თბილისი. 2019 წლის 11 დეკემბერს სახალხო დამცველისა და გაეროს ქალთა ორგანიზაციის მხარდაჭერით გაიმართა კონფერენცია „ფემიციდის პრევენცია და მონიტორინგი“. კონფერენციის მიზანს წარმოადგენდა ფემიციდის, როგორც ქალთა მკვლელობის უკიდურესი ფორმის და სისტემური პრობლემის განხილვა და მასზე მსჯელობა. ანგარიშის ძირითადი მიგნებების შედეგად გამოიკვეთა, რომ კვლავ პრობლემას წარმოადგენს სასამართლოს მიერ ქმედების ფემიციდად ან ფემიციდის მცდელობად კვალიფიკაცია. იმ შემთხვევაშიც კი, როდესაც ხდება გენდერული მოტივის დადგენა, ეს არ აისახება სასჯელის დამამძიმებელ გარემოებაზე. შესაბამისად, მნიშვნელოვანია პროკურატურამ გაატაროს სათანადო ღონისძიებები ქალის მკვლელობის ან მკვლელობის მცდელობის საქმეში გენდერული მოტივის გამოსაკვეთად. სრულად... წყარო: http://ombudsman.ge

თბილისი. „საერთაშორისო გამჭვირვალობა - საქართველოს“ ინფორმაციით, მოქმედი გენერალური პროკურორის იურიდიული დიპლომის ნამდვილობა არ დასტურდება. „აღნიშნული ინფორმაციის, საარქივო მასალებისა და შესაბამისი კანონმდებლობის ანალიზის შედეგად, კიდევ ერთხელ აღვნიშნავთ, რომ არ დასტურდება მოქმედი გენერალური პროკურორის მიერ უზენაესი სასამართლოს მოსამართლეობისთვის აუცილებელი უმაღლესი განათლების დამადასტურებელი კვალიფიკაციის ქონა. კერძოდ, მოსამართლეს უნდა ჰქონდეს არანაკლებ მაგისტრის ან მასთან გათანაბრებული აკადემიური ხარისხი“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის იურიდიულ კომიტეტში სასამართლოს მოსამართლეობის კანდიდატების მოსმენის პროცესს აფასებს. „იშვიათი გამონაკლისების გარდა, კანდიდატების სამართლებრივი მსჯელობის უნარი იყო დაბალი, მათი პასუხები კი - დაუსაბუთებელი. ზოგიერთმა კანდიდატმა უარი განაცხადა კონკრეტული სუბიექტების მიერ დასმულ კითხვებზე პასუხის გაცემაზე. იყო დაუსაბუთებელი და გამოგონილი საფუძვლით შეკითხვებზე თავის არიდების შემთხვევებიც. მსგავსი დამოკიდებულება, არა მხოლოდ პარლამენტის, როგორც ინსტიტუტის, არამედ ზოგადად, პროცესის მიმართ უპატივცემულობის გამომხატველია და ცალსახად, უარყოფით შეფასებას იმსახურებს“, ნათქვამია განცხადებაში. სრულად... წყარო: www.transparency.ge

კოალიცია დამოუკიდებელი და გამჭვირვალე მართლმსაჯულებისთვის განცხადებას აქვეყნებს: უზენაესი სასამართლოს თავმჯდომარის მოვალეობის შემსრულებელი კანონს არღვევს. „კონსტიტუციის შესაბამისად, საკონსტიტუციო სასამართლოს 9 წევრიდან 3 წევრს უზენაესი სასამართლო ნიშნავს. სწორედ უზენაესი სასამართლოს კვოტით იყო არჩეული საკონსტიტუციო სასამართლოს მოსამართლე - მაია კოპალეიშვილი, რომელსაც უფლებამოსილების ვადა 5 დეკემბერს ამოეწურა. კანონის თანახმად, საკონსტიტუციო სასამართლოს წევრის უფლებამოსილების ვადის ამოწურვამდე არაუადრეს 1 თვისა და არაუგვიანეს 10 დღისა უნდა გამწესდეს ახალი მოსამართლე. თუმცა უზენაეს სასამართლოს ქალბატონი მაია კოპალეიშვილის შემცვლელი დღემდე არ აურჩევია, რითაც ის კანონის მოთხოვნებს არღვევს”, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. პარტნიორობა ადამიანის უფლებებისთვის (PHR) ორგანიზებით, 156-ე საჯარო სკოლაში მოსამართლესა და მოსწავლეებს შორის მორიგი შეხვედრა გაიმართა. ამჯერად, ბავშვებს თბილისის სააპელაციო სასამართლოს მოსამართლე ქეთი მესხიშვილი შეხვდა. „მოსწავლეების მაღალი ინტერესის გამო, შეხვედრა დაგეგმილზე ხანგრძლივი აღმოჩნდა. ბავშვები მოსამართლისგან დიდი ინტერესით ისმენდნენ პასუხებს თავიანთ დასმულ შეკითხვებზე, რომელიც შეეხებოდა მოსამართლის როგორც პროფესიულ, ისე პირად გამოცდილებას, პიროვნულ პრინციპებსა და ღირებულებებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „ადამიანის უფლებების სწავლებისა და მონიტორინგის ცენტრმა (EMC)“ 2019 წლის 2 დეკემბერს სისხლის სამართლის ადვოკატების მონაწილეობით გამართა ტრენინგი თემაზე „მოქმედი ნარკოპოლიტიკა და ადამიანის უფლებები“. „ტრენინგის მიზანი იყო ადვოკატებთან ერთად მოქმედი ნარკოპოლიტიკის გამოწვევების განხილვა, ნარკოტიკული დანაშაულის მიმართ სახელმწიფოს პოლიტიკასთან დაკავშირებით ცნობიერების ამაღლება და ნარკოპოლიტიკის სფეროში მგრძნობელობის გაზრდა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტმა (IDFI) საპროცესო შეთანხმების შესახებ კანონმდებლობისა და პრაქტიკის ანალიზის პრეზენტაცია გამართა. „ჩვენი კვლევა ემსახურება საპროცესო შეთანხმებებთან დაკავშირებით არსებული ხარვეზების და გამოწვევების იდენტიფიცირებას და მათი აღმოფხვრის მიზნით კონკრეტული წინადადებების განსაზღვრას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ორგანიზაციის იურისტის, ნუცა ქაშაკაშვილის ვლოგს თემაზე: რას ნიშნავს გონივრული მისადაგება შრომით ურთიერთობებში შშმ პირთა მიმართ. „საქართველოს კანონმდებლობა გონივრული მისადაგების ვალდებულების უარყოფას დისკრიმინაციის ფორმად არ მიიჩნევს, რაც მნიშვნელოვნად აფერხებს თანასწორობის პოლიტიკას შეზღუდული შესაძლებლობების მქონე პირებთან მიმართებით". სრულად... წყარო: emc.org.ge

თბილისი. საქართველოს სახალხო დამცველი ია კერზაიას გარდაცვალების ფაქტზე ჩატარებული გამოძიების შედეგებს აფასებს. „საქართველოს სახალხო დამცველის აპარატმა დაასრულა ია კერზაიას გარდაცვალების ფაქტზე ჩატარებული გამოძიების მასალების შესწავლა და დაადგინა, რომ აღნიშნული საქმეში ვლინდება ის სისტემური ხარვეზები, რომლებიც საქართველოს პროკურატურის მხრიდან სხვა საქმეებშიც ხშირად იკვეთება“, - ვკითხულობთ სახალხო დამცველის აპარატის მიერ გავრცელებულ ინფორმაციაში, - „მიუხედავად იმისა, რომ გამოძიების დაწყების შემდგომ პროკურატურამ საქმესთან შემხებლობის მქონე ყველა პირი გამოკითხა, დაგვიანებით დაწყებული გამოძიების გამო საქმისთვის გადამწყვეტი მნიშვნელობის მქონე მტკიცებულების მოპოვება და სიმართლის დადგენა ვერ მოხერხდა“. სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) 26 ნოემბრის მოვლენების შეფასების დოკუმენტს აქვეყნებს.  დოკუმენტში წარმოდგენილია პირველადი შეფასება, რამდენად კანონიერი და პროპორციული იყო სახელმწიფოს მხრიდან გამოყენებული საპოლიციო ძალა.  სრულად...  წყარო: emc.org.ge

თბილისი. GIZ-სამართლის პროგრამა აქვეყნებს გერმანიის სამოქალაქო კოდექსის თარგმანის მეორე რედაქტირებულ გამოცემას. სახელმძღვანელო: გერმანიის სამოქალაქო კოდექსი... წყარო: ორგანიზაციის გვერდი სოციალურ ქსელში განათლება სამართალი

თბილისი. „დაკარგული თვალის მიღმა“ - ასე ეწოდება საია-ს მიერ მომზადებულ ანგარიშს, რომელიც 20-21 ივნისის მოვლენებს ეხება. მისი პრეზენტაცია დღეს, 27 ნოემბერს გაიმართა.  ანგარიშში შეფასებულია: 2019 წლის 20-21 ივნისს აქციის დაშლის შესახებ მიღებული გადაწყვეტილების ლეგიტიმურობა და პროპორციულობა; არასათანადო მოპყრობის ფაქტები; ჟურნალისტთა წინააღმდეგ ძალის გადამეტებისა და ჟურნალისტური საქმიანობის განხორციელებაში ჩარევის შემთხვევები. ანგარიშში ასევე შეფასებულია 20-21 ივნისის მოვლენებთან დაკავშირებით ადმინისტრაციული წესით დაკავებისა და სასამართლოებში სამართალდარღვევათა საქმეების განხილვის პრაქტიკა.  სრულად...  წყარო: gyla.ge

თბილისი. პარტნიორობა ადამიანის უფლებებისთვის (PHR) ორგანიზებით, 25 ნოემბერს, თბილისის 150-ე საჯარო სკოლის მოსწავლეებს, გასაცნობად და ბავშვთა უფლებებზე სასაუბროდ თბილისის საქალაქო სასამართლოს მოსამართლე, ირაკლი კოპალიანი ეწვია. „არაფორმალურ გარემოში, მოსამართლე პასუხობდა ბავშვების დასმულ შეკითხვებს, რომელიც ეხებოდა სხვადასხვა საინტერესო თემებს, მათ შორის, მოსამართლის როლს ბავშვთა და ადამიანის უფლებების დაცვის პროცესში, მოსამართლედ გახდომის პროცედურებს, სირთულეებს, რომელიც მხარეებს შორის დავების გადაწყვეტას თან ახლავს. შეხვედრის ბოლოს ბავშვები და მოსამართლე შეთანხმდნენ, რომ მომავალი შეხვედრა სასამართლოში გაიმართება, სადაც მოსამართლე უმასპინძლებს ბავშვებს, გააცნობს სასამართლოს და ადგილზე აჩვენებს საქმეთა განხილვის პროცესს, შემდეგ კი მათ შეკითხვებს უპასუხებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ეკატერინე მესხიძის საჩივართან დაკავშირებით პირველი (სიზუსტის) პრინციპის დარღვევა დაუდგინდა 14 მედიასაშუალებას, მე-5 (შესწორების) პრინციპის დარღვევა კი - 11-ს. ეკა მესხიძის ინტერესებს ქარტიის საბჭოში ახალგაზრდა იურისტთა ასოციაცია იცავდა.  „თბილისის საქალაქო სასამართლოს 2019 წლის 09 აგვისტოს მიღებულ გადაწყვეტილებასთან დაკავშირებით რიგი მედია საშუალებების მიერ არაზუსტი ინფორმაცია გავრცელდა. გამოქვეყნებული სადავო მასალების თანახმად, სასამართლომ პაპუნა უგრეხელიძე უდანაშაულოდ სცნო და დაადგინა, რომ მისი საჯარო რეესტრის თავმჯდომარეობის პერიოდში არანაირ ძალადობასა და სექსუალურ შევიწროებას ადგილი არ ჰქონია. ეს ინფორმაცია არ შეესაბამება სინამდვილეს, აღნიშნულ საქმეში სასამართლოს საერთოდ არ უმსჯელია ჰქონდა თუ არა სექსუალურ შევიწროებას ადგილი“, - ვკითხულობთ საიას ვებგვერდზე გამოქვეყნებულ ინფორმაციაში.  სრულად...  წყარო: https://gyla.ge

თბილისი. სახალხო დამცველს მიაჩნია, რომ 2019 წლის 18 ნოემბერს პარლამეტთან აქციის დროს დაკავებული პირების საქმეებზე თბილისის საქალაქო სასამართლოში მიმდინარე პროცესები ადამიანის უფლებების დაცვის მინიმალურ სტანდარტებს ვერ აკმაყოფილებდა. „2019 წლის 19-20 ნოემბერს დასრულდა ადმინისტრაციული წესით დაკავებული 12 პირის სასამართლო განხილვა, სადაც 10 პირს სხვადასხვა ვადით პატიმრობა 1 პირს - ჯარიმა, ხოლო ერთს სიტყვიერი გაფრთხილება შეეფარდა. ორივე დღეს სახალხო დამცველის რწმუნებულები მთელი დღის განმავლობაში აკვირდებოდნენ სასამართლო განხილვების მიმდინარეობას. ამ პირთა დაკავების შემდგომი და სასამართლო პროცესი საპროცესო დარღვევებით წარიმართა, რაც სწრაფ და სათანადო რეაგირებას საჭიროებს“, - აღნიშნულია სახალხო დამცველის განცხადებაში. სრულად...  წყარო: http://ombudsman.ge

თბილისი. საქართველოს ახალგაზრდა იურისტთა ასოციაციის განცხადებით, გენერალურმა პროკურატურამ მაკო გომურს სისხლის სამართლის საქმის მასალები სრულად არ გააცნო. „20-21 ივნისის მოვლენების დროს დაზარალებულ მაკო გომურს გენერალურმა პროკურატურამ შესაბამისი სტატუსი 2019 წლის 11 ნოემბერს მიანიჭა. აღნიშნულის შემდგომ, საიას ადვოკატებმა, რომლებიც მაკო გომურის ინტერესებს იცავენ, მოითხოვეს სისხლის სამართლის საქმის მასალების გაცნობა. 21 ნოემბერს, პროკურატურამ ადვოკატებს და დაზარალებულს სისხლის სამართლის საქმეში არსებული მასალები არასრულად გააცნეს, რითაც დაზარალებულს წაერთვა შესაძლებლობა, შეემოწმებინა და განესაზღვრა საქმეში არსებული დოკუმენტები იყო თუ არა მის შემთხვევასთან შემხებლობაში“, - ვკითხულობთ საიას განცხადებაში, - „მოვუწოდებთ საქართველოს გენერალურ პროკურატურას: მისცეს მაკო გომურს და მის ადვოკატებს საშუალება, გაეცნონ სისხლის სამართლის საქმის მასალებს სრულად; განახორციელოს მასზე დაკისრებული მოვალეობა და ჩაატაროს სრულყოფილი და ყოველმხრივი გამოძიება, მითუმეტეს იმის გათვალისწინებით, რომ მაკო გომურისთვის მიყენებული დაზიანებიდან უკვე 5 თვეზე მეტი გავიდა“. სრულად...  წყარო: https://gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ბათუმის მეჩეთის საქმეზე სასამართლო გადაწყვეტილებას აანალიზებს. „ზემოთ აღნიშნულის გათვალისწინებით, მიგვაჩნია, რომ სასამართლოს მიერ დადგენილი დისკრიმინაციის აღმოფხვრის ერთადერთი გზა შეიძლება იყოს ახალი ადმინისტრაციული წარმოების ფარგლებში მოსარჩელის მოთხოვნის დაკმაყოფილება და შესაბამისი აქტების გამოცემა ბათუმის მერიის მხრიდან“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. თბილისის ადამიანის უფლებათა სახლი და მისი წევრი ორგანიზაციები შეშფოთებას გამოთქვამენ საქართველოში ბოლო პერიოდში განვითარებული მოვლენების გამო და მოუწოდებენ ხელისუფლებას დაიცვან უფლებადამცველების და აქტივისტების უფლებები.  „იმ პირობებში, როდესაც სასამართლო დამოუკიდებლობა პრობლემატურ საკითხად რჩება ქვეყნაში და საქმე ეხება მმართველი პოლიტიკური ძალის საწინააღმდეგო პოლიტიკური პროტესტის ფარგლებში შესაძლო გადაცდომას, დამოუკიდებელმა მოსამართლემ სახდელის დაკისრებისას სასამართლოს მიუკერძოებლობის ეჭვები უნდა გააქარწყლოს, და არ გააღრმავოს“, - აღნიშნულია განცხადებაში, - „თბილისის ადამიანის უფლებათა სახლი და მისი წევრი ორგანიზაციები მოუწოდებენ ხელისუფლებას, მაქსიმალურად დაიცვან უფლებადამცველების, სამოქალაქო აქტივისტების, ოპოზიციური პარტიების წევრებისა თუ მათი მხარდამჭერების გამოხატვის თავისუფლება და ამ თავისუფლების ყველა ფორმა, შეწყვიტონ პოლიტიკურად მოტივირებული დევნა და სასამართლო პროცესები წარიმართოს სამართლიანი სასამართლოს და სხვა კონსტიტუციური ღირებულებების დაცვით“.  სრულად...  წყარო: https://hrht.ge

თბილისი. „კონსტიტუციის 42-ე მუხლი“ ჩინჩალაძის, გეწაძის და მიქაუტაძის მიერ საქმეთა განაწილების სისტემით შესაძლო მანიპულირებაზე განმარტებებს ითხოვს.  „მიმდინარე წლის ოქტომბერ-ნოემბერში ორგანიზაცია „კონსტიტუციის 42-ე მუხლმა“ გამოითხოვა ინფორმაცია საქართველოს უზენაესი სასამართლოს პალატებში მოსამართლეთა შორის საქმეთა განაწილების შესახებ, რომლის საფუძველზეც გამოიკვეთა, რომ 2008-2015 წლებში უზენაესი სასამართლოს ადმინისტრაციულ პალატაში სისტემატურად ირღვეოდა საქმეთა განაწილების წესი, კერძოდ, ამ წლების განმავლობაში პალატის ერთ-ერთ კოლეგიაში შესული ყველა საქმე ეწერებოდა მხოლოდ ერთ მომხსენებელ მოსამართლეს. „კონტიტუციის 42-ე მუხლმა“ ინფორმაცია გამოითხოვა 2002 წლიდან დღემდე უზენაეს სასამართლოში შესულ და განაწილებულ საქმეებზე“, - ვკითხულობთ ორგანიზაციის მიერ განცხადებაში, - „უზენაესი სასამართლოს მიერ მოწოდებული ეს ინფორმაცია ბევრ კითხვის ნიშნებს აჩენს და მნიშვნელოვნად მიგვაჩნია, ამ კითხვებზე, პირველ რიგში, განმარტებები გააკეთოს თავად უზენაესმა სასამართლომ, ხოლო კანონდარღვევის აღმოჩენის შემთხვევაში, მასალები უნდა გადაეგზავნოს შესაბამის ორგანოებს რეაგირებისთვის“.  სრულად...  წყარო: https://article42.ge

თბილისი. 18 ნოემბრიდან დაიწყო ახალი სასწავლო მოდულის „კერძო აღმასრულებლის საქმიანობისთვის აუცილებელი პროფესიული უნარების განვითარება“ პრაქტიკაში განხორციელება. „პირველი ნაკადის ფარგლებში კერძო აღმასრულებლის საქმიანობის პრაქტიკულ საკითხებს გაეცნობა და გადამზადდება 25 სახელმწიფო აღმასრულებელი. სასწავლო მოდულის დანერგვა და განხორციელება მიზნად ისახავს საჯარო აღმასრულებლების მომზადებას კერძო საქმიანობისთვის“, ნათქმია GIZ-ის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი ეხმიანება 2019 წლის 18 ნოემბერს დაკავებულ პირთა სასამართლო პროცესებს. „ამ ეტაპზე ჩვენს ხელთ არსებული ინფორმაციით დაკავებულთა ნაწილი დაკავებულია 18 ნოემბერს, სამუშაო დროს, შესაბამისად მათ მიმართ დაკავების მაქსიმალური ვადა საქართველოს კანონმდებლობის მიხედვით არის 12 საათი. ამ ვადის გასვლის შემდგომ, აუცილებელია მათი გათავისუფლება. აქვე გვსურს ხაზი გავუსვათ იმ ფაქტს, რომ ადმინისტრაციულად დაკავებულების საქმეებს განიხილავს მხოლოდ ერთი მოსამართლე, რაც ბუნებრივია ართულებს სწრაფი მართლმსაჯულების განხორციელებას. აუცილებელია დამატებით სხვა მოსამართლეთა პროცესში ჩართულობა, რათა არ დაირღვეს დაკავებულთა საპროცესო უფლებები. მოვუწოდებთ თბილისის საქალაქო სასამართლოს, დროულად, კანონმდებლობის მოთხოვნათა დაცვით და სამართლიანად წარმართონ სასამართლო განხილვები“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. საია მოუწოდებს ხელისუფლებას დროულად და აქტიურად იმუშაოს ეგრეთ წოდებული სამხრეთ ოსეთის ოკუპაციური რეჟიმის უკანონო პატიმრის, ვაჟა გაფრინდაშვილის გათავისუფლების საკითხზე. „გავრცელებული ინფორმაციით, ვააჟა გაფრინდაშვილის ე.წ. ადმინისტრაციულ საზღვართან მისვლის მიზანიც ახალგორში მცხოვრები პირისთვის სათანადო სამედიცინო დახმარების აღმოჩენა იყო. კერძოდ, ვაჟა გაფრინდაშვილის ოჯახი ერთ-ერთ ვერსიად განიხილავს, რომ ქართველი ექიმი ოკუპირებულ ახალგორში ღრმა ჭაში ჩავარდნილი ადგილობრივი მცხოვრების დასახმარებლად გაემართა, რომელსაც თბილისში გადმოყვანაზე და კვალიფიციური სამედიცინო დახმარების მიღებაზე უარი უთხრეს“, - აღნიშნულია ორგანიზაციის მიერ გავრცელებულ განცხადებაში, - „საია მოუწოდებს საქართველოს ხელისუფლებას, სწრაფად და ეფექტიანად მიიღოს ყველა შესაძლო ზომა ვაჟა გაფრინდაშვილის უკანონო პატიმრობიდან გათავისუფლების საკითხზე; მაქსიმალურად გამოიყენოს ყველა შესაძლო საერთაშორისო სამართლებრივი მექანიზმები, რათა დაიძლიოს ოკუპირებულ ტერიტორიებზე არსებული ჰუმანიტარული კრიზისი და იქ მცხოვრებ პირებს მიეცეთ შესაძლებლობა მიიღონ საბაზისო საჭიროებები, მათ შორის მაღალკვალიფიციური სამედიცინო დახმარება". საია, ასევე მოუწოდებს საერთაშორისო თანამეგობრობასა და შესაბამის საერთაშორისო ორგანიზაციებს, დაეხმაროს ქართულ მხარეს აღნიშნული პრობლემების მოგვარებაში; გაააქტიურონ ძალისხმევა აფხაზეთსა და ცხინვალის რეგიონში უფლებების მასობრივი დარღვევის წინააღმდეგ საბრძოლველად და ოკუპირებულ ტერიტორიებზე მათი წარმომადგენლობის სადამკვირვებლო საქმიანობის განსახორციელებლად“. სრულად...  წყარო: https://gyla.ge/ge