25 ივლისს, 14:00 საათზე საქართველოს კონსტიტუციაში ცვლილების შეტანის შესახებ საქართველოს კონსტიტუციური კანონის საერთო სახალხო განხილვა ოზურგეთში. მისამართი: ოზურგეთი, დემოკრატიული ჩართულობის ცენტრი

თბილისი. საერთაშორისო გამჭვირვალობა საქართველოს ინფორმაციით ადამიანის უფლებებში ევროკავშირის სპეციალური წარმომადგენლის თომას ჰამარბერგის წინასწარი რეკომენდაციები უკანონოდ მოპოვებულ მასალებთან დაკავშირებით უკვე ხელმისაწვდომია. ორგანიზაცია უახლოს დღეებში შესთავაზებს საზოგადოებას დოკუმენტის ქართულენოვან თარგმანს. მანამდე ორგანიზაცია ჰამარბერგის რეკომენდაციებს ინგლისურ ენაზე აქვეყნებს. წინასწარი რეკომენდაციები წყარო: ორგანიზაციის გვერდი სოციალურ ქსელში

თბილისი. ზიანის შემცირების ქსელი ჰეპატიტის მსოფლიო დღესთან დაკავშირებით  რამდენიმე დღიან ღონისძიებებს მართავს. კამპანიის ორგანიზატორები მიესალმებიან საქართველოს მთავრობის მიერ გადადგმულ ნაბიჯებს და მოუწოდებენ მას, გააგრძელოს და კიდევ უფრო დახვეწოს ხელმისაწვდომობის პოლიტიკა C ჰეპატიტის ძვირადღირებულ მკურნალობაზე.  ორგანიზატორები  ასევე, აქტიურად მოუწოდებენ ფარმაცევტულ კომპანიებს, რომ შეამცირონ ფასები სამკურნალო პრეპარატებზე. ამ საკითხზე 24 ივლისს გაიმართა ფარმაკომპანიების ოფისებთან მედიკამენტების გაიაფების მოთხოვნით აქცია გაიმართა. საერთაშორისო დღისადმი მიძღვნილი კამპანიის ფარგლებში სხვადასხვა სახის ღონისძიებებია დაგეგმილი:  26 ივლისს, პარასკევს, 11:00 საათზე, თბილისში გაიმართება პრესკონფერენცია და მრგვალი მაგიდა ქორთიარდ მარიოტში (თავისუფლების მოედ.1).  25 ივლისს, ხუთშაბათს, 12 საათზე გორში გაიმართება იმავე სახის ღონისძიება, ხოლო 26 ივლისს, პარასკევს 12:00 ზუგდიდსა და ბათუმში. 28 ივლისს, კვირას, ბათუმში 20:00 საათზე კამპანია დასრულდება კონცერტით, რომელიც გაიმართება ანბანის კოშკთან.  სრულად წყარო: www.osgf.ge

აჭარა. 23 ივლისს, ბათუმის დემოკრატიული ჩართულობის ცენტრში, სამოქალაქო მრჩეველთა საბჭოს და თვითმმართველი ქალაქი ბათუმის მერიის ერთობლივი ორგანიზებით გამართა ბათუმის 2014–2017 წლების პრიორიტეტბის რიგით III განხილვა. შეხვედრაზე საუბარი  ქალაქის ინფრასტრუქტურის განვითარებას, რეაბილიტაციას და ექსპლოატაციას ეხებოდა. შეხვედრას ესწრებოდნენ საზოგადოებრივი ორგანიზაციების, მერიის წარმომადგენლები, ასევე დაინტერესებული პირები. შეხვედრა კითხვა–პასუხის რეჟიმში წარიმართა. 

სამცხე–ჯავახეთი. დემოკრატ მესხთა კავშირის ოფისში პროექტ – „ეროვნული ინტეგრაციის გაძლიერება საქართველოში" ფარგლებში გაიმართა სადისკუსიო შეხვედრა თემაზე: „არასრულწლოვანთა დანაშაული, მედიაციის და განრიდების პროგრამა". პროექტი ხორციელდება საქართველოს გაეროს ასოციაციის მიერ, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

აჭარა. 24 ივლისს, ასოციაცია „ღირსეული სიბერის" ოფისში, პროექტ „ხანდაზმულთა სოციალური ცენტრის" ფარგლებში გამართულ მორიგ შეხვედრაზე ხანდაზმულთა დისკრიმინაციის ფაქტების შესახებ იმსჯელეს. „სამწუხაროდ ხანდაზმულთა მიმართ ოჯახის წევრების მიერ თაღლითობის და ძალადობის ფაქტები გახშირდა. ხანდაზმული ადამიანები, რომლებიც განიცდიან ძალადობას, არიან ოჯახის წევრების მიერ დისკრიმინაციის მსხვერპლნი, ერიდებიან ამ თემაზე საუბარს, სირცხვილის და დამცირების გრძნობის გამო და რაც მთავარია შიშის გამო, რომ თავისი მდგომარეობის აღიარებით ისინი კიდევ უფრო გაირთულებენ თავის ისედაც გაუსაძლის მდგომარეობას. ოჯახური ძალადობის სტერეოტიპების დარღვევა კი ისაა, რომ ყველამ: მსხვერპლმაც და საზოგადოების წევრმაც თქვას ის, რასაც გრძნობს და აწუხებს; არ დამალოს ძალადობის ფაქტი და არ ილაპარაკოს მხოლოდ ის, რაც სოციალურად მისაღები და სტერეოტიპებით გამყარებულია", ნათქვამია ორგანიზაციის გვერდზე სოციალურ ქსელში. წყარო:ორგანიზაციის გვერდი სოციალურ ქსელში

თბილისი.საერთაშორისო გამჭვირვალობა – საქართველო მოუწოდებს აჭარის ავტონომიური რესპუბლიკის უმაღლეს საბჭოს „თავის შეიკავოს წინასაარჩევნო პერიოდში ბიუჯეტში ცვლილებების განხორციელებისაგან". როგორც ორგანიზაციის გვერდზეა აღნიშნული მათთვის ცნობილი გახდა, რომ აჭარის ავტონომიური რესპუბლიკის უმაღლესი საბჭო აჭარის ბიუჯეტში ცვლილებების შეტანას გეგმავს, რომელთა შორისაა ჯანდაცვის პროექტებისა და ადგილობრივი თვითმმართველობისთვის დაფინანსების ზრდა. „აღვნიშნავთ, რომ „საერთაშორისო გამჭვირვალობა – საქართველო" არ ეწინააღმდეგება ბიუჯეტის ერთ-ერთ ცვლილებას, რომელიც აჭარის ტელე-რადიო დეპარტამენტის დაფინანსებას ეხება, ვინაიდან ეს უკანასკნელი გამოწვეულია გამოუვალი მდგომარეობით და მისი გადადება დეპარტამენტის არსებობას საფრთხეს შეუქმნის. გარდა ამისა, ეს ინიციატივა თავისი არსით, ადმინისტრაციული რესურსის საარჩევნო მიზნებით გამოყენებასთან არ ასოცირდება. იმ შემთხვევაში, თუ უმაღლესი საბჭო მაინც განახორციელებს საბიუჯეტო ცვლილებებს, „საერთაშორისო გამჭვირვალობა – საქართველო"  ხარჯების შესაჩერებლად მიმართავს სასამართლოს", ნათქვამია ორგანიზაციის ვებგვერდზე. სრულად წყარო: transparency.ge

თბილისი.საქართველოს პარლამენტის ეროვნული ბიბლიოთეკის მესამე კორპუსის საკონფერენციო დარბაზში, საქართველოს ახალგაზრდული პარლამენტის სპორტისა და ახალგაზრდულ საქმეთა კომიტეტის მიერ ორგანიზებული დიკუსია გაიმართა. დისკუსიის თემა იყო: „ახალგაზრდა პატიმრები - არსებული მდგომარეობა და პერსპექტივები". შეხვედრას დაესწრნენ სახალხო დამცველის აპარატის წარმომადგენელი, არასრულწლოვანთა სპეციალური დაწესებულების დირექტორი, არასამთავრობო სექტორის წარმომადგენლები და ახალგაზრდა პარლამენტარები. წყარო:ორგანიზაციის გვერდი სოციალურ ქსელში

თბილისი.ინფორმაციის თავისუფლების განვითარების ინსტიტუტმა ცაგერის, ჩხოროწყუს მუნიციპალიტეტების გამგეობებიდან და ქუთაისის მერიიდან მიღებული ინფორმაცია გამოაქვეყნა. ვებგვერდზე განთავსდა დოკუმენტები გამგეობების ბალანსის, პრემიების, სახელმწიფო შესყიდვების, განთავისუფლებული თანამშრომლების შესახებ. ინფორმაცია ცაგერის მუნიციპალიტეტის გამგეობიდან ინფორმაცია ჩხოროწყუს მუნიციპალიტეტის გამგეობიდან ინფორმაცია ქუთაისის მერიიდან წყარო: opendata.ge

გაერო წევრ ქვეყნებს მოუწოდებს დაიცვან 1738-ე რეზოლუცია, რომლის ფარგლებში ქვეყნებს ჟურნალისტთა დაცვა მოეთხოვებათ და უზრუნველყონ  ჟურნალისტთა უსაფრთხოება. გაეროს ამ ნაბიჯს მხარს უჭერს უფლებადამცველი ორგანიზაცია „რეპორტიორები საზღვრებს გარეშე". სრულად წყარო: media.ge

თბილისი. საერთაშორისო გამჭვირვალობა – საქართველომ იპოთეკების აღსრულების საყოველთაო შეჩერების შესახებ ბლოგპოსტი გამოაქვეყნა. „მოვუწოდებთ, საქართველოს პარლამენტს, არ დაუშვას კანონპროექტის მიღება, მომავალში კი სიფრთხილით მოეკიდოს ნებისმიერ ინიციატივას, რამაც შეიძლება ნეგატიური გავლენა იქონიოს ქვეყნის საფინანსო სისტემის სტაბილურობაზე. ამასთანავე, ვაცნობიერებთ, რომ ეს სფერო რეფორმირებას საჭიროებს და მივესალმებით, თუკი ამ კუთხით ხელისუფლება შესაბამის ინიციატივებს წარმოადგენს. თუმცა, ეს ცვლილებები უნდა იყოს ეტაპობრივი და მაქსიმალურად უმტკივნეულო ქვეყნის ფინანსური სისტემისთვის. გარდა ამისა, აუცილებელია, ამ სფეროს რეფორმირების პროცესში ფინანსური ინსტიტუტები აქტიურად იყვნენ ჩართული. ამასთანავე, დასაფიქრებელია, ხომ არ არის ეს ინიციატივა საარჩევნოდ მოტივირებული და ხომ არ ხდება ადმინისტრაციული რესურსების საარჩევნო მიზნებით გამოყენება. ასეთი გაუმართლებელი ინიციატივები, რომლებიც რეალურად პრობლემის გადაწყვეტისკენ კი არა, მხოლოდ ამომრჩევლის ნების ფორმირებისკენ არის მიმართული, წინასაარჩევნოდ ადმინისტრაციული რესურსის არამიზნობრივ გამოყენებას ჰგავს", ნათქვამია ორგანიზაციის ვებ–გვერდზე. სრულად წყარო: transparency.ge

თბილისი. არასამთავრობო ორგანიზაციამ „ერთობა მიზნისთვის", 23 ივლისს დღის ცენტრ „ანიკაში" შეზღუდული შესაძლებლობების მქონე ბავშვებისთვის აქცია მოაწყო. სხვადასხვა გასართობი თამაშები დღის ცენტრის აღსაზრდელებმა  ანრი ჯოხაძესა და ვერიკო ტურაშვილთან ერთად ითამაშეს. აქცია განხორციელდა პროექტის – „თანაბარი პირობების დამკვიდრება იწყება ბავშვობიდან" – პროექტის ფარგლებში.

შიდა ქართლი.2013 წლის მოწვევის „საქართველოს ახალგაზრდული პარლამენტის" მორიგი რეგიონული ვიზიტი 23 ივლისს შიდა ქართლის რეგიონში შედგა. პარლამენტის რეინტეგრაციის საინიციატივო ჯგუფის წევრები გორის მუნიციპალიტეტის კულტურისა და სპორტის სამსახურის წარმომადგენლებსა და სოფელ ნიქოზის რწმუნებულს შეხვდნენ. მხარეები თანამშრომლობაზე შეთანხმდნენ და მხარდაჭერა გამოთქვეს, ერთობლივი კულტურული, საგანმანათლებლო თუ სპორტული პროექტების განხორცილებაში. პროექტები ხელს შეუწყობენ კონფლიქტურ რეგიონებში მცხოვრები ახალგაზრდების სამოქალაქო თვითშეგნების ამაღლებასა და საზოგადოებაში მათ ინტეგრაციას. „საქართველოს ახალგაზრდული პარლამენტი" სურვილს გამოთქვამს, პროექტების უფრო წარმატებული განხორციელებისთვის კონფლიქტურ რეგიონებში საინიციატივო ჯგუფები შეიქმნას, რათა პროექტებს არ ჰქონდეს დროებითი ხასიათი და არ იყოს ერთჯერადი. წყარო:ორგანიზაციის გვერდი სოციალურ ქსელში

აშშ–ის საერთაშორისო განვითარების სააგენტომ (USAID) ცენტრალურ და აღმოსავლეთ ევროპისა და ევრაზიის რეგიონში მომუშავე საზოგადოებრივი ორგანიზაციების მდგრადობის ინდექსი გამოაქვეყნა. 10 ივლისს გამოქვეყნებული მეთექვსმეტე გამოცემა მოიცავს 2012 წელს განვითარებულ მოვლენებს. აშშ–ის საერთაშორისო განვითარების სააგენტომ მდგრადობის პირველი ინდექსი 1997 წელს გამოაქვეყნა, რომელიც მოიცავდა ცენტრალური და აღმოსავლეთ ევროპისა და ევრაზიის 18 ქვეყანას. ინდექსის არეალი 16 წლის განმავლობაში მნიშვნელოვნად გაფართოვდა და  29 ქვეყანას მოიცავს. სამოქალაქო საზოგადოებრივი ორგანიზაციების მდგრადი განვითარების ინდექსი 2012, საქართველო, აშშ–ის საერთაშორისო განვითარების სააგენტო (ინგლისური) საზოგადოებრივი ორგანიზაციებისმდგრადი განვითარების ინდექსი 2012, ცენტრალური და აღმოსავლეთ ევროპისა და ევრაზიის რეგიონი, აშშ–ის საერთაშორისო განვითარების სააგენტო  (ინგლისური) წყარო: usaid.gov

თბილისი. ინფორმაციის თავისუფლების განვითარების ინსტიტუტმა კონსტიტუციური უსაფრთხოების დეპარტამენტის აუდიტის ანგარიში გამოაქვეყნა. ანგარიშში წარმოდგენილია 2011 წლის 1 იანვრიდან 2012 წლის 30 ნოემბრამდე დეპარტამენტის საქმიანობასთან დაკავშირებული ფინანსური ნაკლოვანებები. სრულად წყარო: opendatablog.wordpress.com

აჭარა.ორგანიზაცია არტ ვეი იწყებს ახალი პროექტისთვის – „ღია საზაფხულო თეატრი" არაპროფესიონალ მსახიობთა შერჩევას.  ნებისმიერ მსურველს შეუძლია მივიდეს 25 ივლისს, ბათუმის ხელოვნების უნივერსიტეტში 11:00 საათზე.   სრულად წყარო:ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ 22 ივლისს, პროკურატურაში ჩატარებულ პრესკონფერენციასთან დაკავშირებით განცხადება გაავრცელა. „22 ივლისს პროკურატურაში ჩატარებულ პრესკონფერენციაზე გავრცელდა ინფორმაცია, რომ გამოძიებით არ დადასტურდა ჩვენების მიღების მიზნით მამუკა ივანიაძეზე განხორციელებული ზეწოლის ფაქტი ...სამწუხარო ფაქტია, რომ პროკურატურის თანამშრომელთა ქმედებები ამ საქმეში საქართველოს კანონმდებლობით დადგენილ ჩარჩოებს გასცდა და ძიება მიმდინარეობს იმ მეთოდებით, რომლებიც, შესაძლებელია, თავად შეიცავდნენ დანაშაულის ნიშნებს. ჩვენთვის გასაგებია ის გარემოება, რომ პროკურატურაში კვლავ არიან ის პირები, რომელთა ქმედებების კანონიერებასთან დაკავშირებით წინა წლებშიც არსებობდა კითხვები. თუმცა, ცხადია, რომ  ეს გარემოება ვერ გახდება მსგავსი ქმედებების გამართლების საშუალება. მაგალითად, ის პროკურორი, რომელიც 2013 წლის 22 ივლისს პროკურატურაში გამართულ პრესკონფერენციაზე დამაჯერებლად უხსნიდა საზოგადოებას, რომ ივანიაძეზე არანაირი ზეწოლა არ განხორციელებულა", ნათქვამია განცხადებაში. სრულად წყარო: gyla.ge

თბილისი. აისეკ საქართველო სთავაზობს სტუდენტებს გახდნენ აისეკის წარმომადგენლები საკუთარ ქალაქებში: გორში, ზუგდიდში, ახალგაციხესა და თელავში. ორგანიზაციის წარმომადგენლები 50%–იან ფასდაკლებას მიიღებენ აისეკის გაცვლით პროგრამებზე. საკონტაქტო ინფორმაცია  ელ–ფოსტა: ambassadors@aiesec.ge აქციის შესახებ ინფორმაცია წყარო:ორგანიზაციის გვერდი სოციალურ ქსელში

24 ივლისს 18:15 საათზე კავკასიის კვლევითი რესურსების ცენტრი, ამერიკული საბჭოები და სახრეთ კავკასიის ამერიკული კვლევითი ინსტიტუტი მართავენ სესიას თემაზე – „მსხვრევადი ისტორია: განათლების რეფორმები და მეხსიერების პოლიტიკა საქართველოს კულტურაში". მომხსენებელი ჯეინ კიტაევიჩი, ჰარვარდის უნივერსიტეტი. მისამართი: თბილისი, ზანდუკელის 16, ეკონომიკის საერთაშორისო სკოლა

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმა მიმართვას ავრცელებს. პლატფორმის წევრი ორგანიზაციები მიმართავენ ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, ევროკომისიის ვიცე პრეზიდენტს, ქეთრინ ეშტონს და ევროკომისარს გაფართოებისა და სამეზობლო პოლიტიკის საკითხებში შტეფან ფულეს. „ამ წერილით გვინდა გთხოვოთ გააძლიეროთ თქვენი ძალისხმევა საქართველოში/რეგიონში რუსეთის ფედერაციის პოლიტიკის წინააღმდეგ დააწესოს ახალი, გადაულახავი „საზღვრები" და აღმართოს სხვადასხვა ფორმის ბარიკადები, მავთულხლართები, რკინაბეტონის კონსტრუქციები, კედლები, მიწათხრილები საქართველოს ტერიტორიაზე", ნათქვამია მიმართვაში. სრულად წყარო: eapnationalplatform.ge

24 ივლისს, 14:00 საათზე, „უფლებადამცველთა გაერთიანება", „ახალგაზრდა ადვოკატები" და „ახალგაზრდა ფინანსისტთა და ბიზნესმენთა ასოციაცია" პრესკონფერენციას გამართავენ. თემა: „საერთაშორისო გამჭვირვალობა-საქართველოს" მიერ უცხოელებისთვის მიწის შეძენის აკრძალვასთან დაკავშირებით საკონსტიტუციო სასამართლოში სარჩელის შეტანა. მისამართი:თბილისი, პრაიმტაიმის პრესკლუბი

24 ივლისს, 12:00 საათზე, ადამიანის უფლებების სწავლებისა და მონიტორინგის ცენტრი (EMC) ევროკავშირის პროექტის – სისხლის სამართლის სისტემის რეფორმის მხარდაჭერა საქართველოში – დაფინანსებითა და მხარდაჭერით დაგეგმილ საჯარო დისკუსიას გამართავს. თემა: სასჯელების მიმართ სახელმწიფო პოლიტიკა და მისი სოციალური რეფლექსიები. მისამართი:ოზურგეთი, დემოკრატიული ჩართულობის ცენტრი