თბილისი. „სამართლიანი არჩევნებისა და დემოკრატიის საერთაშორისო საზოგადოება" მიიჩნევს, რიმა ბერაძის ორგანიზებით, „ქართული ოცნება - ჯანმრთელი მომავალი"-ის მიერ, სკოლის პედაგოგებისათვის უფასო სამედიცინო გამოკვლევების ჩატარება, „ქართული ოცნება - დემოკრატიული საქართველოს" სასარგებლოდ გაწეული აგიტაციაა. „ორგანიზაცია „ქართული ოცნება - ჯანმრთელი მომავალი" საქველმოქმედო შინაარსის ღონისძიებებს პარტიის მსგავსი სიმბოლიკითა და სახელით, პარტიის წარმომადგენლების თანდასწრებით ახორციელებს, რაც საარჩევნო კოდექსის 45-ე მუხლის მე-4 პუნქტის „ზ" ქვეპუნქტის მოთხოვნათა დარღვევაა," ნათქვამია ორგანიზაციის განცხადებაში. სრულად... წყარო: www.isfed.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „სახელმწიფო უწყებების რეკლამები წინასაარჩევნო პერიოდში შესაძლოა მმართველი პარტიის რეკლამად აღიქმებოდეს". „ტელევიზიებით და სოციალური ქსელებში ხშირად გვხვდება ვიდეო რგოლები და სხვა სახის ვიზუალური მასალა, რომელშიც მოთხრობილია მთავრობის, ან სხვა საჯარო უწყებების მიღწევების თუ სამომავლოდ დაგეგმილი ღონისძიებების შესახებ. ასეთი ტიპის ინფორმაცია წინასაარჩევნო პერიოდში ამომრჩევლის მხრიდან შესაძლოა აღქმულ იქნეს, როგორც ხელისუფლებაში მყოფი პარტიის საარჩევნო რეკლამა, ეს კი, თავის მხრივ, ადმინისტრაციული რესურსების საარჩევნო მიზნით გამოყენების ნიშნებს ატარებს. დამატებით პრობლემაა თუ ასეთი ვიდეორგოლები სოციალური რეკლამის სტატუსით არის განთავსებული მაუწყებლებში," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. კავკასიის კვლევითი რესურსების ცენტრმა (CRRC) კვლევის - „ბიზნესის დამოკიდებულება საგადასახადო სისტემისადმი საქართველოში" პრეზენტაცია გამართა. „საგადასახადო სისტემის კვლევის მიზანი იყო ქვეყანაში არსებული საგადასახადო სისტემის მიმართ ქართული ბიზნესის დამოკიდებულების შესწავლა. იგი მოიცავს შემდეგ საკვლევ საკითხებს: (1) საქართველოს შემოსავლების სამსახურის მუშაობის შეფასება, (2) მათ მიერ მიწოდებული სერვისების გამოყენების დონე, (3) საგადასახადო ინსპექტირების პრაქტიკა, (4) შემოსავლების სამსახურისა და ბიზნესის თანამშრომლობის სხვა ძირითადი ასპექტების ანალიზი," ნათქვამია ორგანიზაციის ვებ-გვერდზე. კვლევის ანგარიშის ელ-ვერსია... წყარო: crrc.ge

თბილისი. „საერთაშორისო გამჭვირვალობა - საქართველომ" აამოქმედა ახალი ვებ-პორტალი, რომელზეც თავმოყრილია ინფორმაცია 2012 წლიდან პოლიტიკური პარტიების სასარგებლოდ განხორციელებული შემოწირულებების შესახებ. ამ პორტალის საშუალებით, გამომძიებელ ჟურნალისტებს, მკვლევარებს, აქტიურ მოქალაქეებსა და ქართული პარტიების დაფინანსებით დაინტერესებულ ნებისმიერ პირს, საშუალება ექნებათ მოიძიონ და გააანალიზონ პოლიტიკური პარტიების შემომწირველებთან დაკავშირებული ინფორმაცია,” ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „არასრული ინფორმაცია კახეთის მუნიციპალიტეტების ადმინისტრაციული ორგანოების ვებგვერდებზე". „ყველა მუნიციპალიტეტს აქვს მიღებული დადგენილება საჯარო ინფორმაციის პროაქტიული გამოქვეყნების წესის დამტკიცების შესახებ, მაგრამ დადგენილებით ნაკისრ ვალდებულებებს თითქმის არც ერთი მუნიციპალიტეტი არ ასრულებს, ამასთან, გამჭვირვალობისა და ინფორმაციულობის სტანდარტებს მათ მიერ შექმნილი ვებგვერდები ძირითადად ვერ აკმაყოფილებს," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 26 ივლისს, „სამართლიანი არჩევნებისა და დემოკრატიის საერთაშორისო საზოგადოებამ” 2016 წლის 8 ოქტომბრის წინასაარჩევნო პერიოდის მონიტორინგის პირველი შუალედური ანგარიში გამოაქვეყნა. „ორგანიზაციის დაკვირვებით, საანგარიშო პერიოდში გამოვლინდა პოლიტიკური ნიშნით ზეწოლა-მუქარის  - 2, სამსახურიდან სავარაუდოდ პოლიტიკური ნიშნით გათავისუფლების - 3, ძალადობის - 2, ამომრჩევლის სავარაუდო მოსყიდვის - 2, არაუფლებამოსილი პირის მიერ აგიტაციაში მონაწილეობის - 5 და ადმინისტრაციული რესურსის გამოყენების 2 ფაქტი. ანგარიშში, ასევე, საუბარია რიგ მუნიციპალიტეტებში განხორციელებული საბიუჯეტო ცვლილებებისა და სოციალური და ინფრასტრუქტურული პროექტების გააქტიურების ტენდენციაზე,” ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს გოგა თუშურაშვილის სტატიას: „საქართველოს პროკურატურის ხარჯები (2011-2015)". „2012 წლიდან პროკურატურის თანამშრომელთა რაოდენობის ზრდამ, თავის მხრივ, განაპირობა შრომის ანაზღაურებაზე გამოყოფილი თანხების მატებაც. თუმცა, პროკურატურის შრომის ანაზღაურებაზე გაწეული ხარჯების ზრდის ტემპი მნიშვნელოვნად აღემატება დასაქმებულთა რაოდენობის ზრდის ტემპს. მაგალითად, 2011 წლის 31 დეკემბრიდან 2015 წლის 31 დეკემბრამდე საშტატო თანამშრომელთა რაოდენობის ზრდამ შეადგინა 27,8%, ხოლო 2015 წელს 2012 წელთან შედარებით მათ შრომის ანაზღაურებაზე გაწეული ხარჯები გაზრდილია 69,1%-ით," ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. როგორ ასრულებს საქართველო ასოცირების ხელშეკრულებას. რა ნაბიჯებს დგამს ხელისუფლება მდგომარეობის გასაუმჯობესებლად იმ სფეროებში, რასაც ემყარება სახელმწიფო. ამ მიმართულების პოლიტიკის დოკუმენტები გამოაქვეყნეს დღეს არასამთავრობო ორგანიზაციებმა. დოკუმენტები აანალიზებს მდგომარეობას ისეთ სფეროებში, როგორიცაა ბავშვთა უფლებების დაცვა, შრომითი უფლებები, კორუფციის აღმოფხვრა, წამებასთან ბრძოლა ციხეებში, სასამართლო რეფორმა, საარჩევნო სისტემის რეფორმირება, სოციალური მომსახურება, მედიის ხელმისაწვდომობა ეთნიკური უმცირესობების და მათი ჩართვა სამოქალაქო პროცესში. ანგარიშები ნიდერლანდების სამეფოს და ფონდ  „ღია საზოგადოება-საქართველოს" მხარდაჭერით მომზადდა. სრულად... წყარო: osgf.ge

თბილისი. საქართველოს ჟურნალისტური ეთიკის ქარტიამ 2016 წლის საპარლამენტო არჩევნების მედიაში გაშუქების მონიტორინგის შუალედური ანგარიში გამოაქვეყნა. აღნიშნული ანგარიში მოიცავს 11 ტელევიზიის მთავარი საინფორმაციო გამოშვებების მონიტორინგის შედეგებს, ანგარიშში მოცემულია 20 მაისი – 10 ივლისის პერიოდი. მონიტორინგი ხორციელდებოდა შემდეგ სატელევიზიო არხებზე: საზოგადოებრივი მაუწყებლის 1-ლი არხი, რუსთავი 2, იმედი, მაესტრო, GDS,  ტაბულა, კავკასია,  ტვ პირველი,  ობიექტივი, აჭარის ტელევიზია, ტელეარხი 25. სრულად... წყარო: qartia.org

თბილისი. საერთაშორისო გამჭვირვალობა საქართველო აქვეყნებს ბლოგპოსტს: „2014 წლის შემდეგ მუნიციპალიტეტების ა(ა)იპებში დასაქმებულთა რაოდენობა 8 ათასზე მეტი პირით, ყოველთვიური სახელფასო ხარჯები კი 4 მილიონზე მეტი ლარით გაიზარდა". „რეგიონებში ჩატარებულმა აჩვენა, რომ 2014 წლის თვითმმართველობის არჩევნების შემდეგ ქვეყნის ყველა რეგიონში მუნიციპალიტეტების მიერ დაფუძნებული არასამეწარმეო (არაკომერციული) იურიდიული პირების რაოდენობა გაიზარდა, მკვეთრად გაიზარდა იქ დასაქმებულ პირთა რაოდენობაც და მათი შრომის ანაზღაურებაზე გასაწევი ხარჯიც. თუ გავითვალისწინებთ საქართველოში არსებულ უმუშევრობის მაჩვენებელს, მუნიციპალიტეტების მნიშვნელოვან ნაწილში ადგილობრივი თვითმმართველობა დასაქმების ერთ-ერთ ძირითად საშუალებად რჩება, თუმცა არაგონივრულად გაზრდილი საშტატო ერთეულები ხშირ შემთხვევაში მძიმე ტვირთად აწევს მუნიციპალიტეტის ისედაც მწირ საბიუჯეტო რესურსებს," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 18 ივლისს, საქართველოს დემოკრატიულმა ინიციატივამ (GDI) გამართა კვლევის „სიძულვილის ენის გამოყენება თანამდებობის პირების/საჯარო მოხელეების მიერ და დისციპლინური პასუხისმგებლობის საკითხები" პრეზენტაცია. „კვლევა მოიცავს საქართველოს პოლიტიკურ სივრცეში 2014-2016 წლებში სიძულვილის ენის გამოყენების პრაქტიკის მიმოხილვას, საქართველოს საჯარო უწყებებში სიძულვილის ენის გამოყენების შემზღუდავი შიდასამართლებრივი აქტების ანალიზს, ასევე, სხვა სახელმწიფოებში მოქმედი სამართლებრივი აქტების და/ან დამკვიდრებული პრაქტიკის მაგალითზე, სიძულვილის ენის აღმოფხვრისკენ მიმართული თვითრეგულირების მექანიზმების შეთავაზებას საქართველოს პოლიტიკური სივრცის წარმომადგენლებისათვის," ნათქვამია ორგანიზაციის ვებ-გვერდზე. სრულად... წყარო: gdi.ge

თბილისი. 14 ივლისს, კლუბ „ფრონტლაინ ჯორჯიაში" გაიმართა „ადამიანის უფლებების სწავლებისა და მონიტორინგის ცენტრი" (EMC)-ის და „ტოლერანტობისა და მრავალფეროვნების ინსტიტუტი" (TDI)-ის ერთობლივი კვლევის პრეზენტაცია. კვლევა შეეხება 2014-2015 წლებში რელიგიური ორგანიზაციების დაფინანსების პრაქტიკების მიმოხილვასა და სამართლებრივ შეფასებას. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ გამოაქვეყნა კვლევა - „დისციპლინური პასუხისმგებლობა საჯარო სამსახურში - კანონმდებლობა, ადმინისტრაციული და სასამართლო პრაქტიკა".   კვლევაში წარმოდგენილია „საჯარო სამსახურის შესახებ" საქართველოს მოქმედი და ახალი კანონის შედარებით ანალიზი და ევროკავშირის წევრი სახელმწიფოებში არსებული სამართლებრივი რეგულირება დისციპლინური პასუხისმგებლობასთან დაკავშირებით; შესწავლილია საქართველოს პარლამენტისა და საქართველოს სამინისტროებიდან გამოთხოვილი სტატისტიკური ინფორმაცია 2015 წლის განმავლობაში ჩატარებული დისციპლინური წარმოებისა და სამსახურიდან გათავისუფლების თაობაზე; ასევე საქართველოს საერთო სასამართლოების მიერ 2015 წლის განმავლობაში მიღებული გადაწყვეტილებების ანალიზი დისციპლინური გადაცდომის საფუძვლით სამსახურიდან გათავისუფლების შესახებ. კვლევა... წყარო: gyla.ge

თბილისი. „საერთაშორისო გამჭვირვალობა - საქართველო" აგრძელებს ადგილობრივი თვითმმართველობის საქმიანობის მონიტორინგს. ორგანიზაციამ გამოაქვეყნა სამეგრელო-ზემო სვანეთის, გურიის რეგიონების და აჭარის ავტონომიური რესპუბლიკის მუნიციპალიტეტის საკრებულოს ფრაქციების საქმიანობის ანგარიში. „ამჯერად დავინტერესდით, თუ რამდენი ფრაქცია ფუნქციონირებს კახეთის მუნიციპალიტეტებში 2014 წლის ადგილობრივი თვითმმართველობის არჩევნების შემდეგ და რამდენად ეფექტურად მუშაობენ ისინი. კვლევაში მოყვანილი ინფორმაცია მოიცავს პერიოდს ფრაქციის დაარსებიდან 2016 წლის მაისის ჩათვლით," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. „საერთაშორისო გამჭვირვალობა - საქართველო" საპარლამენტო მონიტორინგის ფარგლებში უკვე მესამედ წარმოადგენს საკანონმდებლო ორგანოს მუშაობის წლიურ შეფასებას. „ანგარიში შეეხება საქართველოს პარლამენტის 2015 წლის საქმიანობას (საგაზაფხულო, საშემოდგომო და რიგგარეშე სესიები) და მოიცავს საქართველოს პარლამენტის მიერ 2015 წელს განხორციელებულ საკანონმდებლო საქმიანობის შეფასებას, საპარლამენტო კონტროლის განხორციელებას, პარლამენტის კომიტეტების და ცალკეულ პარლამენტის წევრთა საქმიანობის შეფასებას. 2015 წლის საგაზაფხულო, საშემოდგომო და რიგგარეშე სესიების პერიოდში პარლამენტმა მიიღო 490 კანონი, მათ შორის 326 საქართველოს მთავრობის ინიცირებული, 1601 დადგენილება, რატიფიცირებული იქნა 49 საერთაშორისო ხელშეკრულება, შეთანხმება და კონვენცია. 2015 წელს პრეზიდენტმა ერთხელ გამოიყენა ვეტოს უფლება და 31 ივლისს „ეროვნული ბანკის შესახებ" კანონში ცვლილებებს ვეტო დაადო," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ორგანიზაცია „ახალგაზრდა ადვოკატებმა" საქართველოს მერვე მოწვევის პარლამენტის კანონშემოქმედებითი საქმიანობის და ხარჯვითი ნაწილის შესახებ მონიტორინგის შედეგები წარმოადგინეს. „ორგანიზაციის მხრიდან შესწავლილი მასალის მიხედვით, საქართველოს პარლამენტმა 2012 წლის 1 ოქტომბრიდან 2016 წლის მაისის მდგომარეობით, სულ მიიღო 1427 კანონი. აქედან 2012 წელს – 33, 2013 წელს – 469, 2014 წელს – 327, 2015 წელს – 491, 2016 წლის მაისის თვის მდგომარეობით კი – 125. მიღებულ კანონთა იერარქიით, 2012–2016 წლების საკვლევ პერიოდში, პარლამენტმა სულ მიიღო 1336 „საქართველოს კანონი", 107 „ორგანული კანონი" და 2 „კონსტიტუციური კანონი"", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. 8 ივლისს, საქართველოს ახალგაზრდა იურისტთა ასოციაციამ, მედიისათვის კვლევის „ავტომობილით დედამიწის გარშემო" პრეზენტაცია გამართა. „პრეზენტაციაზე წარმოდგენილი იყო ინფორმაცია მცხეთა-მთიანეთის სამხარეო ადმინისტრაციის და აღნიშნულ რეგიონში არსებული თვითმმართველობების მიერ (გარდა ყაზბეგისა) 2015 წლის განმავლობაში სამსახურებრივი მიზნებისათვის მოხმარებული საწვავის რაოდენობის შესახებ," ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს რეგიონულ მაუწყებელთა ასოციაცია (GARB) აქვეყნებს თბილისში ეუთოს ეგიდით მიმდინარე მედია-კონფერენციის ვიდეო-მიმოხილვას. კონფერენცია ძირითადად ეხებოდა შემდეგ საკითხებს: „რა გამოწვევები არსებობს სამხრეთ კავკასიის ქვეყნების მედიაში და როგორია სოციალურ ქსელებში არსებული ტენდენციები". სრულად... წყარო: garb.ge

თბილისი. საიამ ამომრჩევლის სავარაუდო მოსყიდვისა და წინასაარჩევნო აგიტაციაში სავარაუდოდ კანონის დარღვევით მონაწილეობის ფაქტებთან დაკავშირებით სახელმწიფო აუდიტის სამსახურსა და ცენტრალურ საარჩევნო კომისიას მიმართა. „აღსანიშნავია, რომ პოლიტიკურ პარტიას ეკრძალება კანდიდატის, წარმომადგენლის ან სხვა პირის მეშვეობით, პირდაპირ ან არაპირდაპირ, საქართველოს მოქალაქისათვის ფასდაკლებით/შეღავათიანი პირობებით საქონლის ან მომსახურების მიყიდვა ან მიწოდება, საბაზრო ფასზე მეტ ფასად საქონლის ან მომსახურების შესყიდვა, უსასყიდლოდ საქონლის ან მომსახურების (გარდა კანონით გათვალისწინებული გამონაკლისებისა) მიწოდება ან გავრცელება, ან საქართველოს მოქალაქის დაინტერესება ფულადი სახსრების, ფასიანი ქაღალდების, მატერიალურ ან არამატერიალურ ფასეულობათა ან მომსახურების (მათ შორის, ფიქციური შრომითი ან სხვაგვარი ურთიერთობების დამყარების) მიწოდებით ან დაპირებით," ნათქვამია ორგანიზაცის განცხადებაში. საია მოუწოდებს აუდიტის სამსახურს და ცესკოს ეფექტურად გამოიძიონ განცხადებაში აღწერილი ფაქტობრივი მონაცემები. სრულად... წყარო: gyla.ge

თბილისი. „საერთაშორისო გამჭვირვალობა - საქართველო" ჩართულია გონიოს მიწებთან დაკავშირებულ პროცესში და მუდმივ რეჟიმში აკვირდება მოცემული თემის ირგვლივ განვითარებულ მოვლენებს. „მოვუწოდებთ ქ. ბათუმის მუნიციპალიტეტის ტერიტორიაზე თვითნებურად დაკავებულ მიწის ნაკვეთებზე საკუთრების უფლების აღიარების კომისიას ადმინისტრაციულ წარმოებაში ჩართულ 271 მოქალაქის საკითხი შეისწავლოს ინდივიდუალურად და წერილობით განუმარტოს თითოეულ მათგანს მიღებული გადაწყვეტილების საფუძვლები. გადაწყვეტილება მიიღოს სადაო ურთიერთობის სრულად და ყოველმხრივ გამოკვლევის შემდგომ, კანონის სრული დაცვით," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ნარკვევს: „საყოველთაო ჯანდაცვის პროგრამის გამოწვევები და მათი დაძლევის გზები", ლევან ავალიშვილის, გოგა თუშურაშვილის და სანდრო ქევხიშვილის თანაავტორობით. „საყოველთაო ჯანდაცვის პროგრამის ამოქმედებით საქართველოს მოსახლეობას გაუჩნდა მნიშვნელოვანი სოციალური გარანტიები. თუმცა, პროგრამის მასშტაბებმა გააჩინა რისკები, რომლებიც დაკავშირებულია: სახელმწიფო ბიუჯეტის ხარჯების ზრდასთან; პროგრამის ეფექტურ მართვასთან; კერძო სადაზღვევო ბიზნესის განვითარებასთან. IDFI-ის მერ მომზადებული პოლიტიკის ნარკვევის მიზანია საყოველთაო ჯანდაცვის პროგრამის გამოწვევების შესწავლა და არსებული მდგომარეობის გათვალისწინებით რეკომენდაციების შემუშავება, რაც ხელს შეუწყობს პროგრამის ეფექტურ და შეუფერხებელ ფუნქციონირებას," ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. ახალგაზრდა ფინანსისტთა და ბიზნესმენთა ასოციაციამ (აფბა) შეისწავლა „ჯორჯიან უოტერ ენდ ფაუერსა" და თბილისში მდებარე აბანოებს შორის სადავო საკითხი. „გოგირდის აბანოების პოზიცია, რომ ისინი არ გადაიხდიან არსებულ ტარიფს, სამწუხაროდ, ჩამოჰგავს წლების წინანდელ მდგომარეობას, როცა კომუნალური გადასახადების არგადახდის კულტურა (ელექტროენერგიის დატაცება, დასუფთავების, გაზის, წყლის გადასახადის არგადახდა) ფართოდ იყო დამკვიდრებული საზოგადოებაში და ითვლებოდა ჩვეულებრივ ამბად," ნათქვამია ორგანიზაციის ვებ-გვერდზე. სრულად... წყარო: afba.ge