თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს - „12 წელი 2008 წლის აგვისტოს ომიდან: რუსული დეზინფორმაცია და რეალური ფაქტები“. „2020 წელს, 2008 წლის აგვისტოს რუსეთ-საქართველოს ომის დაწყებიდან 12 წელი გავიდა. ისევე როგორც 2008 წელს, დღესაც რუსეთ-საქართველოს ომთან დაკავშირებით აქტიურია რუსული პროპაგანდა, რომელიც დეზინფორმაციის გავრცელების გზით ცდილობს დაარწმუნოს როგორც რუსეთისა და საქართველოს მოსახლეობა, ასევე საერთაშორისო საზოგადოება, რომ ომი 2008 წლის 8 აგვისტოს საქართველომ დაიწყო ეთნიკური ოსების წინააღმდეგ, რომელთა „დასაცავადაც“ რუსეთი „იძულებული გახდა“ საქართველოში სამხედრო ინტერვენციის გზით შემოსულიყო. რეალურად კი აღნიშნულ კონფლიქტს გაცილებით ვრცელი ისტორია აქვს, რომელიც ადასტურებს, რომ ომის ინიციატორი საქართველო არ ყოფილა“, - ნათქვამია ბლოგპოსტში. სრულად...  წყარო: ორგანიზაციის ვებგვერდი

თბილისი. „საგამოძიებო ჟურნალისტიკის ხელშეწყობა ცვლილებებისათვის“ პროგრამის ფარგლებში ევროპის ფონდი აცხადებს საგრანტო კონკურსს ჟურნალისტებისა და მედია საშუალებებისთვის სამართლებრივი დახმარების გასაწევად.  საგრანტო კონკურსის მიზანია, ორგანიზაციებმა, რომლებსაც აქვთ მედია სამართლის ექსპერტიზა და ჟურნალისტებისა თუ მედიასაშუალებებისათვის სამართლებრივი დახმარების გაწევის გამოცდილება, მიიღონ შესაბამისი მხარდაჭერა ევროპის ფონდისგან, რათა მათ შეძლონ, ჟურნალისტურ გამოძიებასთან დაკავშირებულ საქმეებზე მედიასა და ჟურნალისტებს უფასო იურიდიული მომსახურება გაუწიონ.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი EMC აჭარის საზოგადოებრივი მაუწყებლიდან თანამშრომლების დათხოვნის ფაქტს ეხმიანება და მიიჩნევს, რომ მათი სამსახურიდან გათავისუფლება საზოგადოებრივი მაუწყებლის დირექტორისა და მენეჯმენტის კრიტიკულად განწყობილი თანამშრომლების დევნის კიდევ ერთი თვალსაჩინო მაგალითია. „პირველადი სამართლებრივი შეფასებით, მიგვაჩნია, რომ მაუწყებლის დირექტორის გადაწყვეტილება წარმოადგენს სამართლებრივად დაუსაბუთებელ გადაწყვეტილებას, რომელიც, თავის მხრივ, ნათლად აჩვენებს მაუწყებლის მენეჯმენტის მიდგომას, ყველა შესაძლო საშუალებებით მოახდინოს მაუწყებლის განეიტრალება კრიტიკული აზრის მქონე ჟურნალისტებისგან და სამსახურიდან გათავისუფლებით, როგორც ყველაზე მკაცრი სანქციით, მათი სამაგალითო დასჯა“, - აღნიშნულია EMC-ის მიერ გავრცელებულ განცხადებაში. სრულად...  წყარო: ორგანიზაციის ვებგვერდი

თბილისი. გამოვლინდნენ ფოტო კონკურსის, „პანდემია და ქალები საქართველოში“, გამარჯვებულები. პირველ ადგილზე ნინო ზედგინიძე გავიდა, რომელმაც პრიზის სახით 2 000 ევრო მიიღო, მეორე ადგილი სალომე ბენიძემ დაიკავა, მესამე ადგილი კი გურანდა ბენიძეს ერგო. მათ 1500 და 1000 ევრო გადაეცათ.  ფოტოკონკურსი ევროკავშირის პროექტის "ევროკავშირი გენდერული თანასწორობის უწყებათაშორისი კომისიის მხარდასაჭერად" და “ინდიგოს” ინიციატივითა და ორგანიზებით ჩატარდა. მისი მიზანი იყო გენდერული თანასწორობის მიმართ მხარდაჭერის გაზრდა, ქალთა მიმართ და ოჯახში ძალადობის წინააღმდეგ ბრძოლაში საზოგადოების თანადგომის გაძლიერება.  COVID-19ის პანდემიის გამო, გამარჯვებულთა დაჯილდოება ონლაინ გაიმართა. საპრიზო ადგილზე გასული ნამუშევრები ჟიურის წევრებმა ფოტოგრაფებმა - ლელი ბლაგონრავოვამ, პაბლო ვარელამ და ერიკ გერლანმა.  სრულად   წყარო: გვერდი სოციალურ ქსელში

თბილისი. მედიის განვითარების ფონდმა საზოგადოებას წარუდგინა ანგარიში - „ანტიდასავლური პროპაგანდა - 2019“. „ანტიდასავლური პროპაგანდის რიგით მეხუთე ყოველწლიური ანგარიში 2019 წლის მედია მონიტორინგის და ყალბი ინფორმაციის გადამოწმების შედეგებს ასახავს. ანგარიში, რომელიც ტრადიციულად ანტიდასავლურ გზავნილებს, მათ ფორმირებას და დროთა განმავლობაში ცვალებადობას აკვირდება, ასევე ახდენს ამ გზავნილების წყაროების იდენტიფიცირებას, ყალბი ინფორმაციების გამოვლენას“, - ნათქვამია ანგარიშის შესავალ ნაწილში. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენრი (EMC) დღეს საზოგადოებას წარუდგენს კვლევას - „ეთნიკური უმცირესობების საჭიროებები, საზოგადოებრივი მაუწყებელი და პანდემია“. „2020 წლის 23 მარტს, ეთნიკური უმცირესობებით კომპაქტურად დასახლებული ორი რაიონი, მარნეული და ბოლნისი, ახალი კორონავირუსის შიდა გავრცელების შემთხვევის გამო ჩაიკეტა (რადიო თავისუფლება, 2020). მსუბუქი პანიკა, რომელიც ქვეყანაში ვირუსის უკონტროლო გავრცელების საფრთხეს მოჰყვა, მალევე ქსენოფობიისა და ნაციონალიზმის მორიგ ტალღაში გადაიზარდა, რაც ყველაზე ნათლად სოციალურ ქსელ Facebook-ზე მომხმარებლების კომენტარებში გამოვლინდა (ქევანიშვილი, 2020). „წითელ ზონებად“ გამოცხადებულ რაიონებში ჩაკეტილ მოსახლეობას მომდევნო დღეების განმავლობაში ერთდროულად უწევდა კორონავირუსთან, ეკონომიკური სიდუხჭირის შიშსა და ეთნო-ნაციონალიზმთან ბრძოლა. იმის მაგივრად, რომ ადგილობრივი აქტივისტების ენერგია კორონავირუსის შესახებ ინფორმაციის გავრცელებაზე, ვირუსის პრევენციასა და ეკონომიკური სირთულეების თავიდან არიდებაზე დახარჯულიყო, მათ მოუხდათ ინტერნეტ კამპანიის წამოწყება, რომლის მთავარი მესიჯიც იყო - „მე ვარ საქართველოს მოქალაქე“, - ვკითხულობთ კვლევის შესავალში. სრულად  წყარო: ორგანიზაციის ვებგვერდი

თბილისი. პროექტის - „კარგი მმართველობის გაძლიერება საქართველოში“ - ფარგლებში, ინფორმაციის თავისუფლების განვითარების ინსტიტუტმა (IDFI), ხელისუფლების საქმიანობის მონიტორინგის მექანიზმები და მეთოდების შესახებ, ორდღიანი ტრენინგი გამართა.  ტრენინგში, რომელიც გლობალური საქველმოქმედო ორგანიზაცია Luminate-ის მხარდაჭერით ჩატარდა, მონაწილეობა მიიღეს ღია კონკურსის შედეგად შერჩეულმა რეგიონში მცხოვრებმა სტუდენტებმა, სამოქალაქო აქტივისტებმა და ჟურნალისტებმა.  სრულად   წყარო: ორგანიზაციის ვებგვერდი

თბილისი. „საერთაშორისო გამჭვირვალობა-საქართველომ“ 2019 წლის სატელევიზიო და რადიო სარეკლამო ბაზრის მდგომარეობა შეისწავლა. „კვლევაში, ასევე, მიმოხილულია კორონავირუსის პირობებში 2020 წლის სარეკლამო ბაზრის პირველი კვარტლის მდგომარეობა, გამოწვევები და მოლოდინები“. ერთ-ერთი მიგნების თანახმად, სატელევიზიო სარეკოლამო ბაზარი ყოველწლიურად მცირდება. სრულად... წყარო: transparency.ge

თბილისი. კოალიცია „მედიის ადვოკატირებისათვის“ წევრი ორგანიზაციები ეხმიანებიან საქართველოს პარლამენტში წარმოდგენილ კანონპროექტს „მაუწყებლობის შესახებ“ და „ელექტრონული კომუნიკაციების შესახებ“ საქართველოს კანონებში ცვლილებების შეტანის თაობაზე. „მიგვაჩნია, რომ შემოთავაზებული ცვლილებები გამოხატვის თავისუფლების გაუმართლებლად შეზღუდვის რისკებს მოიცავს და მისი მიღება უდიდეს ზიანს მიაყენებს მედიაგარემოს. მოვუწოდებთ, საქართველოს პარლამენტს, არ დაუშვას ამ კანონპროექტის დამტკიცება წინასაარჩევნო და საარჩევნო პროცესების გათვალისწინებით. მოვითხოვთ კომუნიკაციების კომისიის მიერ შემოთავაზებული წინადადებები საქართველოს პარლამენტმა განიხილოს მაუწყებლების, ავტორიზებული პირების, შიდა და საერთაშორისო ექსპერტების მონაწილეობით“. სრულად... წყარო: gyla.ge

თბილისი. საქართველოს დემოკრატიული ინიციატივა (GDI), სამართლიანი არჩევნებისა და დემოკრატიის საერთაშორისო საზოგადოება (ISFED) და ადამიანის უფლებების ცენტრი (HRC) მიიჩნევენ, რომ საბოტაჟის მუხლით სახელმწიფო უსაფრთხოების სამსახურში მიმდინარე გამოძიება კრიტიკული მედიის თვისუფლებაში უხეში ჩარევისა და აზრის შინაარსის კონტროლის ნიშნებს შეიცავს. „სუს-ის გამოძიების შინაარსს განსაკუთრებულ პრობლემურობას, საარჩევნო წელი და 2020 წლის მოახლოებული საპარლამენტო არჩევნები ანიჭებს, რა დროსაც კრიტიკული მედიის შეუფერხებელ ფუნქციონირებას სასიცოცხლო როლი ენიჭება არჩევნების თავისუფლად და სამართლიანად შეფასებისთვის. მოვუწოდებთ ხელისუფლებას, თავი შეიკავოს კრიტიკული მედიის დამოუკიდებლობაში ნებისმიერი სახის ჩარევისგან და უარი თქვას მედიისა და გამოხატვის თავისუფლების წინააღმდეგ სისხლისსამართლებრივი რეპრესიის გამოყენებაზე“, ნათქვამია ერთობლივ განცხადებაში. სრულად... წყარო: isfed.ge

თბილისი. საერთაშორისო გამჭვირვალობა - საქართველოს მოსაზრებით, სახელმწიფო უსაფრთხოების სამსახურის მიერ ტელეკომპანია „მთავარის“ სიუჟეტზე საბოტაჟის საფუძვლით მიმდინარე გამოძიების პროცესი კითხვებს აჩენს. „მედიის მხრიდან პროფესიული სტანდარტების შესაძლო დარღვევისას, საკითხის სისხლის სამართლის ჭრილში გადატანა ეწინააღმდეგება საერთაშორისოდ აღიარებულ სტანდარტებს, უხეში ჩარევაა მედიის სარედაქციო დამოუკიდებლობაში და ქმნის თვითცენზურის საფრთხეს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „დემოკრატიული ჩართულობის ცენტრების ქსელის“ ახალციხის ოფისის ორგანიზებით მედიაწიგნიერებაზე ონლაინ-სემინარი გაიმართა. „სპიკერმა პრეზენტაციაში აღნიშნა, რომ ახალი კორონავირუსის პანდემიის ფონზე კიდევ უფრო თვალშისაცემი გახდა ის საფრთხეები, რისი გამოწვევაც შეუძლია მედიას დაუდასტურებელი, ყალბი ამბების, მითებისა თუ კონსპირაციული თეორების ტირაჟირებით. საქართველოში აქტიურად დაიწყეს მოქალაქეთა ჯგუფებმა მსოფლიოში გავრცელებული კონსპირაციული თეორიის პოპულარიზაცია, რომ ახალი კორონავირუსის გავრცელება 5G ინტერნეტის დანერგვამ გამოიწვია. ამ თეორიას არც ერთი დადასტურებული მეცნიერული არგუმენტი არ ამყარებს. შესაბამისად, უსაფუძვლოა. დეზინფორმაციისგან თავის არიდების ყველაზე ეფექტური ხერხია ინფორმაციის წყაროს, სათაურის და ფოტო მასალის შემოწმება სპეციალური ვებ-გვერდების მეშვეობით, ამ მიზნით სპიკერმა მონაწილეებთან ერთად პრაქტიკული დავალებები შეასრულეს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით ტელეკომპანია „იმედის“ წამყვანებმა რუსა შელიამ და ვაკა გორგილაძემ ინფორმაციის სიზუსტის პრინციპი დაარღვიეს. „მის წინააღმდეგ ქარტიას ლევან ქათამაძემ მომართა. მხარე დავობდა ტელეკომპანია “იმედის” ეთერში, გადაცემა “არენაში” 2020 წლის 11 თებერვალს გასულ სიუჟეტზე, რომელიც ამერიკელი კონგრესმენების კრიტიკულ წერილებს და Fake news-ებს ეხება. მხარის განმარტებით, fake news-ებთან დაკავშირებით ინტერვიუსთვის დაუკავშირდა ჟურნალისტი, მას, როგორც საიას საზოგადოებასთან ურთიერთობის მენეჯერს და მისი კომენტარი ჩაწერა შეთანხმების გარეშე. განმცხადებელს მიაჩნდა, რომ ტელევიზიით გავრცელდა მცდარი ინფორმაცია ლევან ქათამაძესთან დაკავშირებით, კერძოდ, მის პასუხს მიეცა არასწორი ინტერპრეტაცია“, ნათქვამია ქარტიის ვებგვერდზე. სრულად... წყარო: www.qartia.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, კომუნიკაციების ეროვნული კომისია მცდარ ინფორმაციას მიზანმიმართულად ავრცელებს.  „კომისიის მიერ საიას შესახებ გაკეთებული განცხადება, რომ ვეწინააღმდეგებით მაუწყებლების ფინანსური გამჭვირვალობის შესახებ კანონის აღსრულებას, სიმართლეს არ შეესაბამება და შეცდომაში შეჰყავს საზოგადოება. საზოგადოებას შევახსენებთ, რომ სწორედ საია იყო ერთ-ერთი ინიციატორი 2013 წლის 12 ივლისს მიღებული კანონისა, რომელიც რამდენიმე არასამთავრობო ორგანიზაციის ავტორობით მომზადდა (იხ. კანონის პროექტის განმარტებით ბარათი). კანონის მიღებაც არასამთავრობო სექტორის, მათ შორის, საიას აქტიური მონაწილეობით მოხდა და კომისიის მხრიდან იმის მტკიცება, რომ ვეწინააღმდეგებით ჩვენი თანაავტორობით მომზადებული კანონის აღსრულებას, ლოგიკას მოკლებულია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველოს ინფორმაციით, საზოგადოებრივი მაუწყებლის სამეურვეო საბჭოს წევრების შესარჩევი კონკურსი პროცედურული დარღვევებით მიმდინარეობს. „შესარჩევმა კომისიამ პარლამენტს 3 ვაკანტურ ადგილზე 8 კანდიდატურა წარუდგინა მაშინ, როცა პარლამენტის რეგლამენტის თანახმად, პარლამენტს „ასარჩევზე, სულ ცოტა, სამჯერ მეტი კანდიდატურა“ უნდა წარედგინა, ანუ, ამ შემთხვევაში, არანაკლებ 9“. სრულად... წყარო: transparency.ge

თბილისი. კოალიცია მედიის ადვოკატირებისთვის მიიჩნევს, რომ ტელეკომპანია „მთავარის” მიერ მომზადებული სიუჟეტის გამო სისხლის სამართლის გამოძიების დაწყება, წარმოადგენს უმწვავეს, არათანაზომიერ რეაგირებას და მედიის თავისუფლებაში ჩარევის ძალზედ სახიფათო პრეცედენტს. „იმ პირობებში, როდესაც აშკარაა კონკრეტულად ტელეკომპანია „მთავარის” მიმართ ხელისუფლების უარყოფითი განწყობა (მაგალითად, სახელმწიფო თანამდებობის პირები საჯაროდ უცხადებდნენ ბოიკოტს არხს) და როდესაც საქართველო არაერთხელ მოხვდა მსოფლიოს ყურადღების ცენტრში დეზინფორმაციისა და ყალბი ანგარიშებით ანტიდასავლური პროპაგანდის ფაქტების სიმრავლის გამო, განსაკუთრებით შემაშფოთებელია, სუს-ის მიერ „მთავარ” არხზე გასული სიუჟეტის „საბოტაჟად” შეფასება. აღნიშნული ქმედება, რეპრესიული მექანიზმის შერჩევითად გამოყენების შთაბეჭდილებას ქმნის. ვფიქრობთ, რომ სატელევიზიო სიუჟეტის გამო საბოტაჟის მუხლით სისხლისსამართლებრივი დევნის დაწყებას, შეიძლება ჰქონდეს შეუქცევადი მსუსხავი ეფექტი ხელისუფლების მიმართ კრიტიკულად განწყობილი ყველა მედიასაშუალებებისთვის და დააზარალოს მოქალაქეთა მიერ ხელისუფლების კონტროლის იდეა“, ნათქვამია განცხადებაში. სრულად... წყარო: gyla.ge

თბილისი. კოალიცია თანასწორობისთვის ეხმიანება აჭარის საზოგადოებრივ მაუწყებელში მიმდინარე მოვლენებს და სრულ მხარდაჭერას უცხადებს მაუწყებლის თანამშრომლების ბრძოლას საზოგადოებრივი მაუწყებლისთვის. „ყოვლად დაუშვებელია ის ფაქტი რომ, აჭარის მაუწყებელში თანამშრომლების დევნა გრძელდება მათი კრიტიკული პოზიციების გამო. მენეჯმენტის პოლიტიკასთან შეუგუებლობა ხშირ შემთხვევაში აჭარის მაუწყებლის თანამშრომლებს სამსახურის დაკარგვის, სხვა პოზიციებზე გადაყვანისა და მტრულ და სტრესულ გარემოში მუშაობის ფასად უჯდებათ. თვალშისაცემია, მაუწყებლის თანამშრომლების მიერ დაფუძნებული ალტერნატიული პროფესიული კავშირის საქმინობისთვის ხელშეშლის ნიშნებიც“, ნათქვამია განცხადებაში. სრულად... წყარო: phrgeorgia.wordpress.com

თბილისი. მითების დეტექტორის ინფორმაციის თანახმად, საზოგადოებრივი მაუწყებლის სამეურვეო საბჭოს წევრის კანდიდატურაზე 14-მა დეპუტატმა ტელეკომპანია „ობიექტივის” მთავარ რედაქტორსა და წამყვანს, ბონდო მძინარაშვილს დაუჭირა მხარი. „როგორც არხი, ასევე თავად ბონდო მძინარაშვილი წლებია ანტიდასავლური, პრორუსული, თურქოფობიური და სიძულვილის ენის შემცველი განცხადებებით გამოირჩევა“.  მედიის განვითარების ფონდის მოკვლევის თანახმად, მძინარაშვილის გამოთქმებს შორისაა: ამერიკაც ოკუპანტია, აშშ საქართველოს პოლიგონად იყენებს, ამერიკა ვერ დაგვიცავს, ანაკლიის პორტი ეკონომიკური პროექტი არ არის, დასავლეთი გვმართავს, NATO/აშშ = ტერიტორიების დაკარგვას/ომს, თუ რუსეთია ოკუპანტი, თურქეთიც ოკუპანტია/თურქეთი საქართველოში ექსპანსიას ახორციელებს, სკრიპალები რუსეთს არ მოუწამლავს და ეს დადგმული იყო... სრულად... წყარო: www.mythdetector.ge

თბილისი. კოალიცია „მედიის ადოკატირებისათვის“ წევრი ორგანიზაციები თბილისის მერის და „ქართული ოცნების“ გენერალური მდივნის კახა კალაძის ინიციატივას ეხმიანებიან მედიაკრიტიკისათვის ახალი პლატფორმის შექმნასთან დაკავშირებით. „მიგვაჩნია, რომ მაღალი პოლიტიკური თანამდებობის პირის მხრიდან კრიტიკული მედიასაშუალების მისამართით მსგავსი კამპანიის წარმოება არ შეესაბამება დემოკრატიული საზოგადოების მოლოდინებს. უხეშად ეწინააღმდეგება მაღალი თანამდებობის პირთა ეთიკურ ღირებულებებს და პრინციპებს. მით უფრო, როცა არსებობს რისკი წახალისდეს ჟურნალისტების მიმართ აგრესია, სიტყვიერი და ფიზიკური თავდასხმა“, ნათქვამია განცხადებაში. სრულად... წყარო: კოალიციის გვერდი სოციალურ ქსელში

აჭარა. 26 ივნისს, 18:00 საათზე აჭარის საზოგადოებრივი მაუწყებლის შენობასთან საზოგადოებრივი ორგანიზაციები აჭარის საზოგადოებრივი მაუწყებლის დასაცავად მართავენ საპროტესტო აქციას (მისამართი: ბათუმი, მემედ აბაშიძის 41).  საზოგადოებრივი ორგანიზაციები საზოგადოების მიმართ მიმართვას ავრცელებენ, სადაც ნათქვამია, რომ „აჭარის ტელევიზიისა და რადიოს დაბალანსებული, მიუკერძოებელი და ობიექტური სარედაქციო პოლიტიკის შენარჩუნება არის სასიცოცხლოდ მნიშვნელოვანი სიტყვის თავისუფლების, ჩვენი ქვეყნის დემოკრატიისა და დამოუკიდებლობისათვის“. სრულად... 

თბილისი. მედიაჩექერი აქვეყნებს ნინო ნარიმანიშვილის ინტერვიუს ჯანდაცვის თემებზე მომუშავე, „კაქტუს-მედიის“ დამფუძნებელთან ცირა გვასალიასთან. „როდესაც ვწერთ სტატიას ჯანდაცვის საკითხებზე, სულ წარმოვიდგინოთ, რომ ჩვენმა მკითხველმა არაფერი იცის: არა იმიტომ, რომ მათ პატივს არ ვცემთ. მაგალითად, როდესაც ვამბობთ, რომ საქართველოში ამდენი და ამდენია თანმხლები დაავადებების სტატისტიკა, მაგალითად, გულის დაავადებები, იქვე განვმარტოთ რა არის გულის დაავადება, 1-2 წინადადებით, ძალიან მარტივი ენით. სტატია, რომელშიც ეს ახსნილია მოვლენები და ტერმინები, არის მაღალი ხარისხის და ადვილად გასაგები. ეს ნიშნავს, რომ შენ პატივს სცემ შენს მკითხველს. ალბათ, ძალიან სასარგებლოა ვიკითხოთ სანდო საერთაშორისო გამოცემები, განსაკუთრებით იმ სფეროში, რომელშიც ვმუშაობთ. ასევე ძალიან კარგი იქნება, რომ ჟურნალისტები კონკრეტულ მიმართულებებზე მუშაობდნენ. ეს იმიტომ, რომ ხანდახან ინფორმაცია იმდენად სწრაფად იცვლება, ვერ ეწევი“, ამბობს რესპონდენტი. სრულად... წყარო: www.mediachecker.ge

თბილისი. მედიაჩექერი აქვეყნებს ნატალია ვახტანგიშვილის და ნინო ნარიმანიშვილის სტატიას, რომელიც „მთავარი არხი“-ს მიერ ბავშვთა პორნოგრაფიის საქმეზე მომზადებულ სიუჟეტს შეეხება. სადავო სიუჟეტზე მასალის ავტორებს ფსიქოლოგი მაია ცირამუა ესაუბრა. მისი შეფასებით, მსხვერპლებისთვის ე.წ. სახის „გაბლარვა“ საკმარისი არ არის და არსებობს ბავშვების ამოცნობის საფრთხე, ასევე ტრავმის ხელახალი განცდის საშიშროება. პორნოგრაფიის საქმეში მონაწილე მოზარდები კი ჟურნალისტური მასალის გავრცელების შემდეგ სექსტინგისა და ბულინგის მსხვერპლებიც გახდნენ. საზოგადოების ნაწილმა ისინი დამნაშავეებად გამოიყვანა - „ამ ბავშვებს წავართვით შანსი, რომ ნდობა გაუჩნდეთ ადამიანების მიმართ. იმიტომ რომ ეს ტალღა, რისხვა, ისევ წავიდა ამ ბავშვების მისამართით და არა იქით, საითაც უნდა წასულიყო“, ამბობს მაია ცირამუა. სპეციალისტის განმარტებით, კიდევ ერთი პრობლემა, რომელიც ამ სიუჟეტს უკავშირდება არის ის, რომ ბავშვთა პორნოგრაფიის ამსახველი კადრები ხელახლა იწყებს ცირკულირებას, რაც პირველ რიგში, მზა მასალაა პედოფილებისთვის. სრულად... წყარო: www.mediachecker.ge