თბილისი. „უფლებები საქართველოს“ ინფორმაციით, ორგანიზაციის იურისტის, არჩილ ჩოფიკაშვილის დახმარებით, თბილისის სააპელაციო სასამართლომ პროკურატურას, უკანონოდ მსჯავრდებულის - არჩილ კობიაშვილის სასარგებლოდ, 104 ათასი ლარის ოდენობის კომპენსაციის გადახდა დააკისრა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) სარჩელით მიმართა საკონსტიტუციო სასამართლოს. გასაჩივრებული ნორმები ეხება თანამდებობის პირის უფლებას, გაასაიდუმლოოს მისი ქონებრივი მდგომარეობის დეკლარაცია.   „2019 წლის 23 დეკემბერს შალვა თადუმაძემ საჯარო სამსახურის ბიუროს წინააღმდეგ სარჩელით მიმართა თბილისის საქალაქო სასამართლოს და მოითხოვა იმ განკარგულების გასაიდუმლოება, რომლითაც ის ქონებრივი მდგომარეობის დეკლარაციის შევსების წესის დამრღვევად იყო ცნობილი. შალვა თადუმაძე აცხადებდა, რომ თუ საჯარო სამსახურის ბიურო გამოაქვეყნებდა მის დეკლარაციას, მასში ასახული შეცდომები მიაყენებდა მის რეპუტაციას ზიანს, კერძოდ, შალვა თადუმაძის მიმართ ჩამოყალიბდებოდა არასწორი საზოგადოებრივი აზრი“. სრულად... წყარო: gyla.ge

იმერეთი. 14 ივნისს, ევროკავშირისა და ASB საქართველოს მხარდაჭერით, „უფლებები საქართველომ“ ჭიათურაში უფასო სამართლებრივი დახმარების ცენტრი გახსნა, რომელიც ადგილობრივ მოსახლეობას გენდერული და ოჯახში ძალადობის საქმეებზე უფასოდ მოემსახურება. სრულად... წყარო: rights.ge

თბილისი. საქართველოს ახალგაზრდა იურისტთა ასოციაცია (საია) პარტნიორ ორგანიზაციასთან, ადამიანის უფლებათა დაცვის ევროპულ ცენტრთან ერთად, საოკუპაციო ხაზთან მდებარე სოფელ დვანში მცხოვრები 19 მოქალაქის სახელით ადამიანის უფლებათა ევროპულ სასამართლოში რუსეთის ფედერაციის წინააღმდეგ დავას აგრძელებს. „საქმე შეეხება 2013 წლის სექტემბერ-ოქტომბერში სოფელ დვანში რუსეთის ფედერაციის კონტროლირებადი „მესაზღვრეების“ მიერ, ე.წ საზღვრის მონიშვნის მიზნით, მავთულხლართების გავლებას, რამაც საოკუპაციო ხაზი რამდენიმე ასეული მეტრით გადმოწია. აღნიშნულის შედეგად დვანში მცხოვრები 50-მდე ოჯახის სასოფლო-სამეურნეო მიწები ოკუპანტი ძალის კონტროლირებად ტერიტორიაზე მოექცა. ამ საქმესთან კავშირში, უკიდურესად შემაშფოთებელია, რომ დღეის მდგომარეობით, რუსეთის ფედერაცია კვლავაც აგრძელებს მავთულხლართების გავლებას საქართველოს ტერიტორიაზე, რაც ზრდის დაზარალებულ მოქალაქეთა რიცხვს, არღვევს საერთაშორისო სამართლის ფუნდამენტურ ნორმებს და იწვევს ადამიანის  უფლებათა განგრძობად დარღვევებს“. სრულად...  წყარო: gyla.ge

თბილისი. „უფლებები საქართველოს“ დახმარებით, ირანის მოქალაქემ თბილისის საქალაქო სასამართლოში დავა მოიგო. სასამართლოში ბენეფიციარის ინტერესებს იცავდა „უფლებები საქართველოს“ იურისტი მარიამ მაღრაძე IOM-ის პროექტის - „COVID-19“ და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას: +995 577 28 22 77 სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, 10 ივნისს, პირველი ინსტანციის სასამართლომ საქმეზე გამოაცხადა გადაწყვეტილება, რომლის მიხედვითაც სასამართლომ ეკა კვესიტაძის სამსახურიდან გათავისუფლება მიიჩნია კანონიერად და სამაუწყებლო კომპანიას დააკისრა მხოლოდ ნამუშევარი პერიოდის სახელფასო ანაზღაურების გადახდა. მოსარჩელეს კი სამაუწყებლო კომპანიის სასარგებლოდ დაეკისრა 25 000 ლარის გადახდა შრომითი ხელშეკრულების პირობების დარღვევის გამო, რაც გულისხმობდა ჟურნალისტის ახლადშექმნილ სამაუწყებლო კომპანიაში („მთავარი არხი“) მუშაობის გაგრძელებას. საიას პოზიციით, ორგანიზაციისთვის სრულიად მიუღებელია სასამართლოს მიერ გადაწყვეტილების გამოცხადებისას გაჟღერებული პოზიციები. მას შემდეგ, რაც მხარეს ჩაბარდება დასაბუთებული გადაწყვეტილება, მოსარჩელე მას გაასაჩივრებს სააპელაციო წესით. სრულად...  წყარო: gyla.ge

თბილისი. საქართველოს ახალგაზრდა იურისტთა ასოციაცია გაეცნო ე.წ რუსთავი 2-ის საქმეზე ნიკა გვარამიას, კახაბერ დამენიას და ზურა იაშვილის მიმართ გამოტანილ განაჩენს. მოცემულ საქმეზე საია ახორციელებდა სასამართლო სხდომების მონიტორინგს.  საიას შეფასებით, სასამართლოში საქმის განხილვის სხვადასხვა ეტაპზე არსებულ კითხვებს, რაც ბრალდებულთა მიმართ ბრალის წარდგენის, სასამართლო განხილვის, გამამტყუნებელი განაჩენის გამოტანის სტანდარტებთან და მოსამართლის დამოუკიდებლობასა და მიუკერძოებლობასთან მიმართებით არსებობდა, სასამართლო არც განაჩენში პასუხობს, რის გამოც ორგანიზაციას მიაჩნია, რომ განაჩენი დაუსაბუთებელია - „ამასთანავე, სასამართლო სხდომის დარბაზში გამოკვლეული არაერთი მტკიცებულება გვაძლევს იმის თქმის საფუძველს, რომ ქმედებაში არ იყო დანაშაულის ნიშნები“. სრულად...  წყარო: www.gyla.ge

თბილისი. კავშირი „საფარი“ გიზიარებთ ინფორმაციას: როგორ უნდა მოვიქცეთ თუ ბავშვი მასზე განხორციელებული ძალადობის შესახებ მოგვიყვება. პირველ რიგში, ბავშვს უნდა დავუჯეროთ, შევინარჩუნოთ სიმშვიდე და იურისტთან ერთად დავუკავშირდეთ სამართალდამცავებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის წარმოებაში არსებულ საქმეზე საქართველოს უზენაესმა სასამართლომ სახელმწიფოს ზიანის ანაზღაურება დააკისრა. „კერძოდ, სამივე ინსტანციის სასამართლომ დაადგინა, რომ სახელმწიფო ორგანოები ვალდებული არიან ოჯახში ძალადობის მსხვერპლი ქალის დედას, რომლის თვითმკვლელობამდე მიყვანაც სახელმწიფომ თავიდან ვერ აიცილა, აუნაზღაუროს მორალური ზიანი. უზენაესი სასამართლოს გადაწყვეტილება უკიდურესად მნიშვნელოვანია, ვინაიდან, როგორც ფემიციდის სხვა ფორმების (როგორიც არის განზრახ მკვლელობა) შემთხვევაში, თვითმკვლელობამდე მიყვანის დროსაც სახელმწიფო ორგანოებს უნდა ეკისრებოდეთ ზიანის ანაზღაურების ვალდებულება, როცა მათ იცოდნენ ან უნდა სცოდნოდათ მსხვერპლის სიცოცხლისა და ჯანმრთელობის რისკი და არ დაიცვეს იგი მათ ხელთ არსებული საშუალებებით. საქმე არის საქართველოსთვის პრეცედენტული, როდესაც აღნიშნულ საკითხს სასამართლო თვითმკვლელობამდე მიყვანის თავიდან აცილების კონტექსტში მიმოიხილავს (წარსულში საიამ მსგავსი საქმეები განზრახ მკვლელობის, როგორც ფემიციდის ფორმის, შესახებ აწარმოა)“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, თბილისის საქალაქო სასამართლომ დააკმაყოფილა მოქალაქის სარჩელი, რომელის ინტერესებსაც ISFED იცავდა და ბათილად ცნო მისი გათავისუფლების შესახებ ბრძანება, ხოლო ა(ა)იპ „თბილისის საბავშვო ბაგა-ბაღების მართვის სააგენტო“-ს დააკისრა მოსარჩელის გათავისუფლებიდან სასამართლო გადაწყვეტილების აღსრულებამდე იძულებითი განაცდურის ანაზღაურება, ასევე, სამსახურში აღდგენის სანაცვლოდ კომპენსაციის გადახდა. თუ მიიჩნევთ, რომ სამსახურიდან პოლიტიკური ნიშნით გაგათავისუფლეს, დაურეკეთ ან მისწერეთ ორგანიზაციას: 0 800 100 143; info@isfed.ge სრულად... წყარო: isfed.ge

თბილისი. საქართველოს საკონსტიტუციო სასამართლომ 2022 წლის 20 მაისის განჩინებით არსებითად განსახილველად არ მიიღო საიას სარჩელი - „მაცაცო ტეფნაძე საქართველოს მთავრობის წინააღმდეგ“. „განმარტებიდან გამომდინარე, თითოეული ადმინისტრაციული ორგანო ვალდებულია, საჯარო მოხელის შეფასების მიზნით შექმნილი კომისიის გადაწყვეტილება მიიღოს შესაფასებელი მოხელის საქმიანობის სფეროს მცოდნე ექსპერტის/სპეციალისტის დახმარებით. წინააღმდეგ შემთხვევაში, მიღებული გადაწყვეტილება იქნება კონსტიტუციის საწინააღმდეგო“. ორგანიზაცია არ იზიარებს სასამართლოს არგუმენტს საქმის არსებითად განსახილველად მიუღებლობასთან დაკავშირებით. სრულად... წყარო: gyla.ge

თბილისი. „კოალიცია თანასწორობისთვის“ თბილისში ტრანსგენდერ ქალებზე ჯგუფური თავდასხმის ფაქტს ეხმაურება. ღამის საათებში ტრანსგენდერ ქალს სამი პიროვნება დაესხა თავს. ქალმა მოახერხა სახლში დაბრუნება. რამდენიმე წუთში კი საცხოვრებელთან 20-მდე ადამიანი შეიკრიბა, რომლებმაც ქვები და სხვადასხვა საგნები დაუშინეს სახლს, ტრანსგენდერ ქალებს და ბინის მეპატრონეს კი სიცოცხლის მოსპობით ემუქრებოდნენ. კოალიციის ინფორმაციით, შემთხვევის ადგილზე მისულმა პოლიციამ თავდამსხმელები შემთხვევის ადგილიდან განარიდა, თუმცა არ დაუკავებია. ასევე, მყისიერად არ მომხდარა საგამოძიებო მოქმედებების (გამოკითხვა, შემთხვევის ადგილის დათვალიერება და სხვა) ჩატარება. საგამოძიებო მოქმედებები მხოლოდ მედიის მიერ საქმის გაშუქებისა და უფლებადამცველების ჩართვის შემდეგ დაიგეგმა და ამ დრომდე გრძელდება. კოალიცია თანასწორობისთვის მოუწოდებს, საქართველოს შინაგან საქმეთა სამინისტროს და გენერალურ პროკურატურას: ეფექტურად გამოიძიოს ტრანსგენდერ ქალებზე თავდასხმის ფაქტი... უზრუნველყოს მსხვერპლი ქალების უსაფრთხოება და დაიცვას პოტენციური ძალადობისგან. გააძლიეროს სიძულვილით მოტივირებული დანაშაულების წინააღმდეგ ბრძოლის პოლიტიკა ამგვარი დანაშაულის ეფექტიანი და სისტემური პრევენციის მიმართულებით. სრულად... წყარო: www.equalitycoalition.ge

თბილისი. საქართველოს ახალგაზრდა იურისტთა ასოციაცია (საია) იცავდა საპროტესტო აქციის მონაწილის უფლებებს, რომელიც შინაგან საქმეთა სამინისტროს თანამშრომლებმა 2022 წლის 7 მარტს, უკრიანის მხარდამჭერ აქციაზე დააკავეს. აქციის დატოვების შემდეგ, სახლისკენ მიმავალ გზაზე ის მოულოდნელად დააკავეს... პოლიცია მას ედავებოდა წვრილმან ხულიგნობასა და პოლიციელის კანონიერი მოთხოვნისადმი დაუმორჩილებლობას. თბილისის საქალაქო სასამართლომ ხულიგნობის ნაწილში საქმე შეწყვიტა, ხოლო პოლიციელის მოთხოვნისადმი დაუმორჩილებლობის ნაწილში შენიშვნა გამოიყენა. სრულად... წყარო: gyla.ge

თბილისი. „უფლებები საქართველოს“ ინფორმაციით, ორგანიზაცია გუშინ, დიდუბეში, ავტობუსის გაჩერებაზე დაჭრილი ქალის უფლებებს დაიცავს. „39 წლის ქალი მისმა ყოფილმა მეუღლემ დაჭრა. გავრცელებული ინფორმაციით, მამაკაცს უკვე ჰქონდა გამოწერილი შემაკავებელი ორდერი. დაჭრილი ქალი კლინიკაშია მოთავსებული“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი მიიჩნევს, რომ აშკარაა დაუსჯელობისა და ხელისუფლების ლოიალობის ნიშნები ალტ-ინფოსა და კონსერვატიული მოძრაობის ლიდერების მიმართ. „აშკარაა, რომ საგამოძიებო ორგანოები, მტკიცებულებების არსებობის მიუხედავად, თითქოს დემონსტრაციულად უარს აცხადებენ ამ ჯგუფის ქმედებები შეაფასონ ძალადობის ორგანიზებისა და შუღლის გაღვივების კონტექსტით, ასევე,  უარს ამბობენ გამოვლენილ ქმედებებში სიძულვილის მოტივის გამოკვეთაზე, რითაც ფაქტობრივად ხელს უწყობენ კონსერვატიული პარტიისა და ალტ-ინფოს ლიდერების, როგორც ძალადობრივი ქმედებების ორგანიზატორების პასუხისმგებლობის დაფარვას და ნაკლებად მკაცრი სისხლისსამართლებრივი პოლიტიკის გამოყენებას. ეს მიდგომა წარმოშობს სიცარიელეს მართლწესრიგის სისტემაში და დაუსჯელობის სინდრომს, რომელიც სოციალური კონფლიქტებისა და დაპირისპირებისთვის ნაყოფიერ ნიადაგს ქმნის“, ნათქვამია განცხადებაში. სრულად... წყარო: socialjustice.org.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: ვინ არის ნიკა გვარამიას საქმის განმხილველი მოსამართლე? „ის 2019 წელს თანამდებობაზე გამწესდა უვადოდ. მოსამართლე ჩხიკვაძე ფიგურირებდა 2015 წლის 22 იანვარს მომხდარ ავტოსაგზაო შემთხვევაში, რომელსაც ერთი ადამიანი ემსხვერპლა. პროკურატურამ მაშინ უარყო ჩხიკვაძის რაიმე ბრალეულობა ნიკა გვარამიას საქმეში მოწმე, ზაზა გველესიანი მოსამართლე ლაშა ჩხიკვაძის ახლო მეგობარი და „რუსთავი 2”-ის მმართველი ჰოლდინგის დირექტორი იყო, მაგრამ მოსამართლემ საქმიდან თავი არ აიცილა. მოსამართლე ჩხიკვაძის სახელს უკავშირდება ნაციონალური მოძრაობის ხელისუფლების მაღალჩინოსნების გიგი უგულავას, ბაჩო ახალაიასა და ირაკლი ოქრუაშვილის სისხლის სამართლის გახმაურებული საქმეები“, ნათქვამია ბლოგპოსტში. სრულად... წყარო: transparency.ge

თბილისი. ადამიანის უფლებათა ცენტრის განცხადებით, ქალის მკვლელობის საქმეზე პროკურატურამ გენდერული მოტივი არ გამოკვეთა. ორგანიზაციის კახეთის ოფისი იცავს დაზარალებულის უფლებამონაცვლის სამართლებრივ ინტერესებს გენდერული ნიშნით ქალის მკვლელობის სისხლის სამართლის საქმეზე.  ადამიანის უფლებათა ცენტრმა გამოძიების დაწყების ეტაპზევე გამოხატა პოზიცია ბრალის ფორმულირებასთან და ქმედების კვალიფიკაციასთან დაკავშირებით, რის თაობაზეც  მიმართა საქმეზე როგორც გამომძიებელს, ასევე კახეთის საოლქო პროკურატურას. ორგანიზაცია შეშფოთებულია, რომ კახეთის საოლქო პროკურატურამ არ დააკმაყოფილა მოთხოვნა ქალის განზრახ მკვლელობის საქმეზე გენდერული ნიშნის გამოკვეთის თაობაზე. ცენტრი მოუწოდებს პროკურატურას და საგამოძიებო ორგანოებს, განსაკუთრებული ყურადღება მიაქციონ კონკრეტულად ამ საქმეში და ასევე ზოგადად, ამგვარი კატეგორიის საქმეების გამოძიებისას გენდერულ ნიშანს, რაც ხელს შეუწყობს შემდგომში ასეთი ტიპის დანაშაულთა პრევენციას და საქმეების სრულყოფილ/ობიექტურ გამოძიებას. სრულად... წყარო: www.hrc.ge

თბილისი. ორგანიზაცია „საფარის” საჩივრის საფუძველზე, თბილისის საქალაქო სასამართლომ ძალადობის მსხვერპლი ქალის მიმართ უსაფუძვლოდ გამოცემული შემაკავებელი ორდერი გააუქმა. „ქალი ორგანიზაციას მას შემდეგ დაუკავშირდა, რაც პარტნიორის მხრიდან ფიზიკური ძალადობის მსხვერპლი გახდა. შემთხვევა მიმდინარე წლის 8 აპრილს მოხდა. პოლიციის გამოძახების შემდეგ, კაცი ადგილზე დააკავეს და მის მიმართ შემაკავებელი ორდერიც გამოიცა. მეორე დღეს, კაცს ოჯახში ძალადობის მუხლით წარუდგინეს ბრალი, დაკითხვის დროს კი მან განაცხადა, რომ თავად არის მსხვერპლი. ეს ვერსია ეყრდნობოდა იმ ფაქტს, რომ ფიზიკური თავდასხმის დროს, თავის დაცვის მიზნით, ქალმა მას მხარზე უკბინა, რა დროსაც კაცმა დაზიანებები მიიღო. სწორედ ეს გახდა იმის საფუძველი, რომ შემთხვევიდან მეორე დღეს, 9 აპრილს, მეორე შემაკავებელი ორდერი გამოიცა, ამჯერად უკვე დაზარალებული ქალის მიმართ. ფაქტობრივად, არსებობდა ორი, ერთმანეთის პარალელური შემაკავებელი ორდერი, თუმცა “საფარის” იურისტმა, ნელი ქარელმა ქალის მიმართ გამოცემული შემაკავებელი ორდერი გაასაჩივრა. როგორც ქარელი განმარტავს, მნიშვნელოვანია განისაზღვროს, ვინ იყო კონფლიქტისა ინიციატორი კონკრეტულ სიტუაციაში. იურისტი ხაზს უსვამს იმასაც, რომ თავის დაცვა, არ შეიძლება ჩაითვალოს ძალადობად“, ნათქვამია ორგანიზაციის ვებგვერდზე. სრულად... წყარო: sapari.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის საერთაშორისო სამართალწარმოების გუნდის თანაშემწის, ნინო თურმანიძის ბლოგპოსტს: „უკრაინა რუსეთის ფედერაციის წინააღმდეგ მართლმსაჯულების საერთაშორისო სასამართლოში“. „ბლოგპოსტი მიმოიხილავს თუ რატომ დაეყრდნო უკრაინა გენოციდის კონვენციას მართლმსაჯულების საერთაშორისო სასამართლოში შეტანილ საჩივარში მის მიერ წარდგენლი არგუმენტაციისა და სასამართლოს განმარტებების საფუძველზე. ამასთან, საერთაშორისო სამართლის მიხედვით, შესაძლოა თუ არა ლეგიტიმურად ჩაითვალოს ძალის გამოყენება სხვა სახელმწიფოს წინააღმდეგ შესაძლო გენოციდის პრევენციისა და დასჯის მიზნით?“ სრულად... წყარო: gyla.ge

თბილისი. საქართველოს სახალხო დამცველმა პარლამენტს წარუდგინა ალტერნატიული ანგარიში ადამიანის უფლებათა ევროპული სასამართლოსა და გაეროს ქალთა მიმართ დისკრიმინაციის აღმოფხვრის კომიტეტის მიერ საქართველოს მიმართ გამოტანილი გადაწყვეტილებების აღსრულების მდგომარეობის შესახებ. „ალტერნატიული ანგარიში მიმოიხილავს საქართველოს წინააღმდეგ ევროპული სასამართლოს მიერ გამოტანილი გადაწყვეტილებების აღსრულებისათვის სახელმწიფოს მიერ მიღებულ ზოგად ღონისძიებებს შემდეგ საქმეებში: „ცინცაბაძის ჯგუფი“, „იდენტობის ჯგუფი“, „ნ.წ. და სხვები საქართველოს წინააღმდეგ“”, „,,ამირიძე საქართველოს წინააღმდეგ“’’ და „,,მერაბიშვილი საქართველოს წინააღმდეგ’’“. გარდა ამისა, ანგარიშში შეფასებულია ხანუმ ჯეირიანოვას საქმეზე საქართველოს წინააღმდეგ გაეროს ქალთა მიმართ დისკრიმინაციის აღმოფხვრის კომიტეტის მიერ გამოტანილი გადაწყვეტილების აღსასრულებლად განხორციელებული ზოგადი ღონისძიებები. დოკუმენტში გაანალიზებულია, თუ რამდენად საკმარისია ზემოაღნიშნული საქმეების აღსასრულებლად სახელმწიფოს მიერ გადადგმული ნაბიჯები“, ნათქვამია ანგარიშში. ანგარიშის ელექტრონული ვერსია... წყარო: ombudsman.ge

თბილისი. სოციალური სამართლიანობის ცენტრი გთავაზობთ ანგარიშს, რომელშიც შეფასებულია 2021 წლიდან 2022 წლის მარტის ჩათვლით გამართული საპროტესტო დემონსტრაციების დროს პოლიციის მხრიდან გამოყენებული ძალის პროპორციულობა და უფლებრივ დარღვევებზე სახელმწიფოს რეაგირების ეფექტიანობა. დოკუმენტი იხ. ბმულზე... „საპოლიციო ძალა სულ უფრო ხშირად გვევლინება პროცესების მართვის წამყვან მექანიზმად, როგორც პოლიტიკური კრიზისების დროს, ისე სხვადასხვა სოციალურ საკითხთან დაკავშირებულ კონფლიქტებში. განსაკუთრებით მწვავე იყო 5 ივლისს განვითარებული მოვლენები, როდესაც ერთი მხრივ ჩვენ ვნახეთ, პოლიციის უმოქმედობა, როდესაც ხელისუფლებამ დაუშვა და ირიბად წაახალისა ძალადობრივი მოქმედებები. მეორე მხრივ, ნამოხვანის პროტესტის მიმდინარეობისას, ჩვენ ვიხილეთ ჭარბი/ინტენსიური საპოლიციო ძალების მობილიზება, როდესაც ხისტი და რეპრესიული მეთოდებით, ხელისუფლება ცდილობდა ჭარბი საპოლიციო ძალით ფიზიკური ბარიერები შეექმნა და ხელი შეეშალა რიონის ხეობის მცველების ლეგიტიმური, მშვიდობიანი და სამართლიანი პროტესტისთვის“, ნათქვამია ანგარიშში. წყარო: socialjustice.org.ge

თბილისი. „უფლებები საქართველოს“ დახმარებით, ირანის მოქალაქემ თბილისის სააპელაციო სასამართლოში დავა მოიგო. „თბილისის სააპელაციო სასამართლოში მიმდინარე დავისას ბენეფიციარის ინტერესებს იცავდა  „უფლებები საქართველოს“ იურისტი მარიამ მაღრაძე, IOM-ის პროექტის - „COVID-19 და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით“. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას ნომერზე: (+995) 577 28 22 77. სრულად... წყარო: ორგანიზაციის გვერდი სოციალურ ქსელში