თბილისი. არასამთავრობო ორგანიზაციებმა წამების მსხვერპლი პატიმრებისა და მათი ოჯახის წევრებისადმი მიმართვა გაავრცელეს.  „არასამთავრობო ორგანიზაციები მივმართავთ ნაწამებ პატიმრებს,  ყოფილ პატიმრებს, პრობაციონერებსა და მათი ოჯახების წევრებს და მოვუწოდებთ, თავადაც დაიწყონ აქტიური მოქმედება შელახული უფლებებისა და ღირსების აღსადგენად. ჩვენ, ჩვენის მხრიდან კი გამოვთქვამთ მზაობას ამა თუ იმ ფორმით აღმოგიჩინოთ დახმარება და ხელი შევუწყოთ პრობლემის სამართლიან გადაწყვეტას." ნათქვამია განცხადებაში. არასამთავრობოები წამებისა და არასათანადო მოპყრობის ფაქტების ეფექტური გამოძიებისათვის, წამების მსხვერპლ პატიმრებს მოუწოდებენ თავად მიმართონ დამოუკიდებელ სასამართლო ექსპერტიზას, რათა დროულად მოხდეს წამებისა და ძალადობის ნიშნებისა და კვალის აღწერა და დოკუმენტალურად დაფიქსირება. მიმართვას ხელი 8 არასამთავრობო ორგანიზაციამ მოაწერა.  სრულად წყარო: gyla.ge

თბილისი. ინფორმაციის თავისუფლების განვითარების ინსტიტუტმა გაავრცელა ვიდეო–რგოლი მათთვის ვისაც აწუხებს დედაქალაქის პრობლემები და აქვს ახალი იდეები. ნებისმიერ მოქალაქეს საშუალება აქვს თბილისის მერიის ონლაინ პეტიციების ვებგვერდზე დაარეგისტისტრიროს ინიციატივა, მოიპოვოს მხარდაჭერა და საჭირო რაოდენობის ხმების მოგროვების შემდეგ თბილისის მთავრობა ვალდებული იქნება განიხილოს იდეა.  ვიდეოს მიზანია მოქალაქეებს მიაწოდოს ინფორმაცია თბილისის მერიის მიერ ინიცირებული ონლაინ პეტიციების შესახებ, რათა ისინი უფრო აქტიურად ჩაერთონ გადაწყვეტილების მიღების პროცესში და თბილისის მთავრობას ელექტრონულად მიაწოდონ საკუთარი ინიციატივები ცალკეული პრობლემების გადასაჭრელად. წყარო:idfi.ge

კახეთი.  23 თებერვალს, 12 საათზე სათემო კავშირი ,,ნუკრიანი" პროექტის  –,,ჩვენ ვსწავლობთ" – პრეზენტაციას გამართავს.  პროექტის მიზანია: სოფელ ნუკრიანის კულტურის სახლის/ბიბლიოთეკის ბაზაზე - სათემო განათლების ცენტრის შექმნა და სათემო განათლების ცენტრის მეშვეობით სიღნაღის მუნიციპალიტეტში მცხოვრები ახალგაზრდებისათვის არაფორმალური კულტურულ-საგანმანათლებლო პროგრამების შეთავაზება.  პროექტი დაფინანსებულია ,,ფონდ ღია საზოგადოება საქართველოს" მიერ.  წყარო:ორგანიზაციის გვერდი სოციალურ ქსელში

თბილისი. ორგანიზაციამ „ქალთა ფონდი საქართველოში" პროექტი –"Women's Rights – Art in Action” განახორციელა,რომლის მიზანია ქალთა საკითხებისადმი საზოგადოების ცნობიერების ამაღლება და მგრძნობელობის გაზრდა.  პროექტის ფარგლებში ორგანიზაციამ 14, 16 და 17 თებერვალს  ქუჩის პერფორმანსები ჩაატარა: მილიარდი ამბოხებული (One Billion Rising),  გაწყვიტე ჯაჭვი (Break The Chain) და ქართველი ქალი არტისტების ნამუშვრების გამოფენა „პირადი კანონი" („Auto Nomos"), თემაზე ქალთა სექსუალური უფლებები და გამოცდილებები. პროექტი ესტონეთის საელჩოს მხარდაჭერით განხორციელდა. სრულად წყარო: ორგანიზაციის გვერდი სოციალურ ქსელში

კახეთი. თელავის სახელმწიფო უნივერსიტეტში მცენარეთა ბილოგიური დაცვის ცენტრის „ბიო-აგროს" ექსპერტების დახმარებით ადგილობრივ ფერმერებთან შეხვედრა  გაიმართა. შეხვედრას, ასევე, ესწრებოდნენ თელავის მუნიციპალიტეტის სოფლის მეურნეობის განყოფილების თანამშრომლები, ადგილობრივი ფერმერები, ბიომეურნეები, არასამთავრობო ორგანიზაციებისა და მედიის წარმომადგენლები. ექსპერტებმა შეკრებილებს გააცნეს  ეკოლოგიურად სუფთა სასოფლო-სამეურნეო პროდუქტების წარმოების განვითარების მიმართულებები საქართველოსა და კერძოდ, კახეთში.

თბილისი. არასამთავრობო ორგანიზაციებმა 19 თებერვალს ტელევიზიების მიერ ვიდეო მასალის გავრცელების შესახებ განცხადება გააკეთეს. „ტელეკომპანია „რუსთავი 2"–მა და შემდეგ უკვე სხვა ტელეკომპანიებმა, გაავრცელეს 2004 წლის 24 ნოემბერს მომხდარი ე.წ. სპეციალური ოპერაციის ამსახველი ვიდეო მასალა" – ნათქვამია განცხადებაში, სადაც არასამთავრობოები მოუწოდებენ მედიასაშუალებებს არ გაავრცელონ გადაუმოწმებელი, ღირსების შემლახველი და პირადი ცხოვრების ხელმყოფი მასალები, რითაც შეიძლება ხელი შეუწყონ დაინტერესებული მხარეების ინტერესების ტირაჟირებას. „ყველა ტელეკომპანიამ, რომელმაც გაავრცელა ეს კადრები, დაარღვია „მაუწყებელთა ქცევის კოდექსის" 35-ე მუხლის მე-20, 23-ე და 24-ე პუნქტები. კერძოდ, 23-ე პუნქტი: „ტანჯვისა და მწუხარების ამსახველი საარქივო მასალის (დანაშაულის ჩათვლით) გამოყენებისას, მაუწყებელი უნდა შეეცადოს შეამციროს ის პოტენციური ტრავმა, რომელიც შესაძლოა ამ მასალამ მიაყენოს მასში ასახულ პიროვნებას და/ან მის ნათესავებს", – ნათქვამია განცხადებაში. 20 თებერვალს გავრცელებულ განცხდებას 9 არასამთავრობო ორგანიზაცია აწერს ხელს.  სრულად წყარო:media.ge

კახეთი. საბჭოთა წარსულის კვლევის ლაბორატორია 21-22 თებერვალს თელავში პროექტის - „ტერორის ტოპოგრაფია-საბჭოთა თელავის" მოსამზადებელ სამუშაო შეხვედრა-ტრენინგს გამართავს. დასწრება შეუძლია ყველა დაინტერესებულ პირს, რომელიც მთელი წლის განმავლობაში პროექტზე მუშაობას გააგრძელებს.   შეხვედრაზე ირაკლი ხვადაგიანი წარადგენს საბჭოთა წარსულის კვლევის ლაბორატორიის გამოცდილებას ზეპირი ისტორიების ჩაწერისა და საარქივო მუშაობის შესახებ. პროექტის ფარგლებში იგეგმება თელავის საქალაქო ტურის შემუშავება: ტერორის ტოპოგრაფია - საბჭოთა თელავი. მისამართი: თელავი, მედია-კაფე (ერეკლე II ქუჩა #4, სამხატვრო სკოლის სარდაფი).

აჭარა.19 თებერვალს, არასამათვარობო ორგანიზაცია ბორჯღალის ოფისში, პროექტის  „სოციალური საწარმო: ბუღალტრული და ვებ–დიზაინის ცენტრის" ფარგლებში გადამზადებულმა დევნილმა ახალგაზრდებმა თავიანთ თანატოლებს, ასევე დევნილი ახალგაზრდებს ტრენინგი ჩაუტარეს. ტრენინგები ჩატარდა შემდეგ თემაზე – „ბლოგის შექმნა და მართვა".  აღნიშნულ ტრენინგს პროექტის ძირითადიბენეფიციარების გარდა ბორჯღალის ბაზაზე არსებული მოხალისეთა კლუბის „ბათუსის"  წევრებიც ესწრებოდნენ. ახალგაზრდებმა ორდღიანი ტრენინგ–კურსის საფუძველზე ბლოგის შექმნა და მისი მართვა შეისწავლეს.პროექტი – „სოციალური საწარმო: ბუღალტრული და ვებ–დიზაინის ცენტრი" დაფინანსებულია ფონდი ღია საზოგადოება საქართველოს მიერ.

იმერეთი. ქუთაისში მოქმედი  არასამთავრობო ორგანიზაციები  ქუთაისის თვითმმართველობას კოორდინირებული მუშაობისკენ მოუწოდებენ. ამ ფაქტთან დაკავშირებით არასამთავრობო სექტორმა საზოგადოებას,  დემოკრატიული ჩართულობის ცენტრში, მათ მიერ შედგენილი ერთობლივი განცხადება გააცნეს. „ვინარჩუნებთ რა სრულ პოლიტიკურ ნეიტრალიტეტს, პოლიტიკურ პროცესებში ჩართულ თითოეულ მხარეს მოვუწოდებთ, დაიცვან საქართველოს კანონმდებლობა და ჩვენი ქვეყნის მიერ აღიარებული საერთაშორისო ვალდებულებები. გამოიჩინონ ერთმანეთისა და მთლიანად საზოგადოების მიმართ პატივისცემა და პოლიტიკური პროცესები წარმართონ მშვიდ და ინსტრუქციულ გარემოში." - ნათქვამია განცხადებაში.  არასამთავრობო ორგანიზაციების მოთხოვნაა, ქუთაისის თვითმმართველობამ ყოველთვიურად გამოაქვეყნოს დეტალური ინფორმაცია მერიის სარეზერვო ფონდიდან გაწეული ხარჯების შესახებ. ასევე მიაწოდოს საზოგადოებას ადგილობრივი ბიუჯეტიდან გაწეული ნებისმიერი ხარჯის დასაბუთება. არასამთავრობობები  ასევე მოითხოვენ, უახლოეს მომავალში დაიწყოს მუშაობა 2014 წლის ადგილობრივ  ბიუჯეტზე, რაც მათი აზრით, ხელს შეუწყობს  ბიუჯეტში არსებული თითოეული პროგრამა ჩამოყალიბებული მიზნებითა და ამოცანებით გაიწეროს. 

სამეგრელო.საქართველო – ევროკავშირის თანამშრომლობის პერსპექტივები და სამოქალაქო სექტორის წარმომადგენელთა მონაწილეობა ევროინტეგრაციის პროცესში - ამ საკითხებზე 19 თებერვალს, ზუგდიდში შეხვედრა გაიმართა. ქუთაისის განათლების განვითარების და დასაქმების ცენტრის ექსპერტმა გივი მიქანაძემ არასამთავრობო ორგანიზაციებს გააცნო „აღმოსავლეთ პარტნიორობის" მიზნები და საქართველოს ეროვნული პლატფორმის საქმიანობა, რომელიც თანამშრომლობის პროცესში სამოქალაქო სექტორის მონაწილეობას გულისხმობს. ექსპერტის თქმით, არასამთავრობოებს უკვე ამოქმედებული პლატფორმა საშუალებას აძლევს საკუთარი შენიშვნები,  დააფიქსირონ და  წვლილი შეიტანონ მონიტორინგის განხორციელებასა და ადვოკატირების პროცესში. ექსპერტმა განაცხადა, რომ ევროკავშირში საქართველოს გაწევრიანების პროცესი თანმიმდევრულად, ეტაპობრივად უნდა წარიმართოს. ერთ–ერთი ძირეული წინაპირობა საამისოდ ქვეყანაში ჯანსაღი, კონკურენტული გარემოს შექმნაა. მისი თქმით, საქართველოს აქვს რეალური შესაძლებლობა და პოტენციალი, მიუახლოვდეს და ინტეგრირდეს ევროკავშირთან სხვადასხვა მიმართულებით, თუმცა ვადების განსაზღვრა, დაკონკრეტება დღეს  ხელაღებით რთულია.

კახეთი. საქართველოს ახალგაზრდა იურისტთა ასოციაციის თელავის ოფისში შეხვედრა გაიმართა. შეხვედრის თემა იყო საჯარო პირების სამსახურებიდან მასობრივი დათხოვა. თელავის ოფისის ხელმძღვანელის, მარეხ მგალობლიშვილის განცხადებით, ახლადდანიშნული თანამდებობის პირები  სცდებიან თავიანთი უფლებამოსილების ფარგლებს და კანონის  მოთხოვნებს უგულვებელყოფენ. არასამთავრობო ორგანიზაციები მოქალაქეებს მოუწოდებენ გაახმაურონ ზეწოლის ფაქტები, ხოლო ხელისფლებას კი  მოუწოდებენ გადაამოწმონ საკუთარი კადრების კვალიფიკაცია და მათი საქმიანობის კანონიერება.

გურია. „ახალგაზრდა პედაგოგთა კავშირის" ოფისში ორგანიზაციის პარტნიორი სკოლების მოსწავლეთა თვითმმართველობების წარმომადგენლებისთვის პროექტების წერის შესახებ ტრენინგი ჩატარდა. ტრენინგზე დეტალურად იქნა განხილული პროექტზე მუშაობის ეტაპები: თუ როგორ უნდა გამოვავლინდეს პრიორიტეტული პრობლემა, როგორ უნდა მოხდეს კონკრეტული იდეების დამუშავება და პროექტის ძირითადი მონახაზის ჩამოყალიბება. მოზარდებმა, ტრენინგის მიმდინარეობის დროს შეიმუშავეს რამდენიმე საპროექტო იდეა, რომელიც პროექტის სახით მომზადდება და „ახალგაზრდა პედაგოგთა კავშირის" მიკროგრანტების კონკურსზე იქნება წარდგენილი. კონკურსი პარტნიორი სკოლების მოსწავლეთა თვითმმართველობებისთვის ორგანიზაციამ მიმდინარე თვეში გამოაცხადა.

სამეგრელო.„არასრულწლოვანი და დანაშაული" – ამ თემაზე ისაუბრეს, 19 თებერვალს შინაგან საქმეთა სამინისტროს სამეგრელო ზემო–სვანეთის მთავარ სამმართველოში პოლიციისა და არასამთავრობო ორგანიზაციების წარმომადგენლებმა. მთავარი სამმართველოს უფროსის მოადგილის კობა ცერცვაძის განცხადებით, არასრულწლოვნებში დანაშაულის პრევენციის მიზნით, პოლიციის თანამშრომლებთან ერთად უნდა გაიზარდოს საზოგადოების ჩართულობა პრევენციულ ღონისძიებებში. ასოციაცია „ათინათის" ფსიქოლოგი მაკა გოგოხია კი მიიჩნევს, რომ უფრო  კომპლექსური მუშაობაა საჭირო არასრულწლოვნებში დანაშაულის შემცირების მიზნით. „მსგავსი შეხვედრების ჩატარება აუცლებელია, თუმცა საჭიროა  ამ მიმართულებით მეტი გააკეთოს ყველამ. მცირედი რამის გაკთებაც კი შეიძლება მნიშვნელოვანი აღმოჩნდეს ამ მოზარდებისთვის", –განაცხადა ფსიქოლოგმა.

კახეთი. 19 თებერვალს, საერთაშორისო ასოციაციამ „საქართველოს ქალები მშვიდობისა და სიცოცხლისათვის" გურჯაანელ შეზღუდული შესაძლებლობის მქონე 27 მოქალაქეს ეტლები გადასცა. არასამთავრობო ორგანიზაციის, დღის ცენტრის დირექტორის, გულიკო როსტოშვილის თქმით, ბენეფიციარებს ძალიან უჭირდათ და ფაქტობრივად, სახლიდან გამოსვლას ვერ ახერხებდნენ დაუხმარებლად: ,,ჩვენი ბენეფიციარებისთვის ძალიან მნიშვნელოვანია ეტლები, რადგან შეძლებენ გარეთ გამოსვლას და საზოგადოებასთან კონტაქტს, მოვლენ ჩვენს ცენტრშიც. მადლობა მათ ვინც იზრუნა და ასეთი მნიშნელოვანი დახმარება გაუწიათ".

იმერეთი. არასამთავრობოთა კოალიცია „გამჭვირვალობა თვითმმართველობისათვის" ქუთაისის მერის გადადგომას მოითხოვს. კოალიციის განცხადებით, მათ მიერ განხორციელებული მონიტორინგის შედეგად, ასევე მერიიდან გამოთხოვილი საჯარო ინფორმაციებზე დაყრდნობით, თვითმმართველობაში მთელი რიგი დარღვევები იქნა აღმოჩენილი: მერიაში პარტიული ინტერესების მიხედვით ადამიანების დასაქმება, საშტატო ერთეულების ზრდა, თანხების არამიზნობრივი ხარჯვა. კოალიციის მიერ წაყენებული მოთხოვნების არ გათვალისწინების შემთხვევაში, აქციის მონაწილეები  21 თებერვლიდან პერმანენტული აქციების მოწყობას გეგმავენ. შეგახსენებთ, კოალიციაში „გამჭვირვალობა თვითმმართველობისათვის" –  ქუთაისში მოქმედი 20 არასამთავრობო ორგანიზაციაა გაერთიანებული.

კახეთი. 19 თებერვალს, მუნიციპალური სერვისების მომწოდებელთა ასოციაციამ დემოკრატიული ჩართულობის ცენტრში, ჩაატარა თელავის მუნიციპალიტეტში ნარჩენების მენეჯმენტის მომსახურების გაუმჯობესების გეგმის საჯარო მოსმენა. შეხვედრას ესწრებოდნენ თელავის მუნიციპალიტეტის ადგილობრივი თვითმმართველობის,  არასამთავრობო ორგანიზაციებისა და მედიის წარმომადგენლები და სხვა დაინტერესებული პირები. ნარჩენების მართვის სფეროში სიტუაციის ანალიზისთვის ინფორმაციის შეგროვება ადგილზე არსებული სტატისტიკური მონაცემებითა და ორგანიზაციული ჩანაწერებით მოხერხდა. ასევე ახალგაზრდული ჯგუფების მეშვეობით ადგილობრივი მოსახლეობის გამოკითხვა მოხდა. თელავის მუნიციპალიტეტში ნარჩენების მენეჯმენტის მომსახურების გაუმჯობესების გეგმა შემუშავდა USAID-ის პროგრამის „დემოკრატიული მმართველობია საქართველოში ადგილობრივი თვითმმართველობის კომპონენტის" ფარგლებში მუნიციპალური სერვისების მიმწოდებელთა ასოციაციის დახმარებით.

20 თებერვალს, 13:00 საათზე, დემოკრატიული ჩართულობის ცენტრის ორგანიზებით გაიმართება – ბათუმის ეკონომიკური განვითარების სტრატეგიის საჯარო განხილვა. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი.

20 თებერვალს 13:00 საათზე ახალგაზრდა ფსიქოლოგთა და ექიმთა ასოციაცია  "ქსენონი" პრესკონფერენციას გამართავს. თემა: ქალი ნარკომომხმარებლები  და მათზე ორიენტირებული ზიანის შემცირების სერვისები საქართველოში. მისამართი: თბილისი ჭოველიძის #10

თბილისი. „საერთაშორისო გამჭვირვალობა – საქართველომ" ყოველკვირეული მორიგი აუდიო პოდკასტი გამოაქვეყნა.  გამოშვების თემებია: არასამთავრობოთა კონფერენცია „100 დღე ხელისუფლებაში: კანონის უზენაესობა და ადამიანის უფლებები", კობა დავითაშვილმა შესაძლოა უმრავლესობა დატოვოს, უქმდება სასჯელთა უპირობო შეკრებითობის პრინციპი, რეორგანიზაცია მთავრობაში – ბუნებრივი რესურსების სააგენტო ენერგეტიკის სამინისტროს გამოეყოფა და კვლავ გარემოს დაცვის სამინისტროს უბრუნდება. საპარლამენტო ამბების პოდკასტი: 19 თებერვალი წყარო: transparency.ge

კახეთი. არასამთავრობო ორგანიზაცია ,,მედია ცენტრმა კახეთმა", თელავის მედია კაფეში, 18 თებერვალს, ჟურნალისტური ეთიკის ქარტიის გასვლით ღონისძიებას უმასპინძლა. შეხვედრას, ადგილობრივი მედიისა და სამოქალაქო სექტორის წარმომადგენლები ესწრებოდნენ. ქარტიის საბჭოს თავმჯდომარის, გიორგი მგელაძეს თქმით, შეხვედრები რეგიონული მედიის წარმომადგენლებსა და მოქალაქეებთან თელავიდან დაიწყო და  სხვა მუნიციპალიტეტებშიც გაგრძელდება: ,,შეხვედრა  საინფორმაციო ხასიათის იყო  და მოიცავდა იმ ძირითად საკითხებს, რომელიც შეეხება ეთიკის ქარტიის  პრინციპებს. გარდა ამისა, დამსწრე საზოგადოებას გავაცანით ქარტიის მიერ ბოლო დროს დაგეგმილი სიახლეები. პირველი გასვლითი შეხვედრა თელავში ჩავატარეთ და დაგეგმილი გვაქვს სხვა მუნიციპალიტეტებშიც ანალოგიური გასვლითი ღონისძიებების ჩატარება’’– განაცხადა გიორგი მგელაძემ.

სამეგრელო.რეგიონული განვითარების სტრატეგიაზე იმსჯელეს დღეს, 19 თებერვალს, არასამთავრობო ორგანიზაციების და ხელისუფლების წარმომადგენლებმა სამეგრელო –ზემო სვანეთის სამხარეო ადმინისტრაციაში გამართულ საკოორდინაციო შეხვედრაზე. საკოორდინაციო საბჭომ ჩამოაყალიბა სამუშაო ჯგუფები, რომლებიც რეგიონის სტრატეგიის განვითარებაზე იმუშავებენ.  გაეროს განვითარების პროგრამის მენეჯერის ფლორიან დელონეს თქმით, რეგიონული განვითარების სტრატეგიის შემუშავებაში აქტიურად არიან ჩართულები მისი ორგანიზაციის ექსპერტები. სამხარეო ადმინისტრაციის რეგიონალური სამსახურის უფროსის გელა სვირავას განცხადებით, საბჭოს ჯგუფებმა სტრატეგიაზე მუშაობა მიმდინარე წლის მაისისთვის უნდა დაასრულონ.

კახეთი. გაეროს ერთობლივი პროგრამის – „გენდერული თანასწორობის ხელშეწყობისთვის საქართველოში"–  ფარგლებში თელავის დემოკრატიული ჩართულობის ცენტრში, კახეთში მოქმედ არასამთავრობო ორგანიზაციებთან საინფორმაციო შეხვედრა გაიმართა. შეხვედრის ძირითადი მიზანი იყო ერთობლივი პროგრამის ფარგლებში გათვალისწინებული პრიორიტეტებისა და მიმართულებების წარდგენა კახეთის არასამთავრობო ორგანიზაციებისთვის. სოსო მოქელაძე, ,,ბიზნესცენტრი კახეთის" დირექტორი: „აღნიშნული შეხვედრა, ჩემი აზრით, ხელს შეუწყობს გაეროს ერთობლივი პროგრამისა და კახეთის არასამთავრობო ორგანიზაციების პარტნიორობასა და სამომავლო ერთობლივი პროექტების განხორციელებას". შეხვედრა დასრულდა დისკუსიით თემაზე: კახეთის რეგიონში გენდერული თანასწორობისვის ხელსაყრელი გარემოს შექმნა – გამოწვევები და პრიორიტეტები.