თბილისი. საქართველოს სახალხო დამცველი შინაგან საქმეთა სამინისტროს მოუწოდებს გატარდეს პროაქტიული პრევენციული ღონისძიებები „ქართული მარშის“ მიერ კინოფილმის „და ჩვენ ვიცეკვეთ“ ჩვენებისას თბილისისა და ბათუმის კინოთეატრების შესასვლელების ბლოკირების დაანონსებასთან დაკავშირებით. „სახალხო დამცველი განმარტავს, რომ შეკრებისა და მანიფესტაციის უფლებით დაცულია მხოლოდ მშვიდობიანი შეკრების შესაძლებლობა და არა იმგვარი ქმედებები, რომლებიც მიზნად ისახავს სხვათა უფლებებისა და თავისუფლებების შეზღუდვას. აღნიშნული მიზნით, შეკრებებისა და მანიფესტაციების შესახებ საქართველოს კანონი აქციის ორგანიზატორებს და მონაწილეებს გარკვეულ ვალდებულებებს აკისრებს, მათ შორის დაუშვებელია შეკრებისა და მანიფესტაციის ჩატარებისას შენობების შესასვლელების ბლოკირება“, - აღნიშნულია განცხადებაში. სრულად...  წყარო: http://ombudsman.ge

თბილისი. საზოგადოებრივი ორგანიზაციები 20-21 ივნისის მოვლენების შედეგად დაზარალებულებისთვის სამართლებრივი სტატუსის მინიჭებას მოითხოვენ და სპეციალურ განცხადებას ავრცელებენ.  „ხელმომწერი ორგანიზაციები ვეხმაურებით 20-21 ივნისის მოვლენების შედეგად დაზარალებული პირებისათვის სამართლებრივი სტატუსის მინიჭებაზე უარის თქმის ფაქტს და მოვუწოდებთ პროკურატურას, დროულად მოახდინოს ყველა დაზარალებული პირისათვის დაზარალებულის სტატუსის მინიჭება და საქმის დროული, სრულყოფილი და ობიექტური გამოძიება“, - ვკითხულობთ განცხადებაში, - „მოვუწოდებთ საქართველოს გენერალურ პროკურატურას: დაუყოვნებლივ მიანიჭოს დაზარალებულის სტატუსი ყველა იმ პირს, რომლებიც 20-21 ივნისის მოვლენების შედეგად სამართალდამცავთა ქმედებების შედეგად დაზიანდნენ; მიმდინარე საქმეზე დროულად ჩატარდეს ეფექტიანი, ობიექტური და მიუკერძოებელი გამოძიება; მაღალი საზოგადოებრივი ინტერესის გათვალისწინებით, პერიოდულად მოხდეს საზოგადოების ინფორმირებულობა საქმეზე მიმდინარე გამოძიების პროგრესის შესახებ“.  სრულად...  წყარო: article42.ge

თბილისი. საკონსტიტუციო სასამართლომ არსებითად განსახილველად მიიღო სარჩელი, რომელიც საიამ ირაკლი ჯუღელის სახელით წარადგინა. „ამ საქმეში საია დავობს საქართველოს ადმინისტრაციულ სამართალდარღვევათა კოდექსის 247-ე მუხლის მე-2 ნაწილის და 244-ე მუხლის კონსტიტუციურობის საკითხზე“. სრულად... წყარო: gyla.ge

თბილისი. საქართვლოს სახალხო დამცველმა შრომით ურთიერთობაში კერძო კომპანიის ხელმძღვანელის მიერ განხორციელებული სექსუალური შევიწროების ფაქტი დაადგინა.  საქმის ფაქტობრივი გარემოებების თანახმად, განმცხადებელი კომპანიაში გადიოდა სტაჟირებას. განმცხადებლის მითითებით, მისი უშუალო ხელმძღვანელის მხრიდან ადგილი ჰქონდა არასასურველ სექსუალური ხასიათის სიტყვიერ და ფიზიკურ ქმედებებს, რის გამოც განმცხადებელს შეექმნა დამამცირებელი სამუშაო გარემო და იძულებული გახდა, სამსახური დაეტოვებინა.  განმცხადებლის ინტერესებს სახალხო დამცველის აპარატში „საქართველოს ახალგაზრდა იურისტთა ასოციაცია“ წარმოადგენდა.  სრულად...  წყარო: http://ombudsman.ge

აჭარა. ღია საზოგადოების ფონდის ორგანიზებით, აჭარის ავტონომიური რესპუბლიკის საჯარო მოხელეებისთვის, დაიწყო ტრენინგები ანტიდისკრიმინაციული კანონმდებლობის აღსრულებასთან დაკავშირებით.  ტრენინგს წინ უძღვოდა კვლევა იმის შესახებ, თუ რამდენად ეფექტურად სრულდება პრაქტიკაში კანონი „დისკრიმინაციის ყველა ფორმის აღმოფხვრის შესახებ“; რამდენად გააზრებული აქვთ თანასწორობის პრინციპები საჯარო მოხელეებს და როგორ ახერხებენ ისინი ყოველდღიურ საქმიანობასა თუ კონკრეტულ კონტექსში თანასწორობის პრინციპის დაცვასა და დისკრიმინაციის შემთხვევების აღკვეთას.  კვლევა და ტრენინგი არის ნაწილი პროექტისა, რომელსაც ღია საზოგადოების ფონდის ევროინტეგრაციის პროგრამა ნიდერლანდების სამეფოს საელჩოს მხარდაჭერით ახორციელებს.  სრულად...  წყარო: https://osgf.ge

თბილისი. საქართველოს საკონსტიტუციო სასამართლომ დაგროვებითი საპენსიო სქემაში დასაქმებულთა ჩართვისა და დამსაქმებელთა შენატანის სავალდებულოობის არაკონსტიტუციურად ცნობის თაობაზე სარჩელი არსებითად განსახილველად მიიღო.  „სასამართლომ საფუძვლიანად მიიჩნია საპენსიო სქემაში დასაქმებულთა სავალდებულოდ ჩართვისა და მათ სასარგებლოდ დამსაქმებლის შენატანების დავალდებულების კონსტიტუციურობის შემოწმების მოთხოვნა საკუთრების უფლებასთან მიმართებით. საკონსტიტუციო სასამართლომ სარჩელი წარმოებაში არ მიიღო და შესაბამისად, თანასწორობის უფლებასთან მიმართებით კონსტიტუციურობის შემოწმების საფუძვლები ვერ დაინახა სახელმწიფოს მხრიდან საპენსიო სქემის მონაწილეთა სასარგებლოდ შენატანების განხორციელების მარეგულირებელ ნორმების ნაწილში“, ნათქვამია საქართველოს დემოკრატიული ინიციატივის ვებგვერდზე.  სრულად... წყარო: gdi.ge

თბილისი. 19 ივნისს, „თბილისი პრაიდი“-ს ორგანიზატორებმა გიორგი თაბაგარმა, თამაზ სოზაშვილმა და მარიამ კვარაცხელიამ მიიღეს მუქარის შემცველი შეტყობინებები, სადაც მათი საქმიანობის გამო სიცოცხლის მოსპობით ემუქრებოდნენ.  „პარტნიორობა ადამიანის უფლებებისთვის (PHR) მიიჩნევს, რომ იმ პირობებში, როდესაც საქართველოში ლგბტქ+ თემის მიმართ დისკრიმინაციული ნიშნით ძალადობრივი დანაშაულის განხორციელების მაჩვენებელი საგანგაშოდ მაღალია, სახელმწიფოს მხრიდან მსგავს შემთხვევაზე არაეფექტური რეაგირება იწვევს სიძულვილით მოტივირებულ დანაშაულებზე დაუსჯელობის განცდას და წამახალისებელია ადამიანის უფლებების წინააღმდეგ მოქმედი პირებისა თუ ჯგუფებისთვის“, ნათქვამია ორგანიზაციის გვერდზე. სრულად... წყარო: phrgeorgia.wordpress.com

თბილისი. ASB საქართველომ, ევროკავშირის მხარდაჭერით გამართა საჯარო დებატი თემაზე „კერძო სექტორის ჩართულობა კანონთან კონფლიქტში მყოფი პირების რესოციალიზაციის პროცესში“. „მონაწილეებმა იმსჯელეს პატიმრების, ყოფილი პატიმრებისა და პრობაციონერების დასაქმების კუთხით არსებულ გამოწვევებსა და მათი გადაჭრის გზებზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის ანალიტიკოს, ნინო ნოზაძის ბლოგპოსტს: რამ შექმნა (კლანი) გავლენიანად. „თავდაპირველად საბჭო ლოიალური პირებისგან აკომპლექტებს სასამართლოს, შემდეგ თავმჯდომარეების მეშვეობით აკონტროლებს მათ საქმიანობას და ბოლოს, თუ ესეც არ აღმოჩნდა საკმარისი, დისციპლინური დევნის მექანიზმით იქვემდებარებს მას“, ნათქვამია ორგანიზაციის ვებგვერდზე. სრულად... წყარო: gyla.ge

სამოქალაქო განვითარების სააგენტოს (სიდა) ორგანიზებით, მიმდინარეობს სამუშაო შეხვედრა „ადგილობრივი თვითმმართველობებისა და საზოგადოებრივი ორგანიზაციების ჩართულობა არასრულწლოვანთა დანაშაულის პრევენციის პროცესში“.  „შეხვედრის მიზანია ადგილობრივ დონეზე, საჭიროებებზე მორგებული სერვისების შემუშავებასა და დანერგვაზე მსჯელობა კანონთან კონფლიქტში მყოფი და დანაშაულის ჩადენის რისკის ქვეშ მყოფი მოზარდებისთვის“, ნათქვამი ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (შაია) ინფორმაციით, 20-21 ივნისის მოვლენების დროს დაზარალებულებს სასამართლომ სტატუსის მინიჭებაზე უარი უთხრა. „სასამართლოში იმ 16 პირის საქმე განიხლებოდა (მათ შორის 8 ჟურნალისტი), რომელთა სისხლის სამართლის საქმეში საია თავიდანვე ჩაერთო. ყველა მათგანს სხვადასხვა სიმძიმის დაზიანება 20-21 ივნისს, სამართალდამცავთა მხრიდან სავარაუდოდ უფლებამოსილების გადამეტების შედეგად მიადგა. ნაწილ მათგანს, დაზიანებები რეზინის ტყვიების გამოყენების, ხოლო ზოგიერთ მათგანს - პოლიციელთა მხრიდან ფიზიკური ზემოქმედების შედეგად მიადგათ. სადავო არ არის ის გარემოება, რომ აღნიშნულმა პირებმა დაზიანებები 20-21 ივნისს მიიღეს. მიუხედავად ამისა, არც პროკურატურამ და არც სასამართლომ ისინი დაზარალებულებად არ ცნო“, ნათქვამია ორგანიზაციის გვერდზე სოციალურ ქსელში. სრულად... წყარო: gyla.ge

თბილისი. ადამიანის ულებების სწავლებისა და მონიტორინგის ცენტრი (EMC) პროკურატურის თანამშრომლის მიერ თანამდებობის დატოვების ფაქტს ეხმიანება. „მედიაში რამდენიმე დღის წინ გავრცელებული ინფორმაციის საფუძველზე, თანამდებობა დატოვა დიდუბე-ჩუღურეთის რაიონული პროკურატურის ერთ-ერთმა პროკურორმა, რომელიც აღნიშნულ ფაქტს სოციალურ ქსელში გამოეხმაურა და თანამდებობის დატოვების მიზეზად, უწყებაში არსებული არაერთი პრობლემა დაასახელა. შესაბამისმა ორგანოებმა სრულყოფილად უნდა შეისწავლონ არსებული ვითარება, დაადგინონ ერთი მხრივ, განცხადებაში მოყვანილი პრობლემების რეალურ ფაქტებთან შესაბამისობა, ხოლო მეორე მხრივ, უზრუნველყონ განმცხადებლის და მისი ოჯახის წევრების ნებისმიერი სახის ზემოქმედებისაგან დაცვა“, ნათქვამია განცხადებაში. სრულად... წყარო: emc.org.ge

თბილისი. პარტნიორობა ადამიანის უფლებებისთვის აღმასრულებელი დირექტორი, ანა არგანაშვილი ვებგვერდზე gadamikhade.ge გვიყვება გენდერული უთანასწორობის საკუთარი გამოცდილებაზე - ქალების ხმისა და შრომის იგნორირებაზე, დაუფასებლობაზე. კამპანიის მიზანია ხელი შეუწყოს გენდერული ნიშნით ანაზღაურებებს შორის სხვაობის აღმოფხვრას. „ბოლოს მქონდა შემთხვევა, როდესაც კაცების წრეში, როგორც იურისტმა გამოვთქვი აზრი და ამას ირონიული კომენტარი მოყვა, რომ ,,წარმოგიდგენიათ, ამდენი იურისტი ვართ აქ და ვერავინ მივხვდით ამას, მხოლოდ შენ’’-ო. თითქოს, მე სხვა ტიპის იურისტი ვარ. ასეთ შემთხვევებში მთავარი გამოწვევაა, რომ პირველადი შოკის ეტაპი ჩქარა გავიარო, გავიაზრო, თუ რა შეურაცხმყოფელი კომენტარი გაკეთდა ჩემ მიმართ და შემდეგ უკვე მოვახდინო ამის სახელდება. როდესაც ვეუბნები, რომ მისი კომენტარი იყო შეურაცხმყოფელი, შემდეგ უკვე იწყება საუბარი, რომ რა დროს ესაა, სხვა რამისთვის ვართ შეკრებილები და არ გვაქვს დრო იმის გასარკვევად, შენ თანასწორად იგრძენი იმ მომენტში თავი, თუ - არა“. სრულდ... წყარო: www.gadamikhade.ge

თბილისი. ცხინვალის დმი-ში პატიმრების ცემისა და არასათანადო მოპყრობის ფაქტთან დაკავშირებით, სახალხო დამცველი განცხადებას ავრცელებს.  „2019 წლის 22 ოქტომბერს სოციალურ ქსელსა და მასმედიის საშუალებებში გავრცელდა ინფორმაცია და ვიდეოჩანაწერი ცხინვალის დროებითი მოთავსების იზოლატორში პატიმრების ცემისა და არასათანადო მოპყრობის ფაქტებზე. სამწუხაროდ, აღნიშნული ინფორმაცია და ვიდეო მასალა კიდევ ერთხელ ადასტურებს ოკუპირებულ ტერიტორიებზე ადამიანის უფლებების დაცვის მხრივ არსებულ უმძიმეს მდგომარეობას“, - აღნიშნულია განცხადებაში, - „შექმნილი მძიმე ვითარება და გავრცელებული კადრები, კიდევ ერთხელ ცხადყოფს, რომ სასიცოცხლოდ მნიშვნელოვანია ადამიანის უფლებათა დამცველ საერთაშორისო ორგანიზაციებს მიეცეთ საშუალება დააკვირდნენ და შეისწავლონ ადამიანის უფლებების დარღვევების შემთხვევები კონფლიქტურ რეგიონებში. ამასთან საგულისხმოა, რომ წამების შემთხვევებზე ნებისმიერი სახელმწიფო უფლებამოსილია გამოიძიოს, ბრალი წაუყენოს, დასაჯოს ან ექსტრადირება განახორციელოს წამებაში ეჭვმიტანილი პირის, თუ ასეთი პირი მისი იურისდიქციის ქვეშ იმყოფება, მიუხედავად იმისა, თუ სად მოხდა დანაშაული, რომელი ქვეყნის მოქალაქეა დამნაშავე ან მსხვერპლი”.  სრულად...  წყარო: http://ombudsman.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ აჭარის ტელევიზიისა და რადიოს მრჩეველთა საბჭოს წევრობის კანდიდატების წარდგენა განხორციელდა „მაუწყებლობის შესახებ“ საქართველოს კანონით დადგენილი წესის დარღვევით.  „ფრაქცია „ქართულ ოცნების“ მიერ წარდგენილი კანდიდატი, დღეს უკვე მრჩეველთა საბჭოს წევრია და მისი უფლებამოსილების ვადა არ გასულა. შესაბამისად, პროცესის მიმდინარეობისას ფრაქციების კვოტით შესაძლებელია მხოლოდ 2 კანდიდატის წარდგენა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საიამ, პარტნიორ ორგანიზაცია ადამიანის უფლებათა დაცვის ევროპულ ცენტრთან (EHRAC) ერთად, ადამიანის უფლებათა ევროპულ სასამართლოში ახალი საჩივარი გააგზავნა. საჩივარი ნიკოლო ღვინიაშვილისთვის საიდენტიფიკაციო დოკუმენტებში სასურველი გენდერის ასახვაზე ეროვნული ორგანოების უარს შეეხება. მომჩივანი, ნიკოლო ღვინიაშვილი არის ტრანსგენდერი მამაკაცი, რომელიც ადრეული ასაკიდან თავს მამაკაცად აიდენტიფიცირებს. სამედიცინო დაწესებულების მიერ 2014 წელს გაცემული სამედიცინო ცნობით დასტურდება, რომ ნიკოლოს სამედიცინო დიაგნოზია „ტრანსსექსუალიზმი“. ამჟამად ნიკოლოს მეორადი ბიოლოგიური ნიშან-თვისებები, მათ შორის გარეგნობა, სრულ შესაბამისობაშია მამაკაცის მახასიათებლებთან. სრულად...  წყარო: https://gyla.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ანა ჯაბაურის ბლოგპოსტს: უპასუხო კითხვები და სხვების პასუხები პარლამენტში. „კანონმდებლობა ხაზს უსვამს პარლამენტის წევრის კითხვაზე დროული და ამომწურავი პასუხის გაცემის ვალდებულებას, თუმცა, ამ დებულებების დარღვევას სანქცია არ მოჰყვება ხოლმე. ეს, შესაძლოა, იმითაც იყოს განპირობებული, რომ კანონმდებლობით გათვალისწინებული ზომები უკიდურესი ხასიათისაა (მაგალითად, გადადგომისკენ მოწოდების რეზოლუცია, იმპიჩმენტი). დეპუტატები ნაკლები მნიშვნელობის გადაცდომად მიიჩნევენ პასუხის გაუცემლობას და სანქციების გამოყენებას ერიდებიან. კითხვების მექანიზმის უფრო ეფექტურად ასამუშავებლად, საჭიროა, კანონმდებლობაში გაჩნდეს შუალედური მექანიზმები თანამდებობის პირის მიერ კონსტიტუციის დარღვევის უგულებელყოფასა და მკაცრ პოლიტიკურ-სამართლებრივ პასუხისმგებლობას შორის. პასუხგაუცემელი კითხვების საჯაროდ გამოქვეყნება მნიშვნელოვანი, მაგრამ არასაკმარისი მექანიზმია. შესაბამისად, აუცილებელია მისი გამრავალფეროვნება“, ნათქვამია ორგანიზაციის ვებგვერდზე. სრულად... წყარო: gyla.ge

2019 წლის ივლისში ორგანიზაციის იურისტებს დასახმარებლად მიმართა ქალმა, რომელიც მასზე სისტემური ფსიქოლოგიური ძალადობის შესახებ ყვებოდა და აღნიშნავდა, რომ საფრთხე ემუქრება. ორგანიზაციამ 2019 წლის 2 აგვისტოს მიმართა პოლიციას, ითხოვა გამოძიების დაწყება და ქალის დაცვის მიზნით შემაკავებელი ორდერის გამოცემა.  „შეტყობინების შესვლიდან მეორე დღეს დაიწყო გამოძიება და გამოიცა შემაკავებელი ორდერი, რომელიც სავარაუდო მოძალადემ რამდენჯერმე დაარღვია. მამაკაცისგან ქალის დასაცავად, სამართალდამცავ ორგანოებს დღემდე არ გამოუყენებიათ სისხლის სამართლებრივი მექანიზმი, რაც მიმდინარე საფრთხის ქვეშ აყენებს მსხვერპლს. გამოძიების დაწყების პირობებშიც კი, სახელმწიფომ ვერ უზრუნველყო მსხვერპლის დაცვა შემდგომი ძალადობისგან. შესაბამისად, ორგანიზაციას მიაჩნია, რომ სახელმწიფო არაეფექტურად იძიებს ქალზე ძალადობის ფაქტს, რის გამოც 2019 წლის 13 ოქტომბერს, ქალთა წინააღმდეგ ძალადობის საკითხებზე გაეროს სპეციალურ მომხსენებელს მიმართა“, - ვკითხულობთ ორგანიზაციის მიერ გავრცელებულ ინფორმაციაში.  სრულად...  წყარო: https://phrgeorgia.wordpress.com

თბილისი. ადამიანის უფლებათა ცენტრი მოუწოდებს შინაგან საქმეთა სამინისტროს, გააკეთოს განმარტება 20 ოქტომბერს ტელეკომპანია „ფორმულას“ ეთერში გასულ სიუჟეტთან დაკავშირებით, სადაც ნათლად იკვეთება არასრულწლოვანზე პოლიციის თანამშრომლის მიერ სავარაუდო ძალის გადამეტების ფაქტი.  ორგანიზაციას მიაჩნია, „რომ ბავშვის მიმართ გამოყენებული ძალისმიერი მეთოდი დამამცირებელი და ღირსებისშემლახავი იყო. ბავშვის დაკავებისას სამართალდამცავმა უნდა იხელმძღვანელოს არასრულწლოვანთა მართლმსაჯულების კოდექსით.  სრულად... წყარო: www.humanrights.ge

თბილისი. ჟურნალისტური ეთიკის ქარტიის საბჭო ტვ 25-ის საინფორმაციო სამსახურის უფროსის, სულხან მესხიძისა და ჟურნალისტის, ეკა ბარამიძის მიმართ მუქარას ეხმაურება. „საქმე ეხება ღურტის საბავშვო ბაღის ყოფილ გამგეს, მედეა მამულაძის მიერ განხორცილებულ მუქარას, რომელიც სამსახურიდან TV 25-ის მიერ გავრცელებული მასალის შემდეგ გაათავისუფლეს. ჟურნალისტების ცნობით, მათ მუქარის შეტყობინებები მიიღეს მედეა მუმლაძისგან. 4 სექტემბერს ცნობილი გახდა, რომ შინაგან საქმეთა სამინისტრომ გამოძიება დაიწყო. მიუხედავად ამისა, საზოგადოებისთვის უცნობია რა ეტაპზეა გამოძიება“, - ვკითხულობთ ქარტიის საბჭოს განცხადებაში, - „მნიშვნელოვანია, რომ ჟურნალისტებს არ ჰქონდეთ იმის შიში, რომ პროფესიული საქმიანობისას მათი უფლებების შეილახვის ფაქტები სათანადოდ არ იქნება გამოძიებული, დამნაშავე დაუსჯელი დარჩება და ჟურნალისტებზე ფიზიკური ანგარიშსწორების საფრთხე იარსებებს. დაუსრულებელი გამოძიების და საქმის არასათანადოდ შესწავლის შემთხვევაში ჩამოყალიბდება თვითცენზურა - ჟურნალისტები უარს იტყვიან პრობლემების გაშუქებაზე“. სრულად...  წყარო: https://www.qartia.ge

საქართველო. დღეიდან, ორგანიზაცია „კონსტიტუციის 42-ე მუხლი“ თბილისისა და კახეთის სკოლაში მასშტაბურ სასწავლო კურსს იწყებს, რომელიც ხელს შეუწყობს მოსწავლეებში უცხო ქვეყნიდან შემუსული ადამიანების მიმართ ტოლერანტობის გაზრდას. ამ წამოწყებაში მონაწილეობას დაახლოებით 300-ამდე მოსწავლე მიიღებს.  სასწავლო მოდულის ფარგლებში კონსტიტუციის 42-ე მუხლის იურისტები მოსწავლეებს მიაწვდიან ინფორმაციას ლტოლვილების, ჰუმანიტარული სტატუსის მქონე პირებისა და თავშესაფრის მაძიებლების შესახებ, გააცნობენ ზოგად ინფორმაციას საქართველოს კანონმდებლობით გათვალისწინებულ საერთაშორისო დაცვის ბერკეტებზე, ამასთანავე მოსწავლეები ისწავლიან ლტოლვილის, იძულებით გადაადგილებული პირებისა და მიგრანტების სტატუსებს შორის შინაარსობრივ განსხვავებებს.  სრულად...  წყარო: https://article42.ge

თბილისი. 19 ოქტომბერს, ორგანიზაცია „კონსტიტუციის 42-ე მუხლმა“ ადამიანის უფლებათა სახლში პრესკონფერენცია გამართა. „თბილისის სააპელაციო სასამართლომ განსაკუთრებით მძიმე დანაშაულში ბრალდებულ არჩილ კობიაშვილის მიმართ გამოტანილი გამამტყუნებელი განაჩენი გააუქმა და იგი უდანაშაულოდ ცნო. სააპელაციო სასამართლოს მიერ გამოტანილი გადაწყვეტილებით, ქართული სამართალწარმოების ისტორიაში შეიქმნა პრეცედენტი, რაც გულისხმობს ევროსასამართლოს გადაწყვეტილების საფუძველზე ეროვნული სასამართლოს მიერ გამოტანილი გადაწყვეტილების გამამართლებელი განაჩენით შეცვლას“, ნათქვამია ორგანიზაციის ვებგვერდზე. სრულად... წყარო: article42.ge