აჭარა. 25 ნოემბერს  ქალთა მიმართ ძალადობის აღმოფხვრის საერთაშორისო დღის აღსანიშნავად  ხანდაზმულ ქალთა ასოციაციაში სემინარი გაიმართა. სემინარის თემა იყო ,,გავერთიანდეთ ქალთა მიმართ ძალადობის წინააღმდეგ." სემინარზე მოწვეული იყვნენ  მუნიციპალიტეტის 12 თემის ამბულატორიის მედპერსონალი. სემინარი იურისტმა მარინე ჟღენტმა ჩაატარა, რომელმაც მონაწილეებს გააცნო ინფორმაცია  თუ რას გულისხმობს ოჯახში ძალადობა და როგორ იცავს სახელმწიფო ოჯახში ძალადობის მსხვერპლს. დარიგდა საინფორმაციო მასალა, რომელიც მუნიციპალიტეტის ყველა თემში გავრცელდება. სრულად წყარო: awa.org.ge

29 ნოემბერს, 16:00 საათზე, სამოქალაქო მრჩეველთა საბჭოს ორგანიზებით გაიმართება საჯარო შეხვედრა თემაზე: „თვითმმართველ ქალაქ ბათუმის სატრანსპორტო ინფრასტრუქტურა და ქალაქის წინაშე არსებული პრობლემები". მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი.

29 ნოემბერს 12:00 საათზე, საქართველოში გაეროს მოსახლეობის ფონდის ორგანიზებით გაიმართება ახალგაზრდების ეროვნული ფორუმი უფლებებსა და გამოწვევებზე. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი.

  თბილისი. ღია საზოგადოების ფონდების დამფუძნებელი ჯორჯ სოროსი თბილისს კერძო ვიზიტით ეწვევა. საზოგადოებაში გამოწვეული ინტერესის საპასუხოდ, ფონდი „ღია საზოგადოება – საქართველო" განცხადებას ავრცელებს.  „გვინდა განვაცხადოთ, რომ აღნიშნული ვიზიტი არის არაოფიციალური, მისი მიზანია ფონდის ხელმძღვანელობასთან შეხვედრა, ორგანიზაციის ბოლო წლების მუშაობის შეჯამება და სამომავლო სტრატეგიის განხილვა. არ არის გამორიცხული, რომ ახალი პოლიტიკური რეალობის გაცნობის მიზნით, ჯორჯ სოროსი შეხვდეს პოლიტიკურ ლიდერებსაც" – ნათქვამია ფონდი „ღია საზოგადოება–საქართველოს" მიერ გავრცელებულ განცხადებაში . სრულად  წყარო: osgf.ge  

28 ნოემბერს, 21:00 საათზე, გენდერულ ძალადობასთან ბრძოლის 16-დღიანი გლობალური კამპანიის ფარგლებში ქალთა ფონდი საქართველოში და მეგი გოგიტიძე ბენდთან ერთად გეპატიჟებათ საქველმოქმედო კონცერტზე მისამართი: თბილისი, „მაგთი კლუბი", რუსთაველის გამზ. #22

შიდა ქართლი. 27 ნოემბერს საადვოკატო ბიურო "OK & CG”-სა და ა(ა)იპ გორის მუნიციპალიტეტის მოსწავლე–ახალგაზრდობის კულტურულ–საგანმანათლებლო ცენტრს შორის ურთიერთთანამშრომლობის მემორანდუმი გაფორმდა.  საადვოკატო ბიურო და გორის მოსწავლე-ახალგაზრდობის კულტურულ-საგანმანათლებლო ცენტრი აღნიშნული მემორანდუმის გაფორმებით გეგმავს ურთიერთთანამშრომლობის საფუძველზე ხელი შეუწყოს სამოქალაქო საზოგადოების განვითარებას გორის მუნიციპალიტეტის ფარგლებში საჯარო ლექციების, დისკუსიებისა თუ სხვადასხვა აქტივობების ხარჯზე. ადვოკატებმა მემორანდუმის გაფორმებასთან ერთად წაიკითხეს საჯარო ლექცია ადამიანის უფლებებსა და ვალდებულებებზე. საჯარო ლექცია გორის მოსწავლე-ახალგაზრდობის ცენტრში გაიმართა და მას ესწრებოდა ადამიანის უფლებებისა და ვალდებულებების საკითხით დაინტერესებული საკმაოდ ვრცელი აუდიტორია: გორის მე-5, მე-7, კარალეთის სამოქალაქო კლუბის წევრები. საჯარო ლექციის ფარგლებში მოხსენება გაკეთდა ადამიანის უფლებებისა და ვალდებულებების არსის განხილვითა და ურთიერთმიმართების საფუძველზე, ასევე ამ უფლებების დაცვის მექანიზმებზე როგორც საქართველოს მასშტაბით, ისე საერთაშორისო დონეზე. ლექციის მომდინარეობისას გამოჩენილი აქტივობების საფუძველზე ასევე შეირჩა რამოდენიმე მოსწავლე, რომელთაც მიენიჭათ საადვოკატო ბიუროს მეგობრის სტატუსი.

თბილისი. 28 ნოემბერს ქალთა საინფორმაციო ცენტრის ოფისში გაიმართა ტრენინგი „გაძლიერებული ქალები საჯარო ცხოვრებისათვის". ტრენინგი მიზნად ისახავს ლიდერი ქალების უნარ-ჩვევების გაძლიერებას კომუნიკაციებისა და საჯარო გამოსვლების მიმართულებით და მათი ინფორმირებულობის გაზრდას ქალთა მიმართ ძალადობის აღმოფხვრის ეროვნულ და საერთაშრისო მექანიზმების სფეროში.  ტრენინგში მონაწილეობენ ლიდერი ქალები საქართველოს სხვადასხვა რეგიონებიდან, ეთნიკური უმცირესობების წარმომადგენლები პანკისის ხეობიდან, ჟურნალისტები რეგიონებიდან და ახალგაზრდული სათემო ჯგუფების წარმომადგენლები. ტრენინგები იმართება პროექტის - „გაძლიერებული ქალები საჯარო ცხოვრებისათვის” ფარგლებში, რომელიც დაფინანსებულია საქართველოში აშშ-ს საელჩოს დემოკრატიის განვითარების მცირე საგრანტო პროგრამის მიერ და გენდერული ძალადობის წინააღმდეგ 16 დღიანი კამპანიის ფარგლებში.

თბილისი. „სამართლიანი არჩევნები" მარტვილის გამგეობაში განვითარებულ მოვლენებზე განცხადებას ავრცელებს, სადაც გამოხატავს შეშფოთებას მარტვილის მუნიციპალიტეტის გამგეობის შენობაში განხორციელებული ქმედებების თაობაზე. „სამართლიანი არჩევნების" ინფორმაციით, მარტვილის მუნიციპალიტეტში 26 ნოემბერს გაიმართა ფართომასშტაბიანი აქცია მუნიციპალიტეტის გამგებლისა და საკრებულოს თავმჯდომარის გადადგომის მოთხოვნით. აქციაზე კოალიცია „ქართული ოცნების" მხარდამჭერები და აღნიშნული პოლიტიკური გაერთიანების ადგილობრივი ოფისის ხელმძღვანელებიც იმყოფებოდნენ. „აქციამ კანონსაწინააღმდეგო  ფორმა მიიღო მაშინ, როდესაც მოქალაქეები გამგეობის შენობაში შეიჭრნენ, რამაც გამგეობის მუშაობის პარალიზება, ხოლო ინვენტარის ნაწილის დაზიანება გამოიწვია. აქციის მონაწილეებმა შენობა პოლიციის ჩარევის შემდეგ დატოვეს. ამჟამად კოალიცია „ქართული ოცნების" მხარდამჭერები ახდენენ გამგეობის შენობის  შესასვლელის ბლოკირებას", – ნათქვამია განცხადებაში. განცხადებაში აღნიშნულია, რომ დაუყოვნებლივ უნდა მოხდეს ადგილობრივი თვითმმართველობის ორგანოების მიმართ განხორციელებული უკანონო ქმედებების  გამოძიება და მასში მონაწილე პირების დასჯა  საქართველოს კანონმდებლობის მოთხოვნის შესაბამისად. სრულად წყარო: ორგანიზაციის ოფიციალური გვერდი სოციალურ ქსელში

შიდა ქართლი. 25 ნოემბერს, ქალთა ძალადობის აღკვეთის საერთაშორისო დღესთან დაკავშირებით „სამოქალაქო განათლებისა და პედაგოგთა გადამზადების პროგრამის" ფარგლებში ხაშურის მე-9 სკოლის სამოქალაქო კლუბში მოსწავლეებმა მოიწვიეს სტუმარი – შიდა ქართლის გენდერული თანასწორობის რესურს ცენტრის ხელმძღვანელი ნინო სუხიაშვილი. მან ისაუბრა ქალთა ძალადობასა და მისი აღკვეთის მიზნით განსაზღვრულ კანონმდებლობაზე, განიხილა ოჯახური ძალადობის სტატისტიკა და გაეროს დოკუმენტები.  ოჯახური ძალადობის მსხვერპლთა შესახებ საქართველოში ჩატარებული კვლევის შედეგად დადგენილია, რომ ოჯახური ძალადობის მსხვერპლნი, ხშირ შემთხვევაში, ქალები და ბავშვები არიან, ხოლო მოძალადეები – მამაკაცები. თუმცა, როგორც ქალბატონმა ნინომ განაცხადა, ოჯახური ძალადობის ობიექტი შეიძლება ხანდაზმული მშობელი ან მამაკაციც გახდეს. მისი თქმით, გარდა სხვადასხვა საერთაშორისო ორგანიზაციების, რომელიც ზრუნავს ქალთა უფლებების დაცვაზე, სახალხო დამცველიც უფლებამოსილია განიხილოს ეს საკითხები და დაიცვას ქალთა უფლებები. სტუმარმა სამოქალაქო კლუბს საჩუქარიც გადასცა - ქალთა უფლებათა დეკლარაცია.

30 ნოემბერს, 17:30 საათზე, ორგანიზაცია „გოუ ჯგუფი" გამართავს დოკუმენტური ფილმის – „ომის თაობა ცხინვალი–თბილისი" – პრემიერას. მისამართი: თბილისი, თავისუფლების მოედანი 1, ევროპის სახლი

თბილისი. 1 დეკემბერს, შიდსთან ბრძოლის მსოფლიო დღისადმი მიღძვნილი ღონისძიების ფარგლებში თბილისში გაიმართება მარათონი „ჩვენ ვირჩევთ ცხოვრების ჯანსაღ წესს". მარათონში მონაწილეობას მიიღებენ როგორც 14 დან 18 წლამდე ასაკის  IX-XII კლასის მოსწავლეები, კოლეჯის სტუდენტები, ასევე საზოგადოებისთვის ცნობადი სახეები. მარათონი სტარტს აიღებს მერაბ ბერძენიშვილის საერთაშორისო კულტურის ცენტრიდან და დასრულდება ვაკის პარკის ტერიტორიაზე.  მარათონის მონაწილეთა  რეგისტრაცია დაიწყება 1 დეკემბერს, 11 საათზე, საერთაშორისო კულტურის ცენტრ "მუზას" ეზოში მარათონის 5 გამარჯვებული ფასიანი საჩუქრებით დაჯილდოვდება.  აღნიშნული ღონისძიება ტარდება აშშ–ს საერთაშორისო განვითარების სააგენტოს მიერ დაფინანსებული საქართველოში აივ პრევენციის პროექტის ფარგლებში. სრულად წყარო: geoyouth.ge

სამეგრელო. ადგილობრივი მედია საშუალებების პრობლემებსა და საჭიროებებზე „კონფლიქტებისა და მოლაპარაკებების საერთაშორისო კვლევითმა ცენტრმა" დემოკრატიული ჩართულობის ზუგდიდის ოფისში, 27 ნოემბერს, შეხვედრა გამართა. შეხვედრას სამეგრელოში მომუშავე ჟურნალისტები ესწრებოდნენ. ორგანიზაციის წარმომადგენლის, თინათინ ასათიანის განცხადებით, ისინი კონფლიქტისპირა ქალაქის პრობლემებით დაინტერესდნენ.  პროექტი „ძალა ჩვენშია. განვითარება მშვიდობის მშენებლობის გენდერული და მრავალფეროვნების მართვისთვის" სამეგრელოში, შიდა ქართლსა და სამცხე–ჯავახეთში განხორციელდება.  ორგანიზაცია სამოქალაქო სექტორის და მედიის წარმომადგენლებთან მშვიდობის, გენდერულ და ტოლერანტობის საკითხებზე იმუშავებს. თინათინ ასათიანი ამბობს, რომ საზოგადოების აქტიურმა წევრებმა საკუთარი წვლილი უნდა შეიტანონ პრობლემების გადაწყვეტის პროცესში, ასევე გაძლიერდეს მედია და სამშვიდობო ჟურნალისტიკა, როგორც საქართველოსთვის კონფლიქტების დარეგულირების პროცესში ერთ-ერთი მნიშვნელოვანი რგოლი.

თბილისი. 26 ნოემბერს, კონსულტაციისა და ტრენინგის ცენტრში გაიმართა დისკუსია თემაზე: სამოქალაქო საზოგადოებაში არსებული ძირითადი პრობლემები და მათი გადაჭრის გზები. დისკუსიაზე ძირითადად განიხილეს ისეთი საკითხები, როგორიცაა თუ  რა უნდა გააკეთონ არასამთავრობო ორგანიზაციებმა მათ მიმართ საზოგადოების ნდობის ამაღლებისთვის, რა რისკები და შესაძლებლობები არსებობს დღეს არასამთავრობო ორგანიზაციების წინაშე და  პოლიტიკის ფორმირების პროცესში არასამთავრობო ორგანიზაციების მონაწილეობის რა მაგალითები არსებობს და რა უნდა გამოსწორდეს ამ მიმართულებით? დისკუსიის მომხსენებლები იყვნენ, „საქართველოს ახალგაზრდა იურისტთა ასოციაციის" ხელმძღვანელი, თამარ ჩუგოშვილი; საქართველოს განათლებისა და მეცნიერების მინისტრის მოადგილე, დავით ზურაბიშვილი  და კინო კრიტიკოსი , გოგი გვახარია  დისკუსიის ტრანსკრიპტი გამოქვეყნდება ორგანიზაციის ვებ-გვერდზე. სრულად წყარო: ctc.org.ge

კახეთი. 22 ნოემბერს, დედოფლისწყაროში, CENN-მა ჩაატარა შეხვედრა, რომლის მიზანი იყო დედოფლისწყაროს მუნიციპალიტეტის საკვები სავარგულების გაუმჯობესებისათვის შემუშავებული ღონისძიებების წარდგენა. შეხვედრაში მონაწილეობა მიიღეს სოფლის მეურნეობის ექსპერტებმა, თემებისა და ადგილობრივი ხელისუფლების შესაბამისი სამსახურების წარმომადგენლებმა და მცირე ფერმერებმა.  განხილულ იქნა USAID-ის მხარდაჭერით მიმდინარე პროექტის – კლიმატის ცვლილებასთან ადაპტაცია და ბუნებრივი კატასტროფების რისკის შემცირება (CCADM), ფარგლებში მომზადებული დედფლისწყაროს მუნიციპალიტეტის საძოვრების მოვლის რეკომენდაციები და შესაბამისი ანგარიში.  მონაწილეებს გადაეცათ ადგილობრივ ფერმერთათვის შემუშავებული საძოვრების გამოყენების მოკლე გზამკვლევი.  წყარო: CENN

სამცხე–ჯავახეთი. 26–27 ნოემბერს, ახალციხის დემოკრატიული ჩართულობის ცენტრში, კონფლიქტებისა და მოლაპარაკებების საერთაშორისო კვლევითმა ცენტრმა (ICCN)  მედიისა და სამოქალაქო საზოგადოების წარმომადგენლებთან შეხვედრა გამართა. ეს იყო კვლევითი ფაზა ფოკუს ჯგუფებში პირველადი მონაცემების შესაგროვებლად. ამ კვლევის შედეგებზე აიგება ორგანიზაციის ახალი, ორწლიანი პროგრამა – ,,ძალა ჩვენშია - განვითარება მშვიდობის, მრავალფეროვნების ეფექტურად მართვისა და გენდერული თანასწორობისათვის". პროექტი 3 რეგიონში, სამცხე–ჯავახეთში, სამეგრელოსა და შიდა ქართლში განხორციელდება. ,,ამ ინფორმაციაზე აიგება ჩვენი ორგანიზაციის მიერ წარმოებული ორწლიანი პროგრამა. იგი ახალციხეში მედიისა და სამოქალაქო საზოგადოების წარმომადგენლებთან იმუშვებს. დღევანდელ შეხვედრაზე ვისაუბრეთ ორი სახის პრობლემაზე: მედიაში გენდერული საკითხებისა და მრავალფეროვნების გაშუქება", –განაცხადა ეროვნული უმცირესობების და გენდერული საკითხების პროგრამების მენეჯერმა ნანა ბერეკაშვილმა. შეხვედრები ახალციხის დემოკრატიული ჩართულობის ცენტრში კვირის ბოლომდე გაგრძელდება.

სამეგრელო. საზოგადოებრივმა ორგანიზაციამ „დეამ" ზუგდიდის მუნიციპალიტეტის საკრებულოს მრჩეველთა საბჭოს წევრებისთვის 26 და 27 ნოემბერს, ტრენინგი ჩაატარა.  ტრენინგი  მუნიციპალიტეტის სოციალურ ეკონომიკური გეგმის შედგენასა და მრჩეველთა საბჭოს საქმიანობას ეხებოდა. შეხვედრაზე მთავარი აქცენტი  მრჩეველთა ფუნქციონირებაზე, სტრუქტურასა და ორგანიზების  მეთოდებზე გაკეთდა.  „ტრენინგის თემატიკა მოიცავდა საზოგადოებრივი თანამონაწილეობის ფორმებსა და ადგილობრივი თვითმმართველობის მიერ სამოქალაქო ინიციატივების სტიმულირებას, მოსახლეობასთან ეფექტიანი და ქმედითი დიალოგის ორგანიზებასთან დაკავშირებულ საკითხებს", - განაცხადა ასოციაცია „დეას" წარმომადგენელმა ნონა ქობალიამ. მისივე თქმით, პროექტის ფარგლებში დაგეგმილი ღონისძიებები ხელს შეუწყობს ადგილობრივი ხელისუფლების ანგარიშვალდებულებისა და გადაწყვეტილებების მიღების პროცესში მოქალაქეთა ჩართულობის ამაღლებას. პროექტი ამერიკის შეერთებული შტატების საერთაშორისო განვითარების სააგენტოს პროგრამის  – „დემოკრატიული მმართველობა საქართველოში" – ფინანსური მხარდაჭერით ხორციელდება.

თბილისი. 26 ნოემბერს ფონდმა „ევროპული ინიციატივა - ლიბერალური აკადემია თბილისმა" გამართა შუალედური ორი ანგარიშის პრეზენტაცია: „სინგაპური, ესტონეთი, შვეიცარია: სამიზნე მოდელები ქართული ტრანსფორმაციისთვის?" და „საქართველოს სოფლის მეურნეობის სფეროს ტრანსფორმაცია: დამოუკიდებლობის 20 წელი".  ანგარიშები მომზადდა კვლევითი პროექტის „ტრანსფორმაცია საქართველოში: მნიშვნელოვანი შედეგები" ფარგლებში. ანგარიშებში გაანალიზებულია ეკონომიკური ტრანსფორმაციის ძირითადი მახასიათებლები, ეკონომიკური პარამეტრების დინამიკა, სოციალურ-ეკონომიკური პოლიტიკის ამოცანებისა და შედეგების ურთიერთმიმართება, რაც მთლიანობაში ქმნის ქვეყნის ეკონომიკური ტრანსფორმაციის საერთო სურათს სრულად წყარო: ორგანიზაციის გვერდი სოციალურ ქსელში 

სამეგრელო. 26 ნოემბერს საქველმოქმედო – ჰუმანიტარული ცენტრის „აფხაზეთის" ზუგდიდის ოფისს აშშ-ს საელჩოს რეგიონალური კოორდინატორი ლტოლვილთა საკითხებში - ბ-ნი ჯოშუა ფიშელი ესტუმრა. მან დევნილთა პროფესიული სწავლებისა და მომსახურების ცენტრი მოინახულა, ცენტრში მიმდინარე სწავლების პროცესს გაეცნო და ცენტრის ტრენერებსა და ბენეფიციარებს გაესაუბრა. წყარო: ორგანიზაციის ოფიციალური გვერდი სოციალურ ქსელში

28 ნოემბერს,18:00 საათზე გაიმართება მერაბ მამარდაშვილისადმი მიძღვნილი მესამე სემინარი. თემა – „ადამიანად ყოფნის სირთულე და აუცილებლობა - ვარიაცია მერაბ მამარდაშვილის ფილოსოფიის თემაზე" (მეორე ლექცია). მომხსენებელი სტრატეგიულ გამოკვლევათა ცენტრის თანათავმჯდომარე, პოლიტიკის ანალიტიკოსი ნიკო მელიქაძე. მისამართი: თბილისი, ჭოველიძის 10, ფონდ „ღია საზოგადოება - საქართველოს" ოფისი

თბილისი. ინფორმაციის თავისუფლების განვითრების ინსტიტუტმა (IDFI) განახორციელა პროექტი „საჯარო ინფორმაციის ხელმისაწვდომობის საუკეთესო პრაქტიკის კვლევა", რომლის მიზანს წარმოადგენდა საქართველოს საჯარო სექტორის ანგარიშვალდებულებისა და გამჭვირვალობის გაზრდა.  კვლევის ფარგლებში ავტორებმა იკვლიეს ქართული საჯარო დაწესებულებების ელექტრონულ რესურსებზე გამოქვეყნებული საჯარო ინფორმაციის შინაარსი და მათი განთავსების ფორმა. ამავდროულად, პროექტის ფარგლებში აქცენტი გაკეთდა საჯარო ინფორმაციის ხელმისაწვდომის საუკეთესო საერთაშორისო პრაქტიკის შესწავლაზე. ამისთვის კვლევის ავტორებმა შეარჩიეს ქართული საჯარო უწყებების უცხოური ანალოგები. აქცენტი ამ მხრივ გაკეთდა საუკეთესო პრაქტიკის მქონე ქვეყნებზე: ამერიკის შეერთებული შტატებზე, დიდ ბრიტანეთზე/შოტლანდისა და ესტონეთზე. საერთაშორისო პრაქტიკის კვლევისას გამოიკვეთა თანამედროვე ტენდენცია, რომ სამთავრობო უწყებები საკუთარი საქმიანობის გამჭვირვალობისა და ანგარიშვალდებულების უზრუნველსაყოფად ხელმისაწვდომს ხდიან საზოგადოებისთვის საინტერესო მონაცემებს. კვლევის შედეგად ასევე იკვეთება, რომ თითქმის ყველა უწყების შემთხვევაში ოფიციალურ ვებ-გვერდზე მნიშვნელოვანია ისეთი ტიპის ინფორმაციის არსებობა, როგორიცაა დეტალური ინფორმაცია ხელმძღვანელობის შესახებ; საერთო საკონტაქტო ინფორმაცია; ორგანოს სტრუქტურისა და საქმიანობის წესის აღწერა; სტრატეგიული გეგმები და სამოქმედო გეგმები; პროექტები და პროგრამები; საქმიანობის კვარტალური და წლიური ანგარიშები; სამართლებრივი აქტები; საჯარო ინფორმაციის ხელმისაწვდომობა და გამოთხოვის პროცედურების დეტალური აღწერა და ა.შ. პროექტი განხორციელდა აშშ–ს საერთაშორისო განვითრების სააგენტოს (USAID) პროგრამის „დემოკრატიული მმართველობა საქართველოში (G-3)” მხარდაჭერით. კვლევა წყარო: idfi.ge

თბილისი. საზოგადოებრივი ორგანიზაცია „იარე ფეხით" ავრცელებს ვიდეოს, რომელიც ასახავს საბავშვო ეტლით გადაადგილებისას თანმდევ სირთულეებს. კერძოდ, ტროტუარის უხარისხობას, ვიწრო ტროტუარებს, დახრილი სიბრტყეების ნაკლებობას ან არარსებობას შენობების შესასვლელებთან, ტროტუარებსა და მიწისქვეშა გადასასვლელებში, მანქანებით გადატვირთულ ტროტუარს, მიუდგომელ შესასვლელებს პარკებთან და ა.შ. იგივე პრობლემებთან გამკლავება უწევთ შეზღუდული შესაძლებლობის მქონე პირებსაც.  „იარე ფეხით" არის ორგანიზაცია, რომელიც, მხარს უჭერს ფეხით სიარულს ქალაქებში, ცდილობს დაიცვას ფეხით მოსიარულეთა უფლებები და იმედოვნებს, რომ შეძლებს ხელისუფლების დარწმუნებას, როგორც ეროვნულ, ისე მუნიციპალურ დონეზე, დაეხმაროს ფეხით მოსიარულეებს და, ამ კუთხით, უკეთესი პოლიტიკა გაატაროს. ვიდეო წყარო: „იარე ფეხით" გვერდი სოციალურ ქსელში 

იმერეთი. 22 ნოემბერს ქუთაისის ახალგაზრდული ცენტრის წევრებისათვის ჩატარდა ტრენინგი „პროფესიული ორიენტაციის და კარიერული წინსვლის" საკითხებზე. ტრენინგს მიზანს წარმოადგენდა მონაწილეებისთვის კომუნიკაციის ტექნიკების გაცნობა და ეფექტური კომუნიკაციის უნარების გამომუშავება. ასევე საკუთარი შესაძლებლობების და უნარების შეფასება კარიერული ზრდის დაგეგმვის მიზნით; CV-ის ფორმების, სამსახურეობრივი ინტერვიუს ტექნიკების გაცნობა.  ტრენინგ-კურსი ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. სრულად წყარო: ,,ქუთაისის ახალგაზრდული ცენტრის" გვერდი სოციალურ ქსელში