თბილისი. საქართველოს სტრატეგიის და საერთაშორისო ურთიერთობების კვლევის ცენტრი აქვეყნებს პუბლიკაციას, რომელშიც განხილული მაგალითების საფუძველზე, ჩანს, თუ როგორ იყენებს რუსეთი სადაზვერვო სამსახურ „გრუსთან“ აფილირებულ ჰაკერულ დაჯგუფებებს ევროპის ქვეყნებში სასურველი პოლიტიკის გასატარებლად. სრულად... წყარო: www.gfsis.org

თბილისი. საქართველოს სტრატეგიის და საერთაშორისო ურთიერთობების კვლევის ცენტრი აქვეყნებს პუბლიკაციას, რომელშიც განხილულია პოლონეთის აღმოსავლური პოლიტიკის ისტორიულ-პოლიტიკურ-ეკონომიკური მოტივები და საქართველოს როლი მის პოლიტიკაში. „მნიშვნელოვანია რუსეთის როლიც, რომელიც მისი ქმედებებიდან გამომდინარე უმთავრეს გამოწვევას წარმოადგენს პოლონეთის ეროვნული უსაფრთხოებისთვის“. სრულად... წყარო: www.gfsis.org

თბილისი. მითების დეტექტრი აქვეყნებს მარიამ თოფჩიშვილის ბლოგპოსტს: დინოზავრი ჩინეთიდან თუ იურული პარკიდან. „16 ოქტომბერს, ფეისბუქ მომხმარებელმა ირაკლი გოთუამ, ჯგუფში „აქ სიმართლეა“, გამოაქვეყნა ვიდეო, რომლის თანმხლებ ტექსტში ის ამტკიცებს, რომ ჩინელმა მეცნიერებმა აღმოჩენილი „DNM“ მასალისგან (იგულისხმება DNA) დინოზავრის ერთ-ერთი სახეობა ხელოვნურად გაზარდეს. ირაკლი გოთუა, ასევე წერს, რომ დინოზავრი აგრესიულობით გამოირჩევა და ჩინეთმა, რომელმაც კორონავირუსი „შემოგვასია“ ახლა შესაძლოა, დინოზავრები შემოგვასიოს. ირაკლი გოთუას მიერ გამოქვეყნებული პოსტი ყალბია და მანიპულაციურად უკავშირდება კორონავირუსს. ვიდეოში არა ჩინელების მიერ გაზრდილი დინოზავრი, არამედ Jurassic World-ის გამოფენისთვის შექმნილი თოჯინაა ნაჩვენები, რომელიც ადამიანის მიერ იმართება. ამის შესახებ, ინფორმაცია ორიგინალი ვიდეოს აღწერაშიც იყო ნახსენები“, ნათქვამია მითების დეტექტორის ბლოგპოსტში. სრულად... წყარო: www.mythdetector.ge

თბილისი. სამართლიანი არჩევნებისა და დემოკრატიის საერთაშორისო საზოგადოება აქვეყნებს დოკუმენტს, სადაც მინსკის კრიზისია განხილულია რეგიონული გეოპოლიტიკური დინამიკის, ევროკავშირის საპასუხო ქმედებების, აღმოსავლეთ პარტნიორობის (EaP) ინიციატივისა და საქართველოზე ზეგავლენის ჭრილში. ამასთან, ხაზგასმულია ბელარუსში არსებული სიტუაციის მიმართ ევროკავშირის, EaP ქვეყნებისა და რუსეთის ინტერესი. დამატებით, მიმოხილულია მომავალში მოვლენების განვითარების შესაძლო სცენარები. სრულად... წყარო: isfed.ge

თბილისი. განათლების განვითარების და დასაქმების ცენტრის ინფორმაციით, „საქართველოს მოხალისე 2020“ კონკურსში, საუკეთესო მოხალისის ნომინაციაში – ლიკა ბედინაშვილმა გაიმარჯვა. „17 წლის ლიკა ჭიათურიდანაა და უკვე ორი წელია მოხალისეობრივ აქტივობებში აქტიურადაა ჩართული. მიუხედავად იმისა, რომ ის მონაწილეობდა არაერთი სოციალური ხასიათის კამპანიაში, მათ შორის ადამიანის უფლებების დაცვის, შშმ პირების საზოგადოებაში ინტეგრაციის და ჯანსაღი ცხოვრების წესის დანერგვის ხელშემწყობ აქტივობებშიც, ლიკა ყველაზე მეტად გარემოსდაცვით ღონისძიებებში მოხალისედ ჩართვით ამაყობს“, ნათქვამია ორგანიზაციის გვერდზე სოციალურ ქსელში. პროექტი ხორციელდება „კონრად ადენაუერის ფონდის“ (KAS) მიერ, „სამოქალაქო საზოგადოების ინსტიტუტთან“ (CSI), "კონსულტაციის და ტრენინგის ცენტრთან" (CTC), „საქართველოს სტრატეგიული კვლევებისა და განვითარების ცენტრთან“ (CSRDG) და „განათლების განვითარების და დასაქმების ცენტრთან“ (EDEC) თანამშრომლობით. პროექტს აფინანსებს ევროკავშირი, ხოლო თანადამფინანსებელია „კონრად ადენაუერის ფონდი“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 14 ოქტომბერს, მსოფლიოში ინტერნეტ თავისუფლების შესახებ Freedom House-ის ყოველწლიური ანგარიში გამოქვეყნდა. „2020 წელს საქართველომ 100-დან 76 ქულა აიღო და ინტერნეტ თავისუფლების მხრივ შეფასდა, როგორც „თავისუფალი“ ქვეყანა. 2019 წელთან შედარებით, ქვეყნის ქულა, საერთო ჯამში, ერთით გაუმჯობესდა“.  სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქევყნებს რელიგიის საკითხთა სახელმწიფო სააგენტოს საქმიანობის კრიტიკულ ანალიზს. „როგორც შემდგომ გაირკვა, რელიგიის სააგენტოს საქმიანობასა და ფუნქციების შესახებ არაერთგვაროვანი წარმოდგენები ჰქონდათ ამ სააგენტოს შექმნაში უშუალოდ ჩართულ ადამიანებსაც. ზოგიერთი მათგანისთვის სააგენტო ქვეყანაში რელიგიური თავისუფლების უზრუნველყოფის და სახელმწიფოსა და რელიგიურ გაერთიანებებს შორის მოქნილი, გამჭვირვალე და დემოკრატიული ურთიერთობის მექანიზმი იყო, მაგრამ საქმიანობის პროცესში გამოვლინდა, რომ სააგენტოს საქმიანობაზე კონტროლი საქართველოს სახელმწიფო უშიშროების სამსახურის ხელში აღმოჩნდა“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: არაფორმალური შრომა პოსტსოციალისტურ კონტექსტში: გარდამავალი ეტაპი თუ მუდმივობა.  „არაფორმალობა თანამედროვე საქართველოს ყოფის განუყოფელი ნაწილია. მიუხედავად იმისა, რომ არაფორმალობას ძირითადად პოსტსაბჭოთა ტრანზიციისთვის დამახასიათებელ დროებით ფენომენს უკავშირებენ, მისი სხვადასხვა პრაქტიკები მნიშვნელოვან ფუნდამენტებად რჩება დღევანდელ ეკონომიკაში, პოლიტიკურ პროცესებსა თუ საზოგადოებრივი ცხოვრების საკითხებში. ფართო გაგებით, არაფორმალური შრომა შეგვიძლია განვსაზღვროთ ეკონომიკური აქტივობების სიმრავლედ, რომლებიც სრულად ან ნაწილობრივ სახელმწიფოს ფორმალური რეგულაციების მიღმაა, როგორც საბაზრო, ისე არასაბაზრო შრომითი პრაქტიკებისა და ურთიერთობების სახით (Williams & Franic, 2016)“. სრულად... წყარო: emc.org.ge

თბილისი. რა გამოწვევების წინაშე აღმოჩნდნენ უცხო ქვეყნის მოქალაქეები კორონავირუსის გავრცელების შემდეგ ევროპასა და საქართველოში, და რამდენად ეფექტიანად უმკლავდებიან ქვეყნები პანდემიით გამოწვეულ პრობლემებს - ამის შესახებ, დღეს, სამოქალაქო საზოგადოების წარმომადგენელებმა ონლაინ შეხვედრაზე იმსჯელეს, რომელიც „უფლებები საქართველოს“ და მიგრაციის საერთაშორისო ორგანიზაციის IOM Georgia ორგანიზებით გაიმართა. სრულად... წყარო: ორგანიზაციის გვერდი სოციალურ ქსელში ჯანდაცვა

თბილისი. ინფორმაციის თავისუფლების გავითარების ინსტიტუტი (IDFI) აქტიურად იყო ჩართული ინფორმაციული უსაფრთხოების კანონპროექტის განხილვისა და ცვლილებებთან დაკავშირებული რისკების შესწავლის პროცესში. „ჯერ კიდევ გასული წლის ნოემბერში, IDFI-მ გამოაქვეყნა კანონპროექტთან დაკავშირებული მოსაზრებები. დაინტერესებულ მხარეებთან პრინციპულ საკითხებზე შეუთანხმებლობის გამო, საკანონმდებლო ცვლილებების მიღება პირველად 2020 წლის ივნისში შეფერხდა. მესამე მოსმენით განხილვის ეტაპამდე მისული კანონპროექტი მეორე მოსმენის რეჟიმს დაუბრუნდა. კანონპროექტის მნიშვნელოვნად სახეცვლილი ვერსია 2020 წლის სექტემბერში ხელმეორედ, მეორე მოსმენაზე იქნა წარდგენილი. აღსანიშნავია, რომ საქართველოს პარლამენტმა კანონპროექტი მესამე მოსმენით 15-18 სექტემბრის პლენარული სხდომების ფარგლებში განიხილა, თუმცა, კენჭსაყრელ საკითხებში ის ვერ მოხვდა. კანონის პროექტის კენჭისყრა IX მოწვევის პარლამენტის ბოლო პლენარულ სხდომაზე, 30 სექტემბერსაც იგეგმებოდა, მაგრამ ინიცირებული და განხილული ცვლილებების პროექტი, ამ მოწვევის პარლამენტმა, კენჭისყრაზე ბოლო პლენარული სხდომის ფარგლებშიც არ დააყენა“.  ორგანიზაცია მიიჩნევს, რომ ინფორმაციული უსაფრთხოების კანონპროექტთან დაკავშირებული პრობლემური საკითხების გათვალისწინებით, აუცილებელია მე-10 მოწვევის პარლამენტმა განიხილოს ცვლილებების ახალი ვერსიის შემუშავების შესაძლებლობა. სრულად... წყარო: idfi.ge

თბილისი. კონსულტაციის და ტრენინგის ცენტრი აქვეყნებს თამარ მესხის ნაშრომს: „11 ქართული ისტორია ჩერნობილიდან“, რომელიც ჩერნობილის შედეგების ქართველ ლიკვიდატორებს ეხება. „კრებულში გაერთიანებულია ჩერნობილის კატასტროფის ადგილზე მომუშავე ქართველების ისტორიები. წაიკითხეთ თუ როგორ ცხოვრობდნენ ქართველი „ლიკვიდატორები“ რადიაციულ ზონაში, რა ცხოვრების წესები ჰქონდათ მათ, როგორია მოგონებები კატასტროფის ადგილზე და როგორ ცხოვრობენ ისინი დღეს“. იხილეთ კრებული სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ლაბორატორიის სტუდენტის, მარიამ ნებიერიძის მასალიდან გაიგებთ თუ ვინ ავრცელებს კონსპირაციას, თითქოს 1980 წელს შექმნილი პროგრამა საქართველოს 2020 წლის პანდემიისთვის ამზადებდა. „7 ოქტომბერს ყალბმა ანგარიშმა ლაშა მოდებაძემ საჯარო ჯგუფში „კორონამაფია და საქართველო როგორც საექსპერიმენტო ქვეყანა“ გააზიარა პოსტი, რომელიც სამხრეთ კავკასიის საველე ეპიდემიოლოგიისა და ლაბორატორიული სწავლების რეგიონული პროგრამის შესახებ ამერიკის საელჩოს მიერ გავრცელებულ ინფორმაციას შეეხებოდა. პოსტის თანახმად, აღნიშნული პროგრამა, წინასწარ ამზადებდა საქართველოს პანდემიისათვის. აშშ-ის დაავადებათა კონტროლის ცენტრების (CDC) მიერ ორგანიზებული საველე ეპიდემიოლოგიისა და ლაბორატორიული სწავლების პროგრამა (FELTP) 1980 წლიდან მოქმედებს და მასში 80-ზე მეტი სახელმწიფოა ჩართული. განცხადება, რომ 1980 წელს შექმნილი პროგრამა საქართველოს 2020 წლის პანდემიისთვის ამზადებდა, შეთქმულების თეორიაა“, ნათქვამია ბლოგპოსტში. სრულად... წყარო: www.mythdetector.ge

თბილისი. ადამიანის უფლებების სწავლებისა და მონიტორინგის ცენტრი გთავაზობთ ნაწყვეტს გამოცემიდან - „რელიგია, პოლიტიკა და სოციალური კონტექსტები - კვლევების, ანგარიშებისა და სტატიების კრებული“. „ანგარიშის ამ თავის მიზანია შეაჯამოს რელიგიის თავისუფლების დაცვის კუთხით არსებული მდგომარეობა 2017-2019 წლებში, როგორი იყო სახელმწიფოს პოლიტიკა და პრაქტიკა რელიგიური ნიშნით თანასწორობის და რელიგიის თავისუფლების დაცვის, ასევე, სეკულარული სახელმწიფოს პრინციპის შენარჩუნების თვალსაზრისით“. სრულად... წყარო: emc.org.ge

თბილისი. ინფორმაციის თავისუფლების განვითრების ინსტიტუტის (IDFI) მეხსიერების და დეზინფორმაციის კვლევების მიმართულების ხელმძღვანელმა ანტონ ვაჭარაძემ და ანალიტიკოსმა, მეგი ქარცივაძემ ორნალინ ლექციის ფარგლებში ისაუბრეს თემაზე - რუსული პროპაგანდა: იმპერიიდან თანამედროვეობამდე. ონლაინ ლექციების ვიდეო ჩანაწერები იხილეთ ბმულზე: ლექციების შესახებ მეტი გაიგეთ აქ... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის (CSRDG) ორგანიზებით, ჩატარდა ონლაინ სემინარი თემაზე: როგორ დავგეგმოთ და განვახორციელოთ წარმატებული სათემო პროექტები. „სემინარის ფარგლებში CSRDG თემის განვითრების პროგრამის კოორდინატორმა, ნინო ვასაძემ მონაწილეებს გაუზიარა ორგანიზაციის მიდგომები თემის განვითარებისა და სათემო ინიციატივების მხარდაჭერის მიმართულებით. სათემო ორგანიზაციების წარმომადგენლებმა ლუსინე დოსტიბეგიანმა (თეთრიწყაროს ახალგაზრდული ცენტრი) და გვანცა კიკალეიშვილმა (განათლების და განვითარების ცენტრი თოლისკური) ისაუბრეს თემთან მუშაობის სპეციფიკაზე, განხორციელებულ პროექტებზე, არსებულ გამოწვევებსა და მიღწეულ შედეგებზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს საზოგადოებრივი ორგანიზაციები, 7 ოქტომბერს, საქართველოს გენერალური პროკურატურის მიერ დელიმიტაციისა და დემარკაციის სამთავრობო კომისიის ყოფილი წევრების ივერი მელაშვილი და ნატალია ილიჩოვას დაკავების ფაქტს ეხმაურებიან. „მიგვაჩნია, რომ გამოძიების დაწყების დრო, წინასაარჩევნო კონტექსტი, გამოძიების პროცესში შერჩევითი მიდგომის ნიშნები და მმართველი პარტიის ლიდერების უდანაშაულობის პრეზუმფციის დარღვევით გაკეთებული პოპულისტური განცხადებები აჩენს ეჭვს, რომ გამოძიება პოლიტიკურ მოტივაციებს ემსახურება და მიმართულია საქართველოს მოქალაქეებისთვის მცდარი წარმოდგენების შექმნისა და პოლიტიკური ოპონენტების დისკრედიტაციისაკენ“. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მარიამ შალვაშვილის სტატიას: მაღალმთიანი აჭარის მუსლიმი ქალები. „ამ ორნაწილიანი სტატიის მიზანია, ერთის მხრივ, აჩვენოს, რომ აჭარაში ისლამი ყოველდღიურობის განუყოფელი ნაწილია და ანახოს მისი მნიშვნელოვნება. მეორეს მხრივ კი არ დაუშვას ცხოვრების ყველა ასპექტის რელიგიამდე დაყვანა და რელიგიით ახსნა, ამიტომ დასავლეთში გავრცელებული დომინანტური დისკურსის გამოწვევა სტატიების ძირითად ხაზს წარმოადგენს. ეს სტატიები არის მცდელობა, ოდნავ მეტი ცოდნა შეიქმნას აჭარის რეგიონსა და მუსლიმ აჭარლებზე - აღიწეროს ის პირობები, რომლებშიც მაღალმთიან აჭარაში მაცხოვრებელი ქალები ცხოვრობენ: უთანასწორო ეკონომიკური მდგომარეობა, შრომის მძიმე პირობები, ჯანდაცვასა და განათლებაზე ხელმიუწვდომლობა და გეოგრაფიული და კულტურული პერიფერიისთვის დამახასიათებელი გარიყულობა და ასევე აჩვენოს, თუ როგორ გამოიხატება მუსლიმი ქალების აგენტობა (agency)“. სრულად... წყარო: emc.org.ge

აჭარა. საერთაშორისო გამჭვირვალობა - საქართველოს სამოქალაქო საბჭოს ინიციატივით, გონიოში საზოგადოებრივი ტრანსპორტის მოსაცდელებთან ასფალტი დაიგო, მოწესრიგდა საბავშვო მოედნები, ნაწილობრივ მოწესრიგდა გარეგანათების სისტემა სანაპიროზე. მოქალაქეთა დახმარებით მათივე პრობლემების მოგვარება - „საერთაშორისო გამჭვირვალობა - საქართველოს” მიერ შექმნილი სამოქალაქო საბჭოების მისია ასეთია. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ინფორმაციით, 3 ოქტომბერს ერთ-ერთმა სომხურენოვანმა ფეისბუქ გვერდმა გამოაქვეყნა ვიდეო, რომელშიც საუბარია, თითქოს ბორჯომის რკინიგზის სადგურიდან ხდება აზერბაიჯანისთვის სამხედრო ტექნიკის მიწოდება. ვიდეოში ჩანს მანქანიდან გადაღებული კადრები, რომლებზეც ასახულია შენობები, რკინიგზა, სატვირთო მანქანები და რამდენიმე ტანკი.  „გავრცელებული ვიდეო არ წარმოადგენს იმის მტკიცებულებას, რომ საქართველოს ტერიტორიიდან აზერბაიჯანში სამხედრო ტექნიკის გადატანა მიმდინარეობს. ასევე რთულია იმის იდენტიფიცირება, თუ სად და როდის არის გადაღებული ვიდეო. გავრცელებულ ცნობებს საგარეო საქმეთა სამინისტრო და საქართველოში სომხეთის საელჩოც უარყოფენ“. სრულად...  წყარო: www.mythdetector.ge

თბილისი. ამერიკის შეერთებული შტატების საერთაშორისო განვითარების სააგენტო (USAID) იწყებს ახალ პროგრამას საქართველოში ინფორმაციის უსაფრთხოებისა და სანდოობის ხელშეწყობისთვის.  „USAID-ის ინფორმაციის უსაფრთხოებისა და სანდოობის ახალი პროგრამის ინიციატივით, მომდევნო ხუთი წლის განმავლობაში USAID იმუშავებს საქართველოს ხელისუფლებასთან და ფართო საზოგადოებასთან ქვეყანაში საინფორმაციო სივრცის დასაცავად“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: დეზინფორმაცია ყარაბაღის კონფლიქტთან დაკავშირებით საქართველოს პოზიციის შესახებ სომხურ და აზერბაიჯანულ მედიაში. მიუხედავად იმისა, რომ საქართველო სომხეთ-აზერბაიჯანს შორის მთიან ყარაბაღში მიმდინარე სამხედრო კონფლიქტთან დაკავშირებით ნეიტრალიტეტს ინარჩუნებს, სომხურ და აზერბაიჯანულ მედიაში აქტიურად ვრცელდება დეზინფორმაციები საქართველოს პოზიციასთან დაკავშირებით. გავრცელებულ დეზინფორმაციებს შორისაა საქართველოს მიერ აზერბაიჯანისთვის თურქეთიდან გამოგზავნილი სამხედრო აღჭურვილობისთვის გზის გახსნა. პერიოდულად ჩნდება ქართული და რუსულენოვანი პოსტები, რომლებიც საქართველოს ზემოთხსენებულ ქმედებაში ადანაშაულებს. მსგავსი დეზინფორმაციების გავრცელების შემდეგ, ჯავახეთში რამდენჯერმე დაიძაბა სიტუაცია. „30 სექტემბერს კი სომეხმა პოლიტიკოსმა, „მთიანი ყარაბაღის რესპუბლიკური პარტიის“ ხელმძღვანელმა, კარენ ოჰანჯანიანმა საკუთარ Facebook გვერდზე გაავრცელა იმავე შინაარსის დეზინფორმაცია, რომ თითქოს საქართველო თურქეთიდან აზერბაიჯანის მიმართულებით სამხედრო ტვირთს ატარებს და განაცხადა, რომ ჯავახეთმა საქართველოსგან დამოუკიდებლობა უნდა გამოაცხადოს. ოჰანჯანიანის განცხადება ნათელი მაგალითია იმის, თუ რა მასშტაბებს აღწევს საქართველოსთან დაკავშირებული დეზინფორმაცია სომხურ საინფორმაციო სივრცეში“. ორგანიზაცია საინფორმაცია ომის პირობებში, ხელისუფლებას მოუწოდებს, გააძლიეროს კომუნიკაცია ადგილობრივ მოსახლეობასთან, საერთაშორისო პარტნიორებთან, უზრუნველჰყოს მათი ინფორმირება რეგიონში მიმდინარე მოვლენებთან დაკავშირებით, გააჟღეროს საქართველოს ოფიციალური პოზიცია ნეიტრალიტეტზე და ქვეყნის მიერ გადადგმულ ნაბიჯებზე. სრულად... წყარო: idfi.ge

თბილისი. „ქალთა ფონდი საქართველოში“ იწყებს კატო მიქელაძის პრემიის რიგით მერვე დაჯილდოებისთვის მზადებას. „ნებისმიერ პირს შეუძლია ელექტრონული ფორმით დაასახელოს საკუთარი კანდიდატი, ხოლო პრემიის მფლობელს საგანგებოდ შექმნილი ჟიური გამოავლენს. 2013 წელს ქალთა ფონდის მიერ „კატო მიქელაძის სახელობის პრემიის“ დაწესების შემდეგ, ყოველი წლის 29 ნოემბერს, ქალთა უფლებების დამცველთა საერთაშორისო დღეს, ფონდი ჯილდოს გადასცემს ქალთა უფლებების დამცველ ერთ აქტივისტს საქართველოში. ამ ფორმით ფართო საზოგადოება იგებს იმ ქალი აქტივისტების შესახებ, რომლებიც იბრძვიან ქალებისათვის თანასწორი, თავისუფალი და უსაფრთხო გარემოს შექმნისთვის“, ნათქვამია ორგანიზაციის ვებგვერდზე. სრულად... წყარო: ginsc.net