თბილისი. მითების დეტექტორის ბლოგპოსტის თანახმად, 21 ოქტომბერს ფეისბუქ გვერდზე, „ქოცების დასაცინი ოფიციალური სააგენტო“ გავრცელდა ვიდეო, რომელშიც ბიძინა ივანიშვილი აცხადებს „აჭარლები ჩემს თვალში რაღაც გამოთაყვანებული ან რაღაც”. ვიდეო 3 წამიანია და მასში დამატებით კონტექსტი არ ჩანს, შესაბამისად იქმნება შთაბეჭდილება, რომ ბიძინა ივანიშვილი აჭარელ ხალხს გამოთაყვანებულებს უწოდებს. ვიდეოს 23 ოქტომბრის 14:00 საათის მდგომარეობით 12 400-ზე მეტი ნახვა და 149 გაზიარება აქვს. „გვერდ „ქოცების დასაცინი ოფიციალური სააგენტოს“ მიერ გამოქვეყნებული პოსტი წარმოადგენს ვიდეო მონტაჟს. რეალურად ბიძინა ივანიშვილმა სიტყვა „გამოთაყვანებული“ არა აჭარლების, არამედ სერიალების მიმართ გამოიყენა“, ნათქვამია ბლოგპოსტში. სრულად... წყარო: www.mythdetector.ge

თბილისი. „საერთაშორისო გამჭვირვალობა - საქართველო” არჩევნების წინ, როგორც წესი, აფასებს მედიის მდგომარეობას საქართველოში. „ამ შემთხვევაში შეფასებულია 2016 წლის პარლამენტის არჩევნებიდან დღემდე (პარლამენტის 2020 წლის არჩევნებამდე) პერიოდი, საიდანაც კარგად ჩანს, რომ „ქართული ოცნების” მიდგომები, წინა საანგარიშო პერიოდთან შედარებით, კრიტიკულად განწყობილი მედიის მიმართ უფრო ხისტი გახდა“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ჟურნალისტური ეთიკის ქარტია აქვეყნებს რეკომენდაციებს კენჭისყრის დღეს საარჩევნო უბანზე ფოტოვიდეოგადაღებასა და უსაფრთხოების წესების დაცვაზე. „წინასარჩევნო პერიოდში, განსაკუთრებით კი კენჭისყრის დღეს, მედიის პასუხისმგებლობა, მიაწოდოს აუდიტორიას ინფორმაცია, კრიტიკულად მნიშვნელოვანია. თუმცა, იმ პირობებში, როდესაც ქვეყანაში კორონავირუსით დაავადებულთა რიცხვი დღითიდღე იზრდება, აუცილებელია, რომ პროფესიული მოვალეობის შესრულებისას დაცული იყოს მედიაორგანიზაციებში დასაქმებული პირების უსაფრთხოება“... სრულად... წყარო: www.qartia.ge

თბილისი. საერთაშორისო გამჭვირვალობა - საქართველო ეხმაურება 21 ოქტომბერს, TV Pirveli • ტელეკომპანია პირველის დამფუძნებლის მამის, ავთანდილ წერეთლის მიმართ ფიზიკური ანგარიშსწორების მუქარის ფაქტს, რომელიც, წერეთელის განცხადებით, სწორედ ტვ პირველის კრიტიკული სარედაქციო პოლიტიკით იყო განპირობებული. „სოციალურ მედიაში და საინფორმაციო საშუალებებში გავრცელებული ინფორმაციის მიხედვით და თავად ავთანდილ წერეთლის განცხადებით, მას სპორტული აღნაგობის ორი პირი დახვდა ღია საჯარო სივრცეში და სიცოცხლის მოსპობით დაემუქრა, თუ მისი შვილის კუთვნილი ტელეარხი სარედაქციო პოლიტიკას არ შეცვლდა. მოვუწოდებთ სამართალდამცავ ორგანოებს სასწრაფოდ მოახდინონ რეაგირება ამ ფაქტზე, უზრუნველყონ საქმის დროული და ეფექტური გამოძიება და საზოგადოებისათვის შედეგების გაცნობა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორი აქვეყნებს ბლოგპოსტს: ტვ „ობიექტივი” კონსპირაციულ ფილმს ავრცელებს, რომელიც მაიდნის მოვლენებზე კრემლის ნარატივს იმეორებს. „„ობიექტივის“ ეთერში გასული ფილმი მანიპულაციურია და ფაქტობრივ უზუსტობებს შეიცავს: 1. ფილმში გამოყენებულია “ქართველი სნაიპერების” ყალბი ჩვენებები; 2. ფილმში გვხვდება ანტიამერიკული გზავნილები და განხილულია მაიდნის მოვლენებში აშშ-სა და ჯორჯ სოროსის მონაწილეობა, რაც მტკიცებულებების გარეშეა. ამასთანავე ამერიკული ტელეკომპანია OAN, სადაც ფილმი გავიდა, ყალბი ამბების გავრცელებაშია მხილებული, მისი ავტორი კი მიულერის კომისიის მიერ დაიკითხა“. სრულად... წყარო: www.mythdetector.ge

თბილისი. მედიის განვითარების ფონდი (MDF) აქვეყნებს კვლევას მედიის ფინანსური გამჭვირვალობის შესახებ, რომელიც 2019 წლის მონაცემებს ასახავს. „ანგარიში, რომელსაც მედიის განვითარების ფონდი ყოველწლიურად გამოსცემს, ერთი მხრივ, სამაუწყებლო მედიის მიერ კანონმდებლობის საფუძველზე დეკლარირებულ შემოსავლებს შეეხება, მეორე მხრივ, ინფორმაციისა და რეკლამის გავრცელების მიზნით მედიაში საბიუჯეტო სახსრების განაწილების პრაქტიკას“, ნათქვამია ორგანიზაციის ვებგვერდზე. სრულად... წყარო: mdfgeorgia.ge

თბილისი. საქართველოს ჟურნალისტური ეთიკის ქარტია შეშფოთებას გამოთქვამს ხელვაჩაურის მერის ჯუმბერ ვარდმანიძის მხრიდან ონლაინგამოცემა „ბათუმელების” ჟურნალისტის სიტყვიერი შეურაცხყოფის გამო. „გავრცელებული ინფორმაციით, მერის გაღიზიანება მოჰყვა ჟურნალისტის კითხვას წინასაარჩევნო შეხვედრებზე მერის სამსახურებრივი ავტომობილით გადაადგილებასთან დაკავშირებით. კითხვის მოსმენის შემდეგ მან ჟურნალისტს შეურაცხმყოფელი სიტყვებით მიმართა და უშვერად აგინა. ქარტია მნიშვნელოვანად მიიჩნევს დაუყოვნებლივ რეაგირებას მსგავს შემთხვევებზე, იმისათვის, რომ დაუსჯელობის სინდრომი არ გახდეს გადამდები სხვა საჯარო პირებისათვის“. სრულად... წყარო: www.qartia.ge

თბილისი. 7 ოქტომბერს, დეზინფორმაციის გლობალური ინდექსის (GDI) და მედიის განვითარების ფონდის (MDF) ახალი კვლევის პრეზენტაცია გაიმართა. კვლევა საქართველოში მედია ბაზრის რისკის რეიტინგებს აფასებს და 24 ქართულენოვანი მედია საიტის ანალიზს ეყრდნობა. „კვლევა, რომელიც 2020 წლის აპრილ-ივლისში ჩატარდა, GDI-ის მიერ შემუშავებულ დეზინფორმაციის რისკების შეფასების მეთოდოლოგიას ეფუძნება. საქართველო იმ 10 ქვეყანას შორისაა, რომელიც 2020 წელს ამ მეთოდოლოგიის გამოყენებით შეფასდა“. სრულად... წყარო: www.mdfgeorgia.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, სახელმწიფო ინსპექტორის სამსახურმა „საზოგადოებრივი მაუწყებლის აჭარის ტელევიზიისა და რადიოს“ მხრიდან ადმინისტრაციული სამართალდარღვევის ფაქტი დაადგინა და მაუწყებელი 500 ლარით დააჯარიმა. „საქმე ეხება მაუწყებლის მხრიდან თანამშრომლების პერსონალური მონაცემების გასაჯაროების ფაქტს. ხაზგასასმელია, რომ საზოგადოებრივი მაუწყებლის აჭარის ტელევიზია დაჯარიმდა არა როგორც მაუწყებელი, არამედ როგორც დამსაქმებელი. დასაქმებულების ინტერესებს EMC იცავდა“. სრულად... წყარო: emc.org.ge

თბილისი. კოალიცია „მედიის ადვოკატირებისთვის“ მიიჩნევს, რომ „პანკისის სათემო რადიოს“ წინააღმდეგ წარმოებული კამპანია არ შეიძლება დარჩეს სათანადო რეაგირების გარეშე და ხელისუფლება ვალდებულია დაუყოვნებლივ მიიღოს ზომები როგორც მომხდარი ფაქტის გამოძიების, ისე რადიოს 2020 წლის 06 ოქტომბრის განცხადების თაობაზე, რომლითაც კიდევ უფრო ნათლად ჩანს ჟურნალისტურ საქმიანობაში უკანონოდ ხელის შეუშლის მიზნით დაგეგმილი ნაბიჯები. სრულად... წყარო: კოალიციის გვერდი სოციალურ ქსელში

თბილისი. „სამართლიანი არჩევნებისა და დემოკრატიის საერთაშორისო საზოგადოება“ აქვეყნებს ბლოგპოსტს: დასპონსორებული დისკრედიტაციული Facebook კამპანიის უკან ორგანიზაცია „დავასრულოთ“ დგას. „ოპოზიციის წინააღმდეგ მართული ორგანიზებული დისკრედიტაციული კამპანიის სამი „ფეისბუქ“ გვერდის: „არქივი • Archive“, „პოლიტიკური მოთვალთვალე“ და „დავასრულოთ“ უკან ია მეტრეველის მიერ დაარსებული ორგანიზაცია „დავასრულოთ“ დგას. 7 აგვისტოს, იმავე დღეს, როდესაც საქართველოში „ფეისბუქის“ რეკლამების ბიბლიოთეკა სრული სახით ამოქმედდა, საჯარო რეესტრის ეროვნულ სააგენტოში არასამეწარმეო (არაკომერციული) იურიდიული პირი „დავასრულოთ“ დარეგისტრირდა. 12 აგვისტოს გამართულ პრეზენტაციაზე ორგანიზაციის დამფუძნებლებმა განაცხადეს, რომ მათი მიზანი „ერთიანი ნაციონალური მოძრაობის“„დასრულებაა“. ორგანიზაცია „დავასრულოთ“ საქმიანობა და ფინანსების ხარჯვა პოლიტიკური შინაარსის პოსტების დასპონსორება საქართველოს კანონმდებლობის თანახმად აუდიტის სამსახურში სავალდებულო დეკლარირებას ექვემდებარება, თუმცა ამ დრომდე ორგანიზაციას შემოწირულობის სახით აუდიტის სამსახურისთვის შესაბამისი ინფორმაცია წარდგენილი არ აქვს“. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: დეზინფორმაცია ყარაბაღის კონფლიქტთან დაკავშირებით საქართველოს პოზიციის შესახებ სომხურ და აზერბაიჯანულ მედიაში. მიუხედავად იმისა, რომ საქართველო სომხეთ-აზერბაიჯანს შორის მთიან ყარაბაღში მიმდინარე სამხედრო კონფლიქტთან დაკავშირებით ნეიტრალიტეტს ინარჩუნებს, სომხურ და აზერბაიჯანულ მედიაში აქტიურად ვრცელდება დეზინფორმაციები საქართველოს პოზიციასთან დაკავშირებით. გავრცელებულ დეზინფორმაციებს შორისაა საქართველოს მიერ აზერბაიჯანისთვის თურქეთიდან გამოგზავნილი სამხედრო აღჭურვილობისთვის გზის გახსნა. პერიოდულად ჩნდება ქართული და რუსულენოვანი პოსტები, რომლებიც საქართველოს ზემოთხსენებულ ქმედებაში ადანაშაულებს. მსგავსი დეზინფორმაციების გავრცელების შემდეგ, ჯავახეთში რამდენჯერმე დაიძაბა სიტუაცია. „30 სექტემბერს კი სომეხმა პოლიტიკოსმა, „მთიანი ყარაბაღის რესპუბლიკური პარტიის“ ხელმძღვანელმა, კარენ ოჰანჯანიანმა საკუთარ Facebook გვერდზე გაავრცელა იმავე შინაარსის დეზინფორმაცია, რომ თითქოს საქართველო თურქეთიდან აზერბაიჯანის მიმართულებით სამხედრო ტვირთს ატარებს და განაცხადა, რომ ჯავახეთმა საქართველოსგან დამოუკიდებლობა უნდა გამოაცხადოს. ოჰანჯანიანის განცხადება ნათელი მაგალითია იმის, თუ რა მასშტაბებს აღწევს საქართველოსთან დაკავშირებული დეზინფორმაცია სომხურ საინფორმაციო სივრცეში“. ორგანიზაცია საინფორმაცია ომის პირობებში, ხელისუფლებას მოუწოდებს, გააძლიეროს კომუნიკაცია ადგილობრივ მოსახლეობასთან, საერთაშორისო პარტნიორებთან, უზრუნველჰყოს მათი ინფორმირება რეგიონში მიმდინარე მოვლენებთან დაკავშირებით, გააჟღეროს საქართველოს ოფიციალური პოზიცია ნეიტრალიტეტზე და ქვეყნის მიერ გადადგმულ ნაბიჯებზე. სრულად... წყარო: idfi.ge

თბილისი. მითების დეტექტორის ინფორმაციით, 2020 წლის 3 ოქტომბერს Tvalsazrisi ge-მ გამოაქვეყნა ინტერვიუ თერაპევტ და ასტროფსიქოლოგ ნონა აღდგომელაშვილთან, სათაურით: „უნდა იცოდეთ, პირბადეს გააჩნია კატეგორიული უკუჩვენებები! – ექიმ ნონა აღდგომელაშვილის განგაში“. მასალაში რესპონდენტი საუბრობს პირბადის გამოყენების უარყოფით მხარეებზე და აღნიშნავს, რომ პირბადეს ადამიანის ნახშიროჟანგით ინტოქსიკაცია შეუძლია. მისივე თქმით, ნიღბები ეფექტიანობას მხოლოდ სტერილურ გარემოში ინარჩუნებს და არა მაგალითად, საზოგადოებრივ ტრანსპორტში. „მტკიცება, რომ პირბადეს შეუძლია ადამიანის ნახშიროჟანგით ინტოქსიკაცია ან მისი გამოყენება ეფექტიანი მხოლოდ სტერილურ გარემოშია, არ შეესაბამება სიმართლეს. ჯანდაცვის მსოფლიო ორგანიზაციის თანახმად, რეკომენდაციების სრული დაცვითა და სიზუსტით გამოყენებული პირბადე ვირუსისგან თავდაცვის ერთ-ერთი ეფექტიანი საშუალებაა და მას გავრცელების პრევენციაში მნიშვნელოვანი ადგილი უჭირავს“, ნათქვამია ბლოგპოსტში. სრულად... წყარო: www.mythdetector.ge

თბილისი. ჟურნალისტებმა მაუწყებელთა ქცევის კოდექსის საფუძველზე სარჩელი მოამზადეს, მხარეებმა როლები მოირგეს და პროფესიულ ნორმებზე დისკუსია გამართეს. „იმიტირებული პროცესი MDF-ის ტრენინგის „სიძულვილის ენა, მრავალფეროვნების გაშუქება და ყალბი ინფორმაცია“ ფარგლებში ლოპოტაზე იმართება“. სრულად... წყარო: ორგანიზაციის გვერდი სოციალურ ქსელში

თბილისი. ტოლერანტობის და მრავალფეროვნების ინსტიტუტმა (TDI), მედიის წარმომადგენლებთან სამუშაო შეხვედრა გამართა.  შეხვედრაზე განხილული თემები მოიცავდა საქართველოში რელიგიის თავისუფლების და მიგრანტთა უფლებრივი მდგომარეობის საკითხებს, მათ შორის COVID-19 პანდემიასა და წინასაარჩევნო პერიოდთან მიმართებით. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) 29 სექტემბერს ქალაქ მარნეულში სამოქალაქო აქტივისტებსა და ჟურნალისტებზე, ასევე ოპოზიციური პარტიის მხარდამჭერებზე თავდასხმის ფაქტების პირველად სამართლებრივ შეფასებას აქვეყნებს. ორგანიზაცია სახელმწიფოს მოუწოდებს უზრუნველყოს გამოვლენილი დანაშაულებრივი შემთხვევების დამოუკიდებელი, დროული და ეფექტიანი გამოძიება და მსგავსი ძალადობის ეფექტიანი პრევენცია. ამასთან, EMC მოუწოდებს პოლიტიკურ პარტიებს განუხრელად დაიცვან მშვიდობისა და დემოკრატიის პრინციპები და არ დაუშვან სოციალური კონფლიქტების შექმნა რეგიონებში. სრულად... წყარო: emc.org.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED) 2020 წლის საპარლამენტო არჩევნების ჭრილში, სოციალური მედიის წინასაარჩევნო მონიტორინგის I შუალედური ანგარიში წარმოადგინა. „საანგარიშო პერიოდისთვის ISFED-მა გამოავლინა 10 ცრუ მედია გვერდი, რომლებიც პროსახელისუფლებო და ოპოზიციის საწინააღმდეგო გზავნილებს ავრცელებენ. დაკვირვების შედეგად აღმოჩნდა, რომ ცრუ მედია გვერდები საკუთარ პოსტებს ინტენსიურად ასპონსორებენ, თუმცა პოლიტიკური რეკლამის ხარჯების სათანადო დეკლარირებას არ ახდენენ და Facebook-ის რეგულაციებისთვის თავის არიდებას ცდილობენ. ღიად დისკრედიტაციული Facebook ჯგუფები, ძირითადად, ორი პოლიტიკური პარტიის, „ქართული ოცნების“ და „ერთიანი ნაციონალური მოძრაობის“ წინააღმდეგ მოქმედებენ“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. „მრავალეროვანი საქართველო“ 28 და 29 სექტემბერს, მარნეულსა და სადახლოში მომხდარ ინციდენტებთან და ძალადობის ფაქტებთან დაკავშირებით ღრმა შეშფოთებას გამოხატავს.  ორგანიზაციას დაუშვებლად მიაჩნია ჟურნალისტური საქმიანობისათვის ხელის შეშლა და მოუწოდებს შესაბამის სტრუქტურებს, დროულად, ობიექტურად და სრულყოფილად გამოიძიონ ძალადობრივი ინციდენტები, ასევე, სათანადო რეაგირება იქონიონ მათში მონაწილე, დამნაშავე პირების გამოსავლენად და კანონმდებლობის შესაბამისად პასუხისგებაში მისაცემად. სრულად... წყარო: ორგანიზაციის გვერდი სოციალურ ქსელში

თბილისი. საქართველოს მედია წელს უფრო მრავალფეროვნად აშუქებს არჩევნებს, თუმცა მედია-გაშუქებაში კვლავ შეიმჩნევა საარჩევნო პროცესის სიღრმისეული ანალიზის ნაკლებობა, გენდერული სტერეოტიპები და დისკრიმინაციული ენის გამოყენება. ასეთია საარჩევნო მედიამონიტორინგის პირველი 11 კვირის შედეგები, რომლებიც ევროკავშირმა (EU) და გაეროს განვითარების პროგრამამ (UNDP) 2020 წლის საპარლამენტო არჩევნებამდე ერთი თვით ადრე გამოაქვეყნეს. სრულად... წყარო: internews.ge

თბილისი. კოალიცია „მედიის ადვოკატირებისთვის“ მთავრობას ჟურნალისტების დაცვისკენ მოუწოდებს გუსინ, 2020 წლის 29 სექტემბერს მარნეულში მომხდარი დაპირისპირებისას ფიზიკურად გაუსწორდნენ შემთხვევის გადასაღებად მისულ გადამღებ ჯგუფებსაც. თანამშრომლების დაზიანების შესახებ ინფორმაცია „მთავარმა არხმა“ და საზოგადოებრივმა მაუწყებელმა გაავრცელეს. მედიის ადვოკატირებისთვის მთავრობას ჟურნალისტების დაცვისკენ მოუწოდებს. „მიგვაჩნია რომ მომხდარზე დროული და ეფექტიანი გამოძიება მნიშვნელოვნად შეამცირებს წინასაარჩევნო პერიოდში მედიისათვის გაზრდილ საფრთხეებს“. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ გმობს მარნეულში წუხელ მომხდარი თავდასხმის ინციდენტებს მთავარი არხი • Mtavari Arkhi-ს და პირველი არხის ჟურნალისტებზე, აგრეთვე პოლიტიკურ აქტივისტებზე. „არჩევნების მშვიდ და სამართლიან გარემოში ჩატარება საქართველოს მოქალაქეების უმთავრეს ინტერესს წარმოადგენს და ამის უზრუნველყოფის უმთავრესი ვალდებულება მოქმედ ხელისუფლებას ეკისრება. მოვუწოდებთ სამართალდამცავ უწყებებს უზრუნველყონ ინციდენტების სწრაფად, სრულყოფილად და მიუკერძოებლად გამოძიება“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

კახეთი. 26-27 სექტემბერს, კახეთში, მედიის წარმომადგენლებთან ორდღიანი სამუშაო შეხვედრა გაიმართა COVID-19-თან დაკავშირებულ საკითხებზე. "შეხვედრაზე განიხილეს COVID-19-ის მიერ შექმნილი გლობალური და ლოკალური გამოწვევები, ჯანდაცვის სისტემაში კოვიდ-19-ის მართვის სქემა, ეპიდზედამხედველობა და პროფილაქტიკური ღონისძიებები, კლინიკური მართვის პრინციპები, ვაქცინაცია, გაეროს ბავშვთა ფონდის საპასუხო ღონისძიებები COVID-19-თან დაკავშირებით, ბავშვის უფლებათა კოდექსი და სხვა მნიშვნელოვანი თემები". სრულად... წყარო: ორგანიზაციის გვერდი სოციალურ ქსელში