თბილისი. 20 იანვარს ახალი კვლევა გამოქვეყნდა, რომელიც გამოძიების ეტაპზე დაზარალებული და მოწმე ბავშვების გამოკითხვისას ფსიქოლოგთა ჩართულობას ეხება. კვლევა ორგანიზაციამ „ინიციატივა მოწყვლადი ჯგუფების რეაბილიტაციისათვის“ საქართველოს ღია საზოგადოების ფონდის მხარდაჭერით ჩაატარა. „კვლევის შედეგები მოწმე და დაზარალებული ბავშვებისთვის ფსიქოლოგის მომსახურების გაწევის პრაქტიკის და ადგილობრივი კანონმდებლობის ანალიზს გვთავაზობს, რომელიც საერთაშორისო სტანდარტებსა და პრაქტიკასთან არის შედარებული. კვლევის შედეგად გამოიკვეთა, რომ გადაწყვეტილების მიღების პროცესი ფსიქოლოგების ჩართვის თაობაზე ბუნდოვანია, მათ არ იციან კონკრეტულად რა არის მათი ფუნქცია ამ პროცესში. მიუხედავად საჭიროებისა, ფსიქოლოგის მომსახურება ყველგან ხელმისაწვდომი არ არის და ფსიქოლოგთა კვალიფიკაცია არ პასუხობს არსებულ საჭიროებებს. იშვიათი გამონაკლისის გარდა, გარემო არ არის მორგებული ბავშვზე (ინფრასტრუქტურა, ინვენტარი) და ბავშვების კონფიდენციალობა დაკითხვის პროცესში სისტემატიურად ირღვევა“, ნათქვამია ღია საზოგადოება - საქართველოს ვებგვერდზე. სრულად... წყარო: osgf.ge

გურია. გურიის ახალგაზრდული რესურსცენტრის ოფისში გაიმართა პროექტის „ახალგაზრდები ცვლილებებისათვის“ პრეზენტაცია. „პროექტის მიზანია ხელი შეუწყოს ოზურგეთის მუნიციპალიტეტის ტერიტორიაზე მცხოვრები კანონთან კონფლიქტში მყოფი არასრულწლოვნების რეაბილიტაციას, მათ გააქტიურებასა და საზოგადოებრივ ცხოვრებაში მონაწილეობას. პროექტი ხორციელდება ევროკავშირის ფინანსური მხარდაჭერით, რომელსაც გურიის ახალგაზრდული რესურსცენტრი ახორციელებს პროექტ „არასრულწლოვანთა მართლმსაჯულების სისტემის რეფორმის განხორციელების ხელშეწყობა”-ის მცირე საგრანტო პროგრამის ფარგლებში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბროშურას: რა უნდა ვიცოდეთ პოლიციასთან კონტაქტის დროს. „ბროშურა მიზნად ისახავს ძირითადი უფლებებისა და დაცვის გარანტიების შესახებ პირთა ინფორმირებულობის ზრდას. მასში ყურადღება გამახვილებულია ადმინისტრაციული დაკავებისას, ნარკოლოგიური შემოწმებისას, პოლიციის მიერ პრევენციული უფლებამოსილებით სარგებლობისას, მოწმედ დაბარებისას, ქმედებების ადრესატისათვის კანონმდებლობით მინიჭებულ უფლებებზე, რომელთა ცოდნაც განსაკუთრებით მნიშვნელოვანია იმ ვითარებაში, როდესაც შესაბამისი ორგანოს თანამშრომელი არ ასრულებს კანონისმიერ ვალდებულებას და მოქალაქეს უფლებებსა და განსახორციელებელი ღონისძიების საფუძველს არ განუმარტავს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 23 იანვარს, ინფორმაციის თავისუფლების განვითარების ინსტიტუტმა (IDFI) და საქართველოს ახალგაზრდა იურისტთა ასოციაციამ (GYLA) ანგარიშის „საქართველოს უზენაესი სასამართლო - ინსტიტუციური და სამართლებრივი ჩარჩოს ანალიზი“ პრეზენტაცია გამართა. „კვლევა აანალიზებს ისეთ საკვანძო საკითხებს, როგორიც არის: უზენაესი სასამართლოს როლი და ადგილი სასამართლო სისტემაში, მისი დაკომპლექტება, უზენაესი სასამართლოს თავმჯდომარის უფლებამოსილებები, თავმჯდომარის/მოსამართლეთა პასუხისმგებლობა, უზენაესი სასამართლოს პლენუმის კომპეტენცია, პალატების მუშაობა და საქმეთა განაწილება. გარდა ამისა, ანგარიში აფასებს 2019 წელს უზენაესი სასამართლოს მოსამართლეების დანიშვნის პროცესს და განიხილავს პროცესის მიმდინარეობისას გამოვლენილ პრობლემურ საკითხებს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს სახალხო დამცველი იუსტიციის მინისტრის ქმედების კანონიერების შესწავლის მიზნით სახელმწიფო ინსპექტორს მიმართავს. „ვიდეო ჩანაწერებიდან ორი - ასახავდა სახალხო დამცველის რწმუნებულების პენიტენციურ დაწესებულებებში პატიმრებთან ვიზიტის კონკრეტულ მონაკვეთებს. ჩანაწერები, იმავე დღეს, გამოქვეყნდა იუსტიციის სამინისტროს Facebook გვერდზეც. საჯაროდ გავრცელებულ ჩანაწერებში სახალხო დამცველის რწმუნებულების სახეები არ არის დაფარული და მათი იდენტიფიცირება მარტივად შესაძლებელია. ნიშანდობლივია, რომ „საქართველოს სახალხო დამცველის შესახებ“ საქართველოს ორგანული კანონი უკრძალავს იუსტიციის სამინისტროს სახალხო დამცველის რწმუნებულისა და პატიმარის შეხვედრის რაიმე სახის მიყურადებას ან თვალთვალს. ამასთან, პენიტენციურ დაწესებულებებში ვიზუალური ან/და ელექტრონული მეთვალყურეობისა და კონტროლის განხორციელების, ჩანაწერების შენახვის, წაშლისა და განადგურების წესს ადგენს საქართველოს სასჯელაღსრულებისა და პრობაციის მინისტრის 2015 წლის 19 მაისის N35 ბრძანება“, ნათქვამია ომბუდსმენის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) განცხადებით, სახელმწიფო ინსპექტორმა იუსტიციის მინისტრის მიერ გავრცელებულ ვიდეოებზე დაუყოვნებლივ უნდა დაიწყოს მოკვლევა. „ვიდეოჩანაწერების საჯაროდ ჩვენება საფრთხეს უქმნის სახალხო დამცველის მანდატის სანდოობას და მისი კონსტიტუციური უფლებამოსილების განხორციელებას. აღსანიშნავია ისიც, რომ სავარაუდო კანონდარღვევის ფაქტი ჩადენილია სახელმწიფო-პოლიტიკური თანამდებობის პირის მიერ და გავრცელებული კადრების გადაცემა მოხდა საჯაროდ. აღნიშნულიდან გამომდინარე, ვფიქრობთ, რომ აღნიშნული ფაქტთან დაკავშირებით აუცილებელია სახელმწიფო ინსპექტორმა დაიწყოს მოკვლევა, რის გამოც, მოგმართავთ თხოვნით, გამოიყენოთ კანონმდებლობით გათვალისწინებული შესაძლებლობა და განცხადებაში მითითებულ ფაქტებთან დაკავშირებით მოახდინოთ შესაბამისი რეაგირება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) განცხადებით, იუსტიციის სამინისტროს მიერ ომბუდსმენის წარმომადგენლისა და პატიმრის ჩანაწერის გამოქვეყნება პერსონალურ მონაცემთა დაცვის კანონმდებლობას არღვევს. „გავრცელებულ ვიდეოჩანაწერთან დაკავშირებით მინისტრმა აღნიშნა, რომ ვიდეოში ჩანს, თუ როგორ მიირთმევს სახალხო დამცველის წარმომადგენელი პატიმრის მიერ მომზადებულ ყავას, ასევე შოკოლადს, ეწევა მის სიგარეტს და სარგებლობს პატიმრისთვის განკუთვნილი სველი წერტილით. მითითებული ვიდეოს შენახვითა და გასაჯაროებით უხეშად დაირღვა „პერსონალურ მონაცემთა დაცვის შესახებ“ საქართველოს კანონის პრინციპები და დამუშავების საფუძვლები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს განცხადებას ინსპექტორის შერჩევის პროცესის მიმდინარეობის შესახებ. „უცნობია დამოუკიდებელი ინსპექტორის შესარჩევ კონკურსში მონაწილეთა ვინაობა, დახურულ ფორმატში ჩატარებული გასაუბრებების გამო, სამოქალაქო სექტორის წარმომადგენლებს ასევე არ მოგვეცა პროცესზე დაკვირვების შესაძლებლობა. სასამართლო სისტემაში კლანის გავლენების და მასსა და მმართველ გუნდს შორის არსებული მანკიერი გარიგების გათვალისწინებით, კონკურსის გაუმჭვირვალედ ჩატარება კიდევ უფრო ამცირებს შერჩეული კანდიდატის მიმართ საზოგადოების ნდობას“, ნათქვამია განცხადებაში. სრულად... წყარო: www.transparency.ge

თბილისი. საერთაშორისო გამჭვირვალობა - საქართველოს (TI) იურისტების დამხარებით, მოქალაქე ციცინო ნემსაძემ, მართლზომიერ მფლობელობაში არსებული 2200 კვ.მ. მიწის ნაკვეთი და მასზე განთავსებული შენობა-ნაგებობა საკუთრებად დაირეგისტრირა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, 4 დეკემბერს ადამიანის უფლებათა ევროპულმა სასამართლომ ნიკოლო ღვინიაშვილის გენდერის სამართლებრივი აღიარების საქმის არსებითი განხილვა დაიწყო. „კერძოდ, სასამართლომ საქართველოს მთავრობას, როგორც მოპასუხე სახელმწიფოს, ნიკოლო ღვინიაშვილის საქმესთან დაკავშირებით შესაბამისი კითხვებით მიმართა. მომჩივანი, ნიკოლო ღვინიაშვილი არის ტრანსგენდერი მამაკაცი, რომელიც ადრეული ასაკიდან თავს მამაკაცად აიდენტიფიცირებს. მიუხედავად აღნიშნულისა, სახელმწიფო ორგანოებმა მას უარი უთხრეს საიდენტიფიკაციო დოკუმენტებში სასურველი გენდერის ჩაწერაზე იმ მიზეზით, რომ მას არ ჰქონდა წარდგენილი ანატომიური სქესის შეცვლის დამადასტურებელი საბუთი“, ნათქვამია ორგანიზაციის ვებგვერდზე. სრულად... წყარო: gyla.ge ფოტო: რადიო თავისუფლება

თბილისი. საია-მ საქართველოს პარლამენტს წარუდგინა დასკვნა პარლამენტის წევრის, ირაკლი სესიაშვილის მიერ ინიცირებულ კანონპროექტზე „ინფორმაციული უსაფრთხოების შესახებ“ საქართველოს კანონში ცვლილების შეტანის თაობაზე. „აღნიშნული კანონპროექტით ოპერატიულ-ტექნიკურ სააგენტოს პირდაპირი წვდომა ექნება საჯარო დაწესებულებების ინფორმაციაზე, მათ შორის პირადი სახის ინფორმაციასა და ქსელურ სენსორებზე, ხოლო ინტერნეტ პროვაიდერების მეშვეობით გაცვლილ ინფორმაციაზე, მას არაპირდაპირ ექნება წვდომა, რაც საშუალებას მისცემს სააგენტოს, გააკონტროლოს ინტერნეტში გასული ნებისმიერი ინფორმაცია. საყურადღებოა ისიც, რომ აღნიშნული კანონპროექტის განხილვის პროცესი მიმდინარეობს არსებითი დარღვევებით, რადგან ითვალისწინებს ძირითად უფლებათა შეზღუდვის მნიშვნელოვან საფუძვლებს, ხოლო განხილვაში სავალდებულო კომიტეტის სახით არ მონაწილეობს ადამიანის უფლებათა დაცვისა და სამოქალაქო ინტეგრაციის კომიტეტი. ზემოაღნიშნულიდან გამომდინარე, მოვუწოდებთ საქართველოს პარლამენტს, წარმართოს საკანონმდებლო პროცესი ყველა შესაბამისი კომიტეტის ჩართულობით, არ დაუშვას კანონპროექტის მიღება შემოთავაზებული ფორმით და კანონპროექტის განხილვა მოხდეს მხოლოდ ფართო საზოგადოებრივი ჩართულობისა და დისკუსიის შედეგად“, - წერია დასკვნაში. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC), აქამდე გასაიდუმლოებულ, თემირლან მაჩალიკაშვილის საქმეს გაეცნო.  „მიმდინარე წლის 10 იანვარს, როდესაც „მაჩალიკაშვილი და სხვები საქართველოს წინააღდეგ“ საქმეზე ევროპულმა სასამართლომ არსებითი განხილვა დაიწყო და საქართველოს მთავრობას საქმის მასალების სრული გაზიარება მოსთხოვა, ჩვენ მოგვეცა საქმის საიდუმლო მასალების გაცნობის შესაძლებლობა“, - აღნიშნულია ორგანიზაციის მიერ გავრცელებულ გაცხადებაში, - „მთლიანობაში, ჩვენი შეფასებით მიმდინარე გამოძიება ფორმალური, არაეფექტიანი და ილუზორულია და გამოძიების პროცესში აშკარად გამოჩნდა სუს-ის თვითნებური ინტერვენცია, რამაც გამოძიების ინსტიტუციური დამოუკიდებლობის ფუნდამენტური პრინციპი დაარღვია“.  სრულად...  წყარო: https://emc.org.ge

თბილისი. ყოფილი გენერალური პროკურორის, შალვა თადუმაძის უზენაესი სასამართლოს მოსამართლედ დანიშვნის შემდეგ, საპროკურორო საბჭოს ახალი გენერალური პროკურორის დანიშვნის ვალდებულება ექმნება. ამასთან დაკავშირებით, კოალიცია სამართლიანი და გამჭვირვალე მართლმსაჯულებისთვის, განცხადებას ავრცელებს.  „იმისათვის რომ პროცესის მიმართ არსებობდეს მაღალი საზოგადოებრივი ნდობა, აუცილებელია: საპროკურორო საბჭომ შეიმუშავოს კონკურსის ჩატარების პროცედურები და კრიტერიუმები, რაც, თავის მხრივ, უზრუნველყოფს სამოქალაქო/პროფესიული ჯგუფების უფრო აქტიურ ჩართვას კანდიდატების შერჩევის პროცესში; კანდიდატების შერჩევა-წარდგენასთან დაკავშირებით მიღებულ თითოეულ გადაწყვეტილებაში საბჭომ დაასაბუთოს, რომ კანდიდატები აკმაყოფილებენ გენერალური პროკურორის თანამდებობის დაკავებისთვის საჭირო კრიტერიუმებს; მმართველმა პოლიტიკურმა ძალამ აიღოს პასუხისმგებლობა, რომ გენერალურ პროკურორს არ შეარჩევს ვიწრო-პარტიული ინტერესით და პარლამენტში მიღებული საბოლოო გადაწყვეტილება დაეფუძნება სხვადასხვა პოლიტიკურ ძალას შორის კონსენსუსს“, - ვკითხულობთ განცხადებაში.  სრულად...  წყარო: https://idfi.ge

GIZ-ის სამართლის პროგრამა აქვეყნებს შედარებითი სამართლის ქართულ-გერმანული ჟურნალის, მე-4 გამოცემას. "ქვემოთ მოცემული ბმულიდან შეგიძლიათ ჩამოტვირთოთ გამოცემის ელ-ვერსია. ასევე, გიწვევთ ყველა დაინტერესებულ ავტორს ჟურნალის შემდგომ გამოცემებში მონაწილეობისთვის". გამოცემის ბმული... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) დეკანოზ გიორგი მამალაძის მდგომარეობას აფასებს. „როგორც საზოგადოებისთვის ცნობილია, საქართველოს პრეზიდენტმა შობის დღესასწაულთან დაკავშირებით მსჯავრდებულთა შეწყალების ფარგლებში უარი თქვა დეკანოზის შეწყალებაზე, რითიც პრაქტიკულად შეუძლებელი გახდა სხვა სამართლებრივი პროცედურების გარეშე სასჯელაღსრულების დაწესებულების დატოვება და ადეკვატური მკურნალობის ჩატარება. აღნიშნულის გათვალისწინებით, დეკანოზის ჯანმრთელობის მდგომარეობის გათვალისწინებით, EMC საჭიროდ მიიჩნევს საქართველოს სისხლის სამართლის საპროცესო კოდექსი 283-ე მუხლით გათვალისწინებული სასჯელის მოხდის გადავადების მექანიზმის გამოყენებას, რაც გულისხმობს, რომ გ. მამალაძე უნდა ჰქონდეს შესაძლებლობა სასჯელაღსრულების დაწესებულების გარეთ ჩაიტაროს ადეკვატური მკურნალობა და ჯანმრთელობის მდგომარეობის გაუმჯობესების შემთხვევაში დაბრუნდეს სასჯელის მოხდის ადგილზე“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. არასამთავრობო ორგანიზაციები სახელმწიფო ინსპექტორს მოუწოდებენ პროკურატურას წურწუმიას საქმის გადაცემის მოთხოვნით მიმართოს. „ხელმომწერი არასამთავრობო ორგანიზაციები მივიჩნევთ, რომ 2020 წლის 2 იანვარს, 24 წლის ახალგაზრდის, მურად წურწუმიას მიმართ ჩადენილი დანაშაული, რასაც მისი სიცოცხლე შეეწერა, სახელმწიფო ინსპექტორის სამსახურმა უნდა გამოიძიოს. შესაბამისად მოვუწოდებთ სახელმწიფო ინსპექტორს, გამოიყენოს კანონმდებლობით მის ხელთ არსებული ბერკეტები და საქმის გამოსაძიებლად გადასაცემად შესაბამისი მოთხოვნით პროკურატურას მიმართოს“, ნათქვამია ერთობლივ განცხადებაში. სრულად... წყარო: gyla.ge

2020 წლის 8 იანვარს, ადამიანის უფლებებს სწავლებისა და მონიტორინგის ცენტრს (EMC) ევროსასამართლოსგან ოფიციალურად ეცნობა, რომ სასამართლოს გადაწყვეტილებით, საქმეზე „მაჩალიკაშვილები და სხვები საქართველოს წინააღმდეგ“ სადავო პროცედურების განხილვა დაიწო.  ორგანიზაციის მიერ გავრცელებული ინფორმაციის თანახმად, ეს ნიშნავს იმას, რომ ევროსასამართლოს მიერ, მხარეებისთვის მიცემული 12 კვირიანი ვადა, მეგობრული მორიგების შესაძლებლობის განსახილველად ამოიწურა და მხარეებმა მორიგებაზე უარი განაცხადეს. სადავო პროცედურების ფარგლებში, მთავრობას განესაზღვრა ვადა 2020 წლის 31 მარტამდე ევროსასამართლოს წარუდგინოს საკუთარი მოსაზრებები მაჩალიკაშვილების ოჯახის განაცხადთან დაკავშირებით, ასევე უპასუხოს სასამართლოს მიერ დასმულ კითხვებსა და მოთხოვნებს.  სრულად...  წყარო: ორგანიზაციის ვებგვერდი

თბილისი. კოალიციამ დამოუკიდებელი და გამჭვირვალე მართლმსაჯულებისთვის უზენაესი სასამართლოს მოსამართლეობის კანდიდატების შეფასება მოამზადა.  „პირველად საქართველოს ისტორიაში, უზენაესი სასამართლოს მოსამართლეები უვადოდ დაინიშნენ. კოალიცია დამოუკიდებელი და გამჭვირვალე მართლმსაჯულებისათვის ყურადღებით აკვირდებოდა ამ პროცესის ყველა ეტაპს. წინამდებარე ნაშრომი აფასებს უზენაესი სასამრთლოს მოსამართლეობის კანდიდატებს პარლამენტის საკომიტეტო მოსმენების ანალიზის საფუძველზე. დოკუმენტში მოცემულია 19 კანდიდატის შეფასება „საერთო სასამართლოების შესახებ“ საქართველოს ორგანული კანონით გათვალისწინებული კეთილსინდისიერებისა და კომპეტენტურობის კრიტერიუმების მიხედვით“, - აღნიშნულია შეფასებაში.  შეფასება წყარო: კოალიციის ვებგვერდი

თბილისი. საქართველოს პრეზიდენტის უარს, - შეიწყალოს გიორგი მამალაძე, საქართველოს სახალხო დამცველი განცხადებით ეხმიანება.  „საქართველოს სახალხო დამცველი საზოგადოებას კიდევ ერთხელ შეახსენებს ე.წ. ციანიდის საქმის გამოძიებისა და სასამართლო ეტაპზე გამოვლენილ არსებით ხარვეზებს, რასაც ეფუძნებოდა სახალხო დამცველის მიერ მის შეწყალებასთან დაკავშრებით გაკეთებული განცხადებები“, - ვკითხულობთ განცხადებაში, - „როგორც გამოძიების, ისე - დახურული სასამართლო პროცესის სრულყოფილი შესწალის შედეგად სახალხო დამცველმა გამოაქვეყნა მონიტორინგის ანგარიში, სადაც მითითებულია გამოძიების ეტაპზე დაშვებული ისეთ საპროცესო ხარვეზებზე, რომლებიც სასამართლო განხილვის დროს არ გამოსწორდა და გადამწყვეტი გავლენა მოახდინა პროცესის საბოლოო შედეგზე“.  სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) საქართველოს პრეზიდენტის მიერ დეკანოზ გიორგი მამალაძის შეწყალებაზე უარის გადაწყვეტილებას ეხმიანება.  „ის დასაბუთება, რომელიც პრეზიდენტს აღნიშნულ გადაწყვეტილებას დაედო საფუძვლად, არარელევანტურია და აცდენილი თავად შეწყალების კონცეფციასა და მიზანს“, - ვკითხულობთ EMC-ის მიერ გავრცელებულ განცხადებაში, - „სამწუხაროა, რომ პრეზიდენტმა ამ საქმეზე უფლებების აღდგენისა და ჰუმანური მიდგომის რესურსი არ გამოიყენა და სასულიერო პირი მისი ჯანმრთელობის მდგომარეობის მიუხედავად, კვლავ პატიმრობაში რჩება. აღნიშნული გადაწყვეტილება შეწყალების მექანიზმის მიმართ ჰუმანურ მოლოდინებს ამძიმებს და ის პრეზიდენტის ხელში თვითნებური პოლიტიკური ბერკეტი უფრო ჩანს, ვიდრე ადამიანის უფლებების და ჰუმანიზმის დაცვაზე ორიენტირებული მექანიზმი“.  სრულად...  წყარო: https://emc.org.ge

თბილისი. პარლამენტისათვის უზენაესი სასამართლოს მოსამართლეობის 6 კანდიდატის წარდგენასთან დაკავშირებით, სახალხო დამცველი განცხადებას ავრცელებს.  „გუშინ, 26 დეკემბერს იუსტიციის უმაღლესმა საბჭომ საქართველოს პარლამენტს უზენაესი სასამართლოს მოსამართლეობის 6 კანდიდატი წარუდგინა. შერჩევის პროცესში კვლავ ის ხარვეზები გამოვლინდა, რომელთა შესახებაც სახალხო დამცველი წინა ეტაპებზე მიუთითებდა“, - აღნიშნულია განცხადებაში“, - „6-ვე კანდიდატმა მიმდინარე წლის ზაფხულში იუსტიციის უმაღლეს საბჭოში გასაუბრება გაიარა და შეფასდა ქულებით, 1 კანდიდატი (პაატა სილაგაძე) კი უკვე იყო წარდგენილი პარლამენტისთვის, გასაუბრება გაიარა იურიდიულ საკითხთა კომიტეტში, თუმცა ვერ მიიღო საკმარისი მხარდაჭერა უზენაესი სასამართლოს მოსამართლედ ასარჩევად. 48 კანდიდატის1ჯამში, მიღებული ქულებით, აღნიშნული 6 კანდიდატი იკავებდა მე-14, მე-19, 21-ე, 27-ე, 30-ე და 32-ე სარეიტინგო ადგილს. იუსტიციის უმაღლეს საბჭოს პარლამენტისათვის არც პირველ ეტაპზე და არც ახლა არ წარუდგენია კანდიდატები, რომლებიც იკავებდნენ მე-13, მე-17, მე-18, 25-ე, 28-ე, 29-ე და 31-ე სარეიტინგო ადგილს. აღნიშნული ცხადყოფს, რომ კანდიდატთა კომპეტენტურობის ქულებით შეფასების მიუხედავად, ქულების რაოდენობა არ იყო განმსაზღვრელი ფაქტორი კანდიდატების შერჩევისას. ამავდროულად, ქულების ანონიმურად და დაუსაბუთებლად მინიჭების გამო, იმის თქმაც რთულია, რომ ყველაზე მაღალი ქულების/შეფასების მქონე კანდიდატები სხვა კანდიდატებზე უკეთესები არიან კომპეტენტურობითა და კეთილსინდისიერებით“.  სრულად... წყარო: http://ombudsman.ge

თბილისი. „კოალიცია მედიის ადვოკატირებისათვის“ მოუწოდებს ფინანსთა სამინისტროს შექმნას თანაბარი საგადასახადო პირობები მაუწყებლებისათვის და საბიუჯეტო დავალიანების დაფარვის პროცესი გახადოს გამჭვირვალე და სამართლიანი. „ტელეკომპანიების, TV პირველის, რუსთავი 2-ის, კავკასიის, ასევე რამდენიმე რეგიონული არხის ანგარიშებზე, საბიუჯეტო დავალიანების გადაუხდელობის გამო, შემოსავლების სამსახურმა საინკასო დავალება წარადგინა. მსგავს ავტომატურ სანქციას საქართველოს ხელისუფლება წლების განმავლობაში არ იყენებდა მსხვილი მაუწყებლების მიმართ“, - აღნიშნულია კოალიციის მიერ გავრცელებულ განცხადებაში. სრულად...  წყარო: https://www.qartia.ge