თბილისი. სოციალური სამართლიანობის ცენტრი აქვეყნებს ბრაიან ს. ტერნერის სტატიას (შემოკლებულ ვერსიას), რომელიც მოქალაქეობის კვლევების ერთ-ერთი ფუნდამენტური ტექსტია. „ტერნერი აჩვენებს, თუ რა მნიშვნელობა ჰქონდა მუშაობას, ქორწინებასა და სამხედრო სამსახურს სოციალური უფლებების მიღების პროცესში, როგორ შეიცვალა ეს ტენდენცია და ამის კვალდაკვალ როგორ ძლიერდება გლობალური, კერძოდ, ეკოლოგიური, აბორიგენული (ადგილობრივი) და კულტურული უფლებები. „მოქალაქეობა ერთდროულად ინკლუზიური პროცესია, რომელიც მჭიდროდაა დაკავშირებული რესურსების გადანაწილებასთან და ამასთანავე ის გამრიყველი, ექსკლუზიური პროცესია, რადგან ის ეფუძნება იდენტობის საერთო ან წარმოსახვით მშენებლობას და გარიყავს სხვებს, რომლებიც ამ წარმოსახვაში არ ჯდებიან. მოქალაქეობის სტატუსის მიღება შეზღუდულია სხვადასხვა კრიტერიუმით. ამასთანავე, მოქალაქედ გახდომის პროცესი ხასიათდება ძლიერი იდენტობის შექმნით, რომელსაც არა მხოლოდ იურიდიული, არამედ ეთნიკური, რელიგიური და სექსუალური განზომილება აქვს“. სრულად... წყარო: socialjustice.org.ge

აჭარა. „საერთაშორისო გამჭვირვალობა - საქართველოს“ ინფორმაციით, ბათუმის ოფისის კოორდინატორი, მალხაზ ჭკადუა, ბათუმის მე-18 საჯარო სკოლის უფროსკლასელებს შეხვდა და მოზარდებს ადგილობრივი თვითმმართველობის მუშაობასა და ადგილობრივი პრობლემების ადვოკატირებაში მოქალაქეთა ჩართულობის მექანიზმებზე ესაუბრა.  „სკოლის მოსწავლეები გაეცნენ თვითმმართველობის კომპეტენციებსა და, ამასთან, მიიღეს ინფორმაცია „საერთაშორისო გამჭვირვალობა - საქართველოსთან“ არსებული სამოქალაქო საბჭოების მუშაობის პრინციპებსა და მიღწეულ შედეგებზე“. შეხვედრა „თავისუფალ ჟურნალისტთა სახლის“ ორგანიზებით გაიმართა. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „საფარის” საჩივრის საფუძველზე, თბილისის საქალაქო სასამართლომ ძალადობის მსხვერპლი ქალის მიმართ უსაფუძვლოდ გამოცემული შემაკავებელი ორდერი გააუქმა. „ქალი ორგანიზაციას მას შემდეგ დაუკავშირდა, რაც პარტნიორის მხრიდან ფიზიკური ძალადობის მსხვერპლი გახდა. შემთხვევა მიმდინარე წლის 8 აპრილს მოხდა. პოლიციის გამოძახების შემდეგ, კაცი ადგილზე დააკავეს და მის მიმართ შემაკავებელი ორდერიც გამოიცა. მეორე დღეს, კაცს ოჯახში ძალადობის მუხლით წარუდგინეს ბრალი, დაკითხვის დროს კი მან განაცხადა, რომ თავად არის მსხვერპლი. ეს ვერსია ეყრდნობოდა იმ ფაქტს, რომ ფიზიკური თავდასხმის დროს, თავის დაცვის მიზნით, ქალმა მას მხარზე უკბინა, რა დროსაც კაცმა დაზიანებები მიიღო. სწორედ ეს გახდა იმის საფუძველი, რომ შემთხვევიდან მეორე დღეს, 9 აპრილს, მეორე შემაკავებელი ორდერი გამოიცა, ამჯერად უკვე დაზარალებული ქალის მიმართ. ფაქტობრივად, არსებობდა ორი, ერთმანეთის პარალელური შემაკავებელი ორდერი, თუმცა “საფარის” იურისტმა, ნელი ქარელმა ქალის მიმართ გამოცემული შემაკავებელი ორდერი გაასაჩივრა. როგორც ქარელი განმარტავს, მნიშვნელოვანია განისაზღვროს, ვინ იყო კონფლიქტისა ინიციატორი კონკრეტულ სიტუაციაში. იურისტი ხაზს უსვამს იმასაც, რომ თავის დაცვა, არ შეიძლება ჩაითვალოს ძალადობად“, ნათქვამია ორგანიზაციის ვებგვერდზე. სრულად... წყარო: sapari.ge

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: ბავშვების დაცვა ასაკის ნიშნით დისკრიმინაციისგან - საუკეთესო საკანონმდებლო ინიციატივების მიმოხილვა. „ბავშვების მიმართ სხვადასხვა ნიშნით დისკრიმინაცია ერთ-ერთი მნიშვნელოვანი პრობლემაა ბავშვის უფლებების დაცვის მიმართულებით. დისკრიმინაციული დამოკიდებულება მყარად არის ფესვგადგმული ცხოვრების თითქმის ყველა სფეროში - სკოლა, დასაქმების ადგილი, ოჯახი - ამიტომ, მნიშვნელოვანია, სახელმწიფოს პროაქტიული მოქმედებები ასაკის ნიშნით დისკრიმინაციის აღმოსაფხვრელად. დღემდე ეროვნულ კანონმდებლობაში შეტანილი ცვლილებებით თუ კონსტიტუციური შესწორებებით, არაერთმა ქვეყანამ განახორციელა კონკრეტული ღონისძიებები იმისათვის, რომ ბავშვებმა ისარგებლონ საკუთარი უფლებებით უფროსების თანასწორად“, ნათქვამია ბლოგპოსტში. სრულად... წყარო: phr.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: 9 მაისის აღნიშვნა რუსეთში. IDFI-ის ბლოგში გაეცნობით, როგორ იცვლებოდა 9 მაისის მიმართ დამოკიდებულება წლების მანძილზე, რა ფორმებს იძენდა ამ დღისადმი მიძღვნილი მთავარი აღლუმი თანამედროვე რუსეთის ფედერაციაში და რომელი სიმბოლოები თუ ნარატივები დომინირებდა ამ დღესთან მიმართებით. სრულად... წყარო: idfi.ge

თბილისი. გავრცელებული ინფორმაციით, 2022 წლის 26 აპრილს, აიდა ბალაფკანი, რომელიც დიდი ბრიტანეთის მოქალაქეა და საქართველოში აკადემიური მიზნებით გეგმავდა ჩამოსვლას, საქართველოს შინაგან საქმეთა სამინისტრომ ქვეყანაში არ შემოუშვა. „სამინისტროს ეს გადაწყვეტილება საზღვრის კვეთის სფეროში თვითნებური და სავარაუდოდ დისკრიმინაციული პრაქტიკის კიდევ ერთი მაგალითია. მიღებული გადაწყვეტილება სხვა უფლებებთან ერთად, აკადემიური საქმიანობისთვის და ამ კუთხით გლობალური თანამშრომლობის პროცესს უშლის ხელს“, ნათქვამია ორგანიზაციის განცხადებაში. სოციალური სამართლიანობის ცენტრი მოუწოდებს შსს-ს: •    ბათილად ცნოს 26 აპრილის გადაწყვეტილება და მკვლევარ ქალს საქართველოში შემოსვლის უფლება მისცეს; •    შეწყვიტოს „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის მე-11 მუხლის 1-ლი პუნქტის „ი“ ქვეპუნქტის არაკონსტიტუციური გამოყენება და მისგან მომდინარე უფლების შეზღუდვის თვითნებური პრაქტიკა. სრულად... წყარო: socialjustice.org.ge

იმერეთი. 4-5 მაისს, წყალტუბოში გაიმართა ორდღიანი სამუშაო შეხვედრა, რომელიც უნივერსიტეტებში ბავშვის უფლებების სწავლებას მიეძღვნა.  ღონისძიება ჩატარდა გაეროს ბავშვთა ფონდის პროექტის ფარგლებში, რომელიც უმაღლესი სასწავლებლების პროფესორების პროფესიულ განვითარებას შეეხება ბავშვის უფლებების კუთხით. სრულად... წყარო: ორგანიზაციის გვერდი სოციალურ ქსელში

10 მაისს, 19:00 საათზე, „თანასწორობის მოძრაობის“ ოფისში გაიმართება შეხვედრა აივ ინფექციის პოსტ-ექსპოზიციური თერაპიის შესახებ (PEP). შეხვედრაზე განიხილება PEP-ის მნიშვნელობა, ეფექტურობა, ჩვენებები და პროგრამაში ჩართვის კრიტერიუმები. სრულად...

10 მაისს, 13:00 საათზე, კინოცენტრის საექსპერტო კომისიის გათავისუფლებული წევრები, სამართლიანი არჩევნებისა და დემოკრატიის საერთაშორისო საზოგადოების აღმასრულებელ დირექტორ ნინო დოლიძესთან ერთად პრესკონფერენციას გამართავენ. თემა: „რეპრესიების მორიგი ტალღა კინოცენტრში“. მისამართი: თბილისი, თაბუკაშვილის 5, ISFED-ის ოფისი.

9 მაისს, 21:00 საათზე, ევროპის დღესთან დაკავშირებით გაიმართება ფილმის „მე და ევროპა“ პრეზენტაცია. სრულად...

თბილისი. ინფორმაციის თავისუფლების განვითარების ინსტიტუტის (IDFI)  ცნობით, საერთაშორისო ორგანიზაცია Reporters Without Borders (შემდგომ “RSF”) ყოველწლიურად აქვეყნებს პრესის თავისუფლების გლობალური ინდექსის მაჩვენებელს 180 ქვეყნის მიხედვით. „საზოგადოებისთვის დღეს გახდა ხელმისაწვდომი გლობალური ინდექსის 2022 წლის შეფასებები, რომლის მიხედვითაც, საქართველოში მედიის თავისუფლების მაჩვენებელი წინა წელთან შედარებით საგრძნობლად გაუარესდა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. სოციალური სამართლიანობის ცენტრი გთავაზობთ ინტერვიუს ელიზაბეტ ქულენ დანთან, რომელიც არის ამერიკელი პოლიტიკური ანთროპოლოგი, გეოგრაფი და ინდიანას ბლუმინგტონის უნივერსიტეტის პროფესორი. ამასთან, იგი მიგრაციის საკითხებზე მუშაობს და სხვადასხვა დროს კვლევას აწარმოებდა საქართველოსა და პოლონეთში. „შეუძლებელი იყო გაგეგო, ხვალ რა გექნებოდა, რა ტიპის დახმარებას მიიღებდი. [სამხრეთ ოსეთიდან დევნილებმა] ყოველდღიურობაში ისიც არ იცოდნენ, ისინი ზამთრისთვის ახალ ტანსაცმელს თუ მიიღებდნენ დახმარების სახით. სხვათა შორის, საკმაოდ ბევრმა ადამიანმა ის პირველი ზამთარი ფეხსაცმლის გარეშე, სახლის ჩუსტებში გაატარა ტალახსა და წვიმაში. იძულებით გადაადგილებულ პირებს არ შეეძლოთ საკუთარი მომავლის დაგეგმვა, რადგან არ იცოდნენ, თუ რა სახის რესურსებს მიიღებდნენ. ... რასაც ჩვენ უკრაინაში ვხედავთ, უზარმაზარ იმედად მივიჩნევ. ადამიანებმა გადაწყვიტეს, რომ არ დარჩენილიყვნენ მარტოები, რომ ერთად ემუშავათ და აეშენებინათ დახმარების ჯაჭვები, რათა მიეწოდებინათ დახმარება მათთვის, ვისაც ეს სჭირდებოდა. ის დახმარება, რაც უკრაინაში მიდის, მოძრაობს პირადი ნაცნობობისა და კონტაქტების მეშვეობით. ეს სოლიდარობა ძალიან იმედისმომცემია“. სრულად... წყარო: socialjustice.org.ge

სამცხე-ჯავახეთი. „საერთაშორისო გამჭვირვალობა - საქართველო“ პერიოდულად იკვლევს „მბრუნავი კარის“ პრაქტიკას საქართველოში. „მბრუნავი კარი” საჯარო და კერძო სექტორებს შორის ინტერესთა კონფლიქტისა და კორუფციის რისკების შემცველი სამსახურეობრივი გადაადგილებაა. ორგანიზაციამ ასეთი ფაქტი ბორჯომის მუნიციპალიტეტში გამოავლინა - „ფირან გოგიჩაშვილმა ბორჯომის საკრებულოს წევრობის პერიოდში თავისი კომპანია უსასყიდლოდ გადასცა ინდმეწარმე ვასილ მჭედლიძეს, საკრებულოს ვადის ამოწურვის შემდეგ კი, 2022 წელს, ისევ უკან დაიბრუნა. 2018-2021 წლებში, ფირან გოგიჩაშვილის კომპანიას და ვასილ მჭედლიძეს 53 სახელმწიფო შესყიდვით, 2,387,840 ლარი დაერიცხათ“. სრულად... წყარო: transparency.ge

ქვემო ქართლი. მარნეულში, დემოკრატიული ჩართულობის ცენტრში, ახალგაზრდებისთვის სოციალური მეწარმეობის ახალგაზრდა ელჩების პროგრამის შესახებ საინფორმაციო შეხვედრა გაიმართა. „შეხვედრაზე სოციალური მეწარმეობის მნიშვნელობასა და ახალგაზრდების კარიერისა და სამომავლო საქმიანობის მხრივ სოციალური მეწარმეობის პერსპექტივებზე ისაუბრეს, მოწვეულმა სოციალურმა მეწარმეებმა კი თავიანთი გამოცდილება გააზიარეს. პროგრამაში მონაწილეობის შედეგად, რეგიონებიდან შეირჩევა სოციალური მეწარმეობის 5 ახალგაზრდა ელჩი, რომლებიც მიიღებენ ფინანსურ მხარდაჭერას და თანამოაზრეებთან ერთად იმუშავებენ სოციალური მეწარმეობით მეტი ადამიანის დაინტერესებაზე“. პროგრამას ახორციელებს საქართველოს სტრატეგიული კვლევებისა და განვითარების ცენტრი (CSRDG) ევროკავშირისა და პური მსოფლიოსთვის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. 5 მაისს გაიმართა ფორუმი სახელწოდებით - „რეპრესიები კულტურის სფეროში - კულტურის მოთვინიერების მცდელობა“. „კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ, კულტურის სფეროში განხორციელებულმა რეორგანიზაციამ და მასშტაბურმა ცვლილებებმა საკადრო წმენდის სახე მიიღო, რის ფონზეც სამინისტროს სხვადასხვა საქვეუწყებო დაწესებულებებიდან 70-ზე მეტი თანამშრომელია გათავისუფლდა. ფორუმის მიზანი იყო კულტურის სხვადასხვა სფეროს წარმომადგენლებისთვის დაგვეთმო სივრცე სისტემაში არსებული ცენზურისა და პოლიტიკური კონტროლის შესახებ სასაუბროდ“, ნათქვამია ორგანიზაციის გვერდზე სოციალურ ქსელში. სრულად...  წყარო: ორგანიზაციის გვერდი სოციალურ ქსელში

თბილისი. 6 მაისს, ფაბრიკაში ლგბტქი თემის მიმართ არსებული საზოგადოებრივი დამოკიდებულებისა და მათი უფლებრივი მდგომარეობის შესახებ ახალი კვლევების წარდგენა გაიმართა. „ლგბტქი ადამიანები საქართველოს საზოგადოების ერთ-ერთ ყველაზე დაუცველ და მარგინალურ ნაწილს წარმოადგენენ. ისინი ცხოვრების სხვადასხვა სფეროში დისკრიმინაციასა და ძალადობას განიცდიან, ხოლო მათი უფლებების დაცვისა და პრაქტიკაში რეალიზების მხრივ, კვლავაც მნიშვნელოვანი გამოწვევები არსებობს. შექმნილი ვითარების მიუხედავად, საზოგადოების ნეგატიური დამოკიდებულება ლგბტქი თემის მიმართ თანდათან მცირდება, რაც გაეროსა და შვედეთის მთავრობის ხელშეწყობით ჩატარებულმა ორმა ახალმა კვლევამაც დაადასტურა. ღონისძიება შვედეთის მთავრობისა და გაეროს სამი სააგენტოს - გაეროს ქალთა ორგანიზაციის (UN Women), გაეროს განვითარების პროგრამისა (UNDP) და გაეროს მოსახლეობის ფონდის (UNFPA) ხელშეწყობით ჩატარდა. სრულად... წყარო: ორგანიზაციის გვერდი სოციალურ ქსელში

აჭარა. 5 მაისს, ქალაქ ბათუმში, გაეროს ბავშვთა ფონდისა და ორგანიზაცია პრევენცია პროგრესისთვის/Prevention For Progress ორგანიზებით და European Union in Georgia-ს მხარდაჭერით არასრულწლოვანთა რეფერირების მულტიუწყებრივი რეგიონალური შეხვედრა გაიმართა. სრულად... წყარო: ორგანიზაციის გვერდი სოციალურ ქსელში

აჭარა. არასამთავრობო ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ ევროკავშირის პროექტის, „სამოქალაქო საზოგადოება შეზღუდული შესაძლებლობის მქონე პირთა უფლებებისთვის საქართველოში“ ფარგლებში, ბათუმში ევროპის დამოუკიდებელი ცხოვრების დღისადმი მიძღვნილ პანელურ დისკუსიას უმასპინძლეს. „ღონისძიების მთავარი თემა „შეზღუდული შესაძლებლობის მქონე პირთა დამოუკიდებელი ცხოვრება, გამოწვევები და მხარდამჭერი სერვისები“ იყო. შეხვედრაზე შეზღუდული შესაძლებლობის მქონე აქტივისტებმა და დამოუკიდებელი ცხოვრების ცენტრების ლიდერებმა განიხილეს ის გამოწვევები, რომელსაც შშმ პირები ხვდებიან და სერვისები, რომლებსაც აღნიშნული ცენტრები უზრუნველყოფენ“. სრულად... წყარო: eu4georgia.eu

იმერეთი. „ფონდი ტასო“, „ქალთა ეკონომიკური გაძლიერების“ პროექტის ფარგლებში, სამიზნე სოფლებს სტუმრობს. 5 მაისს ფონდმა სამუშაო შეხვედრა იმერეთის რეგიონის ორ სოფელში - დიმსა და თუზში გამართა. პროექტი ხორციელდება გაეროს ქალთა ორგანიზაციის (UN Women) და ნორვეგიის მთავრობის მხარდაჭერით, შიდა ქართლის, სამეგრელოს, გურიის, იმერეთისა და რაჭა-ლეჩხუმის რეგიონებში ახორციელებს. სრულად... წყარო: ორგანიზაციის გვერდი სოციალურ ქსელში

6 მაისს, 20:00 საათზე, მშობლის სკივრის ორგანიზებით, გაიმართება ვებინარი: აუტიზმის და ნეიროკოგნიტური დარღვევების მქონე მოზარდების დახმარება გარდატეხის ასაკში. სრულად...

6 მაისს, 19:00 საათზე, კომუნიკო ჰაინრიხ ბიოლის ფონდთან ერთად განხორციელებული კვლევითი პროექტის ფარგლებში დისკუსიას „ვინ ზრუნავს მასწავლებლებზე“ უმასპინძლებს. სრულად...

6 მაისს, 17:30 საათზე, ინფორმაციის თავისუფლების განვითარების ინსტიტუტი (IDFI) გიწვევთ ვებინარზე: „გამარჯვება, როგორც ინსტრუმენტი: 9 მაისი, გმირობა და თანამედროვე რუსული პროპაგანდა“. სრულად...