თბილისი. ადამიანის უფლებების სწავლებისა და მონიტორინგის ცენტრი (EMC) თბილისის საქალაქო სასამართლოს შუამდგომლობით მიმართავს და დეკანოზ გიორგი მამალაძის მძიმე ჯანმრთელობის მდგომარეობის გათვალისწინებით, სასჯელის გადავადებას ითხოვს, მისი ჯანმრთელობის გაუმჯობესებამდე. „ორგანიზაცია მიმართავს თბილისის საქალაქო სასამართლოს შესაბამისი შუამდგომლობით და იმედოვნებს, რომ სასამართლო შეისწავლის და გაიაზრებს საქმის ფაქტობრივ და ექსპერტიზის დასკვნებით დადგენილ გარემოებებს და გიორგი მამალაძის მიმართ განაჩენის აღსრულებას ჯანმრთელობის მდგომარეობის გაუმჯობესებამდე გადაავადებს“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, 2020 წლის 31 იანვარს მიღებული გადაწყვეტილებით, სახელმწიფო ინსპექტორმა შინაგან საქმეთა სამინისტრო სამართალდამრღვევად ცნო. „2019 წლის 15 ოქტომბერს საია-მ განცხადებით მიმართა საქართველოს სახელმწიფო ინსპექტორის სამსახურს შინაგან საქმეთა სამინისტროს მიერ პერსონალური მონაცემების უკანონოდ დამუშავების ფაქტზე რეაგირების განხორციელების მოთხოვნით. კერძოდ, სამინისტრო ინახავს ადმინისტრაციულ სამართალდარღვევის ჩადენის შესახებ ინფორმაციას არაგონივრული ვადით. ადმინისტრაციულ სამართალდარღვევათა ერთიან საინფორმაციო ბანკში, ელექტრონულ ფორმატში ჩანაწერების უვადოდ შენახვა დაუშვებელია. ამასთან, გარკვეული ჩანაწერების შენახვის საჭიროება არსებობს 1 წლის ვადით. მიუხედავად ამისა, საიას მიერ მოპოვებული მტკიცებულებებით დასტურდება, რომ შინაგან საქმეთა სამინისტრო პრაქტიკაში მაინც 1 წელზე მეტი ვადით ახდენს ინფორმაციის შენახვას“, ნათქვამია ორგანიზაციის ვებგვერდზე. სრულად... წყარო: gyla.ge სამართალი

თბილისი. სისხლის სამართლის საერთაშორისო სასამართლოსთვის საქართველოს კოალიცია ჰააგის სასამართლოში წარსადგენი მოსამართლეობის კანდიდატის შესარჩევ პროცესს აკრიტიკებს. „მივმართავთ პრემიერ-მინისტრს და იუსტიციის სამინისტროს: -გამოიჩინოს მეტი პასუხისმგებლობა ჰააგის სასამართლოში წარსადგენი მოსამართლეობის კანდიდატის შერჩევის პროცესთან დაკავშირებით; -საქართველოს კოალიციის მოსაზრებების გათვალისწინებით და საზოგადოების, მათ შორის სფეროში მომუშავე არასამთავრობო ორგანიზაციების ფართო ჩართულობით მიიღოს ახალი პროცედურები, რომლებიც უზრუნველყოფს კანდიდატის შერჩევის ღია, გამჭვირვალე და სამართლიან პროცესს და დამოუკიდებელი, მიუკერძოებელი და მაღალკვალიფიციური კანდიდატის ნომინირებას“, ნათქვამია განცხადებაში. სრულად... წყარო: gyla.ge

თბილისი. „საერთაშორისო გამჭვირვალობა - საქართველო” და „საქართველოს დემოკრატიული ინიციატივა” უზენაესი სასამართლოს მოსამართლეების შერჩევის 1 წლიანი პროცესის ქრონოლოგიას წარმოგიდგენთ. „საბოლოო შედეგმა აჩვენა, რომ ხელისუფლების მიზანი უზენაესი სასამართლოს კეთილსინდისიერი და კვალიფიციური კადრებით დაკომპლექტება არ ყოფილა. ხელისუფლებამ ვერ უზრუნველყო საერთაშორისო პრაქტიკის შესაბამისი კანომდებლობის მიღება, რამაც საპარლამენტო უმრავლესობას შერჩევის პროცესის შედეგად წინასწარ დაგეგმილი შედეგის დაყენების შესაძლებლობა გაუადვილა და უზენაესი სასამართლო, ძირითადად, არა კონკურსში მონაწილე მაღალი კვალიფიკაციის მქონე კანდიდატებით, არამედ ხელისუფლების მიერ წინასწარ ლობირებული კადრებით დაკომპლექტდა“, ნათქვამია გამჭვირვალობის ვებგვერდზე. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თორნიკე გერლიანის სტატიას „საარჩევნო სისტემის რეფორმა: ოპოზიციის კანონპროექტი და კონსტიტუციასთან მისი შესაბამისობის საკითხი“. სტატია ეხება საქართველოს სახალხო დამცველის მიმართვის პასუხად, ეუთო/ODIHR-ის მიერ გამოქვეყნებულ დასკვნას ოპოზიციის მიერ შემოთავაზებული საარჩევნო რეფორმის (ე.წ. გერმანული მოდელი) შესახებ. „ODIHR-ის დასკვნაში დასაწყისშივე აღნიშნულია, რომ „კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ. ეს მოსაზრება მიმოიხილავს შემოთავაზებულ ცვლილებებს და აანალიზებს მათ რელევანტურ საერთაშორისო ვალდებულებებსა და სტანდარტებთან მიმართებაში…“ ამასთან, როგორც ოდირი მიუთითებს, „ყველა შემოთავაზებული ცვლილება ფრთხილად უნდა იყოს განხილული და პოლიტიკურ პარტიებს შორის ფართო კონსენსუსის საფუძველზე მიღებული.“ დასკვნაში მიმოხილულია კანონპროექტის შესაბამისობა საერთაშორისოდ აღიარებულ, დემოკრატიულ მიდგომებთან და პრინციპებთან. ამ ნაწილში ოდირი მიუთითებს, რომ „შემოთავაზებული პაკეტი არ გვთავაზობს ისეთ ცვლილებებს საარჩევნო წესში, რომელიც გავლენას მოახდენდა უნივერსალური, თავისუფალი, საიდუმლო და პირდაპირი ხმის უფლების პრინციპებთან შესაბამისობის საკითხზე.“ ამდენად, დასკვნა არ ეხება შემოთავაზებული პროექტის კონსტიტუციურობის საკითხს, თუმცა მიუთითებს მის შესაბამისობაზე საერთაშორისოდ აღიარებულ პრინციპებთან“, - ვკითხულობთ სტატიაში, - „მიუხედავად იმისა, რომ ODIHR-ის დასკვნაში არ არის შეფასებული კანონპროექტის კონსტიტუციურობის საკითხი, მნიშვნელოვანია ამ საკითხის თეორიული შეფასება, რათა არ მოხდეს მარგინალიზება იმ იდეის, რომლის მეშვეობითაც, შესაძლოა, 2020 წლის საპარლამენტო არჩევნები სამართლიანი და საზოგადოების ფართო კონსენსუსზე დაფუძნებული საარჩევნო სისტემის ფარგლებში ჩატარდეს”. სრულად...  წყარო: ორგანიზაციის ვებგვერდი

თბილისი. ადამიანის უფლებათა ევროპულმა სასამართლომ დარღვეულად მიიჩნია კონვენციის მე-2 მუხლი - სიცოცხლის უფლება (პროცედურული ნაწილი) საქმეზე - „საყვარელიძე საქართველოს წინააღმდეგ“. მოპასუხე სახელმწიფოს მოსარჩელისათვის არამატერიალური ზიანის გამო, 25 000 ევროს გადახდა დაეკისრა. „სტრასბურგის სასამართლოს გადაწყვეტილების შესახებ ინფორმაცია დღეს გამოქვეყნდა. ადამიანის უფლებათა ცენტრის სამართლებრივი დახმარებით, დაზარალებულმა მარიამ საყვარელიძემ სტრასბურგის სასამართლოს 2010 წელს მიმართა. დაზარალებულის მთავარი მოთხოვნა ეხებოდა სახელმწიფოს მიერ 2003 წლის 22 ნოემბერს უშიშროების სამინისტროს ჯავშანტრანსპორტიორისა და „ბმვ“ მარკის ავტომანქანის შეჯახების შედეგად გარდაცვლილი დავით საყვარელიძისა და ეთერ წულიაშვილის საქმის გამოძიებას“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველის აპარატმა შეისწავლა მსჯავრდებულთა პირობით ვადამდე გათავისუფლებისა და სასჯელის მოუხდელი ნაწილის უფრო მსუბუქი სახის სასჯელით შეცვლის პრაქტიკა, მარეგულირებელი ნორმატიული ბაზა.  სახალხო დამცველს მიაჩნია, რომ მექანიზმის გამართული ფუნქციონირებისთვის აუცილებელია დროულად გადაიდგას შესაბამისი ნაბიჯები, რათა პატიმრები სრულად იყვნენ ორიენტირებულნი სასჯელის მოხდის პერიოდში მათზე დაკისრებული ვალდებულებების კეთილსინდისიერად შესრულებასა და რესოციალიზაციის პროცესზე, შედეგად კი, ჰქონდეთ ამ მექანიზმით ეფექტურად სარგებლობის იმედი.  სრულად... წყარო: http://ombudsman.ge

თბილისი. საერთაშორისო გამჭვირვალობა - საქართველო (TI) შრომის კანონმდებლობის ცვლილების პროექტის პირველად ანალიზს აქვეყნებს.  შრომის კანონმდებლობის ცვლილებებზე მუშაობა 2019 წელს, პარლამენტის დამოუკიდებელი წევრის, დიმიტრი ცქიტიშვილის ინიციატივით დაიწყო. უკვე გაიმართა რამდენიმე შეხვედრა საერთაშორისო, ბიზნეს და არასამთავრობო ორგანიზაციების მონაწილეობით. საკანონმდებლო პაკეტის ინიცირება 2020 წლის საგაზაფხულო სესიაზე იგეგმება.  სრულად...  წყარო: ორგანიზაციის ვებგვერდი

აჭარა. 7 თებერვალს, 11:00-დან 17:00-ამდე ადამიანის უფლებების სწავლებისა და მონიტორინგის ცენტრი (EMC) ბათუმის ახალი მეჩეთის სივრცეში ადგილობრივ თემს სთავაზობს უფასო იურიდიულ და სოციალურ კონსულტაციებს მათთვის პრობლემატურ საკითხებზე. „მათ შორის, სოციალური დაცვის, რელიგიის თავისუფლების, გარემოს დაცვის, განათლების უფლების, დისკრიმინაციის საკითხებზე. ადგილზე იურიდიული და სოციალური კონსულტაციების გარდა, EMC შეეცდება, რომ თემისგან მოსმენილი საჭიროებები და წუხილები ადგილობრივ მუნიციპალიტეტს და შესაბამის სახელმწიფო უწყებებს გაუზიაროს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 5 თებერვალს, საქართველოს ახალგაზრდა იურისტთა ასოციაციამ „გააღვიძე ოლიგარქის“ აქციის მონაწილეების, ბონდო თევდორაძის, ანზორ გუბაევისა და ხათუნა ბერიძის სახელით საკონსტიტუციო სასამართლოში ახალი სარჩელი წარადგინა. „მოსარჩელეები არიან ქალაქ ქობულეთსა და ბათუმში მცხოვრები პირები, რომელთა მიმართაც ოზურგეთის მერიის სამართლებრივი უზრუნველყოფისა და ზედამხედველობის სამსახურმა 2019 წლის 14 აგვისტოს, აქციის „გააღვიძე ოლიგარქის“ მიმდინარეობის დროს შეადგინა ადმინისტრაციული სამართალდარღვევის ოქმები. ოქმების შედგენის საფუძველი გახდა მოსარჩელეთა მიერ შპს „რეზიდენსის“ ტერიტორიასთან შეკრების მიმდინარეობისას აკუსტიკური ხმაურის ნორმების გადამეტება. ხმაურის ნორმების გადამეტება დასჯადია ადმინისტრაციულ სამართალდარღვევათა კოდექსის 77-ე პრიმა მუხლით. თუმცა, ამავე მუხლის შენიშვნის მიხედვით, სამართალდარღვევას არ წარმოადგენს აკუსტიკური ხმაურის დასაშვები ნორმის გადამეტება შეკრებისა და მანიფესტაციასთან დაკავშირებულ ღონისძიებებზე“, ნათქვამია საიას ვებგვერდზე. სრულად...  წყარო: gyla.ge სამართალი

თბილისი. საქართველოს ახალგაზრდა იურისტთა ასოციაციის იურისტები (საია) ნიკა მელიას ინტერსებს დაიცავენ. „13-14 თებერვალს საქართველოს საკონსტიტუციო სასამართლო არსებითად განიხილავს ნიკა მელიას სარჩელს, რაც ეხება მისთვის ვადაზე ადრე დეპუტატის უფლებამოსილების შეწყვეტის კონსტიტუციურობას. საქართველოს პარლამენტმა ნიკა მელიას ვადაზე ადრე დეპუტატის უფლებამოსილება თბილისის საქალაქო სასამართლოს 2019 წლის 2 დეკემბრის განაჩენის საფუძველზე“, ნათქვამია საიას ვებგვერდზე. სრულად... წყარო: gyla.ge

თბილისი. 4 თებერვალს, ადამიანის უფლებათა ცენტრისა და დამოუკიდებელი იურისტების ჯგუფის ორგანიზებით გენერალურ პროკურატურასთან საპროტესტო აქცია გაიმართა. „აქცია საპროკურორო საბჭოში ირაკლი შოთაძესთან გასაუბრებას უკავშირდებოდა. ადამიანის უფლებათა ცენტრი კვლავ მოუწოდებს საპროკურორო საბჭოს წევრებს, მხარი არ დაუჭირონ ირაკლი შოთაძის კანდიდატურას გენერალური პროკურორის თანამდებობაზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 31 იანვარს საქართველოს დემოკრატიულმა ინიციატივამ (GDI) ანგარიშის „გამოხატვის თავისუფლება საქართველოში“ პრეზენტაცია გამართა. ანგარიში მომზადდა „საქართველოს ღია საზოგადოების ფონდის“ ფინანსური მხარდაჭერით, პროექტის „სამართალწარმოება გამოხატვის თავისუფლებისთვის” ფარგლებში. „ანგარიში მიზნად ისახავს ქვეყანაში გამოხატვის თავისუფლების კუთხით ბოლო პერიოდში არსებული მდგომარეობის სისტემატიზირებულ ანალიზს. ფაქტია, გამოხატვის თავისუფლების შეზღუდვის კუთხით ყველა მიმართულებით მნიშვნელოვან პრობლემებს ვაწყდებით ქვეყანაში. ტენდეცია აჩვენებს, რომ ხელისუფლების ყველა შტო ერთობლივად ცდილობს მაქსიმალურად შეამციროს გამოხატვის თავისუფლების ფარგლები და მოთოკოს მისდამი კრიტიკული აზრის არსებობა საკანონმდებლო ჩარჩოს გამკაცრებით, ადმინისტრაციული პრაქტიკისა თუ, სასამართლოს გადაწყვეტილებების გზით, რაც პირდაპირ კავშირშია ქვეყანაში დემოკრატიის ხარისხის გაუარესებასთან“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. „მედია კოალიცია” ავრცელებს განცხადებას ნიკა გვარამიას მიმართ განხორციელებულ თავდასხმაზე. „ინციდენტის შედეგად ნიკა გვარამიამ სხეულის დაზიანება მიიღო, თუმცა ჩვენთვის ამ დრომდე უცნობია დაიკითხა თუ არა თვითმხილველი რომელიმე პირი და განხორციელდა თუ არა სხვა აუცილებელი საგამოძიებო მოქმედებები. აღნიშნულის გათვალისწინებით, კოალიცია მოუწოდებს სამართალდამცავ ორგანოებს, განახორციელონ დროული, სრულყოფილი, ეფექტური და მიუკერძოებელი გამოძიება ამ კონკრეტულ ინციდენტთან დაკავშირებით. კოალიცია ასევე მნიშვნელოვნად მიიჩნევს დამნაშავეთა დროულ გამოვლენასა და პასუხისმგებლობის დაკისრებას, რათა მოხდეს მომავალში მსგავსი ინციდენტების პრევენცია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის, თბილისის სააპელაციო სასამართლომ დააკმაყოფილა 2015 წლის 13 ივნისის სტიქიის დროს გარდაცვლილი პირის ოჯახის სარჩელი მატერიალური და მორალური ზიანის ანაზღაურებასთან დაკავშირებით. „საქმის განხილვა სასამართლოში 5 წლის განმავლობაში მიმდინარეობდა. სასამართლომ დაადგინა, რომ საქართველოს შინაგან საქმეთა სამინისტრომ, საპატრულო პოლიციის დეპარტამენტმა, საგანგებო სიტუაციების მართვის სააგენტომ და გარემოს ეროვნულმა სააგენტომ ვერ შეასრულეს კანონით მათთვის დაკისრებული ვალდებულება დაეცვათ მოქალაქეთა სიცოცხლე და ჯანმრთელობა სტიქიური უბედურების დროს, რასაც მოჰყვა პირის გარდაცვალება“, ნათქვამია საიას ვებგვერდზე.  სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: სასამართლოს მეგობრის მოსაზრება გიორგი რურუას ბრალდების საქმესთან დაკავშირებით. „„საერთაშორისო გამჭვირვალობა - საქართველომ“ თბილისის საქალაქო სასამართლოს გიორგი რურუას საქმესთან დაკავშირებით სასამართლოს მეგობრის (Amicus Curiae) მოსაზრებით მიმართა. საქმის მასალების შესწავლის შედეგად გამოიკვეთა, რომ გიორგი რურუას, პირადი ჩხრეკისა და სხვადასხვა საპროცესო მოქმედებების ჩატარებისას, არამართლზომიერად შეეზღუდა საქართველოს კონსტიტუციითა და საერთაშორისო აქტებით გარანტირებული უფლებები და თავისუფლებები“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ადამიანის უფლებების სწავლების და მონიტორინგის ცენტრმა (EMC) თბილისის სააპელაციო სასამართლოს ყოფილი მოსამართლისა და „მოსამართლეთა ერთობის თავმჯდომარის“ - მაია ბაქრაძის საქმეზე ადამიანის უფლებათა ევროპულ სასამართლოს მიმართა. „„მოსამართლეთა ერთობა“ და მისი წარმომადგენლები, მათ შორის მაია ბაქრაძე, საჯარო გამოსვლებში ხშირად საუბრობდნენ კანონმდებლობაში არსებულ ხარვეზებზე და აკრიტიკებდნენ იუსტიციის უმაღლეს საბჭოს გაუმჭვირვალე, დაუსაბუთებელ გადაწყვეტილებებს. 2015 წლის 22 სექტემბერს, მაია ბაქრაძე გათავისუფლდა სააპელაციო სასამართლოს მოსამართლის თანამდებობიდან ვადის ამოწურვის გამო. 2015-2016 წლებში მაია ბაქრაძემ მოსამართლეთა შესარჩევ ორ კონკურსში მიიღო მონაწილეობა, თუმცა, იუსტიციის უმაღლესმა საბჭომ ორივე შემთხვევაში უარი თქვა მის მოსამართლედ ხელმეორედ დანიშვნაზე“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის (EMC) პირველად შეფასებას აკეთებს პროკურატურის მიერ, რამდენიმე საათის წინ გამოქვეყნებულ გადაწყვეტილებაზე, რომლის საფუძველზეც პროკურატურამ დანაშაულის ნიშნების არარსებობის გამო, თემირლან მაჩალიკაშვილის სიცოცხლის ხელყოფის საქმეზე მიმდინარე გამოძიება შეწყვიტა. „პროკურატურის მიერ მიღებულ გადაწყვეტილებასთან დაკავშირებით უნდა ითქვს, რომ გამოძიების დინამიკა და მასზე სახელმწიფო უსაფრთხოების სამსახურის აშკარა გავლენები, ჩვენ იმთავითვე გვიჩენდა ღრმა ეჭვს, რომ გამოძიების პროცესი ფორმალური, მორჩვენებითი და არაეფექტიანი იყო და ყოველგვარი ნდობა პროკურატურის გამოძიების მიმართ მაჩალიკაშვილების ოჯახის წევრებსა და მათ უფლებათა დამცველებს დაკარგული გვქონდა. ამის მიუხედავად, ამ პერიოდში საქმეზე მიღებული ეს გადაწყვეტილება მოულოდნელი იყო, რადგან გამოძიების პროცესში ჩვენ, როგორც მაჩალიკაშვილების ოჯახის დამცველებს, არა ერთი განცხადება გვქონდა დაყენებული სპეცრაზმის წევრებისა და სუს-ის სხვა თანამშრომლების გამოკითხვის შემდეგ იდენტიფიცირებული არაერთი არსებითი შეუსაბამობისა და უზუსტობის გამო“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, სისხლის სამართლის საერთაშორისო სასამართლოს პროკურორის ოფისის მიერ საქართველოს სიტუაციის გამოძიების დაწყებიდან 4 წელი გავიდა. „გამოძიებას წინ უსწრებდა 7-წლიანი წინასწარი მოკვლევის პერიოდი, რომელიც 2008 წლის 15 აგვისტოს დაიწყო. მიუხედავად საკმაოდ დიდი დროის გასვლისა, დღემდე არ მომხდარა 2008 წლის აგვისტოს ომის დროს ჩადენილი დანაშაულების ეფექტიანი გამოძიება და დამნაშავე პირთა დასჯა“, ნათქვამია საიას ვებგვერდზე. სრულად... წყარო: gyla.ge

GIZ-ის სამართლის პროგრამა აქვეყნებს სახელმძღვანელოს „ზოგადი ვალდებულებითი სამართალი, კაზუსების კრებული” ელექტორნულ ვერსიას. კრებული... „გამოცემის ბეჭდური ვერსიები გადაეცემათ აკადემიური დაწესებულების ბიბლიოთეკებს და ასევე, გაიცემა დაინტერესებულ პირებზე ჩვენი ოფისიდან. გაცემის თარიღს ჩვენს ფეისბუქ გვერდზე დავწერთ”, ნათქვამია ორგანიზაციის გვერდზე სოციალურ ქსელში.

თბილისი. GIZ-ის სამართლის პროგრამა 31 იანვარს 10:00-15:00 პერიოდში ოფისიდან უფასოდ გასცემს შემდეგ წიგნებს: 1. სამართალმცოდნეობის საფუძვლები (მარაგი - 1000 ცალი) 2. ინვესტიციის დაცვის მექანიზმების ევოლუცია და პრობლემური ასპექტები საქართველოში (მარაგი - 200 ცალი) 3. შესავალი შედარებით საჯარო მმართველობაში (მარაგი - 200 ცალი) 4. საკორპორაციო სამართლის ანატომია (მარაგი - 400 ცალი) 5. South Caucasus Law Journal - (მარაგი - 40 ცალი) 6. საქართველოს კანონი საჯარო სამსახურის შესახებ კომენტარები (მარაგი - 20 ცალი) 7. სანივთო სამართალი (კაზუსების კრებული) (მარაგი 120 ცალი) 8. კაზუსები ადმინისტრაციულ სამართალში (მარაგი 120 ცალი) 9. სოციალური მედიის სამართალი (მარაგი - 20 ცალი) 10. გერმანიის სამოქალაქო კოდექსი (თარგმანი) (მარაგი - 10 ცალი) წიგნის მიღების წესები: - ერთ პირს შეუძლია მიიღოს მხოლოდ გამოცემის ერთი ეგზემპლარი - გთხოვთ, აიღოთ მხოლოდ ის წიგნი, რაც გჭირდებათ. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველს სურს გამოეხმაუროს 2020 წლის 23 იანვარს სპეციალური პენიტენციური სამსახურის/იუსტიციის სამინისტროს მიერ სახალხო დამცველის პატიმრებთან შეხვედრის თაობაზე დეტალების უკანონოდ გასაჯაროების ფაქტს. „ის საკითხი თუ ვის შეხვდება სახალხო დამცველი ან მისი წარმომადგენელი არის კონფიდენციალური ინფორმაცია და მისი გამჟღავნება წარმოადგენს სახალხო დამცველის საქმიანობაში ჩარევას, მასზე ზემოქმედებისა და მისი სამსახურეობრივი საქმიანობისთვის ხელშეშლის მიზნით. მოცემული ქმედება წარმოადგენს საქართველოს სისხლის სამართლის კოდექსის 352-ე მუხლით განსაზღვრულ დანაშაულს. გუშინდელი განცხადება წარმოადგენს საქართველოს იუსტიციის მინისტრის მიერ საქართველოს სახალხო დამცველის ინსტიტუტის წინააღმდეგ დაწყებული პოლიტიკური თავდასხმის კამპანიის გაგრძელებას. სახიფათო და დაუშვებელია იუსტიციის მინისტრის მიერ ისეთი უწყების პოლიტიკური მიზნებისთვის გამოყენება, როგორსაც წარმოადგენს სპეციალური პენიტენციური სამსახური, სადაც სასჯელს იხდიან სხვადასხვა პოლიტიკური შეხედულებისა თუ მსოფლმხედველობის პირები“, ნათქვამია ომბუდსმენის განცხადებაში. სრულად... წყარო: ombudsman.ge