თბილისი. თუ ხარ 17 წლის ან მეტის და ფიქრობ, რომ შეგიძლია სხვების ცხოვრება უკეთესობისკენ შეცვალო, ან თუნდაც გაქვს სურვილი თავისუფალი დრო ნაყოფიერად გაატარო - ეს პროექტი შენთვისაა. „პროექტი „მესტუმრე“ მიზნად ისახავს კვირაში ერთხელ, ერთი საათის განმავლობაში, მოხუცთა პანსიონებში მცხოვრებ მოხუცებულებს მისცეს ახალგაზრდებთან რეგულარული, სოციალური ინტერაქციისა და სასიამოვნო საქმიანობით დაკავების შესაძლებლობა. შერჩეული მოხალისეები დატრენინგდებიან მაკ ჯორჯიას გუნდის მიერ და აღიჭურვებიან იმ საჭირო ცოდნით და უნარებით, რაც ექვსი თვის განმავლობაში დაეხმარებათ მოხუცებთან ურთიერთობაში". დაინტერესების შემთხვევაში - გადადით ბმულზე და დარეგისტრირდით... წყარო: პროექტის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, საქართველოში სახელმწიფო შესყიდვების მონაცემთა ბაზა დამუშავებად ფორმატში ჯერ კიდევ არ არის ხელმისაწვდომი. „სისტემის გაციფრულების 10 წლის თავზეც კი დაინტერესებულ მხარეებს არ აქვთ მარტივი და პირდაპირი წვდომა შესყიდვების შეჯამებულ მონაცემებზე. საქართველოს მთავრობამ და სახელმწიფო შესყიდვების სააგენტომ უნდა გამოავლინონ პოლიტიკური ნება და გამონახონ შესაბამისი რესურსები, რათა საბოლოოდ გაიხსნას სახელმწიფო შესყიდვების სისტემა და მასში არსებული ინფორმაცია მაქსიმალურად ხელმისაწვდომი გახდეს. რა იგულისხმება შესყიდვების ინფორმაციის „საბოლოო გახსნაში“? საქართველოს შესყიდვების სისტემა ხომ სრულად ელექტრონული და გამჭვირვალეა? დიახ, ეს დიდწილად ასეა, თუმცა, საქმე იმაშია, რომ არსებული სისტემა გვანახებს მხოლოდ ცალკეული შესყიდვის შესახებ ინფორმაციას და მისგან შეუძლებელია რაიმე სახის ზოგადი სტატისტიკის და შეჯამებული მონაცემების ამოღება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. გაეროს ბავშვთა ფონდის მხარდაჭერით, ახალგაზრდობის სააგენტოსთან პარტნიორობით და „ჰელფინგ ჰენდის“ ორგანიზებით, ამოქმედდა საქართველოში პირველი ახალგაზრდული მოხალისეობის პლატფორმა, რომელიც ახალგაზრდა მოხალისეებს, საინტერესო იდეებსა და აქტივობებს გააერთიანებს. „პლატფორმაზე უკვე რეგისტრირდებიან მოხალისეები მთელი საქართველოს მასშტაბით. მათი ისტორიები, მათი ორგანიზებით განხორციელებული ყველა მნიშვნელოვანი სიახლე თუ, ზოგადად, საინტერესო საგანმანათლებლო რესურსები, თავს მოიყრის მისამართზე..." შენც შეგიძლია, გახდე მოხალისე. დარეგისტრირდი... youthvolunteering.ge-ზე. საიტი ამ ეტაპზე სატესტო/რედაქტირების რეჟიმშია. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიტიკურ მასალას ლუგარის ლაბორატორიის წინაამდეგ წარმოებულ რუსულ საინფორმაციო ომზე. „მიუხედავად იმისა, რომ შსს დღემდე არ ასახელებს ქვეყანას, საიდანაც საქართველოს ჯანდაცვის სამინისტროზე განხორციელდა კიბერშეტევა, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილემ პაატა იმნაძემ ივარაუდა, რომ შეტევა სწორედ რუსეთის ფედერაციიდან განხორციელდა. ასევე, კიბერშეტევასთან დაკავშირებით გაკეთებულ განცხადებაში რუსეთი ახსენა საქართველოს პრეზიდენტმაც, სალომე ზურაბიშვილმა. აღნიშნულ ვარაუდს კიდევ უფრო ამყარებს ის ფაქტი, რომ რუსეთის ფედერაციის მხრიდან უკვე წლებია გრძელდება თავდასხმები ლუგარის ლაბორატორიაზე, რაც მეტწილად საინფორმაციო ომის ხასიათს ატარებს“, ნათქვამია მასალაში. სრულად... წყარო: idfi.ge

თბილისი. ევროპის კომისია მკვლევარებსა და სხვა დაინტერესებულ მხარეებს იწვევს ჰორიზონტი 2020-ის მწვანე შეთანხმების ფარგლებში განაცხადების მიღებასთან დაკავშირებით გამართულ ვირტუალურ ტრენინგში მონაწილეობის მისაღებად. ვირტუალური ტრენინგის პირველი სესია გაიმართება 2020 წლის 18 სექტემბერს. გაიგეთ მეტი... შეავსეთ სარეგისტრაციო ფორმა შემდეგ ბმულზე... წყარო: ევროკავშირის გვერდი სოციალურ ქსელში

თბილისი. მითების დეტექტორი აქვეყნებს ნინო კალაძის მასალას: რამდენ ტყეს ფლობენ ჩინეთის მოქალაქეები საქართველოში. „17 აგვისტოს ტელეკომპანია „ობიექტივის“ გადაცემაში „ღამის სტუდია“ „გლობალური კვლევების ცენტრის“ ხელმძღვანელმა ნანა დევდარიანმა, რომელიც ამჟამად პატრიოტთა ალიანსის საარჩევნო სიის წევრია, სახელმწიფოს მიერ ჩინეთის მოქალაქეებისთვის ტყის მასივების გადაცემაზე ისაუბრა. მისი თქმით, საქართველოში ტყის მასივების დიდი წილი ჩინეთის მოქალაქეებზე ხანგრძლივი იჯარით არის გადაცემული. დევდარიანის განცხადება, თითქოს ტყის მასივების უდიდეს ნაწილს გრძელვადიანი ლიცენზიებით ჩინეთის მოქალაქეები ფლობენ, დეზინფორმაციაა. საქართვლოში ტყეს ერთადერთი ჩინური კომპანია დროებით სარგებლობაში 2027 წლამდე ფლობს და მის სარგებლობაში არსებული ტყე ქვეყნის ტყით დაფარული ტერიტორიის მხოლოდ 1,4%-ს შეადგენს. გარემოს დაცვისა და სოფლის მეურნეობის სამინისტროს თანახმად, ბოლო ხუთი წლის მანძილზე ჩინეთის მოქალაქისთვის ტყის გადაცემა სარგებლობაში არც ერთი ფორმით არ მომხდარა“, ნათქვამია ბლოგპოსტში. სრულად... წყარო: www.mythdetector.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის მკვლევრის, ზურაბ ბატიაშვილის ბლოგპოსტს: თურქეთ-საბერძნეთის დაპირისპირება და საქართველო: საფრთხეები და გამოწვევები. „თურქეთი, როგორც ნატოს წევრი ქვეყანა და საბერძნეთი, როგორც ნატოსა და ევროკავშირის წევრი ქვეყანა, საქართველოსთვის მნიშვნელოვანი მოკავშირეები არიან. შესაბამისად, თბილისის ინტერესში არ შედის მათ შორის კონფლიქტი; ნატოს შიგნით დაპირისპირება ძალზე ხელსაყრელია კრემლისთვის, რომელიც წლების განმავლობაში ცდილობს განხეთქილების შეტანას ალიანსის რიგებში. ამგვარად, მოსკოვი შეეცდება ნატოს შიგნით არსებული ბზარის გაზრდას და ამ მიზნით განაგრძობს მხარეების წაქეზებას“... სრულად... წყარო: www.gfsis.org

თბილისი. სოციალური მეწარმეობა, როგორია მისი პრაქტიკა საქართველოში, თავად სოციალური საწარმოები და მათი ეკოსისტემა? თუ გაინტერესებთ აღნიშნული საკითხები – შესაძლებლობა გეძლევათ გაეცნოთ სამოქალაქო საზოგადოების ინსტიტუტის უახლეს 2 კვლევაში. საქართველოს პრაქტიკის მიმოიხილავს სოცმეწარმეობის არსებულ მდგომარეობას და მოიცავს სამოქმედო გარემოს ანალიზს. მიმოხილვაში გაანალიზებულია საქართველოში მოქმედი სოციალური საწარმოები საქმიანობის ტიპის, მიზნებისა და იურიდიული ფორმის ჭრილში და ა.შ. კვლევა: სოციალური მეწარმეობა საქართველოში (პრაქტიკის მიმოხილვა, ავტორი ეკა დათუაშვილი), 2020...  მეორე კვლევის საგანს წარმოადგენდა ევროპული გამოცდილების შესწავლა სოციალური მეწარმეობის, სოციალური საწარმოებისა და მათთვის ხელსაყრელი გარემოს მახასიათებლების შესახებ. აღსანიშნავია, რომ სოციალური საწარმოებისათვის აუცილებელი ეკოსისტემა ოთხი ძირითადი ღერძისგან შედგება. ესენია: თვითორგანიზების შესაძლებლობები; ხილვადობა და აღიარება; რესურსებზე ხელმისაწვდომობა; კვლევა, განათლება და უნარები. კვლევა: სოციალური მეწარმეობა, სოციალური საწარმოები და მათი ეკოსისტემა, 2020 (ავტორები ეკატერინე დანელია, მარიამ ლაცაბიძე, ნინო სამსონიძე) ... კვლევები შექმნილია სამოქალაქო საზოგადოების ინსტიტუტის დაკვეთით, საქართველოს სოციალურ საწარმოთა ალიანსთან თანამშრომლობით და არასამეწარმეო სამართლის საერთაშორისი ცენტრის (ICNL) მხარდაჭერით.

თბილისი. მითების დეტექტორი აქვეყნებს მასალას: ვინ დგას კონსპირაციის უკან, თითქოს ამერიკელები გასალამაზებლად ჩვილი ბავშვების ორგანიზმს იყენებენ. „გაზეთ ალიას 31 აგვისტო - 6 სექტემბრის ნომერში ელიზბარ დიაკონიძემ, სასულიერო პირმა, სუროგაციის აკრძალვის შესახებ საუბრისას აღნიშნა, თითქოს ამერიკაში ადამიანები გასაახალგაზრდავებლად და გასალამაზებლად ჩვილი ბავშვების ორგანიზმიდან აღებულ სითხეს მოიხმარდნენ. მან აღნიშნა, რომ ამ საქმეში ჰოლივუდის მსახიობებიც არიან ჩართულები. სასულიერო პირის, ელიზბარ დიაკონიძის მტკიცება, თითქოს ამერიკაში ჩვილი ბავშვების ორგანიზმიდან აღებულ სითხეს გასაახალგაზრდავებლად და გასალამაზებლად მოიხმარენ, კონსპირაციაა. ამ თეორიას QAnon-ი ავრცელებს, რომლის მხარდამჭერები FBI-მა საშინაო ტერორისტულ საფრთხედ გამოაცხადა“, ნათქვამია მითების დეტექტორის ვებგვერდზე. სრულად... წყარო: www.mythdetector.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის უფროსი მკვლევრის ვალერი ჩეჩელაშვილის ბლოგპოსტს: „რამდენიმე მოსაზრება ტერმინის „პოსტსაბჭოთა სივრცე“ გამოყენების თაობაზე“. „რა იყო ასეთი სსრკ? მისი გაუჩინარების შემდეგ, რატომ არ აძლევს მოსვენებას კრემლის ბინადრებს ფანტომური ტკივილები? და როგორ ემსახურება მათ ინტერესებს ტერმინი „პოსტსაბჭოთა სივრცე“? როგორ აძლიერებს იგი დაშლილი იმპერიის შესახებ ილუზიებს? დასაწყისისთვის, სსრკ არ იყო არც საბჭოთა, არც სოციალისტური, არც რესპუბლიკების და არც კავშირი. ეს იყო კლასიკური ფორმის ტოტალიტარული სახელმწიფო, სადაც ძალაუფლება ეკუთვნოდა კომუნისტურ პარტიაში გაერთიანებულ ადამიანთა ჯგუფს. უფრო ზუსტად, რამდენიმე პიროვნებას, რომლებიც პოლიტბიუროს წევრები იყვნენ“, ნათქვამია ორგანიზაციის ვებგვერდზე. სრულად... წყარო: www.gfsis.org

თბილისი. საქართველოს ახალგაზრდა იურისტთა ასოციაციამ ადგილობრივი მოსახლეობის, ასევე, ორგანიზაცია „ბათომის“ სახელით „ბათუმი რივიერას“ მშენებლობასთან დაკავშირებით გაცემული ნებართვა გაასაჩივრა. „ადმინისტრაციულ საჩივარს საქართველოს ეკონომიკისა და მდგრადი განვითარების სამინისტრო განიხილავს. საია მიიჩნევს, რომ გასაჩივრებული აქტები არღვევს გარემოს დაცვითი შეფასების კოდექსით, საქართველოს სივრცის დაგეგმარების, არქიტექტურული და სამშენებლო საქმიანობის კოდექსით, სივრცითი მოწყობისა და ქალაქთმშენებლობის საფუძვლების შესახებ საქართველოს კანონით, საქართველოს მთავრობის დადგენილებისა და ზოგადი ადმინისტრაციული კოდექსით დადგენილ მოთხოვნებს“. სრულად... წყარო: gyla.ge

თბილისი. მითების დეტექტორის ინფორმაციით, 2 სექტემბერს ფეისბუკ გვერდ „ალტ-ინფოს” ონლაინ გადაცემა პარტია „პატრიოტთა ალიანის” რუსული დაფინანსების საკითხს შეეხებოდა. „ალტ-ინფო”-ს წამყვანმა შოთა მარტინენკომ განაცხადა, რომ პროდასავლური პოლიტიკურ პარტიები საქართველოში უცხოეთიდან ფინანსდებიან და „ევროპულ საქართველოსა” და სხვა პარტიებს „ღია საზოგადოების ფონდი” (ე.წ. სოროსის ფონდი) აფინანსებს. „მტკიცება, თითქოს საქართველოში პოლიტიკურ პარტიებს „ღია საზოგადოების ფონდი” აფინანსებს, დეზინფორმაციაა. ფონდი, შიდა პოლიტიკის თანახმად, პოლიტიკური პარტიებს ან მისი მხარდამჭერი/საწინააღმდეგო კამპანიებს არასოდეს აფინანსებს. გარდა ამისა, პროექტის დაფინანსების ონლაინ განაცხადშიც აღნიშნულია, რომ პროექტი პოლიტიკური პარტიის/პირის მხარდამჭერ საქმიანობას არ უნდა ითვალისწინებდეს“. სრულად... წყარო: www.mythdetector.ge

თბილისი. საქართველოს სტრატეგიისა და საერთაშორისო ურთიერთობების ცენტრი აქვეყნებს ანალიტიკოს მამუკა კომახიას მასალას: პოსტსაბჭოთა სივრცეში რუსეთის პოლიტიკის მიმოხილვა, გამოცემა 15. „რუსეთი პოსტსაბჭოთა სივრცეს საკუთარი გავლენის სფეროდ მიიჩნევს და რეგიონში დასავლეთის პოზიციების გაძლიერებას თავისი ეროვნული ინტერესების საფრთხედ განიხილავს. ჩვენი მიმოხილვის მიზანია მკითხველს პოსტსაბჭოთა სივრცეში რუსეთის პოლიტიკასთან დაკავშირებული მნიშვნელოვანი მოვლენების შესახებ ინფორმაცია მივაწოდოთ. მიმოხილვა გამოდის ორ კვირაში ერთხელ და გამოადგება ყველას, გადაწყვეტილების მიმღებთ, საჯარო მოხელეებს, მედიის წარმომადგენლებსა თუ სხვებს, ვისაც პოსტსაბჭოთა ქვეყნებში მიმდინარე პროცესები აინტერესებს“, ნათქვამია ორგანიზაციის ვებგვერდზე. სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს პოდკასტს: რა დაგვანახა პანდემიამ მონოინდუსტრიულ რეგიონებთან დაკავშირებით.  „ბოლო მოვლენებმა ცხადი გახადა, რომ პანდემიის პირობებში სახელმწიფო ორმაგ პოლიტიკას ეწევა - მაშინ, როდესაც სახელმწიფო დონეზე ერთის მხრივ გაცხადებულ მიზნად ადამიანთა ფიზიკური ჯანმრთელობა და უსაფრთხოებაა დასახელებული, მონოქალაქებში სამთომოპოვებითი სექტორში საქმიანობა არ გაჩერებულა, ხოლო მაღაროელების და მეშახტეების პროტესტი უსაფრთხო სამუშაო გარემოს შესახებ საჯარო პოლიტიკური დღისწესრიგიდან გაქრა“. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიტიკურ მასალას: კიბერშეტევა ჯანდაცვის სამინისტროზე და რუსული კვალი. „შეიძლება ითქვას, რომ რუსეთის ფედერაციიდან მომავალი კიბერ-საფრთხეები გარკვეულწილად წინასწარ განჭვრეტადია. ასევე, მიუხედავად იმისა, რომ საქართველოს შსს არ ასახელებს კონკრეტულ ქვეყანას, საიდანაც განხორციელდა კიბერშეტევა საქართველოს ჯანდაცვის სამინისტროზე, ამავე ანგარიშზე დაყრდნობით, შესაძლებელია იმის თქმა, რომ აღნიშნული სწორედ რუსეთის ინტერესებში შედიოდა, ვინაიდან, როგორც მანამდე განვითარებული მოვლენებიც ცხადყოფდა, რუსეთი დიდი ხანია საფრთხედ მიიჩნევს მის საზღვართან ამერიკული ლაბორატორიის არსებობასა და წარმატებულ ფუნქციონირებას, რაც რუსეთის სამხედრო დოქტრინის მე-14 პუნქტის დარღვევას წარმოადგენს“. სრულად... წყარო: idfi.ge

თბილისი. პლატფორმა „სალამ“-ი საქართველოში გავრცელებული საფრთხეში მყოფი იბერიულ-კავკასიური ენების დოკუმენტირებას წარმატებით აგრძელებს. „მოგახსენებთ, რომ აშშ-ში მოქმედი საფრთხეში მყოფი ენების ფონდის ფინანსური მხარდაჭერით პლატფორმა #სალამ-ი ქმნის ენების აუდიო/ვიდეო არქივს. წელს ფონდის მხარდაჭერით კრიტიკული საფრთხის წინაშე მყოფი წოვათუშური და უდიური ენების არქივის შექმნა დავიწყეთ. პროექტის ფარგლებში მოგროვებული მასალები დამხმარე საშუალების სახით გადაეცემა ყველა დაინტერესებულ მხარეს. ლინგვისტური ექსპედიციის ფარგლებში ენათმეცნიერები ამჟამად იმყოფებიან წოვათის თემის თუშებით დასახლებულ სოფელ ზემო ალვანში, სადაც მიმდინარეობს წოვათუშური ტექსტების აქტიური ჩაწერა. დღეს ისინი ზღვის დონიდან 2000-2300 მეტრის სიმაღლეზე, #ტბათანა-ში, წოვა-თუშთა საძოვარზე იმყოფებოდნენ. გიზიარებთ ფოტოებს ჩვენი ექსპედიციიდან“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 1 სექტემბერს, ინფორმაციის თავისუფლების განვითარების ინსტიტუტმა (IDFI) საქართველოს პარლამენტის ეროვნულ ბიბლიოთეკასთან ერთად ბენიამინ (ბენია) ჩხიკვიშვილის მემორიალური ალბომის პრეზენტაცია გამართა. სრულად... წყარო: idfi.ge

საზოგადოებრივი ორგანიზაციების ვებ-პორტალი – www.csogeorgia.org – მადლობას უხდის მომხმარებელს და სექტემბრამდე ემშვიდობება. დაგველოდეთ, ჩვენ მალე დავბრუნდებით...

თბილისი. პლატფორმა სალამ-ი 50 მოხალისეს ეძებს, რომლებიც ქვემო ქართლის 50 სოფელში ჩავლენ და არასრულწლოვნებს და მათ მშობლებს 200 ლარიანი სახელწიფო დახმარების მიღებისთვის რეგისტრაციაში დაეხმარებიან. „ჩვენი აზრით, იმისათვის, რომ ყველა მშობელს შეეძლოს დარეგისტრირება და ყველა ბავშვმა მიიღოს ეს დახმარება, დამატებითი ძალისხმევაა საჭირო. კარგად გვაქვს გაცნობიერებული, რომ ჩვენი მწირი რესურსების გამოყენებით, ამ ეტაპზე, ჩვენ ყველა ბავშვის რეგისტრაციას და პრობლემის არსებითად მოგვარებას ვერ შევძლებთ. აქედან გამომდინარე, პლატფორმა სალამ-ი საქართველოს ყველა რეგიონიდან მოხალისეებს იწვევს, რათა მათი რესურსების გამოყენებით ერთად დავფაროთ ქვემო ქართლის 50 სოფელი და დავარეგისტრიროთ ყველა ბავშვი. სალამ-ს ღრმად სწამს, რომ აღნიშნული ინიციატივა, გარდა რეგისტრაციაზე დახმარებისა, ქვეყნის მოქალაქეებს შორის ინტერეთნიკური სოლიდარობის კულტივირებასაც შეუწყობს ხელს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის ინფორმაციით, 14 აგვისტოს აჭარის უმაღლესი საბჭოს ბიურომ უმაღლესი საბჭოს ღია მმართველობის 2020-2021 წლების პირველი სამოქმედო გეგმა დაამტკიცა. „სამოქმედო გეგმა მიზნად ისახავს უმაღლეს საბჭოში სამოქალაქო ჩართულობისა და ინფორმაციის ხელმისაწვდომობის გაზრდას, ანგარიშვალდებულების გაძლიერებას და ინოვაციებისა და ტექნოლოგიების დანერგვას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კრეგ ვორალის სტატიის მარიამ ბეგაძისეულ თარგმანს: „დანაშაული და კაპიტალი: დანაშაულის და სასჯელის მარქსისტული თეორიის ხელახალი გააზრება“. „მარქსისტულმა კრიმინოლოგიამ პოპულარობის პიკს 1970იან წლებში მიაღწია. მან საბოლოოდ თანმიმდევრული თეორია ვერ შექმნა, თუმცა პოზიტივიზმის, ასევე სასჯელის და გამოსწორების პოლიტიკის (correctionalism) მნიშვნელოვანი კრიტიკა შემოგვთავაზა. ეს ნაშრომი მიმოიხილავს ტრადიციული მარქსისტული კრიმინოლოგიის ცენტრალურ დებულებებს, ასევე მის მიმართ არსებულ ძირითად კრიტიკას, განსაკუთრებით დევიაციის დეტერმინისტული მოდელისგან გამიჯვნის აუცილებლობის შესახებ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებათა სახლის მიერ გამოცხადებული საგრანტო კონკურსის ვადა გაგრძელდა. საკონკურსო განაცხადების მიღება გაგრძელდება 9 აგვისტოს 18:00 საათამდე.  უშუალოდ გრანტი მიზანია Covid-19 პირობებში საზოგადოებრივი ორგანიზაციების მოქნილობისა და მდგრადობის ხელშეწყობა.  საგრანტო წინადადება...  წყარო: ადამიანის უფლებათა სახლი