ორგანიზაცია „რადარამი" ახორციელებს პროექტს - „მობილური ბიბლიოთეკა დევნილი ბავშვებისათვის". პროექტი ითვალისწინებს მობილური ბიბლიოთეკის შექმნას, რომელიც ქართულ ენაზე გამოცემულ 600-ზე მეტი დასახელების წიგნს მოიცავს. პირველ ეტაპზე ცენტრი „აფხაზეთი" უზრუნველყოფს ბიბლიოთეკის გადატანასა და შესაბამისი ღონისძიებების დაგეგმვას დევნილთა 6 დასახლებაში - ქვემო ქართლისა და მცხეთა-მთიანეთის რეგიონებში. მომდევნო ეტაპზე, კი, მთელი საქართველოს მასშტაბით, აფხაზეთის განათლებისა და კულტურის სამინისტრო შეარჩევს რეგიონებს. აღსანიშნავია, პროექტის მიზანი მოზარდებში წიგნისადმი ინტერესის გაღვიძება, ახალგაზრდებში საზოგადოებრივი აქტივობის გაზრდა და საგანმანათლებლო პროცესში მათი ჩართვაა. ამასთან, პროექტი ხელს შეუწყობს დევნილი ბავშვების უზრუნველყოფას ძვირადღირებული წიგნებით. წყარო:ორგანიზაციის გვერდი სოციალურ ქსელში

სამეგრელო. 20-21 ივლისს ანაკლიაში „საერთაშორისო გამჭვირვალობა – საქართველოს" ზუდიდის ოფისის, ასოციაცია „ათინათისა" და „სამოქალაქო მონიტორინგისა და კვლევების ცენტრის" ერთობლივი პროექტის ფარგლებში ჩატარდა სემინარი – „ჩართულობა დემოკრატიული თვითმმართველობისათვის". სემინარზე მომხსენებლებმა და სტუმრებმა ადგილობრივი თვითმმართველობის ძირითადი საკითხები განიხილეს. შეხვედრაში მონაწილეობა ზუგდიდის მუნიციპალიტეტის გამგეობისა და საკრებულოს თანამშრომლებმა, სამეგრელო-ზემო სვანეთის სამხარეო ადმინისტრაციისა და ადგილობრივი მედიის წარმომადგენლებმა მიიღეს. ღონისძიების ფარგლებში, სემინარი ჩაატარეს „კავკასიის ეკონომიკური და სოციალური კვლევითი ინსტიტუტის" ექსპერტ-ანალიტიკოსებმა. პროექტი ხორციელდება „ევრაზიის თანამშრომლობის ფონდის მხარდაჭერით". წყარო:საერთაშორისო გამჭვირვალობა – საქართველოს გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ყაზბეგისა და ყვარელის მუნიციპალიტეტების გამგეობებიდან მიღებული ინფორმაცია გამოაქვეყნა. ვებ–გვერდზე განთავსდა დოკუმენტები ორგანიზაციის ბალანსის, პრემიების, სახელმწიფო შესყიდვების, ავტოპარკის, საკუთარი განცხადების საფუძველზე განთავისუფლებული თანამშრომლების, ხელმძღვანელობის მიერ განთავისუფლებული თანამშრომლების შესახებ.  ინფორმაცია ყაზბეგის მუნიციპალიტეტის გამგეობიდან  ინფორმაცია ყვარელის მუნიციპალიტეტის გამგეობიდან  წყარო: opendata.ge

შიდა ქართლი. 22 ივლისს ,,ინვალიდთა კლუბში" გაიხსნა ანა ფრანკის სახლის ორი გამოფენა – „იკითხე ანა ფრანკთან ერთად" და „ანა ფრანკი - აქტუალური ისტორია". გამოფენა ოფიციალურად გახსნა "გორის ინვალიდთა კლუბმა" და საქართველოს გაეროს ასოციაციამ. პროექტის მიზანია ახალგაზრდების გათვითცნობიერება ისეთ საკითხებზე, როგორიცაა ადამიანის უფლებები, მრავალფეროვნება და დისკრიმინაცია. პროექტის ფარგლებში იგეგმება საქართველოს მასშტაბით 10 ქალაქში მოძრავი გამოფენის მოწყობა. ქ. გორში იგი 28 ივლისამდე დარჩება. ღიაა ყოველ დღე შაბათ-კვირის გარდა და მუშაობს 11.00 სთ-დან 17.00 სთ-მდე.  წყარო:ორგანიზაცია ბილიკის გვერდი სოციალურ ქსელში

თბილისი. საქართველოს ახალგაზრდული პარლამენტი შეშფოთებას გამოთქვამს ზუგდიდში მომხდარი ინციდენტის გამო. „ჩვენი ქვეყნისათვის განსაკუთრებული მნიშვნელობის მატარებელია მომავალი საპრეზიდენტო არჩევნები, რომელსაც მსოფლიო თანამეგობრობა გულისყურით ადევნებს თვალს. ეს პროცესი განსაკუთრებულად გამჭვირვალედ და დემოკრატიულად უნდა ჩატარდეს. საქართველოს ახალგაზრდული პარლამენტი გამოხატავს სურვილს, რომ საპრეზიდენტო არჩევნებთან დაკავშირებული ნებისმიერი ღონისძიება ჩატარდეს უსაფრთხო გარემოში", ნათქვამია ახალგაზრდული პარლამენტის მიერ გავრცელებულ განცხადებაში.  სრულად წყარო:ორგანიზაციის გვერდი სოციალურ ქსელში

თბილისი. „ასოციაცია მომავლის ფერმერმა" გამოსცა კიდევ ერთი გზამკვლევი მეცხოველე ფერმერებისთვის. გამოცემაში: „ჯანსაღი ხბოს მიღება და მისი წარმატებით გამოზრდა ფერმერულ და საოჯახო პირობებში" თავმოყრილია პრაქტიკული რჩევები, რაც ყოველდღიურ საქმიანობაში ფერმერს გამოადგება. სრულად  წყარო:Agro Development Group-ის გვერდი სოციალურ ქსელში

თბილისი. საერთაშორისო გამჭვირვალობა – საქართველომ ბლოგპოსტი – „ტრაქტორების საქმე" ბევრ კითხვას აჩენს გამოაქვეყნა. „1 მაისს სოფლის მეურნეობის სამინისტროს ქვემდებარე უწყებების თანამშრომლების დაკავება ბევრ კითხვის ნიშანს ბადებს   ...საქმის გარემოებების გათვალისწინებით მიგვაჩნია, რომ აღნიშნულ საქმეს სამართალდამცავმა ორგანოებმა განსაკუთრებული ყურადღება უნდა დაუთმონ. მნიშვნელოვანია საზოგადოება მაქსიმალურად იყოს ინფორმირებული „ტრაქტორების საქმეში" არსებულ გარემოებებზე და გამოძიების მიმდინარეობაზე. ეს იყო სახელმწიფოს მიერ ეფექტური ანტიკორუფციული ქმედებები თუ გამოძიების თვითნებობა. ცხადია, რომ რიგითი პროკურორი თვითნებურად ვერ გადაწყვეტდა ზეწოლის გამოყენებას იმ დროს მოქმედი მინისტრის წინააღმდეგ ჩვენებების მისაღებად. მნიშვნელოვანია ამ საქმის მიუკერძოებელი და სწრაფი გამოძიება და იმ პირთა პასუხისმგებლობის დაყენება რომლებმაც კანონი დაარღვიეს", ნათქვამია ორგანიზაციის ვებ–გვერდზე. სრულად წყარო: transparency.ge 

22 ივლისს, 18:00 საათზე, გაიმართება ჰაინრიხ ბიოლის ფონდის მიერ გამოცემული ბარათების - „50 ქალი საქართველოდან" და ლიტერატურის მუზეუმისა და სამეცნიერო კვლევითი ცენტრ „რადიქსის" პროექტის - „ელენე დარიანი - ქალი პაოლოს უკან" პრეზენტაცია.  ადგილზე შეგიძლიათ გაეცნოთ ღია ბარათებზე დატანილ საინტერესო ისტორიებს და მოისმინოთ 50 ქალიდან ერთ-ერთის, ელენე დარიანის ისტორია, რომელსაც ბლოგერი ზურაბ ალხანიშვილი გიამბობთ. მისამართი:ბათუმი, პრესკაფე

თბილისი. „სამართლიანი არჩევნებისა და დემოკრატიის  საერთაშორისო საზოგადოებამ" (ISFED) 2013 წლის 27 ოქტომბრის საპრეზიდენტო არჩევნების წინასაარჩევნო პერიოდის პირველი ანგარიში გამოაქვეყნა. ანგარიში მოიცავს  2013 წლის 1  ივლისიდან 19 ივლისის ჩათვლით პერიოდს. „სამართლიანი არჩევნები" დაკვირვებას საქართველოს ყველა საარჩევნო ოლქში 73 გრძელვადიანი დამკვირვებლის მეშვეობით ახორციელებს. ორგანიზაცია მონიტორინგის პროცესში ხელმძღვანელობს სადამკვირვებლო ორგანიზაციებისათვის დადგენილი საერთაშორისო სტანდარტებით, რაც პროცესის სრულყოფილად, ობიექტურად და გამჭვირვალედ დაკვირვებას გულისხმობს.ანგარიში მოიცავს ინფორმაციას კამპანიის ოფიციალურად დაწყების დღიდან 19 ივლისამდე საარჩევნო ადმინისტრაციის დაკომპლექტების დროს გამოვლენილ ხარვეზებზე, ადმინისტრაციული რესურსების გამოყენებისა და ამომრჩევლის მოსყიდვის კუთხით არსებულ რისკებზე, პოლიტიკური ნიშნით განხორციელებულ სავარაუდო ზეწოლა/მუქარის შემთხვევებზე, პოლიტიკური პარტიების/კანდიდატების წინასაარჩევნო საქმიანობის შეხვედრებზე, საარჩევნო სიებზე. სრულად  წყარო:isfed.ge

თბილისი. საქართველოს ახალგაზრდა იურისტთა ასოციაცია ზუგდიდისა და ბათუმის ინციდენტებს ეხმაურება. საია შეშფოთებას გამოთქვამს 20-21 ივლისს ზუგდიდსა და ბათუმში მომხდარი ინციდენტების გამო და მოუწოდებს პოლიტიკურ პროცესში ჩართულ ყველა პირს უარი თქვას ძალადობაზე.  „საია მოუწოდებს   თითოეულ მოქალაქეს უარი თქვას პროტესტის ძალადობრივი ფორმებით გამოხატვაზე. ჩვენ ვითვალისწინებთ იმ გარემოებას, რომ ის პირები, რომლებიც აქციაზე იმყოფებოდნენ, შესაძლებელია, წარსულში  თავად იყვნენ ძალადობისა და უსამართლობის მსხვერპლნი, თუმცა მათ მსგავს ქმედებას სამართლებრივი გამართლება ვერ მოეძებნება. როგორც კი საწინააღმდეგოს დავუშვებთ, მსგავსი ქმედებები განმეორდება, რაც, ცხადია, დააზარალებს ქვეყნის ინტერესებს", ნათქვამია  ორგანიზაციის ვებ–გვერდზე. სრულად წყარო: gyla.ge

ქვემო ქართლი. რატევნის ქალთა საბჭო აგრძელებს ახალგაზრდებისთვის ტრენინგების ჩატარებას სხვადასხვა თემატიკაზე მათი ცნობიერების ამაღლების მიზნით. 18 ივლისს რატევნის ქალთა საბჭოს ოფისში ჩატარდა ტრენინგი თემაზე: პროექტის ციკლის მართვა, რომელსაც ესწრებოდნენ რატევნის საჯარო სკოლის მოსწავლეები და ეკოკლუბის წევრები, ასევე სტუდენტები. ტრენინგის მიზანს წარმოადგენდა ახალგაზრდებისათვის პროექტის წერის და მისი ციკლის მართვისათვის აუცილებელი ინფორმაციის მიწოდება და შესაბამისი  უნარ-ჩვევების განვითარება. რატევნის ქალთა საბჭო შექმნილია CENN-ის რეგიონული ინიციატივის „სამხრეთ კავკასიის ქვეყნებში სოფლად მცხოვრებ ქალთა უნარ-შესაძლებლობების გაძლიერება და მათი ჩართვა ბუნებრივი რესურსების მდგრად მართვაში" ფარგლებში, რომელიც ხორციელდება გერმანული ფონდის EED-ის ფინანსური მხარდაჭერით.  წყარო:cenn

„რეგიონული კინოს ასოციაცია"  აგვისტოს თვეში საქართველოს მუნიციპალიტეტებში ფილმების ღია ცის ქვეშ ჩვენებას გეგმავს. 3 დღის მანძილზე თითო ქალაქში ნაჩვენები იქნება ქართული, ფრანგული და გერმანული ფილმები. ასევე იქნება საუბრები მუნიციპალური კინოთეატრების განვითარების პერსპექტივებზე. სრულად  წყარო:ორგანიზაციის გვერდი სოციალურ ქსელში

აჭარა. 19 ივლისს ასოციაცია „ღირსეული სიბერის" ოფისში მორიგი სემინარი –„მოხალისეობის არსი და განვითარების პერსპექტივები"–გაიმართა. სემინარი ჩაატარა არასამთავრებო ორგანიზაცია „ბორჯღალოს" თავმჯდომარემ. ღონისძიება ახალგაზრდების ინფორმირულობის დონის ამაღლებასა და მოხალისეობრივ საქმიანობაში მათი აქტიური მონაწილეობის ხელშეწყობას ემსახურებოდა. შეხვედრაში მონაწილეობდნენ ხანდაზმულთა სოციალური ცენტრის მოხალისეები, ასევე ამერიკელი მოხალისე სპენსერ ჰამილტონი და ხანდაზმულთა სოციალური ცენტრის თანამშრომლები. ასოციაციაში პროექტ „ხანდაზმულთა სოციალური ცენტრის" ფარგლებში შექმნილია მოხალისეთა ჯგუფები, რომლებიც მარტოხელა მოხუცებს საყოფაცხოვრებო და ფსიქიოლოგიურ დახმარებას უწევენ, ჩართული არიან საქველმოქმედო აქციებში.  წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის, USAID-სა და საქართველოს იუსტიციის სამინისტროს ორგანიზებით 18 ივლისს ჩატარდა მრგვალი მაგიდა საჯარო ინფორმაციის პროაქტიულად გამოქვეყნების შესახებ. შეხვედრას ესწრებოდნენ სამთავრობო დაწესებულების წარმომადგენლები, ინფორმაციის თავისუფლების საკითხების ექსპერტები, არასამთავრობო ორგანიზაციები და ჟურნალისტები. მრგვალი მაგიდის პირველი ნაწილი დაეთმო ექსპერტების პრეზენტაციებს საჯარო ინფორმაციის პროაქტიული გამოქვეყნებისა და ზოგადად ინფორმაციის თავისუფლების კანონმდებლობის გაუმჯობესების შესახებ. მეორე ნახევარში მთლიანად დაეთმო „საჯარო ინფორმაციის პროაქტიულად გამოქვეყნებისა და ინფორმაციის ელექტრონულ მოთხოვნასთან" დაკავშირებით მთავრობის დადგენილების პროექტის პრეზენტაციას და მის გარჩევას მონაწილეების მიერ. სრულად წყარო: idfi.ge

შიდა ქართლი. 20 ივლისს, საქართველოს ახალგაზრდული პარლამენტის რეგიონული კომიტეტის წევრები გორის რაიონის, სოფელ ტინისხიდის მოსახლეობას შეხვდნენ. მოსახლეობამ რეგიონული კომიტეტის წევრებს  ის პრობლემები გააცნო, რომლებიც მათ ყოველდღიურად აწუხებთ– წყლის, გამრიცხველიანების, სარწყავი არხის, სკოლის, გზების და ნაგვის ბუნკერების პრობლემები. რეგიონული კომიტეტის წევრებმა მოსახლეობასთან ერთად არსებული პრობლემების გადაჭრის გზები დასახეს, დააყენეს საკითხი,რომ უპირველეს ყოვლისა საჭიროა სარწყავი არხის სისტემის მოწესრიგება. ტინისხიდის მოსახლეობის თქმით სოფელმა მიიღო ვაუჩერები, მოხნეს მიწები თუმცა წყლის არარსებობის გამო ვერ მოხერხდა მათი აღმოცენება. საბოლოოდ შეხვედრაზე შეთანხმდნენ,რომ სოფლის მოსახლეობასთან ერთად კომიტეტის წევრი ნიკა კარელიძე შეხვდება სოფელ ტინისხიდის მუნიციპალიტეტის ხელმძღვანელობას რათა ახალგაზრდულმა პარლამენტმა წვლილი შეიტანოს სოფლის პრობლემების მოგვარებაში. წყარო:ორგანიზაციის გვერდი სოციალურ ქსელში

თბილისი. „ტფილისის ჰამქარმა" თბილისის მერიის არქიტექტურის სამსახურიდან მხატვრის სახლთან დაკავშირებით მიღებული პასუხი გამოაქვეყნა.  მიღებული პასუხი წყარო:ორგანიზაციის გვერდი სოციალურ ქსელში

23 ივლისს, 12 საათზე, სამოქალაქო მრჩეველთა საბჭო გამართავს თვითმმართველი ქალაქი ბათუმის პრიორიტეტების განხილვას საზოგადოებრივი დარბაზის წევრებთან.  მისამართი: ბათუმი, ფარნავაზ მეფის 62/64, დემოკრატიული ჩართულობის ცენტრი

22 ივლისს 12:00 საათზე სამართლიანი არჩევნებისა და დემოკრატიის საერთაშორისო საზოგადოება პრესკონფერენციას გამართავს. ორგანიზაცია 2013 წლის 27 ოქტომბრის საპრეზიდენტო არჩევნების წინასაარჩევნო პერიოდის მონიტორინგის პირველ ანგარიშს წარმოადგენს. მისამართი: თბილისი, ონიაშვილის 37

20 ივლისს, 15:00 საათზე ოზურგეთის დემოკრატიული ჩართულობის ცენტრისა და ცენტრის ახალგაზრდა მომხმარებელთა ინიციატივით გაიმართება ადგილობრივი არასამთავრობო ორგანიზაციების მიერ მომზადებული დოკუმენტური ფილმების ჩვენება. ფილმები ეხება ეთნიკური უმცირესობების, შეზღუდული შესაძლებლობების პირებთან კომუნიკაციის პრობლემებსა და მარტოხელა მოხუცებს. ჩვენების შემდეგ გაიმართება დისკუსია მისამართი: ოზურგეთი, ჭავჭავაძის 14, დემოკრატიული ჩართულობის ცენტრი

20 ივლისს, 11:30 საათზე მოსამართლეები და არასამთავრობო ორგანიზაციების წარმომადგენლები იმსჯელებენ თემაზე – ინდივიდუალური მოსამართლეები დამოუკიდებლობა და სამოქალაქო საზოგადოებასთან თანამშრომლობის გაძლიერების გზები. მისამართი: თბილისი, სასტუმრო „ქორთიარდ მარიოტი"

თბილისი.სამოქალაქო საზოგადოების ინსტიტუტი  საზოგადოებრივი ორგანიზაციების ფინანსისტებისა და იურისტებისთვის საგადასახადო კოდექსის თემაზე უფასო ტრენინგებს ატარებს. ორდღიან ტრენინგებს არასამთავრობო ორგანიზაციების 28 წარმომადგენელი ესწრება. ღონისძიება ფოკუსირებულია არასამთავრობო ორგანიზაციების დაბეგვრის საკითხებზე. ტრენინგს საგადასახადო სამართლის სპეციალისტი ირაკლი შავიშვილი უძღვება.  სამოქალაქო საზოგადოების ინსტიტუტი საზოგადოებრივი ორგანიზაციების ფინანსისტებისა და იურისტებისთვის ტრენინგებს 19–20 ივლისს, 6–7 და 9–10 აგვისტოსაც  ჩაატარებს. მსურველებმა დაადასტურეთ მონაწილეობა ელექტრონული ფოსტის მეშვეობით: irakli_mkheidze@civilin.org ღონისძიება ხორციელდება USAID-ის ფინანსური მხარდაჭერით, აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

თბილისი. ინფორმაციის თავისუფლების განვითარების ინსტიტუტმა გამოაქვეყნა ქობულეთის მუნიციპალიტეტის გამგეობიდან მიღებული საჯარო ინფორმაცია. კერძოდ, ინფორმაცია ორგანიზაციის ბალანსის, 2012–2013 წლების პრემიების შესახებ, ინფორმაცია სახელმწიფო შესყიდვების, ავტოპარკის, გათავისუფლებული თანამშრომლების შესახებ და ა.შ. სრულად წყარო: opendata.ge