აჭარა. 26 ივნისს, 18:00 საათზე აჭარის საზოგადოებრივი მაუწყებლის შენობასთან საზოგადოებრივი ორგანიზაციები აჭარის საზოგადოებრივი მაუწყებლის დასაცავად მართავენ საპროტესტო აქციას (მისამართი: ბათუმი, მემედ აბაშიძის 41).  საზოგადოებრივი ორგანიზაციები საზოგადოების მიმართ მიმართვას ავრცელებენ, სადაც ნათქვამია, რომ „აჭარის ტელევიზიისა და რადიოს დაბალანსებული, მიუკერძოებელი და ობიექტური სარედაქციო პოლიტიკის შენარჩუნება არის სასიცოცხლოდ მნიშვნელოვანი სიტყვის თავისუფლების, ჩვენი ქვეყნის დემოკრატიისა და დამოუკიდებლობისათვის“. სრულად... 

თბილისი. მედიაჩექერი აქვეყნებს ნინო ნარიმანიშვილის ინტერვიუს ჯანდაცვის თემებზე მომუშავე, „კაქტუს-მედიის“ დამფუძნებელთან ცირა გვასალიასთან. „როდესაც ვწერთ სტატიას ჯანდაცვის საკითხებზე, სულ წარმოვიდგინოთ, რომ ჩვენმა მკითხველმა არაფერი იცის: არა იმიტომ, რომ მათ პატივს არ ვცემთ. მაგალითად, როდესაც ვამბობთ, რომ საქართველოში ამდენი და ამდენია თანმხლები დაავადებების სტატისტიკა, მაგალითად, გულის დაავადებები, იქვე განვმარტოთ რა არის გულის დაავადება, 1-2 წინადადებით, ძალიან მარტივი ენით. სტატია, რომელშიც ეს ახსნილია მოვლენები და ტერმინები, არის მაღალი ხარისხის და ადვილად გასაგები. ეს ნიშნავს, რომ შენ პატივს სცემ შენს მკითხველს. ალბათ, ძალიან სასარგებლოა ვიკითხოთ სანდო საერთაშორისო გამოცემები, განსაკუთრებით იმ სფეროში, რომელშიც ვმუშაობთ. ასევე ძალიან კარგი იქნება, რომ ჟურნალისტები კონკრეტულ მიმართულებებზე მუშაობდნენ. ეს იმიტომ, რომ ხანდახან ინფორმაცია იმდენად სწრაფად იცვლება, ვერ ეწევი“, ამბობს რესპონდენტი. სრულად... წყარო: www.mediachecker.ge

თბილისი. მედიაჩექერი აქვეყნებს ნატალია ვახტანგიშვილის და ნინო ნარიმანიშვილის სტატიას, რომელიც „მთავარი არხი“-ს მიერ ბავშვთა პორნოგრაფიის საქმეზე მომზადებულ სიუჟეტს შეეხება. სადავო სიუჟეტზე მასალის ავტორებს ფსიქოლოგი მაია ცირამუა ესაუბრა. მისი შეფასებით, მსხვერპლებისთვის ე.წ. სახის „გაბლარვა“ საკმარისი არ არის და არსებობს ბავშვების ამოცნობის საფრთხე, ასევე ტრავმის ხელახალი განცდის საშიშროება. პორნოგრაფიის საქმეში მონაწილე მოზარდები კი ჟურნალისტური მასალის გავრცელების შემდეგ სექსტინგისა და ბულინგის მსხვერპლებიც გახდნენ. საზოგადოების ნაწილმა ისინი დამნაშავეებად გამოიყვანა - „ამ ბავშვებს წავართვით შანსი, რომ ნდობა გაუჩნდეთ ადამიანების მიმართ. იმიტომ რომ ეს ტალღა, რისხვა, ისევ წავიდა ამ ბავშვების მისამართით და არა იქით, საითაც უნდა წასულიყო“, ამბობს მაია ცირამუა. სპეციალისტის განმარტებით, კიდევ ერთი პრობლემა, რომელიც ამ სიუჟეტს უკავშირდება არის ის, რომ ბავშვთა პორნოგრაფიის ამსახველი კადრები ხელახლა იწყებს ცირკულირებას, რაც პირველ რიგში, მზა მასალაა პედოფილებისთვის. სრულად... წყარო: www.mediachecker.ge

თბილისი. წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT შეშფოთებას გამოთქვამს „მთავარი არხის“ ეთერით გავრცელებული სიუჟეტის გამო, რომელიც არასრულწლოვანი, 6-დან 16 წლამდე ასაკის ბავშვების პორნო-ტრეფიკინგს შეეხებოდა. „კატეგორიულად მიუღებელია მასობრივი ინფორმაციის საშუალებით ბავშვების შიშველი, ეროტიკული შინაარსის ფოტო და ვიდეომასალის გავრცელება, იმის მიუხედავად, დაფარულია თუ არა მათი სახეები. ეს ქმედება ეწინააღმდეგება ბავშვთა სექსუალური ექსპლუატაციისა და სექსუალური ძალადობისაგან დაცვის ევროპის საბჭოს კონვენციას. ბავშვების სახეების დამალვა თავიდან ვერ აგვაცილებს მათი იდენტიფიცირების რისკს იმ ადამიანების მხრიდან, რომლებიც პირადად იცნობენ ამ პროცესში ჩართულ არასრულწლოვნებს. გარდა ამისა, მაღალია რეტრავმატიზაციის რისკი - არავინ იცის რა სიძლიერის განცდებს გამოიწვევს ამ მასალის ნახვა მოზარდებში, რომლებმაც საკუთარ თავზე გამოსცადეს ძალადობა. გასათვალისწინებელია ისიც, რომ ამ კადრების ტელევიზიით ტირაჟირებით, ინტერნეტში პრაქტიკულად სამუდამოდ ვტოვებთ ბავშვების ფოტო და ვიდეომასალას, რომელთა ნახვასაც მსხვერპლები წლების მერეც შეძლებენ“, ნათქვამია ორგანიზაციის ვებგვერდზე. სრულად... წყარო: gcrt.ge

თბილისი. მედიაჩექერი აქვეყნებს მაგდა გუგულაშვილის ბლოგპოსტს: როგორ უნდა გაეშუქებინა მედიას ამბავი რამზან კადიროვის „ქველმოქმედებაზე”. მასალაში საუბარია იმაზე, თუ „როგორ გაშუქდა ჩეჩნეთის პრეზიდენტის რამზან კადიროვის მიერ დე ფაქტო სამხრეთ ოსეთში ფქვილის გაგზავნის ამბავი, რომელიც დროში დაემთხვა სავარაუდოდ, კადიროვის დაკვეთით, ქართველი ჟურნალისტის, გიორგი გაბუნიას ლიკვიდაციის მზადების შესახებ ინფორმაციის გასაჯაროებას; რა უნდა ყოფილიყო ასეთ დროს, ასეთი ამბის გავრცელების მთავარი კონტექსტი და როგორ უნდა აეხსნათ გამოცემებს ამგვარი ახალი ამბის მნიშვნელობა“. სრულად... წყარო: www.mediachecker.ge

თბილისი. მითების დეტექტორის ინფორმაციით, იმისთვის, პლატფორმაზე დეზინფორმაციის გავრცელება შეჩერდეს, Google ფოტოების ძიების შედეგების გადამოწმებას დაიწყებს. „რატომ არის ეს მნიშვნელოვანი: ტექსტზე დაფუძნებული მისინფორმაციის საფრთხე შესაძლოა დაჩრდილოს შეცდომაში შემყვანმა, მანიპულაციურმა და ყალბმა ფოტოებმა/ვიდეოებმა, მათ შორის დამაჯერებელმა deepfake-ებმა, რომელიც ხელოვნური ინტელექტის მეშვეობით არის გენერირებული“, ნათქვამია მითების დეტექტორის ვებგვერდზე. სრულად... წყარო: mythdetector.ge

თბილისი. მედიაჩექერის ინფორმაციის თანახმად, საზოგადოებრივი მაუწყებლის სამეურვეო საბჭოს 3 წევრის შერჩევა პარლამენტს 8 კანდიდატიდან მოუწევს. საპარლამენტო კომისიამ გასაუბრებები დაასრულა და შედეგები გაასაჯაროა. შემდეგ ეტაპზე გადასული კანდიდატების სია ასეთია: ზაზა აბაშიძე, თამარ ამაშუკელი, ნათია კაპანაძე, გია მურღულია, ბონდო მძინარაშვილი, დოდო შონავა, კონსტანტინე ჩლაიძე, ზაურ ხალილოვი. სრულად... წყარო: www.mediachecker.ge

თბილისი. 24 ივნისს, 16:00 საათზე, ომისა და მშვიდობის გაშუქების ინსტიტუტი (IWPR) გიწვევთ ვებინარზე „სოციალური მედია არაკომერციული ორგანიზაციებისთვის“. ვებინარი გაიმართება ქართულ ენაზე. სავალდებულოა წინასწარი რეგისტრაცია ბმულზე... სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ქართული ოცნების“ მიერ აჭარის ტელევიზიის ხელში ჩაგდების მცდელობის ქრონოლოგია. „მმართველი პარტიის მხრიდან აჭარის ტელევიზიაზე ზეგავლენის მოპოვების აქტიური მცდელობა 2019 წლის აპრილში აჭარის ტელევიზიისა და რადიოს დირექტორის, ნათია კაპანაძის, დაუსაბუთელი იმპიჩმენტით დაიწყო. თავად იმპიჩმენტი იმ ფონზე განხორციელდა, როდესაც კაპანაძის დირექტორობის პერიოდში, მაუწყებელი ადგილობრივი და საერთაშორისო ორგანიზაციების შეფასებით, პოლარიზებულ მედიაგარემოში დაბალანსებულობითა და მიუკერძოებლობით გამოირჩეოდა. ამის შემდეგ კი ხელისუფლების მხრიდან მთელი რიგი ნაბიჯები გადაიდგა აჭარის ტელევიზიაზე ზეგავლენის საბოლოოდ მოსაპოვებლად“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. მედიაჩექერი (Media Checker) აქვეყნებს მაია მეცხვარიშვილის ბლოგპოსტს: მუქარა ამოშანთვაზე, მხილება სიყალბეში - რას ემსახურება სატელევიზიო ომები. მასალაში საუბარია მთავრობისადმი კრიტიკულად განწყობილი ტელევიზიების (TV Pirveli, Mtavari) მიერ მომზადებულ სიუჟეტებზე, რომლებსაც მეორეს მხრივ, ხელისუფლებისადმი ლოიალურად განწყობილი ტელევიზიები (ტელეკომპანია „იმედი“ და POSTV) განხილვის საგნად აქცევენ და ყალბ სიახლეს უწოდებენ. „მთელ ამ ურთიერთდაპირისპირებაში რა თქმა უნდა დაზარალებული რჩება მაყურებელი, რომელიც ვერ იღებს ზუსტ, მიუკერძოებელ, დაბალანსებულ ცნობებს ქვეყანაში მიმდინარე პროცესებზე. თანაც იმ ფონზე, როდესაც ტელევიზიები საქართველოში კვლავ რჩებიან ინფორმაციის მიღების მთავარ წყაროდ“, ნათქვამია ბლოგპოსტში. სრულად...  წყარო: www.mediachecker.ge

თბილისი. მედიაჩექერის ბლოგპოსტის თანახმად, ორმა ტელეკომპანიამ, „იმედმა“ და აჭარის ტელევიზიამ, „მთავარი არხის“ ჟურნალისტის გიორგი გაბუნიას ლიკვიდაციის მზადების საქმე, რომელიც 15 ივნისს გახდა ცნობილი, იმ დღის მთავარ გამოშვებაში არ გააშუქა. სრულად... წყარო: www.mediachecker.ge

თბილისი. საქართველოს ევრო-ატლანტიკურ კოალიციაში შემავალი ორგანიზაციები ეხმიანებიან ჟურნალისტ გიორგი გაბუნიას შესაძლო ლიკვიდაციის განზრახვას და მას საქართველოს დესტაბილიზაციის რუსულ გეგმად აფასებენ. „რუსული რბილი ძალიდან მომდინარე საფრთხეს სახელმწიფო უსაფრთხოების სამსახურიც ხაზს უსვამს თავის ანგარიშებში. ამ ფონზე ჟურნალისტის შესაძლო სამიზნედ ამოღება ქვეყნის უსაფრთხოების წინააღმდეგ და შესაძლო დესტაბილიზაციისკენ მიმართულ ქმედებად შეიძლება განვიხილოთ. ხელმომწერი ორგანიზაციები ვგმობთ რუსეთის ხელისუფლების წარმომადგენლების და მათ კონტროლ ქვეშ მყოფი პირების მხრიდან საქართველოს სუვერენიტეტისა და მისი მოქალაქეების წინააღმდეგ მიმართულ ქმედებებს. მოვუწოდებთ საქართველოს მთავრობას, გამჭვირვალედ წარმართოს გამოძიება, უზრუნველყოს მასში მეგობარი ქვეყნების ექსპერტების ჩართულობა და სრული ინფორმაცია მიაწოდოს საზოგადოებას დაგეგმილი დანაშაულის შესახებ“, ნათქვამია ერთობლივ განცხადებაში. სრულად... წყარო: transparency.ge

სამოქალაქო საზოგადოების ინსტიტუტი (CSI) აცხადებს მიღებას ონლაინ კურსზე – „ჟურნალისტიკა სოციალური ცვლილებებისთვის“. თანამედროვე ტექნოლოგიებისა და სოციალური სხვადასხვა პლატფორმების ეპოქაში თითოეული მოქალაქე არამხოლოდ ინფორმაციის მიმღები, ხშირ შემთხვევაში ინფორმაციის წყარო ან ინფორმაციის გავრცელების ხელშემწყობი ხდება. იმისთვის, რომ დადებით და საჭირო ცვლილებებს შევუწყოთ ხელი აუცილებელია ვიცოდეთ: როგორ გაავრცელოთ ინფორმაცია სწრაფად; როგორ მოვახერხოთ საზოგადოების ფართო ფენების ინფორმირება; ამისთვის როგორ გამოვიყენოთ თანამედროვე ტექნოლოგიები, პლატფორმები; როგორ არ გავხდეთ მანიპულაციის მსხვერპლი; როდის და როგორ გადავამოწმოთ ინფორმაცია; როგორ არ გავხდეთ დეზინფორმაციის გამავრცელებლები. სრულად...  წყარო: civilin.org

თბილისი. კოალიცია „მედიის ადვოკატირებისათვის“ საქართველოს მთავრობას მოუწოდებენ, საგამოძიებო ორგანოებმა გიორგი გაბუნიას ლიკვიდაციის მომზადებასთან დაკავშირებით „მთავარი არხის“ მიერ გავრცელებული ინფორმაციის თაობაზე დროული და დასაბუთებული ინფორმაცია გაასაჯაროონ. სრულად... წყარო: კოალიციის გვერდი სოციალურ ქსელში

თბილისი. „მითების დეტექტორი“ აქვეყნებს ბლოგპოსტს: ვინ გააყალბა სახალხო დამცველის კომენტარი „ვეფხისტყაოსნის” აკრძალვაზე. „11 ივნისს ფეისბუქ გვერდებსა და ჯგუფებში გავრცელდა ონლაინ გამოცემა on.ge-ის სტატიის სქრინი, სათაურით პოემა „ვეფხისტყაოსანი“ რასისტულია და უნდა აიკრძალოს, რადგან ხშირადაა გამოყენებული „მონა ზანგი“. სქრინზე სახალხო დამცველი ნინო ლომჯარიას ფოტოა განთავსებული და აღნიშნულ ციტატაც სწორედ მას მიეწერება. აღნიშნული სქრინი თავდაპირველად 11 ივნისს 9:51 საათზე ფეისბუქ პროფილმა „მრისხანე. ბაბუაწვერა” გამოაქვეყნა, რომელიც საკუთარ ვინაობას მალავს და სამუშაო ადგილად on.ge-ის რედაქცია აქვს მითითებული. „მრისხანე.ბაბუაწვერას” პოსტი სატირა იყო, რომლითაც ის Netflix-ის მიერ ფილმ „ქარწაღებულნის” ჩვენებიდან დროებით ამოღებას გამოეხმაურა. აღნიშნული ხუმრობა მოგვიანებით როგორც სახალხო დამცველის რეალური კომენტარი ფეისბუკში ვირუსულად გავრცელდა და ის გარკვეულმა ონლაინ პლატფორმებმაც აიტაცეს“. სრულად... წყარო: mythdetector.ge

თბილისი. „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ (CRRC) საზოგადოებრივი აზრის კვლევა ჩაატარა 2020 წლის 27 თებერვლიდან 18 მარტამდე პერიოდში. „გამოკითხულთა უმრავლესობას სმენია ყალბი ინფორმაციის გავრცელების მიზნით შექმნილი „ფეისბუკის“ გვერდების შესახებ. მოსახლეობის დიდი ნაწილი ასევე, ფიქრობს, რომ ხელისუფლება მედიის საქმიანობაში ერევა. სოციალურ მედიაში დეზინფორმაციასთან ბრძოლა ერთ-ერთი დიდი გამოწვევაა. საქართველოში ეს პრობლება განსაკუთრებით წინასაარჩევნოდ მძაფრდება, როცა პოლიტიკური ძალები, მათ შორის ყველაზე აქტიურად მმართველი პარტია, ყალბ გვერდებს ოპონენტების და არა მხოლოდ მათი დისკრედიტაციის მიზნით იყენებენ“, ნათქვამია ორგანიზაციის ვებგვერდზე. სრულად... წყარო: transparency.ge

ევროკომისიის 10 ივნისის ანგარიშის თანახმად, კოვიდ 19-ის პანდემია ცრუ და შეცდომაში შემყვანი ინფორმაციების მასობრივი ტალღის თანხლებით მიმდინარეობს. ჯანდაცვის საკითხებთან დაკავშირებით შეცდომაში შემყვანმა ინფორმაციებმა, სახიფათო, ცრუ მტკიცებებმა, კონსპირაციის თეორიებმა და სამომხმარებლო თაღლითობამ მნიშვნელოვანი საფრთხე შეუქმნა საზოგადოებრივ ჯანმრთელობას. ყალბი ან შეცდომაში შემყვანი ინფორმაციები კორონა ვირუსის შესახებ, აზიანებს სოციეტალურ ერთობას, თუმცა უპირველესად ჯანდაცვას. ცრუ და შეცდომაში შემყვანი ნარატივები სხვადასხვა ფორმით შეიძლება გავცელდეს, ისინი ვარირებს მიზანმიმართული, წინასწარ განზრახული დეზინფორმაციიდან არასწორ ინფორმაციამდე და განსხვავებულ საპასუხო ქმედებებს მოითხოვს. ევროკომისიის განცხადებით, გარეშე აქტორები, კონკრეტულად, რუსეთი და ჩინეთი მონაწილეობენ მიზანმიმართულ, გავლენის გამავრცელებელ ქმედებებში და დეზინფორმაციის კამპანიებში ევროკავშირში, მის სამეზობლოში და მთელ მსოფლიოში. დეზინფორმაციების მაგალითებად ევროკომისიას მოჰყავს ისეთი მცდარი მტკიცებები, როგორიცაა „ძლიერი ქიმიური საყოფაცხოვრებო ხსნარების და სამედიცინო (ეთილის) სპირტის დალევა კურნავს კორონავირუსს“, რა თქმა უნდა, ეს მტკიცება არასწორია და საზიანოა ჯანმრთელობისთვის. Belgium’s Poison Control Centre-ზე დაყრდნობით, ამ პერიოდში, ქიმიურ საყოფაცხოვრებო ხსნარებთან დაკავშირებული ინციდენტები 15%-ით გაიზარდა. კონსპირაციის ერთ-ერთი თეორიის მტკიცებით: კორონავირუსი „არის ინფექცია, რომელიც მსოფლიო ელიტების მიერ მოსახლეობის ზრდის შესამცირებლად გავრცელდა“. სამეცნიერო მტკიცებულება კი ცხადყოფს, რომ კოვიდ 19 მიეკუთვნება ცხოველური წარმოშობის ვირუსების ოჯახს, რომელიც მოიცავს SARS და MERS ვირუსებსაც. მტკიცება, რომ თითქოს „5G ინსტალაციები ავრცელებს ვირუსს“ შორსაა მეცნიერული დასაბუთებებისგან და ანძებზე თავდასხმისთვის გამოიყენეს. ევროკავშირი გააგრძელებს დეზინფორმაციასთან ბრძოლას, ხელს შეუწყობს მოქალაქეების გაძლიერებას, ცნობიერების ამაღლებას და სოციეტალური მედეგობის ზრდას. ევროკომისია მხარს დაუჭერს მედია-წიგნიერების პროექტებს, კრიტიკული აზროვნების, ციფრული უნარების განვითარების შესაძლებლობების გაზრდას. კომისია ასევე, ყურადღებას გაამახვილებს ისეთ ჯგუფებზე (ბავშვები, ახალგაზრდები), რომლებიც უფრო მოწყვლადები არიან ცრუ, შეცდომაში შემყვანი ინფორმაციების მიმართ. სრულად... წყარო: ec.europa.eu

თბილისი. კოალიცია „მედიის ადვოკატირებისათვის” რადიომაუწყებლების საჭიროებების თაობაზე განცხადებას ავრცელებს. „კოალიციის წევრი ორგანიზაციები, გავეცანით კომუნიკაციების კომისიის (შემდგომში „კომისია“) მიერ შემუშავებულ სტრატეგიის პროექტს - კერძო საეთერო რადიომაუწყებლობის ლიცენზიების მოსაპოვებლად კონკურსების გამოცხადების თაობაზე. ჩვენი მოთხოვნაა შეიქმნას სახელმწიფო კომისია საქართველოს ეკონომიკის და მდგრადი განვითარების სამინისტროს, საქართველოს რეგიონული განვითარებისა და ინფრასტრუქტურის სამინისტროს, საქართველოს იუსტიციის სამინისტროს, საქართველოს პრემიერმინისტრის ადმინისტრაციის, საანძო ინფრასტრუქტურის, საერთაშორისო (მათ შორის, ITU ) ექსპერტების და დარგის სხვა სპეციალისტების ჩართულობით. ჩვენ მზაობას გამოვთქვამთ კვლავაც მივიღოთ მონაწილეობა ამგვარი უწყებათაშორისი კომისიის მუშაობაში. გვჯერა, ამგვარი დაგეგმარებით შესაძლებელი იქნება ვიზრუნოთ რადიო სექტორის გადარჩენაზე და შევუქმნათ მათ სათანადო პირობები განვითარებისათვის. ამავე დროს, კოალიცია აუცილებლობად მიიჩნევს კონსულტაციებისათვის პროცესში ჩაერთოს ჩვენი საიმედო პარტნიორი - ევროკავშირის სადამკვირვებლო მისია“, ნათქვამია განცხადებაში. სრულად... წყარო: gyla.ge

თბილისი. „საქართველოს ჟურნალისტური ეთიკის ქარტიის” საბჭომ, პარტნიორობა ადამიანის უფლებებისთვის (PHR) განცხადება განიხალა, რომელიც, 24 მაისს, ტელეკომპანია „მთავარი“-ს ეთერში გასული გადაცემის „მთავარი აქცენტები“ წამყვანის, ნიკა გვარამიას მონოლოგის შინაარსს ეხებოდა. „საქართველოს ჟურნალისტური ეთიკის ქარტიის საბჭოს მიერ, 8 ივნისს მიღებული გადაწყვეტილებით, დასტურდება, რომ ნიკა გვარამიამ ჟურნალისტური ეთიკის ქარტიის პირველი პრინციპი დაარღვია და მაყურებელს ზემოაღნიშნული არაზუსტი ინფორმაცია მიაწოდა“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. საქართველოს ჟურნალისტური ეთიკის ქარტიის სამდივნომ დასაშვებად ცნო გამომძიებელ ჟურნალისტთა გაერთიანება „აი ფაქტის” განცხადება ტელეკომპანია „მთავარის” ჟურნალისტის გიგლა თუმანიშვილის წინააღმდეგ. „სადავო სიუჟეტი 2020 წლის 28 მაისს 9 საათიან გამოშვებაში გავიდა და მეუფე ანტონის საკუთრებაში არსებულ ქონებას ეხება. განმცხადებელი თვლის, რომ სადავო მასალაში დაირღვა ქარტიის პირველი (ინფორმაციის სიზუსტე), მესამე (წყაროს დადასტურების) და მეთერთმეტე (ფაქტის განზრახ დამახინჯება და პლაგიატი) პრინციპი“, ნათქვამია ქარტიის ვებგვერდზე. სრულად... წყარო: www.qartia.ge

თბილისი. აჭარაში მოქმედი საზოგადოებრივი ორგანიზაციები აჭარის მთავრობის თავმჯდომარეს თორნიკე რიჟვაძეს მოუწოდებენ „პატივი სცეს რეგიონში მცხოვრები თითოეული მოქალაქის უფლებას, ღირსებას, იხელმძღვანელოს საყოველთაოდ აღიარებული ეთიკური პრინციპებით“. „თორნიკე რიჟვაძის განცხადება, რომლითაც მან აჭარის საზოგადოებრივი მაუწყებლის დირექტორის გადადგომის მოთხოვნით ალექსანდრე მილორავას რამდენიმედღიანი შიმშილობის აქცია შეაფასა არ შეესაბამება მისი, როგორც სახელმწიფო-პოლიტიკური თანამდებობის პირის სტატუსს და ეთიკის ნორმებს“. სრულად... წყარო: ორგანიზაციის გვერდი სოციალურ ქსელში

თბილისი. კოალიცია მედიის ადვოკატირებისთვის მიიჩნევს, რომ აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია. „დღეისათვის აჭარის მაუწყებლის წინ შიმშილობის აქციის მეშვიდე დღეა, ასევე დევნისა და შევიწროების მსხვერპლი გახდა ახალი ამბების სამსახურის უფროსი შორენა ღლონტი, რომელიც დღეს სამსახურიდან გაათავისუფლეს კიდეც. ამ და სხვა მოვლენებზე პასუხისმგებლობა აჭარის მაუწყებლის ხელმძღვანელ ორგანოებს - დირექტორსა და მრჩეველთა საბჭოს ეკისრება“. სრულად... წყარო: gyla.ge