თბილისი. ევროკავშირის ინფორმაციის თანახმად, დღეს პირველად აღინიშნება საერთაშორისო დღე: სუფთა ჰაერი ლურჯი ცისთვის. „ჰაერის დაბინძურება საფრთხეს უქმნის ცას, რაც, თავის მხრივ, რისკის ქვეშ აყენებს ადამიანის ჯანმრთელობას და იწვევს ინსულტს, გულის დაავადებებს, ფილტვის კიბოს, ქრონიკულ, რესპირატორულ და სხვა მრავალ დაავადებას. ასევე, გავლენას ახდენს მცენარეებზე, ცხოველებსა და გარემოზე. საქართველოში ჰაერის დაბინძურების ძირითადი წყარო ტრანსპორტია: დაახლოებით 75%. ჰაერს ასევე აბინძურებს სამრეწველო ემისიები, სასოფლო სამეურნეო პრაქტიკა, ნარჩენების მართვა და საყოფაცხოვრებო ენერგიის გამოყენება“. სრულად... წყარო: ევროკავშირის გვერდი სოციალურ ქსელში

ქვემო ქართლი. სამოქალაქო მოძრაობამ „გავიგუდეთ“ რუსთავში ქარხნების ტერიტორიაზე საინფორმაციო ტური გამართა. „ტურის მონაწილეებმა ნახეს, თუ რა ზიანს აყენებენ ეს ქარხნები გარემოს და რა გარემოსდაცვით ნორმებს არღვევენ წარმოების პროცესში. „გავიგუდეთ“ არის აქტივისტების ჯგუფი, რომელიც რუსთავში ჰაერის დაბინძურების შესამცირებლად იბრძვის. ბოლო რამდენიმე თვეა ისინი EWMI ACCESS-ის მხარდაჭერით აქტიურ საინფორმაციო და ადვოკატირების კამპანიას ახორციელებენ“. სრულად... წყარო: ორგანიზაციის გვერდი სოციალურ ქსელში

„სამყაროს ამბების“ შესახებ შეხვედრების ფარგლებში, განათლების განვითარებისა და დასაქმების ცენტრთან (EDEC) არსებული შეზღუდული შესაძლებლობის მქონე ბავშვთა და პირთა დღის ცენტრის ბენეფიციარებისთვის მზისა და მზის ირგვლივ მოძრავი პლანეტების, გლობალური დათბობის შესახებ საუბარი შედგა. დღის ცენტრების პროგრამა ხორციელდება განათლების განვითარების და დასაქმების ცენტრის მიერ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო, სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მხარდაჭერით.  სრულად  წყარო: გვერდი სოციალურ ქსელში

სამეგრელო-ზემო სვანეთი. არასამთავრობო ორგანიზაცია „ადამიანის უფლებებისა და სოციალური სამართლიანობის კვლევის ცენტრმა“ 9 ივნისს გაავრცელა პეტიცია, რომლითაც მოქალაქეები ფოთში ატომოსფერული ჰაერის უწყვეტი მონიტორინგისთვის ავტომატური სადგურების დამონტაჟებას ითხოვდნენ.  პეტიციის განხილვის შემდეგ, ქ. ფოთის მუნიციპალიტეტის საკრებულომ ქალაქში პირველი ავტომატიზებური სადგური განათავსა. „ადამიანის უფლებებისა და სოციალური სამართლიანობის კვლევის ცენტრის“ ადვოკატირების კამპანიას მხარს უჭერს EWMI ACCESS.  სრულად  წყარო: გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ნამახვანის კასკადის წინააღმდეგ, დღეს, ქუთაისში დაგეგმილ საპროტესტო აქციას და მოუწოდებს ხელისუფლებას, არ დაუშვას აღნიშნული პროექტის განხორციელება, მისი ეკონომიკური, სოციალური და ეკოლოგიური შედეგების სრულყოფილი გამოკვლევის გარეშე.  „საზოგადოების მაღალი ინტერესის, სამართლებრივი დავისა და დამოუკიდებელი კვლევების სახიფათო პროგნოზების გათვალისწინებით, საქართველოს მთავრობასა და ეკონომიკისა და მდგრადი განვითარების სამინისტროს მოვუწოდებთ: ალტერნატიული კვლევების საფუძველზე შესწავლონ ნამახვანი ჰესის გარემოსდაცვითი გადაწყვეტილების კანონშესაბამისობა და პროექტის გარემოზე ზემოქმედდების ხარისხი;  საბოლოო გადაწყვეტილების მიღებამდე შეჩერდეს ნამახვანი ჰესის მშენებლობის პროცესი;  შეიმუშავონ განახლებადი ენერგეტიკის, მათ შორის, ჰიდროენერგეტიკის განვითარების სისტემური მიდგომა და სტრატეგია;  ჰესებთან დაკავშირებული პროექტების დაგეგმვისა და განხორციელების ეტაპებზე, უზრუნველყონ ეროვნული და საერთაშორისო კანონმდებლობის დაცვა;  აღმოფხვრან ჰესების მშენებლობის დაგეგმვისა და კომპანიებთან წინასწარი შეთანხმების გაუმართავი და გაუმჭვირვალე პრაქტიკა;  უზრუნველყონ ჰესების მშენებლობის პროექტების ზეგავლენის ქვეშ მყოფი მოსახლეობისა და სხვა დაინტერესებული პირების სათანადო ჩართულობა გადაწყვეტილების მიღების პროცესში;  უზრუნველყონ ჰესების პროექტების ზეგავლენის ქვეშ მყოფი მოსახლეობის უფლებების დაცვა“, - ვკითხულობთ განცხადებაში. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება რუსთავში არსებულ ეკოლოგიურ კრიზისს და მოუწოდებს საქართველოს პარლამენტს დაუყოვნებლივ გაატაროს ინიცირებული საკანონმდებლო ცვლილებები გარემოსდაცვითი პასუხისმგებლობის შესახებ. „დაბინძურებული ჰაერს ადამიანის ჯანმრთელობისთვის მძიმე და მრავალმხრივი ზიანის მიყენება შეუძლია. დაბინძურებული ჰაერი ზრდის უნაყოფობის, სხვადასხვა ონკოლოგიური და გულსისხლძარღვთა დაავადების, კოგნიტური დაქვეითების, რესპირატორული პრობლემების ჩამოყალიბების რისკს“. სრულად... წყარო: emc.org.ge

თბილისი. ჰაინრიჰ ბიოლის ფონდი და მოძრაობა „დაიხსენი თავი პლასტმასისგან“ წარმოგიდგენთ პლასტმასის ატლასს. „პირველი საერთაშორისო ვერსია გამოიცა ინგლისურ ენაზე. მოგვიანებით კი ითარგმნა ქართულ ენაზე. ქართულენოვან პუბლიკაში რამდენიმე სტატიაა საქართველოში პლასტმასის ნარჩენებსა და მართვაზე“. სრულად... წყარო: ge.boell.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: ტყიბული და სამართლიანი ტრანზიცია: გამოწვევები და შესაძლებლობები. „ამ ტექსტის მიზანი ქვანახშირზე დამოკიდებული რეგიონების ალტერნატიული განვითარების შესახებ არსებული ძირითადი დისკურსებისა და დაგროვებული გამოცდილების მოკლე მიმოხილვაა. მიმოხილვას სამართლიანი ტრანზიციის კონცეფციის განხილვით დავიწყებთ, რომელიც ეკონომიკური ტრანსფორმაციის დღეს არსებულ ჩარჩოებს შორის ყველაზე გავრცელებულია. ამის შემდეგ იმ ინტერვენციებს მიმოვიხილავთ, რომლებიც სამართლიანი სოციოეკონომიკური ტრანსფორმაციისკენაა მიმართული და სამართლიანი ტრანზიციის პრაქტიკულ ნაბიჯებად თარგმნის მაგალითებს წარმოადგენს. ბოლოს ალტერნატიული განვითარების ხელშეწყობის პროცესში სხვადასხვა ჩართული მხარის – პროფკავშირებისა და სხვადასხვა სამოქალაქო ორგანიზიციის – როლზეც ვისაუბრებთ, რადგან გააზრებული და კოორდინირებული მოქმედების გარეშე სამართლიანი ტრანზიციის უზრუნველყოფა შეუძლებელია“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საია და მწვანე ალტერნატივა დადებითად აფასებენ „ხელედულა 3 ჰესის“ სკოპინგის დასკვნის ძალადაკარგულად გამოცხადებასთან დაკავშირებით სამინისტროს მიერ მიღებულ გადაწყვეტილებას. ორგანიზაციები მოუწოდებენ საქართველოს გარემოს დაცვისა და სოფლის მეურნეობის სამინისტროს, მომავალში მსგავსი პროექტების განხორციელებისას უზრუნველყოს სახელმწიფოსა და საზოგადოების გარემოსდაცვითი, სოციალური და ეკონომიკური ინტერესების თანაზომიერი გათვალისწინება და გარემოსდაცვითი შეფასების პროცედურის განხორციელებისას საუკეთესო საერთაშორისო პრაქტიკის დანერგვა. სრულად... წყარო: gyla.ge

თბილისი. საქართველოს სტრატეგიული კვლევებისა და განვითარების ცენტრის (CSRDG) მხარდაჭერით ორგანიზაცია „ჭიათურელთა კავშირი“-ს მიერ მომზადდა მონიტორინგისა და ადვოკატირების დეტალური ანგარიში, რომელიც ჭიათურაში ატმოსფერული ჰაერის ხარისხის გამოუსჯობესებას შეეხება. იხილეთ დეტალური ანგარიში... პუბლიკაცია შეიქმნა პროექტის „სამოქალაქო საზოგადოების განვითარების ინიციატივა“ ფარგლებში, ერვოკავშირისა და კონრად ადენაუერის ფონდის (KAS) მხარდაჭერით. წყარო: ორგანიზაციის გვერდი სოციალურ ქსელში

თბილისი. მწვანე ალტერნატივამ და საიამ თბილისის საქალაქო სასამართლოს სარჩელით მიმართეს და გარემოს დაცვისა და სოფლის მეურნეობის მინისტრის 2020 წლის 17 მარტის ბრძანების ბათილად ცნობა მოითხოვეს, რომლითაც „ონის ჰიდროელექტროსადგურების კასკადის“ პროექტზე გარემოსდაცვითი გადაწყვეტილება გაიცა. „ჰესის მშენებელმა კომპანიამ – სს „ონის კასკადმა“, არ უზრუნველყო ადამიანების ჯანმრთელობასა და გარემოს უსაფრთხოებისათვის არსებული რისკების შესამოწმებლად კანონით სავალდებულო კვლევების ჩატარება“. სრულად... წყარო: greenalt.org

თბილისი. მწვანე ალტერნატივა აქვეყნებს ირაკლი მაჭარაშვილის სტატიას: COVID-19-ის გაკვეთილები: რა კავშირია გარემოს დაცვასა და ეპიდემიების გავრცელებას შორის. „როგორ უწყობს ხელს ადამიანისა და ველური ბუნების კონფლიქტი სასიკვდილო ეპიდემიების წარმოშობასა და გავრცელებას – ამისათვის უნდა წარმოვიდგინოთ ცხოველთა ბაზრობები. ასეთ ბაზრობებზე თავმოყრილია ბევრი ცხოველი, რომლებიც ბუნებაში შეიძლება ერთად არ ბინადრობდნენ. სტრესის ქვეშ მყოფი და დაავადებული ცხოველები გალიებში არიან გამოკეტილი და სხეულის სითხეებს გამოყოფენ. მათ იქვე კლავენ და ხორცს ანაკუწებენ. ეს ყველაფერი ვირუსის გავრცელებისათვის ხელსაყრელ გარემოს ქმნის. ახალი კორონავირუსის პირველ შემთხვევებს სწორედ ვუჰანის ცხოველთა ბაზარი უკავშირდება, სადაც ცოცხალი ცივეტები და სხვა ცხოველები საკვებად გამოყენების მიზნით იყიდებოდა.  თუ არ გამოვიტანთ სათანადო გაკვეთილს, ადამიანის საქმიანობის შედეგად გარეული ცხოველების საბინადრო გარემოს ყოველდღიური შემცირება კიდევ უფრო გააძლიერებს ახალი ეპიდემიების საფრთხეს: ადამიანი იკავებს გარეული ცხოველების საბინადრო გარემოს და ამით ვირუსებს, სოკოებსა და ბაქტერიებს, რომელთა მასპინძლები ცხოველები იყვნენ, საკუთარ სხეულს სთავაზობს“, ნათქვამია ორგანიზაციის ვებგვერდზე. სრულად... წყარო: greenalt.org

თბილისი. ადამიანის უფლებების სწავლებისა და მონიტორინგის ცენტრმა (EMC), ბახვი 2-თან დაკავშირებით მიღებული გადაწყვეტილების გამო, თბილისის საქალაქო სასამართლოს მიმართა. EMC-იმ, ადგილობრივი გარემოსდაცვითი სათემო ორგანიზაცია „ეკოს“ სახელით, ოზურგეთში, მდინარე ბახვისწყალზე დაგეგმილი ჰიდროელექტროსადგურის - ბახვი 2-ის მშენებლობისა და ექსპლუატაციის თაობაზე მიღებული გარემოსდაცვითი გადაწყვეტილების ბათილად ცნობის მოთხოვნით თბილისის საქალაქო სასამართლოს მიმართა. სრულად... წყარო: emc.org.ge

12 მაისს, 13:00 საქართველოს ტრადიციული რეწვის ასოციაცია • Georgian Craft Association გიწვევთ ონლაინ შეხვედრაზე მონაწილეობის მისაღებად. ვებინარის თემაა: „ქალთა ორგანიზაციები განვითარებისთვის“. სრულად...

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს საქართველოს მთავრობას შეაჩეროს ჰიდრორესურსების მაქსიმალური ათვისების აგრესიული პოლიტიკა და არ გამოიყენოს შექმნილი კრიზისული ვითარება ამ პრობლემური პოლიტიკის დაჩქარებისთვის. სრულად... წყარო: emc.org.ge

თბილისი. ჰაინრიჰ ბიოლის ფონდი სამხრეთ კავკასიაში აქვეყნებს „მწვანე ალტერნატივას“ დამფუძნებლის, მანანა ქოჩლაძის სტატიას: კოვიდ-19, გარემოს დაცვა და მომავლის პერსპექტივები. „კოვიდ-19-ის პანდემია სერიოზული გამოწვევა აღმოჩნდა თანამედროვე საზოგადოებებისთვის. მსოფლიოში დაავადების სწრაფი გავრცელების შედეგად, ათასობით ადამიანი დაიღუპა, იზოლაციისა და კარანტინის გამო დაიხურა საზღვრები, უამრავმა ადამიანმა დაკარგა სამუშაო ადგილი. როგორც მოსალოდნელი იყო, ყველაზე მძიმედ პანდემიამ ღარიბ მოსახლეობას დაარტყა და კიდევ უფრო გაზარდა სიღარიბე და უთანასწორობა, ისედაც უთანასწორო მსოფლიოში“. სრულად... წყარო: ge.boell.org

22 აპრილს, გაეროს გენერალური ასამბლეის დადგენილებით, დედამიწის დღე აღინიშნება. ოზურგეთის ახალგაზრდული ცენტრის ინფორმაციით, პირველად ეს დღე 1970 წელს აღინიშნა ამერიკელი სენატორის გეოლორდ ნელსონის ინიციატივით, მას შედეგ რაც სანტა ბარბარას საბადოდან ნავთობი დაიღვარა, რის შედეგადაც ოკეანე დაბინძურდა და წყლის ბინადრები დაიხოცნენ. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) საგანგებო მდგომარეობის დროს გარემოსდაცვითი გადაწყვეტილებების მიღების პროცესში საზოგადოების მონაწილეობის შემზღუდველი ნორმა გაასაჩივრა. „საია სადავოდ ხდის ,,საქართველოში ახალი კორონავირუსის გავრცელების აღკვეთის მიზნით გასატარებელი ღონისძიებების დამტკიცების შესახებ“ საქართველოს მთავრობის 2020 წლის 23 არტის N181 დადგენილების მე-13 მუხლის მე-5 პუნქტს, რომლის თანახმად, ,,გარემოსდაცვითი შეფასების კოდექსით“ (შემდგომში – კოდექსი) გათვალისწინებული სკოპინგის დასკვნისა და გარემოსდაცვითი გადაწყვეტილების გაცემისთვის დაწყებული ადმინისტრაციული წარმოებები (რომელთა მიმდინარეობისას კოდექსით გათვალისწინებული საჯარო განხილვები ვერ ჩატარდა/ჩატარდება ახალი კორონავირუსის შესაძლო გავრცელების პრევენციის მიზნით) უნდა განხორციელდეს საჯარო განხილვის ჩატარების გარეშე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ მთავრობა საგანგებო მდგომარეობით სარგებლობს და სადავო პროექტებში გარემოსდაცვითი გადაწყვეტილებების მიღების პროცესში საზოგადოების მონაწილეობას ზღუდავს. „მწვანე ალტერნატივა და საია მოუწოდებენ საქართველოს მთავრობას, საგანგებო მდგომარეობის პერიოდში, შეაჩეროს პროექტებზე მიმდინარე გადაწყვეტილებების მიღების პროცესი. განმცხადებელი ორგანიზაციები მივიჩნევთ, რომ მთავრობის დადგენილებაში ცვლილება პრობლემურ პროექტებზე გადაწყვეტილებების მიღების გასამარტივებლად შევიდა. ასეთ პრობლემურ პროექტად, მაგალითად, შეგვიძლია აბასთუმნის შემოსავლელი გზის პროექტი დავასახელოთ“, ნათქვამია განცხადებაში. სრულად... წყარო: gyla.ge

თბილისი. მწვანე ალტერნატივა და საქართველოს ახალგაზრდა იურისტთა ასოციაცია ნამახვანის ჰესების პროექტზე გაცემული გარემოსდაცვითი გადაწყვეტილების ბათილად ცნობას ითხოვენ. „6 აპრილს მწვანე ალტერნატივა და საია თბილისის საქალაქო სასამართლოში შეიტანენ სარჩელს, წყალტუბოსა და ცაგერის მუნიციპალიტეტებში, მდინარე რიონზე დაგეგმილი ორსაფეხურიანი ნამახვანის ჰესების კასკადის პროექტში შეტანილ ცვლილებებთან დაკავშირებით გაცემული გარემოსდაცვითი გადაწყვეტილების ბათილად ცნობის შესახებ“.  სრულად... წყარო: gyla.ge

იცოდით რომ ბათუმის ბაღების ისტორია, გაცილებით ადრე იწყება, ვიდრე თავად ბათუმს ქალაქის სტატუსს მიანიჭებდნენ? იცოდით, რომ თავდაპირველად ანგელოზთა ბაღი მოეწყო, რომელიც შემოწირულობით გაშენდა... ნახეთ ვიდეო, რომელიც #CSI-ის პროექტის „ბათუმის მწვანე კოეფიციენტის“ ფარგლებში მომზადდა. #OSGF-ის მხარდაჭერილი პროექტის მიზანია ბათუმში მწვანე სივრცეების განაშენიანებისა და მოვლის კულტურის მონიტორინგი, მოქალაქეთა გააქტიურება რათა უფრო მეტი მწვანე უბანი გაჩნდეს ბათუმში... სრულად... წყარო: ორგანიზაციის გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელის ინფორმაციით, დედამიწის საათამდე ორი დღე რჩება. „ორგანულ ნარჩენს იმაზე მეტი ზიანი მოაქვს გარემოსთვის, ვიდრე წარმოგვიდგენია. ის პირდაპირ არის დაკავშირებული კლიმატის ცვლილებასთან და გამოწვეული ემისიებით, დიდი წვლილი შეაქვს გლობალური დათბობის პროცესში. FAO-ს კვლევის მიხედვით, საკვები ნარჩენი რომ ქვეყანა იყოს, ის რიგით მესამე ადგილზე იქნებოდა ჰაერის დაბინძურებით; ჩვენ, პატარა აქტივობების განხორციელებით, შეგვიძლია მნიშვნელოვანი გავლენის მოხდენა - შეიძინეთ იმდენი საკვები, რამდენსაც მოიხმარ - შეამცირე საკვები ნარჩენი და მისით გამოწვეული გლობალური ემისიები“. სრულად... წყარო: კავკასიის გარემოსდაცვითი არასამთავრობო ორგანიზაციების ქსელი