თბილისი. საქართველოს ახალგაზრდა იურისტთა ასოციაციამ (საია) მისი ერთ-ერთი თანამშრომლის სახელით განცხადებით მიმართა პერსონალურ მონაცემთა დაცვის სამსახურს და მოითხოვა „მობილურების ნომრების ბაზის“ მფლობელის მიერ პერსონალური მონაცემების დამუშავების კანონიერების შესწავლა. „პერსონალურ მონაცემთა დაცვის სამსახურმა განცხადების შესწავლის შედეგად მიიღო გადაწყვეტილება იმ პირის სამართალდამრღვევად ცნობის თაობაზე, რომელიც არის აპლიკაციის მფლობელი. მას დაეკისრა 2 000 ლარის ოდენობით ჯარიმა და ასევე, დაევალა აპლიკაციიდან განმცხადებლის მონაცემების წაშლა“. სრულად... წყარო: gyla.ge

თბილისი. 2021 წლის ზამთარში პარტნიორობა ადამიანის უფლებებისთვის (PHR) ნანას (სახელი შეცვლილია) საქმეში ჩაერთო. ნანა სექსუალური ძალადობის მსხვერპლი ქალია. მასზე ოჯახის ახლობელმა მის ბავშვობაში იძალადა. „პირველი ინსტანციის სასამართლომ ბრალდებული პირი გაამართლა, ხოლო ბრალდებულის ინტერესების დამცველმა ადვოკატებმა საადვოკატო ბიუროს სოციალურ გვერდზე ნანას საქმის შესახებ ინფორმაცია გამოაქვეყნეს. მიუხედავად იმისა, რომ დაზარალებულის სახელი და გვარი ინიციალებით იქნა აღნიშნული, პოსტის მეშვეობით გასაჯაროვდა ისეთი ინფორმაცია საქმის დეტალების, დაზარალებულისა და მისი ოჯახის წევრების შესახებ, რომ მთლიანობაში იდენტიფიცირებადი გახდა დაზარალებული. PHR-მა განცხადებით მიმართა პერსონალურ მონაცემთა დაცვის სამსახურს და მოითხოვა აღნიშნული საკითხის შესწავლა და რეაგირება. პერსონალურ მონაცემთა დაცვის სამსახურმა გაიზიარა PHR-ის პოზიცია და დაადგინა, რომ საადვოკატო ბიუროს მხრიდან მოხდა სამართალდარღვევა, რის გამოც საადვოკატო ბიურო დაჯარიმდა 500 ლარის ოდენობით. ბიუროს ასევე დაევალა ორგანიზაციის სოციალური გვერდიდან აღნიშნული პოსტის აღება“. ორგანიზაცია აგრძელებს დაზარალებული ქალის დაცვას. სრულად... წყარო: phr.ge

თბილისი. საქართველოს ახალგაზრდა იურისტთა ასოციაცია (საია) იცავდა კომპანია „თბილისი ენერჯიში“ დასაქმებულ პირს, რომელმაც სამსახურებრივი მოვალეობების შესრულებისას მიიღო ტრავმა. დამსაქმებელი დაზარალებული თანამშრომლისთვის ზიანის ანაზღაურებაზე უარს ამბობდა. შესაბამისად, საჭირო გახდა სასამართლოში სარჩელის შეტანა შპს „თბილისი ენერჯის“ წინააღმდეგ. თბილისის სააპელაციო სასამართლოს გადაწყვეტილებით, კომპანიას ყოფილი თანამშრომლის სასარგებლოდ, დაეკისრა სარჩოს გადახდა 2019 წლის ივნისიდან საპენსიო ასაკს მიღწევამდე. საიას ინფორმაციით, სააპელაციო სასამართლოს გადაწყვეტილება კანონიერ ძალაშია შესული. სრულად...  წყარო: gyla.ge

იმერეთი. სოციალური სამართლიანობის ცენტრმა კობა და გელა კვინიკაძეების მიმართ ხარაგაულის პოლიციის თანამშრომლების მიერ არასათანადო მოპყრობის ფაქტზე ადამიანის უფლებათა ევროპულ სასამართლოში საჩივარი წარადგინა. განმცხადებლები დავობენ ევროპული კონვენციის მე-3 (წამების, არაადამიანური და ღირსების შემლახავი მოპყრობის აკრძალვა) და მე-13 (უფლება სამართლებრივი დაცვის ეფექტიან საშუალებებზე) მუხლების დარღვევაზე. „2018 წლის 18 ნოემბერს, კობა და გელა კვინიკაძეები ხარაგაულის რაიონის სოფელი ბაბის ტერიტორიაზე, პოლიციის მოთხოვნისადმი დაუმორჩილებლობისა და წინააღმდეგობის გაწევის საფუძვლით დააკავეს. დაკავების ადგილზე და შემდგომ, ხარაგაულის პოლიციის შენობაში, დაახლოებით საათნახევრის განმავლობაში, ხარაგაულის პოლიციის განყოფილების უფროსი და სხვა თანამშრომლები კობა და გელა კვინიკაძეებს აყენებდნენ ფიზიკურ და სიტყვიერ შეურაცხყოფას, რის შედეგადაც მათ სხეულის სხვადასხვა ნაწილში დაზიანებები მიიღეს“. სრულად...  წყარო: socialjustice.org.ge

შიდა ქართლი. გამყოფი ხაზის მიმდებარე სოფელ აძვში, რომელიც გორის მუნიციპალიტეტში მდებარეობს, ადამიანის უფლებათა ცენტრს პოლიციამ წყლის იმ სათავე ნაგებობის დათვალიერების უფლება არ მისცა, რომელიც ადგილობრივების თქმით, დაბინძურებულია. არასამთავრობო სექტორი და მედია გამყოფ ხაზთან გადაადგილების შეზღუდვის შესახებ ხშირად ამახვილებს ყურადღებას. ორგანიზაციამ ოფიციალური წერილით მიმართა, როგორც შინაგან საქმეთა სამინისტროს, ასევე - სახელმწიფო უსაფრთხოების სამსახურსაც. HRC-მ უწყებებისგან მოითხოვა განმარტება, თუ რატომ იზღუდება პოლიციის მიერ გადაადგილება გამყოფი ხაზის მიმდებარე სოფლებში და არსებობს თუ არა შესაბამისი ნორმატიული აქტი, რომელიც ამ საკითხს არეგულირებს. სრულად... წყარო: www.humanrights.ge

თბილისი. „უფლებები საქართველოს“ დახმარებით, ყოფილმა ლექტორმა, რომელიც თბილისის სახელმწიფო უნივერსიტეტს დისკრიმინაციაში ადანაშაულებდა, უნივერსიტეტის წინააღმდეგ დავა სააპელაციო სასამართლოშიც მოიგო. ...სასამართლომ დაადასტურა, რომ თსუ, განსხვავებული მოსაზრებების გამოხატვის გამო, ლექტორს - დავით ნიჟარაძეს დისკრიმინაციულად მოეპყრო.  შესაბამისად, სააპელაციო სასამართლომ უნივერსიტეტს ლექტორის სასარგებლოდ, მატერიალური და მორალური ზიანის ასანაზღაურებლად, 4350 ლარის გადახდა დააკისრა. სრულად...  წყარო: rights.ge

თბილისი. საქართველოს ახალგაზრდა იურისტთა ასოციაციის ინფორმაციით, 28 ივლისს თბილისის საქალაქო სასამართლოში არასრულწლოვანი შშმ პირის მიმართ არაადამიანურ მოპყრობაში ბრალდებული პოლიციელის საქმეზე ნაფიც მსაჯულებმა გამამტყუნებელი ვერდიქტი გამოიტანეს და სასჯელის ზომად 5 წლით თავისუფლების აღკვეთა განისაზღვრა. წარდგენილ ბრალდებაში გამამტყუნებელი ვერდიქტის გამოტანას 12-დან 8 ნაფიც მსაჯულმა დაუჭირა მხარი. საქმე ეხებოდა ფაქტს, რომლის შესახებაც ინფორმაცია 2022 წლის 24 იანვარს გავრცელდა მედიასაშუალებებში. გავრცელებული ვიდეო-ჩანაწერის მიხედვით, მეტროპოლიტენის საპატრულო პოლიციის თანამშრომლები არასრულწლოვანი შშმ პირის მიმართ ახორციელებდნენ ძალადობრივ ქმედებას. დაზარალებულის ინტერესებს საია იცავდა. სრულად... წყარო: gyla.ge

თბილისი. სოციალური სამართლიანობის ცენტრის ინფორმაციით, ორგანიზაცია ქვეყანაში არადომინანტური ეთნიკური ჯგუფების მხარდასაჭერად გაწეული ძალისხმევისთვის OSCE-ს ეროვნული უმცირესობების საკითხებში უმაღლესი კომისრის ოფისის პრესტიჟული გლობალური ჯილდოს - Max van der Stoel 2022 წლის გამარჯვებული გახდა. ეს პრიზი 2011 წელს დაარსდა და ერთ-ერთი მნიშვნელოვანი ჯილდოა ადამიანის უფლებათა სფეროში, რომელსაც გადასცემენ ორგანიზაციებსა და პერსონებს, თავიანთ ქვეყნებში ეთნიკური/ეროვნული უმცირესობების მიმართულებით გაწეული განსაკუთრებული შრომისა და მიღწევებისთვის. სრულად... წყარო: socialjustice.org.ge

თბილისი. საზოგადოებრივი ორგანიზაციები ეხმაურებიან სახელმწიფო უსაფრთხოების სამსახურის უფროსის ყოფილი მოადგილის, იოსებ (სოსო) გოგაშვილის, დაკავებას და შემდეგ განვითარებულ მოვლენებს. „მიგვაჩნია, რომ ხელისუფლებას გოგაშვილის ფიზიკური უსაფრთხოებისა და ჯანმრთელობის დაცვის, მის მიმართ მართლმსაჯულების მაღალი სტანდარტით წარმართვის და მის მიერ გავრცელებული ინფორმაციის დაუყოვნებლივ გამოძიების განსაკუთრებული ვალდებულება აკისრია“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. სოციალური სამართლიანობის ცენტრის ინფორმაციით, შშმ პირთა უფლებების კონვენციის იმპლემენტაციის უწყებათაშორისი საკოორდინაციო კომიტეტის საკონსულტაციო საბჭოს წევრმა შშმ პირებმა და მათ უფლებებზე მომუშავე ორგანიზაციებმა საქართველოს უსინათლოთა კავშირში განვითარებულ მოვლენებთან დაკავშირებით განცხადებით მთავრობას მიმართეს და ყველა დაინტერესებული მხარის ჩართულობით, კონსტრუქციული ფორმით კონფლიქტის მოგვარების ხელშეწყობისკენ მოუწოდეს. „სიტუაციის სიმწვავიდან გამომდინარე, განცხადებაზე ხელმომწერებმა მიმართეს მთავრობას, მოიწვიოს საკოორდინაციო კომიტეტის რიგგარეშე სხდომა, რომლის ფარგლებშიც განხილული იქნება კავშირში შექმნილი სიტუაცია და შეჯერდება გამოწვევების დაძლევის მოკლე და გრძელვადიანი გეგმა/ხედვა. საქართველოს უსინათლოთა კავშირში შექმნილი ვითარების სიმწვავიდან გამომდინარე და მოშიმშილე ადამიანების სიცოცხლისა და ჯანმრთელობის დასაცავად უმნიშვნელოვანესად მიგვაჩნია ისეთი სივრცის შექმნა, რომელიც ყველა დაინტერესებულ მხარეს მისცემს შესაძლებლობას, დააფიქსიროს საკუთარი პოზიცია, გაცვალოს მოსაზრებები და იპოვოს არსებული კრიზისული სიტუაციიდან გამოსვლის შესაძლებლობა. მიგვაჩნია, რომ ამგვარი სივრცის შექმნა სწორედ უწყებათაშორისი საკოორდინაციო კომიტეტის ფარგლებში უნდა მოხდეს, რის საფუძველსაც ეროვნული კანონმდებლობა და საერთაშორისო დონეზე არსებული სტანდარტები/რეკომენდაციები იძლევა. შესაბამისად, მოგმართავთ თხოვნით, მოიწვიოთ კომიტეტის რიგგარეშე სხდომა, რომელზეც ყველა დაინტერესებული მხარის მონაწილეობით განხილული იქნება კავშირში შექმნილი სიტუაცია და შეჯერდება გამოწვევების დაძლევის მოკლე და გრძელვადიანი გეგმა/ხედვა“, ნათქვამია განცხადებაში. სრულად... წყარო: socialjustice.org.ge

სამცხე-ჯავახეთი. 22 ივლისს, პარტნიორობა ადამიანის უფლებებისთვის (PHR) ადვოკატებმა ბორჯომის დღის ცენტრ „თებეს“ თანამშრომლებისა და მათი ბენეფიციარების მშობლებისთვის ტრენინგი ჩაატარეს თემაზე: „შშმ პირების სექსუალური და რეპროდუქციული ჯანმრთელობის უფლები“. „ტრენინგის მსვლელობისას PHR-ის ადვოკატებმა მიმოიხილეს ეროვნული კანონმდებლობა და საერთაშორისო კონვენცია შშმ პირთა უფლებების შესახებ. ასევე, მშობლებს და მომვლელებს მიეწოდათ ინფორმაცია თუ რა უფლებებს მოიცავს ჩარჩო ტერმინი - სექსუალური და რეპროდუქციული ჯანმრთელობის უფლება, რა სახის მხარდაჭერა შეიძლება დასჭირდეს გარდატეხის ასაკში მყოფ შეზღუდული შესაძლებლობის მქონე გოგოებს. მათ შორის მენსტრუალური ციკლის დროს, როგორია თვით სტიმულირების თანამედროვე აღქმა და რა შემთხვევაში უნდა მიექცეს ყურადღება აღმზრდელისა თუ სპეციალისტის მიერ. ასევე, ტრენინგის დროს განხილული იქნა შეზღუდული შესაძლებლობის მქონე ქალებისთვის აბორტის შესახებ ინფორმაციისა და მომსახურების მიწოდების და კომუნიკაციის პრინციპები“. სრულად... წყარო: phr.ge

თბილისი. სოციალური სამართლიანობის ცენტრის ინფორმაციით, 2013-2019 წლებში რუსეთმა საქართველოს 23 ადამიანის ექსტრადიცია მოსთხოვა. ამათგან, საქართველოს ხელისუფლებამ 14 შემთხვევაში მოთხოვნა დაკმაყოფილდა. ორგანიზაციის ცნობით, განახლებულ ინფორმაციას საქართველოს იუსტიციის სამინისტრო არაერთი მიმართვის მიუხედავად, აღარ გასცემს. „სამწუხაროდ, ბოლო წლებში „ქართული ოცნების“ ხელისუფლების მხრიდან ეს მანკიერი პრაქტიკა ნორმალიზებულია. ჩვენ მიერ შესწავლილი  საქმეები ცხადყოფს, რომ ექსტრადიციის შემთხვევებისას, ქართული სახელმწიფო იჩენს პოლიტიკურ ლოიალობას რუსეთის ფედერაციის მიმართ და ადამიანის უფლებების მძიმე დარღვევის რისკებს არასათანადოდ აფასებს. ჩვენთვის მორალური და პოლიტიკური თვალსაზრისითაც სრულად გაუგებარია, როგორ შეიძლება საქართველოს სახელმწიფომ დაუშვას რუსეთის ფედერაციასთან,  რომელიც უკვე წლებია ჩვენი ქვეყნისა და რეგიონის მიმართ საერთაშორისო დანაშაულებს ჩადის, სისხლის სამართლის სფეროში თანამშრომლობა და რეპრესიული, კონსოლიდირებული ავტორიტარული რეჟიმის წინაშე ადამიანების ექსტრადირება“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია მოუწოდებს საქართველოს პარლამენტს ირაკლი კობახიძის გამონათქვამები პარლამენტის წევრის ეთიკის კოდექსის ფარგლებშიც შეისწავლოს. გავრცელებული ინფორმაციით, 2022 წლის 25 ივლისს „მთავარი არხის“ ჟურნალისტი,  ნატალი ჯახუტაშვილი  „ქართული ოცნების“ თავმჯდომარის ირაკლი კობახიძის აგრესიული სიტყვიერი თავდასხმის სამიზნედ იქცა. პროფესიული საქმიანობის შესრულებისას ირაკლი კობახიძე ჟურნალისტს შეურაცხმყოფელი ფრაზებით მიმართავდა და სექსისტური ენით ესაუბრებოდა. კოალიცია გმობს ირაკლი კობახიძის მიერ ჟურნალისტზე თავდასხმას და მოუწოდებს მმართველ პარტიას, „ქართულ ოცნებას”, მიიღოს ზომები ევროპასთან ინტეგრაციის პროცესში არსებული ვალდებულებების შესასრულებლად, რაც მოიცავს ხელისუფლების პასუხისმგებლობას გააუმჯობესოს მედიაგარემო ქვეყანაში. სრულად... წყარო: კოალიციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) თბილისის ოფისის დახმარებით, 3 პირს ადმინისტრაციული სამართალდარღვევის საქმეებზე ადმინისტრაციული პასუხისმგებლობა არ დაეკისრათ. სრულად... წყარო: www.gyla.ge

თბილისი. ქალთა ინიციატივების მხარდამჭერი ჯგუფი (WISG) ადვოკატირებს 2013 წლის 17 მაისის საქმეზე „ქალთა ინიციატივების მხარდამჭერი ჯგუფი და სხვები საქართველოს წინააღმდეგ“, ადამიანის უფლებათა ევროპული სასამართლოს (შემდგომში ევროპული სასამართლო) 2021 წლის 16 დეკემბრის გადაწყვეტილების აღსრულებას ეროვნულ დონეზე და, მზად არის, უფასო იურიდიული კონსულტაცია გაუწიოს იმ დაზარალებულ მანიფესტანტებს, ვინც ევროპულ სასამართლოში წარმართული პროცესის მიღმა დარჩა. სრულად... წყარო: wisg.org

თბილისი. ადამიანის უფლებათა ცენტრის (HRC) ინფორმაციით, თბილისის სააპელაციო სასამართლოში მთავარი არხის დამფუძნებლის, ნიკა გვარამიას საქმის სასამართლო პროცესი 2022 წლის 4 ოქტომბრამდე, 2-თვენახევრით გადაიდო. ორგანიზაციის ცნობით, ამ გადაწყვეტილების ერთ-ერთ მიზეზად, მოსამართლეთა კოლეგიამ აგვისტოს თვეში მათი შვებულებები დაასახელა. „საქართველოს სისხლის სამართლის საპროცესო კანონმდებლობის თანახმად, სააპელაციო სასამართლოს 2022 წლის 14 სექტემბრამდე უნდა დაესრულებინა საქმის განხილვა და გამოეტანა განაჩენი. საქართველოს სსსკ-ის 295-ე მუხლის მე-2 ნაწილის თანახმად, სააპელაციო სასამართლო საჩივრისა და საქმის მიღებიდან 10 დღის ვადაში, ზეპირი მოსმენის გარეშე წყვეტს სააპელაციო საჩივრის დასაშვებობის საკითხს. ამავე მუხლის მე-5 ნაწილის შესაბამისად, სააპელაციო სხდომა იმართება საჩივრის დასაშვებად ცნობიდან 1 თვის ვადაში. საქართველოს სსსკ-ის 295-ე მუხლის მე-6 ნაწილის თანახმად, სააპელაციო სასამართლოს განაჩენი გამოაქვს სააპელაციო საჩივრის დასაშვებად ცნობიდან 2 თვის ვადაში. შესაბამისად, სააპელაციო სასამართლოს მხრიდან ამ საქმის ორთვენახევრით გადადება (ნაცვლად 2 თვისა) საქართველოს სსსკ-ის 295-ე მუხლის მე-6 ნაწილით დადგენილი საპროცესო ვადის დარღვევაზე მიუთითებს. საპროცესო ვადის დარღვევის ფაქტი, მნიშვნელოვანია შეფასდეს იმ კუთხითაც, თუ რამდენადაა საქმე გაჭიანურებული უსაფუძვლოდ და ამასთან, იკვეთება თუ არა მოსამართლეთა პერსონალური ბრალეულობა. ამ საკითხის შეფასება მნიშვნელოვანია, რადგან გარდა საპროცესო ვადის დარღვევისა, ასევე ირღვევვა სისხლის სამართლის საპროცესო კანონმდებლობის ერთ–ერთი მთავარი პრინციპი: „სამართლიანი პროცესი და სწრაფი მართლმსაჯულება“ (სსსკ-ის მე-8 მუხლი)“... სრულად... წყარო: www.hrc.ge

თბილისი. ადამიანის უფლებათა ცენტრის ინფორმაციით (HRC) 2022 წლის 21 ივლისს გორის რაიონულმა სასამართლომ ნაწილობრივ დააკმაყოფილა თ.ბ.-ს სარჩელი სს „იავნანას“ მიმართ, ბათილად იქნა ცნობილი სს „იავნანას“ დირექტორის ბრძანება თ.ბ.-ს სამსახურიდან გათავისუფლების შესახებ და სამსახურში აღდგენის ნაცვლად დამსაქმებელს დაეკისრა კომპენსაციისა და განაცდურის გადახდა თ.ბ.-თვის. დისკრიმინაციის ფაქტის დადგენის ნაწილში სარჩელი არ დაკმაყოფილდა. სრულად... წყარო: ორგანიზაციის გვერდი სოციალურ ქსელში

თბილისი. ღირსეული შრომის პლატფორმამ, საქართველოში მოპარული ხელფასის ანგარიში გამოაქვეყნა, რომელიც ქვეყანაში მოპარული ხელფასის უკანონო პრაქტიკას და მასთან ბრძოლის სახელმწიფო სტრატეგიას აფასებს. ანგარიშის თანახმად, დასაქმებულთა 88%-ს მოპარული ხელფასის გამო კუთვნილი შრომის ანაზღაურება სახლში სრულად ვერ მიაქვთ, მშრომელთა მოპარული ხელფასის საერთო ოდენობა კი დაახლოებით 25 მილიონს ლარს უტოლდება. სრულად... წყარო: osgf.ge

თბილისი. საქართველოს დემოკრატიული ინიციატივას (GDI) ინფორმაციით, თბილისის საქალაქო სასამართლომ, მოსამართლე სოსო ღურწკაიამ პრეცედენტული გადაწყვეტილება მიიღო და ცილისწამების საქმეზე „საქართველოს რეფორმების ასოციაციის“ წინააღმდეგ შეტანილი სარჩელი აშკარად უსაფუძვლოდ მიიჩნია. სრულად... წყარო: gdi.ge

თბილისი. სოციალური სამართლიანობის ცენტრის ინფორმაციით, 21 ივლისს ევროპარლამენტარების დელეგაცია საოკუპაციო ხაზთან, სოფელ ოძისში ჩავიდა, თუმცა მთავრობის წარმომადგენლები მათთან ერთად არ იმყოფებოდნენ. ერთი თვით ადრე კი, 24 ივნისს, ირაკლი კობახიძემ პირდაპირ განაცხადა, რომ საოკუპაციო ხაზთან არასოდეს ყოფილა. ორგანიზაციის აზრით, მთავრობის ლიდერები საოკუპაციო ხაზთან მისვლის აუცილებლობას ვერ ხედავენ, მაშინ, როცა: „...კონფლიქტის შედეგად გამყოფ ხაზებთან მცხოვრებმა მოსახლეობამ კონფლიქტის ორივე რეგიონში დაკარგა საძოვრების 66%, ხე-ტყის რესურსის 57%, სახნავ-სათესი მიწების 50%, რაც მძიმედ აისახება ადგილობრივი მოსახლეობის სოციო-ეკონომიკურ მდგომარეობაზე. მოსახლეობის 76% არ მიუღია ომის შედეგად მიყენებული ზიანის ანაზღაურება. ამავე კვლევის თანახმად, გამყოფ ხაზებთან არსებული სოფლების 90%-ში არ არის აფთიაქი, 85%-ში არ არის საირიგაციო წყალი, 76%-ში არ არსებობს სასმელი წყლის მომარაგების სისტემა, 70%-ში არ არის საბავშვო ბაღი. ამ მწვავე ვითარების ფონზე, ხელისუფლება ვერ ხედავს გამყოფ ხაზებთან ვიზიტის საჭიროებასაც კი, რასაც არ მალავს მმართველი პარტიის ლიდერიც“. სრულად... წყარო: ორგანიზაციის გვერდი სოციალურ ქსელში

თბილისი. 13 ივლისს, ადამიანის უფლებების დარგში საქართველოში საფრანგეთის საელჩოს პრემიის გადაცემის ცერემონია რესტორან მეტისში, საფრანგეთის ეროვნული დღესასწაულის აღნიშვნის ფარგლებში გაიმართა. „წელს, საქართველოში საფრანგეთის საელჩომ ადამიანის უფლებების რიგით მე-6 პრემია მიუძღვნა პროექტებს, რომლებიც აძლიერებენ ქალების ავტონომიას კრიზისულ სიტუაციებში, იქნება ეს კლიმატურ, გარემოსდაცვით, ეკონომიკურ, სოციალურ საკითხებთან თუ კონფლიქტებთან დაკავშირებული. კრიზისები განსაკუთრებით ეხება ქალებსა და გოგონებს, რომლებიც სექსისტური და სექსუალური ძალადობის ზრდისა და ჯანმრთელობის დაცვის სერვისების ხელმისაწვდომობის სიმცირის მსხვერპლი ხდებიან. დაბრკოლებების წინაშე, რომლებიც მათი ადაპტაციის უნარს ზღუდავს, გადამწყვეტი მნიშვნელობა აქვს ქალთა ავტონომიისა და მათი პასუხისმგებლობის გაძლიერებას, რათა  მხარი დავუჭიროთ მათ პოლიტიკურ, ეკონომიკურ და გარემოსდაცვით გამოწვევებზე ადაპტირებული საარსებო სტრატეგიების შემუშავებაში. სწორედ ამ თემის გარშემო, საფრანგეთის საელჩომ 2022 წლის ადამიანის უფლებების პრემიითა და 2000 ევროს ოდენობის თანხით დააჯილდოვა არასამთავრობო ორგანიზაცია « მერკური » www.merkuri.org.ge. ზუგდიდში მდებარე ეს ორგანიზაცია გამარჯვებულად გამოცხადდა ოჯახური ძალადობის მსხვერპლთა თავშესაფრის პროექტის გამო“. სრულად... წყარო: ge.ambafrance.org

თბილისი. ორგანიზაცია „საფარის“ ინფორმაციით, 20 ივლისს, გაიმართა სამუშაო შეხვედრა საქართველოში ალიმენტის გადაუხდელობის პრობლემის დარეგულირების შესახებ. შეხვედრაზე „საფარის“ მკვლევარებმა, გიორგი ურჩუხიშვილმა და ეკა ლომთათიძემ წარადგინეს კვლევები: „ალიმენტის გადაუხდელობა – კულტურული და საკანონმდებლო გამოწვევები საქართველოში” და  „ალიმენტის განსაზღვრა და აღსრულება - საუკეთესო პრაქტიკის კვლევა”. სრულად... წყარო: sapari.ge