თბილისი. ადამიანის უფლებათა ცენტრის განცხადებით, მთავარმა პროკურატურამ უნდა გამოიძიოს მთავარი პროკურორის სავარაუდო მონაწილეობა ბიზნესმენის ქონების იძულებით დათმობის პროცესში. „მათ შორის, მნიშვნელოვანია, მთავარმა პროკურატურამ გამოკვეთოს ყოფილი მთავარი პროკურორის, ირაკლი შოთაძის პასუხისმგებლობა როგორც უშუალოდ დავით ადეიშვილის მიმართ ჩადენილ დანაშაულში, ისე შემდგომში ამ დანაშაულის გამოძიების გაჭიანურებაზე. ადამიანის უფლებათა ცენტრი იცავს დავით ადეიშვილის სამართლებრივ ინტერესებს. დავით ადეიშვილი იყო შპს „ლეონის" 50% წილის მფლობელი და ამავე კომპანიის დირექტორი," ნათქვამია ორგანიზაციის ვებგვერდი სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

  თბილისი. თბილისში იურიდიული დახმარების შესახებ მესამე საერთაშორისო კონფერენცია (ILAC 2018) მიმდინარეობს. კონფერენცია გუშინ გაიხსნა და სამი დღის განმავლობაში იმუშავებს. კონფერენცია, რომელშიც 60 ქვეყნის 300-ზე მეტი სტუმარი მონაწილეობს - პარლამენტების, მთავრობების, მართლმსაჯულების სისტემის, აკადემიური წრეებისა და სამოქალაქო საზოგადოების წარმომადგენლები, უფლებადამცველები, პრაქტიკოსი იურისტები და ექსპერტები. კონფერენციის მონაწილეები განიხილავენ იმ შესაძლებლობებს და ღონისძიებებს, რაც ხელს შეუწყობს იურიდიული დახმარების ეფექტური და ინსტიტუციურად გამართული სისტემების შექმნას. ეს უმნიშვნელოვანესია საქართველოს მოქალაქეებისთვის, განსაკუთრებით მათთვის, ვისაც სოციალური მდგომარეობისა თუ სხვა ბარიერის გამო, ხშირადხელი არ მიუწვდება კვალიფიციურ იურიდიულ დახმარებაზე, მათ შორის, სასამართლოში წარმომადგენლობაზე ადვოკატის მეშვეობით. სრულად  წყარო: http://www.osgf.ge  

თბილისი. „ქალთა მზერა" წარმოგიდგენთ გრაფიკულ ვიდეო სერიებს: დემოკრატია მრავალფეროვნებაშია. ქვემოთ წარმოდგენილი ვიდეო სერია შეეხება საქართველოში მცხოვრები მუსლიმი მოქალაქეების დისკრიმინაციას სკოლებში და სამუშაო ბაზარზე. „მუსლიმი ქალები, რომლებიც ირჩევენ ჩადრის ტარებას, ხშირად აწყდებიან დისკრიმინაციას სამსახურის ძებნისას. მათ სთხოვენ ჩადრის მოხსნა, ან სულაც მრწამსის გამო არ იყვანენ სამსახურში." სრულად... წყარო: ორგანიზაციის ვებგვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: ხელისუფლების მიერ მეორე ტურის წინ დაანონსებული პროგრამები ადმინისტრაციული რესურსის გამოყენებას წარმოადგენს. „ახალი პროექტების დაპირებები, რომელთა შესახებ არჩევნების პირველ ტურამდე ცნობილი არ ყოფილა, ქმნის შთაბეჭდილებას, რომ ეს ინიციატივები არჩევნების პირველი ტურის შედეგებს უკავშირდება და მათი მიზანი არჩევნების მეორე ტურში მმართველი პარტიის მიერ მხარდაჭერილი კანდიდატისთვის ამომრჩეველთა მხარდაჭერის მოპოვებაა. ჩნდება განცდა, რომ ხელისუფლებაში მყოფი პარტია - „ქართული ოცნება", რომელსაც ხელი მიუწვდება ყველა სახის ადმინისტრაციულ რესურსზე, ცდილობს მისი მხარდაჭერილი კანდიდატის გამარჯვების შანსი ფინანსური და აღსრულებითი ადმინისტრაციული რესურსის გამოყენებით გაზარდოს. ამ ფონზე, სალომე ზურაბიშვილის დამოუკიდებელი კანდიდატის სტატუსით რეგისტრაცია მხოლოდ ფორმალურ ხასიათს ატარებს და ზღვარი მმართველ პარტიასა და ზურაბიშვილის საარჩევნო კამპანიას შორის ფაქტობრივად აღარ არსებობს," ნათქვამია ორგანიზაციის ვებგვერდზე. სრულად... წყარო: www.isfed.ge

თბილისი. „ინფორმაციის თავისუფლების განვითარების ინსტიტუტის" (IDFI) მიერ გავრცელებული ინფორმაციის მიხედვით, Freedom House-ის ანგარიშში საქართველოს ინტერნეტ-თავისუფლების რეიტინგი გაუარესდა. „1 ნოემბერს მსოფლიოში ინტერნეტ-თავისუფლების შესახებ Freedom House-ის ყოველწლიური ანგარიში გამოქვეყნდა. 2018 წელს საქართველომ 100-დან 25 ქულა აიღო და ინტერნეტ-თავისუფლების მხრივ შეფასდა, როგორც „თავისუფალი" ქვეყანა. 2017 წელთან შედარებით, ქვეყნის ქულა ერთით გაუარესდა", - აღნიშნულია ინფორმაციაში. სრულად  წყარო: idfi.ge

თბილისი. სამოქალაქო პლატფორმა „არა ფობიას!" საქართველოს ექსპრეზიდენტისა და პოლიტიკური პარტია „ერთიანი ნაციონალური მოძრაობის" ლიდერის, მიხეილ სააკაშვილის მიერ 2018 წლის 4 ნოემბერს გაკეთებულ განცხადებას ეხმაურება. „პლატფორმის წევრი ორგანიზაციები მოვუწოდებთ მას, ისევე როგორც სხვა პოლიტიკოსებს, თავი შეიკავონ სიძულვილის ენის გამოყენებისგან და მეტიც, აქტიურად შეუწყონ ხელი თანასწორობაზე, ტოლერანტობასადა ადამიანის უფლებებზე დაფუძნებული პოლიტიკური იდეების დამკვიდრებას საზოგადოებაში", - ნათქვამია გავრცელებულ განცხადებაში, - „მიგვაჩნია, რომ აღნიშნული განცხადება წარმოადგენს ეთნიკური და სოციალური/კლასობრივი ნიშნით პირთა დისკრიმინაციის წახალისებას და აფრიკის და აზიის ქვეყნებიდან მიგრანტების, როგორც ისედაც მოწყვლადი სოციალური ჯგუფების მარგინალიზაციას აღრმავებს. ამგვარი განცხადებები უარყოფით გავლენას ახდენს თანასწორობაზე, საზოგადოებრივ კონსოლიდაციაზე დაფუძნებული პოლიტიკური გარემოს ჩამოყალიბებაზე და ხელს უწყობს ქსენოფობიური განწყობების გაძლიერებას და პოლიტიზირებას ჩვენს საზოგადოებაში". სრულად  წყარო: www.osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) აცხადებს, რომ საქართველოს პროკურატურა არ ასაჯაროებს ინფორმაციას, სისტემაში მიმდინარე რეორგანიზაციის შესახებ. „EMC-იმ, პროცესის მონიტორინგის მიზნით, მიმდინარე წლის 12 სექტემბერს, განცხადებით მიმართა საქართველოს პროკურატურას და გამოითხოვა რეორგანიზაციასთან დაკავშირებული დეტალური ინფორმაცია... უწყებამ, კანონმდებლობით დადგენილ ვადაში, არ მოგვაწოდა აღნიშნული ინფორმაცია. EMC-იმ, მიმდინარე წლის 11 ოქტომბერს, განმეორებით მიმართა საქართველოს პროკურატურას გამოთხოვილი ინფორმაციის შემჭიდროვებულ ვადაში მოწოდების შესახებ. თუმცა, რეორგანიზაციის პროცესთან დაკავშირებულ ინფორმაციას პროკურატურა ამ დრომდე არ ასაჯაროებს", - აღნიშნულია EMC-ის მიერ გავრცელებულ ინფორმაციაში, - „დახურულ კარს მიღმა მასშტაბური საკადრო და სტრუქტურული ცვლილებების განხორცილება აზიანებს რეორგანიზაციის პროცესის სანდოობას როგორც სისტემის შიგნით, ასევე გარეთ. EMC მოუწოდებს საქართველოს მთავარ პროკურორს, უზრუნველყოს პროცესის გამჭვირვალედ წარმართვა და დაინტერესებული ჯგუფებისთვის ხელმისაწვდომი გახადოს რეორგანიზაციის პროცესთან დაკავშირებული ინფორმაცია". სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები ავრცელებენ მორიგ განცხადებას, საქართველოს პარლამენტის თავმჯდომარის მიერ გაკეთებულ განცხადებასთან დაკავშირებით. „2018 წლის 2 ნოემბერს, საქართველოს პატრიარქთან გამართული შეხვედრის შემდეგ, მმართველმა გუნდმა გაასაჯაროვა გადაწყვეტილება კანაფის კულტივაციასთან დაკავშირებული კანონპროექტის პარლამენტიდან გაწვევის შესახებ. ირაკლი კობახიძის განცხადებით, ასევე პრინციპული გადაწყვეტილებაა მიღებული, რომ განხორციელდეს ცვლილებები, რომელიც ჩარჩოში მოაქცევს საკონსტიტუციო სასამართლოს გადაწყვეტილების მიღებას ნარკოტიკული პოლიტიკის სფეროში”, - ვკითხულობთ განცხადებაში, - „პარლამენტის თავმჯდომარის განცხადება საკონსტიტუციო სასამართლოს შესახებ ქვეყანაში კონსტიტუციური წესრიგისთვის დამაზიანებელია". სრულად  წყარო: emc.org.ge

იმერეთი. ქმედუნარიანობის რეფორმის შესახებ მორიგი სამუშაო შეხვედრა ორგანიზაციამ „პარტნიორობა ადამიანის უფლებებისთვის" (PHR) ქუთაისის დღის ცენტრ „ვალენტინში" გამართა. შეხვედრის მიზანი, ქმედუნარიანობის რეფორმასთან დაკავშირებული საკითხების შესახებ, ცენტრის თანამშრომლების, მისი მხარდამჭერების, შეზღუდული შესაძლებლობების მქონე ბავშვების მშობლების ინფორმირება იყო. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრის" (EMC) განცხადებით, საქართველოს პარლამენტის იურიდიულმა კომიტეტმა, პროკურატურის რეფორმის შესახებ უმნიშვნელოვანესი ცვლილებები, სხდომის შესახებ ინფორმაციის წინასწარი გამოქვეყნების გარეშე, განიხილა. „იურიდიული კომიტეტის სხდომის შესახებ ინფორმაცია პარლამენტის ვებ-გვერდზე გამოქვეყნებული არ ყოფილა. შესაბამისად, დაინტერესებულ ჯგუფებს არ მიეცათ შესაძლებლობა დასწრებოდნენ კანონპროექტის განხილვას და მონაწილეობა მიეღოთ დისკუსიაში", - აღნიშნულია EMC-ის მიერ გავრცელებულ ინფორმაციაში, - „იმ პირობებში, როცა პროკურატურის სისტემის დამოუკიდებლობის და მიუკერძოებლობის მიმართ არაერთი ლეგიტიმური კითხვა არსებობს და ინიცირებული კანონპროექტის მიმართაც ბევრი შენიშვნაა გამოთქმული, საზოგადოებრივი ჯგუფების მონაწილეობის გარეშე, მეორე და ყველაზე მნიშვნელოვანი საკომიტეტო მოსმენის ჩატარება, ამ რეფორმის მიმართ ნდობას და მოლოდინებს კიდევ უფრო ამცირებს". სრულად  წყარო: ორგანიზაციის ვებგვერდი

თბილისი. გავრცელებული ინფორმაციით, 2018 წლის 30 ოქტომბერს, ახალქალაქში გაერთიანებული ოპოზიციის საპრეზიდენტო კანდიდატის გრიგოლ ვაშაძის საარჩევნო შტაბის წევრებს თავს დაესხნენ. გიორგი ვაშაძის მითითებით, შტაბთან გამოცხადებულ თავდამსხმელებს შორის „ქართული ოცნების" დეპუტატის ენძელ მკოიანის ოჯახის წევრი იყო. „საქართველოს სახალხო დამცველი ხაზგასმით აღნიშნავს, რომ მსგავსი ინციდენტები მნიშვნელოვნად აბრკოლებს წინასაარჩევნო გარემოს თავისუფალ და მშვიდ ვითარებაში მიმდინარეობის პროცესს, რაც საბოლოოდ ქვეყნის დემოკრატიული განვითარების ხარისხზე უარყოფითად აისახება. შესაბამისად, აუცილებელია მოხდეს დანაშაულის ჩამდენი ყველა პირის დროული იდენტიფიცირება და მათ მიმართ კანონით გათვალისწინებულ ღონისძიებათა გატარება. გარდა ამისა, მნიშვნელოვანია გამოძიების პროცესში შეფასება მიეცეს სავარაუდო პოლიტიკური მოტივის არსებობას და საჭიროების შემთხვევაში, შეიცვალოს დანაშაულის კვალიფიკაცია", ნათქვამია განცხადებაში. სრულად... წყარო: ომბუდსმენის ვებგვერდი სოციალურ ქსელში

თბილისი. კარვების გაშლის თვითნებური და უკანონო შეზღუდვის საქმეზე მორიგი სხდომა ჩაინიშნა. „31 ოქტომბერს 10:00 საათზე თბილისის საქალაქო სასამართლოში დანიშნულია მოსარჩელეების ზაზა სარალიძის და მალხაზ მაჩალიკაშვილის სარჩელის განხილვა. მოპასუხეების საქართველოს შინაგან საქმეთა სამინისტროს და საქართველოს შინაგან საქმეთა სამინისტროს საპატრულო პოლიციის დეპარტამენტის წინააღმდეგ იმ გადაწყვეტილების (ქმედების) ბათილად ცნობის თაობაზე, რომლითაც მოსარჩელეებს შეეზღუდათ მშვიდობიანი შეკრების უფლება და არ მიეცათ კარვის განთავსების შესაძლებლობა პარლამენტის შენობის მიმდებარე ტროტუარზე", ნათქვამია ორგანიზაციის ვებგვერდზე სოციალურ ქსელში. სრულად... წყარო: gyla.ge

კახეთი. 25 ოქტომბერს, იაკობ გოგებაშვილის სახელობის თელავის სახელმწიფო უნივერსიტეტში „კონსტიტუციის 42-ე მუხლი"-ს იურისტებმა ჩაატარეს სემინარი სამუშაო ადგილზე შევიწროების/სექსუალური შევიწროების თემაზე. „სემინარზე სტუდენტებს გააცნეს სამუშაო ადგილზე შევიწროების დეფინიცია; საერთაშორისო თუ საქართველოში ჩატარებული კვლევების მიგნებები შევიწროების/სექსუალური შევიწროების შესახებ; ქართულ კანონმდებლობაში არსებული ხარვეზები, რაც სამუშაო ადგილზე შევიწროების/სექსუალური შევიწროების წინააღმდეგ ეფექტურად ბრძოლას ართულებს. სემინარის დასკვნითი ნაწილი დაეთმო სასმართლო გამოცდილებისა და კონკრეტული სიტუაციური მაგალითების განხილვას დისკუსიის რეჟიმში", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. საზოგადოებრივი ორგანიზაციები ზაზა სარალიძის დაკავების ფაქტს გამოეხმაურნენ. მათი განცხადებით, ზაზა სარალიძის ქმედება შინაგან საქმეთა სამინისტრის მიერ ადამიანის უფლებების უხეში და განგრძობითი დარღვევის გამოძახილია. „ზაზა სარალიძის, მალხაზ მაჩალიკაშვილისა და მისი მხარდამჭერების მიერ საქართველოს პარლამენტის წინ მრავალდღიანი მშვიდობიანი პროტესტის დროს საქართველოს შინაგან საქმეთა სამინისტრომ არაერთხელ დაარღვია საქართველოს კონსტიტუცია და კანონი „შეკრებებისა და მანიფესტაციების" შესახებ, როცა აქციის მონაწილეებს არ მისცა მშვიდობიანი პროტესტის გამოსახატავად კარვის ან/და სხვა კონსტრუქციის მოწყობის უფლება. სწორედ საქართველოს შსს-ს წარმომადგენლების მიერ კანონის დარღვევას მოჰყვა დღეს ძალადობის ესკალაცია", - ვკითხულობთ ორგანიზაციების მიერ გავრცელებულ განცხადებაში. სრულად  წყარო: emc.org.ge

თბილისი. ორგანიზაცია „პარტნიორობა ადამიანის უფლებებისთვის" (PHR) აცხადებს, რომ სოციალური მომსახურების სააგენტომ ბავშვის ინფორმირების უფლება დაარღვია. როგორც ორგანიზაციის მიერ გავრცელებული ინფორმაციიდან ირკვევა, 2018 წლის 7 მაისს PHR-ის იურისტმა განცხადებით მიმართა სოციალური მომსახურების სააგენტოს და 2017 წლის იანვარში ბავშვის მიმართ განხორციელებული ძალადობის შესახებ დოკუმენტაციის, მათ შორის, სოციალური მუშაკის მიერ შედგენილი დასკვნის გადმოცემა ითხოვა. სააგენტომ კი, „პერსონალურ მონაცემთა დაცვის შესახებ" საქართველოს კანონით დადგენილი წესის დარღვევით, თავი აარიდა მოთხოვნილი ინფორმაციის მოწოდებას. სრულად  წყარო: ორგანიზაციის ვებგვერდი

თბილისი. კოალიცია "დამოუკიდებელი და გამჭვირვალე მართლმსაჯულებისთვის” სამუშაო ჯგუფმა უმცირესობათა და გენდერული თანასწორობის საკითხები განიხილა. სამუშაო ჯგუფის წევრებმა კოალიციის 2018-2019 წლის სამოქმედო გეგმის უმცირესობათა და გენდერული თანასწორობის კომპონენტის შესახებ იმსჯელეს. შეხვედრაზე, ასევე, იმსჯელეს გენდერული თანასწორობისა და უმცირესობების მიმართულებით სასამართლო სისტემის კვლევის აუცილებლობაზე, მისი მიზნები და მეთოდოლოგია. სრულად  წყარო: ორგანიზაციის ვებგვერდი

თბილისი. 25 ოქტომბერს, ადამიანის უფლებათა ცენტრმა პროექტის - „ქალების, რელიგიური და ეთნიკური უმცირესობების უფლებების დაცვის ხელშეწყობა საქართველოს რეგიონებში” - ფარგლებში მომზადებული ანგარიშის პრეზენტაცია გამართა. „ადამიანის უფლებათა ცენტრის ანგარიშში „ქალების, რელიგიური და ეთნიკური უმცირესობების მართლმსაჯულებაზე ხელმისაწვდომობა" წარმოდგენელია ორგანიზაციის წარმოებაში არსებული გენდერული ძალადობის, გენდერული ნიშნით ან/და ეთნიკური და რელიგიური ნიშნით დისკრიმინაციის საქმეები და მათი ანალიზი; საკონსტიტუციო სასამართლოსა და გაეროს ქალთა მიმართ დისკრიმინაციის ყველა ფორმის აღმოფხვრის კომიტეტში გაგზავნილი საქმეები; ასევე ანგარიშში მიმოხილულია საქმის წარმოების პროცესში იდენტიფიცირებული როგორც საკანონმდებლო ისე პროცესუალურ დონეზე არსებული ხარვეზები, რაც აფერხებს ძალადობის და დისკრიმინაციის მსხვერპლთა უფლებების ეფექტურად დაცვას. ანგარიშში წარმოდგენილია რეკომენდაციები კონკრეტული სახელმწიფო უწყებების მიმართ”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 25 ოქტომბერს, პარტნიორობამ ადამიანის უფლებებისთვის (PHR) ახალციხის ერთ-ერთ სკოლაში 15 წლის ძალადობის მსხვერპლი მოზარდის სკოლიდან გარიცხვის მცდელობის ფაქტთან დაკავშირებით სახალხო დამცველს მიმართა. აღნიშნული შემთხვევის შესახებ საზოგადოებისთვის ცნობილი მედიასაშუალებებიდან გახდა. „PHR-ი მიიჩნევს, რომ ძალადობის მსხვერპლი გოგონას თანაკლასელთა მშობლების მხრიდან გოგონას სკოლიდან გარიცხვის მოთხოვნით ხელმოწერების შეგროვება, წარმოადგენს სკოლის დირექტორის როგორც წაქეზებას, ასევე იძულებას დისკრიმინაციის განხორციელების მიზნით, ხოლო, თავის მხრივ, დირექტორის მხრიდან გოგონას სხვა სკოლაში გადაყვანის მოთხოვნა წარმოადგენს როგორც გენდერული, ასევე ასაკის ნიშნით პირდაპირ დისკრიმინაციას", ნათქვამია განცხადებაში. სრულად... წყარო: phrgeorgia.wordpress.com

თბილისი. 23 ოქტომბერს, „პარტნიორობა ადამიანის უფლებებისთვის" (PHR) ანგარიშის პრეზენტაცია – „ანტიდისკრიმინაციული კანონმდებლობის აღსრულება შშმ პირთა თანასწორობის უზრუნველსაყოფად" გამართა, რომელიც დისკრიმინაციის მიმართულებით 2017-2018 წლებში ორგანიზაციის მუშაობის შედეგებს ასახავს. PHR-ის წარმომადგენლებმა იმ ხარვეზებსა და გამოწვევებზე ისაუბრეს, რასაც ორგანიზაცია ანტიდისკრიმინაციული კანონმდებლობის აღსრულების პროცესში შეზღუდული შესაძლებლობის მქონე პირთა უფლებების დაცვისას აწყდებიან. აუდიტორიას გააცნეს როგორც საერთო სასამართლოებში არსებული საქმეები, ასევე საქმეები, რომლებთან მიმართებითაც საქართველოს სახალხო დამცველმა დაადგინა დისკრიმინაცია ან დისკრიმინაციის წამახალისებლად მიიჩნია. სრულად... წყარო: phrgeorgia.wordpress.com

თბილისი. „პარტნიორობა ადამიანის უფლებებისთვის" (PHR) აქვეყნებს ანა არგანაშვილის ინტერვიუს რენატე ვინტერთან. ის გაერთიანებული ერების ბავშვთა უფლებების კომიტეტის მოქმედი ხელმძღვანელი და საქართველოში არასრულწლოვანთა მართლმსაჯულების კოდექსის ერთ-ერთი ინიციატორია. „ეს დოკუმენტი, რეალურად, პარადიგმის ცვლილებაა, სააზროვნო სისტემის ამოყირავება, რომელიც ჩვენივე ბავშვობის დროინდელი გამოცდილებებითა და ღრმად ჩაკირული პედაგოგიური მიდგომებითაა სავსე და ნებისმიერ კრიზისულ სიტუაციაში გვაიძულებს, ვილაპარაკოთ, ვიმოქმედოთ, შევაფასოთ ისე, როგორც ჩვენი მშობლები, ჩვენი სკოლის მასწავლებლები, ჩვენი უბნის პოლიციელები, ჩვენი კულტურა და მთელი სისტემა შეაფასებდა. რენატე ვინტერი სწორედ ამ პარადიგმის ცვლილებაზე საუბრობს და აცხადებს, რომ სწორედ ეს კოდექსი და მისი რეალურ, ცხოვრებისეულ სიტუაციებში ამოქმედებაა იმის ნიშანი, რომ ხედვა მართლა შეიძლება შეიცვალოს, საზოგადოება კი, რომელიც დამსჯელობით მეთოდებს ახალი მიდგომებით ჩაანაცვლებს, განვითარების სულ სხვა, გაცილებით უფრო ჰუმანურ ეტაპზე გადავიდეს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

ქვემო ქართლი. „კონსტიტუციის 42-ე მუხლის" იურისტებმა რუსთავის მუნიციპალიტეტის მერიისა და საკრებულოს თანამშრომლებთან შეხვერდა გამართეს. შეხვედრის მთავარი მიზანი იყო სამუშაო ადგილზე შევიწროების საკითხების განხილვა და ბოლო კვლევების მონაცემების გაცნობა; მუნიციპალიტეტის თანამშრომლებისთვის ინფორმაციის მიწოდება იმის თაობაზე, თუ როგორ არეგულირებს სამუშაო ადგილზე შევიწროების/სექსუალური შევიწროებას ქართული და ევროპული კანონები. სრულად  წყარო: ორგანიზაციის გვერდი სოციალურ ქსელში

აჭარა. ანტი-სტიგმა კამპანია დაინახე ყველაფერის ფარგლებში გაიმართა შეხვედრები ბათუმში სკოლის მოსწავლეებსა და სტუდენტებთან. მათ შეზღუდული შესაძლებლობის მქონე ბავშვების მშობლები, ლეილა დავითაძე და მარი კორკოტაძე შეხვდნენ. ისინი დამსწრე სტუმრებს საზოგადოებაში არსებული სტიგმებისა და თავიანთი წარმატების ისტორიების შესახებ ესაუბრნენ. სრულად... წყარო: ორგანიზაციის ვებგვერდი სოციალურ ქსელში