15 თებერვალს, 12:00 საათზე ახალგაზრდა იურისტთა ასოციაცია და სამართლიანი არჩევნები ადგილობრივ თვითმმართველობებში განვითარებული მოვლენების შესახებ ერთობლივ პრესკონფერენციას გამართავენ. მისამართი: თელავი, ბარნოვის 10.

შიდა ქართლი. 14 თებერვალს, საქართველოს ახალგაზრდა იურისტთა ასოციაციის გორის ოფისში, გაიმართა იუსტიციის სამინისტროს მიერ შემუშავებული ორგანული კანონის - საქართველოს შრომის კოდექსის პროექტის განხილვა. პროექტი შემუშავებულია იუსტიციის სამინისტროს მიერ და უკვე გადაგზავნილია პარლამენტში, მაგრამ ჯერ არ დაწყებულა საკომიტეტო განხილვები.  შეხვედრის მიზანი იყო საზოგადოების აზრის გაგება აღნიშნული პროექტის მიმართ, ვინაიდან საია აპირებს გარკვეული რეკომენდაციების შემუშავებას და მათ მიწოდებას პარლამენტისთვის. შეხვედრას ესწრებოდნენ ადგილობრივი და საერთაშორისო საზოგადოებრივი ორგანიზაციების წარმომადგენლები. განხილვა მიმდინარეობდა უკვე არსებული კოდექსის და ახლადშემუშავებული პროექტის შედარების მეთოდით. ცვლილების ირგვლივ გაიმართა მსჯელობა და ჩამოყალიბდა დამსწრეთა აზრით,  შესწორებების შეტანის ნუსხა.

თბილისი. ინფორმაციის თავისუფლების განვითარების ინსტიტუტმა სამთავრობო დაწესებულებების ელექტრონული კომუნიკაციის სტრატეგიის შესახებ კვლევა გამოაქვეყნა. საჯარო დაწესებულებების  მოქალაქეებთან ურთიერთობის სტრატეგიის, ელექტრონული რესურსების გამოყენების ხარისხის და კომუნიკაციის დონის შეფასების მიზნით IDFI–მ კვლევა სამთავრობო უწყებებიდან მოთხოვნილი საჯარო ინფორმაციის ანალიზის საფუძველზე მოამზადა. „საჯარო დაწესებულებების მხრიდან სათანადო ყურადღება არ ეთმობა ვებ-გვერდებზე არსებულ საკომუნიკაციო საშუალებებს, უმეტეს შემთხვევებში არ ხდება ელ-ფოსტითა და ვებ-გვერდზე ინტეგრირებული მიწერის ფუნქციით საჯარო დაწესებულებებში შესული წერილების აღრიცხვა, სამთავრობო უწყებები ხშირად არც მათი ვებ-გვერდების მომხმარებელთა რაოდენობით ინტერესდებიან. საჯარო დაწესებულებების უმეტესობას არ აქვს შემუშავებული საზოგადოებასთან ურთიერთობის სტრატეგიული გეგმა", ნათქვამია ორგანიზაციის ვებ–გვერდზე.  კვლევა წყარო:idfi.ge

სამეგრელო. ასოციაცია „ათინათში" სამოქალაქო განათლებისა და პედაგოგთა გადამზადების პროგრამის ფარგლებში გაიმართა ვიდეორგოლის ჩვენება: „უსაფრთხო ინტერნეტი – სასარგებლო ინფორმაციის კიდობანია". კლუბის წევრებმა ზუგდიდში ცნობილ ადამიანებთან ჩაწერეს მოკლე ინტერვიუები, სადაც ისინი ინტერნეტის უსარფხოების შესახებ მსჯელობენ. ვიდეორგოლის ჩვენების შემდეგ გაიმართა დისკუსია ინტერნეტის უსარფრთხოების შესახებ. დისკუსიისა და ვიდეორგოლის მომზადების მიზანი იყო საზოგადოებაში უსაფრთხო ინტერნეტის პოპულარიზაცია და ინტერნეტის მომხმარებლის ვალდებულების და პასუხისმგებლობის შესახებ ინფორმაციის გავრცელება. წყარო: civics.ge ვიდეორგოლი – უსაფრთხო ინტერნეტი – სასარგებლო ინფორმაციის კიდობანია

თბილისი. ორგანიზაცია „რადარამი" აგრძელებს ტრადიციას და თებერვლის ბოლოს გეგმავს წიგნის „გარდატეხა: როგორ გავატაროთ ცვლილება, როცა ეს ასე რთულია" გამოცემას და პრეზენტაციას. ჩიპ და დენ ჰითების წიგნის პრეზენტაცია თებერვლის ბოლოს ზუგდიდში გაიმართება. წიგნი ცვლილებებისა და ნებისყოფის ანატომიას ეძღვნება. ნაწყვეტი:  „...არ დაიჯეროთ, ვინმე თუ გეტყვით, რომ ცვლილება იმიტომ ვერ მოხერხდა, რომ ადამიანები ზარმაცები არიან და ცვლილებებს ეწინააღმდეგებიან. პირიქით, წარუმატებლობის მიზეზი ხშირად სრულიად საპირისპირო რამ არის: ცვლილების განხორციელება რთულია იმიტომ, რომ მისი განხორცილების პროცესში ადამიანები ისე იღლებიან, დაწყებული საქმის დასამთავრებლად უბრალოდ ენერგია აღარ ჰყოფნით..." წყარო: ორგანიზაციის გვერდი სოციალურ ქსელში

თბილისი. ფონდი„ღია საზოგადოება-საქართველოს" მხარდაჭერით, ორგანიზაცია „B და C  ჰეპატიტის პაციენტთა გაერთიანება" 2011 წლიდან ახორციელებს პროექტს „ვიცხოვროთ ტკივილის გარეშე". კამპანიის მიზანია, შეიქმნას ისეთი გარემო, სადაც ყველა მოქალაქეს მიუწვდება ხელი ტკივილის შემამსუბუქებელ ეფექტურ და თანამედროვე საშუალებებზე. პროექტის ფარგლებში 1 თებერვალს გაიმართა ქუჩის აქციები, რომლის მიზანიც იყო მოსახლეობაში პროექტის პოპულარიზაცია და საზოგადოებისთვის მათი უფლების – ტკივილის გარეშე ცხოვრების უფლების გაცნობა. აქცია ერთდროულად თბილისის რამდენიმე ადგილას გაიმართა და მასში მონაწილეობას იღებდნენ უმაღლესი სასწავლებლების სტუდენტები. წყარო: osgf.ge

შიდა ქართლი. ცენტრმა „აფხაზეთმა", გორის ოფისში, პროექტის – „შემოსავლების გენერირებისა და ბიზნესის მხარდაჭერის ინიციატივის" პროექტის შესაძლო ბენეფიციარებს ტრენინგი ჩაუტარა. ტრენინგის მონაწილეებმა ინფორმაცია მიიღეს ისეთ საკითხებზე, როგორიცაა: მარკეტინგისა და ბიზნესის საფუძვლები, ბიზნეს გეგმის შედგენა, სესხის ეფექტური მართვა და სხვა. ტრენინგის დასასრულს მონაწილეებმა მათ მიერ წარმოდგენილი ბიზნეს იდეები დაამუშავეს და ბიზნეს გეგმები შეიმუშავეს, რომელთა საფუძველზე მათთვის სესხის დამტკიცება მოხდება. წყარო: ორგანიზაციის გვერდი სოციალურ ქსელში

თბილისი. IREX G-MEDIA-ის მიერ დაფინანსებული პროექტის ფარგლებში მაუწყებლობს სამოქალაქო ინტერნეტ მაუწყებლობა „ნაკადი". იგი დაინტერესებულ არასამთავრობო ორგანიზაციებსა და პირებს ინფორმაციის მოძიების, მიღებისა და გავრცელებისათვის ახალი შესაძლებლობის გამოყენების  საშუალებას აძლევსა. „ნაკადი" არასამთავრობო ორგანიზაციებს აქტივობების შეუზღუდავ და ონლაინ ტელე–მაუწყებლობის საშუალებით პირდაპირ ეთერს სთავაზობს. რაც ერთის მხრივ ხელს უწყობს ორგანიზაციების საქმიანობის გავრცელებას, ახალი საინფორმაციო–საკომუნიკაციო ტექნოლოგიების დანერგვას.  წყარო: livestream.com/nakadi

თბილისი. საერთაშორისო გამჭვირვალობა – საქართველო შრომის კოდექსში დაგეგმილი ცვლილებების შესახებ მიმოხილვას აქვეყნებს. ორგანი ზაცია მიესალმება იუსტიციის სამინისტროს ინიციატივას და მიიჩნევს, რომ ცვლილებებისა და დამატებების მიღება საგრძნობლად გააუმჯობესებს დასაქმებულთა უფლებებს, თუმცა საერთაშორისო გამჭვირვალობა – საქართველო მიიჩნევს, რომ არსებობს რამდენიმე მნიშვნელოვანი საკითხი, რომელიც დახვეწას საჭიროებს.იმისათვის, რომ საზოგადოებას სრული ინფორმაცია ჰქონდეს რა იცვლება შრომის კანონმდებლობაში, ორგანიზაცია დეტალურ მიმოხილვას აქვეყნებს. მიმოხილვა – შრომის კოდექსში დაგეგმილი ცვლილებები წყარო: transparency.ge

აჭარა. 13 ინავარს, ბათუმის დემოკრატიული ჩართულობის ცენტრში „დემოკრატიის ინსტიტუტმა" სერვისების მომხმარებელთა უფლებების დაცვის სისტემის პირველადი მონიტორინგის შედეგების პრეზენტაცია გამართა. მომსახურების სერვისების მომხმარებელთა უფლებების დაცვის კამპანის პროექტი გასული წლის ნოემბერში დაიწყო და მომხმარებელთა უფლებების დაცვასთან ერთად, მომსახურების სერვისების დახვეწას ისახავს მიზნად.  აჭარის რეგიონში მოქმედი მომსახურების სერვისებზე ინფორმაციის შეგროვების მიზნით, სერვისის მომწოდებელ კომპანიებში ოფიციალური წერილები გაიგზავნა. რათა მათთან არსებული მომხმარებელთა უფლებების დაცვის კუთხით არსებული პრაქტიკის შესახებ მიეღო ორგანიზაციას ინფორმაცია. თუმცა რამდენიმე კომპანიამ აღნიშნულ საკითხზე ინფორმაცია ვერ მიაწოდა. შეხვედრა–დისკუსიაზე მსჯელობა გაიმართა კომპანიებში არსებულ პრაქტიკაზე. ასევე ორგანიზაციის მიერ მომსახურების სერვისებზე ჩატარებულ გამოკითხვის შედეგებზე. შეხვედრაზე შეიქმნა სამუშაო ჯგუფები, რომლებიც ამ საკითხებზე რეკომენდაციებისა და საკანონმდებლო ცვლილებების მიმართულებით იმუშავებენ.

14 თებერვალს 15:00 საათზე „ქალთა ფონდი საქართველოში" და „იდენტობა" აქცია–პერფორმანსს "ერთი მილიარდი ქალი ქალებზე ძალადობის წინააღმდეგ”  გამართავს. აქციით საქართველო მსოფლიოში დაგეგმილ კამპანიას „One Billion Rising”, უერთდება, რომელიც მოუწოდებს მილიონობით ქალს გამოვიდნენ სახლებიდან, სამსახურებიდან და გაერთიანდნენ იმისთვის, რომ ცეკვის საშუალებით ხმა აიმაღლონ სამართლიანობის აღდგენის, ძალადობის დაგმობისა და გენდერული თანასწორობისთვის.  მისამართი:თბილისი, მეტრო რუსთაველი დაგეგმილი ღონისძიებების სრული ჩამონათვალი 

14 თებერვალს 15:00 საათზე ინფრომაციის თავისუფლების განვითარების ინსტიტუტი გიწვევთ გამოფენაზე „1937–1938 წლის რეპრესიები : „სტალინური სიები" საქართველოზე"  მისამართი:ქალაქი რუსთავი, მშენებელთა ქუჩა № 17. რუსთავის ისტორიის მუზეუმი

14 თებერვალს, 15:00 საათზე, „თავისუფალ ჟურნალისტთა სახლი" გამართავს დისკუსიას თემაზე: აჭარის უმაღლესი საარჩევნო კომისიის დაკომპლექტების წესის შესახებ. მისამართი: ბათუმი,  მელაშვილის და საბაჟოს შესახვევი 1–2. პრესკაფე

თბილისი.ინფორმაციის თავისუფლების განვითარების ინსიტუტმა თავდაცვის სამინისტროდან მიღებული სხვადასხვა სახის საჯარო ინფორმაცია გამოაქვეყნა. დოკუმენტები თავდაცვის სამინისტროში გაცემულ პრემიებს, სამინისტროს ღონისძიებების ჩამონათვალსა და ხარჯთაღრიცხვას, მინისტრის ოფიციალურ და სამუშაო ვიზიტებზე გაწეულ ხარჯებს, თანამდებობის პირების ბიოგრაფიულ მონაცემებს, 20 ოქტომბრიდან სამინისტროში დანიშნული თანამშრომლების, ავტოპარკის შესახებ ინფრომაციას მოიცავს.  სრულად წყარო:ორგანიზაციის გვერდი სოციალურ ქსელში

13 თებერვალს, 19:00 საათზე საქართველოს ჟურნალისტური ეთიკის ქარტია გამართავს დისკუსიას. თემა: „უწყობს თუ არა ხელს მედია სექსუალური უმცირესობების მიმართ სტერეოტიპული დამოკიდებულების ჩამოყალიბებას?"მისამართი: თბილისი, კალისტრატე ცინცაძის 6–7, ჟურნალისტური ეთიკის ქარტიის ოფისი

სამეგრელო. სამეგრელო–ზემო სვანეთის სამხარეო ადმინისტრაციაში, 13 თებერვალს,  საქართველოს რეგიონული განვითარების და ინფრასტრუქტურის მინისტრის მოადგილე თენგიზ შერგელაშვილი მუნიციპალიტეტების გამგებლებს, საერთაშორისო და არასამთავრობო ორგანიზაცებს შეხვდა. შეხვედრას ესწრებოდნენ გაეროს განვითარების პროგრამის წარმომადგენლები, რომლებიც აქტიურად არიან ჩართულები რეგიონის განვითარების გეგმის შემუშავებაში. შერგელაშვილმა  რეგიონული განვითარების სტრატეგიასა და  დასაფინანსებელი პროექტების შერჩევის კრიტერიუმებზე ისაუბრა. მან პრიორიტეტულად მიიჩნია ისეთი პროექტების დაფინანსება, რომლებიც სასმელი წყლით მომარაგებას, გზების მშენებლობას, ნაპირსამაგრი სამუშაოების განხორციელებას ითვალისწინებს. მინისტრის მოადგილემ მოუწოდა საერთაშორისო და ადგილობრივი არასამთავრობო ორგანიზაციების წარმომადგენლებს რეგიონული პროექტების განხორციელების საკითხში მეტი ჩართულობისკენ.  

შიდა ქართლი. 9–10 თებერვალს, სამოქალაქო განვითარების ინსტიტუტის „ბავშვზე ორიენტირებული სკოლის ადვოკატირების" პროექტის ფარგლებში, გორში გაიმართა ტრენინგი: „კლასის მართვის თეორიული და პრაქტიკული ასპექტები". ტრენინგი მიმდინარეობდა აკრედიტებული მოდულის შესაბამისად. მრავალფეროვან სატრენინგო მასალასთან ერთად მონაწილეებს დაურიგდა ინსტიტუტის მიერ მომზადებული წიგნი –  „ბავშვზე ორიენტირებული სკოლის გზამკვლევი". წყარო: cdi.org.ge

13 თებერვალს, 15:00 საათზე თბილისის ადამიანის უფლებათა სახლი, ორგანიზაცია „დამოუკიდებელი ცხოვრების ახალგაზრდული ცენტრის“ წარმომადგენლებთან ერთად გამართავს პრესკონფერენციას. სადაც ისაუბრებენ შშმ პირები და მათი ადვოკატები მიმდინარე სასამართლო დავების შესახებ ისაუბრებენ. მისამართი: თბილისი, ჭოველიძის 10, ფონდი ღია საზოგადოება – საქართველო

თბილისი. "ევროკავშირის პრიზი ჟურნალისტიკაში 2012"“ გამარჯვებულები გამოვლინდნენ. საუკეთესო საგამოძიებო სტატიისთვის პრიზი "Georgia Today"-ს ჟურნალისტმა, მაია ედილაშვილმა მიიღო. პრიზი საუკეთესო ტელე და რადიო რეპორტაჟში კი სტუდია "მონიტორის" ჟურნალისტმა, სალომე ცეცხლაძემ. საუკეთესო ვებგვერდის, ბლოგისა და სოციალური ქსელის პროფილისთვის, ბლოგერი გიორგი კიკონიშვილი დაჯილდოვდა. წყარო:Media.ge

თბილისი. ეროვნულ ბიბლიოთეკასთან პარასკევს განვითარებული მოვლენები, რომლებიც პრეზიდენტის გამოსვლას უკავშირდებოდა, საქართველოს უმსხვილესმა ტელეკომპანიებმა ფართოდ გააშუქეს. საერთაშორისო გამჭვირვალობა - საქართველომ ყურადღება გაშუქების ასპექტებზე გაამახვილა და 12 თებერვალს ამ საკითხზე გავრცელებულ ინფორმაციაში ნათქვამია, რომ ზოგიერთი ტელეკომანიის მიერ მომზადებული სიჟეტები მიკერძოებული იყო. "ძველმა ჩვევებმა ტელემაუწყებლებსაც შეახსენა თავი, რაც საბოლოო ჯამში პოლიტიკურად მიკერძოებულ გაშუქებაში გამოიხატა."მეცხრე არხმა" და "იმედმა" უკვე დამონტაჟებულ სიუჟეტებში დაპირისპირება "ქართული ოცნების" სასარგებლოდ, „"რუსთავი 2”"-მა კი "ნაციონალური მოძრაობის" სასარგებლოდ გააშუქა. "მაესტრომ" და "საზოგადოებრივმა მაუწყებელმა" მაყურებელს მეტნაკლებად დაბალანსებული რეპორტაჟები შესთავაზეს", ნათქვამია ინფორმაციაში. სრულად  წყარო: transparency.ge

თბილისი. "კივიტას გეორგიკამ" სკოლამდელი განათლების მდგომარეობასა და საკანონმდებლო ინიციატივებზე შეხვედრა გამართა. შეხვედრის მონაწილეებმა ისაუბრეს ალტერნატიული ბაღების მნიშვნელობაზე, სკოლამდელი განათლების ხარისხზე, პროგრამაზე, ბავშვისა და პედაგოგის საჭიროებებსა და სკოლამდელი განათლების მუნიციპალურ სტრატეგიებზე. შეხვედრას საპარლამენტო უმრავლესობის წევრი თინა ხიდაშელი ესწრებოდა, რომელმაც სკოლამდელი განათლების რეგულირების მიზნით საკანონმდებლო ინიციატივაზე და მოსალოდნელ ცვლილებებზე ისაუბრა, რომლის მიხედვითაც  სკოლამდელი განათლება საყოველთაო და უნივერსალური უნდა გახდეს. პროექტი, რომლის ფარგლებშიც აღნიშნული შეხვედრა მოეწყო, გაეროს ბავშვთა ფონდის დაფინანსებით ხორციელდება. წყარო: civitas.ge

თბილისი. თავისუფალი დებატების ლიგა სტუდენტებს იწვევს საქართველოს ჩემპიონატზე პოლიტიკური ფორმატის დებატებში. მონაწილეობის მსურველებს შეუძლიათ როგორც გუნდური, ასევე ინდივიდუალური აპლიკაციის გაგზავნა.  აპლიკაციების მიღების ბოლო ვადაა 25 თებერვალი სრულად წყარო: ორგანიზაციის გვერდი სოციალურ ქსელში