თბილისი. საქართველოს ახალგაზრდა იურისტთა ასოციაციის განმარტებით, თბილისის სააპელაციო სასამართლომ საზოგადოებრივი მაუწყებლის მიერ საჯარო ინფორმაციის გაცემასთან დაკავშირებით მნიშვნელოვანი გამარტება გააკეთა. „თბილისის სააპელაციო სასამართლომ ნაწილობრივ დააკმაყოფილა საიას სააპელაციო საჩივარი და საზოგადოებრივ მაუწყებელს დაევალა სახელმწიფო შესყიდვის ფარგლებში 10 არარეზიდენტ პირთან გაფორმებული ხელშეკრულების (თითოეულზე თანხის მითითებით) გადმოცემა. თბილისის სააპელაციო სასამართლომ განმარტა, რომ „სახელმწიფო შესყიდვების შესახებ“ და „მაუწყებლობის შესახებ“ კანონები გამორიცხავენ საზოგადოებრივი მაუწყებლის მიერ ტელე-, რადიო-, ასევე ვებგვერდებისა და სოციალური ქსელისთვის განკუთვნილი პროდუქციის ან/და მის შესაქმნელად საჭირო მომსახურების შესყიდვაზე სახელმწიფო შესყიდვების კანონმდებლობის გავრცელებას, მაგრამ ეს არ გულისხმობს სახელმწიფო დაფინანსების ფარგლებში განხორციელებული შესყიდვების ამსახველი ხელშეკრულებების საჯაროობის გამორიცხვას და საჯარო ინფორმაციის გაცემის ვალდებულება მაინც არსებობს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ჟურნალისტური ეთიკის ქარტიის საბჭომ მიიღო გადაწყვეტილება შემდეგ საქმეებზე: •ნელი უკლება თამთა დოლენჯაშვილის წინააღმდეგ. •მამუკა ჟღენტი ნატა მახვილაძის წინააღმდეგ. ქარტიის საბჭოს გადაწყვეტილებით ორივე შემთხვევაში ინფორმაციის სიზუსტე დაირღვა. სრულად... წყარო: www.qartia.ge

თბილისი. 31 მაისს, 18:00 საათზე, გაიმართება მედია წიგნიერების ტრენინგი, რომელიც IREX-ის „ისწავლე, რათა ამოიცნო“ პროექტის კასკადური ტრენინგების ნაწილია და ტარდება პროექტის მონაწილე, IREX-ის „ისწავლე, რათა ამოიცნო“ ახალგაზრდა ტრენერის, მარიამ ავაქოვის მიერ. „როდესაც მოქალაქეები იჯერებენ და ავრცელებენ ყალბ ინფორმაციას, ამით ისინი საკუთარ თავსაც და მათ ირგვლივ მყოფებს: მეგობრებს, ნათესავებს, ახლობლებს და ა.შ. უქმნიან პრობლემას, როგორც ემოციურ დონეზე, ასევე ეროვნულ თუ სახელმწიფოებრივ დონეზეც კი. მცდარი ინფორმაცია სოციალურ ქსელში სანდო ინფორმაციაზე სწრაფად ვრცელდება. ამიტომ, საზოგადოდ დამკვიდრებული არასწორი წარმოდგენებისა და გაუგებრობების გამოაშკარავებასთან ერთად, აუცილებელია, რომ ახალი ამბების მომხმარებლები აღვჭურვოთ ისეთი უნარებით, რომლებიც დაეხმარებიან (ყოველდღიური უამრავი ინფორმაციის მოზღვავების პირობებში) ნამდვილი ინფორმაციის ყალბისგან გარჩევაში“. აპლიკაციის შევსების ბოლო ვადაა 30-05-2020, 18:59. რეგისტრაციის ბმული... სრულად... წყარო: ორგანიზაციის გვერდი სოციალურ ქსელში

თბილისი. მედიის განვითარების ფონდმა პედაგოგებისთვის ონლაინ სწავლების მეთოდებზე ტრენინგი ჩაატარა. ორგანიზაციამ მასწავლებლებს მედიაწიგნიერების რესურსების ბაზაც გაუზიარა: www.millab.ge სრულად... წყარო: ორგანიზაციის გვერდი სოციალურ ქსელში

თბილისი. ორგანიზაციამ „პარტნიორობა ადამიანის უფლებებისათვის” განცხადება წარადგინა ტელეკომპანია „მთავარის” გადაცემა „მთავარი აქცენტების” წამყვანის - ნიკა გვარამიას წინააღმდეგ. საქართველოს ჟურნალისტური ეთიკის ქარტიის სამდივნომ ორგანიზაციის განცხადება დასაშვებად ცნო. „სადავო გადაცემა “მთავარი აქცენტები” ეთერში 2020 წლის 24 მაისს გავიდა და მხარის პრეტენზია გვარამიას მონოლოგის იმ ნაწილს ეხება, როდესაც ის, ყოფილი ცოლის ცემაში ბრალდებული ნიკოლოზ ბასილაშვილის საქმის დეტალებზე საუბრობს. „პარტნიორობა ადამიანის უფლებებისათვის” განმარტებით, გარდა იმისა რომ წამყვანის მონოლოგში, ბასილაშვილის ყოფილი მეუღლის მხრიდან, შანტაჟთან დაკავშირებული ინფორმაცია ფაქტადაა გადმოცემული და სიმართლეს არ შეესაბამება, მსხვერპლი ისეა წარმოჩენილი, თითქოს მან უბიძგა ბრალდებულს ძალადობის ჩადენისკენ და ქმნის წარმოდგენას, თითქოს „ქალის გარკვეული „არასწორი” სოციალური ქცევა, მამაკაცს ანიჭებს პრივილეგიას, რომ მას ძალადობრივი მეთოდებით გაუსწორდეს.“ სრულად... წყარო: www.qartia.ge

თბილისი. გაეცანით კონსულტაციისა და ტრენინგის ცენტრის და ონლაინ გამოცემა „პუბლიკას“ ერთობლივ პროექტს - „Covid-19 და საზოგადოებრივი ინიციატივები“. „პუბლიკას ვებ-გვერდის მოცემულ სვეტში გაერთიანდება და გაშუქდება ყველა ის სოციალური მიმართულების საზოგადოებრივი ინიციატივა, რომელიც COVID 19 პანდემიის საპასუხოდ განხორციელდება. ორი საინტერესო ისტორია ამ ეტაპზე უკვე მომზადდა და სამომავლოდ ერთი სვეტის ქვეშ გაერთიანდება პროექტის ფარგლებში მომზადებული ყველა მასალა. თუ გაქვთ ინფორმაცია და გსურთ გაგვიზიაროთ სოციალური მიმართულებით სამოქალაქო ინიციატივების შესახებ, გთხოვთ მოგვწეროთ ჩვენ ან ონლაინ გამოცემა „პუბლიკას““. იხილეთ სტატიები „პუბლიკაზე“... წყარო: ორგანიზაციის გვერდზე სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2018 წლის 2 აგვისტოს საქართველოს კომუნიკაციების ეროვნულმა კომისიამ ა(ა)იპ „მედიააკადემია“ დააფუძნა, რომლის საქმიანობის მიზანს საქართველოში მედიაწიგნიერების განვითარების ხელშეწყობა წარმოადგენს. ბლოგპოსტის თანახმად, ორგანიზაციამ „მედია აკადემიისგან“ სხვადასხვა ტიპის ინფრომაცია გამოითხოვა, თუმცა IDFI-ს უარი ეთქვა ინფორმაციის მიღებაზე. ეს გადაწყვეტილება გასაჩივრდა კომუნიკაციების ეროვნულ კომისიაში, თუმცა კომისიამ საჩივრის საფუძვლიან განხილვაზე უარი განაცხადა. „საკუთარი უფლებების დაცვისა და საზოგადოების ინფორმირების მიზნით IDFI-იმ სარჩელით მიმართა თბილისის საქალაქო სასამართლოს. IDFI იმედოვნებს, რომ სასამართლო მიიღებს კანონის შესაბამის გადაწყვტილებას, დაადასტურებს რომ „მედიააკადემია“ წარმოადგენს ადმინისტრაციულ ორგანოს და დააკისრებს მას საჯარო ინფორმაციის გაცემის ვალდებულებას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრმა (EMC) აჭარის საზოგადოებრივი მაუწყებლის თანამშრომლებისა და ალტერნატიული პროფესიული გაერთიანების სახელით ბათუმის საქალაქო სასამართლოს სარჩელით მიმართა. სარჩელში ორგანიზაცია მაუწყებლის ახალი დირექტორის მიერ 8 აპრილს დამტკიცებული იმ ქცევის წესების გაუქმებას ითხოვს, რომელიც ინტერნეტში/სოციალურ ქსელებში თანამშრომლების გამოხატვას არეგულირებს. „ჩვენი შეფასებით, აღნიშნული ქცევის წესები უკანონოა, რადგან ის მაუწყებლის თანამშრომლების გამოხატვის, შრომისა და პირადი ცხოვრების ხელშეუხებლობის უფლებებს უხეშად არღვევს და საზოგადოებრივი მაუწყებლის დემოკრატიულ ფუნქციონირებას აფერხებს“. სრულად... წყარო: emc.org.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: Facebook წმენდას გადარჩენილი ცრუ მედიის ქსელი.  „„სამართლიანი არჩევნების“ დაკვირვებით, ამ დროისთვის „ფეისბუქზე“ დასპონსორებაზე მიმართული ერთმანეთთან მჭიდროდ დაკავშირებული 5 გვერდი მოქმედებს, რომლებიც სოციალური მედიის სხვა პლატფორმებსა და ვებ-გვერდებსაც იყენებენ. ცრუ მედიის ეს გვერდები „ფეისბუქზე“ 2020 წლის იანვრიდან შეცვლილი ტაქტიკით გააქტიურდნენ, თუმცა უცვლელია მათი მთავარი სტრატეგია: ისინი თავის რეალურ მედიად წარმოჩენას ცდილობენ და ამ ნიღბით დასპონსორებულ პროპაგანდისტულ კამპანიას აწარმოებენ. ისინი ხელისუფლების სასარგებლოდ ერთიან კოორდინირებულ ქსელს ქმნიან. ამ ცრუ მედიის გვერდების მომწონებელთა და გამომწერთა საშუალო რაოდენობა 5,000-ის ფარგლებშია, თუმცა მათზე გამოქვეყნებულ პოსტებს დასპონსორებული პოსტების წყალობით მაღალი ინტერაქცია აქვთ. გამოქვეყნებული პოსტების ნახევარი დასპონსორებულია. ამ პოსტებზე გვერდების საერთო ინტერაქციის (რეაქციების, კომენტარებისა და გაზიარებების ჯამი) 99%-ზე მეტი მოდის“, ნათქვამია ორგანიზაციის ვებგვერდზე. სრულად...  წყარო: isfed.ge

თბილისი. 21 მაისს, კოალიცია მედიის ადვოკატირებისთვის საზოგადოებრივი მაუწყებლის აჭარის ტელევიზიისა და რადიოს ჟურნალისტების მხარდასაჭერად ერთდღიან აქციაში მონაწილეობას გთავაზობთ. „ეს წარმოადგენს კოალიცია „მედიის ადვოკატირებისათვის“ ინიციატივით წამოწყებული სოლიდარობის კამპანიის გაგრძელებას ამჯერად უკვე არასამთავრობო ორგანიზაციებთან/ სამოქალაქო აქტივისტებთან და საზოგადოებრივი მაუწყებლის იდეის გულშემატკივრებთან ერთად. აღნიშნული აქტივობა მოიცავს თქვენი ორგანიზაციის ან/და პირად ფეისბუქ გვერდზე სოლიდარობის გამომხატველი ქავერის განთავსებას. ჩვენი ჰეშთეგია - #სოლიდარობააჭარისმაუწყებლისჟურნალისტებს აქციის დღეა - ხუთშაბათი, 21 მაისი, 2020 წელი ქავერისათვის შეგიძლიათ გამოიყენოთ გამოქვეყნებული ფოტო. კოალიცია „მედიის ადვოკატირებისათვის“ მადლობას გიხდით საზოგადოებრივი მაუწყებლის იდეის დაცვის პროცესში თქვენი განსაკუთრებული მონაწილეობისათვის“, ნათქვამია კოალიციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. კოალიცია „მედიის ადვოკატირებისათვის“ წევრი ორგანიზაციები ეხმიანებიან TV 25 -ის საინფორმაციო სამსახურის უფროსის მიერ გავრცელებულ ინფორმაციას მაუწყებლის მიმართ არათანასწორი მოპყრობის შესახებ. „2020 წლის 18 მაისს ჟურნალისტმა საჯარო განცხადება გაააკეთა, რომ აჭარის მთავრობა მათთან ბოიკოტის რეჟიმზე გადავიდა. მედიის როლი დემოკრატიული საზოგადოების განვითარებაში შეუცვლელია. ჟურნალისტების მოვალეობაა გააცნონ გადასახადის გადამხდელებს მათ მიერ დაქირავებული მოხელეების მოქმედებები და შედეგები, ეს პროცესი კი არ შეიძლება იყოს დამოკიდებული საჯარო მოხელეების სურვილზე. რადგან მედიასთან ურთიერთობა საჯარო საქმიანობის თანმდევი ატრიბუტია“, ნათქვამია განცხადებაში. კოალიცია მიმართავს აჭარის მთავრობის თავმჯდომარეს, ბატონ თორნიკე რიჟვაძეს გადახედოს მედიასთან ურთიერთობის პოლიტიკას, ხოლო სახალხო დამცველს სთხოვს, შეისწავლოს აღნიშნული საქმე. სრულად... წყარო: კოალიციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) აჭარის საზოგადოებრივი მაუწყებლიდან უკანონოდ გათავისუფლებული თანამშრომლების სახელით მიმართა შინაგან საქმეთა სამინისტროსა და გენერალურ პროკურატურას აჭარის მაუწყებლის დირექტორის გიორგი კოხრეიძის მიმართ გამოძიებისა და სისხლისსამართლებრივი დევნის დაწყების მოთხოვნით. „სამართალდამცავი ორგანოების წინაშე წარდგენილ ვრცელ მიმოხილვაში EMC უთითებს, მათ შორის, საერთაშორისო ორგანიზაციების (ეუთო, ევროპის საბჭო, რეპორტერები საზღვრებს გარეშე), საქართველოს სახალხო დამცველისა და ადამიანის უფლებებზე მომუშავე ადგილობრივი ორგანიზაციების შეფასებებს, რომლებიც ღიად მსჯელობენ მაუწყებლის სარედაქციო პოლიტიკაში ჩარევის, ჟურნალისტების დევნისა და კონტროლის პრაქტიკებზე“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება აჭარის საზოგადოებრივი მაუწყებლიდან ალტერნატიული პროფესიული კავშირის თავმჯდომარისა და გადაცემა „ჰეშთეგის“ წამყვანის მალხაზ რეხვიაშვილის სამსახურიდან გათავისუფლების ფაქტს. „ორგანიზაცია მიიჩნევს, რომ მაუწყებლის ახალი მენეჯმენტის მიერ მიღებული ეს გადაწყვეტილება მაუწყებელში კრიტიკული აზრის დევნის, ალტერნატიული პროფესიული კავშირის დასუსტებისა და მაუწყებლის დამოუკიდებლობის ნგრევის პროცესის გაგრძელებაა, რომელიც უკვე შემაშფოთებელ ფორმას იღებს“. სრულად... წყარო: emc.org.ge

თბილისი. „სამართლიანი არჩევნებისა და დემოკრატიის საერთაშორისო საზოგადოებამ“ გამოავლინა მჭიდრო კოორდინაციის ნიშნების მქონე ცრუ მედია გვერდების ქსელი „ფეისბუქზე“, რომელიც შენიღბულად და ერთგვაროვანი ტაქტიკის გამოყენებით ცდილობს პროსახელისუფლებო გზავნილების არაავთენტურად გავრცელებას და კრიტიკული აზრის დემონიზებას. „ეს ცრუ მედია გვერდები პროსახელისუფლებო სტატიების გარდა, ხელისუფლების მიმართ კრიტიკულად განწყობილი საჯარო პირებისა და ოპოზიციონერი ლიდერების დისკრედიტაციისთვის მიზანმიმართულ დეზინფორმაციასაც ავრცელებენ“. სრულად... წყარო: isfed.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: საქართველოში პოლიტიკური პოლარიზაციის ხელშემწყობი რუსული საინფორმაციო ოპერაცია Facebook-ზე და მასში ჩართული არაავთენტური ანგარიშები. „2020 წლის 30 აპრილს „ფეისბუქმა“ საკუთარი პლატფორმიდან წაშალა კრემლის პროპაგანდისტული საინფორმაციო სააგენტო „ნიუს-ფრონტის“ „ფეისბუქ“ გვერდები ქართულ და სხვა ენებზე, რომელთაც გამოცემა სხვადასხვა ქვეყნებში იყენებდა. სამართლიანი არჩევნებისა და დემოკრატიის საერთაშორისო საზოგადოება სოციალური მედიის მონიტორინგის ფარგლებში „ნიუს-ფრონტ ჯორჯიას“ და მასთან დაკავშირებულ ანგარიშებს „ფეისბუქზე“ 2019 წლის ნოემბრიდან აკვირდებოდა. „ნიუს-ფრონტი“ საქართველოში მოქმედი კრემლისტური საინფორმაციო საგენტოა, რომელიც აქტიურად იყენებდა „ფეისბუქს“ პრო-რუსული და ანტიდასავლური საინფორმაციო კამპანიის საწარმოებლად“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: აჭარის საზოგადოებრივი მაუწყებლის ჟურნალისტების სამთვიანი დევნის ქრონიკა. „ეს პროცესი 2019 წლის აპრილში ნათია კაპანაძის თვითნებური და პოლიტიზირებული იმპიჩმენტის პროცესით დაიწყო და აგრესიული ფორმები ახალი დირექტორის დანიშვნის შემდეგ მიიღო. მთლიანობაში ამ დროისთვის ახალმა მენეჯმენტმა საინფორმაციო სამსახურში საკვანძო პოზიციების მქონე თანამშრომლების უდიდესი ნაწილი გაათავისუფლა ან სხვა სამსახურში გადაიყვანა“, ნათქვამია განცხადებაში. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია აქვეყნებს სტრატეგიული სამართალწარმოების იურისტის თამარ ონიანის ბლოგპოსტს: თავისუფალი პრესა, როგორც ვაქცინა. ბლოგპოსტი პრესის თავისუფლების დღეს ეძვნება და მასში დასმულია ისეთი მნიშვნელოვანი საკითხები, როგორიცაა პრესის დევნა, ცენზურა, ადამიანის უფლებების შეზღუდვა ობიექტური და სანდო ინფორმაციის მიღებაზე. „შეძლებდა თუ არა მსოფლიო ერთი ნაბიჯით წინ ყოფილიყო ვირუსთან ბრძოლაში, თუკი ვირუსის პირველწყაროს თავისუფალი პრესა ეყოლებოდა?! პანდემიის ყველაზე ადრეული დღეებიდან, როდესაც ჩინეთის მთავრობამ, ისევე, როგორც უკვე შემდგომ პერიოდში არაერთმა სახელმწიფომ, გვაჩვენა მაგალითი, თუ რა გავლენა აქვს ადამიანის თავისუფლებაზე, ადამიანის სიცოცხლესა და ჯანმრთელობაზე, პრესის დევნას, ჩაგვრას, შევიწროებას. დღევანდელი დღე შეხსენებაა ყველა სახელმწიფოს ხელისუფლებისა და ჩვენთვის, ადამიანებისთვის, რომ ჩვენი თავისუფლების მოპოვების გზაზე, სიტყვა - მთავარი იარაღია, ხოლო ჩვენი სათქმელი კიდევ იმ ადამიანების, ჟურნალისტების, რეპორტიორების მიერ გაღებული შრომის შედეგად ფორმირდება, რომლებიც, თავიანთი ყოველდღიური საქმიანობით ქმნიან „ვაქცინას“ ყველა იმ „ვირუსის“ წინააღმდეგ, რომელიც მიზანმიმართულია ადამიანის, არა მიზნად აღქმის, არამედ მისი საშუალებად ქცევისკენ. დღეს პრესის თავისუფლების დღეა, და ყველას, ვინც თავისუფლების ამ ქოლგის ქვეშ მოიაზრება, მადლობა უნდა ვუთხრათ! მადლობა.“ სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: რუსული პროპაგანდა და COVID-19 - უნდა გააფართოოს თუ არა საქართველომ სავაჭრო ურთიერთობები რუსეთთან. ბლოგპოსტი ეხმაურება ჟურნალისტ ბესო ბარბაქაძის სტატიას: „საქართველოს სასიცოცხლო არტერია რუსეთზე გადის“, რომელშიც საუბარია იმაზე, რომ კორონავირუსის გამო შექმნილი კრიზის ფონზე, ევროპული ქვეყნები ვეღარ შეძლებენ საქართველოს მომარაგებას იმ პროდუქტებით, რომლებიც აქამდე ექსპორტზე გაჰქონდათ და ამიტომ, საჭიროა, რომ საქართველომ რუსეთის ფედერაციასთან სავაჭრო ურთიერთობების გაფართოებაზე მოლაპარაკებები დაიწყოს. „დღევანდელი სიტუაცია ისევე, როგორც წარსული გამოცდილება, გვაჩვენებს, რომ საჭიროა არა უშუალოდ რუსეთთან სავაჭრო ურთიერთობების გამყარება და მასზე დამოკიდებულების ზრდა, არამედ იმპორტის ისევე, როგორც ექსპორტის დივერსიფიკაცია, რათა ქვეყნის ეკონომიკური სტაბილურობა დამოკიდებული არ იყოს სხვა რომელიმე ერთ ქვეყანაში მიმდინარე პროცესებზე ან არ იქცეს იარაღად სხვა ქვეყნის ხელისუფლების ხელში“. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ომბუდსმენის რეკომენდაციას, რომელიც მან საზოგადოებრივი მაუწყებლის აჭარის ტელევიზიისა და რადიოდან გათავისუფლებული შორენა ღლონტის, მაია მერკვილაძისა და თეონა ბაკურიძის საქმეებზე გამოსცა. „მნიშვნელოვანია აღინიშნოს, რომ სახალხო დამცველი მის ვრცელ რეკომენდაციაში არსებითად იზიარებს იმ სამართლებრივ დასაბუთებას და არგუმენტაციას, რომელიც სამივე საქმეზე სასამართლოში უკვე გაგზავნილ სარჩელებში წარმოდგენილია EMC-ს მიერ. EMC რეკომენდაციის ტექსტს სასამართლოს მალევე გაუზიარებს და ვიმედოვნებთ, რომ სახალხო დამცველის შეფასებები კიდევ უფრო მეტად გააძლიერებს შორენა ღლონტის, მაია მერკვილაძისა და თეონა ბაკურიძის სამართლებრივი ინტერესების და უფლებების დაცვის პროცესს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ჟურნალისტური ეთიკის ქარტია აქვეყნებს გზამკვლევს: ეთიკური დილემები პანდემიის გაშუქებისას. „გზამკვლევის ეს ნაწილი ეთმობა იმ ეთიკურ დილემებს, რაც მედიას პანდემიის თემის გაშუქებისას შესაძლოა წარმოეშვას“. სრულად... წყარო: www.qartia.ge

თბილისი. საქართველოს ჟურნალისტური ეთიკის ქარტიის სამდივნომ დასაშვებად ცნო, ანი მეზურნიშვილის განცხადება, ტელეკომპანია „რუსთავი2”-ის, გადაცემა „ფარული კონვერტის” წამყვანის, ია ფარულავას წინააღმდეგ. „სადავო მასალა, ტელეკომპანიის ეთერში, 2020 წლის 20 აპრილს გავიდა. როგორც განმცხადებელი აღნიშნავს, ჟურნალისტის კითხვაზე „გათხოვების საიდუმლოსთან” დაკავშირებით, რესპონდენტის პასუხი იყო სტერეოტიპული“. სრულად... წყარო: www.qartia.ge

კოალიცია „მედიის ადვოკატირებისათვის“ წევრი ორგანიზაციები, თვლიან, რომ აჭარის საზოგადოებრივ მაუწყებელში კვლავაც უწყვეტად გრძელდება თანამშრომელთა დევნა და შევიწროება მათი განსხვავებული მოსაზრებების გამო. „2020 წლის 21 აპრილს საზოგადოებრივი მაუწყებლის აჭარის ტელევიზიისა და რადიოს დირექტორმა გიორგი კოხრეიძემ საინფორმაციო გამოშვება „მთავარის“ ერთ-ერთი წამყვანი თეონა თურმანიძე ეთერიდან მოხსნა. როგორც თავად ჟურნალისტი ფეისბუქზე წერს, აღნიშნული გადაწყვეტილების მიზეზად სოციალურ ქსელში მაუწყებელთან დაკავშირებით მის მიერ დაფიქსირებული პოზიცია დაუსახელეს“, ნათქვამია განცხადებაში. სრულად... წყარო: კოალიციის გვერდი სოციალურ ქსელში