12 მარტს, 12:00 საათზე, არასამთავრობო ორგანიზაცია "ადამიანის უფლებათა სახლი”, ყოფილი პოლიტპატიმრების და ამნისტიის შედეგად გათავისუფლებული პირებისთვის, ღია კარის დღე გამართავს. შეხვედრაზე არასამთავრობო ორგანიზაცია "კონსტიტუციის 42-ე მუხლის” ადვოკატები ისაუბრებენ სამოქალაქო უფლებების შესახებ ნებისმიერ სამართლებრივ საკითხთან დაკავშირებით. მისამართი:თბილისი, მელიტონ ქანთარიას 11ა, ადამიანის უფლებათა სახლის ოფისი

12 მარტს, 16:00 სთ-ზე არასამთავრობო ორგანიზაციების წარმომადგენლები ბრიფინგს გამართავენ. მისამართი:თბილისი, გუდიაშვილის ქ. #7 საქართველოს პარლამენტის ეროვნული ბიბლიოთეკის დარბაზი

12 მარტს, 12:00 სთ-ზე სახალხო დამცველი უჩა ნანუაშვილი  არასამთავრობო ორგანიზაციების წარმომადგენლებს შეხვდება.  მისამართი: გორი, სტალინის ქუჩა #7, დემოკრატიული ჩართულობის ცენტრი

12 მარტს, 14:00 საათზე სამოქალაქო საზოგადოების ინსტიტუტი მართავს საზოგადოებრივი ორგანიზაციების ვებპორტალის - www.csogeorgia.org - პრეზენტაციას. ღონისძიების თანაორგანიზატორია დემოკრატიული ჩართულობის ცენტრი. მისამართი: ქუთაისი, პუშკინის 6, ქუთაისის დემოკრატიული ჩართულობის ცენტრი

თბილისი.საქართველოს ახალგაზრდა იურისტთა ასოციაციამ, ,,საერთაშორისო გამჭვირვალობა საქართველომ" და „საქართველოს ადვოკატები დამოუკიდებელი პროფესიისთვის" სასამართლო რეფორმასთან დაკავშირებით განცხადება გაავრცელეს. ორგანიზაციები მიესალმებიან ვენეციის კომისიის მოსაზრებებს იუსტიციის სამინისტროს მიერ მომზადებულ იმ კანონპროექტთან დაკავშირებით, რომელიც საქართველოში სასამართლო სისტემის რეფორმირებას ისახავს მიზნად. „მიგვაჩნია, რომ ვენეციის კომისიისა და ადგილობრივი არასამთავრობო სექტორის პოზიციების გათვალისწინებით, უნდა გამოინახოს იმის რესურსი, რომ ზემოაღნიშნული მნიშვნელოვანი კანონპროექტი სასამართლო ხელისუფლების, მთავრობის, საპარლამენტო უმრავლესობისა და უმცირესობის პოზიციების მაქსიმალურად დაახლოებისა და შეთანხმების გზით იქნეს მიღებული და არა მწვავე დაპირისპირების რეჟიმში. მისასალმებელია, რომ ამ მხრივ გარკვეული დადებითი ტენდენციები არსებობს და ჩვენის მხრივ, გამოვთქვამთ მზაობას, რომ ამ პროცესს შეძლებისდაგვარად ხელი შევუწყოთ", ნათქვამია განცხადებაში. სრულად წყარო:gyla.ge

თბილისი.საქართველოს იურისტთა ასოციაციამ საჯარო დაწესებულებებში პრემიების გაცემასთან დაკავშირებით განცხადება გაავრცელა. „მიგვაჩნია, რომ საჯარო დაწესებულებებში დასაქმებულ პირთათვის პრემიების გაცემის არსებული პრაქტიკა, როგორც აღმასრულებელი ისე საკანონმდებლო ხელისუფლების მხრიდან სათანადო ქმედითი ნაბიჯების გადადგმას საჭიროებს. კერძოდ, აუცილებელია როგორც შესაბამისი საკანონმდებლო ცვლილებების მომზადება და მიღება, ისე საჯარო დაწესებულებების მხრიდან პრემიის გაცემის ობიექტური და გამჭვირვალე რეგულაციების შემუშავება და დანერგვა. ამასთან, აღნიშნული პროცესი სამოქალაქო საზოგადოების წარმომადგენელთა ჩართულობით უნდა წარიმართოს", ნათქვამია განცხადებაში. იურისტთა ასოციაცია მოუწოდებს ყველა შესაბამის დაწესებულებას დროულად შეიმუშაონ პრემიის გაცემის გამჭვირვალე და ობიექტური რეგულაციები. ხოლო ამგვარი რეგულაციების შემუშავებამდე თავი შეიკავონ პრემიის გაცემის არსებული პრაქტიკის გამოყენებისგან. სრულად წყარო:ორგანიზაციის გვერდი სოციალურ ქსელში

თბილისი. 9 მარტს, ფონდი „ღია საზოგადოება - საქართველოს" მხარდაჭერით გაიმართა კონფერენცია – „გარდამავალი პერიოდის მართლმსაჯულება საქართველოში". მას ესწრებოდნენ საქართველოს პარლამენტისა და მთავრობის წევრები, დიპლომატიური კორპუსის, საერთაშორისო და ადგილობრივი ორგანიზაციების წარმომადგენლები. კონფერენციის სტუმრები იყვნენ ღია საზოგადოების ფონდების საპატიო პრეზიდენტი,  Human Rights Watch-ისა და არაერთი გავლენიანი საერთაშორისო ადამიანის უფლებათა ორგანიზაციის დამფუძნებელი - არიე ნაიერი და ევროპის საბჭოს ადამიანის უფლებათა ყოფილი კომისარი და ამჟამად ევროკავშირის სპეციალური მრჩეველი იურიდიული და კონსტიტუციური რეფორმებისა და ადამიანის უფლებების სფეროში -  თომას ჰამერბერგი. კონფერენციის მსვლელობისას განხილულ იქნა გარდამავალ მართლმსაჯულებასთან დაკავშირებული საკითხები, საქართველოს გამოწვევები და საერთაშორისო გამოცდილება. სრულად წყარო:www.osgf.ge

თბილისი. ჰაინრიჰ ბიოლის ფონდის სამხრეთ კავკასიის რეგიონალურმა ბიურომ  ვებ-დოსიე გამოაქვეყნა, რომელიც აღწერს სამხრეთ კავკასიის ქვეყნებში არსებული ვითარებისა და ტენდენციების განსხვავებულ სურათს, ლგტბ ადამიანების მდგომარეობას. ჟურნალისტ სილვია შტობერის კვლევა გვიჩვენებს, რომ საბჭოთა კავშირის დაშლის შემდეგ სამივე ქვეყანამ პოლიტიკური, კულტურული თუ რელიგიური მოვლენების ფონზე განვითარების სხვადასხვა რთული ეტაპი გაიარა. როგორც კვლევაში მოყვანილი მაგალითებიდან ჩანს, ყოფილი საბჭოთა კავშირის რესპუბლიკებში მცხოვრები სექსუალური უმცირესობები დღემდე უამრავ სირთულეს აწყდებიან. ვებდოსიე (ინგლისური) ვებ–დოსიე (ქართული) წყარო:ორგანიზაციის გვერდი სოციალურ ქსელში

აისეკის ორგანიზებით პირველად საქართველოში Youth to Business Forum Georgia გაიმართება. კონფერენციაზე სტუდენტები და ბიზნეს სექტორის წარმომადგენლები და განიხილავენ საქართველოსთვის აქტუალური თემებს,რაც ახალ იდეებსა და წამოწყებებს ჩაუყრის საფუძველს.  ორდღიან კონფერენციაში მონაწილეობის მისაღებად შეავსეთ აპლიკაცია. წყარო:ორგანიზაციის გვერდი სოციალურ ქსელში

თბილისი.8  მარტს, ორგანიზაცია „კონსტიტუციის 42-ე მუხლმა", ქალთა საერთაშორისო დღე ტურბაზა „დიღომში" მცხოვრებ ლტოლვილ ქალბატონებს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს წარმომადგენლებთან ერთად  მიულოცა. კონსტიტუციის 42–ე მუხლმა გაუწია იურიდიული კონსულტაცია ადამიანთა უფლებების, კონკრეტულად კი ქალთა უფლებების შესახებ და მიაწოდა მათთვის საინტერესო და აუცილებელ სამართლებრივ საკითხებზე საჭირო ინფორმაცია და იძულებით გადააადგილებულ ქალბატონებს ქალთა უფლებების შესახებ ბუკლეტები და სამახსოვრო საჩუქრები გადასცა. შეხვედრა ჩატარდა, „კონსტიტუციის 42-ე მუხლის" ორგანიზებით პროექტის ფარგლებში „ქალთა სამართლებრივი გზამკვლევის განახლება", რომელიც ხორციელდება გერმანიის ტექნიკური თანამშრომლობის საზოგადოებისა (GIZ) და გაეროს ქალთა ფონდის (UN Woman) მხარდაჭერით. წყარო:ორგანიზაციის გვერდი სოციალურ ქსელში

თბილისი.11 მარტს საქართველოს უნივერსიტეტში 2013 წლის მოწვევის ახალგაზრდული პარლამენტის პრეზენტაცია გაიმართა. პრეზენტაციას 30 სტუდენტი ესწრებოდა,რომლებმაც მიიღეს ინფორმაცია, თუ რას გულისხმობდს 2013 წლის მოწვევის ახალგაზრდული პარლამენტი და როგორ უნდა მოხდეს ახალგაზრდების ჩართვა პროექტში. წყარო:ორგანიზაციის გვერდი სოციალურ ქსელში

თბილისი. ფემინისტების დამოუკიდებელმა ჯგუფმა 8 მარტს პუშკინის სკვერიდან ფილარმონიამდე მშვიდობიანი აქცია–მსვლელობა მოაწყო. აქციის ლოზუნგი იყო „შემოგვიერთდი, თუ იბრძვი რეალური თანასწორობისათვის". აქციის 100–მდე მონაწილე ქალთა შრომით უფლებებსა და მათ საზოგადოებაში ემანსიპაციას უჭერდა მხარს. წყარო: ginsc.net

აჭარა. 9 მარტს, ბათუმის დემოკრატიული ჩართულობის ცენტრში სსიპ ბავშვთა და ახალგაზრდობის განვითარების ფონდმა აჭარის რეგიონში მოქმედ არასამთავრობო ორგანიზაციებს ფონდის საქმიანობა გააცნო. შეხვედრაზე ასევე 2013 წლის პირველ საგრანტო კონკურსთან დაკავშირებულ სიახლეებზე, პროგრამულ პრიორიტეტებზე გამახვილდა ყურადღება.

კახეთი. გურჯაანში,საინიციატივო ჯგუფმა ,,სიკეთე ჩვენი ვალია" საზოგადოებას ერთწლიანი წლიანი ანგარიში წარუდგინა. შეხვედრას ესწრებოდნენ არასამთავრობო სექტორისა და თვითმმართველობის წარმომადგენლები. ჯგუფის ერთ–ერთი ლიდერის, გიორგი მამულაშვილის თქმით, გასულ წელს 30–მდე აქტივობა განახორციელეს: ,,გარდა იმისა, რომ დამსწრე საზოგადოებას ჩავაბარეთ ერთწლიანი ანგარიში, ასევევ ვისაუბრეთ ჩვენს სამომავლო გეგმბზე. ვაგრძელებთ მუშაობას და ახლო მომავალში უფრო აქტიურად განვაგრძობთ ჩვენს საქმიანობას". საინიციატივო ჯგუფი გურჯაანის მუნიციპალიტეტის რამდენიმე სოფელში ახალგაზრდული ცენტრების შექმნას გეგმავს.

თბილისი. „საერთაშორისო გამჭვირვალობა – საქართველომ"  საყოველთაო ჯანმრთელობის დაცვის სახელმწიფო პროგრამასთან დაკავშირებით პრობლემები და რეკომენტაციები გამოაქვეყნა. საყოველთაო ჯანმრთელობის დაცვის პროგრამა ორ მიმდინარე სახელმწიფო სადაზღვევო პროგრამას დაემატა და მოქალაქეთა მასობრივ დაზღვევას გულისხმობს. რა არის პოზიტიური საყოველთაო ჯანმრთელობის დაცვის პროგრამაში?  რა არის პრობლემატური საყოველთაო ჯანმრთელობის დაცვის პროგრამაში?  რა არის პროგრამის მართვასთან დაკავშირებული გამოწვევები? ამ კითხვებს ორგანიზაციის მიერ გამოქვეყნებული ბლოგპოსტი პასუხობს.  სრულად წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა პარლამენტიდან მიღებული სხვადასხვა სახის საჯარო ინფორმაცია გამოაქვეყნა. ინსტიტუტის ვებგვერდზე დეტალური ინფორმაციაა ქუთაისში ბინების ქირაობის ხარჯების, პრემიების, სამივლინებო და ავტოპარკის ხარჯების, სახელმწიფო შესყიდვებისა და ტენდერების შესახებ. ინფორმაციის თავისუფლების განვითარების ინსტიტუტის მიერ გამოქვეყნებულ ინფორმაციას განცხადებით გამოეხმაურა პარლამენტის თავმჯდომარე. დავით უსუფაშვილი მიესალმება არასამთავრობო ორგანიზაციების დაინტერესებას სახელმწიფო დაწესებულებების მიერ საბიუჯეტო სახსრების ხარჯვის მიზანშეწონილობის და კანონიერების საკითხებით.   ინფორმაციის თავისუფლების განვითარების ინსტიტუტის ინფორმაცია სრულად პარლამენტის თავმჯდომარის გამოხმაურება წყაროები: ინფორმაციის თავისუფლების განვითარების ინსტიტუტის გვერდი სოციალურ ქსელში, საქართველოს პარლამენტის ვებგვერდი

აჭარა. 9 მარტს, ბათუმის დემოკრატიული ჩართულობის ცენტრში, აჭარის ავტონომიური რესპუბლიკის ფინანსთა და ეკონომიკის სამინისტრომ  არასამთავრობო ორგანიზაციების წარმომადგენლებს და სხვა დაინტერესებულ პირებთან შეხვედრა  გამართა. სადაც აჭარის ავტონომიური რესპუბლიკის მთავრობის იმ ინიციატივის პრეზენტაცია გაიმართა, რომელიც აჭარის ა.რ. ბიუჯეტის დაგეგმვის პროცესში საზოგადოების ჩართულობის გაძლიერებას შეეხება. შეხვედრის მიზანი საზოგადოების ინფორმირება და სამოქალაქო მექანიზმების განხილვა იყო. შეხვერდას, აჭარის ავტონომიური რესპუბლიკის ფინასნთა და ეკონომიკის მინისტრის მოადგილე რამაზ ბოლქვაძე უძღვებოდა. ღონისძიებაზე განხილულ იქნა ბიუჯეტის ფორმირების პროცესში დაინტერესებულ მხარეთა  ჩართულობის უზრუნველყოფა. რამაზ ბოლქვაძის განცხადებით, მთავრობის მიზიანია შეიმუშაოს მოქალაქეთა საჭიროებებზე ორიენტირებული ეფექტური ბიუჯეტი.

თბილისი. კოალიცია „დამოუკიდებელი და გამჭვირვალე მართლმსაჯულებისთვის" საქართველოს პრემიერ მინისტრისა და  საქართველოს უზენაესი სასამართლოს თავმჯდომარის, კოტე კუბლაშვილის შეხვედრას ეხმიანება. „ჩვენ დადებითად ვაფასებთ აღნიშნული შეხვედრის ჩატარების ფაქტს და ვფიქრობთ, რომ ეს წინგადადგმული ნაბიჯია საქართველოში დამოუკიდებელი და ეფექტური მართლმსაჯულების სისტემის ჩამოსაყალიბებლად", ნათქვამია განცხადებაში. კოალიციას მიაჩნია, რომ სასამართლოს სისტემის რეფორმირება არ უნდა მიმდინარეობდეს კონფლიქტურ გარემოში და დაინტერესებულ მხარეთა მონაწილეობის  გარეშე, რადგან საზოგადოების უმთავრესი ინტერესი სწორედ მიუკერძოებელი და ეფექტური სასამართლო სისტემის ჩამოყალიბებაა.  სრულად წყარო: transparency.ge

შიდა ქართლი. 9 მარტს, გორში, არასამთავრობო ორგანიზაციამ მეგობრობის ხიდი „ქართლოსმა” გამართა რადიოდისკუსის - „ქართლოსის ხმა”  –აუდიო ჩაწერა. პროექტი დაფინანსებულია რობერტ ბოშის და გერმან მარშალის ფონდის მიერ პროგრამის - შავი ზღვის კონსორციუმი რეგიონალური თანამშრომლობისათვის -  ფარგლებში.დისკუსიას უძღვებოდა ჟურნალისტი გოგა აფციაური, ხოლო მონაწილეობას იღებდნენ გიორგი კანაშვილი - კავკასიური სახლის აღმასრულებელი დირექტორი და მალხაზ მინდიაშვილი - შიდა ქართლის დემოკრატიული განვითარების ინსტიტუტის ხელმძღვანელი.დისკუსიის მიმდინარეობისას განხილულ იქნა რამდენიმე საკითხი: ქართულ-რუსული დიალოგი, სახალხო დიპლომატიის როლი კონფლიქტების მოგვარებაში და მისი პერსპექტივები, ქართულ-ოსური დიალოგი.დისკუსიის ჩანაწერი გადაიცემა რეგიონული რადიოკომპანიის  - „თრიალეთის” ეთერში.

თბილისი. ინფორმაციის თავისუფლების განვითარების ინსტიტუტმა საქართველოს მთავრობის კანცელარიის შესახებ სხვადასხვა სახის ინფორმაცია გამოაქვეყნა. მათ შორისაა დოკუმენტები პრემიების, სამივლინებო ხარჯების, საჯარო ინფორმაციის გაცემის ანგარიშების, თანამშრომლების, ავტოპარკზე გაწეული ხარჯებისა და თანამდებობის პირების ბიოგრაფიული მონაცემების შესახებ.  სრულად წყარო:ორგანიზაციის გვერდი სოციალურ ქსელში

აჭარა. 8 მარტის დღესასწაულთან დაკავშირებით ასოციაცია „ღირსეული სიბერეს" მოხალისეებმა სოციალურად დაუცველ 30 ხანდაზმულ ქალბატონს ქალთა დღე მიულოცეს და ადგილობრივი შემოწირულობებით შეძენილი სასურსათო პაკეტები გადასცეს. პროექტის „ხანდაზმულთა სოციალური ცენტრის" ფარგლებში (დონორი – ევროკავშირი) შექმნილია მოხალისეთა ჯგუფები, რომლებიც ჩართული არიან საქველმოქმედო აქციებში, მარტოხელა მოხუცებს კი საყოფაცხოვრებო და ფსიქოლოგიურ დახმარებას უწევენ. წყარო:ორგანიზაციის გვერდი სოციალურ ქსელში

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში 6 მარტს ჭიათურის 4 საჯარო სკოლაში პროექტის – „სკოლის ეზო–სარგებელი სკოლას" – პრეზენტაცია მოეწყო. მცირე საგრანტო კონკურსში გამარჯვებული პროექტის მიზანია სკოლის ეზოში არსებული საფრთხეების თავიდან აცილება, კერძოდ სკოლის ეზოს შემოღობვა და დაჭაობებული ადგილის სკოლის სასარგებლოდ გამოყენება (სათბურის აშენება). პრეზენტაციას სკოლის მოსწავლეები და მასწავლებლები ესწრებოდნენ.  წყარო:ორგანიზაციის გვერდი სოციალურ ქსელში