თბილისი. დემოკრატიული განვითარების ეროვნულმა ცენტრმა – „რატომ უნდა გამოუცხადოს საქართველომ ბოიკოტი სოჭის ოლიმპიადას" – გამოაქვეყნა. „ვალდებულად მივიჩნევთ თავს მივაწოდოთ ხელისუფლებას საზოგადოების აზრი და მოთხოვნა, რომელზეც ის დემოკრატიულ პირობებში ვალდებულია მოახდინოს რეაგირება", ნათქვამია განცხადებაში.  სრულად წყარო: ncdd.ge

თბილისი. „ახალგაზრდა ადვოკატებმა" საქართველოს პრემიერ–მინისტრის, საქართველოს თავდაცვის მინისტრისა და საქართველოს თავდაცვის სამინისტროს განცხადებებთან დაკავშირებით სპეციალური განცხადება გაავრცელეს. „მიგვაჩნია, რომ საქართველოს პრემიერ–მინისტრის პოზიცია პასუხობს საზოგადოების ინტერესებს. დასაბუთებას და განმარტებას მოითხოვს ჯარისკაცების მოწამვლის საქმეზე გრიფით „საიდუმლოს" დადების მიზანშეწონილობა. ორგანიზაცია იმედოვნებს, რომ ფაქტებთან დაკავშირებით, გამოძიება მალე დასრულდება და საზოგადოება პრობლემის შესახებ დასაბუთებულ დასკვნას მიიღებს. ... ჩვენს გაკვირვებას იწვევს თავდაცვის მინისტრის ზოგიერთი შეხედულება, რომლის თანახმადაც, „ახალგაზრდა ადვოკატების" მიერ სხვადასხვა პერიოდში გავრცელებული განცხადებები ჯარისკაცების მოწამვლის ფაქტების შესახებ, შეფასებულია, როგორც პროვოკაცია და ცრუ ინფორმაცია", ნათქვამია განცხადებაში. სრულად წყარო:ორგანიზაციის გვერდი სოციალურ ქსელში

თბილისი. ორგანიზაცია „ახალგაზრდა ადვოკატები" ჯარისკაცების მოწამვლის ფაქტების გამოძიებისთვის მთავარ პროკურატურას მიმართავს. „ორგანიზაციამ ბოლო სამი თვის განმავლობაში, საქართველოს შეიარაღებულ ძალების სამხედრო მოსამსახურეთა კვების სფეროში არსებული საგანგაშო ვითარების შესახებ, არაერთი განცახდება გაავრცელა. საქართველოს თავდაცვის სამინისტრომ ორგანიზაციის განცხადებებს დაუსაბუთებული უწოდა, თუმცა, მოგვიანებით, თავადვე დაადასტურეს, რომ სამხედრო მოსამსახურეთა მოწამვლის ფაქტებზე სამხედრო პოლიციაში მიმდინარეობდა გამოძიება", ნათქვამია განცხადებაში.  განცხადება წყარო:ორგანიზაციის გვერდი სოციალურ ქსელში

იმერეთი. საზოგადოებრივი ინტერესების დაცვის ცენტრის ინიციატივით, ქუთაისში, დემოკრატიული ჩართულობის ცენტრში, 17 ოქტომბერს, მედიისა და არასამთავრობო სექტორის წარმომადგენლებმა პირადი ცხოვრების ხელშეუხებლობისა და, ასევე, ლუსტრაციის შესახებ კანონის მიღების მნიშვნელობაზე ისაუბრეს. მრგვალი მაგიდის ფორმატის შეხვედრაზე აღინიშნა, რომ იმისათვის, რომ გამოირიცხოს პოლიტიკოსების მხრიდან პირადი ცხოვრებით მანიპულაციის შესაძლებლობა, საჭიროა თავად სახელმწიფომ შეიმუშაოს მისგან დაცვის მექანიზმები, და ამით დაიცვას ყველა მოქალაქის უფლება.

თბილისი. საერთაშორისო გამჭვირვალობა საქართველო იუსტიციის სამინისტროს კოორდინაციის ქვეშ მყოფი თავისუფალი და სამართლიანი არჩევნებისათვის უწყებათშორისი კომისიის საქმიანობის შუალედურ ანგარიშსს ეხმიანება. „დოკუმენტში მე–3 საკითხად ნახსენებია საჯარო სამსახურში საკადრო პოლიტიკის შესახებ „საერთაშორისო გამჭვირვალობა – საქართველოს" კვლევა, რომელიც კომისიას „ერთიანმა ნაციონალურმა მოძრაობამ" წარუდგინა და აღნიშნა, რომ კვლევაში ნახსენები საკადრო გადაადგილებები პოლიტიკურად იყო მოტივირებული... 2 ოქტომბრის კომისიის სხდომაზე ჩვენი ორგანიზაციის წარმომადგენლის მიერ განიმარტა, რომ ანგარიშში მსგავსი დასკვნა არ გაკეთებულა და მხოლოდ ცალკეულ შემთხვევებში ჩნდებოდა ეჭვი, რომ პოლიტიკური ნიშნით შეიძლება მომხდარიყო საკადრო გადაწყვეტილების მიღება... მიუხედავად ამისა, ჩვენი კვლევა მაინც მოხვდა უწყებათშორისი კომისიის საქმიანობის შუალედურ ანგარიშში..." სრულად წყარო: transparency.ge

თბილისი. 16 ოქტომბერს, საზოგადოებრივ ორგანიზაციების, მედიის წარმომადგენლებს დემოკრატიის ევროპული ფონდის აღმასრულებელი დირექტორი შეხვდა. შეხვედრის მიზანს წარმოადგენდა სამი თვის წინათ დაფუძნებული ფონდის მანდატისა და მუშაობის პრინციპების გაცნობა იყო. დემოკრატიის ევროპული ფონდი ახლახანს დაარსდა ევროკავშირის წევრი სახელმწიფოებისა და ევროკავშირის ინსტიტუტების ერთობლივი ძალისხმევით. ეს ახალი ევროპული ინიციატივაა, რომლის მიზანია „ღრმა და მდგრადი დემოკრატიის" ხელშეწყობა და წახალისება გარდამავალი დემოკრატიის ქვეყნებში და იმ საზოგადოებებში, რომლებიც იბრძვიან დემოკრატიზაციისათვის.

სამცხე–ჯავახეთი. გასულ კვირას საქართველოს ახალგაზრდა ეკონომისტთა ასოციაციის წარმომადგენლებმა ახალციხეში, სამცხე–ჯავახეთის სახელმწიფო–სასწავლო უნივერსიტეტის სტუდენტებთან შეხვედრა გამართეს. შეხვედრის მიზანი ახალციხის მუნიციპალიტეტის ბიუჯეტის დაგეგმვის პროცესში სტუდენტების ჩართვა იყო. ახალგაზრდა ეკონომისტებმა სტუდენტებთან იმ პროექტზე ისაუბრეს, რომელსაც ახალგაზრდა ასოციაცია, გერმანიის თანამშრომლობის ფონდთან ერთად ახორციელებს. აღნიშნული პროექტი ადგილობრივი ბიუჯეტის დაგეგმვაში, სხვა მიზნობრივ ჯგუფებთან ერთად, ახალგაზრდების ჩართვასაც ითვალისწინებს. შეხვედრას ესწრებოდა ადგილობრივი თვითმმართველობის კულტურის სამსახურის სპეციალისტი სპორტისა და ახალგაზრდულ საქმეთა საკითხებში. დაიგეგმა ადგილობრივი თვითმმართველობის წარმომადგენლებთან სტუდენტების შეხვედრაც,

თბილისი. კოალიცია დამოუკიდებელი და გამჭვირვალე მართლმსაჯულებისთვის განცხადებას აქვეყნებს. „..კოალიციის მიზანია, ყველა დაინტერესებულ მხარეს გააცნოს მართლმსაჯულების საკუთარი ხედვა და აქტიურად შეუწყოს ხელი მის იმპლემენტაციას. ამ პროცესში განსაკუთრებულად მნიშვნელოვანია საპრეზიდენტო კანდიდატებისთვის კოალიციის მოსაზრებების მიწოდება იმის თაობაზე, თუ რა არის საჭირო სასამართლოს დამოუკიდებლობის გაზრდისათვის. ამავდროულად, სამოქალაქო საზოგადოებისა და საქართველოს მოქალაქეებისთვის საინტერესოა საპრეზიდენტო კანდიდატების ხედვა მართლმსაჯულების სისტემაში მიმდინარე რეფორმებზე. ამ მიზნით, კოალიციის წევრები მზადყოფნას გამოთქვამენ შეხვდნენ და ითანამშრომლონ ყველა საპრეზიდენტო კანდიდატთან, მათი მხრიდან ინტერესის გამოხატვის შემთხვევაში", ნათქვამია განცხადებაში სრულად წყარო: 42–ე მუხლის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა მოსამართლეების წლიური შემოსავლების შესახებ ინფორმაცია გაავრცელა. „1 ოქტომბერს პრემიერისა და ფინანსთა მინისტრის შეხვედრაზე იუსტიციის საბჭოს მდივან ლევან მურუსიძესთან გადაწყდა, რომ მოსამართლეებს, სასამართლოს აპარატის და იუსტიციის საბჭოს თანამშრომლებს ხელფასები გაეზრდებათ. მანამ, სანამ გაირკვევა ზუსტად რა ოდენობით გაეზრდებათ ხელფასები მოსამართლეებს, სასამართლოს აპარატისა და იუსტიციის საბჭოს თანამშრომლებს, საინტერესოა რამდენს შეადგენს მათი შემოსავალი დღევანდელი მდგომარეობით", ნათქვამია ორგანიზაციის ვებ–გვერდზე. სრულად  წყარო: opendatablog.wordpress.com

თბილისი. ხუდონჰესის პროექტთან დაკავშირებით საზოგადოებრივი ორგანიზაციები გამოხატავენ პოზიცია სამართლებრივ საკითხებზე და ასევე ბოლო დროს განვითარებული მოვლენების გამო. განცხადება წყარო: greenalt.org

თბილისი. ლიბერალიზმის სასწავლო ცენტრში 11 ოქტომბერს გაიმართა ჟურნალისტ ზვიად ქორიძის ლექცია „ლიბერალიზმი და თავისუფლება (ილია ჭავჭავაძე)" ნაწილი II. მათ ვინც ვერ შეძლო ლექციაზე დასწრება ცენტრი საშუალებას აძლევს გაეცნოს ლექციის ვიდეოს. „ლიბერალიზმი და თავისუფლება" ნაწილი II წყარო: ცენტრის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა გამოაქვეყნა კოკა კიღურაძისა და ნინო სუხიშვილის ბლოგპოსტი ქართული საარჩევნო სისტემის ხარვეზებსა და რეკომენდაციებზე. „უკანასკნელი წლების გამოცდილება აჩვენებს, რომ ხშირად პრინციპულ საკითხებთან დაკავშირებით მთავრობა არ ითვალისწინებს საერთაშორისო და ადგილობრივი არასამთავრობო ორგანიზაციების რეკომენდაციებს, რაც გარკვეულწილად მიუთითებს მთავრობის ნების არარსებობას, საარჩევნო სისტემის რეფორმირება მოახდინოს სამოქალაქო საზოგადოებისა და პოლიტიკური პარტიების აქტიური ჩართულობის ფონზე. თუმცა, ბოლო პერიოდში არსებობს მისასალმებელი ტენდენცია და პოლიტიკური ნება, საარჩევნო სისტემასთან დაკავშირებული საკითხები ფართო დისკუსიის საგანი გახდეს და იგი არსებითად გადაიხედოს", ნათქვამია ბლოგპოსტში. სრულად  წყარო: emcrights.wordpress.com

თბილისი. ორგანიზაცია „სამოქალაქო ჩართულობის ინსტიტუტი" „პრეზიდენტის არჩევნების პორტალის" ადმინისტრირებას ახორციელებს. პორტალის მიზანია ამომრჩევლებს მიაწოდოს ინფორმაცია საპრეზიდენტო არჩევნების შესახებ. საზოგადოებასმიეცემა შესაძლებლობა მიიღონ ინფორმაცია რეგისტრირებული საპრეზიდენტო კანდიდატების ბიოგრაფიებისა და საარჩევნო პროგრამების შესახებ. გარდა ამისა, მოქალაქეებს საშუალება ეძლევან შეაფასონ და გამოთქვან მოსაზრებები საპრეზიდენტო კანდიდატებისა და მათი საარჩევნო პროგრამების შესახებ. „პრეზიდენტის არჩევნების პორტალი" წყარო: სამოქალაქო ჩართულობის ინსტიტუტი

თბილისი. საიამ, გამჭვირვალობა – საქართველომ და სამართლიანმა არჩევნებმა ნაციონალური მოძრაობის მიერ უწყებათაშორისი კომისიის დატოვებასთან დაკავშირებით განცხადება გაავრცელეს. „...მაშინ, როდესაც საპრეზიდენტო არჩევნებამდე სულ ორი კვირაა დარჩენილი და წინასაარჩევნო კამპანია აქტიურ ფაზაშია შესული, მნიშვნელოვანია, რომ მხარეები სამუშაო რეჟიმს დაუბრუნდნენ, რისთვისაც კონფლიქტი დაუყოვნებლივ უნდა ამოიწუროს. მიზანშეწონილად მიგვაჩნია, რომ „ერთიანი ნაციონალური მოძრაობა" კომისიაში დაბრუნდეს, ხოლო უწყებათაშორისი კომისიის თავმჯდომარემ უზრუნველყოს ამ შეხვედრების კონსტრუქციულ გარემოში ჩატარება", ნათქვამია განცხადებაში. სრულად წყარო: transparency.ge

თბილისი. 12 ოქტომბერს საქართველოს ახალგაზრდულმა პარლამენტის წევრებმა ეროვნული ოლიმპიური კომიტეტის წინ მშვიდობიანი საპროტესტო აქცია – „არა სოჭის ოლიმპიადას" გამართეს. ახალგზარდულ პარლამენტს მიაჩნია, რომ საქართველოს დელეგაციამ მონაწილეობა არ უნდა მიიღოს ზამთრის ოლიმპიადაში..." სრულად წყარო: ორგანიზაციის გვერდი სოციალურ ქსელში

თბილისი. 12 ოქტომბერს ახალგაზრდა კონსტიტუციონალისტთა ასოციაციამ სოჭის ზამთრის ოლიმპიურ თამაშებში საქართველოს მონაწილეობის შესახებ ბრიფინგი გამართა. „საქართველოს ახალგაზრდა კონსტიტუციონალისტთა ასოციაცია" ემიჯნება პეტიციას ოლიმპიადის ბოიკოტირების შესახებ და მოუწოდებს სამოქალაქო საზოგადოებას მეტი პრაგმატიზმით მიუდგეს აღნიშნულ საკითხს. ამასთან, ასოციაცია მხარდაჭერას უცხადებს ქართულ სპორტს, თითოეულ ქართველ სპორტსმენს და უსურვებს მათ წარმატებებს სოჭის 2014 წლის ზამთრის ოლიმპიურ თამაშებზე", ნათქვამია ორგანიზაციის გვერდზე. სრულად წყარო: ორგანიზაციის გვერდი სოციალურ ქსელში

თბილისი. 16 ოქტომბერს, 12:00 საათზე, სასტუმრო ქორთიარდ მარიოტში, მედიის, არასამთავრობო ორგანიზაციებისა და სამოქალაქო საზოგადოების წარმომადგენლებს დემოკრატიის ევროპული ფონდის (EED) აღმასრულებელ დირექტორი იერჟი პომიანოვსკის შეხვდება. დემოკრატიის ევროპული ფონდი ახლახანს დაარსდა ევროკავშირის წევრი სახელმწიფოებისა და ევროკავშირის ინსტიტუტების ერთობლივი ძალისხმევით. მისი მიზანია ღრმა და მდგრადი დემოკრატიის ხელშეწყობა და წახალისება გარდამავალი დემოკრატიის ქვეყნებში. ფონდი მიიღებს განაცხადები პლურალისტური, მრავალპარტიული სისტემის სასარგებლოდ მოქმედი ნებისმიერი ზომისა და სტატუსის მქონე სამოქალაქო ორგანიზაციის, მოძრაობისა თუ ცალკეული აქტივისტისაგან. დამატებითი ინფორმაციისათვის იხილეთ დემოკრატიის ევროპული ფონდის ინტერნეტ-გვერდი (http://democracyendowment.eu/). ღონისძიების მიზანია უკეთ გააცნოს საზოგადოებასა დემოკრატიის ევროპული ფონდის მანდატი და მუშაობის პრინციპები აღმასრულებელ დირექტორთან ინტერაქტიული შეხვედრის გზით. წყარო:media.ge

თბილისი. საქართველოს ახალგაზრდა იურისტთა ასოციაციამ შინაგან საქმეთა სამინისტროს განცხადებას უპასუხა. 9 და 10 ოქტომბერს საიას მიერ გაკეთებულ იქნა განცხადებები მოქალაქეების - დავით კაპანაძისა და ლევან კორკოტაშვილის საქმეზე. კორკოტაშვილის საქმეზე საიას განცხადების პასუხად 10 ოქტომბერს გავრცელდა შსს-ს ოფიციალური განცხადება, სადაც მიეთითა, რომ საიას მიერ მოწოდებული ინფორმაცია „სიმართლეს არ შეესაბამება". ამავე განცხადებაში აღინიშნა, რომ „მსგავსი განცხადებები მიმართულია პოლიციის დისკრედიტაციისკენ და სწორედ ცრუ ინფორმაციების გავრცელების შედეგად ხდება პოლიციის იმიჯის შელახვა".   „ჩვენ არ გვაქვს იმის ილუზია, რომ შინაგან საქმეთა სამინისტროში, სადაც ათასობით ადამიანი მუშაობს, ადვილია რეფორმებისა და ცვლილებების განხორციელება. ისიც გასაგებია, რომ ვერ შევქმნით ისეთ სისტემას, სადაც პოლიციელთა მხრიდან მოქალაქეებზე რაიმე სახის ძალადობის ალბათობა სრულიად გამოირიცხება. მთავარია, რა პასუხი გაეცემა ასეთ ფაქტებს, რამდენად ეფექტურად და ობიექტურად წარიმართება გამოძიება. გამოძიების სათანადოდ წარმართვა არის არასასურველი ფაქტების გამეორების პრევენციის ყველაზე ეფექტური მექანიზმი, რომლის გამოყენების ნებაც, როგორც ჩანს, მოცემულ შემთხვევაში არ არსებობს. სისტემის იმიჯს კი ისეთ დიდ ზიანს ვერაფერი მიაყენებს, როგორც მსგავსი ტიპის ფაქტებზე მსგავსი რეაგირების მოხდენაა", ნათქვამია საიას მიერ გავრცელებულ საპასუხო განცხადებაში. სრულად წყარო: gyla.ge

თბილისი. „ადგილობრივი თვითმმართველობის კოდექსის" პროექტის შემუშავებაში მონაწილე არასამთავრობო ორგანიზაციებმა განცხადება გაავრცელეს. „უმნიშვნელოვანეს ამოცანად გვესახება 2014 წლის დასაწყისამდე ადგილობრივი თვითმმართველობის საარჩევნო სისტემის რეფორმირების დასრულებაც, რაც შეიძლება შეფერხდეს „ადგილობრივი თვითმმართველობის კოდექსის" დაგვიანებით მიღებით". არასამთავრობოები მოუწოდებენ საქართველოს მთავრობას, დროულად მოახდინონ კანონპროექტის ინიცირება საქართველოს პარლამენტში და „არ დაუშვას წინა ხელისუფლების მიერ ადგილობრივი თვითმმართველობის რეფორმისას დაშვებული შეცდომების გამეორება". სრულად წყარო:osgf.ge

თბილისი. საქართველოს ახალგაზრდა იურისტთა ასოციაციამ საკონსტიტუციო კომისიის შექმნასთან დაკავშირებით განცხადება გაავრცელა. „გამოვთქვამთ იმედს, რომ კონსტიტუციის გადასინჯვის ახალ პროცესს მოქმედი ხელისუფლება და მასში მონაწილე სხვა სუბიექტები მაღალი პასუხისმგებლობით მოეკიდებიან, გადაწყვეტილების მიღებისას კი მხოლოდ ქვეყნის დემოკრატიული განვითარების ინტერესებით იხელმძღვანელებენ.  მიგვაჩნია, რომ აღნიშნული დოკუმენტის პარლამენტის მიერ დამტკიცებამდე სათანადო დისკუსიები უნდა გაიმართოს და დაინტერესებულ მხარეებს მოსაზრებების გამოთქმისა და გავლენის მოხდენის შესაძლებლობა უნდა მიეცეთ", ნათქვამია განცხადებაში. სრულად წყარო: gyla.ge

თბილისი. საერთაშორისო გამჭვირვალობა – საქართველო მიიჩნევს, რომ საქართველოს მთავრობას, რაც შეიძლება სწრაფად უნდა შექმნას „ელექტრონული პეტიციების ოფიციალური მექანიზმი, რომელიც ბევრად უფრო ფართო შესაძლებლობებს გაუხსნის პოლიტიკის ფორმირებაში მონაწილეობის მსურველ აქტიურ მოქალაქეებს". საქართველოს მთავრობას უკვე აღებული აქვს ასეთი სისტემის შექმნის ვალდებულება, ნათქვამია ორგანიზაციის ვებგვერდზე. „კერძოდ, „ღია მმართველობის პარტნიორობის" ფარგლებში საქართველოს მთავრობის მიერ წარდგენილი სამოქმედო გეგმის თანახმად, იუსტიციის სამინისტრომ 2013 წლის ბოლომდე უნდა შექმნას ვებგვერდი ichange.ge, რომელიც მოქალაქეებს ელექტრონული პეტიციების შექმნის შესაძლებლობას მისცემს. სამოქმედო გეგმაში ნათქვამია, რომ ხელმოწერების გარკვეული რაოდენობის არსებობის შემთხვევაში, ხელისუფლება ვალდებული იქნება განიხილოს პეტიცია". სრულად წყარო: transparency.ge

სამეგრელო. „საერთაშორისო გამჭვირვალობა – საქართველოს" ზუგდიდის ოფისს  ესტონეთის რესპუბლიკის ელჩი საქართველოში პრიიტ ტურკი ეწვია.  ელჩი დაინტერესდა ზუგდიდში არსებული წინასაარჩევნო გარემოთი, ასევე ადგილობრივი თვითმმართველობის ორგანოებისა და არასამთავრობო ორგანიზაციების თანამშრომლობის საკითხებით. ორგანიზაციამ ელჩს მიაწოდა ინფორმაცია წინასაარჩევნო პერიოდში ზუგდიდში მიმდინარე მოვლენებზე და ასევე ადგილობრივ მოსახლეობასთან გამართული შეხვედრების შედეგებზე. ელჩმა ხაზი გაუსვა წინასაარჩევნო პერიოდისა და არჩევნების დღის მშვიდობიან გარემოში მიმდინარეობის აუცილებლობას და განაცხადა, რომ საპრეზიდენტო არჩევნების შემდეგ ის ზუგდიდს კიდევ ერთხელ ეწვევა. წყარო:ორგანიზაციის გვერდი სოციალურ ქსელში