და დღევანდელ რეალობაში. სრულად... წყარო: ცენტრის ვებგვერდი სოციალურ ქსელში

თბილისი. მოუსმინეთ „საფარის" მკვლევარს, გიორგი ურჩუხიშვილს, რომელიც ქალთა ჩაგვრაზე, გამომწვევ მიზეზებზე, ბარიერებსა და სახელმწიფოს ჩართულობაზე საუბრობს. სრულად... წყარო: sapari.ge

კახეთი. ქალთა საინფორმაციო ცენტრი ადგილობრივი თვითმმართველობის დონეზე გენდერული პოლიტიკის გაძლიერების მიმართულებით მუშაობს. „ამ საქმიანობის ფარგლებში ორგანიზაციის წარმომადგენლებმა სამუშაო შეხვედრა გამართეს სიღნაღის მუნიციპალიტეტის არასამთავრობო ორგანიზაციების წარმომადგენლებთან და ასევე საკრებულოს გენდერული საბჭოს წევრებთან. შეხვედრები მიეძღვნა მუნიციპალიტეტში არსებულ პრობლემების იდენტიფიცირებას გენდერულ ჭრილში, რომლის ანალიზის საფუძველზე შემუშავდება მუნიციპალიტეტის გენდერული თანასწორობის სამოქმედო გეგმა. ქალთა საინფორმაციო ცენტრი ამ პროცესში გენდერულ საბჭოს კონსულტაციებს გაუწევს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ქალთა საერთაშორისო დღესთან დაკავშირებით, საქართველოს სახალხო დამცველმა, ნინო ლომჯარიამ სპეციალური განცხადება გაავრცელა. „საქართველოში არსებული გენდერული უთანასწორობის დასაძლევად, ბოლო წლების მანძილზე, მთავრობის, სამოქალაქო საზოგადოებისა და საერთაშორისო ორგანიზაციების მხრიდან გადადგმული ნაბიჯების მიუხედავად, კვლავ რჩება პრობლემები, რომელიც სახელმწიფოს მყისიერ ჩარევას და რეაგირებას საჭიროებს", - აღნიშნავს სახალხო დამცველი, - „გენდერული თანასწორობის მიღწევის პროცესში აუცილებელია ხელი შეეწყოს ქალთა პოლიტიკური და ეკონომიკური მონაწილეობის ზრდას, რადგან აღნიშნული პირდაპირ კავშირშია ქვეყნის დემოკრატიული განვითარების მაჩვენებელთან". სრულად  წყარო: ორგანიზაციის ვებგვერდი