თბილისი. დღეს, 2022 წლის 5 ივლისს, მედიისა და არასამთავრობო სექტორის წარმომადგენლებმა პროკურატურის წინ აქცია გამართეს. აქციის მონაწილეებმა 1 წლის თავზე, 2021 წლის 5-6 ივლისს პროფესიული მოვალეობის შესრულების დროს ჰომოფობიური და მოძალადე ჯგუფების მიერ ჟურნალისტებზე თავდასხმის ყველა მონაწილისა და ორგანიზატორის გამოვლენა და დასჯა მოითხოვეს. 5-6 ივლისს სიძულვილის ჯგუფების მასობრივი თავდასხმის შედეგად მედიის 53 წარმომადგენელი დაშავდა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს გაეროს ასოციაციის ინფორმაციით, ორგანიზაციის მედია პლატფორმა - Civil.ge 21 წლისაა. „სამოქალაქო საქართველო - Civil.ge ახალ ამბებს სამ ენაზე - ქართულ, ინგლისურ და რუსულ ენაზე აცნობს მკითხველს. Civil.ge-ს ამბებს ფართოდ იყენებენ ადგილობრივი და საერთაშორისო, სამთავრობო და არასამთავრობო უწყებები, საქართველოში და მის ფარგლებს გარეთ. აღნიშნული ორგანიზაციები ეყრდნობიან Civil.ge-ს ახალ ამბებსა და არქივებს თავიანთ ანგარიშებსა და პუბლიკაციებში“. სრულად...  წყარო: UNA Georgia-ს გვერდი სოციალურ ქსელში

თბილისი. კოალიცია მედიის ადვოკატირებისთვის განცხადებას ავრცელებს და მიიჩნევს, რომ 2021 წლის 5 და 6 ივლისის მასშტაბური ძალადობის ორგანიზატორთა გამოვლენა და დასჯა ხელისუფლების პასუხისმგებლობაა. „ერთი წლის წინ, 2021 წლის 5 და 6 ივლისს, ქართულ ჟურნალისტიკაში ყველაზე მძიმე დღეები იყო, რა დროსაც პროფესიული მოვალეობის შესრულებისას ჰომოფობიური და მოძალადე ჯგუფების მასობრივი თავდასხმის შედეგად მედიის 53 წარმომადგენელი დაშავდა. 11 ივლისს საკუთარ სახლში გარდაცვლილი იპოვეს „TV პირველის“ ოპერატორი ლექსო ლაშქარავა. ოპერატორი 5 ივლისის თავდასხმების დროს სიძულვილის ჯგუფებმა სასტიკად სცემეს -  მიიღო ტვინის შერყევა, ჩამტვრეული ჰქონდა სახის ძვლები და ჩაუტარდა ქირურგიული ოპერაცია. გამოძიებას 5 და 6 ივლისის თავდასხმის ორგანიზატორები ერთი წლის თავზე კვლავ არ გამოუვლენია და შესაბამისად, არ დაუსჯია. მედია გარემო კი დღითი დღე უარესდება“. კოალიცია მოუწოდებს ხელისუფლებას: გამოავლინოს და სათანადოდ დასაჯოს 5-6 ივლისის მოვლენების დროს დანაშაულებრივი ქმედებების უშუალო ჩამდენები და ორგანიზატორები. სწრაფად და ეფექტიანად გამოიძიოს ჟურნალისტების წინააღმდეგ მომრავლებული თავდასხმები, მათ პროფესიულ საქმიანობაში უკანონო ხელშეშლის ფაქტები და სისხლის სამართლებრივ პასუხისგებაში მისცეს შესაბამისი პირები; შეწყდეს კრიტიკული მედიასაშუალებების მიმართ მიმდინარე პოლიტიკურად მოტივირებული გამოძიებები და სასამართლო პროცესები. ციხიდან გათავისუფლდეს ტელეკომპანია „მთავარი არხის“ დირექტორი და დამფუძნებელი ნიკა გვარამია; გამოიძიოს მედიის წარმომადგენლების მასობრივი უკანონო ფარული მოსმენა-მიყურადების და თვალთვალის საქმეები. სრულად...  წყარო: mediacoalition.ge

აჭარა. 3 ივლისს, ბათუმში გაიმართა შეხვედრა მედიის წარმომადგენლებთან იმუნიზაციის პროგრამისა და მისი მნიშვნელობის, ასევე COVID-19-ის პრევენციისა და მკურნალობის საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია ეხმიანება გავრცელებულ ინფორმაციას “TV პირველის” წარმომადგენლებისთვის ხელის შეშლის შესახებ. 2022 წლის 24 ივნისს თბილისში, დოლიძის ქუჩაზე ჟურნალისტ ნანუკა ქაჯაიას და ოპერატორ პაპუნა ხაჩიძეს თავს დაესხნენ. გავრცელებული კადრებიდან ჩანს, რომ გადამღებ ჯგუფს აგრესიული პირები ხელს უშლიან ჟურნალისტურ საქმიანობაში.  გუშინ, 2022 წლის 23 ივნისს “TV პირველის“ კიდევ ერთმა წარმომადგენელმა, ჟურნალისტმა ნატა ქაჯაიამ გაავრცელა ინფორმაცია, რომ საქართველოს პარლამენტის წევრის მამუკა მდინარაძის მხრიდან დისკრიმინაციის და აგრესიული დამოკიდებულების მსხვერპლი გახდა. ჟურნალისტის ინფორმაციით, პარლამენტის წევრმა საჯარო შეხვედრისას მის მიმართ არაერთხელ გამოიყენა არაკორექტული ლექსიკა, ისევე როგორც შეურაცხმყოფელი, პატივისა და ღირსების შემლახველი, ასევე დისკრიმინაციული ფრაზები. კოალიცია მოუწოდებს სპეციალურ საგამოძიებო სამსახურს, დაუყოვნებლივ დაიწყოს გამოძიება დოლიძის ქუჩაზე  “TV პირველის”  გადამღებ ჯგუფზე თავდასხმის ფაქტზე. კოალიცია მოუწოდებს საქართველოს პარლამენტს ეთიკის საბჭოს ფარგლებში შეისწავლოს პარლამენტის წევრის მამუკა მდინარაძის მიერ საქართველოს პარლამენტის წევრის ეთიკის კოდექსის შესაძლო დარღვევის შესახებ. სრულად... გადამღებ ჯგუფზე თავდასხმა  წყარო: კოალიცია მედიის დამოუკიდებლობისთვის

თბილისი. სოციალური სამართლიანობის ცენტრი  წარმოგიდგენთ ახალ სამაგიდო კვლევას „სისტემური მედიამრავალფეროვნება“. „კვლევა ეფუძნება რამდენიმე საერთაშორისო მედიასაშუალების სტრატეგიული დოკუმენტების ანალიზს და მასში მიმოხილულია ის საუკეთესო პრაქტიკა, რაც ამ მედიასაშუალებებს მრავალფეროვნების მიმართულებით აქვთ, როგორც მედიაგაშუქების, ისე ორგანიზაციული მოწყობის მიმართულებით. კვლევის მიზანია შექმნას რეფლექსიის სივრცე საქართველოში მომუშავე მედიაპროფესიონალებისთვის, რათა ეთნიკური, რელიგიური, და ენობრივი მრავალფეროვნება გახდეს არა ერთჯერადი, არამედ მუდმივად განახლებადი ინიციატივა“. სრულად... წყარო: socialjustice.org.ge

თბილისი. მედიის ადვოკატირების კოალიციის ინფორმაციით, 2022 წლის გავრცელდა ინფორმაცია საქართველოს კულტურის, სპორტისა და ახალგაზრდობის სამინისტრო შენობაში ტელეკომპანია პირველი გადამღები ჯგუფის შეზღუდვის თაობაზე. ვიდეო ხელმისაწვდომია... კოალიციამ მიმართა სამინისტროს გაასაჯაროვოს შეზღუდვის მიზეზი და მოითხოვა სამართლებრივი რეაგირება ჟურნალისტების უფლებების დარღვევის ფაქტზე. კოალიცია კიდევ ერთხელ შეახსენებს საქართველოს ხელისუფლებას, რომ ევროპასთან ინტეგრაციის პროცესში   მედიაგარემოს გაუმჯობესება განსაკუთრებული ამოცანაა. სრულად...  წყარო: კოალიციის გვერდი სოციალურ ქსელში

სამცხე-ჯავახეთი. სამცხე-ჯავახეთის ჰაბის - დემოკრატ მესხთა კავშირის (UDM) ხელშეწყობით და საქართველოს სტრატეგიული კვლევებისა და განვითარების ცენტრი-ს ორგანიზებით, ახალციხეში მოქმედი საზოგადოებრივი ორგანიზაციების წარმომადგენლებისთვის და აქტიური მოქალაქეებისთვის ჩატარდა ტრენინგი თემაზე: „საზოგადოებასთან ურთიერთობის უნარების გაუმჯობესება ციფრული ინსტრუმენტების გამოყენებით“. „ტრენინგის მიზანია აღჭურვოს საზოგადოებრივი  და სათემო ორგანიზაციების წარმომადგენლები, ახალგაზრდები და  სამოქალაქო აქტივისტები საზოგადოებასთან გაუმჯობესებული ურთიერთობის, მხარდამჭერების მოზიდვისა და მოხალისეობრივი ან ქრაუდფანდინგის კამპანიების ორგანიზების საჭირო უნარებით. ტრენინგი ხორციელდება პროექტ „სამოქალაქო საზოგადოების ინიციატივა“ ფარგლებში ევროკავშირისა და კონრად ადენაუერის ფონდის მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიციის წევრი ორგანიზაციები საქართველოს პრეზიდენტს თხოვნით მიმართავენ, განიხილოს და დადებითად გადაწყვიტოს „მთავარი არხის“ გენერალური დირექტორის ნიკა გვარამიას შეწყალების საკითხი. „მთავარი არხის” დამფუძნებლის და გენერალური დირექტორის დაპატიმრებით რეალური საფრთხე შეექმნა ჩვენი ქვეყნის ევროპულ მომავალს. სამართლიანი კრიტიკა ნიკა გვარამიას დაკავებასთან დაკავშირებით ევროპარლამენტის 2022 წლის 8 ივნისის რეზოლუციაშიც „მედიის თავისუფლებისა და ჟურნალისტთა უსაფრთხოების დარღვევების შესახებ“ აისახა, რომლითაც ევროპარლამენტმა მოუწოდებს საქართველოს ხელისუფლებას, მტკიცედ დაიცვას დემოკრატიის უმაღლესი სტანდარტები, ისეთი მიმართულებებით, როგორიცაა კანონის უზენაესობა, სასამართლო სისტემის დამოუკიდებლობა, სამართლიანი სასამართლო პროცესები და ფუნდამენტური თავისუფლებები, მათ შორის, მედიის თავისუფლების სფეროში. მოგმართავთ, როგორც საქართველოს სახელმწიფოს მეთაურს, შეიწყალოთ ნიკა გვარამია და ამ გზით შეასრულოთ საკუთარი როლი ქვეყანაში მიმდინარე პოლიტიკური კრიზისის განმუხტვასა და საქართველოს ევროპის კავშირში ინტეგრაციის პროცესში. თქვენი უფლებამოსილების გამოყენებით დაამტკიცოთ ევროკავშირის წევრობის რეალური სურვილი და მზაობა ქვეყანამ გადალახოს არსებული დაბრკოლებები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, გუშინ ტელეკომპანია „იმედის“ ეთერში გაშუქდა კომპანია „გორბის“ (GORBI) მიერ ჩატარებული საზოგადოებრივი აზრის გამოკითხვის შედეგები, რომელშიც დასმული კითხვების ნაწილის ფორმულირება არ შეესაბამება ვალიდობის სტანდარტებს. აცდენილია აქტუალობას და მიზნად ისახავს არა საზოგადოებრივი აზრის შესწავლას, არამედ მის მანიპულირებას და ამდენად, წარმოადგენს პროპაგანდის ინსტრუმენტს. „იმედის“ დაკვეთით ჩატარებული კვლევის ეს ნაწილი, თავისი აბსურდულობით, აქამდე შეფარვით მიმდინარე ანტიდასავლური რიტორიკის საზოგადოებრივ აზრზე მოხვევის მცდელობას წარმოადგენს. „ამგვარი კვლევის ინსტრუმენტალიზაცია ავტორიტარული რეჟიმებისთვის დამახასიათებელი პროპაგანდის მეთოდების არაერთ ტექნიკას აერთიანებს, როგორებიცაა: შიშის დანერგვა, ადამიანების არარსებული არჩევანის წინაშე დაყენება, მტრის ხატის შექმნა, საზოგადოებრივი აზრისა და განწყობების მანიპულაცია და მოტყუება“. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 10 ივნისს, პირველი ინსტანციის სასამართლომ საქმეზე გამოაცხადა გადაწყვეტილება, რომლის მიხედვითაც სასამართლომ ეკა კვესიტაძის სამსახურიდან გათავისუფლება მიიჩნია კანონიერად და სამაუწყებლო კომპანიას დააკისრა მხოლოდ ნამუშევარი პერიოდის სახელფასო ანაზღაურების გადახდა. მოსარჩელეს კი სამაუწყებლო კომპანიის სასარგებლოდ დაეკისრა 25 000 ლარის გადახდა შრომითი ხელშეკრულების პირობების დარღვევის გამო, რაც გულისხმობდა ჟურნალისტის ახლადშექმნილ სამაუწყებლო კომპანიაში („მთავარი არხი“) მუშაობის გაგრძელებას. საიას პოზიციით, ორგანიზაციისთვის სრულიად მიუღებელია სასამართლოს მიერ გადაწყვეტილების გამოცხადებისას გაჟღერებული პოზიციები. მას შემდეგ, რაც მხარეს ჩაბარდება დასაბუთებული გადაწყვეტილება, მოსარჩელე მას გაასაჩივრებს სააპელაციო წესით. სრულად...  წყარო: gyla.ge

თბილისი. 3-4 ივნისს, ინფორმაციის თავისუფლების განვითარების ინსტიტუტმა (IDFI) და საქართველოს უნივერსიტეტმა, ასევე, უნივერსიტეტის ბაზაზე შექმნილმა, საგამოძიებო მედია ლაბმა გამართეს კონფერენცია თემაზე: „მსოფლიოს გამოფხიზლება: ჰიბრიდული ომი, დეზინფორმაცია და ისტორია ცენტრალურ და აღმოსავლეთ ევროპაში“.  სრულად...  წყარო: idfi.ge

თბილისი. საქართველოს ახალგაზრდა იურისტთა ასოციაცია გაეცნო ე.წ რუსთავი 2-ის საქმეზე ნიკა გვარამიას, კახაბერ დამენიას და ზურა იაშვილის მიმართ გამოტანილ განაჩენს. მოცემულ საქმეზე საია ახორციელებდა სასამართლო სხდომების მონიტორინგს.  საიას შეფასებით, სასამართლოში საქმის განხილვის სხვადასხვა ეტაპზე არსებულ კითხვებს, რაც ბრალდებულთა მიმართ ბრალის წარდგენის, სასამართლო განხილვის, გამამტყუნებელი განაჩენის გამოტანის სტანდარტებთან და მოსამართლის დამოუკიდებლობასა და მიუკერძოებლობასთან მიმართებით არსებობდა, სასამართლო არც განაჩენში პასუხობს, რის გამოც ორგანიზაციას მიაჩნია, რომ განაჩენი დაუსაბუთებელია - „ამასთანავე, სასამართლო სხდომის დარბაზში გამოკვლეული არაერთი მტკიცებულება გვაძლევს იმის თქმის საფუძველს, რომ ქმედებაში არ იყო დანაშაულის ნიშნები“. სრულად...  წყარო: www.gyla.ge

სამეგრელო. USAID-ის მხარდაჭერით გაეროს ბავშვთა ფონდმა და მედიის განვითარების ფონდმა ფოთის მეხუთე საჯარო სკოლაში ჩაატარეს მედია წიგნიერების ტრენინგი „ნუ დაინფიცირდები დეზინფორმაციით.“ ტრენინგზე ახალგაზრდებმა მიიღეს ინფორმაცია იმის შესახებ თუ როგორ უნდა ამოიცნონ კოვიდ 19-თან დაკავშირებული დეზინფორმაცია და თავიანთი ცოდნა თანატოლებსაც გაუზიარონ. სრულად...  წყარო: ორგანიზაციის გვერდი სოციალურ ქსელში

კახეთი. სოციალური სამართლიანობის ცენტრის ინფორმაციით, პანკისში დროშების გადახატვაზე რუსთავი 2-ის მანიპულაციური სიუჟეტი გასაჩივრდა. ორგანიზაციამ 17 მაისს პანკისის ხეობის ადგილობრივი აქტივისტისა და ჟურნალისტის სულხან ბორძიკაშვილის სახელით, ჟურნალისტური ეთიკის ქარტიასა და „რუსთავი 2“-ის თვითრეგულირების ორგანოს საჩივრით მიმართა და არაზუსტი, მანიპულაციური და ეთნიკური/რელიგიური უმცირესობების მიმართ სტერეოტიპული შინაარსის მასალის შესწორებას ითხოვს. სრულად... წყარო: socialjustice.org.ge

თბილისი. მედიის ადვოკატირების კოალიცია ეხმაურება 2021 წელს არასამთავრობო ორგანიზაციების წარმომადგენლების, ჟურნალისტების, სამოქალაქო აქტივისტების, რელიგიური ორგანიზაციების, პოლიტიკოსების და სხვა პირთა შესაძლო უკანონო ფარული მოსმენა-მიყურადების შესახებ გავრცელებულ ინფორმაციაზე მიმდინარე გამოძიების პროცესს.  „მიგვაჩნია, რომ თბილისის პროკურატურის რეაგირება არსებითად არაეფექტიანია და სამართლებრივი შედეგის დადგომას მიზნად არ ისახავს. გამოძიების მიმდინარეობის მიუხედავად, ამ დრომდე არ არის გამოკითხული შესაძლო უკანონო ფარული მოსმენა-მიყურადების მსხვერპლთა ნაწილი, ხოლო უკვე გამოკითხული პირებიდან დაზარალებულის სტატუსის მინიჭებაზე პროკურატურამ და სასამართლომ ყველას დაუსაბუთებელი უარი განუცხადა. დანაშაულის მსხვერპლებისთვის, დაზარალებულის სტატუსის არარსებობის პირობებში, გამოძიების მიმდინარეობის, ჩატარებული საგამოძიებო მოქმედებების და მათი შედეგების თაობაზე ინფორმაცია ხელმიუწვდომელი რჩება“, ნათქვამია განცხადებაში. სრულად... წყარო: mediacoalition.ge

თბილისი. საზოგადოებრივი ორგანიზაციები მხარდაჭერას უცხადებენ ნიკა გვარამიას და „მთავარი არხის” გუნდს. „თბილისის საქალაქო სასამართლოს მიერ 2022 წლის 16 მაისს მიღებული გადაწყვეტილება და ნიკა გვარამიასთვის თავისუფლების აღკვეთის მისჯა აღიქმება როგორც გაფრთხილება და მუქარა სხვა დამოუკიდებელი მედიასაშუალებების მიმართ, რათა შეწყვიტონ ხელისუფლების საქმიანობის კრიტიკულად გაშუქება, არ შეასრულონ ხელისუფლების მაკონტროლებელი ფუნქცია და უარი თქვან ხელისუფლებისთვის არასასურველი ფაქტების საზოგადოებამდე მიტანაზე. ვფიქრობთ, მსგავსმა პროცესებმა შესაძლოა უარყოფითი გავლენა მოახდინოს  საქართველოს ევროპული ინტეგრაციის პროცესზე“, ნათქვამია განცხადებაში. სრულად... წყარო: transparency.ge

თბილისი. ღია საზოგადოების ფონდის აღამსრულებელი დირექტორის ქეთი ხუციშვილის შეფასებით, „დღეს ჩვენ გავხდით მომსწრე, კიდევ ერთი პოლიტიკურად მოტივირებული პროცესისა და გადაწყვეტილებისა. ის საქმე, რომელიც ნიკა გვარამიას წინააღმდეგ არის აღძრული, იურისტების შეფასებით, საერთოდ არ შეიცავს სისხლის სამართლის დანაშაულის ნიშნებს. შესაბამისად, უნდა განხილულიყო როგორც სამეწარმეო საქმე. ჩვენ ვნახეთ, რომ მთელი ამ წლების მანძილზე, ხელისუფლება ვერ ფარავდა სურვილს, რომ დაეპატიმრებინა ნიკა გვარამია, რაც შეიძლება მეტად შეეზღუდა საქართველოში დამოუკიდებელი და კრიტიკული მედია. დღეს კიდევ ერთი, აშკარად რეპრესიული ნაბიჯი გადადგა არა მხოლოდ სასამართლომ, არამედ ხელისუფლებამ, რომლის დავალებითაც მოქმედებს სასამართლო“, ამბობს ქეთი ხუციშვილი. სრულად...  წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის განცხადებით, სასამართლო სისტემის დამოუკიდებლობასთან დაკავშირებული სისტემური გამოწვევებისა და მართლმსაჯულების პოლიტიკური ინსტრუმენტალიზების ტენდენციის ფონზე, ნიკა გვარამიას დაპატიმრება ხელისუფლების მიმართ კრიტიკულად განწყობილ მედიაზე ზეწოლის, პოლიტიკური პოლარიზებისა და კრიზისის გაღრმავებისკენ მიმართული კიდევ ერთი სახიფათო პრეცედენტია. მით უფრო მაშინ, როდესაც მოსამართლის მიერ სასჯელის ყველაზე მკაცრი ფორმის გამოყენება, განსახილველი დანაშაულის შინაარსის და ბუნების გათვალისწინებით, აშკარად არაპროპორციული ჩანს სადავო ქმედებით დამდგარ ზიანთან. სრულად... წყარო: socialjustice.org.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს მედია გარემოს შეფასების ანგარიშს. „ბოლო რამდენიმე წლის განმავლობაში მედიის თავისუფლების გამოწვევებს შორის არის ისეთი საკითხები, როგორებიცაა მედიაპოლარიზაცია, ჟურნალისტების მიმართ ძალადობა, დამოუკიდებელ და კრიტიკულ მედიაზე ზეწოლა და ინფორმაციის ხელმისაწვდომობის ხარვეზები. ცალკე აღნიშვნას იმსახურებს გამოხატვის თავისუფლების შეზღუდვის მცდელობა. მმართველი პარტიისა და საქართველოს კომუნიკაციების ეროვნული კომისიის წარმომადგენლები ხშირად საუბრობენ ქვეყანაში ლიბერალური კანონმდებლობის არსებობაზე და სხვადასხვა შეზღუდვის დაწესებაზე მიუთითებენ. ცალსახაა, რომ მედია დღეს მნიშვნელოვანი გამოწვევების წინაშე დგას. წინამდებარე დოკუმენტის მიზანია, აღწეროს და გააანალიზოს მედიაში მიმდინარე მოვლენები“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) საჯარო ინფორმაციაზე ხელმისაწვდომობის გაუმჯობესების მიზნით ახორციელებს პროექტს. რომლის ფარგლებშიც ჟურნალისტებსა და მედიის წარმომადგენლებს სთავაზობს სრულ სამართლებრივ დახმარებას ინფორმაციის თავისუფლებასთან დაკავშირებულ საკითხებზე. დახმარება მოიცავს: განცხადებების, საჩივრების და სარჩელების მომზადებას წარმომადგენლობას ადმინისტრაციულ ორგანოებსა და სასამართლოებში საჭიროების შემთხვევაში ორგანიზაცია დაფარავს სახელმწიფო ბაჟს. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI)  ცნობით, საერთაშორისო ორგანიზაცია Reporters Without Borders (შემდგომ “RSF”) ყოველწლიურად აქვეყნებს პრესის თავისუფლების გლობალური ინდექსის მაჩვენებელს 180 ქვეყნის მიხედვით. „საზოგადოებისთვის დღეს გახდა ხელმისაწვდომი გლობალური ინდექსის 2022 წლის შეფასებები, რომლის მიხედვითაც, საქართველოში მედიის თავისუფლების მაჩვენებელი წინა წელთან შედარებით საგრძნობლად გაუარესდა“, ნათქვამია ორგანიზაციის ვებგვერდზე. სრულად... წყარო: idfi.ge