თბილისი. საქართველოს დემოკრატიული ინიციატივას (GDI) ინფორმაციით, ლაშა ჩხვიმიანმა კულტურის, სპორტისა და ახალგაზრდობის სამინისტროსა და მინისტრ თეა წულუკიანის წინააღმდეგ სახალხო დამცველს დისკრიმინაციის დადგენის მოთხოვნით მიმართა. განმცხადებლის ინტერესებს სახალხო დამცველის წინაშე GDI იცავს. „მიგვაჩნია, რომ ლაშა ჩხვიმიანიც სწორედ განსხვავებული შეხედულებების ღიად გაჟღერების გამო გახდა მინისტრ თეა წულუკიანის რეპრესიული პოლიტიკისა და დისკრიმინაციის მსხვერპლი“, ნათქვამია ორგანიზაციის განცხადებაში. სრულად... წყარო: gdi.ge

თბილისი. საქართველოს დემოკრატიული ინიციატივა (GDI) და ადამიანის უფლებათა ცენტრი (HRC) ეხმაურებიან 2022 წლის 4 აპრილს თბილისის საქალაქო სასამართლოს მოსამართლე ნინო ჩახნაშვილის მიერ გამოცხადებულ განაჩენს 2021 წლის 5 ივლისს ჟურნალისტებზე განხორციელებულ ძალადობასთან დაკავშირებულ საქმეზე. ამ საქმეში საქართველოს დემოკრატიული ინიციატივა იცავს „რადიო თავისუფლების“ დაზარალებული ჟურნალისტის, თორნიკე მანდარიას, ხოლო ადამიანის უფლებათა ცენტრი ოპერატორის, დავით ქორიძის ინტერესებს. ორგანიზაციები არ ეთანხმებიან გამოცხადებულ განაჩენს ბრალდების გადაკვალიფიცირებისა და სასჯელის ნაწილში. „ამგვარი მიდგომა ფაქტობრივად გამორიცხავს 2022 წლის 5 ივლისს ჟურნალისტებსა და სამოქალაქო აქტივისტებზე მასშტაბური, ჰომოფობიური ძალადობის ორგანიზატორებისთვის პასუხისმგებლობის დაკისრებას მაშინ, როდესაც დანაშაულის ორგანიზებულ ხასიათზე არაერთი მტკიცებულება მიუთითებს. ... მოვუწოდებთ საქართველოს პროკურატურას, გაასაჩივროს მიღებული განაჩენი სააპელაციო სასამართლოში“, ნათქვამია ერთობლივ განცხადებაში. სრულად... წყარო: www.hrc.ge

გურია. ღია საზოგადოების ფონდი წარმოგიდგენთ პროექტის „ცოდნისა და უნარების განვითარების ქსელებისა და პლატფორმების გაძლიერება“ ბენეფიციარებს გურიიდან. „ნინო კვიტაიშვილის, თაზო ჯოჯუას და ნინი გარდახაბაძის ცხოვრებაში ამ პროექტით მნიშვნელოვანი ცვლილებები დაიწყო. მიღებული ცოდნა, გაუმჯობესებული უნარები და გამოცდილება მათ კარიერულ წინსვლას, საკუთარ რეგიონში ახალი შესაძლებლობების აღმოჩენასა და აქტიურ მოქალაქეებად ჩამოყალიბებას უწყობს ხელს“. პროექტს ევროკავშირის მხარდაჭერით საქართველოს ოთხ რეგიონში - აჭარაში, გურიაში, ქვემო ქართლსა და შიდა ქართლში ახორციელებენ ღია საზოგადოების ფონდი და საქართველოს გაეროს ასოციაცია. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველოს“ ინიციატივით, 30-ზე მეტი საზოგადოებრივი ორგანიზაცია, 4 აპრილს სამუშაო შეხვედრაზე შეიკრიბა. ორგანიზაციის თანახმად, დისკუსიის თემა იყო უკრაინა-რუსეთის ომი, მასზე ოფიციალური თბილისის რეაგირება და განწყობები საზოგადოებაში, ასევე, ამ პროცესების გავლენა საქართველოს მომავალზე, მათ შორის ევროკავშირის კანდიდატის სტატუსის მიღების კუთხით. სრულად... წყარო: ორგანიზაციის გვერდი სოციალურ ქსელში

5 აპრილს, 12:00 საათზე, ონლაინ ფორმატში გაიმართება საზოგადოებრივი ორგანიზაციების საგადასახადო გარემოს კვლევის შედეგების პრეზენტაცია. სრულად...

თბილისი. გავრცელებული ინფორმაციებითა და კადრებით, ქალაქი ბუჩა და უკრაინის სხვა ქალაქები მშვიდობიანი მოსახლეობის, მათ შორის, ქალების, ბავშვების, მოხუცების მკვლელობის, წამების, გაუპატიურებისა და ომის სხვა უმძიმესი დანაშაულების ადგილი გახდა. სოციალური სამართლიანობის ცენტრი უკიდურეს შეშფოთებას გამოხატავს და სოლიდარობას უცხადებს უკრაინელ ერს. „პოსტ-საბჭოთა ხალხებს, მათ შორის ქართველ ხალხს ამ პოლიტიკისა და იდეოლოგიის ფასი ჩვენს სიცოცხლეზე, სხეულებზე და ყოველდღიურობაში გვაქვს განცდილი და კარგად ვიცით, რა მძიმეა ის ტრაგედია, ტრავმა და დანაკარგი, რომელიც უკრაინელ ხალხს აქვთ. თქვენი ტკივილი, ჩვენი ტკივილია და ჩვენს თანაგრძნობას და სოლიდარობას საზღვარი არ აქვს“. სრულად... წყარო: socialjustice.org.ge

თბილისი. სახალხო დამცველმა საქართველოში ადამიანის უფლებათა დაცვის მდგომარეობის შესახებ წლიური ანგარიში წარმოადგინა. ძირითადი მიგნებების თანახმად, „2021 წელს ადამიანის უფლებების დაცვის მდგომარეობა არსებითად არ გაუმჯობესებულა, მეტიც, რიგი მიმართულებებით მნიშვნელოვანი გაუარესებაც კი შეინიშნებოდა“. სრულად... წყარო: ombudsman.ge

აჭარა. ინფორმაციის თავისუფლების განვითარების ინსტიტუტის (IDFI) ცნობით, უმაღლესი საბჭოს დეპუტატებმა, კომიტეტების აპარატის თანამშრომლებმა და ღია მმართველობის საბჭოსა და უმაღლესი საბჭოს აპარატის წევრებმა გაიარეს ტრენინგები, საქმიანობის ყოველწლიური ანგარიშების მომზადებაში. ტრენინგები მოიცავდა ანგარიშის მომზადების როგორც თეორიულ, ისე პრაქტიკულ ნაწილს.  ტრენინგები გაიმართა ევროკავშირისა (EU) და გაეროს განვითარების პროგრამის (UNDP) პროექტის - „საპარლამენტო დემოკრატიის კონსოლიდაცია საქართველოში“ ფარგლებში. პროექტი მჭიდროდ თანამშრომლობს ინფორმაციის თავისუფლების განვითარების ინსტიტუტთან (IDFI), საქართველოს პარლამენტსა და აჭარის უმაღლეს საბჭოში ღია მმართველობის პრინციპების დანერგვის ხელშეწყობის მიზნით. სრულად... წყარო: idfi.ge

თბილისი. სოციალური სამართლიანობის ცენტრი წარმოგიდგენთ 2021 წლის საქმიანობის მიმოხილვას. დოკუმენტში მიმოხილულია ორგანიზაციის საქმიანობა, ქვეყანაში მიმდინარე პროცესებისა და ადამიანის უფლებების მხრივ არსებული მდგომარეობის კვალდაკვალ. ანგარიშს გაეცანით ბმულზე... წყარო: socialjustice.org.ge

თბილისი. კორუფციასთან ბრძოლის სასერტიფიკატო პროგრამის ფარგლებში, გაიმართა ანალიტიკური სტატიების კონკურსის - მამხილებლები კორუფციის წინააღმდეგ - გამარჯვებულთა დაჯილდოება. ინფორმაციის თავისუფლების განვითარების ინსტიტუტის (IDFI) ცნობით, გამოგზავნილი სტატიების შეფასების საფუძველზე პირველ ადგილზე გავიდა მონაწილეთა ჯგუფი შემდეგი შემადგენლობით: ლია აბლოთია, კობა აბლოთია და ეკატერინე დემეტრაშვილი. მეორე ადგილზე გავიდა ჯგუფი - ნინო ტაგანაშვილისა და მარიტა გორგილაძის მონაწილეობით, ხოლო მესამე ადგილი დაიკავა ჯგუფმა - მერი მაჭარაშვილისა და თინათინ ღვინიანიძის მონაწილეობით. სრულად... წყარო: idfi.ge

აჭარა. საქართველოს ახალგაზრდა იურისტთა ასოციაცია 2022 წლის ბათუმის საკრებულოს შუალედური არჩევნების კენჭისყრის დღის დაკვირვების შედეგებს აჯამებს. საიას დამკვირვებლების ინფორმაციით, მთელი დღის განმავლობაში უბნების მიმდებარე ტერიტორიაზე შეინიშნებოდა ამომრჩევლის ნების კონტროლის რეგულაციების, კერძოდ, შეკრების, ამომრჩევლის შეფერხებისა და აღრიცხვის აკრძალვის სრული უგულებელყოფა. უბნებთან იმყოფებოდნენ გავლენიანი პირები, მათ შორის, პარლამენტის დეპუტატები, თბილისისა და რეგიონების საკრებულოების წევრები - როგორც „ქართული ოცნების”, ასევე „ერთიანი ნაციონალური მოძრაობისა“ და სხვა პარტიების მხრიდან. დღის განმავლობაში დაფიქსირდა აგიტაციის რამდენიმე შემთხვევა. ორგანიზაციის განცხადებით, დარღვევები უკავშირდება არჩევნებში მონაწილე ორივე პარტიას. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: რუსული დეზინფორმაციის ტენდენციები საქართველოში უკრაინის ომის პარალელურად. „რუსული დეზინფორმაციის მასშტაბები, ისევე როგორც რუსული დეზინფორმაციის ტონი, გაიზარდა და გაძლიერდა უკრაინის ტერიტორიაზე რუსეთის აგრესიული შეჭრის შემდეგ. ადგილობრივად, ქართულ ენაზე ვრცელდება სხვადასხვა მიმართულებით დეზინფორმაციული ნარატივები. დეზინფორმაციული ნარატივები ემატება რუსეთის უფრო დიდ ინფორმაციულ იარაღს - მისი სიდიადისა და დაუმარცხებლობის შესახებ, რომელიც უკვე წლებია დამკვიდრებულია რეგიონში“.  სრულად... წყარო: idfi.ge

თბილისი. თბილისის ადამიანის უფლებათა სახლი უკრაინელი უფლებადამცველების, აქტივისტებისა და ჟურნალისტების ინდივიდუალური მხარდაჭერისთვის შემოწირულობების შეგროვებას იწყებს.  „უკრაინაში რუსეთის თავდასხმის შედეგად ბევრ უფლებადამცველს, აქტივისტს და ჟურნალისტს მოუწია საკუთარი საცხოვრებელი ადგილის იძულებით დატოვება. ამის მიუხედავად, ისინი აქტიურად აგრძელებენ უფლებადაცვით საქმიანობას, მუშაობენ მოხალისეებად, ადოკუმენტირებენ ომის დანაშაულებს და ა.შ. შექმნილ მდგომარეობაში მათ ფინანსური მხარდაჭერა სჭირდებათ - როგორც უკრაინაში, ასევე ქვეყნის გარეთ“. თუ გაქვთ სურვილი, შეგიძლიათ გაიღოთ შემოწირულობა... ანგარიშის ნომრები: ლარი: #GE41TB7249036080100001 დოლარი/ევრო: #GE85TB7249036180100001 მიმღები: თბილისის ადამიანის უფლებათა სახლი დანიშნულება: შემოწირულობა უკრაინისთვის სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი და ქვემო ქართლი. საქართველოს სტრატეგიისა და განვითარების ცენტრის ორგანიზებით, ეთნიკური უმცირესობებისთვის ფინანსებზე ხელმისაწვდომობის გაზრდის პროექტის ფარგლებში, 23-25 მარტს, სამცხე-ჯავახეთისა და ქვემო ქართლის რეგიონების 5 ქალაქში შეხვედრები გამართა. შეხვედრები მიზნად ისახავდა აღნიშნულ რეგიონებში მიკრო და მცირე ბიზნესების საჭიროებებისა და მათ წინაშე მდგარი გამოწვევების გამოვლენას და ადგილობრივი ბიზნეს გარემოს შეფასებას.  პროექტი, შვეიცარიის განვითარებისა და თანამშრომლობის სააგენტოს მხარდაჭერით, “Rural SMEs Development Programme”-ის ფარგლებში ხორციელდება. სრულად... წყარო: ორგანიზაციის გვერდი სოციალურ ქსელში

იმერეთი. განათლების განვითარების და დასაქმების ცენტრმა (EDEC) მეტყველების განვითარების და კორექციის ცენტრთან „ლოგომედი“ ერთად, 26 მარტს ქუთაისში მცხოვრებ 70-მდე ბავშვს მეტყველების პირველადი დიაგნოსტიკა უფასოდ ჩაუტარა. სრულად... წყარო: ორგანიზაციის გვერდი სოციალურ ქსელში

თბილისი. 1-3 აპრილს, ქალთა საინფორმაციო ცენტრისა და საქართველოს ოკუპირებული ტერიტორიებიდან იძულებით გადაადგილებულ პირთა, შრომის, ჯანმრთელობისა და სოციალური დაცვის სამინისტროს ორგანიზებით გაიმართა ტრენინგი „გენდერი და გენდერული ურთიერთობები“. სრულად... წყარო: ორგანიზაციის გვერდი სოციალურ ქსელში

4 აპრილს, 12:00 საათზე, სახალხო დამცველი საზოგადოებას 2021 წლის „ადამიანის უფლებათა და თავისუფლებათა მდგომარეობის შესახებ“ საპარლამენტო ანგარიშს წარუდგენს. მისამართი: თბილისი, აღმაშენებლის #80

თბილისი. სამოქალაქო საზოგადოების ორგანიზაციები და პროფესიული წრეები აქვეყნებენ ღია წერილს და კიდევ ერთხელ გამოხატავენ უკიდურეს შეშფოთებას თბილისში, ელბაქიძის აღმართზე, მიხეილ ჯავახიშვილის სახლის სიახლოვეს, საქანელას ქუჩაზე დაგეგმილი მასშტაბური მშენებლობის გამო. „„სილქნეტის“ მიერ ინიცირებული ეს პროექტი, ლახავს ქალაქის ისტორიული განაშენიანების და მასში დაცული ძეგლების სივრცით არქიტექტურულ გარემოს. მშენებლობა, რომელიც სრულიად ცვლის ქალაქის ისტორიულ მახასიათებლებს, უშვებს განაშენიანების არატრადიციული ფორმების დომინაციას, რაც დამღუპველია ჩვენი იდენტობის და კულტურის შემადგენელი თბილისის ისტორიული ნაწილისათვის. ამ მასშტაბის ჩარევა, მომავალში, ბიძგს მისცემს მარჯვენა სანაპიროზე, მასიური და უსახური სხვა მშენებლობების განხორციელებას. ყოველივე ზემოთთქმული, ეწინააღმდეგება საქართველოს კულტურული მემკვიდრეობის დაცვის კანონმდებლობას“, ნათქვამია განცხადებაში. სრულად... წყარო: socialjustice.org.ge

იმერეთი. გავრცელებული ინფორმაციით, უკანასკნელი ორი კვირის განმავლობაში ჭიათურის სოფელ ითხვისში თავი იჩინა საცხოვრებელი სახლების დაზიანების ახალმა შემთხვევებმა. წინასწარი ინფორმაციით აღდგენასა და შეკეთებას აღარ ექვემდებარება უკვე 12 საცხოვრებელი სახლი და დაზარალებულია 11 ოჯახი, რომელთაგან 7, ჭიათურის მერიის ინფორმაციით, საცხოვრებლით უზრუნველყოფას საჭიროებს. სამოქალაქო საზოგადოების ორგანიზაციები მოითხოვენ: მინერალური რესურსების ეროვნულმა სააგენტომ დაუყოვნებლივ შეისწავლოს ითხვისის ტერიტორიაზე და მის მიმდებარედ „ჯორჯიან მანგანეზის” ლიცენზიის ფარგლებში მიმდინარე მოპოვებითი სამუშაოები; გარემოს დაცვისა და სოფლის მეურნეობის სამინისტრომ შეისწავლოს გარემოსთვის მიყენებული ზიანი და ადამიანების სიცოცხლისთვის შექმნილი საფრთხე; ტექნიკური და სამშენებლო ზედამხედველობის სააგენტომ შეაფასოს მაღაროს მდგომარეობა მომავალში საფრთხის თავიდან არიდების მიზნით; ეკონომიკისა და მდგრადი განვითარების, ინფრასტრუქტურისა და რეგიონალური განვითარების და ჯანდაცვისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროებმა დაიწყონ კოორდინირებული მუშაობა განსახლების ღირსეული და საერთო სტანდარტის შემუშავებისთვის. საქართველოს პარლამენტის გარემოს დაცვისა და ბუნებრივი რესურსების კომიტეტმაშეასრულოს კანონით გათვალისწინებული, დროული და ქმედითი საზედამხედველო ფუნქცია. სრულად... წყარო: gyla.ge

აჭარა. პროექტის „სამოქალაქო საზოგადოების ინიციატივის“ ფარგლებში, მიმდინარე წლის მარტის თვეში გაიმართა მოსახლეობასთან შეხვედრები, ქედის მუნიციპალიტეტის სოფელ ხარაულასა და ქობულეთის მუნიციპალიტეტის სოფელ ლეღვაში.  სოფლის მაცხოვრებლებს შეზღუდული შესაძლებლობების მქონე ქალთა ალიანსის წარმომადგენელი, დეა ერემაშვილი შეხვდა. ადგილობრივებს მიეწოდათ ინფორმაცია ორგანიზაციის საქმიანობაზე და იმ სერვისებზე, რომელსაც შშმ ქალთა ალიანსი სთავაზობს ბენეფიციარებს. აჭარის რეგიონული ჰაბი ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში შეიქმნა. სრულად... წყარო: ორგანიზაციის გვერდი სოციალურ ქსელში

5 აპრილს 12:00 სათზე ონლაინ ფორმატში გაიმართება საზოგადოებრივი ორგანიზაციების საგადასახადო გარემოს კვლევის შედეგების პრეზენტაცია.  შეხვედრის მიზანია დაინტერესებული მხარეები გაეცნონ კვლევის მიგნებებსა და შედეგებს, იმსჯელონ მომზადებულ დოკუმენტში განხილულ საკითხებზე და მონაწილეობა მიიღონ საკითხის გარშემო გამართულ დისკუსიაში.  კვლევა...  ონლაინ შეხვედრას მართავს სამოქალაქო საზოგადოების ინსტიტუტი (CSI), ევროკავშირისა და კონრად ადენაუერის ფონდის მიერ დაფინანსებული პროექტის - „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ - ფარგლებში.  სრულად...

თბილისი. ინფორმაციის თავისუფლების განვითარების ინსტიტუტის (IDFI) თანახმად, ღია მმართველობის პარტნიორობამ მნიშვნელოვანი როლი ითამაშა გადაწყვეტილების მიღების პროცესში მოქალაქეთა ჩართულობის მექანიზმების დანერგვისა და ზოგადად, საჯარო და სამოქალაქო სექტორებს შორის თანამშრომლობის პრაქტიკის გაუმჯობესებაში. თუმცა, აუცილებელია ხელისუფლების მეტი გახსნილობა და მიმღებლობა ამბიციური რეფორმებისა და სამოქალაქო სექტორის მიერ წარდგენილი ინიციატივების მიმართ. სრულად... წყარო: idfi.ge