27  ივლისს, 13:00 საათზე, საქართველოს წითელი ჯვრის საზოგადოების ბათუმის ფილიალი, ერთჯერად ჰუმანიტარულ დახმარებას გაუწევს მრავალშვილიან 11 ოჯახს.  მისამართი: ბათუმი, მემედ აბაშიძის გამზირი 4, საქართველოს წითელი ჯვრის საზოგადოების ბათუმის ფილიალი

თბილისი. ინფორმაციის თავისუფლების განვითარების ინსტიტუტმა (IDFI) შინაგან საქმეთა  სამინისტროდან მიღებული ინფორმაცია გამოაქვეყნა.  „IDFI-იმ საქართველოს შინაგან საქმეთა სამინისტროდან მიიღო ინფორმაცია სამეგრელოში სპეციალურ სამალავებში აღმოჩენილი ვიდეოფირების ჩვენებაზე დამსწრე ორგანიზაციებისა და პირთა რაოდენობის შესახებ. როგორც მიღებული დოკუმენტიდან ირკვევა შსს ორგანიზებით მოწყობილ შეხვედრაზე წამების ამსახველი ვიდეო-კადრები სულ იხილა 108 პირმა. შსს-მ აგრეთვე მოგვაწოდა ყველა იმ ორგანიზაციის ჩამონათვალი, რომელთა წარმომადგენლებიც მოწვეულნი იქნენ აღნიშნული ვიდეო-კადრების დახურულ ჩვენებაზე", ნათქვამია ორგანიზაციის ვებგვერდზე. სრულად  წყარო: opendata.ge

თბილისი. არასამთავრობო ორგანიზაცია „სტეფანწმინდას" ინიციატივით და არასამთავრობო ორგანიზაცია „სიდას" ფასილიტაციით, გაიმართა სამუშაო შეხვედრა, რომელიც შეეხებოდა ბოლო წლების განმავლობაში საქართველოს ხელისუფლების მიერ გატარებულ ენერგეტიკულ პოლიტიკას – „რესურსების მაქსიმალური ათვისების პოლიტიკას", რაც ქვეყანაში არსებულ თითქმის ყველა მდინარეზე ჰიდროელექტროსადგურის მშენებლობას გულისხმობს. წყარო: სიდას გვერდი სოციალურ ქსელში

თბილისი. საქართველოს ახალგაზრდა კონსტიტუციონალისტთა ასოციაცია 27 ივლისს დაგეგმილ ნაციონალური მოძრაობის პრაიმერთან დაკავშირებით შსს-ს მიმართავს. „ასოციაცია მიმართავს შინაგან საქმეთა სამინისტროს  უსაფრთხოების უპრეცენდენტო ზომების მიღების თხოვნით, რათა, თავიდან იქნეს აცილებული შესაძლო პროვოკაციები. ვიმედოვნებთ, რომ როგორც შსს-ს წარმომადგენლები, აგრეთვე, პოლიტიკური პარტიების წევრები და აქტივისტები იმოქმედებენ კანონის მოთხოვნათა დაცვით და არ დაფიქსირდება სიტუაციის ესკალაცია", ნათქვამია ორგანიზაციის გვერდზე სოციალურ ქსელში სრულად წყარო:ორგანიზაციის გვერდი სოციალურ ქსელში

აჭარა. 25-26 ივლისს, ქობულეთში, ხანდაზმულ ქალთა ასოციაციის ოფისში ჩატარდა სემინარი „გენდერი, სტერეოტიპები და თანასწორობა". სემინარი მიზნად ისახავდა ქობულეთში მცხოვრებ, სხვადასხვა პროფესიის მქონე ლიდერ ქალთა ცნობიერების ამაღლებას გენდერული თანასწორობისა და ქალთა უფლებების საკითხებზე, ასევე მათთვის ინფორმაციის მიწოდებას ოჯახში ძალადობის საკითხებზე ქვეყანაში არსებულ დაცვის, პრევენციისა და რეაბილიტაციის მექანიზმებზე.  წყარო: ორგანიზაციის გვერდი სოციალურ ქსელში

27 ივლისს, 11:00 საათზე ინფორმაციის თავისუფლების განვითარების ინსტიტუტი (IDFI) გამართავს საჯარო დისკუსიას – „ინფორმაციის თავისუფლება საქართველოში" საზოგადოების სხვადასხვა ჯგუფების მონაწილეობით. მისამართი: ქუთაისი, დემოკრატიული ჩართულობის ცენტრი

27 ივლისს, 14:00 საათზე არასამთავრობო ორგანიზაცია „რადარამი" გამართავს ამერიკელი ავტორის ჯეი მათეუსის წიგნის „იშრომე ბევრი, იყავი კეთილი" ქართული თარგმანის პრეზენტაციას. მისამართი: გორი, სტალინის 7, გორის დემოკრატიული ჩართულობის ცენტრი

თბილისი.საქართველოს ახალგაზრდა იურისტთა ასოციაციამ უძრავ ქონებასთან დაკავშირებულ საქმეებზე აღსრულების შეჩერების შესახებ კანონპროექტს და საქართველოს პარლამენტს დასკვნით მიმართავს. „მოვუწოდებთ საქართველოს პარლამენტს, არ მიიღოს წინამდებარე კანონპროექტი, რამეთუ ის ეწინააღმდეგება კერძო სამართლებრივი ურთიერთობის არსს, ხოლო უკვე დასრულებულ სამართლებრივ ურთიერთობაში კანონისმიერი ჩარევა არღვევს სამართლებრივი სტაბილურობის პრინციპს. ამავდროულად, ზემოთ წარმოდგენილი არგუმენტების გათვალისწინებით, კანონპროექტით გათვალისწინებული ნორმები შესაძლებელია წინააღმდეგობაში მოვიდეს საქართველოს კონსტიტუციის 21-ე მუხლთან", ნათქვამია ორგანიზაციის მიერ გავრცელებულ განცხადებაში. სრულად წყარო: gyla.ge

თბილისი.ლიბერალიზმის სასწავლო ცენტრში ლევან გიგინეიშვილმა ლექცია – „პიროვნების თავისუფლება ქართულ ლიტერატურაში"– წაიკითხა. მათ ვინც ვერც შეძლო დასწრება,  ცენტრი საშუალებას აძლევს იხილოს ჩანაწერი. წყარო:ორგანიზაციის გვერდი სოციალურ ქსელში

გურია.25 ივლისს, საქართველოს პარლამენტის ინიციატივით და  ოზურგეთის დემოკრატიული ჩართულობის ცენტრის ორგანიზებით გაიმართა საქართველოს კონსტიტუციაში ცვლილებების შეტანის შესახებ საქართველოს კონსტიტუციური კანონის  საერთო სახალხო განხილვა. შეხვედრაზე განხილეს საკონსტიტუციო ცვლილებების სამი პროექტი: საქართველოს პრეზიდენტის, პრემიერ–მინისტრის და პარლამენტის თავმჯდომარის თანამდებობის დაკავების უფლებასთან, პარლამენტის მიერ მთავრობის შემადგენლობაში ცვლილებების შეტანაზე კონტროლის შესახებ და  ცვლილება - კონსტიტუციაში ცვლილებების შესატანად საჭირო კვორუმთან დაკავშირებით. განხილვაში მონაწილეობა მიიღეს ოზურგეთში მოქმედმა არასამთავრობო და სამთავრობო ორგანიზაციის წარმომადგენლებმა, პარტიების ოზურგეთის ადგილობრივმა, რაიონული ორგანიზაციის წარმომადგენლებმა და მოქალაქეებმა.

თბილისი. სამართლიანმა არჩევნებმა გამოაქვეყნა ბლოგი – „ადმინისტრაციული რესურსი: 14 მილიონამდე ლარი წინასაარჩევნოდ აჭარაში". ორგანიზაციის ინფორმაციით აჭარის ავტონომიური რესპუბლიკის 2013 წლის ბიუჯეტში შესატანი ცვლილებები უმაღლესმა საბჭომ 24 ივლისს რიგგარეშე პლენარულ სხდომაზე 11 ხმით დაამტკიცა. კანონპროექტის მიხედვით, ბიუჯეტი გაიზარდა 14 მილიონ 722 ათას 700  ლარით, საიდანაც 13 მილიონ 554 ათას 400 ლარი განკუთვნილია ინფრასტრუქტურული და სოციალური პროექტებისთვის. „აჭარის ავტონომიური რესპუბლიკის უმაღლესმა საბჭომ, აღნიშნული გადაწყვეტილებით უგულვებელყო საქართველოს საარჩევნო კოდექსის 49-ე მუხლის მოთხოვნები, რომლის მიხედვით არჩევნების დანიშვნის დღიდან არჩევნების შედეგების შეჯამებამდე, აკრძალულია იმ საბიუჯეტო პროგრამების ზრდა, რომლებიც არჩევნებამდე გათვალისწინებული არ იყო ბიუჯეტით, აგრეთვე არაგეგმური ტრანსფერების ინიცირება ან გეგმიური ტრანსფერის ზრდა ადგილობრივ ბიუჯეტში. გარდა ამისა, ოფიციალური წინასაარჩევნო კამპანიის განმავლობაში აკრძალულია ისეთი პროექტების განხორციელება, რომლებიც მანამდე არ იყო გათვალისწინებული სახელმწიფო/ადგილობრივ ბიუჯეტში", – ნათქვამია სამართლიანი არჩევნების ბლოგზე. სრულად წყარო: www.isfed.ge

თბილისი. საერთაშორისო გამჭვირვალობა – საქართველომ ფარული ჩანაწერების შესახებ თომას ჰამარბერგის წინასწარი რეკომენდაციის თარგმანი გამოაქვეყნა. „შესაძლებელია ერთი ჩანაწერის ნიმუშის სახით შენარჩუნება სასამართლოს წინაშე მისი წარდგენის მიზნით (რის შემდგომაც ის უნდა განადგურდეს) მხოლოდ იმ შემთხვევაში, თუ ის სრულიად აუცილებლად მიიჩნევა, როგორც მტკიცებულებითი მასალა და მხოლოდ იმ პირობით, თუ იარსებებს პირადი ცხოვრების ხელშეუხებლობის სრული გარანტიები. მაგრამ პირადი ცხოვრების ხელშეუხებლობის უფლებასა და პროკურატურის ინტერესებს შორის კონფლიქტის შემთხვევაში, უპირატესობა პირველს უნდა მიენიჭოს", ნათქვამია რეკომენდაციაში. სრულად წყარო: transparency.ge

გურია. 24 ივლისს, ოზურგეთის დემოკრატიული ჩართულობის ცენტრში, ადამიანის უფლებების სწავლებისა და მონიტორიგნის ცენტრმა (EMC) გაიმართა დისკუსია თემაზე: „სასჯელების მიმართ სახელწიფო პოლიტიკა და მისი სოციალური რეფლექსიები”. შეხვედრის მომხსენებელმა, სისხლის სამართლის პოლიტიკის ექსპერტმა სოფო ვერძეულმა ისაუბრა სისხლის სამართლის პოლიტიკაზე ვარდების რევოლუციის შემდეგ, გაცხადებულ ნულოვან ტოლერანტობის, სასჯელების სიმკაცრესა და მის გავლენაზე კრიმინალის დონეზე, პატიმართა რესოციალიზაციის პრობლემაზე სასჯელაღსრულების დაწესებულებებში. ასევე, სამომავლო განვითარების შესაძლო გზებს. შეხვედრას დაესწრნენ, ადგილობრივი არასამთავრობო ორგანიზაციების წარმომადგენელბი, მედია და პრაქტიკოსი იურისტები. წყარო: ადამიანის უფლებების სწავლებისა და მონიტორინგის ცენტრის გვერდი სოციალურ ქსელში

თბილისი. 26 ივლისს საქართველოს ახალგაზრდა კონსტიტუციონალისტთა ასოციაციამ საკონსტიტუციო ცვლილებების შესახებ ბრიფინგი გამართეს. საქართველოს ახალგაზრდა კონსტიტუციონალისტთა ასოციაციის პრეზიდენტმა თორნიკე ჭეიშვილმა ისაუბრა საკონსტიტუციო ცვლილებების საყოველთაო-სახალხო  განხილვის საორგანიზაციო კომისიის ეფექტურ მუშაობასა და თანამშრომლობაზე საზოგადოებასთან. თუმცა, აღნიშნა,რომ შეიმჩნეოდა საპარლამენტო უმცირესობის პასიურობა ზემოხსენებულ პროცესში. სრულად წყარო: ორგანიზაციის გვერდი სოციალურ ქსელში

აჭარა.სამოქალაქო საზოგადოების ინსტიტუტმა სამუშაო შეხვედრების ციკლი არასამთავრობო ორგანიზაციების ფინანსურ მდგრადობაზე 25 ივლისს, ბათუმში დაასრულა. ინსტიტუტის ექსპერტები აჭარის რეგიონში მოქმედი არასამთავობო ორგანიზაციების წარმომადგენლებს შეხვდნენ.  სამუშაო შეხვედრაზე განიხილეს საკითხები: ფილანტროპია და მოხალისეობა, გრანტები და სახელმწიფო დაფინანსება, სოციალური მეწარმეობა. სამოქალაქო საზოგადოების ინსტიტუტმა სამუშაო შეხვედრები 21 ივნისს დაიწყო და შიდა ქართლი, სამცხე–ჯავახეთი, კახეთი, იმერეთი, გურია და აჭარა მოიცვა.

თბილისი.ადამიანის უფლებათა ცენტრმა სასჯელაღსრულების დაწესებულებებში C ჰეპატიტის მკურნალობის დაწყებასთან შესახებ პუბლიკაცია გამოაქვეყნა. პუბლიკაციაში სასჯელაღსრულების მინისტრის მოადგინე პროგრამის დაწყებაზე, იმ კრიტერიუმებზე საუბრობს, რომლის მიხედვითაც მსჯავრდებულების პროგრამაში ჩართვა მოხდება. სრულად წყარო: humanrights.ge

იმერეთი.სამეცნიერო-ინტელექტუალური კლუბის „თაობათა დიალოგის" წევრებმა მონაწილეობა მიიღეს გერმანიაში გაცვლით პროგრამაში. იგი განხორციელდა – „ახალგაზრდობა მოქმედებაში" – პროგრამის ფარგლებში. პროგრამაში მონაწილეობდნენ ახალგაზრდები გერმანიიდან, პოლონეთიდან, საქართველოდან, ჩეხეთიდან, თურქეთიდან, საფრანგეთიდან, სომხეთიდან , აზერბაიჯანიდან. წყარო:ორგანიზაციის გვერდი სოციალურ ქსელში

გურია.გრძელდება „საქართველოს დემოკრატიული განვითარების კავშირი" აგრძელებს შეხვედრებს ოზურგეთში მდებარე მრავალბინიანი საცხოვრებელი სახლების ბინათმესაკუთრეებთან. 23 და 24 ივლისს მსგავსი ტიპის შეხვედრები გაიმართა სხვადასხვა ქუჩის მრავალბინიანი სახლების ბინათმესაკუთრეებთან. შეხვედრების მიზანია ბინათმესაკუთრეთა ამხანაგობის ინსტიტუტის პოპულარიზაცია და მათი შექმნა.  

იმერეთი. 23 ივლისს თერჯოლის მუნიციპალიტეტის სოფელ ჩხარის საჯარო სკოლის სამოქალაქო კლუბის წევრები, სკოლის პედაგოგებთან და მშობლებთან ერთად საქართველოს პარლამენტს სტუმრობდნენ. მათ გარემოს დაცვისა და ბუნებრივი რესურსების საპარლამენტო კომიტეტი მასპინძლობდათ. სადაც საუბარი შეეხო იმერეთის ეკოლოგიურ პრობლემებს. შეხვედრის ბოლოს მხარეებს შორის თანამშრომლობის მემორანდუმი გაფორმდა, რომლის მიზანია გარემოს დაცვის საკითხებში სამოქალაქო კლუბსა და საქართველოს პარლამენტის გარემოს დაცუვისა და ბუნებრივი რესურსების კომიტეტს შორის თანამშრომლობა და ერთობლივი ღონისძიებების განხორციელება. წყარო: kedec.ge

26 ივლისს, 12:00 საათზე, საქართველოს ახალგაზრდა კონსტიტუციონალისტთა ასოციაცია ინიცირებულ საკონსტიტუციო ცვლილებებზე ბრიფინგს გამართავს. მისამართი:თბილისი, ვაზისუბნის 7 

26 ივლისს, 17:00 საათზე ჰაინრიჰ ბიოლის ფონდი აწყობს საჯარო დისკუსიას – „ენერგეტიკა და ეკოლოგია: ინტერესთა ბალანსი". მისამართი: ბათუმი, ფარნავაზ მეფის 62–64, ბათუმის დემოკრატიული ჩართულობის ცენტრი

26 ივლისს, 11:00 საათზე არასამთავრობო ორგანიზაცია „სტეფანწმინდას ინიციატივით და ორგანიზაცია „სიდას" ფასილიტაციით გაიმართება ენერგეტიკული პოლიტიკის შესახებ შეხვედრა. მისამართი: თბილისი, სასტუმრო „თორი".