თბილისი. საერთაშორისო გამჭვირვალობა – საქართველომ 24 ივნისის საპარლამენტო ამბების აუდიო პოდკასტი გამოაქვეყნა. გამოშვებაში ორგანიზაციის საპარლამენტო მდივანი და მთავარი იურისტი პირადი ცხოვრების ამსახველი ვიდეო მასალისა და წამების ამსახველი ვიდეო კადრების შესახებ საუბრობენ. სრულად  წყარო:transparency.ge

თბილისი. ინფორმაციის თავისუფლების განვითარების ინსტიტუტმა სოციალურ ქსელში საჯარო დაწესებულებების გვერდების მონიტორინგის შედეგები გამოაქვეყნა. იგი მოიცავს იანვარ–აპრილის მონაკვეთს.  „1 ოქტომბრის შემდეგ ქართული სამთავრობო უწყებების მუშაობამ ელ-სივრცეში დიდი ცვლილებები განიცადა, უმეტესწილად დადებითი კუთხით. საჯარო დაწესებულებების უმრავლესობამ, რომელსაც წინა ხელისუფლების პირობებში დახურული ჰქონდა კედელი და გაუქმებული ჰქონდა შეტყობინების გაგზავნის ფუნქცია, დღეს ეს პრობლემები მოაგვარა", ნათქვამია ორგანიზაციის ვებგვერდზე. საჯარო დაწესებულებების Facebook გვერდების იანვარ - აპრილის მონიტორინგის შედეგები  წყარო: www.idfi.ge

თბილისი. 22 ივნისს, საქართველოს წითელი ჯვრის საზოგადოებამ საქველმოქმედო აქცია გამართა ჰიპერმარკეტ „გუდვილში". რომელშიც ორგანიზაციის მოხალისეები მონაწილეობდნენ. აქცია სახელწოდებით „გახდი ქველმოქმედი" სამი საათის განმავლობაში მიმდინარეობდა და მოხალისეები თანხას შემოწირულობის ყუთებით აგროვებდნენ. აქციის მიზანი იყო ლეიკემიით დაავადებული ორი ადამიანის დახმარება. წყარო: ორგანიზაციის გვერდი სოციალურ ქსელში

იმერეთი. ორგანიზაცია „რადარამმა" ახლახანს გამოცემული წიგნის მორიგი პრეზენტაცია გამართა ზესტაფონში. „როგორ აგვიხსნა ფეხბურთმა მსოფლიო" – აღნიშუნლი წიგნის პრეზენტაცია ადგილობრივ ბიბლიოთეკაში გაიმართა და მას მწერალი დათო ტურაშვილი და რადიო „თავისუფლების" ჟურნალისტი დათო ჩიხლაძე უძღვებოდნენ. წყარო: ორგანიზაციის გვერდი სოციალურ ქსელში

სამეგრელო. ინტერვიუს–საქართველოს ორგანიზებით ფოთის საჯარო სკოლების მასწავლებლებისთვის ჩატარდა საინფორმაციო ტრენინგი თემაზე – „გავეცნოთ ევროკავშირს". სემინარი ევროპული ინტეგრაციის, გლობალურ პოლიტიკაში ევროპის კავშირის როლსა და საქართველოთან თანამშრომლობის საკითხებს დაეთმო. მას უძღვებოდნენ ევროპული კვლევების ცენტრის დირექტორი   კახა გოგოლაშვილი და თბილისის სახელმწიფო უნივერსიტეტის პროფესორი სერგი კაპანაძე. წყარო:media.ge

ქვემო ქართლი. პროექტის ,,სამოქალაქო ადვოკატირების ინიციატივა" ფარგლებში, ,,სიდამ” განაახლა ვებგვერდი www.cems.ge, რომელიც წარმოადგენს სამოქალაქო მონიტორინგის ელექტრონულ სისტემას. ვებგვერდი საშუალებას აძლევს ადგილობრივ მოსახლეობას მიიღოს ინფორმაცია თვითმმართველობის საქმიანობის შესახებ და მიაწოდოს მათ ინფორმაცია აქტუალურ და პრობლემურ საკითხებზე. აღნიშნული საიტი შეიქმნა 2012 წელს, პროექტის ,,შენი ქალაქის თვითმმართველობა და შენ" ფარგლებში. თავდაპირველად საიტი მოიცავდა ინფორმაციას მხოლოდ რუსთავის შესახებ. განახლებულ საიტზე ასევე განთავსდება ინფორმაცია გორის, ქუთაისისა და ფოთის შესახებ. პროექტი „სამოქალაქო ადვოკატირების ინიციატივა" ხორციელდება აშშ საერთაშორისო განვითარების სააგენტოს (USAID) დემოკრატიული მმართველობის პროექტის მხარდაჭერით. წყარო: cida.ge

თბილისი. კოალიციას „დამოუკიდებელი და გამჭვირვალე მართლმსაჯულებისათვის" 9 ორგანიზაციისგან შემდგარი მმართველი კომიტეტი ჰყავს. 20 ივნისს სასტუმრო „შერატონ მეტეხი პალასში" გამართულ შეხვედრაზე, მმართველი კომიტეტის წევრებად აირჩია შემდეგი ორგანიზაციები: ახალგაზრდა იურისტთა ასოციაცია, ევრაზიის თანამშრომლობის ფონდი, ფონდი „ღია საზოგადოება – საქართველო, საერთაშორისო გამჭვირვალობა – საქართველო, კონსტიტუციის 42–ე მუხლი, საქართველოს ადვოკატები დამოუკიდებელი პროფესიისათვის, ადამიანის უფლებების სწავლებისა და მონიტორინგის ცენტრი, სამართლიანი არჩევნებისა და დემოკრატიის საერთაშორისო საზოგადოება, ადამიანის უფლებათა ცენტრი. მმართველი კომიტეტის პირველივე სხდომაზე, რომელიც უახლოეს მომავალში ჩატარდება, კენჭისყრით აირჩევა მმართველი კომიტეტის თავმჯდომარე და თავმჯდომარის მოადგილე. სრულად წყარო: www.coalition.org.ge

თბილისი. ინფორმაციის თავისუფლების განვითარების ინსტიტუტმა საარჩევნო სისტემების განვითარების, რეფორმებისა და სწავლების ცენტრიდან მიღებული ინფორმაცია გამოაქვეყნა. ვებგვერდზე განთავსდა ინფორმაცია თანამდებობის პირების პრემიების, თანამშრომლების პრემიების, მოქმედი საშტატო ნუსხისა და თანამდებობრივი სარგოს, ორგანიზაციის ბალანსის, ავტოპარკის ხარჯების, საკუთარი განცხადების საფუძველზე განთავისუფლებული თანამშრომლების, ხელმძღვანელობის მიერ განთავისუფლებული თანამშრომლების, დაფინანსებული ღონისძიებების, სამივლინებო ხარჯების, 2012 წლის 20 ოქტომბრიდან დანიშნული თანამდებობის პირების ბიოგრაფიული მონაცემების,  შიდა აუდიტის ანგარიშის, საჯარო ინფორმაციის გაცემის ანგარიშების შესახებ. ცენტრმა უარით უპასუხა მოთხოვნას თანამდებობის პირების ბიოგრაფიული მონაცემების შესახებ, რადგან განაცხადა, რომ ინფორმაცია პერსონალური მონაცემების შემცველია.  სრულად წყარო: www.opendata.ge

თბილისი. თბილისის ადამიანის უფლებათა სახლმა საიდუმლო საცავში აღმოჩენილი წამების ამსახველი ვიდეო მასალის შესახებ განცხადება გაავრცელა. ადამიანის უფლებათა ცენტრის აღმასრულებელი დირექტორი ალეკო ცქიტიშვილი მიიჩნევს, რომ წამების მსხვერპლის დაცვა და მისი რეაბილიტაცია არის ყველაზე მნიშვნელოვანი გამოწვევა დღევანდელი სახელმწიფოსთვის. „შსს-მ და ზოგადად ხელისუფლებამ ყველაფერი უნდა გააკეთოს იმისათის, რომ არ მოხდეს წამების მსხვერპლთა იდენტიფიკაცია, რათა მათ კიდევ ერთხელ არ მივაყენოთ ტკივილი. მსგავსი „კინოსეანსების” ჩვენებები გამოძიებას არაფერს არგებს და საჭიროა მიუკერძოებელი გამოძიება და მსხვერპლთან ერთად ეჭვმიტანილების დაცვა." სრულად წყარო: humanrightshousetbilisi.wordpress.com

თბილისი. სიდასა და პრობაციის ეროვნული სააგენტოს თანამშრომლობით, პროექტის – „ჩემი უფროსი მეგობარი" – ფარგლებში, კანონთან კონფლიქტში მყოფი ხუთი მოზარდი თავის „უფროს მეგობართან" ერთად, რუსთაველის სახელობის თეატრში გამართულ წარმოდგენას დაესწრო. პროექტში  „ჩემი უფროსი მეგობარი" რუსთავში მცხოვრები ხუთი არასრულწლოვანი პრობაციონერია ჩართული, ის  მიზნად ისახავს მოზარდებში დანაშაულის პრევენციას და სირთულეების დაძლევაში  ხელშეწყობას. „უფროსი მეგობრის" მოვალეობაა არასრულწლოვანზე დადებითი ზეგავლენის მოხდენა და მასში სოციალური პასუხისმგებლობის გრძნობის გაღვივება. „უფროსი მეგობარი" უზრუნველყოფს არასრულწლოვანი პირობით მსჯავრდებულისთვის როგორც საგანმანათლებლო, ისე გასართობი აქტივობების ორგანიზებას. წყარო: mcla.gov.ge

იმერეთი. სამეცნიერო–ინტელექტუალური კლუბი „თაობათა დიალოგი" ერთ–ერთი პროექტის ფარგლებში უფასო იურიდიულ, ფსიქოლოგიურ და პედაგოგიურ სატელეფონო კონსულტაციებს სთავაზობს მოზარდებს, ასევე მათ მშობლებს. სრულად წყარო: ორგანიზაციის გვერდი სოციალურ ქსელში

24 ივნისს, 16:00 საათზე, საქართველოს ახალგაზრდული პარლამენტი გამართავს მესამე რეგიონულ ვიზიტს მცხეთა-მთიანეთის რეგიონში, დუშეთში. მისამართი:დუშეთი, გამგეობის შენობა

თბილისი. 25 ივნისს ინფორმაციის თავისუფლების განვითარების ინსტიტუტი (IDFI) პოსტსაბჭოთა კვლევების ცენტრთან (CPSS) ერთად გამართავს პროექტის -„ელექტრონული ჩართულობის განვითარება საქართველოში" - შედეგების პრეზენტაციას. ღონისძიებაზე წარმოდგენილი იქნება საჯარო დაწესებულებების ელექტრონული რესურსების - ოფიციალური ვებ-გვერდებისა და Facebook გვერდების 2012-2013 წლების მონიტორინგის ანგარიში, რეკომენდაციები მოქალაქეებსა და საჯარო სექტორს შორის ორმხრივი კომუნიკაციის გასაუჯობესებლად.  პრეზენტაციაზე IDFI აგრეთვე წარმოადგენს მოქალაქეების ჩართულობის პლატფორმის - www.ichange.ge-ს კონცეფციას.  სრულად  წყარო:ორგანიზაციის გვერდი სოციალურ ქსელში

აჭარა. 21 ივნისს, ბათუმის დემოკრატიული ჩართულობის ცენტრში საჯარო შეხვედრა გაიმართა თემაზე - „ქალაქი და მოქალაქეები: ქალაქგანვითარების სოციალური და პოლიტიკური ასპექტები". შეხვედრაზე თბილისიდან მოწვეულმა არქიტექტორმა ვლადიმერ ვარდოსანიძემ იმ შენობა-ნაგებობებზე გაამახვილა ყურადღება, რომლებიც ბოლო წლებში დედაქალაქში აშენდა და დააზიანა ქალაქის სტრუქტურა. მოწვეულმა სტუმარმა ასევე ისაუბრა იმ არქიტექტურულ გადაცდომებზეც, რომლებიც ბათუმის შემთხვევაშია დაშვებული. დისკუსიას ბათუმის მთავარი არქიტექტორიც ესწრებოდა. გიორგი რამიშვილმა ქალაქის განვითარების სოციალურ და პოლიტიკურ ასპექტებში მოქალაქეების ჩართულობის აუცილებლობაზე ისაუბრა. დისკუსია ჰაინრიხ ბიოლის ფონდის სამხრეთ კავკასიის რეგიონალური ბიუროს ინიციატივით გაიმართა.

იმერეთი. 21 ივნისს საერთაშორისო გამჭვირვალობა –  საქართველო სამტრედიის მუნიციპალიტეტის საკრებულოს თავმჯდომარის არჩევნებს აკვირდებოდა. კენჭისყრას ასევე აკვირდებოდნენ არასამთავრობო ორგანიზაციების  („საერთაშორისო გამჭვირვალობა – საქართველო", საია და NDI), სახალხო დამცველის ოფისისა და მედიის წარმომადგენლები. სრულად  წყარო: transparency.ge

თბილისი. საქართველოს ახალგაზრდულმა პარლამენტმა საინფორმაციო ბიულეტენი გამოაქვეყნა. პირველი ბიულეტენი ახალგაზრდული პარლამენტის მიერ მაისის თვეში ჩატარებული ღონისძიებების შესახებ მოიცავს ინფორმაციას. ბიულეტენი  წყარო:ორგანიზაციის გვერდი სოციალურ ქსელში

იმერეთი. 21 ივნისს საქართველოს ახალგაზრდა იურისტთა ასოციაციის ქუთაისის ფილიალში გაიმართა შეხვედრა თემაზე – „საჯარო ადმინისტრაციის რეფორმები ადგილობრივ დონეზე". შეხვედრას დაესწრნენ  სამოქალაქო საზოგადოების, მედიისა და ადგილობრივი თვითმმართველობის წარმომადგენლები. მონაწილეებმა ისაუბრეს აღმოსავლეთის პარტნიორობისა და მისი პლატფორმების, ადგილობრივი თვითმმართველობისა და ამ დონეზე მიმდინარე რეფორმების დადებითი და უარყოფითი მხარეების შესახებ, ასევე დეცენტრალიზაციისა და გამჭვირვალობის შესახებ სახელმწიფო შესყიდვების განხორციელების დროს.  წყარო:ორგანიზაციის გვერდი სოციალურ ქსელში

აჭარა. 21 ივნისს, აჭარის მთავრობამ განვლილი 7 თვის საქმიანობის ანგარიში წარუდგინა საზოგადოებას. შეხვედრას სამთავრობო უწყებებთან ერთად აჭარაში მომუშავე საზოგადოებრივი ორგანიზაციებისა და მედიის წარმომადგენელბიც ესწრებოდნენ. არჩილ ხაბაძე თვლის, რომ ახალი ხელისუფლების მთავარი მონაპოვარი გამჭვირვალობა, ანგარიშვალდებულება, ბიუჯეტის დაგეგმვაში საზოგადოების აქტიური ჩართულობა და მედიის გავლენებისგან გათავისუფლებაა. შეხვედრა აჭარის ტელევიზიის პირდაპირ ეთერში გადაიცემოდა.

კახეთი. სათემო განვითარების ცენტრის და სათემო კავშირ „ნუკრიანის" ორგანიზებით შედგა შეხვედრა ეროვნული ბიბლიოთეკის დირექტორი გიორგი კეკელიძესთან. შეხვედრას დაესწრნენ ნუკრიანის საკვირაო სკოლის ახალგაზრდები და რაიონის სასოფლო ბიბლიოთეკების თანამშრომლები. წყარო:ორგანიზაციის გვერდი სოციალურ ქსელში

აჭარა. 22 ივნისს, ბათუმის დემოკრატიული ჩართულობის ცენტრში საქართველოს დემოკრატიული ინიციატივის ორგანიზებით ტრენინგი ჩატარდა, რომლის თემა იყო დისკრიმინაციის აკრძალვა. ტრენინგი ადამიანის უფლებათა სამართლის სპეციალისტებმა გიორგი მშვენიერაძემ და ბესარიონ ბოხაშვილიმა ჩაატარეს. აღნიშნულ ღონისძიებაში მონაწილეობდნენ ბათუმის შოთა რუსთაველის სახელმწიფო უნივერსიტეტის სტუდენტები, ადგილობრივი საზოგადოებრივი ორგანიზაციებისა და მედიის წარმომადგენლები. ტრენინგი მთელი დღის განმავლობაში გრძელდებოდა და აქცენტი საქართველოს კონსტიტუციაში არსებული დისკრიმინაციის აკრძალვასთნ დაკავშირებული მუხლების განხილვას დაეთმო. 

მცხეთა–მთიანეთი. სამოქალაქო განათლების საზაფხულო ბანაკის მონაწილეები სამოქალაქო განათლების ექსპერტებსა და ორგანიზაცია „საქართველოს ალიანსი უსაფრთხო გზებისთვის" ხელმძღვანელს მშეხვდნენ. ბანაკის 92 მონაწილემ სტუმრებთან ერთად აქტიურ მოქალაქეობრივ პოზიციაზე, სამოქალაქო ჩართულობაზე, ასევე გზებზე უსაფრთხო მოძრაობასა და ალკოჰოლის მოხმარების გავლენაზე ისაუბრეს.  ბანაკს ახორციელებს სიქა PH – International-ის პროგრამა – „სამოქალაქო განათლებისა და პედაგოგთა გადამზადების პროგრამის" – ფარგლებში.  წყარო: ორგანიზაციის გვერდი სოციალურ ქსელში

იმერეთი. 21 ივნისს სამეცნიერო-ინტელექტუალურის კლუბის „თაობათა დიალოგის" გამგეობის თავჯდომარემ საიას ქუთაისის ფილიალის იურისტ ნინო ხუხუასთან ერთად ერთობლივი საინფორმაციო ტიპის შეხვედრა გამართა. შეხვედრას მედიის, არასამთავრობო ორგანიზაციებისა და ადგილობრივ თვითმმართველობის წევრები დაესწრნენ. თემა იყო- საჯარო ადმინისტრაციის რეფორმები ადგილობრივ დონეზე, აღმოსავლეთის პარტნიორობის ქვეყნების გამოცდილების მაგალითზე. წყარო:ორგანიზაციის გვერდი სოციალურ ქსელში