თბილისი. ქალთა საინფორმაციო ცენტრი აქვეყნებს ანასტასია ლორთქიფანიძის ბლოგპოსტს: რისი ეშინია შიშს.? „ჩვენი უბედურება დღესდღეობით იმაში მდგომარეობს რომ ჩვენი საზოგადოება (არ ვსაუბრობ იმ ნაწილზე, რომელიც დღის სინათლეზე დიდი ხანია გამოვიდა) ქალს აღიქვამს, როგორც ნივთს, რომელიც მამაკაცის ღირსების საზომია და რომელსაც ძალიან მცირე შეცდომის დაშვება სჭირდება იმისათვის რომ აღარ იყოს სასურველი ან მისაღები. სამაგიეროდ მამაკაცს ბევრი რამ ეპატიება, რაც ვფიქრობ მისი განვითარებისთვისვეა დამღუპველი. ალბათ ამიტომაც გვყავს ბევრი რეალობას აცდენილი კაცი, რომელსაც იმდენი ეძახეს, შენ კაცი ხარ ასეთი და ასეთი უნდა იყო, ამის და ამის უფლება გაქვს, შენ მეტი ხარ, შენ გეპატიება, მერე რა და ა.შ. მათ ყველაფერი აპატიეს, გაუტარეს, მისცეს უამრავი უფლება, მისცეს მეტი ხელფასი იგივე საქმეში, რასაც ქალიც აკეთებს, რითაც ერთგვარი დათვური სამსახური გაუწიეს და შეაფერხეს მათი განვითარება“. სრულად... წყარო: ginsc.net

შიდა ქართლი. „საერთაშორისო გამჭვირვალობა - საქართველოს“ ორგანიზებით, საქართველოს სხვადასხვა რეგიონში, ბესო სოლომონაშვილის ფილმის „ბოსტანი კონფლიქტის ზონაში“ ჩვენება გაიმართება. ამჯერად, ფილმის ჩვენება გაიმართა კასპის მუნიციპალიტეტის სოფელ ქვემო გომში, სადაც ფილმის გადაღებები მიმდინარეობდა. „ფილმის შემქმნელებს და აუდიტორიას აერთიანებდათ სურვილი, რომ, ჩვენ, ყველამ ერთად გადავდგათ ნაბიჯი ევროპისკენ, რომელიც მშვიდობის და უსაფრთხოების სივრცეა, რომლის ერთადერთი მტერი დღეს - ჩვენი საერთო მტერი - რუსეთია“, ნათქვამია გამჭვირვალობის ვებგვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს ლელა ჯობავას ბლოგპოსტს: „ყველა და ყველაფერი ერთმანეთთან კავშირშია“. ბლოგპოსტში საუბარია წოვათის თუშებზე (ბაცბები/წოვათუშები), რომელთა ენაც გაქრობის პირასაა. „ჩემი ყურადღება წოვათის თუშებმა (ბაცბებმა/წოვათუშებმა) იმით მიიქციეს, რომ მათ, თუშეთის დანარჩენი თემების მცხოვრებთაგან, თავიანთი ენა - წოვათუშური - განასხვავებთ. დღესდღეობით, წოვათუშურ ენაზე მოსაუბრეთა რაოდენობა რამდენიმე ათეულ ადამიანს არ აღემატება და მასზე ძირითადად უფროსი თაობის ხალხი ლაპარაკობს. ხოლო უფრო ახალგაზრდებს კი ან ესმით ან არ ლაპარაკობენ, რადგან ზოგიერთ ოჯახშიც მხოლოდ ქართულია სასაუბრო ენა.“ სრულად... წყარო: socialjustice.org.ge

თბილისი. ღირსეული შრომის პლატფორმა ეხმიანება საქართველოს კულტურის, სპორტისა და ახალგაზრდობის სამინისტროში მიმდინარე თანამშრომელთა მასშტაბურ გათავისუფლების ფაქტებს, რაც, სავარაუდოდ, დასაქმებულთა კრიტიკული შეხედულებების ან/და პროფესიული კავშირის წევრობის ნიშნით, საკადრო წმენდას გულისხმობს. ღირსეული შრომის პლატფორმის წევრი ორგანიზაციები დეტალურად სწავლობენ მუზეუმის სისტემიდან თანამშრომელთა გათავისუფლებისა და რეორგანიზაციის კანონიერების საკითხს და საჭიროების შემთხვევაში, კულტურის სამინისტროს სისტემაში დასაქმებულ სხვა პირთა შრომითი უფლებების სასამართლო წესით დაცვის პარალელურად, უზრუნველყოფენ მეცნიერების, განათლებისა და კულტურის პროფკავშირს წევრთა სამართლებრივ მხარდაჭერასაც. სრულად... წყარო: socialjustice.org.ge

თბილისი. ორგანიზაცია „საფარი“ აქვეყნებს ნინო ყვირილიანის ბლოგპოსტს ფემიციდზე: კულტურის საზღვრებში მოქცეული გაწირული ქალები. „ვხედავთ სოციალურ ქსელში როგორ თელავენ ისევ მსხვერპლს და ამ რიცხვში უმრავლესობა, სამწუხაროდ, ქალია. როგორ იტანჯებიან თვითონაც სინამდვილეში, მაგრამ ამას არასოდეს აღიარებენ განპირობებული გონების ტყვეობაში, რადგან კომფორტის ზონადაც კი ექცათ უკვე. რადგან თვითონ ვერ გაარღვიეს ჩაკეტილი ცნობიერება, გაუცნობიერებლად ცდილობენ იგივე გალიაში შეიპატიჟონ სხვებიც, რომ მარტო არ იხუთებოდნენ. შვილებს ზრდიან ამბიციებით, მახინჯი ტრადიციებით, სტერეოტიპებით და ტენიან იდეოლოგიებით, სწორედ ეს აყალიბებს მათ მომავალში უკანასკნელ ბოროტებად! ამ ჭაობიდან ამოსასვლელად, უმთავრესია იმ კულტურის საზღვრების გარღვევა, რომელმაც ბავშვობიდან დღემდე გადაავსო ადამიანის გონება. ამ ყველაფრისგან უნდა დაიცალო, რომ შენში სიყვარულისთვის ადგილი გამოთავისუფლდეს“. სრულად... წყარო: sapari.ge

თბილისი. მაკლეინის ასოციაცია საქართველოში გაცნობებთ, რომ გიორგი მრევლიშვილის ფილმი „თორმეტი გაკვეთილი“, MediaWave-ის კინოფესტივალზე საუკეთესო დოკუმენტური ფილმის ნომინაციაში დაჯილდოვდა. ფილმი მოგვითხრობს გურიაში მცხოვრებ ვალერი ბაბუაზე, რომელიც ცდილობს აუტისტური სპექტრის მქონე შვილიშვილის ინტეგრაციას საზოგადოებაში. დიდი გამოწვევების და ადგილობრივად რესურსების უქონლობის პირობებში, ვალერი შვილიშვილს იმ გაკვეთილებს ასწავლის, რაც ცხოვრებისეული გამოწვევების დამოუკიდებლად დაძლევაში დაეხმარება“. დღეს, 20:30 საათზე, ფილმს ორგანიზაციის facebook-ის გვერდზე იხილავთ.  სრულად... წყარო: ორგანიზაციის გვერდი სოციალურ ქსელში

საქართველო. ფილმი „ევროპა და მე“ ოთხ სამიზნე რეგიონში: კახეთში, რაჭა-ლეჩხუმში, გურიასა და იმერეთში გადაღებულ ოთხ ამბავს აერთიანებს. ეს ფილმი მოგვითხრობს ჩვენს საერთო ღირებულებებზე – მრავალფეროვნებაზე, თანასწორობაზე, თავისუფლებასა და დემოკრატიაზე.ვროკავშირის მხარდაჭერით გადაღებული ფილმის „მე და ევროპა“ და მასთან დაკავშირებული რესურსების ნახვა შეგიძლიათ აქ... სრულად... წყარო: eu4georgia.eu

თბილისი. კინოცენტრის საექსპერტო კომისიის გათავისუფლებული წევრების უფლებებს სასამართლოში სამართლიანი არჩევნებისა და დემოკრატიის საერთაშორისო საზოგადოება (ISFED) დაიცავს. კომისიის წევრებს კინემატოგრაფიის ეროვნული ცენტრის მიერ გამოცხადებული კონკურსის - პირველი სრულმეტრაჟიანი მხატვრული ფილმის 2022-2023 წლის წარმოების - გამარჯვებულები უნდა გამოევლინა. „2022 წლის 15 აპრილს საექსპერტო კომისიის წევრებმა მიიღეს შეტყობინება, რომ მათი დანიშვნის ბრძანებაში შევიდა ცვლილება და სრულად განახლდა კომისიის შემადგენლობა. დღემდე კომისიის წევრებს არ მიუღიათ დასაბუთება, ან რაიმე ტიპის განმარტება, მათი დათხოვნის მიზეზებისა და საფუძვლის შესახებ“. განცხადება სრულად... წყარო: isfed.ge

თბილისი. 5 მაისს გაიმართა ფორუმი სახელწოდებით - „რეპრესიები კულტურის სფეროში - კულტურის მოთვინიერების მცდელობა“. „კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ, კულტურის სფეროში განხორციელებულმა რეორგანიზაციამ და მასშტაბურმა ცვლილებებმა საკადრო წმენდის სახე მიიღო, რის ფონზეც სამინისტროს სხვადასხვა საქვეუწყებო დაწესებულებებიდან 70-ზე მეტი თანამშრომელია გათავისუფლდა. ფორუმის მიზანი იყო კულტურის სხვადასხვა სფეროს წარმომადგენლებისთვის დაგვეთმო სივრცე სისტემაში არსებული ცენზურისა და პოლიტიკური კონტროლის შესახებ სასაუბროდ“, ნათქვამია ორგანიზაციის გვერდზე სოციალურ ქსელში. სრულად...  წყარო: ორგანიზაციის გვერდი სოციალურ ქსელში

თბილისი. აქტივისტები სხვადასხვა თემიდან საუბრობენ სოლიდარობის პლატფორმაზე, რომელიც 2019 წელს შეიქმნა და აერთიანებს საქართველოს სხვადასხვა ეთნიკურ და რელიგიურ ჯგუფს. „სოლიდარობის პლატფორმა არის სივრცე, სადაც ჩვენ ვცდილობთ, დავინახოთ ამ ჯგუფების შეხების წერტილები, ვსაუბრობთ ჩვენს ყოფაზე და იმ ექსკლუზიურ გამოცდილებებზე, რომელიც შეიძლება განსაკუთრებით მწვავედ იდგეს საქართველოს სხვადასხვა ეთნიკური და რელიგიური ჯგუფებისთვის“. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ოქტაი ქაზუმოვის ბლოგპოსტს: „დინი-მოვჰუმათი“. „„მუჰარამობა“ ერთადერთი რელიგიური რიტუალია, რომლის დროსაც მუსლიმურ თემთა და სახელმწიფოთა ეთნიკურ/ეროვნულ ენებს მონაწილეობის შესაძლებლობა აქვთ (სხვა შემთხვევებში უპირობოდ არაბული დომინირებს) - ყველა ერს საკუთარ ენაზე შეუძლია გლოვის ლექსების შექმნა და წარმოთქმა. სწორედ ეს უკანასკნელი ფაქტი ანუ გასაგებობაც უნდა მივიჩნიოთ თუნდაც ჩვენს სოფლებში „მუჰარამობისადმი“ (რომელსაც „მარსალიქ“-ს ანუ „მარსიობას“ ვუწოდებთ) იმ დიდი მოწიწების საბაბად, რომელსაც თვით კომუნისტურმა წყობამ არათუ ვერაფერი დააკლო, პირიქით, აკრძალვის კომპონენტით კიდევ უფრო მიმზიდველი და ლამის „დისიდენტურიც“ გახადა“. სრულად... წყარო: socialjustice.org.ge

თბილისი. სოციალური სამართლიანობის ცენტრი გთავაზობთ ინტერვიუს რონალდ გრიგორ სიუნისთან: „მგრძნობადი საზოგადოებები“ და ეროვნული ნარატივები: საქართველო, რუსეთი, სომხეთი და უკრაინა. ორგანიზაციის ცნობით, რონალდ სიუნი სომხური წარმოშობის ამერიკელი ისტორიკოსი, ჩიკაგოსა და მიჩიგანის უნივერსიტეტების საპატიო პროფესორია და ათწლეულების მანძილზე იკვლევდა სამხრეთ კავკასიის სამი სახელმწიფოს ნაციონალიზმის ისტორიას. „ქართული იდენტობის ძალიან ბევრი პოზიტიური ასპექტი არსებობს, მაგალითად, სტუმარმასპინძლობა, რომელიც არაჩვეულებრივი ტრადიციაა. ქართველები ყოველთვის ამბობენ, რომ ისინი ძალიან სტუმართმოყვარეები არიან და ხაზს უსვამენ, რომ ისინი ისტორიის მანძილზე ხშირად იღებდნენ უცხო სტუმრებს. მაგრამ სტუმრობა იმას ნიშნავს, რომ სტუმრებმა რაღაც ეტაპზე უნდა დატოვონ მასპინძლის სახლი. სტუმრობა იგივე არაა, რაც ნამდვილი მოქალაქეობა. ამიტომ მუდმივად იყო განცდა „ჩვენ სტუმართმოყვარეები ვართ, მაგრამ თქვენ მაინც სტუმრები ხართ. სომხები, აზერბაიჯანელები, ბერძნები ის არ ხართ, რაც ნამდვილი ქართველები არიან“. სხვა სიტყვებით, არის პოზიტიური ასპექტები საქართველოში, რისი კულტივირება, განვითარება სხვა, დადებითი, გზით შეიძლებოდა, მაგრამ ასე არ მოხდა“. სრულად... წყარო: socialjustice.org.ge

თბილისი. ღია საზოგადოების ფონდი აქვეყნებს დისკუსიის „კულტურული მემკვიდრეობის მდგომარეობა და სახელმწიფო პოლიტიკა“ ვიდეო ჩანაწერს. „საჯარო დისკუსია მიეძღვნა ქაოტური განაშენიანების შედეგად დანგრეული კულტურული მემკვიდრეობის საკითხს და მისი დაცვის მნიშვნელობას“. პირდაპირი ჩართვის ჩანაწერი... სრულად... წყარო: ორგანიზაციის გვერდი სოციალურ ქსელში

თბილისი. 1990 წელს 14 აპრილი ქართული ენის დღედ გამოცხადდა. „1977 წელს ახალი საბჭოთა კონსტიტუცია მიიღეს, საქართველოს სსრ-ის უზენაესი საბჭო კი განიხილავდა ახალ კონსტიტუციურ გეგმას, რომლის მიხედვითაც ქართული აღარ იქნებოდა სახელმწიფო ენა საქართველოს ტერიტორიაზე, რამაც დიდი ვნებათაღელვა გამოიწვია საზოგადოებაში. საპროტესტო ტალღამ კი კულმინაციას 1978 წელის 14 აპრილს მიაღწია“. ინფორმაციის თავისუფლების განვითარების ინსტიტუტი (IDFI) გთავაზობთ 14 აპრილის თბილისის მოვლენების შესახებ ამონარიდებს დასავლური პრესიდან. სრულად... წყარო: idfi.ge

თბილისი. ტოლერანტობისა და მრავალფეროვნების ცენტრის (TDI) ინფორმაციით, 8 აპრილი ბოშათა საერთაშორისო დღეა. ორგანიზაციის ცნობით, საქართველოში ბოშები ძირითადად ცხოვრობენ თბილისში, ქუთაისში, ფოთში, ოზურგეთში, ქობულეთში, კახეთის სოფლებსა და გარდაბანში. TDI-ს მიერ მომზადებულ ვიდეოში ბოშათა თემის წარმომადგენელი ელენე პროშიკიანი და სკოლის დირექტორი ნარგიზ ჯინჭარაძე ყვებიან ბოშათა საჭიროებების, პრობლემების, სტიგმების დაძლევისა და მიღწევების შესახებ. წყარო: ორგანიზაციის გვერდი სოციალურ ქსელში

თბილისი. მრავალფეროვნების სახეები წარმოგიდგენთ ვიდეოს, რომელიც პოეტ დიანა ანფიმიადთანაა ჩაწერილი. „დიანა ანფიმიადი, ქართული პოეზიის გამორჩეული ავტორი, დედით ქართველი, მამით კი იმ ბერძენთა შთამომავალია, რომლებიც მე-19 საუკუნეში ოსმალეთის იმპერიიდან გამოდევნეს. მაშინ, სამშობლოდან გამოსახლებულმა ბერძნებმა საქართველოს რამდენიმე რეგიონს შეაფარეს თავი, მათ შორის დიანას სოფელსაც - გორას“. წყარო: ორგანიზაციის გვერდი სოციალურ ქსელში

შიდა ქართლი. ამერიკის ელჩი საქართველოში, კელი დეგნანი, გორის ამერიკულ თაროს ესტუმრა, სადაც მოსწავლეებთან, მასწავლებლებსა და ადგილობრივ ოფიციალურ პირებთან დისკუსიაში ჩაერთო. „შეხვედრისას განიხილეს განათლებისა და კულტურის როლი გორის მაცხოვრებლებისა და ახალგაზრდების განვითარებაში. ამერიკის მისია სიამაყით უჭერს მხარს 15 ამერიკულ სივრცეს საქართველოში“. სრულად... წყარო: საელჩოს გვერდი სოციალურ ქსელში

თბილისი. საქართველოს დემოკრატიული ინიციატივას (GDI) ინფორმაციით, ლაშა ჩხვიმიანმა კულტურის, სპორტისა და ახალგაზრდობის სამინისტროსა და მინისტრ თეა წულუკიანის წინააღმდეგ სახალხო დამცველს დისკრიმინაციის დადგენის მოთხოვნით მიმართა. განმცხადებლის ინტერესებს სახალხო დამცველის წინაშე GDI იცავს. „მიგვაჩნია, რომ ლაშა ჩხვიმიანიც სწორედ განსხვავებული შეხედულებების ღიად გაჟღერების გამო გახდა მინისტრ თეა წულუკიანის რეპრესიული პოლიტიკისა და დისკრიმინაციის მსხვერპლი“, ნათქვამია ორგანიზაციის განცხადებაში. სრულად... წყარო: gdi.ge

თბილისი. გავრცელებული ინფორმაციით, კულტურის მინისტრად თეა წულუკიანის დანიშვნის შემდეგ, კულტურის სფეროდან 70-ზე მეტი თანამშრომელია გათავისუფლებული. სოციალური სამართლიანობის ცენტრი, „სამართლიანი არჩევნები” (ISFED) და საქართველოს ახალგაზრდა იურისტთა ასოციაცია (GYLA) სასამართლოში უკვე იცავენ კულტურის სფეროს 22 წარმომადგენლის ინტერესებს. ეს ორგანიზაციები დაიცავენ კინოცენტრის ყოფილი დირექტორის, გაგა ჩხეიძის ინტერესებსაც. „ყოფილი დირექტორი მინისტრის მიერ კინოცენტრის საქმიანობაში ჩარევის კონკრეტულ შემთხვევებზე, არაკორექტულ და არაკეთილგანწყობილ დამოკიდებულებაზე საუბრობს, რაც, სავარაუდოდ, მინისტრთან შეხვედრების დროს გაგა ჩხეიძის მიერ დაფიქსირებული პრინციპულობითა და კინოცენტრის საქმიანობის შინაარსსა და ფორმასთან დაკავშირებით განსხვავებული ხედვებით იყო განპირობებული”, ნათქვამია განცხადებაში. სრულად... წყარო: socialjustice.org.ge

თბილისი. „სხვა კუთხის“ მორიგი ეპიზოდი ეხება საქართველოს აზერბაიჯანელებს, მათ კულტურას, უახლეს ისტორიას და მათი პოლიტიკური, ეკონომიკური და კულტურული პერიფერიალიზაციის საკითხს. „რა ვიცით საქართველოს აზერბაიჯანელების შესახებ და რა არის პრობლემური ჩვენს ამ ცოდნასა და წარმოდგენებში? რა არ ვიცით ამ თემის შესახებ და როგორ ცდილობენ ახალგაზრდა მკვლევრები და აქტივისტები ცოდნის ამ სიცარიელის გარღვევას, ამოვსებას თვითორგანიზებისა და ფიქრის უნიკალური პროცესებით? რა ისტორიულმა ფაქტორებმა, იმპერიულმა და ნაციონალისტურმა პოლიტიკამ განაპირობა ეთნიკური უმცირესობების არაღიარების ამ გარემოს შექმნა და რა შეგვიძლია და რა უნდა მოვითხოვოთ დღეს?! სწორედ ესაა ის მთავარი კითხვები, რომელზეც ინტერვიუში სოციალური სამართლიანობის ცენტრის თანასწორობის პოლიტიკის პროგრამის დირექტორი თამთა მიქელაძე კავკასიოლოგთან, კულტურის მკვლევართან ელნურ ალისოისთან ერთად საუბრობს“. სრულად... წყარო: socialjustice.org.ge

თბილისი. საქართველოს სახალხო დამცველი საქართველოს მოქალაქეებს ნოვრუზ ბაირამის დღესასწაულს ულოცავს. „ვულოცავ ნოვრუზ ბაირამის დღესასწაულს ჩვენს მოქალაქეებს და მათთან ერთად ვიზიარებ ამ ახალი დღის დადგომის სიხარულს. გისურვებთ სიცივეზე სითბოს, სიბნელეზე სინათლის, სიკვდილზე სიცოცხლის გამარჯვებას, როგორც პირად ცხოვრებაში, ასევე მთელ სამყაროში. ეს გამარჯვება დღეს ყველას მეტისმეტად გვჭირდება“, ნათქვამია ომბუდსმენის განცხადებაში. სრულად... წყარო: ombudsman.ge

თბილისი. სოციალური სამართლიანობის ცენტრი საქართველოს აზერბაიჯანელ თემს ნოვრუზ ბაირამს ულოცავს და უფრო სამართლიან, თანასწორ და ღირსეულ გარემოში ცხოვრებას უსურვებს. „დღეს საქართველოს აზერბაიჯანელები აღნიშნავენ ნოვრუზ ბარაიმს. ეს უძველესი სახალხო დღესასწაულია და გაზაფხულის შემოსვლას, გამოღვიძებას და სიცოცხლის განახლებას უკავშირდება. უკვე რამდენიმე წელია საქართველოს აზერბაიჯანელები ნოვრუზ ბაირამს ეროვნულ დღესასწაულად და უქმე დღედ გამოცხადებას ითხოვენ. ადგილობრივი თემისთვის ეს მოთხოვნა საკუთარი კულტურის, იდენტობის და ზოგადად საქართველოს ეთნიკური და კულტურული მრავალფეროვნების აღიარების მნიშვნელობას ატარებს და რა თქმა უნდა. პოლიტიკური შინაარსი აქვს. სამწუხაროდ, თემის ეს მოთხოვნა ხელისუფლების მიერ ამ დრომდე არ არის გაზიარებული. სწორედ ამიტომ ჩვენ მივიჩნევთ, რომ დღეს საქართველოს აზერბაიჯანელის თემის მოთხოვნა ნოვრუზ ბაირამის ეროვნულ დღესასწაულად და უქმედ გამოცხადების შესახებ სამართლიანია და ის გათავისუფლებისთვის და აღიარებისთვის ამ თემის უფრო დიდ ბრძოლას აჩვენებს“, ნათქვამია ორგანიზაციის გვერდზე. სრულად... წყარო: ორგანიზაციის გვერდი სოციალურ ქსელში