თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის საერთაშორისო სამართალწარმოების გუნდის თანაშემწის, ნინო თურმანიძის ბლოგპოსტს: „უკრაინა რუსეთის ფედერაციის წინააღმდეგ მართლმსაჯულების საერთაშორისო სასამართლოში“. „ბლოგპოსტი მიმოიხილავს თუ რატომ დაეყრდნო უკრაინა გენოციდის კონვენციას მართლმსაჯულების საერთაშორისო სასამართლოში შეტანილ საჩივარში მის მიერ წარდგენლი არგუმენტაციისა და სასამართლოს განმარტებების საფუძველზე. ამასთან, საერთაშორისო სამართლის მიხედვით, შესაძლოა თუ არა ლეგიტიმურად ჩაითვალოს ძალის გამოყენება სხვა სახელმწიფოს წინააღმდეგ შესაძლო გენოციდის პრევენციისა და დასჯის მიზნით?“ სრულად... წყარო: gyla.ge

თბილისი. საქართველოს სახალხო დამცველმა პარლამენტს წარუდგინა ალტერნატიული ანგარიში ადამიანის უფლებათა ევროპული სასამართლოსა და გაეროს ქალთა მიმართ დისკრიმინაციის აღმოფხვრის კომიტეტის მიერ საქართველოს მიმართ გამოტანილი გადაწყვეტილებების აღსრულების მდგომარეობის შესახებ. „ალტერნატიული ანგარიში მიმოიხილავს საქართველოს წინააღმდეგ ევროპული სასამართლოს მიერ გამოტანილი გადაწყვეტილებების აღსრულებისათვის სახელმწიფოს მიერ მიღებულ ზოგად ღონისძიებებს შემდეგ საქმეებში: „ცინცაბაძის ჯგუფი“, „იდენტობის ჯგუფი“, „ნ.წ. და სხვები საქართველოს წინააღმდეგ“”, „,,ამირიძე საქართველოს წინააღმდეგ“’’ და „,,მერაბიშვილი საქართველოს წინააღმდეგ’’“. გარდა ამისა, ანგარიშში შეფასებულია ხანუმ ჯეირიანოვას საქმეზე საქართველოს წინააღმდეგ გაეროს ქალთა მიმართ დისკრიმინაციის აღმოფხვრის კომიტეტის მიერ გამოტანილი გადაწყვეტილების აღსასრულებლად განხორციელებული ზოგადი ღონისძიებები. დოკუმენტში გაანალიზებულია, თუ რამდენად საკმარისია ზემოაღნიშნული საქმეების აღსასრულებლად სახელმწიფოს მიერ გადადგმული ნაბიჯები“, ნათქვამია ანგარიშში. ანგარიშის ელექტრონული ვერსია... წყარო: ombudsman.ge

თბილისი. სოციალური სამართლიანობის ცენტრი გთავაზობთ ანგარიშს, რომელშიც შეფასებულია 2021 წლიდან 2022 წლის მარტის ჩათვლით გამართული საპროტესტო დემონსტრაციების დროს პოლიციის მხრიდან გამოყენებული ძალის პროპორციულობა და უფლებრივ დარღვევებზე სახელმწიფოს რეაგირების ეფექტიანობა. დოკუმენტი იხ. ბმულზე... „საპოლიციო ძალა სულ უფრო ხშირად გვევლინება პროცესების მართვის წამყვან მექანიზმად, როგორც პოლიტიკური კრიზისების დროს, ისე სხვადასხვა სოციალურ საკითხთან დაკავშირებულ კონფლიქტებში. განსაკუთრებით მწვავე იყო 5 ივლისს განვითარებული მოვლენები, როდესაც ერთი მხრივ ჩვენ ვნახეთ, პოლიციის უმოქმედობა, როდესაც ხელისუფლებამ დაუშვა და ირიბად წაახალისა ძალადობრივი მოქმედებები. მეორე მხრივ, ნამოხვანის პროტესტის მიმდინარეობისას, ჩვენ ვიხილეთ ჭარბი/ინტენსიური საპოლიციო ძალების მობილიზება, როდესაც ხისტი და რეპრესიული მეთოდებით, ხელისუფლება ცდილობდა ჭარბი საპოლიციო ძალით ფიზიკური ბარიერები შეექმნა და ხელი შეეშალა რიონის ხეობის მცველების ლეგიტიმური, მშვიდობიანი და სამართლიანი პროტესტისთვის“, ნათქვამია ანგარიშში. წყარო: socialjustice.org.ge

თბილისი. „უფლებები საქართველოს“ დახმარებით, ირანის მოქალაქემ თბილისის სააპელაციო სასამართლოში დავა მოიგო. „თბილისის სააპელაციო სასამართლოში მიმდინარე დავისას ბენეფიციარის ინტერესებს იცავდა  „უფლებები საქართველოს“ იურისტი მარიამ მაღრაძე, IOM-ის პროექტის - „COVID-19 და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით“. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას ნომერზე: (+995) 577 28 22 77. სრულად... წყარო: ორგანიზაციის გვერდი სოციალურ ქსელში

კახეთი. საქართველოს ახალგაზრდა იურისტთა ასოციაციის ინფორმაციით, რეორგანიზაციის გამო შტატების შემცირების მოტივით სამსახურიდან გათავისუფლებულმა პირმა თელავის მუნიციპალიტეტის მერიას დავა მოუგო. მის ინტერესებს საია იცავდა.  „სამივე ინსტანციის სასამართლომ მიიჩნია, რომ სამსახურიდან გათავისუფლება არ შეესაბამებოდა კანონის მოთხოვნებს, შესაბამისად, თელავის მუნიციპალიტეტის მერიას დაევალა გათავისუფლებული თანამშრომლის ტოლფას თანამდებობაზე აღდგენა და 2018 წლის 30 იანვრიდან სამსახურში აღდგენის დღემდე იძულებითი განაცდური ხელფასის ანაზღაურება“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, ევროპულმა სასამართლომ დაადგინა, რომ მომჩივნის მიმართ პოლიციელთა მხრიდან განხორციელდა არასათანადო მოპყრობა და ამ ფაქტზე მიმდინარე გამოძიება არ იყო სრულყოფილი. „გამოძიების ინტერესების მიღმა დარჩა მომჩივნისთვის მიყენებული ისეთი მძიმე დაზიანება, როგორიცაა ნეკნების მოტეხილობა, რაც საქმის მასალებში წარმოდგენილი ექსპერტიზის დასკვნით დასტურდებოდა. მიუხედავად აღნიშნულისა, არცერთ პოლიციელს არ წაეყენა ბრალი აღნიშნულ ფაქტზე. დამატებით, სასამართლომ არასათანადო მოპყრობის საქმეებზე საგამოძიებო პროცესის ფარგლებში დროული სამედიცინო გამოკვლევის/ექსპერტიზის საჭიროებაზე კიდევ ერთხელ გაამახვილა ყურადღება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 28 აპრილს სამუშაო ადგილებზე გარდაცვლილ და დაშავებულ მშრომელთა საერთაშორისო დღე აღინიშნება. სოციალური სამართლიანობის ცენტრის ინფორმაციით, ბოლო წლებში, საქართველოში სამუშაო ადგილებზე გარდაცვლილთა რიცხვი იკლებს, რაც სავარაუდოდ, შრომის პოლიტიკის ეტაპობრივი რეფორმირების შედეგია. „მიუხედავად კლების დინამიკისა, ქვეყანაში სურათი კვლავ მძიმეა, ბოლო ათ წელიწადში სამუშაო ადგილზე 1 800-მდე მშრომელი დაშავდა, 500-ზე მეტი კი გარდაიცვალა. პრობლემურია, სამუშაო ადგილებზე მომხდარი უბედური შემთხვევების საქმეთა გამოძიებაც. არაეფექტიანი სისხლისსამართლებრივი რეაგირება დამსაქმებელ კომპანიებში დაუსჯელობის სინდრომს ქმნის და თავიდან ვერ ირიდებს ტრაგედიათა ჯაჭვს“.  სრულად... წყარო: socialjustice.org.ge

თბილისი. საქართველოს დემოკრატიული ინიციატივას ინფორმაციით, ორგანიზაციის სტრატეგიული სამართალწარმოების იურისტებმა, ეკატერინე სუბელიანმა, მარიამ ბიბილურმა და მარიამ ტაგანაშვილმა მონაწილეობა მიიღეს ეუთოს დემოკრატიული ინსტიტუტების და ადამიანის უფლებათა ოფისის (OSCE/ODIHR) საერთაშორისო იმიტირებულ პროცესში, სადაც ორ საუკეთესო ფინალისტ გუნდს შორის მოხვდნენ. დასკვნითი ეტაპი 19 მაისს, ვარშავაში გაიმართება, გუნდი University of California, Berkeley-ს დაუპირისპირდება. სრულად... წყარო: ორგანიზაციის გვერდი სოციალურ ქსელში

იმერეთი. სოციალური სამართლიანობის ცენტრი ეხმიანება მედიაში გავრცელებულ ინფორმაციას ჭიათურაში პოლიციის მხრიდან მოქალაქე ს.ჭ-ის მიმართ ძალის სავარაუდო გადამეტებაზე. ორგანიზაცია მოუწოდებს სპეციალურ საგამოძიებო სამსახურს, საქმეზე აწარმოოს ყოველმხრივი, ეფექტიანი და დროული გამოძიება. „დაზარალებულის ოჯახის წევრების განცხადებით, პატრულის მანქანა ს.ჭ-ს შეეჯახა, რაზე გაბრაზებულმაც წამოდგომისას ავტომობილს ფეხი მიარტყა. სწორედ ამ ინციდენტს მოჰყვა მისი მანქანაში ძალის გამოყენებით ჩასმა და განყოფილებაში გადაყვანა. მათი განმარტებით, დაზარალებული საჩხერე-ჭიათურის მეოთხე სახაზო განყოფილების შენობის მეორე სართულიდან ვარდნის შედეგად მიღებული უმძიმესი დაზიანებებით იმყოფება საავადმყოფოში კომატოზურ მდგომარეობაში“. სრულად... წყარო: socialjustice.org.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ ეხმიანება სასამართლოს რეფორმების თაობაზე საქართველოს პარლამენტში შექმნილი სამუშაო ჯგუფის მუშაობას. „სამწუხაროა, რომ საზოგადოებისთვის დახურულია ინფორმაცია სამუშაო ჯგუფის ფორმატის შესახებ. მასში მიწვეულნი არ არიან მართლმსაჯულების საკითხებზე მომუშავე ადგილობრივი არასამთავრობო ორგანიზაციები, საერთაშორისო მისიები და სხვა დაინტერესებული ჯგუფები, შესაბამისად პროცესი არაინკლუზიურად მიმდინარეობს. მმართველი პარტია ამ დრომდე არ აღიარებს სასამართლო სისტემაში არსებულ მთავარ გამოწვევას, მოსამართლეთა გავლენიანი ჯგუფის არსებობას, შესაბამისად აქამდე გატარებული რეფორმები, ძირითადად, ფრაგმენტული იყო და პროცედურულ საკითხებს ეხებოდა. „გავლენის სისტემა“ კი, რომელიც მართლმსაჯულების სისტემაშია გაბატონებული და მოსამართლეთა გავლენიანი ჯგუფის არსებობის შენარჩუნებას უწყობს ხელს, ხელუხლებელი რჩება“, ნათქვამია განცხადებაში. სრულად... წყარო: socialjustice.org.ge

თბილისი. ევროკავშირი და გაეროს ბავშვთა ფონდი მხარს უჭერს საქართველოს მთავრობას განრიდება გახდეს პრიორიტეტი კანონთან კონტაქტში მყოფი ბავშვებისათვის. ორგანიზაციებმა კონფერენციაზე იუსტიციის სამინისტროსთან ერთად განრიდებისა და მედიაციის პროგრამის გასული თერთმეტი წლის შედეგები შეაჯამეს. სრულად... წყარო: eu4georgia.eu

თბილისი. ღია საზოგადოების ფონდის მხარდაჭერით, საქართველოს დემოკრატიული ინიციატივა, საქართველოს ახალგაზრდა იურისტთა ასოციაცია, სოციალური სამართლიანობის ცენტრი, უფლებები საქართველო და ადამიანის უფლებათა ცენტრი/Human Rights Center ახორციელებენ ერთობლივ პროექტს „იურიდიული დახმარების ქსელი აქტივისტებისათვის“. პროექტის მოკლევადიანი მიზანია სამოქალაქო აქტივისტების დაცვა უკანონო დევნისგან, რაც, თავის მხრივ, უზრუნველყოფს სამოქალაქო აქტივიზმისა და შეკრებისა და გამოხატვის თავისუფლების რეალიზებისთვის უფრო ხელსაყრელ გარემოს.  ბლოგპოსტში წარმოდგენილია ორგანიზაციების მიერ წარმოებული საქმეების სტატისტიკა და საქმიანობის ძირითადი შედეგები. სრულად... წყარო: ორგანიზაციის გვერდი სოციალურ ქსელში

თბილისი. მართლმსაჯულების საკითხების მკვლევარმა, სოფო ვერძეულმა იკვლია სამი სხვადასხვა თაობის მოსამართლის გამოცდილებები და თავი მოუყარა სასამართლოს წარსულსა და დღევანდელობაზე, სისტემის შიგნით დაგროვილ ისტორიებს, გამოცდილებებსა და ემოციებს. „ეს დოკუმენტი ერთგვარი მცდელობაა წარმოადგინოს მცირე რეფლექსია მოსამართლეთა მონათხრობზე და მათი პირადი გამოცდილებები სასამართლოს ინსტიტუციური და ორგანიზაციული გარდაქმნების ისტორიას დაუკავშიროს“. სასამართლოს საკადრო და ორგანიზაციული განახლების ისტორია... სასამართლო 90-იანი წლებიდან დღემდე - სამი მოსამართლის პერსპექტივა... წყარო: socialjustice.org.ge

თბილისი. სოციალური სამართლიანობის ცენტრი საკონსტიტუციო სასამართლოში ასაჩივრებს იმ ნორმებს, რომლებიც უშვებს კერძო კომპანიისათვის ენერგოპროექტის განხორციელების უფლების მინიჭებას გარემოზე ზემოქმედების შეფასების (გზშ) ჩატარებამდე. „სადაო ნორმების თანახმად, მთავრობასა და კერძო კომპანიას შორის ენერგოპროექტის განხორციელების შესახებ ხელშეკრულება შესაძლოა დაიდოს სრულიად დახურული პროცედურის საფუძველზე, საზოგადოების მონაწილეობის გარეშე, რაც ეწინააღმდეგება საქართველოს კონსტიტუციით გარანტირებულ გარემოსდაცვით ინფორმაციაზე ხელმისაწვდომობისა და გარემოსდაცვით საკითხებზე გადაწყვეტილებებში მონაწილეობის უფლებებს“, ნათქვამია განცხადებაში. სრულად... წყარო: socialjustice.org.ge

თბილისი. ორგანიზაცია „საფარის“ ინფორმაციით, გაუპატიურების მსხვერპლი უკრაინის მოქალაქე ქალი პროკურატურამ დაზარალებულად ცნო. „საქმის გახმაურებიდან რამდენიმე საათში, თითქმის ერთთვიანი ლოდინის შემდეგ, პროკურატურამ დაზარალებულად ცნო გაუპატიურების მსხვერპლი ქალი. შესაბამისი დადგენილების ჩაბარების შემდეგ “საფარს” შესაძლებლობა ექნება გაეცნოს საქმის მასალებს და უფლებამოსილების ფარგლებში, ჩაეროს გამოძიების პროცესში. დაზარალებული ქალის ინტერესებს, რომელიც უკრაინის მოქალაქეა, ორგანიზაციის იურისტი, თამარ ლუკავა იცავს“. სრულად... წყარო: sapari.ge

თბილისი. სოციალური სამართლიანობის ცენტრი გთავაზობთ სტატიას, რომლითაც ორგანიზაცია საზოგადოებას წარუდგენს თავად მოსამართლეთა პერსპექტივას სასამართლოს წარსულსა და დღევანდელობაზე. „სტატიაში წარმოდგენილია სხვადასხვა თაობის სამი მოსამართლის ისტორია, მათი გამოცდილებები და განწყობები. სამი მოსამართლის მოყოლილი ისტორია, ერთი მხრივ, აჩვენებს მათ მიერ გავლილ განსხვავებულ გზას, თუმცა ასევე წარმოაჩნეს პრობლემებს, რომელიც ყველა თაობის მოსამართლისთვის საერთო და გადამკვეთია“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, ევროპარლამენტი სამართლის უზენაესობის პრინციპის მიმართულებას სრულ უკუსვლად აფასებს. 2022 წლის 4 აპრილს ევროპარლამენტმა საქართველოს მიერ ასოცირების შეთანხმების შესრულებაზე კრიტიკული ანგარიში გამოაქვეყნა. „ბოლო 2 წლის განმავლობაში საქართველოს ხელისუფლების მიერ ძირითადი დემოკრატიული პრინციპების პატივისცემისა და პოლიტიკური ვალდებულებების შესრულების მიმართულებით სერიოზულ უკუსვლასთან ერთად, ანგარიშში განსაკუთრებული ყურადღება ეთმობა მართლმსაჯულების ჩავარდნილ რეფორმას და მის შედეგებს საქართველოს ევროკავშირში გაწევრიანების გზაზე“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის (საია) აქვეყნებს საერთაშორისო სამართალწარმოების გუნდის თანაშემწის, გიორგი ჩაჩხიანის ბლოგპოსტს: ადამიანის უფლებათა ევროპული სასამართლო: კონფლიქტის კონტექსტში ჩადენილ დარღვევებთან დაკავშირებით რუსეთის ფედერაციის წინააღმდეგ მიმართული უკრაინის სახელმწიფოთაშორისი დავების მომავალი. ნაშრომის მიზანია, განიხილოს კონფლიქტის კონტექსტში ჩადენილ დარღვევებთან დაკავშირებით რუსეთის ფედერაციის წინააღმდეგ მიმართული უკრაინის სახელმწიფოთაშორისი დავების არსი და მათი მომავალი. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს დოკუმენტს: სასამართლო სისტემის რეფორმირებისას კიდევ ერთი უკან გადადგმული ნაბიჯი - 2021 წლის 30 დეკემბერს მიღებული საკანონმდებლო ცვლილებების ანალიზი. ორგანიზაციის ცნობით, პარლამენტმა, „საერთო სასამართლოების შესახებ“ საქართველოს ორგანულ კანონში შესატანი საკანონმდებლო ცვლილებები რიგგარეშე სესიაზე, საზოგადოებრივი ჩართულობისა და კონსულტაციების გამართვის გარეშე, დაჩქარებული წესით მიიღო. „მოცემულ ცვლილებებზე ვეტოს დადების მოწოდებისა და საერთაშორისო აქტორების მხრიდან კანონპროექტის კრიტიკის მიუხედავად, პრეზიდენტმა არ გამოიყენა კონსტიტუციური უფლებამოსილება და 2022 წლის 13 იანვარს ხელი მოაწერა კანონპროექტს.  წინამდებარე დოკუმენტი აფასებს როგორც საკანონმდებლო პაკეტის განხილვის პროცესს, ასევე ცვლილებების რელევანტურობასა და ეფექტიანობას სასამართლო სისტემაში არსებული კონტექსტისათვის და აანალიზებს მის შესაძლო შედეგებს“. სრულად... წყარო: socialjustice.org.ge

თბილისი. საქართველოს დემოკრატიული ინიციატივა (GDI) და ადამიანის უფლებათა ცენტრი (HRC) ეხმაურებიან 2022 წლის 4 აპრილს თბილისის საქალაქო სასამართლოს მოსამართლე ნინო ჩახნაშვილის მიერ გამოცხადებულ განაჩენს 2021 წლის 5 ივლისს ჟურნალისტებზე განხორციელებულ ძალადობასთან დაკავშირებულ საქმეზე. ამ საქმეში საქართველოს დემოკრატიული ინიციატივა იცავს „რადიო თავისუფლების“ დაზარალებული ჟურნალისტის, თორნიკე მანდარიას, ხოლო ადამიანის უფლებათა ცენტრი ოპერატორის, დავით ქორიძის ინტერესებს. ორგანიზაციები არ ეთანხმებიან გამოცხადებულ განაჩენს ბრალდების გადაკვალიფიცირებისა და სასჯელის ნაწილში. „ამგვარი მიდგომა ფაქტობრივად გამორიცხავს 2022 წლის 5 ივლისს ჟურნალისტებსა და სამოქალაქო აქტივისტებზე მასშტაბური, ჰომოფობიური ძალადობის ორგანიზატორებისთვის პასუხისმგებლობის დაკისრებას მაშინ, როდესაც დანაშაულის ორგანიზებულ ხასიათზე არაერთი მტკიცებულება მიუთითებს. ... მოვუწოდებთ საქართველოს პროკურატურას, გაასაჩივროს მიღებული განაჩენი სააპელაციო სასამართლოში“, ნათქვამია ერთობლივ განცხადებაში. სრულად... წყარო: www.hrc.ge

კახეთი. 29 მარტს, ადამიანის უფლებათა ცენტრის წარმომადგენლები თელავის მუნიციპალიტეტის საჯარო მოხელეებს შეხვდნენ. ორგანიზაციის აღმასრულებელმა დირექტორმა ალეკო ცქიტიშვილმა შეხვედრის მონაწილეებს გააცნო ადამიანის უფლებათა ცენტრის ანგარიში - „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“, რომელიც საქართველოში ბრიტანეთის საელჩოს ფინანსური მხარდაჭერით გამოქვეყნდა. სრულად... წყარო: www.humanrights.ge

თბილისი. 30 დეკემბერს პარლამენტმა დაჩქარებული წესით მიიღო საკანონმდებლო ცვლილებები, რომლითაც გაუქმდა სახელმწიფო ინსპექტორის სამსახური და მის ნაცვლად შეიქმნა ორი ახალი უწყება. იმ დროისათვის მოქმედმა სახელმწიფო ინსპექტორმა, ლონდა თოლორაიამ საკონსტიტუციო სასამართლოში სარჩელი წარადგინა, რომლითაც საკანონმდებლო ცვლილებების არაკონსტიტუციურად ცნობას და სადავო ნორმების მოქმედების შეჩერებას მოითხოვდა. სოციალური სამართლიანობის ცენტრის ანალიტიკური დოკუმენტი აფასებს საოქმო ჩანაწერის იმ ძირითად პრობლემურ ასპექტებს, რომლებიც ორგანიზაციის აზრით, ეწინააღმდეგება საქართველოს კონსტიტუციის ფუნდამენტურ პრინციპებსა და საკონსტიტუციო სასამართლოს მიერ დადგენილ პრაქტიკას. ანალიტიკური დოკუმენტი... წყარო: socialjustice.org.ge