თბილისი. გაერთიანებული ერების ორგანიზაცია (UN Georgia) შეშფოთებულია საქართველოს მთავრობის გადაწყვეტილებით სახელმწიფო ინსპექტორის სამსახურის გაუქმების შესახებ. „2022 წლის 13 იანვარს პრეზიდენტმა ხელი მოაწერა ახალ კანონს, რომლითაც უქმდება სახელმწიფო ინსპექტორის სამსახური და იქმნება ორი ცალკეული ინსტიტუტი: სპეციალური საგამოძიებო სამსახური და პერსონალურ მონაცემთა დაცვის სამსახური. განსაკუთრებით შეშფოთებულნი ვართ, რომ გადაწყვეტილება საქართველოში ერთ-ერთი ყველაზე სანდო, დამოუკიდებელი და ავტორიტეტული ინსტიტუტის, რომელიც უფლებამოსილია გამოიძიოს სამართალდამცავი ორგანოების მიერ ჩადენილი ადამიანის უფლებათა სავარაუდო დარღვევები და უზრუნველყოს პერსონალური მონაცემების დაცვის ზედამხედველობა, მიღებულ იქნა დაჩქარებული წესით და ინკლუზიური და გამჭვირვალე დისკუსიების გამართვის გარეშე. სახელმწიფო ინსპექტორის სამსახურის გაუქმების შესაბამისი საფუძვლისა და სახელმწიფო ინსპექტორისთვის ექვსწლიანი მანდატის ჩამორთმევის აუცილებლობის დამაჯერებელი დასაბუთების არარსებობა შემაშინებელი გზავნილია ადამიანის უფლებათა დამცველ დამოუკიდებელ ინსტიტუტების მიმართ. მოვუწოდებთ ხელისუფლებას, გამოითხოვოს შესაბამისი საერთაშორისო ინსტიტუტების მოსაზრება ამ გადაწყვეტილებების საერთაშორისო სტანდარტებთან თანხვედრის შესახებ“, ნათქვამია განცხადებაში. სრულად... წყარო: georgia.un.org

თბილისი. კოალიცია მოუწოდებს საქართველოს პრეზიდენტს, გამოიყენოს კონსტიტუციით მინიჭებული უფლებამოსილება, ვეტო დაადოს „საერთო სასამართლოების შესახებ“ საქართველოს ორგანულ კანონში 2021 წლის 30 დეკემბერს შეტანილ ცვლილებებს და მოტივირებული შენიშვნებით დაუბრუნოს კანონპროექტი პარლამენტს. სრულად... წყარო: rights.ge

თბილისი. საერთაშორისო გამჭვირვალობა - საქართველო ეხმაურება 12 იანვარს, თბილისის საქალაქო სასამართლოს მიერ მამუკა ხაზარაძის, ბადრი ჯაფარიძისა და ავთანდილ წერეთლის სისხლის სამართლის საქმეზე გამოტანილ განაჩენს. „სასამართლომ დაადგინა, რომ არ არსებობდა ფულის გათეთრების დანაშაულის ნიშნები და ქმედება თაღლითობად გადააკვალიფიცირა. დღეს, ქართული საზოგადოება კიდევ ერთხელ გახდა პოლიტიკური მართლმსაჯულების განხორციელების მომსწრე. მიუხედავად იმისა, რომ შედეგად პოლიტიკური გაერთიანება „ლელოს” ლიდერებისა და კრიტიკული მედია არხის „ტვ პირველის” დამფუძვნებლის ოჯახის წევრის თავისუფლების აღკვეთა არ დადგა, სასამართლოს გადაწყვეტილებაში იკვეთებოდა პოლიტიკური მოტივი და მათ მიადგათ სერიოზული რეპუტაციული ზიანი. მხარეთა მიერ განაჩენის გასაჩივრების შემთხვევაში, „საერთაშორისო გამჭვირვალობა - საქართველო” გააგრძელებს ამ საქმის მონიტორინგს ზემდგომი ინსტანციის სასამართლოებში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიული ინიციატივას (GDI) ინფორმაციით, საკონსტიტუციო სასამართლომ ორგანიზაციას მიაწოდა ინფორმაცია, რომლითაც ირკვევა, რომ „სასამართლოს თავმჯდომარე, მერაბ ტურავა, „აიისას“ საქმესთან დაკავშირებით მოსამართლე მანანა კობახიძის შესახებ ე.წ. სუსის კრებსებიდან გავრცელებულ ინფორმაციას არ მიიჩნევს სარწმუნოდ/ავთენტურად, შესაბამისად უარს ამბობს მის წინააღმდეგ დისციპლინური წარმოების დაწყებაზე. მაშინ, როდესაც, სასულიერო პირი მოსამართლესთან კომუნიკაციის ფაქტს საჯაროდ ადასტურებს, ხოლო, ამავე ინფორმაციის თანახმად, მანანა კობახიძე გენერალური პროკურატურისგან აღნიშნული ფაქტის შესახებ სრულყოფილი გამოძიების ჩატარებას ითხოვს. საქართველოს საკონსტიტუციო სასამართლოს ფორმალისტური პასუხი დაყენებულ შუამდგომლობაზე აჩენს ლეგიტიმურ კითხვებს სასამართლოს ინსტიტუციური დამოუკიდებლობისა და ანგარიშვალდებულების თაობაზე. ხოლო ამავე პერიოდში მანანა კობახიძის არჩევა მეორე კოლეგიის თავმჯდომარედ, დამატებით მიუთითებს იმაზე, რომ სასამართლო არაა მოწოდებული, დაიცვას საკუთარი ავტორიტეტი, შეინარჩუნოს საზოგადოებაში ნდობა და მიიღოს მსგავსი გადაწყვეტილებები კონსტიტუციური და საერთაშორისო სტანდარტების გათვალისწინებით“, ნათქვამია ორგანიზაციის განცხადებაში. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ ლექსო ლაშქარავას საქმეზე ექსპერტიზის პროცესში საერთაშორისო ექსპერტების ჩაურთველობა, ასევე, არაპროპორციული მოცულობით ექსპერტიზის დასკვნის გავრცელება, ამცირებს გამოძიების პროცესის მიმართ ნდობას. „საია ლექსო ლაშქარავას ოჯახთან შეთანხმებით, გააგრძელებს მიმდინარე გამოძიებების პროცესში ოჯახის უფლებების დაცვას. ორგანიზაციის ადვოკატი მიმართავს საგამოძიებო უწყებას ექსპერტიზის დასკვნის გადმოცემის თაობაზე, ხოლო დამატებით ინფორმაციას საზოგადოებას სწორედ აღნიშნული დოკუმენტის სრულყოფილად გაცნობის შედეგად გავაცნობთ“, ნათქვამია ორგანიზაციის განცხადებაში. სრულად... წყარო: gyla.ge

თბილიში. ამერიკის საელჩო საქართველოში განცხადებას ავრცელებს. „გასულ კვირას მმართველმა პარტიამ ძირი გამოუთხარა მთავრობის ანგარიშვალდებულებას, სახელმწიფო ინსპექტორის სამსახურის გაუქმებით, რომლის მოვალეობა პოლიციის მხრიდან ძალადობის გამოძიება და მონაცემთა კონფიდენციალურობის დაცვაა; ზიანი მიაყენა ცალკეული მოსამართლის დამოუკიდებლობას საერთო სასამართლოების შესახებ კანონში ცვლილებების განხორციელებით და შეასუსტა ნდობა სასამართლოს მიმართ უზენაესი სასამართლოს კიდევ ერთი მოსამართლის დანიშვნით, რაც შერჩევის ხარვეზიანი პროცესით განხორციელდა. საზოგადოებას არ მიეწოდა სარწმუნო არგუმენტები, თუ რატომ გახდა საჭირო ამ ცვლილებების ნაჩქარევად მიღება, სათანადო კონსულტაციების გარეშე. ნაბიჯები, რომლებიც ასუსტებს დემოკრატიულ ინსტიტუტებს, როგორიცაა სასამართლო ან დამოუკიდებელი საზედამხედველო უწყებები, აზიანებს საქართველოს მისწრაფებებს ნატოსა და ევროკავშირში გაწევრიანებისკენ და ძირს უთხრის ძირითად თავისუფლებებს, რაც ქართული კულტურისა და საზოგადოების საძირკველს წარმოადგენს“, ნათქვამია განცხადებაში. სრულად... წყარო: საელჩოს გვერდი სოციალურ ქსელში

თბილისი. ომბუდსმენი შეშფოთებას გამოთქვამს, რომ საქართველოს პარლამენტი დაჩქარებულად, სამოქალაქო საზოგადოებასთან ყოველგვარი წინასწარი კონსულტაციისა და საკმარისი დისკუსიის გარეშე განიხილავს სასამართლო სისტემასთან დაკავშირებულ ცვლილებებს. „დაუშვებელია, მხოლოდ 2-3 დღე ეთმობოდეს მსგავს საკითხებზე მსჯელობას, კომიტეტის სხდომა ინიშნებოდეს კანონპროექტის გამოქვეყნების გარეშე და დაინტერსებულ პირებს წართმეული ჰქონდეთ განხილვაში ინფორმირებული მონაწილეობის შესაძლებლობა. მოვუწოდებთ საქართველოს პარლამენტს, არ დაუჭიროს მხარი წარმოდგენილ ცვლილებებს, რადგან ის მკვეთრად აუარესებს საქართველოში მართლმსაჯულების სისტემისა და სამართლიანი სასამართლოს უფლების მდგომარეობას. კანონპროექტის მიღების შემთხვევაში, მოვუწოდებთ საქართველოს პრეზიდენტს, გამოიყენოს მის ხელთ არსებული შესაძლებლობა და კანონპროექტი მოტივირებული შენიშვნებით დაუბრუნოს პარლამენტს“. სრულად... წყარო: ombudsman.ge

თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, საქართველოს საკონსტიტუციო სასამართლომ წარმოებაში მიიღო რელიგიური ორგანიზაციების კიდევ ერთი სარჩელი, რომელიც რელიგიური ნაგებობების პრივატიზებას ეხება. „მოსარჩელე შვიდი რელიგიური ორგანიზაციაა. ისინი კონსტიტუციური სარჩელით ითხოვენ „სახელმწიფო ქონების შესახებ” საქართველოს კანონში არსებული ჩანაწერის იმ ნორმატიული შინაარსის არაკონსტიტუციურად ცნობას, რომელიც რელიგიურ ორგანიზაციებს უკრძალავს, სახელმწიფოსგან საკუთრებაში მიიღონ რელიგიური და საკულტო ნაგებობები როგორც სასყიდლით, ისე უსასყიდლოდ“. სრულად... წყარო: tdi.ge

თბილისი. სოციალური სამართლიანობის ცენტრი აქვეყნებს შეფასებას: უსაფრთხოების სექტორი, სამართალდამცავი სისტემა და რეპრესიული სისხლისამართლებრივი პოლიტიკა -2021. „მიმდინარე წელს არსებითაც შეჩერებული იყო სამართალდამცავი სისტემის, პროკურატურის და პოლიციის ინსტიტუციური რეფორმები. კვლავაც გამოწვევას წარმოადგენს აღნიშნული უწყებების ჩაკეტილობა და თანამშრომლობის დეფიციტი სამოქალაქო ორგანიზაციებთან. უმწვავეს პრობლემად რჩება პროკურატურის და პოლიციის პოლიტიკური მიზნებით ინსტრუმენტალიზება და ამ ორგანოების გამოყენება საზოგადოებრივი თუ პოლიტიკური პროტესტების ჩასახშობად“, ნათქვამია დოკუმენტში. სრულად... წყარო: socialjustice.org.ge

თბილისი. სოციალური სამართლიანობის ცენტრის შეფასებით, მართლმსაჯულების რეფორმების 4 ტალღის მიუხედავად, ქართული სასამართლო სისტემა კვლავაც ვერ არის მედეგი შიდა, თუ გარე გავლენების მიმართ. „დღეს სასამართლო სისტემა იმართება არა მართლმსაჯულების, არამედ ვიწრო-პარტიული და შიდა-კორპორატივისტული ინტერესებით“. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ანალიტიკურ დოკუმენტს: 19 აპრილის შეთანხმება - მართლმსაჯულების რეფორმის მორიგი გამოუყენებელი შესაძლებლობა. „დოკუმენტი აფასებს 19 აპრილის შეთანხმების იმ პუნქტების შესრულების მდგომარეობას, რომლებიც სასამართლოსა და პროკურატურის რეფორმას ეხებოდა“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის ანალიტიკოსის თამარ ხუხიას ბლოგპოსტს „ქართული მართლმსაჯულების რეფორმა - გაშვებული შესაძლებლობა“. „ამ ვითარებაში, როცა სასამართლო სისტემაში კლანს ძალაუფლება მონოპოლიზებული აქვს, მნიშვნელოვანია მართლმსაჯულების სფეროს ძირეული გარდაქმნა, სისტემური, თუნდაც მტკივნეული რეფორმა და არა - ის ფრაგმენტული კვაზიცვლილებები, რომლებსაც, ბოლო წლებია, თვალს ვადევნებთ. სხვა შემთხვევაში დამსახურებული კრიტიკა კიდევ უფრო მწვავე იქნება, შედეგები კი - შეუქცევადი“. სრულად... წყარო: gyla.ge

თბილისი. სოციალური სამართლიანობის ცენტრი წარმოგიდგენთ ანალიტიკურ დოკუმენტს: „სასამართლო ხელისუფლების ინსტიტუციური მოწყობის „ევროპული მოდელი“: ხსნა თუ დაბრკოლება წარმატებული სასამართლო რეფორმის გზაზე“. „„ევროპული მოდელი“ ეს არის სასამართლოს იმგვარი მოწყობა, რომელიც განსაკუთრებულ მნიშვნელობას ანიჭებს პოლიტიკური ხელისუფლებისაგან სასამართლოს ფორმალურ დამოუკიდებლობას. დამოუკიდებლობის მიღწევის საუკეთესო გზად კი ძლიერი მოსამართლეთა თვითმმართველობის ორგანოს - იუსტიციის უმაღლესი საბჭოების არსებობა მოიაზრება.  მოცემულ დოკუმენტში კრიტიკულადაა გაანალიზებული სასამართლო ხელისუფლების მოწყობის სწორედ ამ მოდელის წარმოშობის ისტორიული, პოლიტიკური და სამართლებრივი წინაპირობები, ნორმატიული ჩარჩო და პრაქტიკაში დანერგვის შედეგები“. სრულად... წყარო: socialjustice.org.ge

თბილისი. ორგანიზაცია „დემოკრატიის ინდექსი“ გიზიარებთ კვლევას: „საქართველოს სასამართლო გადაწყვეტილებების დასაბუთების ხარისხი“. „კვლევა მიზნად ისახავს საქართველოს საერთო სასამართლოების მიერ მიღებული გადაწყვეტილებების დასაბუთებულობის ხარისხის შემოწმების გზით პრობლემების გამოვლენას და რეკომენდაციების გაცემას“. კვლევა... პროექტი მხარდაჭერილია: USAID-PROLoG - Promoting Rule of Law in Georgia Activity -ის მიერ. წყარო: democracyindex.ge

თბილისი. საერთაშორისო გამჭვირვალობა - საქართველო ნიკა გვარამიას საქმის მასალების შესწავლის შედეგად, ასევე, საქართველოს კანონმდებლობის, სასამართლო პრაქტიკის, იურიდიული დოქტრინისა და საქმეში არსებული ფაქტების მხედველობაში მიღებით, ასკვნის, რომ არ დასტურდება ნიკა გვარამიას მიერ ქონებრივი უფლების გაფლანგვის, კომერციული მოსყიდვის, ყალბი ოფიციალური დოკუმენტის დამზადებისა და გამოყენების ფაქტი. „გარდა ამისა, ნიკა გვარამიას მიმართ წარდგენილი უკანონო შემოსავლის ლეგალიზაციის ბრალდება ვერ პასუხობს სისხლის სამართლის კოდექსის გათვალისწინებული ფულის გათეთრების დანაშაულის ნიშნებსა და მის კონვენციურ შინაარსს. იმედს ვიტოვებთ, რომ სასამართლო კანონიერ და დასაბუთებულ გადაწყვეტილებას მიიღებს“, ნათქვამია განცხადებაში. სრულად... წყარო: transparency.ge ფოტო: მთავარი არხი

თბილისი. საია ადმინისტრაციული სამართალდარღვევის შესახებ ინფორმაციის შენახვის ვადებს საკონსტიტუციო სასამართლოში კიდევ ერთხელ ასაჩივრებს. საიამ საქართველოს საკონსტიტუციო სასამართლოში მორიგი სარჩელი შეიტანა. გასაჩივრებული ნორმები შინაგან საქმეთა სამინისტროს აძლევს შესაძლებლობას, ადმინისტრაციული სამართალდამრღვევი პირის შესახებ პერსონალური ინფორმაცია შეინახოს 20 ან 28 წლის ვადით. საია მიიჩნევს, რომ შინაგან საქმეთა სამინისტროს მიერ სამართალდამრღვევი პირის შესახებ პერსონალურ მონაცემთა შენახვის ვადები არ შეესაბამება საქართველოს საკონსტიტუციოს 2017 წლის 9 თებერვლის N1/2/622 გადაწყვეტილებაში დადგენილ სტანდარტებს. სრულად...  წყარო: ორგანიზაციის ვებგვერდი

თბილისი. საფარის საქმის თანახმად, პოლიციელებმა სამსახურეობრივი გულგრილობა გამოიჩინეს და არ მოარიდეს მსხვერპლს მოძალადე, რასაც მძიმე შედეგები მოჰყვა. „ხშირად ხდება, რომ შსს-სა და საპატრულო პოლიციის უმოქმედობის შედეგად ხდება ფემიციდის შემთხვევები ან მსხვერპლის სიცოცხლეს საფრთხე ემუქრება. ეს საქმე უნდა იყოს პრევენციული შსს-ს იმ თანამშრომლებისთვის, რომლებიც არ იჩენენ ემპათიას ძალადობის მსხვერპლების მიმართ და მხარდაჭერას უცხადებენ მოძალადე პირებს“. სრულად... წყარო: sapari.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, თბილისის საქალაქო სასამართლომ 2021 წლის 29 ოქტომბერს სრულად დააკმაყოფილა ოჯახში ძალადობის მსხვერპლი ქალის მოთხოვნა და მის ყოფილ მეუღლეს დააკისრა მორალური ზიანის ანაზღაურების ვალდებულება 15 000 ლარის ოდენობით. დაზარალებულის ინტერესებს საგამოძიებო უწყებაში და სასამართლოში საია იცავდა. სრულად... წყარო: gyla.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ გაუმართლებლად და დამაზიანებლად მიიჩნევს პარლამენტის მიერ უზენაესი სასამართლოს 4 მოსამართლის დანიშვნას. „მოსამართლეთა შერჩევა-დანიშვნის წესები არსებითად პრობლემურია, რადგან არასაკმარისად არის დაზღვეული ამ პროცესზე შიდა და გარე გავლენების საფრთხეები. ამავდროულად, საბოლოო გადაწყვეტილებას პარლამენტი იღებს ერთპარტიულად, ფართო პოლიტიკური კონსენსუსის გარეშე. შესაბამისად, ასეთ კონტექსტში უმაღლესი ინსტანციის სასამართლოს 4 მოსამართლით დაკომპლექტება კიდევ უფრო ამცირებს მართლმსაჯულების სისტემისადმი ისედაც დეფიციტურ ნდობას“, ნათქვამია განცხადებაში. სრულად... წყარო: gyla.ge

თბილისი. სოციალური სამართლიანობის ცენტრის, სისხლის სამართლის ადვოკატი, ქეთი ჩუთლაშვილი ვიდეოში აანალიზებს, რა ვერ და არ მუშაობს ჩვენს ქვეყანაში, როცა საუბარი გვაქვს ოჯახში ძალადობაზე, მსხვერპლსა და მოძალადეზე. წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) გადამდგარი ნოტარიუსის თანამდებობაზე დაბრუნების დისკრიმინაციულ წესს საკონსტიტუციო სასამართლოში ასაჩივრებს. „2008 წლის 1 აპრილიდან 2010 წლის 1 აპრილამდე ნოტარიუსის თანამდებობიდან გადამდგარ ნოტარიუსებს გასაჩივრებული ნორმა ათავისუფლებს პროფესიული და ზოგადი უნარების გამოცდების ჩაბარების ვალდებულებისაგან, ხოლო იმ ნოტარიუსებს, რომლებმაც თანამდებობა დატოვეს 2010 წლის 1 აპრილის შემდეგ, ეკისრებათ ამგვარი გამოცდის ჩაბარების ვალდებულება. ამგვარ განსხვავებულ მოპყრობას არავითარი კონსტიტუციურ-სამართლებრივი გამართლება არ გააჩნია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „უფლებები საქართველოს“ ინფორმაციით, ორგანიზაციის იურისტის დახმარებით, სოციალურად დაუცველმა მარტოხელა დედამ შპს „აკადემიკოს ნიკოლოზ ყიფშიძის სახელობის ცენტრალურ საუნივერსიტეტო კლინიკას“ სასამართლოში დავა მოუგო. „სამედიცინო მომსახურების გაწევისას, კლინიკამ თავდაპირველად განუმარტა პაციენტს, რომ მომსახურება, რომელიც მას სჭირდებოდა, ფინანსდებოდა საყოველთაო ჯანდაცვის პროგრამით. შემდეგ კი, მაინც მოსთხოვა ქალს მომსახურების საფასურის გადახდა (200 ლარის ოდენობით)“. სრულად... წყარო: ორგანიზაციის გვერდი სოციალურ ქსელში