თბილისი. ინფორმაციის თავისუფლების განვითარების ინსტიტუტის (IDFI) შეფასებით, მთავრობის ადმინისტრაციის მხრიდან თელარა გელანტიას სხდომაზე განმეორებითი არდაშვების ფაქტი ცალსახად ადასტურებს რომ ადგილი აქვს ჟურნალისტის მიმართ დისკრიმინაციულ მოპყრობას. IDFI კიდევ ერთხელ მოუწოდებს საქართველოს მთავრობის ადმინისტრაციას თანასწორობის პრინციპის საფუძველზე მისცეს თელარა გელანტიას მთავრობის სხდომების გაშუქების შესაძლებლობა და აღმოფხვრას ჟურნალისტის მიმართ განხორციელებული უთანასწორომოპყრობა. სრულად... წყარო: idfi.ge

თბილისი. 27 სექტემბერს, აზერბაიჯანელმა ჟურნალისტმა აფგან მუხთარლიმ თბილისში პრესკონფერენცია გამართა და ხუთი წლის წინ საქართველოს დედაქალაქიდან თავისი გატაცების საქმეზე მიმდინარე გამოძიებაზე ისაუბრა. „მუხთარლიმ მისი გატაცების ორგანიზებისათვის პასუხისმგებლობა საქართველოსა და აზერბაიჯანის უმაღლესი ხელისუფლების წარმომადგენლებს დააკისრა. მანვე მოითხოვა, რომ საქართველოს პრემიერ-მინისტრმა ირაკლი ღარიბაშვილმა უფლებამოსილება შეუჩეროს შინაგან საქმეთა მინისტრს ვახტანგ გომელაურს, ვიდრე ჟურნალისტის გატაცების საქმის გამოძიება არ დასრულდება. მუხთარლის ინტერესებს 2017 წლიდან დღემდე თბილისის ადამიანის უფლებათა სახლი და ორგანიზაცია „უფლებები საქართველო“ იცავენ არა მხოლოდ ადგილობრივ დონეზე, არამედ ევროსასამართლოშიც“. ვრცლად... წყარო: rights.ge

თბილისი. 22 სექტემბერს, პოლიტიკური ნიშნით დისკრიმინაციისა და მედიის თავისუფლების კუთხით არსებული გამოწვევების შესახებ სამართლიანი არჩევნებისა და დემოკრატიის საერთაშორისო საზოგადოებისა (ISFED) და საქართველოს დემოკრატიული ინიციატივის (GDI) სამუშაო შეხვედრა და პროექტის პრეზენტაცია გაიმართა. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. მედიის განვითარების ფონდი ბავშვთა უფლებების კვირეულის ფარგლებში, გაეროს ბავშვთა ფონდთან ერთად ახალქალაქს ეწვია. ფონდმა მედიაწიგნიერების ტრენინგი გამართა და სკოლის მოსწავლეებს ფაქტების გადამოწმების, ვიზუალური მანიპულაციების ამოცნობისა და პირველწყაროს მოძიებისთვის საჭირო ინსტრუმენტები და პროგრამები ასწავლა. ტრენინგების სერია და საინფორმაციოა კამპანია „ნუ დაინფიცირდები დეზინფორმაციით!“ UNICEF Georgia-სთან პარტნიორობითა და USAID/Georgia-ის ფინანსური მხარდაჭერით მიმდინარეობს. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) სამართლებრივ დახმარებას უწევს „ბიზნეს მედია საქართველოს“ ჟურნალისტ, თელარა გელანტიას, საქართველოს მთავრობის მხრიდან მის მიმართ განხორციელებული შესაძლო დისკრიმინაციული ფაქტის დადგენის საქმეზე. „საქართველოს მთავრობის ადმინისტრაციის მიერ ჟურნალისტის მიმართ არათანასწორი მოპყრობა მედიის მიმართ იმ უარყოფითი დამოკიდებულების მორიგი გამოხატულებაა რაც, ბოლო წლების განმავლობაში განსაკუთრებით შეიმჩნევა ხელისუფლების წარმომადგენლების მხრიდან“. სრულად... წყარო: idfi.ge

თბილისი. USAID-მა, UNICEF-მა, მედიის განვითარების ფონდმა და DemocracyLab-მა გადაამზადეს 600 ახალგაზრდა და 200 მასწავლებელი, რომლებიც შეძლებენ COVID-19-ის შესახებ დეზინფორმაციის იდენტიფიცირებას და ამ ცოდნას მეგობრებსაც გაუზიარებენ. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია თელარა გელანტიას მთავრობის სხდომაზე დასწრების აკრძალვის ფაქტს ეხმიანება. კოალიციის განცხადებით, ჟურნალისტთა მიმართ დისკრიმინაციული მოპყრობა ხელს უწყობს მედიის მიმართ მტრული გარემოს ჩამოყალიბებას და აუარესებს მედიის თავისუფლების ხარისხს საქართველოში. მედიის ადვოკატირების წევრი ორგანიზაციის - ინფორმაციის თავისუფლების განვითარების ინსტიტუტის (IDFI) დახმარებით, თელარა გელანტია მიმართავს საქართველოს სახალხო დამცველს ჟურნალისტის მიმართ დისკრიმინაციული მოპყრობის შესაძლო ფაქტის შესასწავლად. მოვუწოდებთ მთავრობის ადმინისტრაციას დაუყოვნებლივ გააკეთოს განმარტება თელარა გელანტიას მიმართ შესაძლო დისკრიმინაციული მოპყრობის ფაქტთან დაკავშირებით. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიციის ინფორმაციით, 8 სექტემბერს, საქართველოში არ შემოუშვეს კიდევ ერთი რუსი ჟურნალისტი დმიტრი ალეშკოვსკი, რომელიც თბილისში ცოლთან და შვილთან ერთად ცხოვრობდა. დეტალური ინფორმაციისთვის: სტატია „რუსი ჟურნალისტი და ქველმოქმედი დმიტრი ალეშკოვსკი საქართველოში არ შემოუშვეს“... ვიდეო „რუსული სია ქართულ საზღვარზე?“...  ჟურნალისტური საქმიანობის მიმართ მაღალი საჯარო ინტერესის გათვალისწინებით, მედიის ადვოკატირების კოალიცია/Media Advocacy Coalition-მ მიმართა შინაგან საქმეთა სამინისტროს და მოითხოვა ინფორმაცია საქართველოს საზღვარზე რუსი ჟურნალისტის შეჩერების და ქვეყანაში გადაადგილების ნებართვის გაცემაზე უარის მიზეზის თაობაზე. კოალიცია გამოთქვამს მზადყოფნას დაიცვას  ჟურნალისტის ინტერესები საქართველოში სრულად...  წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) 55 წელს გადაცილებული მოქალაქეებისთვის მედია და საინფორმაციო წიგნიერების ტრენინგებს აგრძელებს. ტრენინგის მონაწილეები ეცნობიან მედიასა და სოციალურ ქსელებში ინფორმაციის მანიპულაციების ამოცნობის და გადამოწმების გზებს, ასევე, იძენენ პრაქტიკულ უნარებს, რომლებიც დაეხმარებათ ყალბი და რეალური ამბების გარჩევაში.  თბილისში, ტრენინგში მონაწილეობის მსურველებს რეგისტრაციის გავლა შემდეგ ბმულზე შეუძლიათ... ტრენინგები „სამართლიანი არჩევნებისა და დემოკრატიის საერთაშორისო საზოგადოება” (ISFED)-ის მიერ ევროკავშირის მხარდაჭერით ხორციელდება. სრულად...  წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია მოუწოდებს საქართველოს პარლამენტს ირაკლი კობახიძის გამონათქვამები პარლამენტის წევრის ეთიკის კოდექსის ფარგლებშიც შეისწავლოს. გავრცელებული ინფორმაციით, 2022 წლის 25 ივლისს „მთავარი არხის“ ჟურნალისტი,  ნატალი ჯახუტაშვილი  „ქართული ოცნების“ თავმჯდომარის ირაკლი კობახიძის აგრესიული სიტყვიერი თავდასხმის სამიზნედ იქცა. პროფესიული საქმიანობის შესრულებისას ირაკლი კობახიძე ჟურნალისტს შეურაცხმყოფელი ფრაზებით მიმართავდა და სექსისტური ენით ესაუბრებოდა. კოალიცია გმობს ირაკლი კობახიძის მიერ ჟურნალისტზე თავდასხმას და მოუწოდებს მმართველ პარტიას, „ქართულ ოცნებას”, მიიღოს ზომები ევროპასთან ინტეგრაციის პროცესში არსებული ვალდებულებების შესასრულებლად, რაც მოიცავს ხელისუფლების პასუხისმგებლობას გააუმჯობესოს მედიაგარემო ქვეყანაში. სრულად... წყარო: კოალიციის გვერდი სოციალურ ქსელში

თბილისი. 2022 წლის 13 ივლისს ტელეკომპანიების „მაესტროს” და „იმედის” ეთერით წამყვანმა გია გაჩეჩილაძემ (უცნობი) გაავრცელა ფარული ჩანაწერი, რომელიც მისივე განმარტებით, ტელეკომპანია „მთავარი არხის” გუნდის სამუშაო პროცესს ასახავს, „მთავარი არხის” ჟურნალისტები კი ჩანაწერების ავთენტურობას ადასტურებენ. მედიის ადვოკატირების კოალიცია მიიჩნევს, რომ სპეციალურმა საგამოძიებო სამსახურმა დაუყოვნებლივ უნდა დაიწყოს გამოძიება სისხლის სამართლის კოდექსის 158-ე მუხლით, რაც კერძო კომუნიკაციის საიდუმლოების დარღვევას გულისხმობს. „მოვუწოდებთ, სპეციალურ საგამოძიებო სამსახურს სწრაფი და ეფექტიანი გამოძიებით გაფანტოს ჟურნალისტებზე სახელმწიფოს მიერ უკანონო მიყურადების შესახებ არსებული ეჭვები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიციის ინფორმაციით, 2022 წლის 7 ივლისს, პირველი არხის ეთერში, პოლიტიკური პარტიის „სტრატეგია აღმაშენებლის“ თავმჯდომარემ გიორგი ვაშაძემ, ჩართვისას, არხის წამყვანს, თამთა სანიკიძეს არაერთხელ მიუთითა კითხვების ფორმულირების ცვლილებისკენ და უხეშად მიმართა. კოალიციის ცნობით, 2022 წლის 7 ივლისს, პარტია „ქართული ოცნების“ თავმჯდომარის, ირაკლი კობახიძის თავდასხმის სამიზნედ იქცა მთავარი არხი და მისი ჟურნალისტი, თენგო გოგოტიშვილიც. ბრიფინგზე მმართველი პარტიის ლიდერმა ჟურნალისტს რუსული სპეცსამსახურების პროპაგანდის გავრცელებაში დასდო ბრალი, „ომში ჩართვისკენ“ მოწოდებებში დაადანაშაულა და აღნიშნა, რომ მსგავსი „პროპაგანდის გავრცელებით“ სხვებიც გამოირჩევიან - პოლიტიკოსებთან, არასამთავრობო ორგანიზაციების წარმომადგენლებთან და სახალხო დამცველთან ერთად, ტელეკომპანია „ფორმულას“ ჟურნალისტი, ვახო სანაიაც დაასახელა. მედიის ადვოკატირების კოალიცია მიუღებლად მიიჩნევს, მედიის წამომადგენლებზე ნებისმიერი სახის თავდასხმას. „ჟურნალისტების გამოხატვის თავისუფლებაში ჩარევა იწვევს უარყოფით შედეგს, რომელსაც საზოგადოებაზე აქვს გავლენა. პოლიტიკოსებს უნდა ესმოდეთ, რომ ჟურნალისტებზე თავდასხმა ახალისებს ჟურნალისტთა მიმართ ძალადობას. ამასთან, წარმოადგენს საზოგადოების თითოეული წევრის ინფორმაციისა და იდეების მიღების უფლებაში ჩარევას. კოალიცია მოუწოდებს როგორც საპარლამენტო უმრავლესობის, ისე საპარლამენტო უმცირესობის წევრებს პატივი სცენ ჟურნალისტების პროფესიულ თავისუფლებას“, ნათქვამია განცხადებაში. სრულად... წყარო: კოალიციის გვერდი სოციალურ ქსელში

თბილისი. მედიის ადვოკატირების კოალიციის ინფორმაციით, დღეს, 11 ივლისს, ტელეკომპანია პირველის ოპერატორის, ლექსო ლაშქარავას გარდაცვალებიდან 1 წელი გავიდა. 2021 წლის 11 ივლისს, ლექსო, რომელიც პარლამენტის მიმდებარე ტერიტორიაზე სირცხვილია-ს ოფისში ათობით თავდამსხმელის ძალადობის მსხვერპლი გახდა, საკუთარ სახლში გარდაცვლილი იპოვეს. თავდასხმის შემდეგ ლექსო ლაშქარავას დაზიანებული ჰქონდა სახის ძვლები და ჩაუტარდა ქირურგიული ოპერაცია. საქართველოს პროკურატურას, შინაგან საქმეთა სამინისტროს ამ დრომდე არ გამოუვლენია დამნაშავეები. გაეცანით: კოალიციის წევრი ორგანიზაციის „მედიის განვითარების ფონდის“ (MDF) ახალ კვლევას „ძალადობრივი ჯგუფების ანატომია - 1 წელი 5 ივლისის მოვლენებიდან“... ასევე, მედიის ადვოკატირების კოალიციის შეფასებას - მედიის პოგრომი: თბილისი 5 - 6 ივლისი, 2021 წელი... „2021 წლის 5 და 6 ივლისის მასშტაბური ძალადობის ორგანიზატორთა გამოვლენა და დასჯა ხელისუფლების საქართველოს მთავრობა პასუხისმგებლობაა“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ჟურნალისტური ეთიკის ქარტიის საბჭოს გადაწყვეტილებით, რუსთავი 2-ის ჟურნალისტმა ქარტიის პირველი და მე-7 პრინციპი დაარღვია. 17 მაისს, სოციალური სამართლიანობის ცენტრმა, პანკისის ხეობიდან ადგილობრივი აქტივისტისა და ჟურნალისტის სულხან ბორძიკაშვილის სახელით, ეთიკის ქარტიას მიმართა. სადავო სიუჟეტი პანკისის ხეობის სოფლებში იჩქერიის დროშების გამოჩენას ეხება. ვრცლად... წყარო: www.qartia.ge

თბილისი. უკრაინაზე რუსეთის სამხედრო თავდასხმის შემდგომ, ევროკავშირმა რუს პროპაგანდისტებს მკაცრი სანქციები დაუწესა. საერთაშორისო გამჭვირვალობა - საქართველოს ინფორმაციით, საქართველოს ხელისუფლება კი მხოლოდ იმ ჟურნალისტებსა და აქტივისტებს უქმნის პრობლემებს, ვინც კრემლის მიმართ კრიტიკულად არის განწყობილი. მაგალითად, საქართველოში შემოსვლაზე უარი უთხრეს და საზღვრიდან უკან გააბრუნეს ტელეკომპანია „დოჟდის“ და ონლაინგამოცემა „მედიაზონის“ ჟურნალისტები. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია/Media Advocacy Coalition „TV მონიტორინგის“ გადამღებ ჯგუფზე თავდასხმას ეხმიანება. გავრცელებული ინფორმაციის თანახმად, 2022 წლის 05 ივლისს „TV მონიტორინგის“ გადამღებ ჯგუფს შოთა სადაღაშვილს და თორნიკე გელიტაშვილს ჟურნალისტური საქმიანობის შესრულების დროს თავს დაესხნენ. შემთხვევა ქარელის მუნიციპალიტეტში მოხდა. ჟურნალისტის ინფორმაციით, მოძალადეები ძალადობრივი და პრორუსული ჯგუფის „ალტ-ინფოს“ პარტიის მხარდამჭერებად გაეცნენ,  არხის სარედაქციო, პროევროპული პოლიტიკის გამო აკრიტიკებდნენ და ხელს უშლიდნენ პროფესიულ საქმიანობაში. მედიის ადვოკატირების კოალიცია მოუწოდებს სპეციალურ საგამოძიებო სამსახურს სწრაფი და ეფექტიანი გამოძიების პირობებში გამოიკვლიოს „TV მონიტორინგისთვის“ ჟურნალისტურ საქმიანობაში ხელშეშლის შემთხვევა. კოალიცია მიმართავს შინაგან საქმეთა სამინისტროს გაატაროს პრევენციული ზომები მედიის წარმომადგენლებზე გახშირებული თავდასხმების შესაჩერებლად. სრულად... წყარო: კოალიციის გვერდი სოციალურ ქსელში

თბილისი. დღეს, 2022 წლის 5 ივლისს, მედიისა და არასამთავრობო სექტორის წარმომადგენლებმა პროკურატურის წინ აქცია გამართეს. აქციის მონაწილეებმა 1 წლის თავზე, 2021 წლის 5-6 ივლისს პროფესიული მოვალეობის შესრულების დროს ჰომოფობიური და მოძალადე ჯგუფების მიერ ჟურნალისტებზე თავდასხმის ყველა მონაწილისა და ორგანიზატორის გამოვლენა და დასჯა მოითხოვეს. 5-6 ივლისს სიძულვილის ჯგუფების მასობრივი თავდასხმის შედეგად მედიის 53 წარმომადგენელი დაშავდა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს გაეროს ასოციაციის ინფორმაციით, ორგანიზაციის მედია პლატფორმა - Civil.ge 21 წლისაა. „სამოქალაქო საქართველო - Civil.ge ახალ ამბებს სამ ენაზე - ქართულ, ინგლისურ და რუსულ ენაზე აცნობს მკითხველს. Civil.ge-ს ამბებს ფართოდ იყენებენ ადგილობრივი და საერთაშორისო, სამთავრობო და არასამთავრობო უწყებები, საქართველოში და მის ფარგლებს გარეთ. აღნიშნული ორგანიზაციები ეყრდნობიან Civil.ge-ს ახალ ამბებსა და არქივებს თავიანთ ანგარიშებსა და პუბლიკაციებში“. სრულად...  წყარო: UNA Georgia-ს გვერდი სოციალურ ქსელში

თბილისი. კოალიცია მედიის ადვოკატირებისთვის განცხადებას ავრცელებს და მიიჩნევს, რომ 2021 წლის 5 და 6 ივლისის მასშტაბური ძალადობის ორგანიზატორთა გამოვლენა და დასჯა ხელისუფლების პასუხისმგებლობაა. „ერთი წლის წინ, 2021 წლის 5 და 6 ივლისს, ქართულ ჟურნალისტიკაში ყველაზე მძიმე დღეები იყო, რა დროსაც პროფესიული მოვალეობის შესრულებისას ჰომოფობიური და მოძალადე ჯგუფების მასობრივი თავდასხმის შედეგად მედიის 53 წარმომადგენელი დაშავდა. 11 ივლისს საკუთარ სახლში გარდაცვლილი იპოვეს „TV პირველის“ ოპერატორი ლექსო ლაშქარავა. ოპერატორი 5 ივლისის თავდასხმების დროს სიძულვილის ჯგუფებმა სასტიკად სცემეს -  მიიღო ტვინის შერყევა, ჩამტვრეული ჰქონდა სახის ძვლები და ჩაუტარდა ქირურგიული ოპერაცია. გამოძიებას 5 და 6 ივლისის თავდასხმის ორგანიზატორები ერთი წლის თავზე კვლავ არ გამოუვლენია და შესაბამისად, არ დაუსჯია. მედია გარემო კი დღითი დღე უარესდება“. კოალიცია მოუწოდებს ხელისუფლებას: გამოავლინოს და სათანადოდ დასაჯოს 5-6 ივლისის მოვლენების დროს დანაშაულებრივი ქმედებების უშუალო ჩამდენები და ორგანიზატორები. სწრაფად და ეფექტიანად გამოიძიოს ჟურნალისტების წინააღმდეგ მომრავლებული თავდასხმები, მათ პროფესიულ საქმიანობაში უკანონო ხელშეშლის ფაქტები და სისხლის სამართლებრივ პასუხისგებაში მისცეს შესაბამისი პირები; შეწყდეს კრიტიკული მედიასაშუალებების მიმართ მიმდინარე პოლიტიკურად მოტივირებული გამოძიებები და სასამართლო პროცესები. ციხიდან გათავისუფლდეს ტელეკომპანია „მთავარი არხის“ დირექტორი და დამფუძნებელი ნიკა გვარამია; გამოიძიოს მედიის წარმომადგენლების მასობრივი უკანონო ფარული მოსმენა-მიყურადების და თვალთვალის საქმეები. სრულად...  წყარო: mediacoalition.ge

აჭარა. 3 ივლისს, ბათუმში გაიმართა შეხვედრა მედიის წარმომადგენლებთან იმუნიზაციის პროგრამისა და მისი მნიშვნელობის, ასევე COVID-19-ის პრევენციისა და მკურნალობის საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია ეხმიანება გავრცელებულ ინფორმაციას “TV პირველის” წარმომადგენლებისთვის ხელის შეშლის შესახებ. 2022 წლის 24 ივნისს თბილისში, დოლიძის ქუჩაზე ჟურნალისტ ნანუკა ქაჯაიას და ოპერატორ პაპუნა ხაჩიძეს თავს დაესხნენ. გავრცელებული კადრებიდან ჩანს, რომ გადამღებ ჯგუფს აგრესიული პირები ხელს უშლიან ჟურნალისტურ საქმიანობაში.  გუშინ, 2022 წლის 23 ივნისს “TV პირველის“ კიდევ ერთმა წარმომადგენელმა, ჟურნალისტმა ნატა ქაჯაიამ გაავრცელა ინფორმაცია, რომ საქართველოს პარლამენტის წევრის მამუკა მდინარაძის მხრიდან დისკრიმინაციის და აგრესიული დამოკიდებულების მსხვერპლი გახდა. ჟურნალისტის ინფორმაციით, პარლამენტის წევრმა საჯარო შეხვედრისას მის მიმართ არაერთხელ გამოიყენა არაკორექტული ლექსიკა, ისევე როგორც შეურაცხმყოფელი, პატივისა და ღირსების შემლახველი, ასევე დისკრიმინაციული ფრაზები. კოალიცია მოუწოდებს სპეციალურ საგამოძიებო სამსახურს, დაუყოვნებლივ დაიწყოს გამოძიება დოლიძის ქუჩაზე  “TV პირველის”  გადამღებ ჯგუფზე თავდასხმის ფაქტზე. კოალიცია მოუწოდებს საქართველოს პარლამენტს ეთიკის საბჭოს ფარგლებში შეისწავლოს პარლამენტის წევრის მამუკა მდინარაძის მიერ საქართველოს პარლამენტის წევრის ეთიკის კოდექსის შესაძლო დარღვევის შესახებ. სრულად... გადამღებ ჯგუფზე თავდასხმა  წყარო: კოალიცია მედიის დამოუკიდებლობისთვის

თბილისი. სოციალური სამართლიანობის ცენტრი  წარმოგიდგენთ ახალ სამაგიდო კვლევას „სისტემური მედიამრავალფეროვნება“. „კვლევა ეფუძნება რამდენიმე საერთაშორისო მედიასაშუალების სტრატეგიული დოკუმენტების ანალიზს და მასში მიმოხილულია ის საუკეთესო პრაქტიკა, რაც ამ მედიასაშუალებებს მრავალფეროვნების მიმართულებით აქვთ, როგორც მედიაგაშუქების, ისე ორგანიზაციული მოწყობის მიმართულებით. კვლევის მიზანია შექმნას რეფლექსიის სივრცე საქართველოში მომუშავე მედიაპროფესიონალებისთვის, რათა ეთნიკური, რელიგიური, და ენობრივი მრავალფეროვნება გახდეს არა ერთჯერადი, არამედ მუდმივად განახლებადი ინიციატივა“. სრულად... წყარო: socialjustice.org.ge