იმერეთი. ქუთაისის დემოკრატიული ჩართულობის ცენტრში  გაიმართა დისკუსია თემაზე: „ქუთაისი-მწვანე ქალაქი".დისკუსიაში მონაწილეობა  ქალაქის კეთილმოწყობის სამსახურის, საკრებულოს წარმომადგენლებმა, ეკოლოგებმა, დამოუკიდებელმა ექსპერტებმა, პარკების, ბაღებისა და სკვერების ხელმძღვანელებმა, ასევე საზოგადოებრივი ორგანიზაციებისა და სამოქალაქო საზოგადოების წარმომადგენლებმა მიიღეს. მრგვალ მაგიდის ფორმატის შეხვედრაზე განიხილეს ქალაქ ქუთაისის გამწვანების სტრატეგიის მონახაზები და ამ კუთხით ადგილობრივი თვითმმართველობისა და საზოგადოების ჩართულობის საკითხები.

სამცხე–ჯავახეთი. ასპინძის რაიონის სოფელ რუსთავის საჯარო სკოლის მოსწავლეების ინიციატივას, რომ დაესუფთავებინათ და გაემწვანებინათ სკოლის მიმდებარე ტერიტორია, მხარი ადგილობრივმა თვითმმართველობამ და ახალციხის ახალგაზრდულმა ცენტრმა აუბეს. აქცია 18 მაისს გაიმართა. ახალგაზრდებმა დაასუფთავეს სკოლის მიმდებარე ტერიტორია, ასევე შეიმუშავეს სოფლიდან ნარჩენების გატანის გრაფიკი. დაიდგა ნაგვის ბუნკერები და ნარჩენების გასატანად გამოიყო მანქანა. მსგავსი პროექტი ადიგენის რაიონის სოფელ ლელოვანშიც ხორციელდება. სადაც სკოლის მოსწავლეების, ახალციხის ახალგაზრდული ცენტრისა და ადგილობრივი თვითმართველობის თანანამშრომლობით, შემოიღობა სკოლის ეზო.

სამცჯხე–ჯავახეთი. 22 მაისს, ახალციხის დემოკრატიული ჩართულობის ცენტრში გაიმართა დისკუსია ბიომრავალფეროვნების თემაზე. დისკუსიაში მონაწილეობა მიიღეს ახალციხის საჯარო სკოლის მოსწავლეებმა, ეკო–კლუბის წევრებმა, აგრეთვე სამცხე–ჯავახეთის რეგიონული გარემოსდაცვითი კავშირის „ეკოდახის" წარმომადგენლებმა. შეხვედრაზე გადაწყდა, რომ ანალოგიური შეხვედრები ყოველთიურ ხასიათს მიიღებს, რათა ახალგაზრდებმა ბიომრავალფეროვნების შესახებ ცოდნა გაიღრმაონ და ცნობიერება აიმაღლონ. ასევე დაიგეგმა სხვადასხვა აქტივობები, სკოლის მოსწავლეები გეგმავენ ეკოლოგიური გაზეთის გამოშვებას, ლაშქრობების მოწყობას ბორჯომ–ხარაგაულის ეროვნულ პარკში და ა.შ.

თბილისი. „გრინფისის მხარდაჭერთა ჯგუფის" აქცია-ბრიფინგი გაიმართა გარემოს დაცვის სამინისტროსთან. აქტივისტები ჰესების მშენებლობის და ტყის მასივების გაჩეხვის შეწყვეტას ითხოვენ, რადგანაც ეს , მათი თქმით, იწვევს კლიმატურ ცვლილებებს. ორგანიზაცია საზოგადოებრივი კამპანიების გაგრძელებას გეგმავს.

იმერეთი. კლიმატის ზეგავლენის  თემაზე სამეცნიერო-ინტელექტუალური კლუბის „თაობათა დიალოგის" წევრებმა ქუთაისში აქცია გამართეს. „წერტილთა შეერთება", „გლობალური მოქმედების დღე" - ამ თემებს მიეძღვნა ფოტო სესიაც, რომელიც ღია ცის ქვეშ ჩატარდა. მოეწყო იმპროვიზირებული ”ფოტო სტუდია”. ფოტო სესიის მიზანი იყო კლიმატის ცვლილებების თაობაზე საზოგადოებისთვის ინფორმაციის მიწოდება. გამვლელებს და აქციის მონაწილეებს საშუალება ჰქონდათ იმპროვიზირებულ სესიაში ჩართულიყვნენ.

შიდა ქართლი. საზოგადოებრივი ორგანიზაცია „ბილიკმა" – „სამოქალაქო განათლებისა და პედაგოგთა გადამზადების პროგრამის"ფარგლებში (PH International /USAID) შიდა ქართლის 29 სკოლაში ჩამოაყალიბა სამოქალაქო კლუბები, რომლებიც მრავალ საინტერესო აქტივობებს ახორცილებენ. პროგრამის ფარგლებში, სურამის მე–3 საჯარო სკოლაში სამოქალაქო განათლების კვირეული მოეწყო, რომლის ფარგლებში გაიმართა აქცია –  „სუფთა სკოლა". ასევე ადგილობრივ თვითმმართველობასთან ერთად დასუფთავდა სურამის რკინიგზის სადგურის მიმდებარე ტერიტორია და ზინდისის ტყის მონაკვეთი. აქციაში მონაწილეობდნენ როგორც სკოლის მოსწავლეები და მასწავლებლები, ასევე თვითმმართველობის წარმომადგენლები. 3 მაისს სკოლაში მოეწყო ანტინარკოტიკული და აზარტული თამაშების საწინააღმდეგო აქცია–გამოფენა.

კახეთი. ,,მედია ცენტრ კახეთის" ორგანიზებით  ქალაქ გურჯაანში მდებარე ტყე პარკში მასშტაბური დასუფთავების აქცია გაიმართა. ტყე–პარკი 10 ჰექტარს მოიცავს. აქ, გასული საუკუნის 80-იან წლებში ფუნქციონირებდა ატრაქციონები, გასართობი ცენტრები, ამფითეატრი, დახურული და ღია კინოთეატრი. ამჟამად მხოლოდ ძველი ატრაქციონებისა და ღია თეატრის ნანგრევებია შემორჩენილი. პარკთან ახლოს მდებარეობს გენერალ ჯონ მალხაზ შალიკაშვილის სახელობის სამხედრო მუზეუმი. ,,პარკის ტერიტორიის დიდი ნაწილი ამჟამად გამოუყენებელია და განადგურების პირასაა. ჩვენი მიზანია, პარკს დაუბრუნდეს ძველი იერსახე. ვცდილობთ საზოგადოებას მოვაწვდინოთ ჩვენი ხმა, რათა სამომავლოდ კიდევ ერთი, კარგი დასასვენებელი ადგილი შევმატოთ ქალაქს", აცხადებს პროექტის კოორდინატორი მაკა ხაზიური.პარკის ტერიტორიის დასუფთავების აქციაში მონაწილეობა მიიღეს როგორც ორგანიზაციის თანამშორმლებმა, ასევე ,,მედია ცენტრი კახეთის" მოხალისეებმა. ,,ჩვენს ქალაქში ბევრი არაფერი კეთდება იმისათვის, რომ ახალგაზრდები ჩართულნი ვიყოთ სამოქალაქო აქტივობებში. ვფიქროთ, შეგვიძლია ამ სიტუაციის შეცვლა და იმედი გვაქვს, ჩვენი მონდომებით ბევრს შევცვლით ქალაქისა და ჩვენს სასიკეთოდ’’, აცხადებს ანი სპარსიაშვილი, მედია ცენტრის მოხალისე. ,,მედია ცენტრი კახეთი" ძირითადად, ახალგაზრდულ  პროექტებს ახორციელებს. აქცია ,,სათემო განვითარების ცენტრის’’ პროექტის –  ,,შემოსავლების მომტანი საქმიანობებისა და რეგიონული განვითარების ხელშეწყობა კულტურულ-საგანმანათლებლო პროგრამების მეშვეობით’’ – ფარგლებში მოეწყო.