თბილისი. გაეროს ბავშვთა ფონდის სოციალური ნორმების ცვლილებისაკენ მიმართული საკომუნიკაციო კამპანიის, დაასრულე ძალადობა • End Violence-ის ფარგლებში მომზადებულ ბროშურას ავრცელებს. „სანამ ძალადობის შესახებ ვისაუბრებდეთ, უნდა დაიმახსოვრო მთავარი - ბავშვს აქვს უფლება დაცული იყოს ძალადობისაგან. ეს უპირობო ჭეშმარიტებაა, რომელზეც მსოფლიო დიდი ხანია შეთანხმდა. როდესაც ერთი ადამიანი თავის ძალას თუ მდგომარეობას სხვის საზიანოდ იყენებს - ეს ძალადობაა. ყოველგვარი მოქმედება, რომელიც აზიანებს სხვას - ძალადობაა! ძალადობამ შეიძლება ძალიან ცუდი შედეგი გამოიღოს - დააზიანოს ადამიანი ფიზიკურად (გამოიწვიოს სხეულის გარეგანი დასახიჩრება, შინაგანი ორგანოების დაზიანება...) ან ფსიქიკურად..." სრულად... წყარო: ორგანიზაციის ვებგვერდი სოციალურ ქსელში

თბილისი. ქალთა მოძრაობა 4 დღის წინ სოფელ ლამბალოში 17 წლის გოგოს საკუთარი სახლიდან ძალის გამოყენებით გატაცებაზე განცხადებას ავრცელებს. „საქართველოში მცხოვრებ ეროვნულ უმცირესობებში ხშირია ცოლად მოყვანის მიზნით გოგოების გატაცება. ასეთ შემთხვევებზე საგამოძიებო სტრუქტურები პრაქტიკულად თვალს ხუჭავენ. პოლიცია ვერასდროს პოულობს გამტაცებელს, რომელიც ხშირად მეზობელ სოფელშია დამალული ნათესავებთან. სახელმწიფო ელოდება, როდის მორიგდებიან ოჯახები ერთმანეთში, შემდეგ კი ან სრულიად წყდება გამოძიება ან ფორმდება 5000 ლარიანი საპროცესო შეთანხმება. ეთნიკურად აზერბაიჯანელი გოგოები ისეთი დაუცველები არიან საქართველოში, რომ მათ სკოლებს არ ამთავრებინებენ, ხშირად მშობლებს თვითონ დაჰყავთ 15-17 წლის გოგოები სკოლაში, რადგან მათთვის მარტო გადაადგილება სახიფათოა. ეს მავნე პრაქტიკა არის სახელმწიფოს უმოქმედობით წახალისებული და ხელშეწყობილი ეთნიკური და გენდერული დისკრიმინაცია აზერბაიჯანელი გოგოების მიმართ. ჩვენ მოვითხოვთ: - შეწყდეს აზერბაიჯანელი გოგოების მიმართ დისკრიმინაციული მოპყრობა სამართალდამცავი სტრუქტურების მიერ; - გატაცებული გოგოს ძებნაში ჩაერთოს ყველა სახელმწიფო ორგანო, რომელსაც შეუძლია სამძებრო საქმიანობის განხორციელება; - შსს მინისტრმა პირად ზედამხედველობაზე აიღოს ეს საქმე; - გამოქვეყნდეს და გავრცელდეს გატაცებულის და გამტაცებლის ფოტოები, რათა საზოგადოება ჩაერთოს გოგოს ძებნაში; - დაისაჯოს არა მხოლოდ გამტაცებელი, არამედ ყველა, ვინც ამ დანაშაულის ჩადენაში მონაწილეობდა და ვინც არ შეატყობინა დანაშაულის შესახებ სახელმწიფოს; - ხელისუფლებამ შეიმუშაოს ადრეული ქორწინებისა და გატაცების წინააღმდეგ ეფექტური სტრატეგია და ბოლო მოუღოს დისკრიმინაციულ დანაშაულს და პრაქტიკას საქართველოში. წყარო: ორგანიზაციის ვებგვერდი სოციალურ ქსელში

თბილისი. ბათუმის საქალაქო სასამართლომ დააკმაყოფილა საქართველოს სახალხო დამცველის სარჩელი, რომელიც ქობულეთში მდებარე მუსლიმი მოსწავლეების პანსიონატის საქმეზე ქობულეთის მუნიციპალიტეტის მერიის მიერ დისკრიმინაციის აღმოფხვრის თაობაზე მისი რეკომენდაციის შეუსრულებლობას უკავშირდებოდა. „კერძოდ, შპს „ქობულეთის წყალი" (რომელიც მუნიციპალური საწარმოა) და ქობულეთის მუნიციპალიტეტის მერია 2014 წლის შემდეგ არ უზრუნველყოფენ მუსლიმი მოსწავლეების პანსიონატისთვის წყალარინების (კანალიზაციის) მომსახურების გაწევას, რაც სახალხო დამცველის, როგორც დისკრიმინაციის ყველა ფორმის აღმოფხვრის შესახებ კანონის საფუძველზე შექმნილი სპეციალური თანასწორობის მექანიზმის, მიერ დისკრიმინაციულ მოპყრობად შეფასდა და ადგილობრივ თვითმმართველობას სერვისის გაწევა და თანასწორობის საკითხებზე მისი თანამშრომლებისთვის საგანმანათლებლო-ინფორმაციული ღონისძიებების ჩატარება დაავალა. სახალხო დამცველის აღნიშნული რეკომენდაცია ქობულეთის მუნიციპალიტეტის მერიამ ამ დრომდე არ შეასრულა, რის გამოც კანონით დადგენილი წესით სახალხო დამცველმა მას სასამართლოში უჩივლა და სასამართლოს მერიისთვის მისი რეკომენდაციის შესრულების დავალდებულება მოსთხოვა", ნათქვამია ადამიანის უფლებების სწავლებისა და მონიტორინგის ცენტრის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „საერთაშორისო გამჭვირვალობა-საქართველოს" დახმარებით იოსებ კუციამ და რუსუდან ჭიჭინაძემ ათწლიანი სამართლებრივი ბრძოლის შემდეგ მიწის ნაკვეთი დაიკანონეს. თუ თვლით, რომ ადმინისტრაციულმა ორგანომ შელახა თქვენი ინტერესები, დაუკავშირდით ჩვენი სამართლებრივი დახმარების ცენტრებს საქართველოს რამდენიმე ქალაქში: თბილისი: აღმაშენებლის 61, ტელ: 032 260 15 08; ზუგდიდი: კონსტანტინე გამსახურდიას ქ. 67, ტელ: 0415 22 37 20; ბათუმი: ფარნავაზ მეფის 74, ბინა 9; ტელ: 0422 29 44 88; ქუთაისი: თამარ მეფის 21, ტელ: 0431 25 45 31 სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის განცხადებით, პოლიციელთა მხრიდან ირაკლი ხოფერიას წამების საქმეზე დღემდე ბრალდებულად არავინაა ცნობილი. „გამოძიების მიერ შეგროვებული მტკიცებულებები იძლევა საკმარის საფუძველს პოლიციელთა მიმართ ბრალის წასაყენებლად. მიუხედავად ამისა, საქართველოს მთავარი პროკურატურა დღემდე არ ახორციელებს კანონით მასზე დაკისრებულ ვალდებულებას და არ იწყებს სისხლის სამართლებრივ დევნას შესაბამისი პირების მიმართ. მოვუწოდებთ საქართველოს მთავარ პროკურატურას, დაუყოვნებლივ დაიწყოს სისხლის სამართლებრივი დევნა ირაკლი ხოფერიას მიმართ ჩადენილი წამებისა და სხვა დანაშაულების ფაქტებზე", - აცხადებს საია. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტია "რუსთავი 2-ის” ჟურნალისტებზე თავდასხმის საქმის სწრაფ გამოძიებას ითხოვს. „საქართველოს ჟურნალისტური ეთიკის ქარტია შინაგან საქმეთა სამინისტროსგან და მთავარი პროკურატურისგან ითხოვს, დაუყოვნებლივ გამოიძიონ 2018 წლის 10 ოქტომბერს ხაშურის მუნიციპალიტეტში ტელეკომპანია "რუსთავი 2"-ის ჟურნალისტებზე თავდასხმის, ძალადობისა და პროფესიულ საქმიანობაში უკანონოდ ხელის შეშლის ფაქტი”, - ნათქვამია ორგანიზაციის მიერ გავრცელებულ განცხადებაში, - „შინაგან საქმეთა სამინისტრომ მომხდარზე გამოძიება სისხლის სამართლის კოდექსის 154-ე მუხლით დაიწყო, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს. ჟურნალისტური ეთიკის ქარტია საგამოძიებო ორგანოებს და ხელისუფლებას მოუწოდებს, დანაშაულის სწრაფი და ეფექტიანი გამოძიებით გაემიჯნოს მედიაზე ძალადობას და უზრუნველყოს საქართველოში ჟურნალისტების უსაფრთხოდ მუშაობა". სრულად  წყარო: ორგანიზაციის ვებგვერდი

თბილისი. კოალიცია მედიის ადვოკატირებისთვის „კურიერის" გადამღები ჯგუფისთვის ჟურნალისტურ საქმიანობაში ხელშეშლის ფაქტს განცხადებით ეხმაურება. „როგორც მედიაში გასული სიუჟეტიდან ირკვევა, მედიის წარმომადგენლები რეპორტაჟს რკინიგზის ახალი მაგისტრალის მშენებლობის დროს გამოვლენილ დარღვევებზე ამზადებდნენ. ვიდეომასალის გადაღების დროს კი, ჩინეთის რკინიგზის 23-ე ბიუროს საქართველოს ოფისის წარმომადგენლებმა „კურიერის" ჟურნალისტს კამერა წაართვეს და მოპოვებული ვიდეომასალის წაშლა სცადეს, რამდენიმე საათის განმავლობაში ტელევიზიის კუთვნილი ტექნიკა კომპანიის წარმომადგენლებს ჰქონდათ”, - ვკითხულობთ განცხადებაში, - „მოვუწოდებთ შესაბამის საგამოძიებო ორგანოებს, კანონით გათვალისწინებული, დროული და ეფექტური რეაგირება მოახდინონ აღნიშნულ ფაქტზე, რათა მომავალში თავიდან იქნეს აცილებული ჟურნალისტებისათვის საქმიანობაში ხელის შეშლის შემთხვევები". სრულად  წყარო: https://gyla.ge

თბილისი. მედიის ინსტიტუტი და ადამიანის უფლებათა ცენტრი ეხმაურებიან „რუსთავი 2"-ის გადაცემა „კურიერის" ჟურნალისტისა და ოპერატორის ცემისა და ჟურნალისტურ საქმიანობაში ხელის შეშლის ფაქტს. „მედიის ინსტიტუტი და ადამიანის უფლებათა ცენტრი გმობენ ტელევიზიის ჟურნალისტსა და ოპერატორზე თავდასხმას. ორგანიზაციები მოუწოდებენ საგამოძიებო ორგანოებს, დროულად შეისწავლონ ჟურნალისტურ საქმიანობაში ხელის შეშლისა და ძალადობის სავარაუდო ფაქტი”, ნათქვამია განცხადებაში. სრულად... წყარო: „ადამიანის უფლებათა ცენტრის" ვებგვერდი სოციალურ ქსელში

თბილისი. ვეხმაურებით „რუსთავი 2”-ის მიერ გავრცელებულ ინფორმაციას ჟურნალისტ ეკა გაგუას და ოპერატორ ლევან კალანდიას ფიზიკური შეურაცხყოფისა და პროფესიული საქმიანობის შესაძლო ხელშეშლასთან დაკავშირებით. „ტელეკომპანია „რუსთავი 2”-სა და მისი ჟურნალისტების მიმართ ხშირია აგრესიული გამონათქვამები (https://bit.ly/2NzzXwu). ამ მხრივ განსაკუთრებით ხელისუფლების მაღალჩინოსნები და დეპუტატები გამოირჩევიან და ხშირად ეს გამონათქვამები სცილდება ეთიკის ჩარჩოებს. მიუხედავად იმისა, რომ ნებისმიერ პირს აქვს უფლება გააკრიტიკოს ან არ მოეწონოს არხის სარედაქციო პოლიტიკა, ხელისუფლების პირდაპირ ვალდებულებას წარმოადგენს ქვეყანაში ჟურნალისტებისათვის საქმიანობის უსაფრთხო გარემოს შექმნა. შესაბამისად, მოვუწოდებთ ხელისუფლების წარმომადგენლებს შეასრულონ კანონით ნაკისრი ვალდებულები და ასევე, თავი შეიკავონ კრიტიკული მედიისა და ჟურნალისტების წინააღმდეგ ვერბალური თავდასხმისაგან, რადგან მსგავსი განცხადებები და დამოკიდებულება ჟურნალისტების მიმართ ძალადობის წახალისებას ახდენს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. „ადამიანის უფლებათა ცენტრი" და „ჩართულობის და განვითარების ცენტრი" 30 სექტემბერს, უფლებადამცველ ვიტალი საფაროვის მკვლელობასთან დაკავშირებით განცხადებას ავრცელებენ. „საფაროვი არასამთავრობო ორგანიზაცია „ჩართულობის და განვითარების ცენტრში" მუშაობდა. იგი, მრავალი წლის მანძილზე აქტიურად იყო ჩართული მოზარდების ტოლერანტულ ბანაკებსა და სხვა პროექტებში, რასიზმის, ქსენოფობიისა და დისკრიმინაციის წინააღმდეგ. ვიტალი საფაროვის მკვლელობის საქმეზე ამ დროისთვის დაკავებულია ორი პირი, რომლებიც ე.წ. ნეონაცისტური დაჯგუფების წევრები არიან. მათ შორის ერთ-ერთს ბრალი წარდგენილი აქვს საქართველოს სისხლის სამართლის კოდექსის 108-ე მუხლით, რაც გულისხმობს განზრახ მკვლელობას (დამამძიმებელი გარემოებების გარეშე), ხოლო მეორე დაკავებულს ბრალი წარდგენილი აქვს, ამავე კოდექსის, 376-ე მუხლით, რაც დანაშაულის შეუტყობინებლობას გულისხმობს. ვიტალი საფაროვის ოჯახის სამართლებრივ ინტერესებს ადამიანის უფლებათა ცენტრი იცავს. ამ დროისთვის გამოძიების მიმდინარეობისას არსებობს რიგი გარემოებები, რაც იწვევს შეშფოთებას. კერძოდ, მკვლელობის მოწმეებთან გასაუბრების შედეგად ირკვევა, რომ ბოლო ორი წლის განმავლობაში მათ არაერთხელ შეატყობინეს საინფორმაციო ცენტრ 112-სა და კრიმინალურ პოლიციას, დაკავებული ბრალდებულების მიერ ჩადენილ მსგავს ძალადობის შემთხვევებზე, მაგრამ შეტყობინებებზე პოლიციას რეაგირება არ მოუხდენია. შემაშფოთებელია, რომ ბრალდებულების მიერ სიძულვილით მოტივირებული ძალადობრივი აქტები აქამდე რეაგირების გარეშე რჩებოდა. გასათვალისწინებელია ისიც, რომ ქსენოფობიური, ფაშისტური ჯგუფების აქტიურობა და სიძულვილის გაღვივება დღეისათვის ქართული სახელმწიფოს ერთ-ერთ სერიოზულ გამოწვევას წარმოადგენს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

ამ წუთებში, ყაზახეთის დედაქალაქში, ორგანიზაცია Amnesty International-ის მიერ ორგანიზებული კონფერენცია იმართება, სადაც გაეროს „შეზღუდული შესაძლებლობის მქონე პირთა უფლებების კონვენციის" იმპლემენტაციის შეფასების მიზნით მომზადებული ანგარიშის პრეზენტაცია მიმდინარეობს. „განსაკურებული ყურადღება გამახვილებულია კონვენციის მე-12 მუხლის იმპლემენტაციის აუცილებლობაზე, რომელიც ქმნის კანონის წინაშე თანასწორობის გარანტიას ყველასთვის მიუხედავად შეზღუდული შესაძლებლობისა. PHR-ის აღმასრულებელი დირექტორი, ანა აბაშიძე, კონფერენციის მონაწილეებს უზიარებს, 2015 წელს, საქართველოში განხორციელებული ქმედუნარიანობის რეფორმის შესახებ ინფორმაციას, რომლის შედეგადაც მეურვეობის უსამართლო სისტემა შეიცვალა მხარდაჭერის მოდელით. რაც მეტად ორიენტირებულია ადამიანის საჭიროებებზე, პატივს სცემს ადამიანთა ღირსებას და სამოქალაქო და პოლიტიკური უფლებების რეალიზების საშუალებაა. მოხსენებისას, PHR-ის წარმომადგენელმა, ასევე ისაუბრა ქმედუნარიანობის რეფორმის ხარვეზებზე და კონფერენციის მონაწილეებს ამ მიმართულებით არსებული პრაქტიკა გაუზიარა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

4 ოქტომბერს, სახალხო დამცველის პირველმა მოადგილემ თამარ გვარამაძემ და სახალხო დამცველის აპარატის თანამშრომლებმა თელავში ორი შეხვედრა გამართეს კახეთის რეგიონის მუნიციპალიტეტების თანამშრომლებთან და სამოქალაქო საზოგადოების წევრებთან. „ადგილობრივი სამოქალაქო სექტორის წარმომადგენლებთან შეხვედრაზე საკუთრების და ჯანსაღ გარემოსთან დაკავშირებული საკითხები განიხილეს. სამოქალაქო სექტორის წარმომადგენლებმა აპარატის თანამშრომლებს აღნიშნული უფლებების შესაძლო დარღვევის შესახებ მათ ხელთ არსებული ინფორმაცია გაუზიარეს”, ნათქვამია ომბუდსმენის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. არასამთავრობო ორგანიზაციების ნაწილი სალომე ზურაბიშვილის ქსენოფობიურ განცხადებას ეხმაურება. „2 ოქტომბერს, ნინოწმინდაში, წინასარჩევნო კამპანიის ფარგლებში, სალომე ზურაბიშვილი ადგილობრივ ეთნიკურად სომეხ მოქალაქეებს შეხვდა. მან განაცხადა: „აქამდე მოქალაქეობა იყო მხოლოდ მინიჭებით და მხოლოდ პრეზიდენტის საბოლოო გადაწყვეტილებით და ერთმა პრეზიდენტმა [მიხეილ სააკაშვილი], ძალიან ბევრი მოქალაქეობა დაურიგა თურქებს, დღეს მისი წარმომადგენელი არის ჩემი ოპონენტი, მაგრამ თქვენ არ მოგცათ მოქალაქეობა”. მიგვაჩნია, რომ პრეზიდენტობის კანდიდატის განცხადება ხელს უწყობს შუღლის გაღვივებას, ეწინააღმდეგება ლიბერალური დემოკრატიისა და თანასწორუფლებიანობის პრინციპებს, ახდენს ისტორიული კონფლიქტის თანამედროვე ქართულ პოლიტიკურ რეალობაში სახიფათო პრობლემატიზაციას", ნათქვამია ერთობლივ განცხადებაში. სრულად... წყარო: tdi.ge

თბილისი. ადამიანის უფლებების სწავლებისა და მონიტორინგის ცენტრმა (EMC) მოამზადა კვლევა - „რელიგიური უმცირესობების დაცვა". დოკუმენტის მიზანია 2016-2017 წლების საქართველოს ადამიანის უფლებების დაცვის სამთავრობო გეგმის მე-11 თავის შესრულების პროცესის შეფასება და მთავრობისთვის რეკომენდაციების წარდგენა, რომელიც, ავტორების აზრით, შეიძლება, მომავალში, მისი პოლიტიკის რევიზიის საფუძველი გახდეს. სრულად  წყარო: ორგანიზაციის ვებგვერდი

თბილისი. „ქალთა მზერა" წარმოგიდგენთ გრაფიკული ვიდეოების სერიას: დემოკრატია მრავალფეროვნებაშია. „ეთნიკური უმცირესობის წარმომადგენელი ქალების მხოლოდ 5%-ს აქვს უმაღლესი განათლება, ხოლო ქალების უმრავლესობას ყოველთვიური პირადი შემოსავალი არ გააჩნია. მსგავსი სტატისტიკა ნათლად გვანახებს, რომ არსებითად მნიშვნელოვანია მათ საჭიროებებზე მორგებული პოლიტიკის წარმოება და ცვლილებები სოციალურ-ეკონომიკურ სფეროში", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს კვლევას: გენდერული ძალადობა სექსმუშაკების მიმართ და მართლმსაჯულების ხელმისაწვდომობის ბარიერები: საერთაშორისო სტანდარტები და საქართველოს გამოცდილება. „კვლევა მიმოიხილავს სექსმუშაკ ქალებთან მიმართებით ადამიანის უფლებათა საერთაშორისო სტანდარტებს და სახელმწიფოს ვალდებულებებს დაიცვას მარგინალიზებული ქალები ძალადობისგან. კვლევა აფასებს საქართველოში პროსტიტუციასთან მიმართებით სასამართლოს დადგენილებათა ხარვეზებსა და არსებულ კანონმდებლობას, რომელზე დაყრდნობითაც ხდება სექსმუშაკ ქალთა ადამიანის უფლებების დარღვევა. კვლევა ასევე მოიცავს საქართველოში სექსმუშაკ ქალებთან ჩატარებული ფოკუს-ჯგუფების ანალიზს, სადაც ქალები საუბრობენ მათ მიერ განცდილი ძალადობის ფორმებზე და სამართლებრივი დაცვის საშუალებების მიუწვდომლობაზე. კვლევის მიზანს წარმოადგენს მარგინალიზებულ ქალთა ექსპლუატაციის წინააღმდეგ ბრძოლა. შესაბამისად, კვლევა სათანადო უწყებებს სთავაზობს რეკომენდაციებს კანონმდებლობის, პრაქტიკისა და პოლიტიკის ცვლილებების შესახებ, რათა სექსმუშაკებმა, სხვა ქალების მსგავსად, ისარგებლონ საქართველოს კანონმდებლობით გათვალისწინებული დაცვის საშუალებებით და მოხდეს მათ მიმართ გენდერული ძალადობის პრევენცია", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების დაცვაზე მომუშავე არასამთავრობო ორგანიზაციები და ჯგუფები შეშფოთებას გამოხატავენ თბილისში, ორგანიზაცია „თანასწორობის მოძრაობის" ოთხი აქტივისტის მიმართ ჰომოფობიური მოტივით განხორციელებული ძალადობისა და მუქარის ფაქტზე. „ხელმომწერი ორგანიზაციები მოვუწოდებთ საქართველოს პროკურატურას და შინაგან საქმეთა სამინისტროს, უზრუნველყონ: კერძო პირების მხრიდან „თანასწორობის მოძრაობის" აქტივისტების ცემისა და მათ მიმართ განხორციელებული მუქარის ფაქტზე დროული, დამოუკიდებელი და ეფექტიანი გამოძიება, მათ შორის, მსხვერპლებისათვის დაზარალებულის სტატუსის დროული მინიჭება, დანაშაულებრივი ქმედების სათანადო კვალიფიკაციის გამოყენება, ასევე, ჰომოფობიური სიძულვილის მოტივის გამოკვეთა და საპროცესო დოკუმენტებში ნათლად ასახვა. ამასთან, საქმეზე მაღალი საჯარო ინტერესის გათვალისწინებით, მოახდინონ გამოძიების პროგრესისა და შედეგების შესახებ საზოგადოების დროული ინფორმირება", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. 2 ოქტომბერს, 16:00 საათზე, თბილისის საქალაქო სასამართლოში გაიმართება ზაზა სარალიძისა და მალხაზ მაჩალიკაშვილის სარჩელის განხილვა, საქართველოს შინაგან საქმეთა სამინისტროს წინააღმდეგ. „საქმე შეეხება საქართველოს შინაგან საქმეთა სამინისტროს მიერ, ზაზა სარალიძისა და მალხაზ მაჩალიკაშვილის, ასევე აქციაში მონაწილე სხვა პირების შეკრებისა და მანიფესტაციის უფლების უკანონოდ შეზღუდვას. კერძოდ კი, 2018 წლის 26 სექტემბერს, თბილისში, პარლამენტის წინ ზაზა სარალიძისა და მალხაზ მაჩალიკაშვილის მიერ ორგანიზებულ აქციაზე, აქციის მონაწილეებმა გადაწყვიტეს აქციის გასაგრძელებლად გამოეყენებინათ მშვიდობიანი შეკრების კონკრეტული ფორმა და პარლამენტის შენობის წინ, ტროტუარზე, იმ სივრცეში რომელიც ხელს არ შეუშლიდა მოქალაქეების თავისუფალ გადაადგილებას დაედგათ კარავი. თუმცა, პოლიციის თანამშრომლებმა აქციის მონაწილეებს უკანონოდ არ მისცეს შესაძლებლობა ესარგებლათ შეკრების ამ ფორმით, დაშალეს კარვის კონსტრუქცია, აქციის მონაწილეებს ჩამოართვეს კარვები და არ მისცეს შესაძლებლობა, პროტესტის ამ ფორმით გაგრძელების შესაძლებლობა, რითიც პოლიციის მიერ განხორციელდა მშვიდობიანი შეკრების უფლებაში მოხდა უხეში ჩარევა", ნათქვამია საქართველოს ახალგაზრდა იურისტთა ასოციაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

1 ოქტომბერს, ხანდაზმულთა საერთაშორისო დღე აღინიშნება. „ხანდაზმულთა დღის აღნიშვნის მიზანია კიდევ ერთხელ შეახსენოს საზოგადოებას ხანდაზმულთა პრობლემები. ხანდაზმულთა უფლებების სათანადოდ რეალიზება დღემდე გამოწვევად რჩება საქართველოში, დაბალია მათი სოციალური დაცვის ხარისხი, დიდი ნაწილი ცხოვრობს სიღარიბეში, არასაკმარისია სახელმწიფო პროგრამები და სერვისები. ჩვენი ორგანიზაცია 500-ზე მეტ ხანდაზმულს აერთიანებს. ამ 9 წლის განმავლობაში, რაც ჩვენი ორგანიზაცია არსებობს, ხანდაზმულთა სოციალურ-ეკონომიური გაძლიერებისკენ მიმართული არაერთი პროექტი განვახორციელეთ. ხანდაზმულებს შესაძლებლობა ჰქონდათ მიეღოთ უფასო იურიდიული დახმარება, ფუნქციონირებდა ხანდაზმულთა კლუბი, საგანმანათლებლო ტრენინგ ცენტრი. ჩვენ ვეხმარებოდით ხანდაზმულებს, რომლებიც მზად იყვნენ წამოეწყოთ მცირე ბიზნესი. ევროკავშირის ფინანსური მხარდაჭერით 70-ზე მეტი ბენეფიციარი მცირე გრანტით დაფინანსდა, 1300 ბენეფიციარმა სხვადასხვა საგანმანათლებლო ტრენინგების გაიარა", ნათქვამია ღირსეული სიბერის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

მცხეთა-მთიანეთი. პარტნიორობა ადამიანის უფლებებისთვის (PHR) იურისტებმა გენდერული დისკრიმინაციის შესახებ მორიგი სემინარი ჩაატარეს. „PHR-ის წარმომადგენლები მცხეთის მუნიციპალიტეტის თანამშრომლებს საქართველოში გენდერული დისკრიმინაციის მიმართულებით არსებული გამოწვევებისა და პრაქტიკის შესახებ ესაუბრნენ", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. კავშირი „საფარი" აქვეყნებს გიორგი თუმანიშვილის ბლოგპოსტს: „ქალები, რომლებსაც კაცები ვერ ხედავენ”. „ქალი უნდა დავინახოთ! – და უნდა დავინახოთ არა უკვე არსებული სოციალური კონსტრუქტიდან ან იმ მოდელიდან გამომდინარე, რაც ოჯახში ჩაგვიდუღაბეს, არამედ დავინახოთ მისი რეალური "მე”, როგორსაც ის ხედავს თავის თავს, – თავისუფალს, დამოუკიდებელს, ძლიერს, – ინდივიდს", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. 21 სექტემბერს არასამთავრობო ორგანიზაციების წარმომადგენლები ევროპარლამენტის დეპუტატს, ანა გომეშს შეხვდნენ და საქართველოში ადამიანის უფლებათა დაცვის მიმართულებით არსებული მდგომარეობის შესახებ მიაწოდეს ინფორმაცია. „ორგანიზაციის „პარტნიორობა ადამიანის უფლებებისთვის" აღმასრულებელმა დირექტორმა ანა აბაშიძემ შეხვედრაზე ბავშვთა უფლებრივ მდგომარებაზე ისაუბრა, ყურადღება გაამახვილა ქუჩაში მცხოვრები და მომუშავე ბავშვების იმ გადაუჭრელ პრობლემებზე, რაც წლებია სახელმწიფოსთვის გამოწვევას წარმოადგენს. ასევე, კრიტიკულად შეაფასა ბავშვთა სახლებში არსებული მდგომარება და ნინოწმინდის მზრუნველობამოკლებულ ბავშვთა პანსიონატში ბავშვთა უფლებების დარღვევის შესახებ ისაუბრა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com