თბილისი. ადამიანის უფლებათა სწავლებისა და მონიტორინგის ცენტრმა (EMC) დისკრიმინაციის ყველა ფორმის აღმოფხვრის შესახებ საქართველოს კანონის პროექტთან დაკავშირებით მოსაზრებები და შენიშვნები გამოაქვეყნა. „ადამიანის უფლებების სწავლებისა და მონიტორინგის ცენტრი (EMC) მიესალმება საქართველოს იუსტიციის სამინისტროს ინიციატივას ანტიდისკრიმინაციული კანონის მიღების თაობაზე და მიაჩნია, რომ სამართლებრივი დაცვის სპეციალური მექანიზმებისა და დისკრიმინაციის წინააღმდეგ ბრძოლის ეფექტური ინსტიტუტის ამოქმედება მნიშვნელოვნად შეუწყობს ხელს დისკრიმინაციის აღმოფხვრას", ნათქვამია ორგანიზაციის გვერდზე სოციალურ ქსელში სრულად  წყარო:ორგანიზაციის გვერდი სოციალურ ქსელში

აჭარა. „სამოქალაქო მრჩეველთა საბჭომ" თვითმმართველ ქალაქ ბათუმის მერიასთან ერთად რიგით მეორე შეხვედრა ჩაატარა. შეხვედრაზე იმსჯელეს პრიორიტეტებზე განათლების, კულტურის და ახალგაზრდობის მიმართულებით. საუბარი შეეხო ახალგაზრდების დასაქმების, ხელოვანების ხელშეწყობის და სამოქალაქო საზოგადოების განვითარების საკითხებს.  ეხვედრა კითხვა-პასუხის რეჟიმში 2 საათზე მეტხანს გაგრძელდა. სამოქალაქო მრჩეველთა საბჭო პრიორიტეტების განხილვის მიზნით კიდევ ერთ შეხვედრას ჩაატარებს. 

თბილისი. საერთაშორისო გამჭვირვალობა – საქართველომ ბლოგპოსტი გამოაქვეყნა თემაზე:  „უცხოელებისთვის მიწის შეძენის აკრძალვა: კონსტიტუციის დარღვევა და საინვესტიციო გარემოზე უარყოფითი გავლენა". „საერთაშორისო გამჭვირვალობა – საქართველო" აღიარებს მიწის რესურსების მართვასთან დაკავშირებული საკითხების მოგვარების აუცილებლობას, თუმცა, მიაჩნია, რომ ახლადშემოღებული შეზღუდვები არღვევს საკუთრების კონსტიტუციურ უფლებებს; ასევე, ქვეყნის ეკონომიკური განვითარების სერიოზულად შეფერხებაც შეუძლია", ნათქვამია ორგანიზაციის გვერდზე. ორგანიზაცია უახლოეს მომავალში აპირებს  შეზღუდვების გაუქმების მოთხოვნით სარჩელით მიმართოს საკონსტიტუციო სასამართლოს. სრულად წყარო: transparency.ge

თბილისი. თბილისის იუსტიციის სახლში, არასამთავრობო ორგანიზაცია „სიდას" და ორგანიზაცია „მე დავბრუნდების" ორგანიზებით გაიმართა 25 მიგრანტის შეხვედრა მიგრაციის საკითხთა სამთავრობო კომისიის სამდივნოსთან. შეხვედრაზე სამდივნომ  მიგრანტებს მიგრაციის სფეროში სახელმწიფო პოლიტიკასა და მიმდინარე ინიციატივები გააცნო, მიგრანტებმა კი მათ წინაშე არსებული გამოწვევებისა და პრობლემების შესახებ ისაუბრეს. შეხვედრის მიზანი იყო საქართველოში მიგრაციის პოლიტიკის შემუშავებასა და განხორციელებაზე პასუხისმგებელ ინსტიტუციებთან მიგრანტების პირდაპირი კომუნიკაციის დამყარების ხელშეწყობა. „სიდა" აღნიშნულ ღონისძიებას მხარს უჭერს პროექტის „ინდივიდუალური დახმარება ქართველ მიგრანტებს" (Individual Support for Georgian Migrants – G-PAM) ფარგლებში. პროექტი G-PAM ხორციელდება ევროკავშირის დაფინანსებით. წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაცია „სამართალდამცავთა დაცვის" ლიგის დამფუძნებელმა „თავისუფლების კლუბის" ორგანიზებით გამართულ საჯარო ლექციაში მიიღო მონაწილეობა. მათ სტუდენტებს საჯარო ლექცია წაუკითხა თემაზე – ვინ არიან ორგანიზებული დანაშაუილის სუბიექტები და ვინ წარმართავს მათ კრიმინალურ საქმიანობას? ლექცია ორგანიზებული დანაშაულის შესახებ ორ საათს გაგრძელდა და მას ოცდაათზე მეტი სტუდენტი დაესწრო. მსმენელებს შორის იყვნენ სხვადასხვა უმაღლესი სასწავლებლის წარმომადგენლები. ლექციის დასრულების შემდეგ საუბარი კითხვა პასუხის რეჟიმში გაგრძელდა. წყარო:ორგანიზაციის გვერდი სოციალურ ქსელში

19 ივლისს, 19:00 საათზე ლიბერალიზმის სასწავლო ცენტრში გაიმართება ეკა აღდგომელაშვილის საჯარო ლექცია – „სქესი, გენდერი, მედია". მისამართი: თბილისი, კალისტრატე ცინცაძის 6–7, ჟურნალისტური ეთიკის ქარტია

თბილისი. ინფორმაციის თავისუფლების განვითარების ინსტიტუტმა ჭიათურის მუნიციპალიტეტის გამგეობიდან მიღებული ინფრომაცია გამოაქვეყნა. ვებგვერდზე განთავსდა ინფორმაცია ორგანიზაციის ბალანსის, 2012 წლის პრემიების, 2013 წლის პრემიების, სახელმწიფო შესყიდვების, საჯარო ინფორმაციის გაცემის ანგარიშების, ავტოპარკის, განთავისუფლებული თანამშრომლების შესახებ. გამგეობამ ინსტიტუტს არასრულყოფილად მიაწოდა ინფორმაცია გათავისუფლებული თანამშრომლების შესახებ, რადგან არ არის მითითებული პოზიციები და გათავისუფლების მიზეზი. სრულად  წყარო: opendata.ge

19 ივლისს, 17:00 საათზე ორგანიზაცია „მზის შვილების" ორგანიზებით გაიმართება შეზღუდული შესაძლებლობის მქონე ბავშვთა მხარდასაჭერი აქცია – „ერთად მოვშალოთ საზღვრები". მოეწყობა გამოფენა და შშმ ბავშვების მხარდასაფერად იმღერებენ „მაგთი–ფანის" მონაწილეები. მისამართი: თბილისი, რუსთაველის მეტროს მიმდებარე ტერიტორია

თბილისი. ადამიანის უფლებათა ცენტრი აქვეყნებს პუბლიკაციას შიდა ქართლში არსებულ მდგომარეობაზე. „უკანასკნელი ერთი თვის განმავლობაში შიდა ქართლის სამხარეო, კრიმინალური პოლიციის და სახელმწიფო უშიშროების სამსახურის (სუს-ის) განყოფილებების თანამშრომლების მხრიდან მოქალაქეების ცემის და დაშინების ფაქტები გახშირდა. რამდენიმე შემთხვევის შესახებ ადამიანის უფლებათა ცენტრის გორის ოფისის წარმომადგენლებმა მასალები შეაგროვეს და საქართველოს პრემიერ-მინისტრის აპარატს წარუდგინეს. „დაგვიტოვეთ ფაქტები და თქვენ ნახავთ რეაქციას", - გვითხრა პრემიერ-მინისტრმა ბიძინა ივანიშვილმა", – ნათქვამია humanrights.ge–ზე გამოქვეყნებულ პუბლიკაციაში. სრულად წყარო: humanrights.ge

მცხეთა–მთიანეთი. სიქა-ს მიერ ორგანიზებულ სამოქალაქო განათლების ბანაკი 2013-ის მეორე ნაკადის ყველა მონაწილე ადგილზეა - ბაზალეთში. 92 მონაწილე საქართველოს ყველა რეგიონიდან 5 დღის განმავლობაში ერთად იმუშავებენ თემში არსებული პრობლემების მოგვარებისათვის სხვადასხვა ინიციატივებისა და პროექტების შემუშავებაზე. წყარო: ორგანიზაციის გვერდი სოციალურ ქსელში

ქვემო ქართლი. 16 ივლისს ბოლნისში ადგილობრივი არასამთავრობო ორგანიზაციების წარმომადგენლებისა და ჟურნალისტებისთვის ჩატარდა სემინარი თემაზე „სოციალური მეწარმეობა". სემინარს უძღვებოდა სტრატეგიული კვლევების დაგ ანვითარების ცენტრი და განხილული იყო ისეთი საკითხების როგორიცაა: რა არის სოციალური მეწარმეობა, წარმატებული სოციალური საწარმოების მაგალითები საქართველოში და მის ფარგლებს გარეთ, სოციალური საწარმოებისა და ბიზნეს კომპანიების მსგავსება და განსხვავებები და ა.შ. სემინარი გაიმართა Arbeiter-Sammarieter-Bund-ის ორგანიზებით. წყარო: სოციალური მეწარმეობის ცენტრი

შიდა ქართლი. 18 ივლისს გორის მე–7 საჯარო სკოლის სამოქალაქო კლუბ „ალტრუისტების" ინიციატივით, დემოკრატიული ჩართულობის ცენტრში ორგანიზაცია ეკოვიჟენის წარმომადგენლებსა და საჯარო სკოლების დირექტორებს შორის შეხვედრა გაიმართა. სადაც შედგა ენერგიის და რესურსების დაზოგვის საერთაშორისო სასკოლო პროექტის (SPARE) პრეზენტაცია.  SPARE ესაა მსოფლიოში უდიდესი საგანმანათლებლო პროექტი კლიმატის ცვლილებაზე, ენერგეტიკაზე და გარემოს დაცვაზე, რომელშიც 6 000 სკოლა და 300 000 მოსწავლეა ჩართული. სექტემბრიდან SPARE–ს გორის მე–3, მე–7, ბერშუეთის, შავშვების, საღოლაშენის, რუისის მე–2 და აგარის საჯარო სკოლებიც შეუერთდებიან. ჩამოაყალიბებენ ეკო კლუბებს და პროექტის შესაბამის აქტივობებს განახორციელებენ.  წყარო: ორგანიზაცია ბილიკის გვერდი სოციალურ ქსელში

სამცხე–ჯავახეთი. დემოკრატ მესხთა კავშირის ოფისში ახალგაზრდული საკრებულოს 2013 წლის წევრებს მორიგი ტრენინგი ჩაუტარდათ, თემაზე: ეფექტური პრეზენტაცია. პროექტი – „ახალგაზრდული საკრებულო" – დაფინანსებულია საქართველოს და შვედეთის გაეროს ასოციაციების მიერ შვედური სიდას ფინანსური მხარდაჭერით. პროექტის მიზანია ხელი შეუწყოს ახალგაზრდების ინფორმირებულობის და მათ ჩართულობის ზრდას ადგილობრივივი თვითმმართველობის საქმიანობაში. პროექტში ჩართულია ახალციხის მუნიციპალიტეტში მცხოვრები 30 ახალგაზრდა.  წყარო:ორგანიზაციის გვერდი სოციალურ ქსელში

19 ივლისს, 12:00, 15:00 საათზე სამართლიანი არჩევნებისა და დემოკრატიის საერთაშორისო საზოგადოება (ISFED) საქართველოს ახალგაზრდა იურისტთა ასოციაცია (GYLA) და საერთაშორისო გამჭვირვალობა - საქართველო (TI) ატარებენ ორ მრგვალ მაგიდას თბილისის ორ გამგეობაში. დისკუსიას დაესწრებიან პოლიტიკური პარტიების წარმომადგენლები და მოქალაქეები. განსახილველი თემაა: პოლიტიკური გაერთიანებების შესახებ საქართველოს ორგანულ კანონში განხორციელებული ცვლილებები. მისამართი: თბილისი, მთაწმინდის გამგეობა (12:00 საათი)                                           დიდუბის გამგეობა (15:00 საათი)

19 ივლისს, 10:00 საათზე, სამოქალაქო საზოგადოების ინსტიტუტი საზოგადოებრივი ორგანიზაციების ფინანსისტებისა და იურისტებისთვის საგადასახადო კოდექსის თემაზე ტრენინგებს ჩაატარებს. ღონისძიება ფოკუსირებული იქნება არასამთავრობო ორგანიზაციების დაბეგვრის საკითხებზე. სამოქალაქო საზოგადოების ინსტიტუტი საზოგადოებრივი ორგანიზაციების ფინანსისტებისა და იურისტებისთვის ტრენინგებს 6–7 და 9–10 აგვისტოსაც ჩაატარებს.

19 ივლისს, 13:00 საათზე, არასამთავრობო ორგანიზაცია სამოქალაქო ჩართულობის ცენტრის წარმომადგენელი ლევან ჩიტაძე იპოთეკარებთან დაკავშირებით საგანგებო განცხადებას გააკეთებს. მისამართი:თბილისი, პრაიმტაიმის პრესკლუბი

19 ივლისს, 11:00 საათზე, არასამთავრობო ორგანიზაცია სიდას და ორგანიზაცია მე დავბრუნდების ორგანიზებით, გაიმართება 25 ახალგაზრდა და ზრდასრული მიგრანტის შეხვედრა მიგრაციის საკითხთა სამთავრობო კომისიის სამდივნოსთან. მისამართი:თბილისი, იუსტიციის სახლი

თბილისი. ფონდმა „ღია საზოგადოება - საქართველომ" ინგლისურიდან ქართულად თარგმნა და გამოსცა „ადვოკატირების გზამკვლევი სამოქალაქო საზოგადოებისათვის: ევროკავშირში გადაწყვეტილებების მიღების პროცესი და ადვოკატირება".  პუბლიკაცია მომზადდა ღია საზოგადოების ფონდების ადგილობრივი მმართველობის და საჯარო სექტორის რეფორმის ინიციატივის ფარგლებში. პუბლიკაციაში აღწერილია ის ძირითადი საკითხები, რომელიც უკავშირდება ევროკავშირის ინსტიტუტების მუშაობას და მათ როლს გადაწყვეტილების მიღების პროცესში. მასში ასევე განხილულია საკანონმდებლო პროცედურები, საჯარო პოლიტიკის შემუშავების პროცესი, ადვოკატირების განხორციელების შესაძლებლობები და შესაძლო შედეგები. წარმოდგენილი პუბლიკაცია  დაეხმარება სამოქალაქო სექტორის წარმომადგენლებს ევროკავშირის ინსტიტუტებთან მუშაობის პროცესში. წყარო: osgf.ge

სამცხე–ჯავახეთი. დემოკრატ მესხთა კავშირის ოფისში ორგანიზაციის იურისტებსა და მოსახლეობას შორის სადისკუსიო შეხვედრა გაიმართა. დისკუსიის თემა იყო: კანონით და ანდერძით მემკვიდრეობა. შეხვედრა შედგა პროექტის – „უფასო იურიდიული დახმარება სამცხე-ჯავახეთის მცხოვრებლებს"– ფარგლებში. წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ხელვაჩაურის, ხაშურის, ხარაგაულისა და წყალტუბოს მუნიციპალიტეტების გამგეობებიდან მიღებული ინფორმაცია გამოაქვეყნა. ვებგვერდზე განთავსდა ინფორმაცია ორგანიზაციის ბალანსის, 2012 წლის პრემიების, 2013 წლის პრემიების,   სახელმწიფო შესყიდვების, ინფორმაციის გაცემის ანგარიშების, განთავისუფლებული თანამშრომლების შესახებ. ინფორმაცია ხელვაჩაურის მუნიციპალიტეტის გამგეობიდან ინფორმაცია ხაშურის მუნიციპალიტეტის გამგეობიდან ინფორმაცია ხარაგაულის მუნიციპალიტეტის გამგეობიდან ინფორმაცია წყალტუბოს მუნიციპალიტეტის გამგეობიდან წყარო: opendata.ge

თბილისი. ორგანიზაცია „იდენტობამ" იურისტ ნინო ბოლქვაძესთან ინტერვიუ გამოაქვეყნა. ორგანზიაციის იურისტი პარლამენტის ადამიანთა უფლებების დაცვისა და სამოქალაქო ინტეგრაციის კომიტეტის 17 მაისის მოვლენების განხილვებს ესწრებოდა. ნინო ბოლქვაძესთან ინტერვიუ ორგანიზაციამ ვებ–გვერდზე განათავსა. სრულად წყარო: identoba.com

თბილისი. 17 ივლისს საქართველოს ახალგაზრდა კონსტიტუციონალისტთა ასოციაციის ინიციატივით გაიმართა მრგვალი მაგიდა – „ახალგაზრდები საკონსტიტუციო ცვლილებებისთვის". ღონისძიებაზე განიხილეს ინიცირებული საკონსტიტუციო ცვლილებები. ასოციაციის წარმომადგენლებმა დამსწრე საზოგადოებას შესთავაზეს ცვლილებების ალტერნატიული წინადადებები. სრულად წყარო: ორგანიზაციის გვერდი სოციალურ ქსელში