თბილისი. ორგანიზაცია „ქალი და განვითარება“ აქვეყნებს ვიდეო რგოლს, რომლის საშუალებითაც ადგილობრივი მოქალაქეები უკეთ გააცნობიერებენ თუ რა უფლებები და მოვალეობები აქვთ ნარჩენების მართვისას, როგორც მუნიციპალური სერვისების მიმღებებს. ვიდეო რგოლი შექმნილია საქართველოს სტრატეგიული კვლევებისა და განვითარების ცენტრის მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

მცხეთა-მთიანეთი. მცხეთა-მთიანეთის რეგიონული ჰაბის მიერ ორგანიზებულ მოხალისეობის კვირეულში ახალგორის მუნიციპალიტეტიდან წეროვანის დევნილთა დასახლება ჩაერთო. მოხალისეები საბავშვო ბაღში ბუნების დაცვის თემატიკით გაერთიანდნენ. ბავშვებისათვის მოეწყო შემეცნებითი შეხვედრა გარემოს დაცვის თემატიკაზე. ანიმაციური გმირების ფორმებში გამოწყობილმა მოხალისეებმა ბაგა-ბაღის მოსწავლეებს სახე მოუხატეს, პატარებთან ერთად ქოთნის მცენარეები დარგეს და ეზო ნაძვებით გაამწვანეს. მოხალისეობის კვირეული ტარდება პროექტის „სამოქალაქო საზოგადოების ინიციატივა“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. გარემოს დაცვის დღის წინ, გაეროს განვითარების პროგრამა (UNDP) წარმოგიდგენთ ახალ კვლევას „გარემოსდაცვითი განათლებისა და ცნობიერების დონის შეფასება საქართველოში“,  რომლის მიზანია სამთავრობო და სამოქალაქო სექტორის უზრუნველყოფა სანდო სტატისტიკური და ანალიტიკური მონაცემებით. კვლევის შედეგებით გამოიკვეთა, რომ 10 რესპონდენტიდან 9 გრძნობს კლიმატის ცვლილების უარყოფით შედეგებს. გამოკითხულთა 91% თვლის, რომ წყლის რესურსების დაბინძურება კანონით უნდა ისჯებოდეს. 90% მიიჩნევს, რომ საქართველოში ნარჩენების დახარისხების პრაქტიკა უნდა დაინერგოს. სრულად... წყარო: ორგანიზაციის გვერდი სოციალურ ქსელში

მცხეთა-მთიანეთი. საერთაშორისო გამჭვირვალობა - საქართველოს იურისტები ხადის ხეობასა და მლეთაში დაზარალებულ მაცხოვრებლებს შეხვდნენ, რომელთა საცხოვრებელი სახლები და მიწის ნაკვეთები, ასევე დამხმარე შენობა-ნაგებობები, ქვეშეთი - კობის მშენებარე საავტომობილო გზაზე გვირაბის გაყვანისას დაზიანდა.  ორგანიზაცია დეტალურად შეისწავლის ამ საქმეებს და სამართლებრივ დახმარებას გაუწევს დაზარალებულებს. სრულად... წყარო: ორგანიზაციის გვერდი სოციალურ ქსელში

თბილისი. გაეცანით ანა ბერიძის ბლოგპოსტს: კლიმატის ცვლილება და ბავშვები.  „1 ივნისს საქართველოში ბავშვთა დაცვის საერთაშორისო დღე აღინიშნება. მისი ერთ-ერთი მიზანი ბავშვთა უფლებების შესახებ ცნობიერების ამაღლება და მათ კეთილდღეობასთან დაკავშირებული პრობლემური საკითხების წამოწევაა. UNICEF-ის 2021 წლის მონაცემების მიხედვით, დღესდღეობით დედამიწაზე თითქმის ყველა ბავშვი არის კლიმატის ცვლილებითა და გარემოს დაზიანებით გამოწვეული მინიმუმ ერთი ისეთი საფრთხის წინაშე მაინც, როგორიც, შესაძლოა, იყოს გაძლიერებული და გახშირებული სითბური ტალღები, ციკლონები, ჰაერის დაბინძურება, წყალდიდობა და სუფთა წყლის დეფიციტი.[1] მსოფლიოს მასშტაბით თანდათან იზრდება ბავშვების როლი გარემოს დაცვის საკითხებთან დაკავშირებულ პროცესებში, რაც ბუნებრივია, ვინაიდან სწორედ ისინი არიან ის თაობა, რომელსაც ყველაზე ნაკლები წვლილი მიუძღვის თანამედროვე კლიმატის ცვლილების გამოწვევაში და მიუხედავად ამისა, სწორედ მათზე აისახება ყველაზე მეტად მისი უარყოფითი შედეგები. ამიტომ, მნიშნელოვანია ბავშვებთან დაკავშირებული საკითხების მეტად პოპულარიზაცია საქართველოში და სახელმწიფოს მხრიდან სხვადასხვა მექანიზმის შექმნა და გამოყენება, რათა უზრუნველყოფილი იყოს მათი სათანადო ჩართულობა კლიმატის ცვლილებასთან დაკავშირებულ პროცესებში“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, გაეროს ადამიანის უფლებათა საბჭომ მიიღო ახალი რეზოლუცია (#A/HRC/52/L.7) სუფთა, ჯანსაღ და მდგრად გარემოში ცხოვრების უფლების შესახებ. „რეზოლუცია მნიშვნელოვანი დოკუმენტია, ვინაიდან ის კიდევ ერთხელ აღიარებს, რომ სამმაგი პლანეტარული კრიზისი: (მსოფლიო დაბინძურება, ბიომრავალფეროვნების განადგურება და კლიმატის ცვლილება) ადამიანის უფლებათა დაცვის კუთხით ერთ-ერთ უმნიშვნელოვანეს გამოწვევას წარმოადგენს.  კონკრეტულად, ის საფრთხეს უქმნის ადამიანის სიცოცხლეს, მის ფიზიკურ და მენტალურ ჯანმრთელობას, თავშესაფარზე, საკვებზე, სუფთა სასმელ წყალსა და სანიტარიაზე ხელმისაწვდომობის, კულტურულ და სხვა უფლებებს“. სრულად... წყარო: gyla.ge

თბილისი. გაეცანით საქართველოს ახალგაზრდა იურისტთა ასოციაციის კვლევას - „გარემოს დაცვის სისხლისსამართლებრივი რეგულირება“. „სისხლისსამართლებრივი პასუხისმგებლობა გარემოს დაცვის სფეროში ერთ-ერთი მნიშვნელოვანი ინსტრუმენტია, რომელიც უზრუნველყოფს დანაშაულთან ქმედით ბრძოლას და ამ სფეროში არსებული იმ დირექტივების ეფექტიან იმპლემენტაციას, რომელთა ეროვნულ დონეზე დანერგვის ვალდებულება საქართველომ ასოცირების შეთანხმების ფარგლებში აიღო.  კვლევის შედეგად გამოკვეთილი მიგნებების გათვალისწინებით, საქართველოს კანონმდებლობის დახვეწის, ევროკავშირის სამართალთან მისი მეტად დაახლოებისა და ჰარმონიზაციის, ასევე, პრაქტიკაში აღსრულების კუთხით გამოვლენილი პრობლემების გამოსწორების მიზნით, საიამ შეიმუშავა რეკომენდაციები“. სრულად... წყარო: www.gyla.ge

თბილისი. მწვანე ალტერნატივა მოუწოდებს გარემოს ეროვნულ სააგენტოს შეწყვიტოს ნატახტარი-რუსთავის ჩქაროსნული ავტომაგისტრალის ნატახტარი-ჟინვალის მონაკვეთის მშენებლობისა და ექსპლუატაციის პროექტის შესახებ გარემოსდაცვითი გადაწყვეტილების მიღებისათვის მიმდინარე პროცესი.  „განსახილველი გარემოზე ზემოქმედების შეფასების ანგარიში (გზშ) დოკუმენტი არ მოიცავს მთელი რიგი საკითხების შესახებ ინფორმაციას, რომლის წარმოდგენა სავალდებულოა.  დოკუმენტის ნაკლოვანებების სია ვრცელია, თუმცა განსაკუთრებით აღსანიშნავია, რომ ანგარიში არ მოიცავს პროექტის საჭიროების დასაბუთებასა და ხარჯ-სარგებლიანობის ანალიზს; ასევე, არ არის გათვალისწინებული საპროექტო დერეფანში მოხვედრილი საკმაოდ მასშტაბური ინფრასტრუქტურის გადატანით მოსალოდნელი ზემოქმედება.   მიგვაჩნია, რომ გზშ-ის ანგარიშში აღნიშნული ინფორმაციის არარსებობა დაუშვებელს ხდის პროექტზე გადაწყვეტილების მიღებას და წარმოდგენილი განაცხადის განუხილველად დატოვების საფუძველს წარმოადგენს“, ნათქვამია განცხადებაში. სრულად... წყარო: greenalt.org

თბილისი. გაეროს განვითარების პროგრამის ინფორმაციით, 2021 წლის ოქტომბერში, გაეროს ადამიანის უფლებათა საბჭომ მიიღო რეზოლუცია, რომლის თანახმად სუფთა, ჯანსაღი და მდგრადი გარემო ადამიანის უფლებად იქნა აღიარებული... „მსოფლიოში, ყოველი მეექვსე ნაადრევად გარდაცვლილი ადამიანი დაბინძურების გამო იღუპება. კლიმატის ცვლილების გამო, ათობით მილიონი ადამიანი ცხოვრებას დევნილობაში ატარებს. ხოლო ბიომრავალფეროვნების დანაკარგი ეკოსისტემების კოლაფსით გვემუქრება. აუცილებელია, რომ ქვეყნების მთავრობებმა და მთლიანად საერთაშორისო თანამეგობრობამ ერთიანად იმოქმედონ და ყველა არსებული რესურსი გამოიყენონ იმისთვის, რომ ადამიანის უფლებას იცხოვროს ჯანსაღ გარემოში საფრთხე აღარ დაემუქროს“. სრულად... წყარო: ორგანიზაციის გვერდი სოციალურ ქსელში

იმერეთი. 20 იანვარს, პროექტის „სუფთა გარემო ნარჩენების გარეშე ხაშურის მუნიციციპალიტეტში“ - კვლევის შედეგების ექსპერტული ანალიზის შედეგად მიღებული რეკომენდაციების საჯარო განხილვა მოეწყო. მომხსენებლებმა ანა ჯებისაშვილმა და სოსო მეზვრიშვილმა ხაშურის მუნიციპალიტეტის თანამშრომლებს ნარჩენების მართვასთან დაკავშირებული მიღებული რეკომენდაციები გააცნეს. აღნიშნულ რეკომენდაციებს ხაშურის მუნიციპალიტეტი ახალი ნარჩენების მართვის გეგმისა და სტრატეგიის შემუშავებაში გამოიყენებს, რომელიც მიმდინარე წელს დამტკიცდება. დღევადენლი შეხვედრა მოეწყო პროექტის „სუფთა გარემო ნარჩენების გარეშე ხაშურის მუნიციპალიტეტში“ ფარგლებში, რომელსაც მეგობრობის ხიდი „ქართლოსი“ ახორციელებს. საჯარო განხილვა განხორციელდა „საქართველოს სტრატეგიული კვლევებისა და განვითარების ცენტრის“ მხარდაჭერით, პროექტის „სამოქალაქო საზოგადოების ინიციატივა:  მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტს ხორციელდებოდა  კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციისა და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). პროექტს აფინანსებს ევროკავშირის და კონრად ადენაუერის ფონდი. სრულად... წყარო: ორგანიზაციის გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონული ბიურო აქვეყნებს ლიკა ჯალაღანიას სტატიას „რიონის ხეობის პროტესტი და „მოქალაქეობის“ გარდაქმნის პოტენციალი“. „სტატია შეეხება რიონის ხეობის პროტესტის კონტექსტში ახალი პოლიტიკური მოქალაქეობის დაბადების და თვითშექმნის პოტენციალებს. სტატიის ფოკუსში ექცევა მხოლოდ ის ზოგადი მულტიდისციპლინური ლიტერატურა, რომელიც ადგილობრივ პროტესტებს მოქალაქეობისა და სამართალსუბიექტურობის გადაკვეთაზე ხედავს და იძლევა შესაძლებლობას, მეტად სიღრმისეულად დავინახოთ ადგილობრივად ამოზრდილ წინააღმდეგობათა მნიშვნელობები და გავლენები“, ნათქვამია სტატიის აღწერაში. სრულად... წყარო: ge.boell.org

აჭარა. გაეროს განვითარების პროგრამის (UNDP) ინფორმაციით, ბათუმის მუნიციპალიტეტი ნარჩენების მართვის ახალ მიდგომას ნერგავს, რომელიც ნარჩენების წარმოქმნის შემცირებასთან ერთად, ნარჩენების შემდგომი გადამუშავებისთვის მათ დახარისხებასაც ისახავს მიზნად. მუნიციპალური ნარჩენების მართვის ახალი მიდგომა ეფუძნება ბათუმის მერიისა და გაეროს განვითარების პროგრამის სწრაფი განვითარების ლაბორატორიის თანამშრომლობას, რომლის ქცევითი ექსპერიმენტის შედეგად, ბათუმში პლასტმასას ბოთლების სეპარირებული შეგროვება ერთ წელიწადში 16-ჯერ გაიზარდა. სრულად... წყარო: ორგანიზაციის გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელი (CENN) გიზიარებთ ახალ სტატიას „კლიმატის ცვლილებით გამოწვეული „ზარალის და ზიანის“ შეთანხმება: ძირითადი კითხვები და პასუხები“. სტატია მიმოიხილავს, კლიმატის 27-ე მსოფლიო კონფერენციის (COP27-ის) ერთ-ერთ მთავარ შედეგს - შეთანხმებას „ზარალისა და ზიანის“ მსოფლიო ფონდის შექმნის თაობაზე. სტატია... წყარო: ორგანიზაციის გვერდი სოციალურ ქსელში

გერმანია. კავკასიის გარემოსდაცვითი არასამთავრობო ორგანიზაციების ქსელი (CENN) შეუერთდა საქართველოს დელეგაციას გერმანიის საერთაშორისო თანამშრომლობის საზოგადოების (GIZ)-სა და გერმანული LAG 21-ის მიერ ორგანიზებულ გაცვლით ვიზიტზე გერმანიაში, რომელიც მდგრადი განვითარების მიზნების ადგილობრივ დონეზე დანერგვის ხელშეწყობაზე გამოცდილების გაზიარებას ეძღვნებოდა. ვიზიტის ფარგლებში, მონაწილეები გაეცნენ საუკეთესო პრაქტიკის მაგალითებს გარემოს დაცვის, მდგრადი ტურიზმის, ენერგოეფექტურობისა და მდგრადი ეკონომიკის მიმართულებით. გერმანიის მთავრობის მიერ მხარდაჭერილი მიმდინარე პროექტის „SDG-ების განხორციელების ხელშეწყობა საქართველოში“ ფარგლებში, CENN აქტიურად მუშაობს საქართველოს SDG სამდივნოსთან საქართველოში მდგრადი განვითარების მიზნების განხორციელების პროცესებში მრავალსექტორული დიალოგის უზრუნველსაყოფად. აღნიშნული პროექტის საქმიანობა ითვალისწინებს სხვადასხვა დაინტერესებული მხარეების გაძლიერებას და SDG-ებთან დაკავშირებული დაგეგმვის, მონიტორინგისა და ანგარიშგების პროცესებში სამოქალაქო საზოგადოების ორგანიზაციებისათვის ჩართულობის სივრცეებისა და მექანიზმებს შექმნას. სრულად... წყარო: ორგანიზაციის გვერდი სოციალურ ქსელში

ქვემო ქართლი. CENN HEKS-EPER-ის ფინანსური მხარდაჭერით ხელს უწყობს მარნეულის მუნიციპალიტეტში მცხოვრები ახალგაზრდების გარემოსდაცვით განათლებას. მარნეულის გოგონების გაძლიერების კლუბის წევრების ინიციატივით, მარნეულის მუნიციპალიტეტის სოფელ მარადისში და წითელსოფელში ხეების დარგვის აქტივობა და მწვანე სივრცეების ეკონომიკური, სოციალური და გარემოსდაცვითი ასპექტების შესახებ ღია დისკუსია მოეწყო. აქტივობები განხორციელდა კლიმატის ცვლილების მიმართ მედეგი სოფლის მეურნეობა PRAISE MARNEULI - პროექტის ფარგლებში, რომელიც ხორციელდება CENN-ის მიერ, HEKS-EPER-ის ფინანსური მხარდაჭერით. სრულად... წყარო: ორგანიზაციის  გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელის (CENN) ონლაინ კამპანია „იმოქმედე კლიმატისთვის“ ნახევარ მილიონზე მეტ ადამიანს მისწვდა. ორგანიზაცია გიზიარებთ #ACT4CLIMATE-ის ანგარიშს, რომელიც ერთი წლის განმვლობაში მიღწეულ შედეგებს წარმოგიდგენთ.  2022 წლის დასაწყისში CENN-მა წამოიწყო ონლაინ კამპანია, რომლის მთავარ მიზანს გარმოსდაცვით საკითხებზე საზოგადოების ცნობიერების ამაღლება და კლიმატისთვის სასიკეთო ქმედებების წახალისება წარმოადგენდა. კამპანია მოუწოდებდა ადამიანებს გადაედგათ ქმედითი ნაბიჯები გარემოს დასაცავად და თავიანთი წვლილი შეეტანათ კლიმატის ცვლილების მიერ გამოწვეული შედეგების შერბილების პროცესში.  ორგანიზაცია მადლობას უხდის იმ ათასობით ადამიანს, ვინც აქტიურად ჩაერთო კამპანიაში და დაეხმარა ACT4CLIMATE-ს მიზნების მიღწევაში.  „ვიმედოვნებთ, რომ კამპანიის დასრულების შემდეგაც გააგრძელებთ თქვენი წვლილის შეტანას კლიმატის ცვლილების შერბილების პროცესში. სრულად... ანგარიში... წყარო: ორგანიზაციის გვერდი სოციალურ ქსელში

თბილისი. კავკასიის გარემოსდაცვითი არასამთავრობო ორგანიზაციების ქსელი (CENN) გვიზიარებს საინფორმაციო ბლოგპოსტს ფეიერვერკების მავნებლობის შესახებ. „ფეიერვერკების გამოყენებით ხელს ვუწყობთ ჰაერის, წყლის და ნიადაგის დაბინძურებას. მათი გამოყენების დროს წარმოქმნილი მავნე ნივთიერებები ტოქსიკურია, როგორც ადამიანებისთვის, ისე ფრინველებისთვისა და ცხოველებისთვის. აფეთქებისთვის საჭირო ჟანგბადის წარმოებისთვის, ბევრი ფეიერვერკი შეიცავს პერქლორატებს, რომლებიც წყლის - სასმელი, მდინარეებისა და ტბების დაბინძურების წყარო ხდება. პერქლორატის მარილები ნეგატიურ გავლენას ახდენს როგორც ადამიანის ჯანმრთელობაზე, ისე წყალში მცხოვრებ ორგანიზმებზე“. სრულად... წყარო: ორგანიზაციის გვერდი სოციალურ ქსელში

თბილისი. გაეცანით საქართველოს ახალგაზრდა იურისტთა ასოციაციის (საია) ანალიტიკოსის ანა ბერიძის კვლევას „კლიმატის ცვლილება და ადამიანის უფლებები“. „კლიმატის ცვლილების შედეგად გამოწვეული ბუნებრივი კატასტროფები, გარემოს შეცვლილი პირობები და სხვა უარყოფითი შედეგები უშუალოდ უქმნის საფრთხეს ადამიანის ისეთ ძირითად უფლებებს, როგორებიცაა: ადამიანის სიცოცხლისა და ჯანმრთელობის, ღირსეულად ცხოვრების, თვითგამორკვევის, განვითარების, განათლების უფლებები და სხვა“, აღნიშნულია კვლევაში. სრულად... წყარო: gyla.ge

სამეგრელო. კავკასიის გარემოსდაცვითი არასამთავრობო ორგანიზაციების ქსელის (CENN) ინფორმაციით, აფხაზეთის მე-10 საჯარო სკოლა ნიკო კეცხოველის სასკოლო პრემიის გამარჯვებულია. „აფხაზეთის #10 საჯარო სკოლა უკვე მეორე წელია ნიკო კეცხოველის სასკოლო პრემიის მონაწილეა. მინიმალური რესურსით, დიდი შრომითა და მონდომებით სკოლის ეკო კლუბი 2021 წელს საუკეთესო ათეულში მოხვდა, წელს კი მონაწილე სკოლებს შორის პირველი ადგილი მოიპოვა და კონკურსის გამარჯვებულიც გახდა“. სრულად... წყარო: ორგანიზაციის გვერდი სოციალურ ქსელში

ნორვეგია. საქართველოს ახალგაზრდა იურისტთა ასოციაციის ადამიანის უფლებათა პროგრამის ანალიტიკოსი ანა ბერიძე ოსლოს საერთაშორისო გარემოსდაცვითი სამართლის კონფერენციაზე მოხსენებით გამოვიდა.  მისი მოხსენება ეძღვნებოდა მომავალი თაობების ინტერესებსა და უფლებებს სამმაგი პლანეტარული კრიზისის კონტექსტში. ანამ თავის კვლევაზე დაყრდნობით ისაუბრა, თუ რა გამოწვევების წინაშე დგას ამ მხრივ მსოფლიო და საქართველო, ქმნის თუ არა საქართველოს კონსტიტუციაში არსებული მითითება მომავალი თაობების ინტერესებზე ახალ სამართლებრივ რეჟიმს, დაცული და გათვალისწინებულია თუ არა მომავალი თაობების ინტერესები გადაწყვეტილების მიღების პროცესში, როგორ უკავშირდება ეს ინტერესები მდგრად განვითარებას და როგორ უნდა გაუმჯობესდეს ამ მხრივ დღეს არსებული მდგომარეობა. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი-იმერეთი. ბორჯომ-ხარაგაულის ეროვნულ პარკში მზის ენერგიაზე მომუშავე ელექტრო-ღობეები და ციმციმები (Foxlight) დამონტაჟდა. ამ ტექნოლოგიას 10-ზე მეტი მწყემსი და მეფუტკრე გამოიყენებს, რაც მათ მეურნეობებს მგლის, მურა დათვისა და ფოცხვერის თავდასხმისგან დაიცავს, თუმცა ადგილობრივი ფაუნის ამ მნიშვნელოვან წარმომადგენლებს ზიანს არ მიაყენებს. ინიციატივა განხორციელდა UNDP-სა და გლობალური გარემოსდაცვითი ფონდის მცირე გრანტების პროგრამის (GEF SGP) ფარგლებში, რომელიც ათ წელზე მეტია მხარს უჭერს საქართველოში ბიომრავალფეროვნების კონსერვაციას, განახლებადი ენერგიის გამოყენებას და გარემოსდაცვით საქმიანობაში ადგილობრივი მოსახლეობის ჩართვას. სრულად... წყარო: ორგანიზაციის გვერდი სოციალურ ქსელში

გურია. გურიაში პუბლიკაციის „გარემოსდაცვითი „გადაწყვეტილების მონიტორინგი გურიის რეგიონში“ პრეზენტაცია გაიმართა. პუბლიკაცია მომზადდა გურიის სამოქალაქო ცენტრის და გარემოსდაცვითი სათემო ორგანიზაცია „ეკოს“ ერთობლივი პროექტის „გარემოსდაცვითი გადაწყვეტილებების მონიტორინგი გურიის რეგიონში“ ფარგლებში და მასში აღწერილია გურიის რეგიონში გარემოსდაცვითი გადაწყვეტილებების მიღების პროცესში მოქალაქეთა ინფორმირების და ჩართულობის კუთხით არსებული მდგომარეობა და გამოვლენილი ხარვეზები. პუბლიკაციაში მოცემულია რეკომენდაციები შესაბამისი სახელმწიფო უწყებების მიმართ. პუბლიკაცია იხ. პროექტი ხორციელდება საქართველოს სტრატეგიული კვლევებისა და განვითარების ცენტრის მხარდაჭერით, ევროკავშირისა (EU) და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში