თბილისი. საერთაშორისო გამჭვირვალობა - საქართველო გვიხსნის თუ როგორ პარლამენტს მივიღებთ, თუკი საპარლამენტო ოპოზიცია უარს იტყვის შესვლაზე და საკანონდებლო ორგანო მხოლოდ „ქართული ოცნების” 90 დეპუტატით იქნება წარმოდგენილი. „საქართველო, კონსტიტუციის უკანასკნელი ცვლილებების თანახმად, საპარლამენტო რესპუბლიკაა და შესაბამისად, პარლამენტის გამართული ფუნქციონირება საკვანძო მნიშვნელობისაა ქვეყნის განვითარებისათვის. პარლამენტი ხალხის წარმომადგენლობითი ორგანოა, ის საქართველოს მოსახლეობის არჩევანსა და მის ნებას უნდა გამოხატავდეს. ერთპარტიული პარლამენტი ვერ შეასრულებს წარმომადგენლობითი ორგანოს ფუნქციას, ვერ შეძლებს გამართულად ფუნქციონირებას და მთავრობის კონტროლს. პარლამენტის თანამდებობები სრულად ვერ დაკომპლექტდება და ბევრ გადაწყვეტილებას პარლამენტი ვერ მიიღებს ხმათა არასაკმარისი რაოდენობის გამო. ოთხმოცდაათი წევრით წარმოდგენილი პარლამენტი ვერ მიიღებს ისეთ გადაწყვეტილებებს, რომელთა მიღებასაც 100 ან 113 ხმა ჭირდება და ძალიან გართულდება 90 ხმის მობილიზებაც. ასეთი გადაწყვეტილება კი არაერთია“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. განათლების განვითარების და დასაქმების ცენტრი (EDEC) მოხალისეობის კვირეულის ფარგლებში, 10-14 დეკემბერს (18:00–დან 19:00 საათმდე) გიწვევთ კინო-ჩვენებებსა და ონლაინ დისკუსიებზე. „კინო-საღამოების ციკლი მხოლოდ 5 დღე გაგრძელდება. ყოველდღიურად სპეციალურ ონლაინ პლატფორმაზე მოხალისეობის თემაზე გადაღებული დოკუმენტური და მხატვრული ფილმები გაეშვება, ხოლო ონლაინ დისკუსიებს გამართავენ მოწვეული სპიკერები: გოდერძი შარაშია, გიორგი კალანდია, ლელა გაფრინდაშვილი, ლაშა ბაქრაძე, ნათია ლოლაძე, გიორგი კეკელიძე, სიმონ ჯანაშია, ლევან ღამბაშიძე და ლევან გიგინეიშვილი. საინტერესო თემების და ნაჩვენები ფილმების გარშემო დისკუსიებს კინომცოდნე თამთა თურმანიძე წარმართავს. ყოველი კინო-საღამოს ბოლოს მოწვეული სპიკერები უპასუხებენ აუდიტორიის მიერ დასმულ შეკითხვებს, რისთვისაც რეკომენდებულია თქვენთვის საინტერესო ფილმის წინასწარ ნახვა. თქვენთვის სასურველ კინო-ჩვენებასა და დისკუსიაზე რეგისტარციისათვის მიყევით შესაბამის ბმულს. თქვენ არ ხართ შეზღუდული კინო-ჩვენებების რაოდენობაში და ყოველ ღონისძიებაზე შეგიძლიათ რეგისტრაცია“.  ➤ 10 დეკემბერი - მოხალისეობა საქართველოში... ➤ 11 დეკემბერი - მოხალისეობრივი მოძრაობა XIX-XX საქართველოში... ➤ 12 დეკემბერი - საბჭოთა მოხალისეობა ეკრანზე და ეკრანს მიღმა... ➤ 13 დეკემბერი – მოხალისეობა გლობალურად...  ➤ 14 დეკემბერი – შექმენი და გააგრძელე სიკეთის ჯაჭვი... სრულად... წყარო: ორგანიზაციის გვერდი სოციალურ ქსელში

აჭარა. სოციალური საწარმო თავისუფალი სივრცე/Free Space მაკლეინის ასოციაციის MAC Georgia რჩეული სოციალური საწარმო გახდა სოც. მეწარმეობის მე-9 ფორუმზე. „„მაკლეინის ასოციაციის“ მიერ, მის რჩეულ საწარმოს ფინანსური ჯილდო გადაეცემა საქმიანობის გასაფართოვებლად და უფრო მეტი სოციალური შედეგის უზრუნველსაყოფად“.  დამატებითი ინფორმაცია „სოციალური მეწარმეობის ფორუმი 2020“-ის შესახებ იხილეთ ბმულზე...  სრულად... წყარო: ორგანიზაციის გვერდი სოციალურ ქსელში სხვა

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: „დავითი და გოლიათი“ და „ქართველები კრემლში“: პოსტ-კოლონიური პერსპექტივა კონფლიქტის შესახებ პოსტ-საბჭოთა საქართველოში. „გეოპოლიტიკის და დემოკრატიის პოლარიზებული ჩარჩოს მიღმა, ეს სტატია არის მცდელობა დაინახოს სამხრეთ ოსეთის და აფხაზეთის კონფლიქტები 1990-იანი წლების სამხრეთ კავკასიის დეკოლონიზაციის ჭრილში. წინამდებარე სტატია იწყება ცარისტული ეპოქის მოკლე მიმოხილვით, შემდეგ განიხილავს ოსეთის, აფხაზეთის და საქართველოს საბჭოთა კავშირში გაერთიანების ფორმებს. ასევე იმ შედეგებს, რაც ამ გაერთიანების ფორმებს შორის განსხვავებამ გამოიწვია და რა ზეგავლენა იქონია ამ მოდელებმა აფხაზურ და ოსურ კონფლიქტებზე. ბოლო ნაწილში განხილულია საქართველოს, აფხაზეთის და სამხრეთ ოსეთის პოსტ კოლონიური სუვერენიტეტის თავისებურებები“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის სტაჟიორის, ანი ზირაქაშვილის ბლოგპოსტს: რუსეთის ენერგოპოლიტიკა ცხინვალის რეგიონში. „ბოლო წლებში განხორციელებული პოლიტიკის შედეგად, ცხინვალის რეგიონი, აფხაზეთისგან განსხვავებით, ენერგოსფეროში სრულად გახდა რუსეთზე დამოკიდებული. ამ ეტაპზე, რუსეთის ფინანსური და ტექნიკური მხარდაჭერის შედეგად, ცხინვალის რეგიონში გაზისა და ელექტროენერგიის მიწოდება მხოლოდ რუსეთიდან ხდება. მოსკოვის მიზანია განხორციელებული და დაგეგმილი პროექტების შედეგად ცხინვალის რეგიონის ენერგეტიკული სტაბილურობის უზრუნველყოფა“. სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კვლევას: კულტურული დომინაციის და უმცირესობების კულტურის წაშლის ნიშნები ქვემო ქართლის რეგიონში. „კვლევის შედეგად მიღებული მონაცემები ქვემო ქართლში კულტურული დომინაციის კომპლექსურ სურათს ასახავს. კვლევის მონაცემებზე დაყრდნობით შეგვიძლია ვისაუბროთ, ერთი მხრივ, მიზანმიმართულ, თუმცა მეორე მხრივ, გაუაზრებელ სახელმწიფო პოლიტიკაზე, რომლის შედეგებიც უშუალოდ აზერბაიჯანული თემის ყოველდღიურობაზე მტკივნეულად აისახება. აზერბაიჯანული თემის წარმომადგენლებთან ჩატარებულ ინტერვიუებს ერთი საერთო ნარატივი აერთიანებს: ეს აღიარების მოლოდინია, რომელიც არადომინანტური კულტურის დანახვის, უკეთ გაცნობის ინტერესით გამოიხატება, ხოლო უპირველესი ამოცანა ქართულ საზოგადოებაში, მათი აზრით, პრობლების აღიარებაა“. სრულად...  წყარო: emc.org.ge

თბილისი. ამ დღის აღსანიშნავად, განათლების განვითარების და დასაქმების ცენტრი, პროექტის „სამოქალაქო საზოგადოების განვითარების ინიციატივა“ ფარგლებში, 7–14 დეკემბერს გამართავს მოხალისეობის კვირეულს. კვირეულის განმავლობაში სოციალურ ქსელებში გავრცელდება მოხალისეობისადმი მიძღვნილი სხვადასხვა ანიმაციები და გამოქვეყნდება საინტერესო ინფორმაცია მოხალისეებისა და პროექტის მიღწევების შესახებ. 10–14 დეკემბერს კი 5 დღის განმავლობაში მოეწყობა კინო-ჩვენება და ონლაინ დისკუსიები ცნობილი მოაზროვნეების მონაწილეობით. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველომ“ დღეს გამოხატვის თავისუფლების მიმართულებით საქართველოში არსებულ გამოწვევებსა და პერსპექტივებზე ონლაინ დისკუსია გამართა, რომელშიც მონაწილეობა არასამთავრობო ორგანიზაციების, სახალხო დამცველისა და მედიის წარმომადგენლებმა მიიღეს. „შეხვედრის მონაწილეები გაეცნენ „უფლებები საქართველოს“ პროექტს საქართველოში გამოხატვის თავისუფლების დაცვის თაობაზე, რომელიც ნიდერლანდების სამეფოს საგარეო საქმეთა სამინისტროს მხარდაჭერით ხორციელდება. დისკუსიის მთავარ თემას გამოხატვის თავისუფლებასა და მედიის საქმიანობასთან დაკავშირებული საკანონმდებლო ხარვეზები წარმოადგენდა. განსაკუთრებული ყურადღება გამახვილდა ჟურნალისტების უსაფრთხოებისა და პროფესიულ საქმიანობაში უკანონო ხელის შეშლის საკითხებზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 2020 წლის 4, 5, 6 დეკემბერს იმართება პირველი საერთაშორისო კონგრესი ყრუუსინათლობის შესახებ საქართველოში: „ვხედავ და მესმის შეხებით.“  კონგრესის მიზანია გადაწყვეტილების მიმღები პირებისა და საზოგადოების ცნობიერების ამაღლება ყრუუსინათლობის შესახებ. ასევე, მათი ყურადღების მიპყრობა ორმაგი სენსორული დარღვევის ეფექტიანი მართვის სტანდარტის შექმნისა და დანერგვის მნიშვნელობაზე. სამი დღის განმავლობაში, დაგეგმილ ლექციებზე, დისკუსიებსა და ვორქშოფებზე, რომლებსაც დარგის ქართველი და უცხოელი ექსპერტები გაუძღვებიან, განიხილება ყრუ-უსინათლო პირთა წინაშე არსებული გამოწვევები საქართველოსა და მსოფლიოს სხვა ქვეყნებში, გაზიარდება საერთაშორისო გამოცდილება და საუკეთესო პრაქტიკები. იხ. პროგრამა... წყარო: ორგანიზაციის გვერდი სოციალურ ქსელში

თბილისი. კონსული არის გადაწყვეტილებების მიღების, სამოქალაქო დიალოგისა და ერთობლივი ინიციატივების შექმნის ელექტრონული პლატფორმა, რომელიც საქართველოს 5 ქალაქისთვის შეიქმნა: თბილისი... გორი... თელავი... ქუთაისი... ბათუმი... დარეგისტრირდით თქვენი ქალაქის ვებ-გვერდზე, დააყენეთ საკუთარი ინიციატივები და გააცანით ფართო საზოგადოებას, რათა მოიპოვოთ მხარდაჭერა მათი განხორციელების პროცესში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) 4, 5 და 6 დეკემბერს, გიწვევთ საერთაშორისო ფორუმზე „ექსტრაქტივისტული გადაკვეთები - პოლიტიკა, ეკოლოგია და სოციალური სამართლიანობა“. ფორუმი ონლაინ რეჟიმში ჩატარდება. მონაწილეობისთვის გთხოვთ, დარეგისტრირდეთ... სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) და საქართველოს ახალგაზრდა იურისტთა ასოციაცია (GYLA) საჯარო მმართველობის პოლიტიკის დოკუმენტების შემუშავებასთან დაკავშირებით ერთობლივ განცხადებას ავრცელებენ. საჯარო მმართველობის რეფორმის გზამკვლევის და 2019-2020 წლების სამოქმედო გეგმის ვადის გასვლის შესაბამისად, მთავრობის ადმინისტრაციამ ახალ სტრატეგიასა და სამოქმედო გეგმაზე დაიწყო მუშაობა. პროცესი სამოქალაქო საზოგადოების წარმომადგენელთა ჩართულობით დაიწყო. ორგანიზაციები მიესალმებიან სამოქმედო გეგმის შემუშავების პროცესში სამოქალაქო საზოგადოების ჩართულობის უზრუნველყოფას და ამავდროულად, ხაზს უსვამენ წინა სტრატეგიულ დოკუმენტებთან დაკავშირებული ხარვეზების აღმოფხვრის აუცილებლობას... სრულად... წყარო: gyla.ge

თბილისი. პარტნიორობა ადამიანის უფლებებისთვის აქვეყნებს შეზღუდული შესაძლებლობების მქონე დედების ისტორიის მეორე ნაწილს. „პირველი ტრავმა მშობიარობა იყო. 2007 წელს ვიმშობიარე. იდეალური ორსულობით, 6 თვემდე ვმუშაობდი. სასწრაფოს ექიმი ვიყავი. აყვანილი ექიმით, იდეალური, სწრაფი მშობიარობით მე-4 სამშობიაროში ვიმშობიარე. 2.900კგ გაჩნდა ახალშობილი. ექიმს ეჩქარებოდა და მისი დაუდევრობით მოწყვიტა მომყოლი და ატყდა ატომური სისხლდენა. 2 ლიტრი სისხლი დავკარგე. ჰემორაგიული შოკით გამიყვანეს საოპერაციოში და საშვილოსნო ამომიღეს. პირველი კლინიკური სიკვდილი საოპერაციო მაგიდაზე მქონდა. გარდა ამისა, კანის ღრმა შრეში ჩამიტოვეს კანის საკერავი ნემსი, რაც ცალკე საოპერაციო გახდა 9 თვის შემდეგ“, ამბობს ერთ-ერთი რესპონდენტი. სრულად... წყარო: phr.ge

თბილისი. ადამიანის უფლებების სწავლებისა და მონიტორინგის ცენტრი (EMC) და ინფორმაციის თავისუფლების განვითარების ინსტიტუტი (IDFI) დამოუკიდებელი საგამოძიებო მექანიზმის გამოწვევებზე განცხადებას ავრცელებენ. „დამოუკიდებელი საგამოძიებო მექანიზმის ამოქმედებიდან ერთი წლის თავზე, კვლავაც არ არსებობს ამ სამსახურის ინსტიტუციური და ფუნქციური დამოუკიდებლობის საკმარისი გარანტიები. სამსახურის შექმნა უმნიშვნელოვანესი იყო ქვეყანაში წამებისა და არასათანადო მოპყრობის წინააღმდეგ ბრძოლის თვალსაზრისით, თუმცა საჭიროა შემდგომი ნაბიჯები სახელმწიფო ინსპექტორის სამსახურის შემდგომი გაძლიერებისთვის“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „სოციალური მეწარმეობის ფორუმი 2020“ 19 ნოემბერს, სოციალური მეწარმეობის საერთაშორისო დღეს გაიმართა, „პანდემიისა და უსაფრთხოების ნორმების გათვალისწინებით, ფორუმი ჩატარდა ონლაინ ფორმატში. მონაწილეებს შესაძლებლობა ჰქონდათ ZOOM პლატფორმის მეშვეობით დასწრებოდნენ ფორუმს. ასევე, ღონისძიება გაშუქდა სოციალურ საწარმოთა ალიანსის FACEBOOK LIVE-ის მეშვეობით.  ფორუმის ფარგლებში გამოვლინდა „წლის სოციალური საწარმო“ - გუმბათი“. ღონისძიების ერთ-ერთი პარტნიორია სამოქალაქო საზოგადოების ინსტიტუტი (CSI). სრულად... წყარო: ალიანსის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის უფრო მკვლევრის, შოთა უტიაშვილის ბლოგპოსტს: ვინ მოიგო და ვინ წააგო ყარაბაღის ომით. „დამარცხდა სომხეთი, რომელმაც დათმო მიმდებარე შვიდი რაიონი და თავად ყარაბაღის ნაწილი, ქალაქი შუშით, და გაიმარჯვა აზერბაიჯანმა, რომელმაც, შესაბამისად, ეს ტერიტორიები მიიღო. დამარცხდა დასავლეთიც, რადგანაც ცხადად გამოჩნდა, რომ მისი გავლენა რეგიონზე მინიმალურია. ფორმალურად, აშშ და საფრანგეთი მინსკის ჯგუფის თანათავმჯდომარეები არიან (რუსეთთან ერთად), მაგრამ მათ მოწოდებებს ომის შეწყვეტის შესახებ არანაირი გავლენა კონფლიქტის მსვლელობაზე არ მოუხდენიათ, ისევე, როგორც ვაშინგტონში საგარეო საქმეთა მინისტრების მიერ ხელმოწერილ შეთანხმებას“. სრულად... წყარო: www.gfsis.org

თბილისი. ადამიანის უფლებების სწვალებისა და მონიტორინგის ცენტრი (EMC) აქვეყნებს თორნიკე გერლიანის სტატიას: სათემო მიწათსარგებლობა და ადგილობრივთა კოლექტიური უფლებები რესურსებზე. „წინამდებარე ტექსტი მიმოიხილავს საერთაშორისო და სახელმწიფოს შიდა დონეებზე სათემო მიწათსარგებლობასთან დაკავშირებული უფლებების კომპონენტებს და იმ მიდგომებს, თუ როგორ უნდა მოხდეს მათი აღიარება და დაცვა. მასში გაანალიზებულია სათემო მიწათსარგებლობის სხვადასხვა სამართლებრივი რეჟიმები და მათი პოტენციური გავლენები ადგილობრივი თემის ინტერესებისა და უფლებების დაცვის კონტექსტში. ტექსტში წარმოდგენილი მსჯელობები არის მცდელობა, სათემო მიწათსარგებლობის აღიარებისა და დაცვის მნიშვნელობის წარმოჩენით ნათელი გახდეს მისი პრინციპული დაპირისპირება განვითარების იმ პარადიგმებთან, რომლებიც მიმართულნი არიან რესურსების მაქსიმალური ათვისების გზით გარემოსთვის გამოუსწორებელი ზიანის მიყენების, ადგილობრივი კულტურის, ცხოვრების წესისა და ტრადიციების გაქრობის, უთანასწორობის კვლავწარმოებისა და კერძო კაპიტალის ხელში რესურსებისა და ძალაუფლების თავმოყრისკენ“, ნათქვამია ორგანიზაციის გვერდი სოციალურ ქსელში. სრულად... წყარო: emc.org.ge

თბილისი. პანდემიით შექმნილი გარემოების გათვალისწინებით, ევროკავშირის ENPARD-ის პროგრამის ფინანსური მხარდაჭერით მიმდინარე პროექტის ფარგლებში, წალკის ადგილობრივი განვითარების ჯგუფი (LAG) საგრანტო კონკურსში განაცხადის წარმოდგენის ვადას 15 დეკემბრამდე ახანგრძლივებს. საგრანტო კონკურსი მიზნად ისახავს მუნიციპალიტეტში ეკონომიკურ დივერსიფიკაციას და ადგილობრივი თემების კეთილდღეობისა და სოციალურ-ეკონომიკური მდგომარეობის გაუმჯობესებას. განაცხადის წარდგენის ბოლო ვადაა: 15 დეკემბერი, 2020, 18:00 სთ. გაიგეთ მეტი აქ... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი გთავაზობთ ახალ სტატიას: „რუსეთის ექსპანსია კავკასიაში და საქართველო“ პროექტის ფარგლებში. ნაწილი VIII - ორი რუსეთი (მითი თუ რეალობა?). პროექტის მიზანია რუსეთის მიერ ფართოდ ტირაჟირებული თვალსაზრისისგან განსხვავებულად გააშუქოს XVIII-XX საუკუნეების ქართულ-რუსული ურთიერთობები. სრულად... წყარო: www.gfsis.org

თბილისი. სახალხო დამცველთან არსებული რელიგიათა საბჭო აშშ-ს სახელმწიფო მდივნის მაიკლ პომპეოს ვიზიტის თაობაზე მიმართვას ავრცელებს. „მივესალმებით ამერიკის შეერთებული შტატების სახელმწიფო მდივნის მაიკლ პომპეოს სტუმრობას. ჩვენთვის განსაკუთრებით მნიშნველოვანია საქართველოში ვიზიტის განხორციელების ერთ-ერთი საფუძველი - რელიგიის თავისუფლების მხარდაჭერა.  ვსარგებლობთ შემთხვევით და გვინდა მადლობა გადავუხადოთ ამერიკის შეერთებული შტატების ხალხსა და მთავრობას მთელი ამ წლების განმავლობაში, ჩვენი ქვეყნის დამოუკიდებლობისა და მთლიანობის, დემოკრატიის, ადამიანის უფლებების დაცვის, კეთილდღეობის განმტკიცებისა და განვითარებისკენ მიმართული დიდი ძალისხმევის გამო, ასევე იმის გამო, რომ მთელ მსოფლიოში და მათ შორის, საქართველოში აშშ მტკიცედ უჭერს მხარს რელიგიის თავისუფლებასა და ტოლერანტობას“, ნათქვამია განცხადებაში. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტის ბლოგპოსტის თანახმად, სახელმწიფო სერვისების განვითარების სააგენტომ (სააგენტო) შეიმუშავა სახელმწიფო სერვისების შექმნის, მიწოდების, ხარისხის უზრუნველყოფისა და განფასების პოლიტიკის დოკუმენტისა და სამოქმედო გეგმის სამუშაო ვერსიები და მათი მთავრობის მიერ დამტკიცება 2020 წლის დეკემბერშია დაგეგმილი. ორგანიზაციამ სააგენტოს წარუდგინა პოლიტიკის დოკუმენტთან და სამოქმედო გეგმასთან დაკავშირებით საკუთარი მოსაზრებები. IDFI-ის მიერ წარდგენილი ექვსი რეკომენდაციიდან ორი ეხებოდა დოკუმენტების შინაარსობრივ მხარეს: აღსრულების მექანიზმთან დაკავშირებით ამოცანების და ღონისძიებების გაწერის საჭიროება და მუნიციპალიტეტებთან თანამშრომლობის საკითხი. IDFI-ის დანარჩენი კომენტარები კი ემსახურებოდა ამოცანებისა და ინდიკატორების გამართულობის უზრუნველყოფას. 2020 წლის ოქტომბერში სააგენტომ IDFI-ს დაუბრუნა პასუხები (შენიშვნების ფურცელი) მიღებულ მოსაზრებებზე, რომლის მიხედვით, წარდგენილი ორი შინაარსობრივი კომენტარიდან არცერთი არ არის გათვალისწინებული, ხოლო ამოცანებისა და ინდიკატორების გამართულობასთან დაკავშირებით წარდგენილი კომენტარები გათვალისწინებულია. სრულად... წყარო: idfi.ge

თბილისი. საქართველოს სტრატეგიისა და საერთაშორისო ურთიერთობების კვლვის ფონდი აქვეყნებს ორგანიზაციის მკვლევრის დავით ბატაშვილის ბლოგპოსტს: რა მოიპოვა რუსეთმა ყარაბაღში.  „რუსული კონტინგენტი ყარაბაღში არის ის გასაღები, რომლითაც რუსებს შეუძლიათ ნება დართონ ან აუკრძალონ აზერბაიჯანელებსა და სომხებს ერთმანეთის დაზიანება. ცხადია, რომ რუსები ამ კრიტიკულ ბერკეტს ორივე მხარესთან ურთიერთობისას გამოიყენებენ. რუსეთის მიზანი, გააკონტროლოს მისი სამეზობლო, არსად გამქრალა და ეს სამხრეთ კავკასიასაც ეხება“. სრულად... წყარო: www.gfsis.org