თბილისი. საზოგადოებრივი ორგანიზაციები „საქართველოს ახალგაზრდა იურისტთა ასოციაცია", „სამართლიანი არჩევნებისა და დემოკრატიის საერთაშორისო საზოგადოება", „საერთაშორისო გამჭვირვალობა- საქართველო" და „კონსტიტუციის 42-ე მუხლი” გამოხატავენ შეშფოთებას საქართველოს სხვადასხვა მუნიციპალიტეტში ადგილობრივი თვითმმართველობის ორგანოების მიმართ ზეწოლის  ფაქტებთან დაკავშირებით.  „ადგილობრივი თვითმმართველობების საქმიანობაში ნებისმიერი ფორმით ჩარევა და ზეწოლა, რომელიც აფერხებს ან ხელს უშლის მათ ნორმალურ ფუნქციონირებას - შემაშფოთებელია". – ნათქვამია ორგანიზაციების მიერ გავრცელებულ განცხადებაში.  ორგანიზაციები მოუწოდებენ ყველა პოლიტიკურ პარტიას და მათ მხარდამჭერებს, თავი შეიკავონ ადგილობრივი თვითმმართველობის განმახორციელებელი ორგანოებზე ნებისმიერი ხასიათის ზეწოლისაგან, ასევე მიმართავენ შესაბამის ორგანოებს, რომ შეისწავლონ ზეწოლის ფაქტები და გაატარონ შესაბამისი სანქციები. მიმართვა წყარო: gyla.ge

თბილისი. გაეროს ბავშვთა ფონდი არასრულწლოვანთა დაწესებულებების მონიტორინგის შედეგებს აქვეყნებს. არასრულწლოვანი პატიმრები გაეროს ბავშვთა ფონდთან საუბრისას აღნიშნავენ, რომ დაცულნი არიან  ზიანისა და არასათანადო მოპყრობისაგან და მცველების მათ მიმართ დამოკიდებულება უკეთესია.  „თავისუფლების აღკვეთის ადგილებში არასრულწლოვნების მიმართ მოპყრობა უკეთესია, თუმცა გამოწვევები კვლავ რჩება", - ნათქვამია ორგანიზაციის მიერ გავრცელებულ ინფორმაციაში. იუნისეფი მოუწოდებს მთავრობას, რაც შეიძლება სწრაფად დასრულდეს ავჭალის არასრულწლოვანთა სპეციალური დაწესებულების სარემონტო სამუშაოები, რათა ამჟამად რუსთავის მე–17 საპყრობილეში მოთავსებული არასრულწლოვნები დაბრუნდნენ გაუმჯობესებულ გარემოში. იუნისეფი ასევე მოუწოდებს მთავრობას, მაქსიმალურად სწრაფად აღდგეს საგანმანათლებლო პროცესი თავისუფლების აღკვეთის ადგილებში მყოფი ყველა ახალგაზრდისათვის. ორგანიზაცია არასრულწლოვანთა განთავსების ადგილებში დამოუკიდებელ მონიტორინგს 2012 წლის 25 სექტემბრიდან ახორციელებს. მონიტორინგის უმთავრესი მიზანია, შეამოწმოს იმყოფებიან  თუ არა ახალგაზრდები უსაფრთხო გარემოში და დაცულია თუ არა მათი ძირითადი უფლებები და არიან თუ არა ძალადობის, შეურაცხყოფისა და დამცირებისაგან დაზღვეული.   სრულად წყარო: unicef.ge

თბილისი.  ადამიანის უფლებათა ცენტრი მიმართავს საქართველოს მთავარ პროკურორს, არჩილ კბილაშვილს თხოვნით, პროკურატურამ დაიწყოს 2005 წლის 26 მარტს ორთაჭალის ციხეში მომხდარი ციხის ბუნტის გამოძიება. „ე. წ. ციხის ბუნტის ჩასახშობად მაშინდელმა ხელისუფლებამ გამოიყენა სასტიკი მეთოდები. ცეცხლსასროლი იარაღით მოკლულია რამდენიმე პატიმარი (სახელდება სხვადასხვა რაოდენობა). მიუხედავად ამისა, აქამდე არ არის გამოძიებული, მოხდა თუ არა ძალის გადამეტება და ყველაზე მთავარი - ობიექტურად არ არის დადგენილი, რამ გამოიწვია პატიმრების ამბოხება. შესაბამისად, არ დასმულა პენიტენციალური სისტემის მაშინდელი ხელმძღვანელების პასუხისმგებლობის საკითხი" – ნათქვამია ორგანიზაციის მიერ გავრცელებულ ინფორმაციაში სრულად წყარო: humanrights.ge

აჭარა. 16 ნოემბერს, ბათუმის დემოკრატიული ჩართულობის ცენტრში,  შრომის საერთაშორისო ორგანიზაციის (ILO) ორგანიზებით ჩატარდა „სამმხრივი ერთობლივი ტრენინგი საქართველოში მოქმედი სოციალური დაცვის სისტემისა და თანამედროვე გენდერული მიმართულებების საკითხებზე".  ტრენინგი  პროექტის - „ კრიზისიდან ღირსეული და უსაფრთხო შრომისაკენ ცენტრალურ აზიასა და სამხრეთ კავკასიაში" – შემადგენელ ნაწილს წარმოადგენდა. რომელიც მიზნად ისახავს შრომის ღირსეული პრინციპების დამკვიდრების ხელშეწყობას, დასაქმების, შრომის უსაფრთხოებისა და სოციალური დაცვის სფეროში. აღნიშნულ ტრენინგში მონაწილეობდნენ: საქართველოს შრომის, ჯანმრთელობის და სოციალური დაცვის სამინისტროს, საქართველოს დამსაქმებელთა ასოციაციის, საქართველოს პროფესიული კავშირების გაერთიანების და საზოგადოებრივი ორგანიზაციების წარმომადგენლები.

აჭარა. 14 ნოემბერს, ბათუმის დემოკრატიული ჩართულობის ცენტრში, ახალგაზრდული ორგანიზაციის და თვითმმართველ ქალაქ ბათუმის საკრებულოსთან არსებული „სამოქალაქო მრჩეველთა კომიტეტის" ორგანიზებით გაიმართა საჯარო დისკუსია. დისკუსია გაიმართა თემაზე - „შშმ პირთა, კერძოდ, უსინათლოთა უფლებების დაცვის დონე აჭარის რეგიონში". დისკუსიის მიზანს წარმოადგენდა საზოგადოების ამ სეგმენტის პრობლემების გამოკვეთა, ჯანდაცვის სამინისტროს, მერიის სოციალური დაცვის უზრუნველყოფის სამსახურის, ადგილობრივი სამთავრობო უწყებების, არასამთავრობო ორგანიზაციებისა და უსინათლოთა შორის ერთგვარი დიალოგის წარმართვა შშმ პირთა პრობლემების მოგვარების და სხვადასხვა სახის რეკომენდაციების მიღების მიზნით. შეხვედრას ესწრებოდნენ: უსინათლოთა კავშირის წევრები და თავმჯდომარე, ჯანდაცვის მინისტრის მოადგილე, მერიის თანამშრომლები, შშმ პირთა უფლებების დაცვის კუთხით მომუშავე საზოგადოებრივი ორგანიზაციების  და მედიის წარმომადგენლები.

თბილისი. „სამართლიანი არჩევნებისა და დემოკრატიის საერთაშორისო საზოგადოება" ეხმიანება განათლებისა და მეცნიერების მინისტრის, გიორგი მარგველაშვილის განცხადებას, სადაც მინისტრი ამბობს, რომ „სხვადასხვა დროს, სხვადასხვა სასწავლო დაწესებულებიდან გათავისუფლებული პირების საქმის შესწავლის მიზნით სამინისტროში სპეციალური კომისია შეიქმნება და აღნიშნული დავების განხილვაში უშუალოდ განათლებისა და მეცნიერების მინისტრი იქნება ჩართული".  „სამართლიანი არჩევნები" მინისტრს აწვდის სიას საგანმანათლებლო დაწესებულებიდან  სავარაუდოდ პოლიტიკური მოტივით გათავისუფლებული იმ პირების შესახებ, რომლებიც „სამართლიანმა არჩევნებმა"  2012 წელს წინასაარჩევნო გარემოს მონიტორინგის ფარგლებში შეისწავლა და საჯარო გახადა.  „სამართლიანი არჩევნები" იმედს გამოთქვამს, რომ კომისია ყურადღებით შეისწავლის პოლიტიკური ნიშნით სამსახურიდან გათავისუფლებულ პედაგოგებთან დაკავშირებულ  გარემოებებს და შესაბამისად, მათი გათავისუფლების პოლიტიკური მოტივის გამოკვეთის შემთხვევაში აღადგენენ პირვანდელ პოზიციაზე" – ნათქვამია ორგანიზაციის მიერ გავრცელებულ განცხადებაში განცხადება  წყარო: „სამართლიანი არჩევნების" გვერდი სოციალურ ქსელში

თბილისი. 19 ნოემბერს, ფონდის  „ღია საზოგადოება საქართველო"  ოფისში პროგრამის – „აღმოსავლეთი–აღმოსავლეთი საზღვრებს გარეშე" – ფარგლებში გაიმართება სემინარი ჟურნალისტებისთვის ბავშვებზე ძალადობის საკითხებზე. სემინარს ჩაატარებს ფსიქოლოგი ქეთევან თავართქილაძე,  საქართველოს საზოგადოებრივი ჯანდაცვის და მედიცინის განვითარების ფონდიდან. სემინარზე ყურადრება გამახვილდება შემდეგ საკითხებზე: ბავშვის თვალით  დანახული ძალადობა - რას ამბობენ, ფიქრობენ და გრძნობენ ბავშვები საკუთარ თავზე, დიდებზე, ცხოვრებაზე; ძალადობის ზეგავლენა ბავშვის განვითარებასა და კეთილდღეობაზე; საზოგადოების როლი ძალადობისაგან ბავშვის დაცვაში; მედია და ბავშვები: როგორ გავაშუქოთ ბავშვზე ძალადობასთან დაკავშირებული საკითხები ისე, რომ არ ვავნოთ. სრულად წყარო: osgf.ge

თბილისი. 9 ნოემბერს „რასიზმისა და ანტისემიტიზმის წინააღმდეგ ბრძლოლის’’ საერთაშორისო დღე აღინიშნება. მას მიეძღვნება ახალგაზრდული ასოციაცია „დრონის", საქართველოს ფეხბურთის ფედერაციის, საქართველოს ტექნიკურ უნივერსიტეტისა და კომპანია „Aqua-Geo”-ს პარტნიორობით დაგეგმილი პროექტის – „ერთად დავამარცხოთ ფაშიზმი და რასიზმი- გამოხატე შენი პოზიცია"– წარმოდგენა. პროექტის ფარგლებში რვა ფეხბურთის გუნდი, რვა სხვადასხვა ეთნიკური და ნაციონალური უმცირესობების წარმომადგენლები, შეხვდებიან ერთმანეთს ფეხბურთის ტურნირის განმავლობაში საქართველოს ტექნიკური უნივერსიტეტის სპორტულ დარბაზში. ღონისძიების მიზანია  სამართლიანობის, კაცთმოყვარეობის მესიჯის გავრცელება სხვადასხვა სქესისა და ეთნიკური წარმომავლობის, რელიგიური და ეკონომიკური კუთვნილების ადამიანებს შორის, ასევე ჩართულობის, ჯანმრთელი ცხოვრების წესისა და ტოლერანტობის პოპულარიზება. ღონისძიება 9 ნოემებერს 12 საათზე დაიწყება. სრულად წყაროო: „დრონის" გვერდი სოცალური ქსელი 

სამეგრელო.ზუგდიდში მოქმედმა არასამთავრობო ორგანიზაციამ „ახალგაზრდები სამოქალაქო ინტერესებისათვის" 6 ნოემბერს კინოთეატრ „ატრიუმში" ოთხდღიანი დოკუმენტური ფილმების ჩვენება დაასრულა. ორგანიზაციის „ახალგაზრდები სამოქალაქო ინტერესებისათვის" დირექტორის, გურამ ჩიხლაძის თქმით, ნაჩვენები იყო 6 დოკუმენტური ფილმი, რომელიც ძირითადად ადამიანის უფლებებს და  საზოგადოების პაუხისმგებლობას ეხებოდა. „პროექტის მიზანია საზოგადოებაში გაჩნდეს და გაღრმავდეს საზოგადოებრივი პასუხისმგებლობის დონე და საზოგადოება არ უნდა დარჩეს ქვეყანაში მიმდინარე პროცესების მიღმა", აღნიშნა გურამ ჩიხლაძემ. კინოფესტივალის მხარდამჭერები არიან: არასამთავრობო ორგანიზაცია „ადამიანი გაჭირვებაში" და ამერიკის შეერთებული შტატების საელჩო საქართველოში. 

თბილისი. ოც წელზე მეტია გაეროს ბავშვთა ფონდი საქართველოს მთავრობას ეხმარება სოციალური პოლიტიკისა და პროგრამირების გაუმჯობესების საქმეში მსოფლიოს საუკეთესო პრაქტიკის გათვალისწინებით. კონსულტაციას უწევს იმ უწყებებს, რომლებიც პასუხიმგებელნი არიან პოლიტიკის შემუშავებაზე. ფონდი კვლავ იღებს ვალდებულებას დაეხმაროს საქართველოს მთავრობას ყველაზე დაუცველი მოსახლეობის კეთილდღეობის გაუმჯობესების საქმეში. ამ მიმართულებით ფონდმა დოკუმენტი მოამზადა, რომელშიც განხილულია ქართული ოცნების საარჩევნო პროგრამის ის ნაწილები, რომლებიც ეხება ბავშვთა უფლებების დაცვას საქართველოში და ასევე წარდგენილია კონკრეტული რეკომენდაციები. რეკომენდაციები წყარო:unicef.ge

თბილისი. საქართველოს ახალგაზრდა იურისტთა ასოციაციამ სოფელ ნიგვზიანში განვითარებულ მოვლენებს ეხმაურება და განცხადებას ავრცელებს.  „საია შეშფოთებას გამოთქვამს იმ მდგომარეობის გამო რასაც უკანასკნელ პერიოდში ლანჩხუთის მუნიციპალიტეტის სოფელ ნიგვზიანში აქვს ადგილი, სადაც მუსლიმანურ და ქრისტიანულ მოსახლეობას შორის რელიგიურ ნიადაგზე ურთიერთობა დაიძაბა...", ნათქვამია განცხადებაში.  საია მიიჩნევს, რომ სოფელ ნიგვზიანში განვითარებული მოვლენების დროს დაირღვა რელიგიური უმცირესობების უფლებები და მიაჩნია, რომ  ხელისუფლებამ უნდა გამოიყენოს ყველა ადეკვატური საშუალება, რათა საფრთხე არ შეექმნას რელიგიის თავისუფლების განხორციელებას.  ორგანიზაცია გამოთქვამს იმედს, რომ „...არსებული ვითარება სახელმწიფოს ჩარევით უახლოეს მომავალში განიმუხტება და ყველა რელიგიურ კონფესიას ექნება საკუთარი უფლებების მაქსიმალურად თავისუფლად გამოყენების შესაძლებლობა". განცხადება წყარო: gyla.ge 

სამეგრელო. ზუგდიდში მოქმედი არასამთავრობო ორგანიზაცია „ახალგაზრდები სამოქალაქო ინტერესებისათვის" 3 ნოემბრიდან, ზუგდიდის კინოთეატრ „ატრიუმში" დოკუმენტური ფილმების ჩვენებას იწყებს. ოთხი დღის განმავლობაში ნაჩვენები იქნება დოკუმენტური ფილმები ადამიანის უფლებებზე. კინოჩვენების შემდეგ გაიმართება დისკუსია, რომელსაც მოწვეული ექსპერტები და კინოფესტივალის ორგანიზატორები წარმართავენ. კინოფესტივალის მხარდამჭერები არიან არასამთავრობო ორგანიზაცია „ადამიანი გაჭირვებაში" და ამერიკის შეერთებული შტატების საელჩო საქართველოში. კინოსეანსებზე, რომელიც ექვს ნოემბერს დასრულდება დასწრება თავისუფალია.

თბილისი. ფონდ „ღია საზოგადოება – საქართველოს" ოფისში პროფესორმა მარგარეტ ლინჩმა ლექცია გამართა ბავშვზე ძალადობის საკითხებზე. შეხვედრას ესწრებოდნენ სკოლის პედაგოგები და განათლების სპეციალისტები. პროფესორმა ლინჩმა ისაუბრა მოზარდებზე ძალადობის სხვადსხვა ფორმებსა და მათ უგულვებელყოფასა თუ ექსპლოატაციაზე. შეხვედრაზე აღინიშნა, რომ ბავშვზე ძალადობის თავიდან არიდების საქმეში მნიშვნელოვანი როლი მასწავლებელს ენიჭება, თუმცა აუცილებელია ამ საკითხის მიმართ განხორციელდეს კომპლექსური მიდგომა და მასში ჩაერთნონ არამარტო სკოლის, არამედ სამედიცინო დაწესებულებების, სოციალური მომსახურების სააგენტოების, პოლიციის დეპარტამენტებისა და საზოგადოების სხვა წარმომადგენლები.  პროფესორმა ლექციის მონაწილეებს მსგავსი მულტიდისციპლინარული საქმიანობის წარმატებული მაგალითებიც გაუზიარა. ლექცია ფონდ „ღია საზოგადოება - საქართველოს" და ქსელური პროგრამის „აღმოსავლეთი - აღმოსავლეთის საზღვრებს გარეშე" ხელშეწყობით ჩატარდა სრულად წყარო: osgf.ge

თბილისი. 29 ოქტომბერს წამების მსხვერპლთა ფსიქოსოციალური და სამედიცინო რეაბილიტაციის ცენტრმა (GCRT) პრესკონფერენცია გამართა და არასრულწლოვან მსჯავრდებულთა მდგომარეობაზე ისაუბრა.  ორგანიზაციის წარმომდგენლებმა მედიას გააცნეს არასრულწლოვან მსჯავრდებულთა ამჟამინდელი მდგომარეობა. ისაუბრეს ავჭალის არასრულწლოვანთა სპეციალურ №11 დაწესებულებაში 2012 წლის 8 აგვისტოს მომხდარი არეულობის შესახებ და ახალ პარლამენტს აღნიშნული ფაქტის გამოძიების თხოვნით მიმართეს. მიმართვა პარლამენტს სრულად წყარო: osgf.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება", საქართველოს ახალგაზრდა იურისტთა ასოციაცია და „საერთაშორიო გაჭვირვალობა - საქართველო" საქართველოს მთავრობას პოლიტიკური ნიშნით გათავისუფლებული პირების საქმის გარემოებების შესწავლას სთხოვენ.   „სამართლიანი არჩევნებისა და დემოკრატიის საერთაშორისო საზოგადოებამ", საქართველოს ახალგაზრდა იურისტთა ასოციაციამ და „საერთაშორიო გაჭვირვალობა - საქართველომ" 2012 წლის წინასაარჩევნო გარემოს მონიტორინგის ფარგლებში მოქალაქეთა მიმართ პოლიტიკური ნიშნით ზეწოლის მრავალი ფაქტი შეისწავლა და გამოაქვეყნა.  მათ შორის ერთ-ერთი ყველაზე გავრცელებული - საჯარო სექტორიდან პოლიტიკური მოტივით სამსახურიდან გათავისუფლების შემთხვევები იყო"– აღნიშნულია განცხადებაში. განცხადება წყარო: gyla.ge

სამეგრელო. ასოციაცია „დეასთან" არსებულმა იურიდიულ-საკონსულტაციო ცენტრმა შეზღუდული შესაძლებლობების მქონე (შშმ) პირთა უფლებრივი მდგომარეობის გაუმჯობესების მიზნით შეხვედრა გამართა. შეხვედრას ესწრებდონენ შეზღუდული შესაძლებლობების მქონე პირები, მათი ოჯახის წევრები, იურისტები, არასამთავრობო სექტორი და მედიის წარმომადგენლები. შეხვედრა დემოკრატიული ჩართულობის ცენტრში 19 ოქტომბერს გაიმართა.   ასოციაცია „დეას" იურისტმა ბაკურ გოგოხიამ შეხვედრის მონაწილეებს შეზღუდული შესაძლებლობებების მქონე პირების უფლებების დარღვევის კონკრეტული მაგალითები გააცნო. საუბარი იყო იმ ადამიანებზე, რომლებიც მოუწესრიგებელი ინფრასტრუქტურის გამო სახლიდან გასვლას ვერ ახერხებენ. თავის მხრივ,  „დეასთან" არსებული, იურიდიულ-საკონსულტაციო ცენტრის იურისტმა გურამ ყუფუნიამ განაცხადა, რომ „ამ ადამიანებს ერიდებათ და საკუთარი უფლებების დარღვევის შესახებ საქმე სასამართლოში არ შეაქვთ". შეხვედრას ესწრებოდნენ ზუგდიდის შოთა მესხიას სახელობის უნივერსიტეტის სტუდენტები, რომლებიც ჩართულები არიან იურიდიულ-საკონსულტაციო ცენტრის მუშაობაში და მზად არიან, შეზღუდული შესაძლებლობების მქონე პირებს უფლებების დაცვაში დაეხმარონ.

შიდა ქართლი. 12 ოქტომბერს საზოგადოება „ბილიკში" გორის   სამოქალაქო კლუბებმა შიდა ქართლში სახალხო დამცველის წარმომადგენელთან, ნინო დალაქიშვილთან შეხვედრა გამართეს. შეხვედრა სამოქალაქო განათლებისა და პედაგოგთა გადამზადების პროგრამის (USAID / PH International) ფარგლებში მოეწყო და მიზნად ისახავდა სამოქალაქო კლუბების წევრებისთვის სახალხო დამცველის უფლება-მოვალეობების შესახებ ინფორმაციის გაზიარებას. გარდა ამისა საუბარი შეეხო ზოგადად ადამიანის უფლებებს საქართველოში და კონკრეტულად შიდა ქართლის რეგიონში არსებულ მდგომარეობას. 

იმერეთი. 10, 11 და 12 ოქტომბერს, თერჯოლაში შეზღუდული შესაძლებლობების მქონე პირთა საკითხებზე მომუშავე საკოორდინაციო საბჭოს წევრებისთვის ჩატარდა სამდღიანი ტრენინგ კურსი, რომლის მიზანი იყო მონაწილეებისთვის ინკლუზიური განათლების შესახებ ინფორმაციის მიწოდება. კურსის განამვლობაში მონაწილეებმა იმსჯელეს ისეთ თემებზე, როგორიცაა  ინკლუზიური განათლება, საკანონმდებლო ბაზა, შშმ მოსწავლეთა საჯარო სკოლებში ჩარიცხვა და მიღების წესები, სწორი ხედვის და მიდგომების ჩამოყალიბება, ეთიკური ნორმების გამოყენება და ა.შ. ტრენინგი ორგანიზებული იყო ფედერაცია ,,გადავარჩინოთ ბავშვების" მიერ მხარდაჭერილი პროექტის: „თანაბარი შესაძლებლობები შეზღუდული შესაძლებლობების მქონე პირებისათვის" ფარგლებში. სრულად წყარო: kedec.ge

თბილისი. 18 ოქტომბერს 12 საათზე „შერატონ მეტეხი პალასში" მოძრაობა „ხემისაწვდომი გარემო ყველასთვის" ვებ გვერდის (www. Ertad.org) პრეზენტაციას გამართავს. ასევე გაიმართება სოციალური ვიდეორგოლის ჩვენება და დაიწყება პეციტიაზე ხელმოწერების შეგროვება, რათა საზოგადოებრივი ტრანსპორტი ხელმისაწვდომი გახდეს ეტლით მოსარგებლე მოქალაქეებისთვის. ახალი ინტერნეტპორტალი უნიკალური რესურსია მათთვის, ვისაც დამოუკიდებლად გადაადგილება არ შეუძლიათ. მისი მეშვეობით მოხდება ხერხემლის დაზიანების და სხვა შეზღუდული შესაძლებლობების მქონე ადამიანების ერთმანეთთან დაკავშირება, ერთობლივი ღონისძიებების დაგეგმვა და გამოცდილების გაცვლა. ასევე განთავსებული იქნება ინფორმაცია შეზღუდული შესაძლებლობების მქონე პირების უფლებების, არსებული კანონმდებლობის და ხელმისაწვდომი მომსახურების შესახებ. ასევე გვერდი ბევრ პრაქტიკულ რესურსს შესთავაზებს მომხმარებელ. წყარო: osgf.ge

კახეთი. არასამთავრობო ორგანიზაცია ,,სოფლის ქალები ადამიანის უფლებებისათვის" თელავის მუნიციპალიტეტში ახორციელებს პროექტს ,,ვიცხოვროთ ძალადობის გარეშე". პროექტის მიზანია ოჯახური ძალადობის დაძლევის ხელშეწყობა სოფლად, აგრეთვე, მოზარდი თაობის მოქალაქეობრივი პასუხისმგებლობის დონის ამაღლება ოჯახური ძალადობის საკითხებთან დაკავშირებით, მათთვის ინფორმაციის მიწოდებისა და საზოგადოებრივ საქმიანობაში ჩართვვის გზით. ორგანიზაციის ხელმძღვანელი თამილა ბაწაშვილი: ,,ვმუშაობთ მოზარდი თაობის აღზრდისათვის არაძალადობრივი დამოკიდებულებების ჩამოყალიბებაზე, რაც მომავალში, იმედია, გახდება საფუძველი იმისა, რომ ვიცხოვროთ საზოგადოებაში ძალადობის გარეშე.  პროექტის ფარგლებში ვატარებთ ტრენინგებს და ვეხმარებით მსგავსი ტიპის პრობლემების მქონე ოჯახებს, ქალებსა და ბავშვებს. თუ საჭიროება მოითხოვს მსხვერპლი გადაგვყვავს დაცვის ეროვნული ქსელის კუთვნილ თავშესაფარში, სადაც უტარდებათ ფსიქოსარეაბილიტაციო კურსები და უქმნიან საუკეთესო პირობებს კრიზისიდან გამოსვლისა და შემდგომი რეაბილიტაციისთვის".

კახეთი. 12 ოქტომბერს თელავის დემოკრატიული ჩართულობის ცენტრში აღმოსავლეთ და დასავლეთ ინსტიტუტის ფინანსური მხარდაჭერით ადვოკატურის პროგრამის ფარგლებში შეხვედრა გაიმართა. შეხვედრა სამოქალაქო საზოგადოების კვლევისა და განვითარების ცენტრმა გამართაა. ღონისძიების მიზანს თელავის მუნიციპალიტეტის მოსახლეობის მიერ ადვოკატირების წარმოების გაცნობა წარმოადგენდა. ,,ძალიან კარგი შეხვედრა იყო, მომეწონა. გავეცანით ადვოკატირების წარმოების ელემენტებს, რომელიც სამომავლოდ გამომადგება. სასარგებლო იქნება ამ თემაზე კიდევ ჩატარდეს შეხვედრა ამჯერად უფრო ფართო აუდიტორიისთვის’’, – აცხადებს თელევის მკვიდრი ნანული მაზნიაშილი.

აჭარა. 11 ოტომბერს, დემმოკრატიული ჩართულობის ცენტრში, ახალგაზრდულმა ორგანიზაციამ – „Art Way”, წარმოადგინა პროექტი – „რე–ანიმაცია". აღნიშნული პროექტი მიზნად ისახავს უსინათლო და დამოუკიდენლად გადაადგილებისათვის საჭირო ინფრასტრუქტურით ქალაქის უზრუნველყოფის თაობაზე რიგი რეკომენდაციების შემუშავებას, ცენტრალური და ადგილობრივი ხელისუფლებისთვის. ასევე, უსინათლოთა საზოგადოებაში ინტეგრაციის ხარისხის ამაღლების ხელშეწყობას. პროექტის ხანგრძლივობაა 6 თვე, ამ დროის განმავლობაში ქალაქის მასშტაბის მოეწყობა და გაიმართება სხვადასხვა საღამოები და აქციები. პროექტი ხორციელდება აღმოსავლეთ დასავლეთის მართის ინსტიტუტის (EWMI) ფინანსური მხარდაჭერით.