თბილისი. მასმედიის და სამოქალაქო საზოგადოების ორგანიზაციების წარმომადგენლები ევროპული საბჭოს პრეზიდენტს, ბ-ნ შარლ მიშელს მიმართავენ. 2 ნოემბერს, თბილისის სააპელაციო  სასამართლომ პატიმრობაში დატოვა  ნიკა გვარამია, დამოუკიდებელი ტელეკომპანია „მთავარი არხის“ დამფუძნებელი და დირექტორი. ჩვენი ღრმა რწმენით, ეს არის პოლიტიკურად მოტივირებული საქმე, ხოლო მის მიმართ წარდგენილი ბრალდებები უსაფუძვლოა. ამაზე მიუთითებდა საქართველოს სახალხო დამცველისა და არასამთავრობო ორგანიზაციების მიერ სასამართლოში წარდგენილი დამოუკიდებელი მოსაზრებებიც. საქართველოს სასამართლო სისტემაში არსებული მძიმე გამოწვევების ფონზე და კრიტიკული მედიის მიმართ „ქართული ოცნების“ აგრესიული პოლიტიკის გათვალისწინებით, არ ველით, რომ ნიკა გვარამიას უფლებები დაცული იქნება უზენაეს სასამართლოში. ერთადერთ გზად მისი უსამართლო პატიმრობის აღსაკვეთად პრეზიდენტის მიერ ნიკა გვარამიას შეწყალება გვესახება. საქართველოს პრეზიდენტს უკვე არაერთმა საზოგადოებრივმა თუ პოლიტიკურმა ჯგუფმა მიმართა ამ თხოვნით. ვფიქრობთ, თქვენმა, როგორც საქართველოს დემოკრატიული განვითარების ერთგული მხარდამჭერის მიმართვამ შესაძლოა საქართველოს პრეზიდენტს, ქალბატონ სალომე ზურაბიშვილს გადაადგმევინოს ჰუმანური და ქვეყნისთვის მნიშვნელოვანი ნაბიჯი, შეიწყალოს კრიტიკული მედიის დირექტორი და პატიმრობიდან გაათავისუფლოს  პოლიტიკური პატიმარი. ბატონო მიშელ, თქვენი შუამდგომლობა სერიოზულ წვლილს შეიტანს  საქართველოში სიტყვის თავისუფლების დაცვაში და ძალას შემატებს ქართველი ხალხის მისწრაფებას ევროპისაკენ“, ნათქვამია ერთობლივ განცხადებაში. სრულად... წყარო: ორგანიზაციის გვერდი სოციალურ ქსელში

კახეთი. 3-4 ნოემბერს ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ მოქმედ ადვოკატებთან და იურისტებთან გაეროს შეზღუდული შესაძლებლობის მქონე პირთა უფლებების კონვენციის თემაზე ტრენინგი ჩაატარეს. ლაგოდეხში ჩატარებული შეხვედრები ევროკავშირის პროექტის, „სამოქალაქო საზოგადოება შეზღუდული შესაძლებლობის მქონე პირთა უფლებებისთვის“, ფარგლებში გაიმართა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) აჭარის ფილიალის შეფასებით, ნათია კაპანაძის საქმეზე სასამართლოს გადაწყვეტილება - კიდევ ერთი ნაბიჯი უკან მედიის თავისუფლებისა და ევროინტეგრაციის გზაზე. „ქუთაისის სააპელაციო სასამართლოს მიერ მიღებული გადაწყვეტილება საზოგადოებრივი მაუწყებლის აჭარის ტელევიზიისა და რადიოს ყოფილი დირექტორის ნათია კაპანაძის იმპიჩმენტის წესით თანამდებობიდან გათავისუფლების კანონიერებასთან დაკავშირებით, კიდევ ერთი დარტყმაა თავისუფალ მედიაზე. ნათია კაპანაძის ინტერესებს სასამართლოში იცავდა საქართველოს ახალგაზრდა იურისტთა ასოციაცია. როგორც საიას, ასევე მედიის ადვოკატირების კოალიციის წევრი ორგანიზაციების შეფასებით, სააპელაციო სასამართლოს მიერ მიღებული გადაწყვეტილება კიდევ ერთი მაგალითია იმისა, რომ ხელისუფლება ზღუდავს მედიის თავისუფლებას, ხოლო სასამართლოს სისტემის დამოუკიდებლობა პრობლემურია. ვფიქრობთ, მსგავსი გადაწყვეტილებები საქართველოს მიერ კანდიდატის სტატუსის მოპოვების მცდელობის ფონზე, კიდევ უფრო გვაშორებს ევროპულ მომავალს“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. 2 ნოემბერს თბილისის სააპელაციო სასამართლომ დაასრულა ნიკა გვარამიას,  კახაბერ დამენიას და ზურა იაშვილის სისხლის სამართლის საქმის განხილვა. სასამართლომ დაცვის მხარის სააპელაციო საჩივრები არ დაკმაყოფილა და ნიკა გვარამია კვლავ დამნაშავედ ცნო უფლებამოსილების ბოროტად გამოყენების ორ ეპიზოდში. გვარამიას  საბოლოო სასჯელის სახედ და ზომად განესაზღვრა თავისუფლების აღკვეთა 3 წლისა და 6 თვის ვადით. საქართველოს ახალგაზრდა იურისტთა ასოციაციამ, საერთაშორისო გამჭვირვალობა საქართველომ და ადამიანის უფლებათა ცენტრმა შეისწავლეს პირველი ინსტანციის სასამართლოს 2022 წლის 16 მაისის განაჩენი. განაჩენის შესწავლის და სხდომებზე დაკვირვების შედეგად, ორგანიზაციები მივიდნენ  დასკვნამდე, რომ ნიკა გვარამიას მიერ განხორციელებული ქმედებები არ შეიცავს სისხლის სამართლის კანონმდებლობით განსაზღვრული დანაშაულის ნიშნებს, მის მიმართ გამოტანილი განაჩენი მთელი რიგი მიმართულებით ხარვეზიანი, დაუსაბუთებელი და უკანონოა. აღსანიშნავია, რომ პირველ ინსტანციაში გვარამიას საქმეზე განაჩენი გამოიტანა მოსამართლემ, რომლის ბიექტურობასა და მიუკერძოებლობასთან დაკავშირებით არსებობს საფუძვლიანი კითხვები. ხელმომწერი ორგანიზაციები აცხადებენ რომ გაეცნობიან თბილისის სააპელაციო სასამართლოს მიერ მიღებულ დასაბუთებულ განაჩენს, „თუმცა ზემოთ ხსენებული გარემოებების ერთობლიობისა და სასამართლოში გამოკვლეული მტკიცებულებების შეფასების გათვალისწინებით, სააპელაციო სასამართლოს გადაწყვეტილება გვაფიქრებინებს, რომ სასამართლო ამ შემთხვევაშიც არ მოიქცა მოქმედი კანონმდებლობის ფარგლებში და მის მიერ მიღებული გადაწყვეტილება ნაკარნახევია პოლიტიკური მოტივებით“, ნათქვამია ერთობლივ განცხადებაში. სრულად... წყარო: rights.ge

შიდა ქართლი. გორის რაიონულმა სასამართლომ (მოსამართლე დავით მაკარაძე) ბავშვის ფიზიკური დასჯის საქმეზე გამამტყუნებელი განაჩენი გამოიტანა და ბავშვზე მოძალადეს 5 წლით თავისუფლების აღკვეთა და 2000 ლარის ოდენობით ჯარიმა შეუფარდა. ორგანიზაციის ცნობით, ბავშვმა ხილი უნებართვოდ მოკრიფა. ამის გამო კი, ხილის ერთერთმა მეპატრონემ ბავშვს პლასტმასის მილით ფეხზე ფიზიკური დაზიანება მიაყენა, ხოლო მეორემ, ბავშვი ხიდან ძალით ჩამოათრია, რამდენჯერმე გაარტყა სახეში ხელი, ამოარტყა პანღური, მიაყენა სიტყვიერი შეურაცხყოფა, ძალის გამოყენებით წელსზემოთ გააშიშვლა, აიძულა შარვლის გახდა და ამ მდგომარეობაში - ბავშვი ქუჩაში გაუშვა. მოზარდს სხეულზე ფიზიკური დაზიანების კვალი აღენიშნებოდა. ძალადობის ფაქტიდან წელიწადნახევრის შემდეგ, გორის რაიონულმა სასამართლომ დამნაშავედ ცნო პირი, რომელმაც გიორგი დასაჯა და ღირსება შეულახა. პარტნიორობა ადამიანის უფლებებისთვის (PHR), აღნიშნულ საქმეს USAID სამართლის უზენაესობის პროგრამის მხარდაჭერით აწარმოებს. სრულად... წყარო: phr.ge

თბილისი. 2022 წლის 2 ნოემბერის თბილისის სააპელაციო სასამართლომ გამოაცხადა განაჩენი ტელეკომპანია „რუსთავი 2-ის“ ყოფილი დირექტორის, ამჟამად „მთავარი არხის“ დამფუძნებლის და გენერალური დირექტორის ნიკა გვარამიას საქმეზე და გვარამია პატიმრობაში დატოვა. „სააპელაციო სასამართლოს მიერ დღეს მიღებული გადაწყვეტილება ეწინააღმდეგება ევროკომისიის მიერ საქართველოსთვის სტატუსის მისაღებად დაწესებულ მოთხოვნებს პლურალისტური მედია გარემოსა და დამოუკიდებელი და მიუკერძოებელი სასამართლოს შესახებ. ნიკა გვარამიას საქმე მოხვდა საქართველოში მედიის თავისუფლებისა და ჟურნალისტების უსაფრთხოების შესახებ ევროპარლამენტის მიერ მიღებულ რეზოლუციაშიც. სასამართლოს ამ გადაწყვეტილებამ საქართველო კიდევ უფრო დააშორა ევროკავშირის კანდიდატის სტატუსს და ბუნდოვანი გადახადა ჩვენი ქვეყნის ევროპული მომავალი. არსებულ კრიტიკულ სიტუაციაში კიდევ ერთხელ მოვუწოდებთ საქართველოს პრეზიდენტს, შეიწყალოს ნიკა გვარამია და დადებითი როლი შეასრულოს ევროპის კავშირში ინტეგრაციის პროცესში“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. სამი არასამთავრობო ორგანიზაცია - სოციალური სამართლიანობის ცენტრი, საია და მწვანე ალტერნატივა აქვეყნებს შეფასებას, სახელმწიფო კომისიის მიერ ითხვისის შესახებ მომზადებულ დასკვნაზე. როგორც საზოგადოებისთვის ცნობილია, მიმდინარე წლის მარტში ჭიათურის მუნიციპალიტეტის სოფელ ითხვისში, სახლების ჩაქცევის შემდეგ საქართველოს მთავრობის განკარგულების საფუძველზე, შეიქმნა უწყებათაშორისი კომისია, რომელსაც ამ პროცესების გამომწვევი მიზეზების შესწავლა და „სტიქიის“ არეალში მოქცეული მოსახლეობის იდენტიფიცირება დაევალა. კომისიის დასკვნა, რომელიც 10 ოქტომბრითაა დათარიღებული, მოსახლეობის ნაწილისთვის ხელმისაწვდომი ოქტომბრის შუა რიცხვებში გახდა. ორგანიზაციების შეფასებით, დასკვნა ითხვისელების ღირსეული განსახლების გარანტიებს ვერ ქმნის შემდეგი მიზეზების გამო: •    კომისიას არ შეუფასებია, რა ბედი უნდა ეწიოს სოფელს/უბანს - უნდა მოხდეს მთლიანი თემის განსახლება და განხორციელდეს წიაღის მოპოვება, თუ არსებობს მოლოდინი, რომ დანარჩენი მცხოვრებლებისთვის სოფელში დარჩენა უსაფრთხოა; •    ბუნდოვანია რა სტანდარტებით, წესებით და რა ვადებში მოხდება დაზარალებულების განსახლება. ამ ეტაპზე მხოლოდ სახლების საბაზრო ღირებულება ფასდება, რაც, სავარაუდოდ, საკმარისი ვერ იქნება ახალი საცხოვრებელი სახლების ასაგებად; •    დასკვნის მიხედვით, შეისწავლეს მხოლოდ 106 ოჯახის მდგომარეობა, თუმცა კომისია არ მსჯელობს იმაზე, თუ რატომ არ შეფასდა დამატებით ის საცხოვრისებიც, რომლებიც ასევე ექცევა მიწის ჩაქცევის არეალში და სავარაუდოდ, არც ეს სახლებია ბოლომდე უსაფრთხო; •    კომისია გამოყოფს მნიშვნელოვანი და ნაკლები დაზიანების მქონე ნაგებობებს და ამბობს, რომ პირველ რიგში უნდა მოხდეს მნიშვნელოვნად დაზიანებულ სახლში მცხოვრები მოსახლეობის განსახლება. თუმცა გაურკვეველია, კონკრეტულად რა კრიტერიუმებით მიაკუთვნა კომისიამ სახლები ნაკლებად დაზიანებულ, ან მნიშვნელოვნად დაზიანებულ კატეგორიებს. სრულად... წყარო: www.gyla.ge

თბილისი. საერთაშორისო გამჭვირვალობა - საქართველოს იურისტებმა 2012-2021 წლებში მოქალაქეთა სასარგებლოდ 762 საქმე მოიგეს სასამართლოში. „ჩვენი იურისტები წლებია იურიდიული კონსულტაციებით და უფასო სამართლებრივი დახმარებით გვერდით უდგანან სახელმწიფოს მიერ უკანონოდ დაჩაგრულ ადამიანებს და მათი უფლებების აღდგენისთვის ძალისხმევას არ იშურებენ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ ლია დეკანაძის ინტერვიუს პოლიტიკის, გენდერის და ისლამის ისტორიის მკვლევართან ინშაჰ მალიქთან. „ერთ თვეზე მეტი გავიდა, რაც 22 წლის მაჰსა ამინის ტრაგიკულ სიკვდილს ჯერ ირანის ქურთულ რეგიონში და შემდგომ მთელს ქვეყანაში ფართო საპროტესტო ტალღა მოჰყვა. მოქალაქეები საკუთარი სიცოცხლის ფასად აპროტესტებენ სავალდებულო ჰიჯაბის წესს და დემონსტრაციულად წვავენ მას, გამოდიან ანტისახელისუფლებო სლოგანებით და მოითხოვენ სამოქალაქო თავისუფლებებს. წინააღმდეგობის მოძრაობამ გადალახა ირანში ეთნიკური, სოციალური, კულტურული საზღვრები; გადავიდა სკოლებსა და უნივერსიტეტებშიც. პროცესს გამოხმაურება ირანის საზღვრებს მიღმა, მათ შორის საქართველოშიც მოჰყვა, რაც მხარდამჭერი პერფორმანსებითა და სოლიდარობის აქციებით გამოიხატა“. სრულად... წყარო: socialjustice.org.ge

თბილისი. ორგანიზაცია „საფარის“ ინფორმაციით, პირადი ცხოვრების ამსახველი ინფორმაციის გავრცელებაში ბრალდებულ კაცს სასამართლომ აღმკვეთი ღონისძიების სახით პატიმრობა შეუფარდა. დაზარალებული ქალის განმარტებით, მისი პირადი ცხოვრების ამსახველი ინფორმაცია ბრალდებულმა სოციალურ ქსელებში გაავრცელა. „საფარმა“ საგამოძიებო სამსახურს წარუდგინა შესაბამისი მტკიცებულებებიც. ორი კვირის განმავლობაში  უწყებამ „საფარის” ჩართულობით არაერთი საგამოძიებო მოქმედება ჩაატარა. საბოლოოდ, 22 ოქტომბერს კაცი დააკავეს და წინასწარი პატიმრობა შეუფარდეს. სრულად...  წყარო: sapari.ge

თბილისი. სოციალური სამართლიანობის ცენტრის ინფორმაციით, თეა წულუკიანის მხრიდან ჩატარებული საკადრო წმენდის შედეგად სამსახურიდან გათავისუფლებულმა კიდევ ერთმა მოქალაქემ, გუგა გოგაძემ, 2022 წლის 26 ოქტომბერს თბილისის სააპელაციო სასამართლოში შრომითი დავა მოიგო. მის ინტერესებს სოციალური სამართლიანობის ცენტრი იცავს. სოციალური სამართლიანობის ცენტრი პარტნიორ ორგანიზაციებთან ერთად, აგრძელებს დავას როგორც კულტურული მემკვიდრეობის დაცვის ეროვნული სააგენტოს, ასევე მუზეუმის თანამშრომელთა უკანონო გათავისუფლების საქმეებზე. სრულად... წყარო: socialjustice.org.ge

თბილისი. საია-ს ინფორმაციით, სახალხო დამცველმა დაადგინა დისკრიმინაციის ფაქტი ეკატერინე კიკნაძის, დინარა ვაჩნაძის, ნინო ხუნდაძისა და დავით ნიორაძის მიმართ, რის საფუძველზეც 2022 წლის 26 ოქტომბერს გამოსცა რეკომენდაცია განსხვავებული მოსაზრებების ნიშნით პირდაპირი დისკრიმინაციის აღმოფხვრის შესახებ. განმცხადებლების ინტერესებს სახალხო დამცველის აპარატში საია წარმოადგენდა. კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ სამინისტროს დაქვემდებარებულ დაწესებულებებში რეორგანიზაცია და მასშტაბური ცვლილებები დაიწყო. შედეგად, ამ დროისთვის მრავალი დასაქმებული გათავისუფლდა დაკავებული პოზიციებიდან. გათავისუფლებულებს შორის არიან ეკატერინე კიკნაძე, დინარა ვაჩნაძე და ნინო ხუნდაძე, რომლებიც თავიანთი უფლებების დაცვას სასამართლოში აგრძელებენ. სრულად... წყარო: gyla.ge

კახეთი. „უფლებები საქართველომ“ ორგანიზაცია „ომისა და მშვიდობის გაშუქების ინსტიტუტის“  (IWPR) მხარდაჭერით ოქტომბრიდან დაიწყო ახალი პროექტი „ლაგოდეხის მუნიციპალიტეტში ეთნიკური უმცირესობების პოლიტიკურ-სოციალურ ცხოვრებაში ჩართულობის ზრდის ხელშეწყობა“. პროექტის პარტნიორები არიან „ლელიანის ზრდასრულთა განათლების ცენტრი“ და მედია ორგანიზაცია „კახეთის ხმა“.  პროექტის დასრულების შემდეგ, პროექტში ჩართული სულ მცირე ერთი ახალგაზრდა „უფლებები საქართველოს“ დაფინანსებით გაივლის ანაზღაურებად სტაჟირებას ორგანიზაციაში და  პრაქტიკულად გაეცნობა ადამიანის უფლებათა აქტივიზმს. სრულად...  წყარო: ორგანიზაციის გვერდი სოციალურ ქსელში

სამცხე-ჯავახეთი. სოციალური სამართლიანობის ცენტრმა ევროპის ადამიანის უფლებათა ადვოკატირების ცენტრთან ერთად ევროპის საბჭოს მინისტრთა კომიტეტს სოფელ მოხეში ადგილობრივი მუსლიმების არასათანადო მოპყრობის საქმეზე - „მიქელაძე და სხვები საქართველოს წინააღმდეგ“ საქმის აღსრულების შესახებ ანგარიში წარუდგინა. „მოქალაქის მიმართ არასათანადო მოპყრობის ბრალდებებთან დაკავშირებით გამოძიება კვლავ არაეფექტიანად მიმდინარეობს და გამოკვეთილი არ არის პოლიციელების მხრიდან რელიგიური შეუწყნარებლობის შესაძლო მოტივი“, - ვკითხულობთ ანგარიშში. ამ საქმეზე ევროსასამართლომ 2021 წლის გადაწყვეტილებით 2014 წელს სოფელ მოხეში ისტორიული მეჩეთის შენობის ბიბლიოთეკად გადაკეთების გასაპროტესტებლად მისული ადგილობრივი მუსლიმების უფლებების დარღვევა დაადგინა. სრულად... წყარო: socialjustice.org.ge

სამცხე-ჯავახეთი. სოციალური სამართლიანობის ცენტრი აქვეყნებს გოჰარ აღჯოიანის ბლოგპოსტს: მოქალაქეობის გარეშე დარჩენილები. „2008 წლის აგვისტოს ომის შემდეგ რუსეთში საქართველოს მოქალაქეების შესვლა, იქ ხანგრძლივი დროის განმავლობაში დარჩენა და დასაქმება გართულდა. შრომით მიგრაციაში წასულ ხალხს რუსეთში ყოფნა და მუშაობა საქართველოს მოქალაქეობის პასპორტით მხოლოდ სამი თვის განმავლობაში შეეძლოთ. ამ პოლიტიკურმა რეალობამ გამოიწვია ის, რომ ადამიანების უმეტესობამ ჯავახეთში საქართველოს მოქალაქეობასთან ერთად, სომხეთის მოქალაქეობაც მიიღო, რაც მათ რუსეთში მუშაობის და საბაზისო შემოსავლის მიღების შესაძლებლობას აძლევდა. თუმცა, მალევე, ვისაც საზღვარზე დაუფიქსირდა ორმაგი მოქალაქეობა, ჩამოერთვათ საქართველოს პასპორტები და შესაბამისად, საქართველოს მოქალაქეობაც. კანონის აღსრულება კიდევ უფრო გამკაცრდა 2013 წლიდან და ათასობით ადამიანმა აღმოაჩინა, რომ ისინი საქართველოს მოქალაქეობის გარეშე დარჩნენ“. სრულად... წყარო: socialjustice.org.ge

შიდა ქართლი. სოციალური სამართლიანობის ცენტრის ინფორმაციით, გორში, ანწუხელის ქუჩაზე მდებარე ყოფილი ნარკოლოგიური კლინიკის ხუთსართულიანი შენობა წლებია, სოციალურ საცხოვრისადაა გადაქცეული. აქ 150-ზე მეტი ადამიანი უკიდურესად მძიმე და ღირსების შემლახავ გარემოში ცხოვრობს. მათი ნაწილი დევნილია, ნაწილი კი - უსახლკაროდ დარჩენილი ადამიანები. „საცხოვრისში უამრავი მძიმე პრობლემაა, რომელიც მუნიციპალიტეტის მხრიდან დაუყოვნებელ რეაგირებას მოითხოვს. შენობა ავარიულია, რის გამოც ადამიანების სიცოცხლე და ჯანმრთელობა საფრთხის წინაშე დგას. საცხოვრისში არსებობს გადატვირთულობის პრობლემაც - მცირე ფართობებში მრავალსულიან ოჯახებს უწევთ ცხოვრება, რის გამოც ადამიანებისათვის, მათ შორის, ბავშვებისთვის ან/და შშმ პირებისათვის ინდივიდუალური სივრცის არსებობის შესაძლებლობა გამოირიცხება. აქ მყოფ ადამიანებს ასევე, არ აქვთ ინდივიდუალური სველი წერტილები - ისინი მათ სართულზე განლაგებული საერთო სველი წერტილებით სარგებლობენ, სადაც კედლები ინგრევა და ჭერიდან ბათქაში ცვივა. შენობაში არ მოდის ცხელი წყალი და აქ არც სამზარეულო სივრცეა“. სრულად... წყარო: socialjustice.org.ge

რეგიონები. „უფლებები საქართველომ“, გაეროს ლტოლვილთა უმაღლესი კომისარიატის (UNHCR) მხარდაჭერითა და სახელმწიფო სერვისების განვითარების სააგენტოსთან თანამშრომლობით, მოქალაქეობის არქონის აქტუალურ საკითხებზე რეგიონებში საინფორმაციო შეხვედრები გამართა. შეხვედრები 21 სექტემბრიდან 18 ოქტომბრამდე პერიოდში, საქართველოს შვიდ ქალაქში - ბათუმში, ზუგდიდში, ქუთაისში, მარნეულში, თელავში, ახალციხესა და გორში ჩატარდა და მათ ადგილობრივი არასამთავრობო ორგანიზაციების, ასევე საქართველოს სახალხო დამცველისა და იურიდიული დახმარების სამსახურის წარმომადგენლები დაესწრნენ. სრულად... წყარო: ორგანიზაციის გვერდი სოციალურ ქსელში

თბილისი. 13 ოქტომბერს, ინფორმაციის თავისუფლების განვითარების ინსტიტუტმა (IDFI) გამართა საჯარო განხილვა პერსონალური მონაცემებისა და კიბერუსაფრთხოების ექსპერტებთან, იურისტებთან, საჯარო, კერძო და სამოქალაქო საზოგადოების წარმომადგენლებთან კიბერსივრცეში პერსონალური მონაცემების დაცვის მექანიზმების გაუმჯობესების საკითხებზე. სრულად... წყარო: idfi.ge

თბილისი. კოალიცია ბავშვებისა და ახალგაზრდებისთვის მარიტა მეფარიშვილის ტრაგიკულად დაღუპვასთან დაკავშირებით განცხადებას აქვეყნებს. „13 წლის მოზარდის გარდაცვალების ფაქტზე, საქართველოს შინაგან საქმეთა სამინისტრომ დაიწყო გამოძიება სისხლის სამართლის კოდექსის 240-ე მუხლის პირველი ნაწილით (უსაფრთხოების წესების დარღვევა). თბილისის მერის განცხადებით „... ყველა დაისჯება შესაბამისად“. უკვე დაკავებულია მერიის კონტრაქტორი კომპანიის - „გრინსერვის +-ის“ დირექტორი ლაშა ფურცხვანიძე. ... ტრადიციად იქცა ყოველი მსგავსი ინციდენტის შემდეგ პრობლემის შედეგზე კონცენტრირება იმ სისტემურ გამოწვევაზე რეაგირების გარეშე, რომელიც ამ პრობლემას იწვევს. აუცილებელია, სისტემურად გაანალიზდეს, სახელმწიფოს როლი ტრაგედიების თავიდან აცილების პროცესში“. სრულად... წყარო: ორგანიზაციის გვერდი სოციალურ ქსელში კესო გველესიანის ნამუშევარი

თბილისი. ადამიანის უფლებათა ცენტრმა პრესკონფერენციაზე წარმოადგინა მიხეილ სააკაშვილის ჯანმრთელობის დაცვის უფლების თაობაზე მომზადებული ანალიტიკური დოკუმენტი, სახელწოდებით „პატიმრის უფლება ჯანდაცვაზე - მიხეილ სააკაშვილის წინააღმდეგ მიმდინარე სასამართლო პროცესის და თანმდევი მოვლენების ანალიზი“. ანალიტიკური დოკუმენტი ეყრდნობა სხვადასხვა კვალიფიციურ წყაროს, პირველ რიგში კი - ადამიანის უფლებათა ცენტრის სასამართლო მონიტორის მიერ მომზადებულ სასამართლო სხდომების მონიტორინგის ანგარიშებს. სრულად... წყარო: ორგანიზაციის გვერდი სოციალურ ქსელში

კოალიცია დამოუკიდებელი ცხოვრებისთვის აქვეყნებს გიორგი ხიზანიშვილის ბლოგპოსტს: დედა, როგორც პერსონალური ასისტენტი. „ამ ბლოგის დაწერა იმიტომ გადავწყვიტე, რომ საზოგადობას ვაჩვენო, რამდენად რთულია იყო  დედა, როდესაც შენი შვილი შეზღუდული შესაძლებლობის მქონეა. ვინაიდან, ჩვენი ქვეყანა ვერ უზრუნველყოფს პერსონალურ ასისტენტს და თავიდან იცილებს ამ პასუხისმგებლობას, შეზღუდული შესაძლებლობის მქონე პირთა ასისტენტებად ძირითადად, ოჯახის წევრები გვევლინებიან. ფაქტობრივად, ჩვენი ოჯახის წევრები საკუთარ ცხოვრებაზე უარს ამბობენ იმისთვის, რომ თავი ღირსეულ ადამიანებად ვიგრძნოთ, მივიღოთ განათლება, გვქონდეს სამსახური და საზოგადოების სრულყოფილ წევრებად ვიქცეთ. ჩემ შემთხვევაშიც მსგავსად ხდება. როდესაც რამე მჭირდება, დედა ყოველთვის გვერდით ჩნდება. სამწუხაროდ, ეს მიღებული პრაქტიკაა და ვინმეს რომ ჰკითხოთ გიპასუხებთ - „აბა რა, ვინ  უნდა მიხედოს, თუ არა ოჯახის წევრმა“, რაც არასწორია და მიუღებელი. თუ რატომ, ამის საილუსტრაციოდ ვიტყვი: როდესაც ბავშვი იბადება, ის დამოუკიდებლად ცხოვრებას ვერ ახერხებს თუმცა, ასაკის მატებასთან ერთად, ცდილობს დამოუკიდებლად შეასრულოს აქტივობები. ყველას მსგავსად, შეზღუდული შესაძლებლობის მქონე პირსაც ესაჭიროება თავისუფლება და დამოუკიდებლობა. როგორც ყველას, მასაც სურს დამოუკიდებლად მიიღოს გადაწყვეტილებები და რაც მთავარია, აღასრულოს საკუთარი ნება. ჩვენთან კი, მოგეხსენებათ, როგორც ხდება: შეზღუდული შესაძლებლობის მქონე პირს ვერ აღიქვამენ „სრულყოფილ“ ადამიანად. გამოსავალი რაშია? სწორედ იმაში, რომ შეზღუდული შესაძლებლობის პირს სახელმწიფომ პირადი ასისტენტის სერვისი შესთავაზოს, რაც კიდევ უფრო მეტად გაზრდის შეზღუდული შესაძლებლობის მქონე პირის დამოუკიდებლობის ხარისხს“. სრულად... წყარო: disability.ge

თბილისი. „პარტნიორობა ადამიანის უფლებებისთვის“ იურისტი თამარ გაბოძე მცირე საოჯახო ტიპის სახლის თანამშრომლებს და პერსონალურ ასისტენტებს შეხვდა, რომლებიც უფლებამოსილების ფარგლებში, შშმ ქალებს სხვადასხვა სერვისს აწვდიან. თანამშრომლებმა ისაუბრეს სახელმწიფოს მხრიდან ბენეფიციარებზე გამოყოფილ მწირ დაფინანსებაზე. ასევე, იმ სირთულეებზე, რასაც შშმ ქალები აწყდებიან სექსუალური და რეპროდუქციული ჯანმრთელობის სერვისით სარგებლობისას. „პროექტის განმავლობაში დღის ცენტრებში და მცირე საოჯახო ტიპის სახლებში განხორციელებული ვიზიტებზე მუდმივად იკვეთება სახელმწიფოს მხრიდან ნაკისრი ვალდებულების შეუსრულებლობა და შშმ ქალთა სექსუალური და რეპროდუქციული ჯანმრთელების უფლების დარღვევა“, ნათქვამია ორგანიზაციის ვებგვერდზე. სრულად... წყარო: phr.ge