თბილისი. საქართველოს ახალგაზრდა იურისტთა ასოციაციისა და მშვიდობის დემოკრატიისა და განვითარების კავკასიური ინსტიტუტის წარმომადგენლები გერმანიაში მცხოვრებ ქართველებს შეხვდნენ. შეხვედრის მიზანი იყო ინფორმაციის გაზიარება მიგრაციის თემაზე მიმდინარე პროექტების შესახებ, ქართველ მიგრანტებს შორის კვალიფიციური კადრების შერჩევა საქართველოში ტრენინგების ჩასატარებლად.  წყარო: ორგანიზაციის გვერდი სოციალურ ქსელში

თბილისი. „ახალგაზრდა ადვოკატები" საქართველოს შეიარაღებულ ძალებში ჯარისკაცების საკვებით მოწამვლის ფაქტთან დაკავშირებით მორიგ განხადებას ავრცელებს.  „ბოლო პერიოდში, ჯარისკაცების მოწამვლის გახშირებული ფაქტები, კიდევ ერთხელ მიუთითებს, რომ საქართველოს შეიარაღებული ძალების კვების უსაფრთხოებაში არსებული პრობლემები გამოუსწორებელია და შეცვლილი მენეჯმენტი სათანადოდ ვერ უზრუნველყოფს ლოჯისტიკის სფეროში არსებული საკითხების შესაბამის გადაწყვეტას და ხარვეზების აღმოფხვრას", ნათქვამია განცხადებაში „ახალგაზრდა ადვოკატები" კიდევ ერთხელ მიმართავს საქართველოს თავდაცვის სამინისტროს და ჯარისკაცების მოწამვლის ფაქტებზე, მინისტრს, სათანადო რეაგირებისკენ მოუწოდებს.  სრულად წყარო:ორგანიზაციის გვერდი სოციალურ ქსელში

თბილისი. 30 სექტემბერს, 11.00 საათზე, სასტუმრო „თბილისი მარიოტში" გაიმართება კონფერენცია „ევრაზიული კავშირის საფრთხეები ევროინტეგრაციის გზაზე". კონფერენციაზე, არასამთავრობო ორგანიზაციები გაავრცელებენ განცხადებას, „რომელიც პასუხობს რუსეთის გაძლიერებულ ზეწოლას აღმოსავლეთ პარტნიორობის წევრ ქვეყნებზე, რაც განსაკუთრებით თვალშისაცემი გახდა ვილნიუსის სამიტის მოახლოებასთან ერთად", ნათქვამია ფონდ „ღია საზოგადოება საქართველოს" ვებგვერდზე. დღის წესრიგი წყარო: osgf.ge

კახეთი. 26 სექტემბერს, თელავის დემოკრატიული ჩართულობის ცენტრში, არასათავრობო ორგანიზაცია „თავისუფალი ზონის" ორგანიზებით საბჭოთა კავშირის ისტორიის შესახებ ფილმის ჩვენება გაიმართა. ფილმი ასახავდა სოციალისტური მმართველობის უარყოფით მხარეებს. „ბოლო პერიოდში ძალზე  აქტულური გახდა საბჭოთა კავშირის ისტორია. შეხვედრა ჩატარდა  იმ ადამიანებთან ერთად, ვისაც საბჭოთა კავშირის რეალური ისტორია აინტერესებს. ნაჩვენები იყო ედვან შნორის ფილმი, რომელიც გადაღებულია რეალურ ფაქტებზე დაყრდნობით", აღნიშნა შეხვედრის ორგანიზატორმა თამარ ლამაზოშვილმა ფილმის ჩვენების შემდეგ  დისკუსია გაიმართა.

კახეთი. დემოკრატიის სკოლამ სწავლება განახლდა. წლევანდელ კურსს 25 მსმენელი  გაივლის.  ნიკა შარვაშიძე, თელავის დემოკრატიული სკოლის კოორდინატორი: ,,სკოლის მსმენელების სასწავლო პროგრამა 5 თვით შემოიფარგლება. ამ პერიოდის განმავლობაში მსმენელები  მოისმენენ არაერთ ლექციას დემოკრატიის მნიშვნელოვან საკითხებზე, გაეცნობიან ისეთ თემებს რომლებიც შეეხება პოლიტიკურ პარტიებს, არჩევნებს, ადამიანის უფლებებს, ადვოკატირებას, ლიდერობას და სხვ.  გარდა ამისა, დაეუფლებიან პროექტის წერის, დებატებისა და საჯარო გამოსვლების პრაქტიკულ უნარ-ჩვევებს. მნიშვნელოვანია ისიც, რომ დემოკრატიის სკოლის მსმენელებს საშუალება აქვთ მონაწილეობა მიიღონ ადგილობრივ კონფერენციებსა და საერთა-შორისო გაცვლით პროგრამებში".  NIMD-ი ხელს უწყობს ახლი ინიციატივებისა და იდეების განხორციელებას.  ამ მიზნით პერიოდულად აცხადებს საგრანტო კონკურსებს და აფინანსებს უშუალოდ დემოკრატიის სკოლების მსმენელთა მიერ დაწერილ პროექტებს, რომელებიც მიმართულია კონკრეტული პრობლემის მოგვარების ან დემოკრატიული იდეების განმტკიცებისაკენ. ნიდერლანდების ინსტიტუტი მრავალპარტიული დემოკრატიისთვის საგანმანათლებლო პროგრამა მესამე წელია ხორციელდება. ნიმდის დემოკრატიული სკოლა საქართველოს 4 ქალაქში ფუნქციონირებს. 

თბილისი. საერთაშორისო გამჭვირვალობა საქართველოს საკანონმდებლო წინადადება პარლამენტის დარგობრივი ეკონომიკისა და ეკონომიკური პოლიტიკის კომიტეტმა მიღებულად ცნო. ორგანიზაციის მიერ მომზადებული კანონპროექტი „საქართველოს შრომის კოდექსში" ცვლილებების შეტანას ითვალისწინებს და მისი მიზანია დამსაქმებლისა და იმ კატეგორიის დასაქმებულის ინტერესების დაბალანსება, რომელიც მმართველ თანამდებობაზე მუშაობს. საკანონმდებლო წინადადება წყარო: transparency.ge

აჭარა. 26 სექტემბერს, ბათუმის დემოკრატიული ჩართულობის ცენტრში ამერიკის ელჩი რიჩარდ ნორლანდი ადგილობრივ საზოგადოებრივ ორგანიზაციებს, სტუდენტებს და სხვადასხვა რელიგიური კონფესიების წარმომადგენლებს შეხვდა. შეხვედრის მიზანი ბოლო პერიოდის განმავლობაში რელიგიურ საკითხებთან დაკავშირებით განვითარებულ მოვლენებზე საუბარი იყო. ასევე, სხვადასხვა რელიგიის წარმომადგენლებს შორის დიალოგის გამართვა, რეალური მიზეზების გამოკვეთა ჭელაში მომხდარი ინციდენტთან დაკავშირებით და პრობლემის გადაჭრის ერთობლივი გზების ძიება იყო.

აჭარა. 26 სექტემბერს, ბათუმის პრეს–კაფეში, სამოქალაქო საზოგადოების ინიციატივით გაიმართა ადგილობრივი საზოგადოებრივი ორგანიზაციებისა და მედიის წარმომადგენლებთან შეხვედრა თემაზე: საზოგადოებრივი ორგანიზაციები და საზოგადოება. შეხვედრის მიზანი საზოგადოებრივი ორგანიზაციებისა და მედიის ურთიერთობის შესახებ დისკუსიის გაგრძელება იყო. მონაწილეებმა იმსჯელეს, ერთის მხრივ, საზოგადოებრივი ორგანიზაციების სწორი საკომუნიკაციო სტრატეგიების საჭიროებასა და, მეორეს მხრივ, მედიის, როგორც სამოქალაქო საზოგადოების აქტორის, როლზე. შეხვედრაზე აჩვენეს სამოქალაქო საზოგადოების ინსტიტუტის მომზადებული საინფორმაციო-სარეკლამო რგოლები, სადაც ასახულია საზოგადოებრივი ორგანიზაციების განვითარების ეფექტურობის ძირითადი პრინციპები, რომლებიც საზოგადოებრივი ორგანიზაციების საერთაშორისო ასამბლეამ დაამტკიცა და რომელთაც „სტამბულის პრინციპები" ეწოდა.

თბილისი. 24 სექტემბერს „საერთაშორისო გამჭვირვალობა – საქართველომ" საქართველოს პრეზიდენტის ადმინისტრაციის წინააღმდეგ თბილისის საქალაქო სასამართლოში სარჩელი შეიტანა. ორგანიზაცია ასაჩივრებს პრეზიდენტის ადმინისტრაციის უარს პრეზიდენტის სარეზერვო ფონდიდან საზღვარგარეთ მაგისტრატურაში სასწავლებლად დაფინანსებული სტუდენტების შესახებ ორგანიზაციის მიერ ინფორმაციის მოთხოვნაზე.  „საერთაშორისო გამჭვირვალობა – საქართველო" იყენებს სამართლებრივ გზებს, სარჩელით მიმართავს თბილისის საქალაქო სასამართლოს პრეზიდენტის ადმინისტრაციის წინააღმდეგ  და მოითხოვს, რომ სასამართლომ დაავალოს პრეზიდენტის ადმინისტრაციას საჯარო ინფორმაციის მოწოდება", ნათქვამია ორგანიზაციის ვებ–გვერდზე. სრულად წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრმა (EMC) პროკურატურას გაუგზავნა განცხადება, რომელშიც სოფელი ჭელას მეჩეთის მინარეთის დემონტაჟის დროს პოლიციის მიერ „აშკარად არაპროპორციული ძალის გამოყენების ფაქტებზე" გამოძიების დაწყება მოითხოვა. „განცხადების პასუხად, შინაგან საქმეთა სამინისტრომ გამოძიების, ისევე როგორც მისი თანამშრომლების მიმართ დისციპლინური წარმოების დაწყებაზე უარი განაცხადა. შსს-ს შეფასებით, პოლიციის მუშაკების მხრიდან არაპროპორციული ძალის გამოყენების ფაქტები არ დგინდება, რადგან ადგილობრივმა მაცხოვრებლებმა სხეულის დაზიანებები მიიღეს საზოგადოებრივი წესრიგის დაცვისთვის ხელის შეშლის მიზნით, პოლიციის მუშაკის მიმართ ძალადობით და ძალადობის მუქარით წინააღმდეგობის გაწევის დროს".  EMC მიიჩნევს, რომ შსს-ს აღნიშნული გადაწყვეტილება აშკარად დაუსაბუთებელია და პროკურატურას დამოუკიდებელი გამოძიების ჩატარებას სთხოვს. სრულად წყარო:ორგანიზაციის გვერდი სოციალურ ქსელში

თბილისი. კონსტიტუციის 42-ე მუხლის ორგანიზებით გაიმართა მრგვალი მაგიდა საგადასახადო სამართალში არსებული პრობლემების შესახებ. ღონისძიებაში მონაწილეობა მიიღეს სახელმწიფო უწყებების (სასამართლოები, ფინანსთა სამინისტრო, შემოსავლების სამსახური, დავების განხილვის საბჭო) და არასამთავრობო ორგანიზაციების წარმომადგენლებმა. ორგანიზაციის გვერდზე ნათქვამია, რომ შემოსავლების სამსახურის წარმომადგენლების მიერ გაზიარებულ და მოწონებულ იქნა 42-ე მუხლის იურისტების მიერ შეთავაზებული რამდენიმე რეკომენდაცია. წყარო:ორგანიზაციის გვერდი სოციალურ ქსელში

თბილისი. კოალიცია „საზოგადოებრივმა ინიციატივამ" საზოგადოებრივი მაუწყებლის ლოგოს ცვლილებასთან დაკავშირებით პეტიცია გაავრცელა. „რუსეთის მიერ საქართველოს ტერიტორიის 20%-ის ოკუპირებული ფონზე, საზოგადოებრივი მაუწყებლის მხრიდან ლოგოს (სიმბოლო, ფერები, დიზაინი) დამსგავსება ოკუპანტი სახელმწიფოს პირველი არხის ლოგოსთან (სიმბოლოებთან) ქართველი ერის შეურაცხყოფაა", ნათქვამია პეტიციაში. „მიგვაჩნია, რომ ტელევიზია, რომელიც ფინანსდება სახელმწიფო ბიუჯეტიდან და მოქალაქეთა შემოსავლებით არ უნდა ატარებდეს ოკუპანტი ქყვეყნის პირველი არხის ლოგოს და ქონდეს ანალოგიური სტუდია". კოალიცია მოითხოვს გამოცხადდეს კონკურსი საქართველოს საზოგადოებრივი მაუწყებლის ლოგოს ((ბრენდირება) სიმბოლო, ფერები, დიზაინი) გამოსავლენად. პეტიცია წყარო:media.ge

თბილისი. ადამიანის უფლებების სწავლებისა და მონიტორინგის ცენტრმა გამოაქვეყნა მოსაზრებები „პოლიციის შესახებ" საქართველოს კანონის პროექტთან დაკავშირებით. „EMC-ის შეფასებით, კანონპროექტის მიღებამდე მნიშვნელოვანია, ინიციატორმა სათანადოდ დაასაბუთოს პოლიციის პრევენციული უფლებამოსილებების გაზრდის საჭიროება და მიზანშეწონილობა. ასევე, სისტემურად იქნეს შეფასებული და დაგეგმილი სამართალდამცავი უწყებების უფლებამოსილებების გაფართოების პარალელურად კონტროლის ადეკვატური მექანიზმების შექმნის საკითხი", აღნიშნულია გამოქვეყნებულ მოსაზრებებში. სრულად  წყარო:ორგანიზაციის გვერდი სოციალურ ქსელში

აჭარა. 24 სექტემბერს, დემოკრატიული ჩართულობის ცენტრის ინიციატივით გაიმართა შეხვედრა თემაზე - „ერთად აღმოვფხვრათ სიძულვილის ენა". შეხვედრის მიზანი მაისი-ივნისის თვეებში ექსპერტთა ფართო ჩართულობით შემუშავებული სიძულვილის წინააღმდეგ ბრძოლის სფეროში სარეკომენდაციო ხასიათის წინადადებათა პაკეტის გაცნიბა იყო. რეკომენდაციებში ასახულია ის ძირითადი მიმართულებები, რომლითაც სასურველია იხელმძღვანელონ პოლიტიკურმა პარტიებმა, საჯარო დაწესებულებებმა, მედია ორგანიზაციებმა, საზოგადოებრივმა ორგანიზაციებმა, ისევე როგორც რიგითმა მოქალაქეებმა.

თბილისი. ევრაზიის თანამშრომლობის ფონდი და კოალიცია დამოუკიდებელი და გამჭვირვალე მართლმსაჯულებისათვის მართავს ფორუმს. ღონისძიების თემაა: სასამათლოს დამოუკიდებლობის და მიუკერძოებლობის ხელშეწყობა: საკანონმდებლო ცვლილებების გარკვეული საკითხები. ფორუმში მონაწილეობას იღებენ საერთაშორისო ორგანიზაციების, აღმასრულებელი, სასამართლო ხელისუფლებისა და არასამთავრობო სექტორის წარმომადგენლები.

აჭარა. 20 სექტემბერს, ბათუმის დემოკრატიული ჩართლობის ცენტრში, ბიოლის ფონდის ორგანიზებით საჯარო დისკუსია გაიმართა თემაზე: „ომით გაყოფილი საზოგადოებები 20 წლის შემდეგ, სამშვიდობო პოლიტიკა და შერიგების რესურსები". დისკუსიის ძირითადი მომხსენებლები სახელმწიფო მინისტრი რეინტეგრაციის საკითხებში პაატა ზაქარეიშვილი და ექსპერტი გია ნოდია იყვნენ.  პაატა ზაქარეიშვილის განცხადებით, სამხრეთ ოსეთთან და აფხაზეთთან ურთიერთობისას, საქართველოს ძირითადი ბერკეტი ევროპული მისწრაფებები უნდა იყოს.  შეხვედრას ადგილობრივი მთავრობის, საზოგადოებრივი ორგანიზაციის, და მედიის წარმომადგენლები ესწრებოდნენ. 

თბილისი. ლიბერალიზმის სასწავლო ცენტრში 20 სექტემბერს გიორგი მშვენიერაძის ლექცია გაიმართა: „თავისუფლება და პასუხისმგებლობა". მათ ვინც ვერ შეძლეს ლექციაზე დასწრება ცენტრი საშუალებას აძლევს ჩანაწერი იხილოს. ლექცია – „თავისუფლება და პასუხისმგებლობა" წყარო: ცენტრის გვერდი სოციალურ ქსელში

თბილისი. „ახალგაზრდა ადვოკატები" ინსტიტუციური დიალოგის ფარგლებში, ევროინტეგრაციის საკითხებში სახელმწიფო მინისტრ ალექსი პეტრიაშვილს შეხვდნენ. დიალოგის მთავარი თემები იყო: აღმოსავლეთ პარტნიორობის არაფორმალურ მინისტერიალში მონაწილეობის შეჯამება; ასოცირების ხელშეკრულების პარაფირების საკითხი; ევროკავშირის სტანდარტიზაციის პროცესის მნიშვნელობა; საქართველოსთან მიმართებით პრორუსული და ევროპული პოლიტიკის შეჯერება, 2013 წლის საპრეზიდენტო არჩევნები და საქართველოს მიმართ პარტნიორი ქვეყნების დამოკიდებულება, ქვეყნის საშინაო პოლიტიკის შესაბამისობა საგარეო პოლიტიკურ გამოწვევებთან, ევროკავშირსა და ნატო – საქართველოს ურთიერთობების პერსპექტივები, საერთაშორისო საზოგადოების ინფორმირება ახალი ხელისუფლების პირობებში გაწეული საქმიანობის შესახებ და ა.შ.  პროექტის ფარგლებში, ეს ორგანიზაციის მიერ გამართული მესამე შეხვედრა იყო.

თბილისი. საქართველოს ახალგაზრდა მწვანეებმა კუს ტბაზე ხეების გაჩეხვის შესახებ სოციალურ ქსელში განცხადება გაავრცელა. „კუს ტბაზე ხეების ჩეხვა დღეს „კანონიერად" განახლდა, რაც ჩვენის აზრით არის იმის დასტური, რომ საქართველოს ხელისუფლება პასუხისმგებლობას იხსნის ქვეყნის ეკოლოგიურ მდგომარეობაზე და მას ბიზნეს სექტორის კეთილსინდისიერების იმედად ტოვებს. ეს უგუნური პოლიტიკა ანალოგიურია ჰესების მასიურ მშენებლობებთან მიმართებაშიც. ახალგაზრდა მწვანეები კიდევ ერთხელ ვადანაშაულებთ გარემოს დაცვის სამინისტროს უმოქმედობაში და მოვუწოდებთ სასწრაფოდ მიიღოს ზომები მსგავსი შემთხვევების თავიდან ასაცილებლად". სრულად  წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაცია ჯამპსტარტ ჯორჯიას პროექტის „ფერადი ინფოს" ფარგლებში ახალი ვიზუალიზაცია გამოქვეყნდა – „რა იცვლება პრეზიდენტის უფლებამოსილებაში?". მასში ასახულია ის ძირითადი ცვლილებები, რაც პრეზიდენტის უფლებამოსილებებს შეეხება. შეგახსენებთ, რომ ოქტომბრის საპრეზიდენტო არჩევნების შემდეგ ძალაში შედის ცვლილებები კონსტიტუციაში, რომლის მიხედვითაც პრეზიდენტის უფლებები იცვლება. სრულად წყარო: feradi.info

მცხეთა–მთიანეთი. 9–20 სექტემბერს, გუდაურში, საზოგადოებრივ ორგანიზაციებისა და დონორი ორგანიზაციების დიალოგი გაიმართა. შეხვედრის მიზანი იყო დონორ და საზოგადოებრივ ორგანიზაციებს შორის დიალოგის ხელშეწყობა და ურთიერთთანამშრომლობის გაღრმავება. ამ საკითხებზე ორგანიზაციებმა ჯგუფებში იმუშავებს და პრეზენტაციები გამართეს. შეიქმნა სარედაქციო ჯგუფი, რომელიც დონორ ორგანიზაციებსა და საზოგადოებრივ ორგანიზაციებს შორის ურთიერთშეთანხმების დოკუმენტზე იმუშავებს. ღონისძიება გაიმართა სამოქალაქო საზოგადოების ინსტიტუტის (CSI), სამოქალაქო განვითარების სააგენტოსა (CiDA) და კონსულტაციის და ტრენინგის ცენტრის (CTC) ინიციატივით, აღმოსავლეთ პარტნიორობის საქართველოს ეროვნული პლატფორმის „საზოგადოებრივი ორგანიზაციების განვითარების ეფექტურობის" ჯგუფთაშორისი ქვე–ჯგუფის პარტნიორობით

თბილისი. საზოგადოებრივი ორგანიზაციები ერთობლივ განცხადებას ავრცელებენ, რომელიც ერთი წინ წინ, 2012 წლის 18 სექტემბერს, მედია საშუალებებით გავრცელებულ პენიტენციურ სისტემაში პატიმართა წამების, არაადამიანური მოყრობის ფაქტების გამოძიების საკითხებს ეხება. „სამწუხაროდ, დღეს, კადრების გავრცელებიდან ერთი წლის შემდეგ, საზოგადოებას არ აქვს სრული სურათი ადამიანის უფლებათა იმ სისტემური დარღვევის შესახებ, რომელსაც ადგილი ჰქონდა სასჯელაღსრულების სისტემაში. ამ ფაქტებზე მიმდინარე გამოძიების შედეგები არ არის გამჭვირვალე. საზოგადოებისთვის ცნობილია მხოლოდ გამოძიებასთან დაკავშირებული რამდენიმე ზოგადი ინფორმაცია... მივმართავთ შესაბამის უწყებებს საზოგადოებას წარუდგინონ დეტალური ანგარიში სასჯელაღსრულების სისტემაში წამებისა და არასათანადო მოპყრობის ფაქტებზე ერთი წლის განმავლობაში მიმდინარე გამოძიებისა და მისი შედეგების თაობაზე...", ნათქვამია განცხადებაში. სრულად წყარო:ადამიანის უფლებების სწავლებისა და მონიტორინგის ცენტრის გვერდი სოციალურ ქსელში