თბილისი. სახალხო დამცველს მიაჩნია, რომ 2019 წლის 18 ნოემბერს პარლამეტთან აქციის დროს დაკავებული პირების საქმეებზე თბილისის საქალაქო სასამართლოში მიმდინარე პროცესები ადამიანის უფლებების დაცვის მინიმალურ სტანდარტებს ვერ აკმაყოფილებდა. „2019 წლის 19-20 ნოემბერს დასრულდა ადმინისტრაციული წესით დაკავებული 12 პირის სასამართლო განხილვა, სადაც 10 პირს სხვადასხვა ვადით პატიმრობა 1 პირს - ჯარიმა, ხოლო ერთს სიტყვიერი გაფრთხილება შეეფარდა. ორივე დღეს სახალხო დამცველის რწმუნებულები მთელი დღის განმავლობაში აკვირდებოდნენ სასამართლო განხილვების მიმდინარეობას. ამ პირთა დაკავების შემდგომი და სასამართლო პროცესი საპროცესო დარღვევებით წარიმართა, რაც სწრაფ და სათანადო რეაგირებას საჭიროებს“, - აღნიშნულია სახალხო დამცველის განცხადებაში. სრულად...  წყარო: http://ombudsman.ge

თბილისი. საქართველოს ახალგაზრდა იურისტთა ასოციაციის განცხადებით, გენერალურმა პროკურატურამ მაკო გომურს სისხლის სამართლის საქმის მასალები სრულად არ გააცნო. „20-21 ივნისის მოვლენების დროს დაზარალებულ მაკო გომურს გენერალურმა პროკურატურამ შესაბამისი სტატუსი 2019 წლის 11 ნოემბერს მიანიჭა. აღნიშნულის შემდგომ, საიას ადვოკატებმა, რომლებიც მაკო გომურის ინტერესებს იცავენ, მოითხოვეს სისხლის სამართლის საქმის მასალების გაცნობა. 21 ნოემბერს, პროკურატურამ ადვოკატებს და დაზარალებულს სისხლის სამართლის საქმეში არსებული მასალები არასრულად გააცნეს, რითაც დაზარალებულს წაერთვა შესაძლებლობა, შეემოწმებინა და განესაზღვრა საქმეში არსებული დოკუმენტები იყო თუ არა მის შემთხვევასთან შემხებლობაში“, - ვკითხულობთ საიას განცხადებაში, - „მოვუწოდებთ საქართველოს გენერალურ პროკურატურას: მისცეს მაკო გომურს და მის ადვოკატებს საშუალება, გაეცნონ სისხლის სამართლის საქმის მასალებს სრულად; განახორციელოს მასზე დაკისრებული მოვალეობა და ჩაატაროს სრულყოფილი და ყოველმხრივი გამოძიება, მითუმეტეს იმის გათვალისწინებით, რომ მაკო გომურისთვის მიყენებული დაზიანებიდან უკვე 5 თვეზე მეტი გავიდა“. სრულად...  წყარო: https://gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ბათუმის მეჩეთის საქმეზე სასამართლო გადაწყვეტილებას აანალიზებს. „ზემოთ აღნიშნულის გათვალისწინებით, მიგვაჩნია, რომ სასამართლოს მიერ დადგენილი დისკრიმინაციის აღმოფხვრის ერთადერთი გზა შეიძლება იყოს ახალი ადმინისტრაციული წარმოების ფარგლებში მოსარჩელის მოთხოვნის დაკმაყოფილება და შესაბამისი აქტების გამოცემა ბათუმის მერიის მხრიდან“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. თბილისის ადამიანის უფლებათა სახლი და მისი წევრი ორგანიზაციები შეშფოთებას გამოთქვამენ საქართველოში ბოლო პერიოდში განვითარებული მოვლენების გამო და მოუწოდებენ ხელისუფლებას დაიცვან უფლებადამცველების და აქტივისტების უფლებები.  „იმ პირობებში, როდესაც სასამართლო დამოუკიდებლობა პრობლემატურ საკითხად რჩება ქვეყნაში და საქმე ეხება მმართველი პოლიტიკური ძალის საწინააღმდეგო პოლიტიკური პროტესტის ფარგლებში შესაძლო გადაცდომას, დამოუკიდებელმა მოსამართლემ სახდელის დაკისრებისას სასამართლოს მიუკერძოებლობის ეჭვები უნდა გააქარწყლოს, და არ გააღრმავოს“, - აღნიშნულია განცხადებაში, - „თბილისის ადამიანის უფლებათა სახლი და მისი წევრი ორგანიზაციები მოუწოდებენ ხელისუფლებას, მაქსიმალურად დაიცვან უფლებადამცველების, სამოქალაქო აქტივისტების, ოპოზიციური პარტიების წევრებისა თუ მათი მხარდამჭერების გამოხატვის თავისუფლება და ამ თავისუფლების ყველა ფორმა, შეწყვიტონ პოლიტიკურად მოტივირებული დევნა და სასამართლო პროცესები წარიმართოს სამართლიანი სასამართლოს და სხვა კონსტიტუციური ღირებულებების დაცვით“.  სრულად...  წყარო: https://hrht.ge

თბილისი. „კონსტიტუციის 42-ე მუხლი“ ჩინჩალაძის, გეწაძის და მიქაუტაძის მიერ საქმეთა განაწილების სისტემით შესაძლო მანიპულირებაზე განმარტებებს ითხოვს.  „მიმდინარე წლის ოქტომბერ-ნოემბერში ორგანიზაცია „კონსტიტუციის 42-ე მუხლმა“ გამოითხოვა ინფორმაცია საქართველოს უზენაესი სასამართლოს პალატებში მოსამართლეთა შორის საქმეთა განაწილების შესახებ, რომლის საფუძველზეც გამოიკვეთა, რომ 2008-2015 წლებში უზენაესი სასამართლოს ადმინისტრაციულ პალატაში სისტემატურად ირღვეოდა საქმეთა განაწილების წესი, კერძოდ, ამ წლების განმავლობაში პალატის ერთ-ერთ კოლეგიაში შესული ყველა საქმე ეწერებოდა მხოლოდ ერთ მომხსენებელ მოსამართლეს. „კონტიტუციის 42-ე მუხლმა“ ინფორმაცია გამოითხოვა 2002 წლიდან დღემდე უზენაეს სასამართლოში შესულ და განაწილებულ საქმეებზე“, - ვკითხულობთ ორგანიზაციის მიერ განცხადებაში, - „უზენაესი სასამართლოს მიერ მოწოდებული ეს ინფორმაცია ბევრ კითხვის ნიშნებს აჩენს და მნიშვნელოვნად მიგვაჩნია, ამ კითხვებზე, პირველ რიგში, განმარტებები გააკეთოს თავად უზენაესმა სასამართლომ, ხოლო კანონდარღვევის აღმოჩენის შემთხვევაში, მასალები უნდა გადაეგზავნოს შესაბამის ორგანოებს რეაგირებისთვის“.  სრულად...  წყარო: https://article42.ge

თბილისი. 18 ნოემბრიდან დაიწყო ახალი სასწავლო მოდულის „კერძო აღმასრულებლის საქმიანობისთვის აუცილებელი პროფესიული უნარების განვითარება“ პრაქტიკაში განხორციელება. „პირველი ნაკადის ფარგლებში კერძო აღმასრულებლის საქმიანობის პრაქტიკულ საკითხებს გაეცნობა და გადამზადდება 25 სახელმწიფო აღმასრულებელი. სასწავლო მოდულის დანერგვა და განხორციელება მიზნად ისახავს საჯარო აღმასრულებლების მომზადებას კერძო საქმიანობისთვის“, ნათქმია GIZ-ის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი ეხმიანება 2019 წლის 18 ნოემბერს დაკავებულ პირთა სასამართლო პროცესებს. „ამ ეტაპზე ჩვენს ხელთ არსებული ინფორმაციით დაკავებულთა ნაწილი დაკავებულია 18 ნოემბერს, სამუშაო დროს, შესაბამისად მათ მიმართ დაკავების მაქსიმალური ვადა საქართველოს კანონმდებლობის მიხედვით არის 12 საათი. ამ ვადის გასვლის შემდგომ, აუცილებელია მათი გათავისუფლება. აქვე გვსურს ხაზი გავუსვათ იმ ფაქტს, რომ ადმინისტრაციულად დაკავებულების საქმეებს განიხილავს მხოლოდ ერთი მოსამართლე, რაც ბუნებრივია ართულებს სწრაფი მართლმსაჯულების განხორციელებას. აუცილებელია დამატებით სხვა მოსამართლეთა პროცესში ჩართულობა, რათა არ დაირღვეს დაკავებულთა საპროცესო უფლებები. მოვუწოდებთ თბილისის საქალაქო სასამართლოს, დროულად, კანონმდებლობის მოთხოვნათა დაცვით და სამართლიანად წარმართონ სასამართლო განხილვები“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. საია მოუწოდებს ხელისუფლებას დროულად და აქტიურად იმუშაოს ეგრეთ წოდებული სამხრეთ ოსეთის ოკუპაციური რეჟიმის უკანონო პატიმრის, ვაჟა გაფრინდაშვილის გათავისუფლების საკითხზე. „გავრცელებული ინფორმაციით, ვააჟა გაფრინდაშვილის ე.წ. ადმინისტრაციულ საზღვართან მისვლის მიზანიც ახალგორში მცხოვრები პირისთვის სათანადო სამედიცინო დახმარების აღმოჩენა იყო. კერძოდ, ვაჟა გაფრინდაშვილის ოჯახი ერთ-ერთ ვერსიად განიხილავს, რომ ქართველი ექიმი ოკუპირებულ ახალგორში ღრმა ჭაში ჩავარდნილი ადგილობრივი მცხოვრების დასახმარებლად გაემართა, რომელსაც თბილისში გადმოყვანაზე და კვალიფიციური სამედიცინო დახმარების მიღებაზე უარი უთხრეს“, - აღნიშნულია ორგანიზაციის მიერ გავრცელებულ განცხადებაში, - „საია მოუწოდებს საქართველოს ხელისუფლებას, სწრაფად და ეფექტიანად მიიღოს ყველა შესაძლო ზომა ვაჟა გაფრინდაშვილის უკანონო პატიმრობიდან გათავისუფლების საკითხზე; მაქსიმალურად გამოიყენოს ყველა შესაძლო საერთაშორისო სამართლებრივი მექანიზმები, რათა დაიძლიოს ოკუპირებულ ტერიტორიებზე არსებული ჰუმანიტარული კრიზისი და იქ მცხოვრებ პირებს მიეცეთ შესაძლებლობა მიიღონ საბაზისო საჭიროებები, მათ შორის მაღალკვალიფიციური სამედიცინო დახმარება". საია, ასევე მოუწოდებს საერთაშორისო თანამეგობრობასა და შესაბამის საერთაშორისო ორგანიზაციებს, დაეხმაროს ქართულ მხარეს აღნიშნული პრობლემების მოგვარებაში; გაააქტიურონ ძალისხმევა აფხაზეთსა და ცხინვალის რეგიონში უფლებების მასობრივი დარღვევის წინააღმდეგ საბრძოლველად და ოკუპირებულ ტერიტორიებზე მათი წარმომადგენლობის სადამკვირვებლო საქმიანობის განსახორციელებლად“. სრულად...  წყარო: https://gyla.ge/ge

თბილისი. „ადამიანის უფლებების სწავლებისა და მონიტორინგის ცენტრმა (EMC)“ საკონსტიტუციო სასამართლოს, სახალხო დამცველის, პარლამენტის და სხვა უწყების წარმომადგენელთა მონაწილეობით გამართა დისკუსია 2018 წლის 2 აგვისტოს საკონსტიტუციო სასამართლოს მიერ, ნარკოპოლიტიკის შესახებ მიღებულ გადაწყვეტილებაზე. „საკონსტიტუციო სასამართლომ არაკონსტიტუციურად ცნო საპატიმრო სასჯელის გამოყენება ისეთი ნარკოტიკული საშუალებების მოხმარებისა და მათი ერთჯერადი მოხმარებისთვის საჭირო ოდენობის შეძენა-შენახვისთვის, რომლებიც არ იწვევს სწრაფ შეჩვევას ან/და აგრესიულ ქცევას. გადაწყვეტილება არაერთგვაროვანი ინტერპრეტაციის საგანი გახდა ნარკოპოლიტიკის საკითხზე მომუშავე აქტორებს შორის, რადგან პრაქტიკაში საკმაოდ რთულია, აღნიშნული კრიტერიუმით მკაფიოდ გაიმიჯნოს ნარკოტიკული საშუალებები და დადასტურებულად ითქვას, რომელი სუბსტანცია იწვევს სწრაფ შეჩვევასა და აგრესიულ ქცევას“, ნათქვამია ორგანიზაციის გვერდზე სოციალურ ქსელში. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი (EMC)“ 2019 წლის 2 დეკემბერს ორგანიზებას გაუწევს ერთდღიან ტრენინგს სისხლის სამართლის ადვოკატებისთვის, თემაზე “მოქმედი ნარკოპოლიტიკა და ადამიანის უფლებები”.  „ტრენინგის მიზანია, სისხლის სამართლის ადვოკატებთან ერთად მოქმედი ნარკოპოლიტიკის გამოწვევების განხილვა, ნარკოპოლიტიკის ცვლილების მიზნით მომზადებული საკანონმდებლო ცვლილებების შინაარსის განხილვა, ნარკოტიკული დანაშაულის მიმართ სახელმწიფოს არაჰუმანურ პოლიტიკასთან დაკავშირებით ცნობიერების ამაღლება და მგრძნობელობის გაზრდა სისხლის სამართლის ადვოკატებისთვის. ამ მიზნით, ტრენინგის ფარგლებში მიმოხილული იქნება ნარკოტიკულ დანაშაულებთან მიმართებით საკანონმდებლო და მართლმსაჯულების პრობლემები, საკონსტიტუციო სასამართლოს როლი ნარკოპოლიტიკის ლიბერალიზაციის თვალსაზრისით, წამალდამოკიდებულების მკურნალობასთან დაკავშირებული მიდგომებისა და ზიანის შემცირების საკითხები“, ნათქვამია ორგანიზაციის ვებგვერდზე. სრულად... წყარო: emc.org.ge

იმერეთი. საია 2016 წლიდან იცავდა წყალტუბოს მუნიციპალიტეტის მერიის ჯანმრთელობისა და სოციალური დაცვის სამსახურიდან გათავისუფლებულ პირს. იგი დავობდა სამსახურიდან უკანონოდ, პოლიტიკური ნიშნით გათავისუფლების გამო.  2019 წლის 25 ოქტომბერს, მხარეები მორიგდნენ. მორიგების პირობების თანახმად, საიას ბენეფიციარი იძულებით გაცდენილი პერიოდის შრომით ანაზღაურებას - 20.000 ლარს მიიღებს.  სრულად...  წყარო: gyla.ge

თბილისი. GIZ სამართლის პროგრამა წარმოგიდგენთ შედარებითი სამართლის ქართულ-გერმანული ჟურნალის მე-3 გამოცემას, რომელიც თინათინ წერეთლის სახელობის სახელმწიფოსა და სამართლის ინსტიტუტთან თანამშრომლობის ფარგლებში დაფუძნდა. „ჟურნალი ქართველი და უცხოელი მეცნიერებისთვის ქმნის სამართლებრივ საკითხებზე მსჯელობის პლატფორმას“. ჟურნალი...  წყარო: ორგანიზაციის გვერდი სოციალურ ქსელში სამართალი

თბილისი. გენდერული საინფორმაციო პორტალის თანახმად, მაკო გომური დაზარალებულად ცნეს. „პროკურატურამ „გავრილოვის ღამის“ ერთ-ერთი დაზარალებული მაკო გომური, რომელმაც თვალი დაკარგა, დაზარალებულად ცნო. პროკურატურის ინფორმაციით, დაზარალებულის სტატუსი მიენიჭათ ომარ სეხნიაშვილსა და მირზა ლიპარტელიანსაც, თუმცა არა გიორგი სულაშვილს, რომელმაც, მაკო გომურის მსგავსად, თვალი დაკარგა“. სრულად... წყარო: www.ginsc.net

თბილისი. საქართველოს ახალგაზრდა იურისტთა ასოციაცია (საია) 6 თვის მანძილზე პენსიის დაზოგვის გამო პენსიონერისათვის საპენსიო თანხის გადახდის შეჩერებას საია საკონსტიტუციო სასამართლოში ასაჩივრებს. „საიამ პენსიონერ მედია კვაჭაძის სახელით საკონსტიტუციო სასამართლოს მიმართა. წარდგენილი სარჩელით საია ითხოვს „სახელმწიფო პენსიის შესახებ“ კანონის და საქართველოს ჯანდაცვის მინისტრის ბრძანების იმ ნორმის არაკონსტიტუციურად ცნობას, რომელიც ითვალისწინებს პენსიის შეჩერებას, თუ პენსიონერმა 6 თვის განმავლობაში საბანკო ანგარიშზე დატოვა პენსია. პენსიონერს აქვს პენსიის განახლების მოთხოვნის უფლება, თუმცა მას აუნაზღაურდება მხოლოდ ერთი წლის პენსია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „ადამიანის უფლებების სწავლებისა და მონიტორინგის ცენტრმა“ (EMC) და „ინფორმაციის თავისუფლების განვითარების ინსტიტუტმა“ (IDFI) წარადგინეს ანგარიში „სასამართლო რეფორმის შედეგების შეფასება-დისციპლინური პასუხისმგებლობის სისტემა“. „ანგარიში მიზნად ისახავს, შეაფასოს მოსამართლეთა დისციპლინური პასუხისმგებლობის სისტემა, რომელიც ჩამოყალიბდა სასამართლო სისტემის რეფორმის „მესამე ტალღის“ ფარგლებში“. სრულად... წყარო: emc.org.ge

თბილისი. საქართველოს სახალხო დამცველმა საკონსტიტუციო სარჩელით მიმართა საქართველოს საკონსტიტუციო სასამართლოს და იუსტიციის უმაღლესი საბჭოს მიერ უზენაესი სასამართლოს მოსამართლის თანამდებობაზე ასარჩევად საქართველოს პარლამენტისათვის წარსადგენი კანდიდატების შერჩევის წესის არაკონსტიტუციურად ცნობა მოითხოვა.  სახალხო დამცველი მიიჩნევს, რომ იუსტიციის უმაღლეს საბჭოში საქართველოს უზენაესი სასამართლოს მოსამართლის თანამდებობაზე ასარჩევად საქართველოს პარლამენტისათვის წარსადგენი კანდიდატების შერჩევის წესი ეწინააღმდეგება საქართველოს კონსტიტუციით გარანტირებულ, მოქალაქის საჯარო თანამდებობის დაკავების (კონსტიტუციის 25-1), სამართლიან სასამართლოზე წვდომის უფლებებს (კონსტიტუციის 31-1 პირველი წინადადება) და დამოუკიდებელი და მიუკერძოებელი სასამართლოს უზრუნველმყოფელ პრინციპს (კონსტიტუციის 31-1).  საკონსტიტუციო სარჩელი ეფუძნება ვენეციის კომისიისა და ადამიანის უფლებებისა და დემოკრატიული ინსტიტუტების ოფისის (ეუთო/ოდირი) დასკვნებს, ასევე, მოსამართლეთა შერჩევის პროცესის მონიტორინგის (საქართველოს სახალხო დამცველი, ეუთო/ოდირი) შედეგად გამოვლენილ ფაქტობრივ გარემოებებს.  სრულად... წყარო: http://ombudsman.ge

თბილისი. 12 ივნისს საქართველოს პარლამენტს დასამტკიცებლად წარედგინა „სასამართლო რეფორმის მეოთხე ტალღად“ ცნობილი კანონპროექტი. კოალიცია დამოუკიდებელი და გამჭვირვალე მართლმსაჯულებისთვის თვლის, რომ „პროექტში დადებითად უნდა შეფასდეს მოსამართლეთა დისციპლინური პასუხისმგებლობის დაკისრების წინაპირობების დაკონკრეტება და სკოლის მსმენელთა შერჩევის პროცესის იუსტიციის უმაღლესი საბჭოსგან გამოცალკევება. ამავდროულად, პროექტში არის რამდენიმე სიახლე, რაც კრიტიკას იმსახურებს“. სრულად... წყარო: www.transparency.ge

თბილისი. ადამიანის უფლებათა ცენტრი ივლისის, აგვისტოს, სექტემბრისა და ოქტომბრის თვეების წარმატებული საქმეების შესახებ ჩანაწერს ავრცელებს.  მათ შორისაა ისეთი საქმეები, როგორიცაა: სასამართლოს მიერ თბილისის მერიისთვის თბილისის ზღვის ტერიტორიაზე გამაფრთხილებელი ბანერებისა და კედლის მოწყობის დავალება;  20 ივნისის აქციის დროს დაკავებულ პირთა საქმეებზე ადმინისტრაციული საქმის წარმოების შეწყვეტა;  საჯარო რეესტრის მიერ საოკუპაციო ხაზთან მდებარე მიწის ნაკვეთის მოქალაქისთვის საკუთრებაში დარეგისტრირების დავალება;  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) საკონსტიტუციო სასამართლოს სარჩელით მიმართა.  EMC არაკონსტიტუციურად მიიჩნევს კანონმდებლობის იმ ნორმებს, რომელიც ერთი მხრივ, გაფიცვის უფლების ფარგლებს, და მეორე მხრივ, მისი შეზღუდვის საფუძვლებსა და პროცედურებს ადგენს.  სრულად...  წყარო: emc.org.ge

თბილისი. საფარის ბენეფიციარს, რომელიც ქმართან გაცილებულია, ყოფილმა მეუღლემ იმის გამო უჩივლა, რომ შვილს ჩაცმულობასთან დაკავშირებით შენიშვნა მისცა. „შემაკავებელი ორდერის თანახმად, დედას აეკრძალა შვილთან ურთიერთობა 15 დღის ვადით. ბავშვის დედამ დახმარებისთვის კავშირ „საფარს“ მიმართა. „საფარის“ იურისტმა თეა თადაშვილმა დედის მიმართ გამოწერილი შემაკავებელი ორდერი სასამართლოში გაასაჩივრა. 2019 წლის 6 ნოემბრის გადაწყვეტილებით, თბილისის საქალაქო სასამართლოს ადმინისტრაციულ საქმეთა კოლეგიამ სარჩელი დააკმაყოფილა და დედის წინააღმდეგ გამოწერილი შემაკავებელი ორდერი გააუქმა“, ნათქვამია ორგანიზაციის ვებ-გვერდზე. სრულად... წყარო: sapari.ge

თბილისი. 7 ნოემბერს EMC-მ პრესკონფერენცია ჩაატარა და შეაფასა თემირლან მაჩალიკაშვილის სიცოცხლის ხელყოფის საქმის გამოძიების ფარგლებში ჩატარებული ახალი საგამოძიებო მოქმედებები, მათ შორის, სახელმწიფო უსაფრთხოების სამსახურის (სუს) ამჟამინდელი და ყოფილი მაღალჩინოსნების გამოკითხვის პროცესი. „სუს-ის მაღალი თანამდებობის პირების განმარტებებმა აჩვენა, რომ ამ სისტემაში კრიტიკულად მნიშვნელოვანი გადაწყვეტილებები, მათ შორის, სპეცრაზმისა და ლეტალური ძალის გამოყენების შესახებ, სათანადო ანალიზისა და ადეკვატური სამართლებრივი სტანდარტების გარეშე მიიღება. ცხადად ჩანს, რომ ამ პროცესში პრობლემურია სათანადო კოორდინაცია და არ არსებობს ფორმალურად გაწერილი პროცედურული სტანდარტები. უწყების შიგნით პროცესების ამ ფორმით ორგანიზება და გადაწყვეტილებების მიღების ეს წესი ადამიანის უფლებების დარღვევის ძალიან მაღალ რისკებს ქმნის და უკიდურესად შემაშფოთებელი პრაქტიკაა“, ნათქვამია ორგანიზაციის გვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, თბილისის საქალაქო სასამართლომ ლენტეხის მუნიციპალიტეტში „ხელედულა 3 ჰესის“ მშენებლობის პროექტზე გაცემული სკოპინგის დასკვნის კანონიერების საკითხის არსებითად განიხილვა დაიწყო. „საია სასამართლოში ლენტეხის ადგილობრივ მცხოვრებთა ინტერესებს იცავს და გარემოს დაცვისა და სოფლის მეურნეობის მინისტრის იმ ბრძანების ბათილად ცნობას ითხოვს, რომლითაც სკოპინგის დასკვნა დამტკიცდა. თბილისის საქალაქო სასამართლოს „ხელედულა 3 ჰესის“ საქმეზე საიას მიერ წარდგენილი შუამდგომლობები დააკმაყოფილა, მათ შორის დამოუკიდებელი გარემოსდაცვითი შეფასების ექსპერტის მამუკა გვილავასა და „მწვანე ალტერნატივას“ ექპსერტის დავით ჭიპაშვილის მიერ მომზადებული ექსპერტიზის დასკვნების საქმისათვის დართვის შესახებ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში