აჭარა. 29 ნოემბერს, ბათუმის მერიის წინ, მაწანწალა ძაღლების ხოცვის ფაქტები საქართველოს ცხოველთა დაცვის ასოციაციის წევრებმა  გააპროტესტეს. მათ მერიის შესაბამის სამსახურებს მოუწოდეს, შეწყდეს ცხოველთა განადგურება და გამოიყენონ ცხოველთა დაცვის საერთაშორისო ორგანიზაციების მიერ აღიარებული მეთოდები.   მერიის კეთილმოწყობის სამსახურის წარმომადგენლები ამბობენ, რომ მაწანწალა ძაღლების განადგურების პროგრამა გასულ წელს შეწყდა. წელს დაგეგმილია ტენდერის გამოცხადება იმ კომპანიის გამოსავლენად, რომელიც დაავადებული ძაღლების ევთანაზიას თანამედროვე, მსოფლიოში აპრობირებული მეთოდით განახორციელებს.

აჭარა. 4 ოქტომბერს, ბათუმის ახალგაზრდულ ცენტრში ცხოველთა დაცვის საერთაშორისო დღე აღინიშნა. მოწვეულმა სტუმარმა, ცხოველთა უფლებების დამღცველი ორგანიზაციის „მეგობრის ხმის" ხელმძღვანელმა გიორგი კალანდაძემ ცენტრის წევრებისთვის პრეზენტაცია გამართა. პრეზენტაციაში წარმოდგენილი იყო თუ როგორ იცავენ ცხოველთა უფლებებს სხვადასხვა ქვეყნებში და რა მდგომარეობაა ამ მხრივ ჩვენს ქვეყანაში. რატომ უნდა გვიყვარდეს და დავიცვათ ცხოველები? რა ფაქტებს ჰქონდა აქამდე ადგილი მათი უფლებების დარღვევის მხრივ? რა პირობებში უნდა იმყოფებოდნენ ისინი? ამ და სხვა კითხვებზე ახალგაზრდებმა ამომწურავი პასუხი მიიღეს. ღონისძიება მიზნად ისახავდა ცხოველთა უფლებებზე ცნობიერების და თვითშეგნების ამაღლებას. აქტივობა განხორციელდა პროექტის ფარგლებში „ეროვნული ინტეგრაციის გაძლიერება საქართველოში" (ANI) რომელსაც ახორციელებს საქართველოს გაეროს ასოციაცია(UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

ქვემო ქართლი. 4 ოქტომბერს, სიქამ ცხოველთა დაცვის საერთაშორისო დღე აქციით აღნიშნა. რუსთავის სკოლების სამოქალაქო კლუბების აქტიური ჩართულობით მოეწყო აქცია, რომელსაც შეუერთდა ცხოვლთა დაცვის რუსთავის ორგანიზაცია. მოსწავლეებმა ცხოვლთა დაცვის ორგანიზაციის დამფუძნებელთან და წევრებთან ერთად განიხილეს ცხოველთა უფლებები და იმსჯელეს ადამიანის ვალდებულებებზე. აქციაში ასევე მონაწილეობას იღებდნენ ამერიკელი მშვიდობის კორპუსის მოხალისეები. აქციის ფარგლებში სამოქალაქო კლუბის წევრებმა ცხოველთა დაცვის თემაზე მოამზადეს პოსტერები და მოეწყო გამოფენა - კონკურსი. დამთვალიერებელს საშუალება ჰქონდა ფარულ კენჭისყრაში მიეღო მონაწილეობა და ხმა მიეცა მისთვის სასურველი პოსტერისთვის. მნახველთა რჩეული პოსტერის ავტორი სერთიფიკატითა და სამახსოვრო პრიზით დაჯილდოვდა. წყარო:ორგანიზაციის გვერდი სოციალურ ქსელში

თბილისი. „ახალგაზრდა მწვანებმა" 4 ოქტომბერს, ცხოველთა დაცვის საერთაშორისო დღეს უერთდებიან. „შეშფოთებას გამოვთქვავთ, რადგან საქართველო არ არის მიერთებული ცხოველთა უფლებების უზრუნველმყოფ საერთაშორისო კონვენციებსა და სხვა აქტებს. ქვეყანაში ცხოველების უფლებებს მხოლოდ საქართველოს სისხლის სამართლის კოდექსის 259-ე მუხლი იცვას, თუმცა ფაქტი ამ მუხლის გამოყენებისა არ დაფიქსირებულა. ქვეყანაში არაერთგზის ხორციელდებოდა უპატრონო ცხოველების უმოწყალო ხოცვა-ჟლეტვა. ჩვენს შეშფოთებას იწვევს როგორც მოსახლეობის დიდი ნაწილის, ისევე სახელისუფლებო ორგანოების მუშაკთა დაბალი ცნობიერების დონე ცხოველთა დაცვის საკითხებში. არ არსებობს სწორი და კომპეტენტური მიდგომა ცხოველთა პოპულაციების მართვასთან დაკავშირებით", ნათქვამია ორგანიზაციის ვებგვერდზეს სოციალურ ქსელში. წყარო:ორგანიზაციის გვერდი სოციალურ ქსელში

სამეგრელო. საერთაშორისო გამჭვირვალობა-საქართველომ ბლოგპოსტი - „ზუგდიდში უპატრონო ძაღლებს ცეცხლსასროლი იარაღით ხოცავენ" - გამოაქვეყნა. ორგანიზაციის თქმით, ზუგდიდის ოფისს მოსახლეობამ ტელეფონით გადაღებული ფოტოები მიაწოდა, თუ როგორ ხოცავენ „ზუგდიდდასუფთავების" თანამშრომლები უპატრონო ძაღლებს, რაც სისხლის სამართლის კოდექსის მიხედვით ისჯება ჯარიმით, ან გამასწორებელი სამუშაოთი.  „იმის გათვალისწინებით, რომ უპატრონო ძაღლების პრობლემა არა მარტო ზუგდიდში, არამედ სხვა მუნიციპალიტეტებში დგას, „საერთაშორისო გამჭვირვალობა - საქართველო" რეკომენდაციით მიმართავს გარემოს დაცვისა და ბუნებრივი რესურსების სამინისტროს, შეიმუშავოს ერთიანი მიდგომა ამ პრობლემის მოსაგვარებლად. ძაღლების ქუჩაში დახოცვა, ვფიქრობთ, ყველაზე არაჰუმანური მიდგომაა. ამასთან, „საერთაშორისო გამჭვირვალობა - საქართველო" მიმართავს ადგილობრივ მუნიციპალიტეტებს, შინაური ცხოველების დასახოცად არ გამოიყენონ ცეცხლსასროლი იარაღი", ნათქვამია ორგანიზაციის ვებგვერდზე. სრულად წყარო: transparency.ge