თბილისი. საერთაშორისო გამჭვირვალობა - საქართველოს განცხადების საფუძველზე, საქართველოს ჟურნალისტური ეთიკის ქარტიის საბჭომ გადაწყვეტილება მიიღო, რომ ტელეკომპანია „რუსთავი 2”-ის ჟურნალისტმა ნათია ლაზაშვილმა, ქარტიის პირველი პრინციპი (ინფორმაციის სიზუსტე) დაარღვია. „განცხადების საფუძველი გახლდათ „რუსთავი 2”-ის ეთერით 2020 წლის 14 დეკემბერს 9 საათიან კურიერში გასული სიუჟეტი, რომელშიც წამყვანმა აღნიშნა, რომ „საერთაშორისო გამჭვირვალობა - საქართველომ” საპარლამენტო არჩევნების შედეგებთან დაკავშირებით პოზიცია შეცვალა, რაც საბჭოს შეფასებით, არასწორ ინფორმაციას წარმოადგენდა. ჩვენი ორგანიზაცია აქტიურად იცავს მედიის და ჟურნალისტების უფლებებს და მათ გამოხატვის თავისუფლებას, რომელიც დღეს სერიოზული გამოწვევების წინაშე დგას. თუმცა მნიშვნელოვანია ასევე, რომ მედიის წარმომადგენლებმა დაიცვან საყოველთაოდ აღიარებული პროფესიული და ეთიკური სტანდარტები ქვეყანაში მიმდინარე პროცესების გაშუქებისას“, ნათქვამია ორგანიზაციის განცხადებაში.  სრულად... წყარო: transparency.ge

თბილისი. საქართველოს სახალხო დამცველი ეხმიანება გაეროს ბავშვის უფლებათა კომიტეტის დროებით ღონისძიებას ნინოწმინდის ბავშვთა პანსიონთან მიმართებით, რომელიც ა/ო „პარტნიორობა ადამიანის უფლებებისთვის“ მიმართვის საფუძველზე გამოიცა. „კომიტეტის მოწოდებით, სახელმწიფო ვალდებულია, დაუყოვნებლივ უზრუნველყოს შესაბამისი უფლებამოსილების მქონე მონიტორინგის განმახორციელებელი ორგანოების მიერ ნინოწმინდის პანსიონში ბავშვის უფლებრივი მდგომარეობის შემოწმება. საქართველოს კონსტიტუციის და მოქმედი კანონმდებლობის მიხედვით, სახალხო დამცველი მონიტორინგის განმახორციელებელი ორგანოა და კომიტეტის გადაწყვეტილების შესაბამისად, დაუყოვნებლივ უნდა მიეცეს ყოველმხრივი შემოწმების შესაძლებლობა ნინოწმინდის ბავშვთა პანსიონში. ომბუდსმენი მადლობას უხდის ორგანიზაციას გაწეული სამუშაოსთვის და მოუწოდებს საქართველოს მთავრობას და საქართველოს შრომის, ჯანმრთელობისა და სოციალური დაცვის სამინისტროს მყისიერი რეაგირება მოახდინონ კომიტეტის მიერ მიღებულ გადაწყვეტილებაზე“. სრულად... წყარო: სახალხო დამცველის გვერდი სოციალურ ქსელში

თბილისი. სახელმწიფო ვალდებულია, დაუყოვნებლივ უზრუნველყოს ნინოწმინდის პანსიონატში ბავშვის უფლებრივი მდგომარეობის შემოწმება - გაეროს ბავშვის უფლებათა კომიტეტი. „დღეს, 7 მაისს, საღამოს 8 საათისთვის, არასამთავრობო ორგანიზაციამ „პარტნიორობა ადამიანის უფლებებისთვის“ გაეროს ბავშვთა კომიტეტიდან შეტყობინება მიიღო. კომიტეტმა დროებითი ღონისძიება გამოსცა, რომლითაც დააკმაყოფილა ორგანიზაციის 5 მაისის საჩივარი და მთავრობას ნინოწმინდის ბავშვთა პანსიონატში, ყველა შესაბამისი უწყების მიერ, მონიტორინგის ჩატარების უზრუნველყოფა დაავალა“. სრულად... წყარო: phr.ge

თბილისი. სახალხო დამცველმა გამოაქვეყნა სპეციალური ანგარიში „თვითმმართველი ორგანოების სოციალური და ჯანმრთელობის დაცვის პროგრამების შესაბამისობა თანასწორობის პრინციპთან“, რომელშიც მუნიციპალური პროგრამების ანტიდისკრიმინაციულ კანონმდებლობასთან შესაბამისობაა გაანალიზებული. „კვლევამ ცხადყო, რომ ადგილობრივი თვითმმართველობის პროგრამების ნაწილი მოსარგებლეთა წრის განსაზღვრისას სქესის, შეზღუდული შესაძლებლობის, ასაკის, ქორწინების სტატუსის და სხვა ნიშნით დისკრიმინაციულ კრიტერიუმებს იყენებს, რის შედეგადაც, რიგი ჯგუფები პროგრამით სარგებლობის მიღმა რჩებიან. ასევე, გვხვდება სხვადასხვა ჯგუფების მიმართ დისკრიმინაციის წამახალისებელი ტერმინები და რეგულაციები, რომელიც არსებულ სტიგმებს აძლიერებს. არის შემთხვევები, როდესაც თანაბარი საჭიროებების მქონე პირთაგან პროგრამაში მოსახვედრად შერჩევა ყოველგვარი დასაბუთების გარეშე ხდება“. სრულად... წყარო: ombudsman.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ანგარიშს: „პროპაგანდისტული ნარატივები Facebook-ზე 2020 წლის საპარლამენტო არჩევნების პერიოდში“... „ანგარიში მიმოიხილავს ღირებულებით საკითხებზე პროპაგანდისტული ნარატივების გამავრცელებელი ფეისბუქ გვერდების შესწავლის საფუძველზე გამოვლენილ აქტივობას და მოიცავს, როგორც რაოდენობრივ, ისე თვისებრივ მიგნებებს. ანგარიში ასევე მიმოიხილავს გვერდების კოორდინაციას საარჩევნო სუბიექტებთან, პროპაგანდისტული ნარატივის გამავრცელებელი გვერდების გზავნილების ანალიზს პოლიტიკურ დისკურსთან და საარჩევნო პროცესებთან თანხვედრაში“. სრულად... წყარო: isfed.ge

თბილისი. გაეცანით სამართლიანი არჩევნებისა და დემოკრატიის საერთაშორისო საზოგადოების (ISFED) მიერ მომზადებულ 2020 წლის საპარლამენტო არჩევნების სოციალური მედიის მონიტორინგის საბოლოო ანგარიშს... „ანგარიში მოიცავს საქართველოში სოციალური მედიის სივრცეში 2020 წლის 1 სექტემბრიდან 21 ნოემბრის ჩათვლით პერიოდში მიმდინარე ძირითადი ტენდენციების ანალიზს. კერძოდ, აღწერილია არჩევნებში რეგისტრირებული პოლიტიკური პარტიებისა და კანდიდატების ოფიციალური გვერდების, ადგილობრივი თვითმმართველობის ორგანოების ოფიციალური გვერდების აქტივობა, ასევე პოლიტიკური მიზნით მოქმედ არაოფიციალურ, ანონიმურ გვერდებზე დაკვირვების შედეგები და სხვა მნიშვნელოვანი ტენდენციები, რომლებიც მიზნად ისახავენ, ამა თუ იმ ფორმით გავლენა მოახდინონ ამომრჩევლის ნებაზე“. სრულად... წყარო: www.isfed.ge

თბილისი. 28 აპრილს, საქართველოს ახალგაზრდა იურისტთა ასოციაციამ (საია) გამართა კვლევის - „პრემიერი - სუვერენი“ - ონლაინ პრეზენტაცია. „კვლევა შეეხება საქართველოში კოვიდ-19-თან დაკავშირებით საგანგებო მდგომარეობის გამოცხადებას და მის თანამდევ შედეგებს. კვლევამ გამოავლინა, რომ ამ პროცესს ხარვეზების გარეშე არ ჩაუვლია. ნაშრომი შედგება ორი ნაწილისგან და განიხილავს საქართველოში კოვიდ-19-ის პანდემიის საპასუხოდ გამოცხადებულ საგანგებო მდგომარეობასთან დაკავშირებულ მნიშვნელოვან საკითხებს. პირველი ეხება პრეზიდენტის ბრძანებისა და დეკრეტის მიღების პროცედურებს, პარლამენტის პასიურ როლსა და კონსტიტუციის მოთხოვნების საწინააღმდეგოდ მთავრობისთვის უფლებამოსილებების გაზრდას. მეორე - ძირითად აქცენტს აკეთებს საერთაშორისო აქტებიდან დეროგაციის, შეზღუდული უფლებების, დაწესებული სანქციებისა და საკანონმდებლო ცვლილებების ანალიზზე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: საქართველოს პორტების გარშემო მიმდინარე მოვლენები: რა არის სიახლე. „2020 წლის მარტში ფოთის პორტის ოპერატორმა კომპანიამ პორტის გაფართოების პირველი საფეხურის, მიწათსარგებლობის ნებართვა მიიღო და ახალი ნავმისადგომის შენება დაიწყო, ხოლო ანაკლიის პორტის ასაშენებლად ახალი ინვესტორების მოძიება მთავრობას ჯერ არ დაუწყია. „საერთაშორისო გამჭვირვალობა - საქართველო“ თვალს ადევნებდა ბოლო წლებში ანაკლიის პორტის გარშემო მიმდინარე მოვლენებს და ამ თემაზე რამდენიმე პუბლიკაცია გამოაქვეყნა. 2019 წლის ივნისში ვწერდით, რომ შესაძლოა, ანაკლიის პორტის მშენებლობის შეჩერების ერთ-ერთი მიზეზი ფოთის პორტის მოსალოდნელი გაფართოება იყო, სადაც საქართველოს ხელისუფლებასთან დაკავშირებული პირები საქმიანობენ“, ნათქვამია ბლოგპოსტში. სრულად... წყარო: transparency.ge

თბილისი. 21 აპრილს, სახალხო დამცველმა სპეციალური ანგარიში წარადგინა „2019-2020 წლებში ე.წ. გამშვები პუნქტების ჩაკეტვის გავლენა, ოკუპირებულ ტერიტორიებზე მცხოვრები მოსახლეობის უფლებრივ მდგომარეობაზე“. „ომბუდსმენის შეფასებით, საოკუპაციო ხაზზე გადაადგილებისთვის, დე ფაქტო ხელისუფლების მიერ დადგენილი ფორმალური რეჟიმი და სხვადასხვა ბარიერის დაწესება, როგორიცაა ე.წ. გამშვები პუნქტების არაპროგნოზირებადი ჩაკეტვა, უკანონო დაკავებები, გადაადგილებისათვის აუცილებელ დე ფაქტო დოკუმენტაციასთან დაკავშირებული პრობლემები და სხვა, ზღუდავს ოკუპირებული რეგიონების მკვიდრთა გადაადგილების თავისუფლებას და გაუმართლებელ დაბრკოლებებს უქმნის მათ საარსებო წყაროებზე წვდომაზე. მნიშვნელოვანია, საქართველოს ხელისუფლებამ, საერთაშორისო თანამეგობრობის მხარდაჭერით, ყველა შესაძლო მექანიზმი გამოიყენოს ოკუპირებულ ტერიტორიებზე მცხოვრები ადამიანების უფლებების დასაცავად. მათ შორის, საოკუპაციო რეჟიმთან მოლაპარაკებების დარწმუნების გზით, კონფლიქტურ რეგიონებში საერთაშორისო წარმომადგენლობების დაშვების უზრუნველსაყოფად“. სრულად... წყარო: www.ombudsman.ge

თბილისი. 20 აპრილს, ინფორმაციის თავისუფლების განვითარების ინსტიტუტის ღია მმართველობის მიმართულების ხელმძღვანელმა, დავით მაისურაძემ, კორუფციასთან ბრძოლის სასერტიფიკატო პროგრამის ფარგლებში ჩაატარა ლექცია ყირგიზეთის კორუფციასთან ბრძოლის სასერტიფიკატო პროგრამის მონაწილეებისათვის. ლექციის ფარგლებში დავით მაისურაძემ შეხვედრის მონაწილეებს გაუზიარა საქართველოს გამოცდილება კორუფციასთან ბრძოლის შესახებ... მომხსენებელმა ყურადღება გაამახვილა ღია მმართველობის პარტნიორობის (OGP) სამოქმედო გეგმების ფარგლებში შემუშავებულ ანტიკორუფციულ ინიციატივებზე, რომელიც ეხება საჯარო სამსახურის რეფორმირებას, საბიუჯეტო პროცესების გამჭვირვალობას და საჯარო ინფორმაციაზე ხელმისაწვდომობას. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) გთავაზობთ აშშ-ის სახელმწიფო დეპარტამენტის 2020 წლის ანგარიშში წარმოდგენილი ძირითადი მიგნებების მოკლე შეჯამებას და საანგარიშო პერიოდის განმავლობაში სამოქალაქო ორგანიზაციების, სახალხო დამცველის აპარატის, მედიისა და საერთაშორისო საზოგადოების მიერ აღნიშნული მნიშვნელოვანი საკითხების მიმოხილვას.  „ადამიანის უფლებების დაცვასთან დაკავშირებით გამოიკვეთა შემდეგი ძირითადი პრობლემები: სასამართლოს დამოუკიდებლობის მხრივ არსებული მნიშვნელოვანი გამოწვევები; პოლიტიკურად მოტივირებული გამოძიებები და სამართლებრივი დევნა; პირადი ცხოვრების უფლების უკანონო ხელყოფის შემთხვევები; მშვიდობიანი შეკრებისა და გამოხატვის უფლებაში ჩარევა; და ძალადობრივი ან მუქარით ჩადენილი დანაშაულები ლგბტი პირების მიმართ“. სრულად... წყარო: gyla.ge

თბილისი. საერთაშორისო გამჭვირვალობა-საქართველომ სამცხე-ჯავახეთის მუნიციპალიტეტების (ახალციხე, ნინოწმინდა, ახალქალაქი, ასპინძა, ადიგენი და ბორჯომი) თანამდებობის პირთა 2020-2021 წლის დეკლარაციები შეისწავლა.  „კვლევის დროს შევისწავლეთ მერიებისა და საკრებულოების 144 თანამდებობის პირის დეკლარაცია. 49 დეკლარაციაში აღმოჩნდა დარღვევა და ფაქტობრივი უზუსტობა, ასევე გამოვლინდა თანამდებობრივი შეუთავსებლობის/შეუთავსებელი საქმიანობის 27 შემთხვევა. აღსანიშნავია, რომ ცალკეულ თანამდებობის პირებთან დაკავშირებული კომპანიები ჩართული არიან სახელმწიფო შესყიდვებშიც“, - აღნიშნულია ორგანიზაციის მიერ გავრცელებულ ინფორმაციაში.  სრულად...   წყარო: ორგანიზაციის ვებგვერდი

2021 წლის 12 აპრილს ევროსაბჭოს კორუფციის წინაღმდეგ სახელმწიფოთა ჯგუფმა (GRECO), შეფასების მეოთხე რაუნდის ფარგლებში, გამოაქვეყნა საქართველოს შესაბამისობის მეორე ანგარიში, სადაც აფასებს ქვეყნის მიერ 2016 წელს მიღებული რეკომენდაციების შესრულების მდგომარეობას.  IDFI-ის ინფორმაციით, GRECO-ს რეკომენდაციების შესრულების დაბალი პროგრესი ცალსახად მიუთითებს ქვეყანაში კორუფციის წინააღმდეგ ბრძოლის პასიურ ფაზაში გადასვლაზე. კორუფციის პრევენციის მიმართულებით შესასრულებელი 11 რეკომენდაციიდან ქვეყანამ 18 თვის განმავლობაში მხოლოდ ორი რეკომენდაციის სრულად შესრულება მოახერხა, დანარჩენი ცხრა რეკომენდაცია კი კვლავ შესასრულებელია. კორუფციის წინააღმდეგ ღონისძიებების გატარების საჭიროებაზე მეტყველებს ის ფაქტიც, რომ 2020 წელს საერთაშორისო რეიტინგების უმეტესობა ქვეყანაში კორუფციის მდგომარეობის გაუარესებაზე მიუთითებს, რის ერთ-ერთ მიზეზად მაღალი დონის კორუფცია სახელდება. 2021 წლის პირველი კვარტალის დასასრულს საქართველოს მთავრობას ჯერ კიდევ არ მიუღია ახალი ანტიკორუფციული სამოქმედო გეგმა 2021-2022 წლებისთვის.  სრულად...   წყარო: idfi.ge

2021 წლის 30 მარტს ამერიკის შეერთებული შტატების სახელმწიფო დეპარტამენტმა გამოაქვეყნა ადამიანის უფლებათა და თავისუფლებათა მდგომარეობის 2020 წლის ანგარიში. ანგარიში მომზადდა აშშ-ს საელჩოებისა და საერთაშორისო მისიების მიერ მიწოდებულ მონაცემებზე დაყრდნობით და მიმოიხილავს ადამიანის უფლებების მდგომარეობას სხვდასხვა ქვეყანაში მსოფლიოს მასშტაბით, მათ შორის საქართველოში. ანგარიშში მოცემულია მრავალი საკითხი, რომლებიც IDFI-ის საქმიანობის მნიშვნელოვან მიმართულებებს წარმოადგენენ. კერძოდ ანგარიშის შესავალში ხაზგასმულია რომ 2020 წლის განმავლობაში ადამიანის უფლებებთან დაკავშირებით საქართველოში მწვავედ იდგა ისეთი საკითხები, რომლებიც დაკავშირებულია სასამართლო ხელისუფლების დამოუკიდებლობასთან, პროკურატურისა და სამართლებრივი დევნის პოლიტიკურ მიკერძოებულობასა და შეკრებისა და მანიფესტაციის უფლების დაცვასთან. ანგარიშში სხვა საკითხებთან ერთად საუბარია სიტყვისა და გამოხატვის მიმართულებით არსებულ პრობლემებსა და კორუფციის წინააღმდეგ ქმედითი ნაბიჯების გადადგმის აუცილებლობაზე. სრულად...  წყარო: idfi.ge

თბილისი. თბილისის საქალაქო სასამართლომ 2021 წლის 25 თებერვლის გადაწყვეტილებით ა(ა)იპ ინფორმაციის თავისუფლების განვითარების ინსტიტუტის სარჩელი დააკმაყოფილა, სრულად გაიზიარა მოსარჩელის არგუმენტაცია, კომუნიკაციების ეროვნული კომისიის მიერ დაფუძნებული ა(ა)იპ „მედიააკადემია“ ფუნქციონალური გაგებით ადმინისტრაციულ ორგანოდ ცნო და მას საჯარო ინფორმაციის გაცემა დაავალა. 2020 წლის 7 აპრილს IDFI-იმ თბილისის საქალაქო სასამართლოში სარჩელი შეიტანა, რომლითაც მოითხოვა ა(ა)იპ „მედიააკადემის“ ადმინისტრაციულ ორგანოდ ცნობა და მისთვის მოთხოვნილი ინფორმაციის გაცემის დავალება. სრულად...  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველომ” შეისწავლა სახელმწიფო რწმუნებულის ცხრა ადმინისტრაციის მიერ 2020 წელს გაწეული ხარჯები, რამაც ჯამურად 5,182,978 ლარი შეადგინა.  კვლევაში თავმოყრილია მონაცემები გაცემული შრომის ანაზღაურების, ჯილდოს/პრემიის და სახელფასო დანამატის, ასევე ადმინისტრაციების მიერ სატელეფონო კომუნიკაციაზე, მივლინებებზე, საწვავზე, ავტომობილების შეკეთება/დიაგნოსტიკაზე გაწეული და წარმომადგენლობითი ხარჯების შესახებ.  სრულად...  წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტმა მოამზადა კვლევა - „მუნიციპალურ ა(ა)იპ-ებსა და შპს-ებში დასაქმებული თანამშრომლები და შრომის ანაზღაურების ხარჯები“.  დოკუმენტში ვკითხულობთ: „მუნიციპალურ იურიდიულ პირებში დასაქმებულ თანამშრომელთა შრომის ანაზღაურების ოდენობებს შორის არსებული დისბალანსი განსაკუთრებით თვალშისაცემია თბილისის მუნიციპალიტეტსა და რეგიონებს შორის. ყველაზე მაღალანაზღაურებადი პოზიციები თბილისშია თავმოყრილი. ამასთან, მსგავს პოზიციებზე არსებულ ანაზღაურებებს შორის განსხვავება, ხშირ შემთხვევაში, არაპროპორციულია, ზოგადად, დაქირავებით დასაქმებულთა საშუალო ხელფასებს შორის არსებულ განსხვავებებთან მიმართებით. შესაბამისად, მუნიციპალურ ა(ა)იპ-ებში არსებული სახელფასო პოლიტიკის პრაქტიკა ხელს უწყობს სოციალური უთანასწორობის გაღრმავებას რეგიონებსა და დედაქალაქს შორის“.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციამ საზოგადოებას წარუდგინა ანგარიში - „სისხლის სამართლის პროცესების ოთხწლიანი მონიტორინგის შედეგები“.  ანგარიში ემსახურება სისხლის სამართლის პროცესებზე დასწრებითა და გამოვლენილი შემთხვევების ანალიზის შედეგად, პრაქტიკული და საკანონმდებლო ხარვეზების, მათ შორის, დადებითი ტენდენციების იდენტიფიცირებას. ანგარიში ასახავს სისხლის სამართალწარმოების საკითხებს, 2016 წლის მარტიდან - 2020 წლის თებერვლის ჩათვლით პერიოდში, ასევე, ძირითად ტენდენციებს მონიტორინგის დაწყებიდან - დღემდე. ანგარიშის ძირითადი მიგნებები შეეხება - აღკვეთის ღონისძიებებს, საგამოძიებო მოქმედებებსა და საპროცესო შეთანხმებაზე სათანადო სასამართლო კონტროლის განხორციელებას, პროცესის სხვადასხვა ეტაპზე არსებულ ხარვეზებს. ანგარიშში განსაკუთრებული ყურადღება ეთმობა ოჯახურ, ნარკოტიკულ და სოციალური ფონით განპირობებულ დანაშაულებს.  სრულად...  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო” წარმოგიდგენთ ინფორმაციას 2017 წლიდან 2020 წლის დეკემბრის ჩათვლით ქუთაისის მუნიციპალიტეტის მიერ გაწეული ხარჯების შესახებ, რაც ჯამურად 22,551,848 ლარს შეადგენს.  კვლევაში თავმოყრილია ინფორმაცია გაცემული შრომის ანაზღაურების, ჯილდოს/პრემიის და სახელფასო დანამატის, ასევე ადმინისტრაციების მიერ სატელეფონო კომუნიკაციის, მივლინებების, საწვავის, ავტომობილების შეკეთება/დიაგნოსტიკისა და წარმომადგენლობითი ხარჯების შესახებ.  სრულად...   წყარო: ორგანიზაციის ვებგვერდი

თბილისი. 31 მარტსა და 1 აპრილს, ინფორმაციის თავისუფლების განვითარების ინსტიტუტმა (IDFI), კონსულტაციის და ტრენინგის ცენტრმა (CTC) და მმართველობითი სისტემების განვითარების ცენტრმა (MSDC) რეგიონული ორგანიზაციებისთვის ადგილობრივი თვითმმართველობის ინდექსის შესახებ ორდღიანი ონლაინ ტრენინგი ჩაატარეს. „ადგილობრივი თვითმმართველობის ინდექსი ხსენებული ორგანიზაციების ერთობლივი ინიციატივაა, რომელიც მუნიციპალიტეტების ანგარიშვალდებულებასა და გამჭვირვალობას აფასებს. ტრენინგი მიზნად ისახავდა პარტნიორი რეგიონული ორგანიზაციების წარმომადგნელებისთვის ინდექსის შეფასების მეთოდოლოგიის გაცნობას. მომავალში მათ ამ მეთოდოლოგიით მუნიციპალიტეტების აღმასრულებელი და წარმომადგენლობითი ორგანოები უნდა შეაფასონ“. სრულად... წყარო: idfi.ge

თბილისი. „საერთაშორისო გამჭვირვალობა - საქართველო” წარმოგიდგენთ მე-9 მოწვევის პარლამენტის საქმიანობის შეფასებას და რეკომენდაციებს. „მე-9 მოწვევის პარლამენტმა საკონსტიტუციო რეფორმა განახორციელა და ქვეყანა სრულად გადავიდა საპარლამენტო მართვის მოდელზე. პარლამენტს საკანონმდებლო და მაკონტროლებელი ფუნქციის შესრულება მოუწია საგანგებო მდგომარეობის დროსაც და დაძაბული პოლიტიკური მოვლენების ფონზე, რამაც კიდევ უფრო მეტად წარმოაჩინა ის ხარვეზები, რაც არაერთი წელია ვლინდება პარლამენტის საქმიანობის პროცესში. საკანონმდებლო ნორმების გაუმჯობესება დადებითად აისახა საპარლამენტო კონტროლის განხორციელების პრაქტიკაზე. თუმცა, პროგრესის მიუხედავად, კვლავ პრობლემად რჩება, საპარლამენტო კონტროლის განხორციელების პროცესში ოპოზიციის როლი, როგორც დეპუტატების, ასევე მთავრობის წევრთა ანგარიშვალდებულებისა და პასუხისმგებლობის საკითხები“. სრულად... წყარო: transparency.ge

თბილისი. „საერთაშორისო გამჭვირვალობა - საქართველო“ აგრძელებს ინფორმაციის სისტემატიზებულ შეგროვებას მაღალი დონის შესაძლო კორუფციულ დარღვევებზე, რომელთა შესახებ ბოლო წლებში გახდა ცნობილი და რომლებზეც შესაბამისი რეაგირება არ მომხდარა. „ჩვენი მიზანია შევქმნათ პერიოდულად განახლებადი საინფორმაციო რესურსი, რომელიც მოგვცემს შესაძლებლობას, თვალყური ვადევნოთ ამ დარღვევებს და დავინახოთ მაღალი დონის კორუფციის რეალური მასშტაბი. ჩამონათვალში ხვდება სავარაუდო კორუფციის ისეთი შემთხვევები: რომელთა შესახებ გავრცელებული ინფორმაცია, საფუძვლიანი გამოძიების ჩატარების გარეშე, აღძრავს დასაბუთებად ეჭვს კორუფციული დარღვევის არსებობის შესახებ; სადაც ფიგურირებენ მაღალი თანამდებობის ანდა მმართველ პარტიასთან დაახლოებული პირები; რომლებზეც არ დამდგარა სათანადო შედეგი: არ დაწყებულა/არ დასრულებულა გამოძიება“. სრულად... წყარო: transparency.ge