კახეთი. თელავის მედია კაფეში რატი ამიაღლობელმა სამოქალაქო კლუბების წარმომადგენლებსა და წიგნის მოყვარულებს ლიტერატურული პროექტი „ჩემი წიგნი" წარუდგინა. „ახალი პროექტი საუკეთესო წიგნების მარათონია. მარათონი, რომელიც თავიდან წაგაკითხებთ ყველა თქვენ საყვარელ წიგნს. მარათონი, რომელშიც ახალ ლიტერატურას აღმოაჩენთ. მარათონი, რომელშიც თქვენ აირჩევთ ერთს, რომელზეც იტყვით: - ეს ჩემი წიგნია! თუმცა დაუსრულებლად შეიძლება კამათი თუ რომელია საუკეთესო ნაწარმოები. ყველა ფიქრობს, რომ მისი საყვარელი წიგნი საუკეთესოა", აღნიშნა შეხვედრაზე რატი ამაღლობელმა. პროექტი BBC-ის მხარდაჭერით მიმდინარეობს.

აჭარა. 11 თებერვალს ბათუმის დემოკრატიული ჩართულობის ცენტრში გაიმართა „სამართლის სკოლის" პრეზენტაცია". მე-9, მე-10 და მე-11 კლასიის მოსწავლეებს შესაძლებლობა აქვთ უფასოდ ისწავლონ სამართლის სკოლაში. ისინი სამი თვის განმავლობაში მიიღებენ ინფორმაციას ადამიანის უფლებებზე, სახელმწიფო სამართალსა და დემოკრატიის შესახებ. „სამართლის სკოლა" ეს არის დემოკრატიული ჩართულობის ცენტრისა და საქართველოს ახალგაზრდა იურისტთა ასოციაციის (საია) ერთობლივი პროექტი. აღნიშნული პროექტი დაახლოებით რვა წელია არსებობს, პროექტის მიზანია, სკოლის მოსწავლეებში იურიდიული განათლების დანერგვა და პრაქტიკული ცოდნის გაუმჯობესება. სწავლების პროცესში მოსწავლეები დაეუფლებიან კონფლიქტების მოგვარებას, გადაწყვეტილების მიღებასა და სხვა საჭირო უნარჩვევებს. „სამართლის სკოლა" გაზრდის ბავშვებს სამაგალითო მოქალაქეებად, რომელთაც რეაგირება ექნებათ არა მარტო საკუთარი ინტერესების, არამედ სხვისი ინტერესების დასაცავადაც.

თბილისი. საერთაშორისო განათლების ცენტრი აწყობს ცენტრალური ევროპის უნივერსიტეტის პრეზენტაციას 13 თებერვალს 17:00 საათზე. პრეზენტაცია გაიმართება ფონდ „ღია საზოგადოება საქართველოს" ოფისში (მისკამართი: თბილისი, ჭოველიძის 10). ცენტრალური უნივერსიტეტის წარმომადგენლები ისაუბრებენ სწავლის შესაძლებლობების შესახებ. წყარო: jobs.ge

შიდა ქართლი. 10 თებერვალს, ასოციაცია „გორის ინვალიდთა კლუბთან" არსებული ახალგაზრდული ცენტრი, გორის სახელმწიფო სასწავლო უნივერსიტეტს ეწვია, სადაც გაეცნო პროფესიულ საგანმანათლებლო პროგრამებს. პროფესიული პროგრამების ადმინისტრატორმა მიაწოდა ინფორმაცია პროფესიულ პროგრამებზე ჩარიცხვის, სპეციალობებისა და სწავლის შესახებ, სადაც 2013 წლიდან სწავლა მიმდინარეობს სახელმწოფო დაფინანსებით. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

თბილისი. 6 თებერვალს, საქართველოს ადვოკატთა ასოციაციისა და ორგანიზაცია ,,საქართველოს ადვოკატები დამოუკიდებელი პროფესიისათვის" ორგანიზებით საერთაშორისო ხელშეკრულებების და საარბიტრაჟო საქმისწარმოებასთან დაკავშირებით ადვოკატებისათვის ტრენინგი გაიმართა. ტრენინგს ამერიკელი ექსპერტები უძღვებიან და იგი ორ დღეს გასტანს. ღონისძიება ხორციელდება ამერიკის შეერთებული შტატების სახელმწიფო დეპარტამენტის კომერციული სამართლის განვითარების პროგრამის მხარდაჭერით. წყარო:ორგანიზაციის გვერდი სოციალურ ქსელში

თბილისი. საინფორმაციო ვებგვერდის (Edu-Guide.Ge) ინფორმაციით, 16 თებერვალს გაიმართება ინფო–სესია ესტონეთის უნივერსიტეტების, სტიპენდიებისა და უფასო პროგრამების შესახებ. შეხვედრას დაესწრებიან ტალინის ტექნოლოგიური უნივერსიტეტისა და ტარტუს უნივერსიტეტის წარმომადგენლები. სრულად წყარო: edu-guide.ge

თბილისი. განსაკუთრებული საჭიროებების მქონე ბავშვებისა და მათი მშობლებისთვის ვებგვერდი www.myworld-kids.ge შეიქმნა. ვებ–გვერდზე განთავსებულია საბავშვო მწერლების ნაწარმოებები, აუდიო ზღაპრები, თამაშები და სხვა ინფორმაცია. პროექტი საბავშვო ლიტერატურის განვითარების ფონდის, ბავშვთა და ახალგაზრდობის ფონდისა და ფონდ ,,ღია საზოგადოება საქართველოს’’ მხარდაჭერით განხორციელდა. წყარო: myworld-kids.ge

იმერეთი. საჩხერის შეზღუდული შესაძლებლობების მქონე პირთა რეგისტრირებული კავშირის ორგანიზებით „მაკლეინის ასოციაციამ ბავშვებისთვის" ჩაატარა „ინკლუზიური განათლების" ტრენინგი. ტრენინგს ესწრებოდნენ საჩხერის საჯარო სკოლებისა და ასევე სოფელ სავანის საჯარო სკოლის მასწავლებლები. ტრენინგი გრძელდებოდა 28 იანვრიდან 1 თებერვლამდე.  წყარო:ორგანიზაციის გვერდი სოციალურ ქსელში

სამცხე–ჯავახეთი. ახალციხის  N1  საჯარო  სკოლის  საკონფერენციო დარბაზში  მცირე  გრანტის  პროგრამის ფარგლებში  გაიმართა რეგიონალური  კონფერენცია   და  მრგვალი მაგიდა  თემაზე:  „რა  მოგვცა  სამოქალაქო განათლების  დამხმარე  სახელმძღვანელოებმა".  კონფერენციის ორგანიზატორები ასპინძის რაიონის სოფელ აწყვიტის საჯარო სკოლის სამოქალაქო კლუბის წევრები იყვნენ. კონფერენციაში მონაწილეობა  მიიღეს  ახალციხისა  და  ასპინძის  მუნიციპალიტეტის  15  საჯარო  სკოლის   სამოქალაქო კლუბების  წევრებმა და პედაგოგებმა. მომხენებლების უმრავლესობამ   თემები სლაიდების  საშუალებით წარმოადგინეს. კონფერენციის  მიზანს დამხმარე  სახელმძღვანელოების  პოპულარიზაცია და კლუბების  მიერ  ერთმანეთისათვის  გამოცდილების  გაზიარება  წარმოადგენდა.  

კახეთი. არასამთავრობო ორგანიზაცია საქართველოს დემოკრატიულმა ინიციატივამ (GDI) თელავში ორდღიანი ტრენინგი გამართა, რომელიც დისკრიმინაციის აკრძალვის და პირადი ცხოვრების პატივისცემის უფლებას ეხებოდა. პროექტი დაფინანსებულია ნიდერლანდების სამეფოს მთავრობის მიერ. ტრენინგს სკოლის მოსწავლეები და სტუდენტები ესწრებოდნენ და მოისმინეს ისეთი საკითხები, როგორიცაა უფლებების დაცვის მექანიზმები, საერთაშორისო სტანდარტები და შიდა კანონმდებლობა.

თბილისი. 31 იანვარს, თბილისის ადამიანის უფლებათა სახლში იურიდიული ფაკულტეტის სტუდენტებისათვის მასტერკლასი ჩატარდა. ღონისძიება პროექტის - „უფასო იურიდიული დახმარება სოციალურად დაუცველი მოქალაქეებისათვის" - ფარგლებში გაიმართა.  მასტერკლასს უძღვებოდნენ „კონსტიტუციის 42-ე მუხლის" იურისტები, რომლებმაც სტუდენტებს ადმინისტრაციული სამართალწარმოების პროცედურები გააცნეს. წყარო: ორგანიზაციის გვერდი სოციალურ ქსელში

თბილისი.  სამოქალაქო საზოგადოების ინსტიტუტში ონლაინ სწავლების ფარგლებში ლექციათა კურსის ჩაწერა დაიწყო. იგი მოიცავს ისეთ თემებს როგორიცაა: „საჯარო ფინანსების მონიტორინგი", „კვლევის მეთოდები", „ადვოკატირება და ლობირება", „პოლიტიკის ანალიზი". ლექციებს იაგო კაჭკაჭიშვილი, ვაჟა სალამაძე, მიშა ძაგანია და ქეთი მელიქაძე კითხულობენ. ლექციათა კურსი ხელმისაწვდომი იქნება პორტალზე csogeorgia.org

თბილისი. 31 იანვარს, ევროკავშირისა და გაეროს განვითარების პროგრამის მხარდაჭერილი პროექტის ფარგლებში მომზადებული კვლევის პრეზენტაცია გაიმართა. კვლევა - „პოლიტიკური რეკლამა და მისი გავლენა არჩევნებსა და მედიაზე" - საინიციატივო ჯგუფმა ჩაატარა, რომლის შემადგენლობაში შედიან ლაშა ტუღუში, ნათია კუპრაშვილი, ზვიად ქორიძე და ნინო რუხაძე.  სრულად წყარო: media.ge

სამეგრელო. 30 იანვარს, „საერთაშორისო გამჭვირვალობა - საქართველოსა" და ზუგდიდის შოთა მესხიას სახელმწიფო სასწავლო უნივერსიტეტს შორის ურთიერთთანამშრომლობის მემორანდუმი გაფორმდა. დოკუმენტს ხელი უნივერსიტეტის რექტორმა და ორგანიზაციის ზუგდიდის წარმომადგენლობის ხელმძღვანელმა მოაწერეს. მემორანდუმის ხელმომწერთა მიზანია სტუდენტების დახმარება ხარისხიანი იურიდიული განათლების მიღებასა და თვითრეალიზებაში; სტუდენტების სამართლებრივი მართლშეგნების დონის ამაღლება და გამოცდილების გაზიარება და პროფესიული უნარ-ჩვევების ჩამოყალიბების ხელშეწყობა. შოთა მესხიას სახელობის უნივერსიტეტის სტუდენტებს მიეცემათ საშუალება მონაწილეობა მიიღონ ორგანიზაციის მიერ ჩატარებულ სემინარებსა და ტრენინგებში; ასევე, ჩაერთონ „საერთაშორისო გამჭვირვალობა - საქართველოს" სასამართლო მონიტორინგის პროგრამაში. წყარო:ორგანიზაციის გვერდი სოციალურ ქსელში

იმერეთი. 27 იანვარს, ქუთაისის ახალგაზრდული ცენტრის წევრებისათვის ორგანიზება გაუკეთდა სემინარს: „სტიგმა და სტერეოტიპები ეთნიკური უმცირესობების საკითხებთან დაკავშირებით". სემინარს მოწვეული ტრენერი, ფსიქოლოგი ირაკლი ჯულაყიძე უძღვებოდა და მას ცენტრის 32 წევრი დაესწრო. ღონისძიება მიზნად ისახავდა ახალგაზრდებს მიეღოთ ინფორმაცია თუ რა არის ყველაზე კარგი გზა ინტეგრაციისათვის, თუ როგორ უნდა მოხდეს აზროვნების შეცვლა ეთნიკურ უმცირესობებში და ეთნიკურ ქართველებში, როგორ უნდა ვებრძოლოთ სტიგმას და სტერეოტიპებს ეთნიკურ უმცირესობებთან მიმართებაში. სესიის მიმდინარეობისას განიხილეს საკითხები: ეროვნული უმცირესობათა დაცვის (ჩარჩო) კონვენციის 30- ე მუხლი, თვითმყოფადობის დაცვა, განათლების რეფორმა და ეროვნული უმცირესობები, ეროვნული უმცირესობების ინტეგრაცია და სასაზღვრო პრობლემები, მედია საშუალებები და ეროვნული უმცირესობები, ეროვნული უმცირესობები და რელიგია, სამოქალაქო საზოგადოება და რელიგია. წყარო:ორგანიზაციის გვერდი სოციალურ ქსელში

თბილისი. ევროპის სახლში „ჯამპსტარტ ჯორჯია" საზოგადოებრივი ორგანიზაციებისთვის მართავს სემინარს: „მონაცემთა ფერადი კომუნიკაცია". ორგანიზაციის წარმომადგენლები დამსწრეებისთვის ატარებენ სწავლებას ისეთ საკითხებზე როგორიცაა: „ღია მონაცემები ეფექტური კომუნიკაციისთვის", „დიზაინი ეფექტური კომუნიკაციისთვის" და „მონაცემთა ვიზუალიზაცია ადვოკატირებისთვის". სემინარების პარალელურად იმართება გამოფენაც, მონაწილეებს საშუალება აქვთ დაათვალიერონ „ჯამპსტარტ ჯორჯიას" მიერ შექმნილი ვიზუალიზაციები.

იმერეთი. ქუთაისის ახალგაზრდული ცენტრის წევრებისთვის გაიმართა ტრენინგები: „დებატები და საჯარო გამოსვლების ტექნიკები. ტრენინგში მონაწილე ახალგაზრდებმა მიიღეს ინფორმაცია დებატების ტექნიკისა და საჯარო გამოსვლების წესის შესახებ. განიხილეს ისეთი მნიშვნელოვანი საკითხები როგორიცაა: საკამათო თემა, გამოსავალი და მისი ეტაპები, უპირატესობა და მისი ჩამოყალიბება, სპიკერის პასუხისმგებლობა და ა.შ. ტრენინგის დასრულების შემდეგ დაიგეგმა კარლ პოპერის დებატების ტურნირი, რომლის პოლიტიკური რეზოლუცია იქნება: „სახელმწიფოს როლი ეთნიკური უმცირესობების წარმომადგენელთა ინტეგრაციაზე". ტრენინგი გაიმართა საქართველოში ეროვნული ინტეგრაციის გაძლიერების პროექტის ფარგლებში, რომელსაც ახორციელებს საქართველოს გაეროს ასოციაცია, აშშ–ის საერთაშორისო განვითარების სააგენტოს მხარდაჭერით. წყარო: ქუთაისის ახალგაზრდული ცენტრის ვებგვერდი სოციალურ ქსელში

კახეთი. „პატარა და თავისუფალი ბიბლიოთეკა" იქნება წიგნებით სავსე ყუთი, რომელიც განთავსდება წნორის ცენტრალურ სკვერთან ახლოს, ღია ცის ქვეშ და დაეფუძნება პრინციპს – „მოიტანე და წაიღე წიგნი". წნორში მყოფ ნებისმიერ ადამიანს საშუალება ექნება წიგნებით სავსე ყუთიდან აიღოს სასურველი წიგნი, წაიკითხოს ადგილზე ან წაიღოს სახლში იმის სანაცვლოდ, რომ „პატარა ღია ბიბლიოთეკაში" დატოვოს მისთვის საყვარელი წიგნი. სამოქალაქო ინიციატივა ამ ინიციატივაში მონაწილეობას გთავაზობთ. იმისთვის რომ „პატარა თავისუფალი ბიბლიოთეკისთვის" წიგნების ყუთი დამზადდეს საჭიროა 150 ლარი. წნორის „პატარა თავისუფალი ბიბლიოთეკის" შექმნაში მონაწილეობის მსურველებს შეგიძლიათ თანხა გადარიცხოთ „სამოქალაქო ინიციატივა - Civic Initiative”-ს საბანკო ანგარიშზე. GE80LB 01151159259223000 . წყარო: სამოქალაქო ინიციატივის ვებგვერდი სოციალურ ქსელში

თბილისი. 15, 16 და 17 იანვარს კონსულტაციისა და ტრენინგის ცენტრში გაიმართა ტრენინგი: „მსოფლიო ეკონომიკა და მისი ძირითადი პრინციპები". ტრენინგი ჩატარდა სამოქალაქო განათლებისა და პედაგოგთა გადამზადების პროგრამის (ACETT) ფარგლებში კონსულტაციისა და ტრენინგის ცენტრის ორგანიზებით. სამდღიანი ტრენინგი, 26-მა სამოქალაქო განათლების პედაგოგმა გაიარა. წყარო:ორგანიზაციის გვერდი სოციალურ ქსელში

გურია. საქართველოს პარლამენტის ეროვნული ბიბლიოთეკის გენერალური დირექტორი – გიორგი კეკელიძე, ბიბლიოთეკის წარმომადგენლებთან ერთად ოზურგეთში, ანასეულის ხანდაზმულთა სახლს ეწვივნენ. სტუმრებმა სახლის ბინადრებს საჩუქრად 30 ქართულენოვანი წიგნი გადასცეს. ეროვნული ბიბლიოთეკის დირექტორის იდეის შესაბამისად, ხანდაზმულთა სახლში მოეწყო ბიბლიოთეკა, რომლით სარგებლობაც შეეძლება არამხოლოდ სახლის ბინადრებს, არამედ ანასეულის თემის ყველა მაცხოვრებელს. ბიბლიოთეკას ადმინისტრირებას გაუწევს ხანდაზმულთა სახლის მაცხოვრებელი.

თბილისი. არასამთავრობო ორგანიზაცია „ჯამპსტარტ ჯორჯია" 28 იანვარს, ევროპის სახლში მართავს სემინარს: „მონაცემების ფერადი კომუნიკაცია". ორგანიზაცია მიიჩნევს, რომ ვიზუალური მონაცემები ეფექტური კომუნიკაციის საშუალებაა, რომელიც დაეხმარება ყველას აღმოაჩინოს კავშირი ნედლ მონაცემებს, ინფორმაციასა და იმ შეტყობინებებს შორის, რომელსაც ნებისმიერი მონაცემები შეიცავს. 28 იანვარს – მთელი დღის განმავლობაში, ორგანიზაცია გთავაზობთ სემინარებს, რათა დაინტერესებულმა ორგანიზაციებმა უკეთ გამოყენონ მათ ხელთ არსებული მონაცემები. სემინარების შემდეგ გაიმართება გამოფენა, სადაც წარმოდგენილი იქნება „ჯამპსტარტ ჯორჯიას" მიერ შექმნილი ინფოგრაფიკები. ღონისძიებაზე ასევე იქნება გათამაშება. სემინარში მონაწილეობის რეგისტრაციის შემთხვევაში შესაძლებლობა გექნებათ მოიგოთ სახალისო პრიზი, მათ შორის ჩვენი ერთ–ერთი ვიზუალიზაცია. რეგისტრაცია სემინარის განრიგი: 13.00-14.00 საათი. სემინარი თემაზე: „ღია მონაცემები ეფექტური კომუნიკაციისთვის'" 15.00-16.00 საათი. სემინარი თემაზე: „დიზაინი ეფექტური კომუნიკაციისთვის'" 17.00-18.00 საათი. სემინარი თემაზე: „მონაცემთა ვიზუალიზაცია ადვოკატირებისთვის" 19.00-21.00 საათი. „ჯამპსტარტ ჯორჯიას" გამოფენა წყარო: jumpstart.ge

სამცხე-ჯავახეთი. ახალციხის ახალგაზრდული ცენტრის წევრებმა, თანატოლთა განათლების ფარგლებში, ახალგაზრდებს მიაწოდეს ინფორმაცია კარლ პოპერის სტილით დებატების ჩატარების მეთოდის, პრინციპების შესახებ. ღონისძიება ჩატარდა პროექტ "ეროვნული ინტეგრაციის გაძლიერება საქართველოში" ფარგლებში, რომელსაც ახორციელებს საქართველოს გაეროს ასოციაცია (UNAG) საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში